Xwéɖé-Dù Gànáà Mɛ Ɓiè Jɛ̀hóvà

Kà m̀ nyuà cɛ̃́ɛ nɔ̄ bòɖòsóò nìà kɛ múɛɛ, Báɓòɔ̀ ɓéɖé gma vò-vò ɓɛ́ wa mu m̀ kè nì xwéɖé-dùɔ̀ gbo kpáùn wɛ̃. Jɛ̀hóvà mɔ́ ɓɛ́ m̀ ké múàǔn nì. Ɔ cɛ̃ɛ kà ɓɛ́ ɓě dyi ɔ ɓiè jè po kĩ́ín ní, nìí, “ɔ mu ɓě ɖɛ séín ɓě nìà kɛ nyíìn.” (Máfíò 6:33) Ɔ nìɛ̀ mɔ́uń cá ɓɛ́ ɓě ké ɔ ɓǎto jǔ. Nyùìn kpé séín m̀ ɓéɖéɛ kũ̀à mú ɓɛ́ m̀ kè Gèɖèpɔ́ɔ̀ ké ɓǎto jǔ. Ɔ mɔ̀ ɖɛ kpa ɖɛ ɓɛ́ nyɔ ɖò ɓɛ́ìn ɓéɖéɛ kɛ.—Máfíò 22:37, 38.

1 KÙÌN GBO-KPƆ̃ÌN-KPƆ̃ÌN NÌÀ M̀ KÈ JƐ̀HÓVÀ PṸA KƐƐ DYI

ÐƐ BÁƁÒƆ̀ CƐ̃ KƐ MƆ̀: “Ní mu ɓěɛ̀ ɓǎ jǔùn, ké ɓě mu ní dyú-gàà kè dyú-màà ɓě jǔùn,” kǎà Jɛ̀hóvà ɖá. (2 Kɔ̀ɖéíntĩ̀ɔ̀ 6:18) Gèɖèpɔ́ɔ̀ mɔ́ ɓɛ́ m̀ ké ɔ ɓǎto jǔ. M̀ ɓɛ́ìn ɔ bũ̌in xwɛ̃́ìn dyììn ɖé ɓaà-ɓaà mú. Jɛ̀hóvà mɔ́ ɓɛ́ m̀ ké “ɓaà ti séín.” (1 Tɛ̀sàɖónìà 5:17) Ɔ nìɛ̀ mɔ́uń cá ɓɛ́ ɔ ké nì hwìɖǐi-poìn-ɖɛ̀ ɓěɔ̀ ɔ kè nì hwòɖǒ-kpɔ̃-ɖɛ̀ ɓěɔ̀ wɔ̃́. (Fèɖópĩ̀ɔ̀ 4:6) M̀ dyi nì xwéɖé-dùɔ̀ hwìɛ̀ ɓaà ní, nìí, wa muɛ dyéín kà ɓɛ́ Gèɖèpɔ́ɔ̀ mɔ̀ nyɔ jɛ́ɛ́ ɖé m̀ gboɛ.

Sɔ̀ìn ɓó Gèɖèpɔ́ɔ̀ ɓaà-ɓaà gboɛɛ, m̀ ɓéɖé ɓɛ́ m̀ ké ɔ ɖùǔ gbo tò. M̀ ɓɛ́ìn ɖɛ nìà kɛ nyuɛ dyììn ɖé Báɓòɔ̀ ɔ kè Báɓò-cèè-ɖɛ̀ ɓě wuɖuún zà-zà mú. (Wɛ́ɖɛ́ 1:1, 2) Nàìn ɖɛ nì muà cɛ̃́ìn nyɛɛ jè hwìɖǐi. (Wɛ́ɖɛ́ 77:11, 12) Ké ɖeɛɛ, Gèɖèpɔ́ɔ̀ ɖùǔ gbo tò-tò mɔ̀ ɓɛ́ m̀ ké Kɛ́ɖɛ́ì ɖeín-sí-nyɔ̀ ɓěɛ̀ dyí-poìn-poìn ɓě mú nì ti séín.—Wɛ́ɖɛ́ 122:1-4).

Nyɔ tɔ̀ɔ̀ ɓě Jɛ̀hóvà jè gbo cɛ̃-cɛ̃ mɔ̀ ɖɛ kpa ɖɛ ɖekè ɓɛ́ ɔ ké gbo-kpɔ̃ìn-kpɔ̃ìn nìà m̀ kè Jɛ̀hóvà pṹa kɛɛ dyi kùìn. Kà nì muà ɖɛ nìà kɛ nyuùn teeɛɛ, kǎà nì mu ɔ bũ̌in xwɛ̃́ìn.—Máfíò 28:19, 20.

ÐƐ M̀ ƁƐ́ÌN NYUƐ KƐ MƆ̀:

• Ðú ti dyí wé séín ɓɛ́ m̀ ké Báɓòɔ̀ wuɖuún zà, kè ɓɛ́ m̀ ké ɓaà

• Xwéɖé-dùɔ̀ mɛ po ɖɛ ɓě ɓá Gèɖèpɔ́ɔ̀ ɓiè jè dyíɛɛ ɖé múàǔn-po-ɖɛ̀ ɓě kɔ̃in

2 KPÁÌN NÌ XWÉÐÉ-DÙƆ̀ GÈÐÈPƆ́Ɔ̀ ƁIÈ-ƁIÈ MÚÀǓN DYI

ÐƐ BÁƁÒƆ̀ CƐ̃ KƐ MƆ̀: “Ɓě xwɛ̃́ìn Gèɖèpɔ́ɔ̀ bũ̌in, nìí, ɔ mu ɓě mɔ̀ùn bũ̌in xwɛ̃́ìn.” (Jĩ́ìn 4:8) M̀ kɔ̃̀ ɓɛ́ m̀ ké ti dyi sɔ́, nìí, ɓɛ́ m̀ ké nì xwéɖé-dùɔ̀ Gèɖèpɔ́ɔ̀ ɓiè-ɓiè kíɖíí sè tee. (Jɛ́nɛ́sì 18:19) Kɛɛ ɔ seɛ séín. Poìn Gèɖèpɔ́ɔ̀ jè hwìɖǐi ɖé nì nyuu-ɖɛ̀ séín mú. Kùìn gbo-kpɔ̃ìn-kpɔ̃ìn nìà nì xwéɖé-dùɔ̀ kè Gèɖèpɔ́ɔ̀ pṹa kɛɛ dyi dyììn ɖé ɔ jè cɛ̃-cɛ̃ mú ɓó “ti ɓě mu ɖé táún nììn nyɛ, kè ti ɓě mu hwìè xwíníín nàǔn nììn nyɛ, kè ti ɓě mu dyi pɛ̃́ìn nyɛ, ɔ kè ti ɓě mu dyí sɔ̀ùn wɛ̃.” (Dìtɔ̀wáɖánámɛ̀ 6:6, 7) Vɔ̃ ɓɛ́ m̀ ké nì kà Jasúé nì ma kà kɛ. Ɔ cɛ̃ɛ ma ké ɔ ɖá, “Kɛɛ ɔ dyi ḿ kè ḿ níǐn gbǒ-xwíníín-nyɔ̀ ɓěɔ̀ jè jǔǐn, à mu [Jɛ̀hóvà] ɓièìn.”​—Jasúé 24:15.

ÐƐ M̀ ƁƐ́ÌN NYUƐ KƐ MƆ̀:

• Poìn ɖɛ-cɛ̃́-cɛ̃́ ɓɛ́ ɔ ɓɛ́ìn nì gbǒ-xwíníín-nyɔ̀ ɖò-ɖò séín gbo kpáa kɛɛ xwaún ɓɛ́ ɔ ké nì ti séín