CƐ̃́Ɛ́-ÐƐ̀ 07

Nyɛ́ Jɛhova Jù Kɛ́?

Ɔ Dyɛ̀ Sɔ̀à Nɛɛ̀ Kɔ̃ɛ

M̀ dyi Jɛhova Geɖepɔɔ jè hwìɖìi poìn ní, ɖɛ́ dyi m̀ hwìɖìiɛ́? Ɔ gã̀ níì, kɛɛ ɔ tɔ̀mɔ̀ gbo kà dɛ̀nɛ̀ ɓè nìà ɖé dyɔɔ̀ dyíɛɛ nìà kɛɛ̀? Mɔɔ m̀ poìn ɔ jè hwìɖìi kà nyɔ ɓɛ́ ɔ ɓéɖé kpéɛɛ̀, kɛɛ ɔ se kpeɖe ɖò ɓéɖé kà dìì vɛ̀nɛ̀ ɖò nìà kɛɛ̀? Nyɛ́ Jɛhova jù jɛ́ɛ́ cá kɛ́? Ðé ɔ Wuɖu mɔ̀à Baɓoɔ kɛ múɛɛ, Jɛhova tɛ̀mɛ̀ìn ɔ kpeɖe ɓèɔ̀ ɖíɛ́ ɓè, ké ɔ tɛ̀mɛ̀ìn kà ɔ kɔ̃̀ m̀ jè gboɛ.

1. Xwíníínɔ̀ nyɛ́ kɔ̃̀ jè à seà Geɖepɔɔ dyéɛ ɓɛ́ìn nyɛ́?

“Geɖepɔɔ mɔ̀ zùù.” (Jɔ̃́ɔ́ 4:24) Jɛhova se nyɔùn-kpòɖò-dyùà ɓéɖé. Ɔ mɔ̀ zùù, ké ɔ cĩ́ ɖé dyɔún, dɛ̀ ɓɛ́ à seà dyéɛ ɓɛ́ìn nyɛ.

2. Ðɛ́ mɔ̀ Jɛhovaa kpeɖe ɓèɔ̀ ɖíɛ́ ɓè kɛ́?

À se Jɛhova dyéɛ ɓɛ́ìn dyɛo, kɛɛ ɔ mɔ̀ nyɔ jɛ́ɛ́ ɖò, ɓɛ́ ɔ ɓéɖé kpeɖe ɓè ɓɛ́ wa nyu ké nyɔ ɓè ɓɛ́ wa dyuò ɔ dyíɛɛ ɖɛ̀ɓɛ̀ ɔ múɛ. Baɓoɔ ɖá: “[Jɛhova] ɖɛ̀ɓɛ̀ dyí-sɛ́ɖɛ́ìn-ɖɛ̀ mú, ké ɔ se ɔ nyɔ ɓèɔ̀ dyi táà mu.” (Wɛ́ɖɛ́ 37:28) Ké ɖeɛɛ, ɔ “ɓéɖé wìì kè jĩ́á-jè pàɖà” ɓó nyɔ ɓè nì gà dyéɛń nyɛɛ bìì jɛ́ɛ́. (Jĩ́ìn 5:11) “[Jɛhova] xwɛ̃́ìn nyɔ ɓè kɔ̃̀ hwòɖò kpá ɖé ɖeiɛɛ bũ̀in, ké ɔ póìn nyɔ ɓè ɓɛ́ wa se hwòɖò-po-naín ɖò kɔ̃̀ɛ.” (Wɛ́ɖɛ́ 34:18) Kɛɛ, m̀ dyuòɛ̀ kà à nyuu-ɖɛ̀ ɓè jè kpɔ̃ Jɛhova hwòɖò kɛɛ̀? Nyɔ ɓɛ́ ɔ gãa, ɓɛ́ ɔ ké ɖɛ gbà nyuɛɛ po ɔ hwòɖò ɖé ɖei, ké ɔ nyuɛ ké ɔ kpá wììn. (Wɛ́ɖɛ́ 78:40, 41) Kɛɛ, nyɔ ɓɛ́ ɔ nyu ɖɛ sɛ́ɖɛ́ìn dyíɛɛ po ɔ múàùn.—Zà Nɔ́ɔ́ 27:11 wuɖuún.

3. Xwɛ̀ Jɛhova nyuɛ tɛ̀mɛ̀ìn kà ɔ ɖɛ̀ɓɛ̀ à múɛ́?

Jàà kɛɛ, “Geɖepɔɔ mɔ̀ ɖɛ̀ɓɛ̀ìn-ɖɛ̀ɓɛ̀ìn.” (1 Jɔ̃́ɔ́ 4:8) Jɛhova se ɔ ɖɛ̀ɓɛ̀ìn-ɖɛ̀ɓɛ̀ìnɔ̀ tɛ̀mɛ̀ìn ɖé Baɓoɔ mú ɖòùn, kɛɛ ɔ tɛ̀mɛ̀ìn dyììn ɖé ɖɛ ɓè ɔ ɖàà mɛɛ mú ɖekè. (Zà Àpɔ́sò 14:17 wuɖuún.) Poìn kà ɔ nyu à mɛɛ kɛɛ jè hwìɖìi. Ɔ mɛ à, ɓɛ́ à ké dyéɖé nɔ̀mɔ̀ kɔ̃in kò-kò ɓè dyéɛ ɓɛ́ìn, kè ɓɛ́ à ké wɛ́ɖɛ́ nɔ̀mɔ̀ dyíin ɓè wɔ̃́ɔ ɓɛ́ìn, ɔ kè ɓɛ́ à ké ɖii-ɖɛ̀ nɔ̀mɔ̀ wɔ̃ ɓè wɔ̃ dɔ̃̀ɔ̀ ɓɛ́ìn. Ɔ mɔ́ ɓɛ́ à ké fɛ̀ɛ̀ múàùn dyi kpáìn.

ÐE ÐƐ MÚIN CÁ

Cɛ̃́ ɖɛ Jɛhova nyùìn kũ̀à mú ɓɛ́ ɔ ké dĩ́ín-dĩ̀ìn-ɖɛ̀ ɓè nyuɛɛ jè. Nìí, dyé kà Jɛhova nyu ɔ kpeɖe nɔ̀mɔ̀ dyíin ɓèɔ̀ da zàà kè kà ɔ nyu wa tɛ̀mɛ̀ìn nyɛ.

4. Zùù hwɛ̀in-hwɛ̀in—Geɖepɔɔ kũ̀à-mú-nyùìn-kpèɔ̀

Fótò poìn dyí: Ðɛ ɓè ɓɛ́ Geɖepɔɔ zùù hwɛ̀in-hwɛ̀inɔ̀ nyuɛ. 1. Ɓóɖó-kpàà kè dyɔɔ̀. 2. Baɓo céè-nyɔ̀ ɖò nì Geɖepɔɔ hwìɖìi-poìn-ɖɛ̀ ɓè céèɛ̀n ɓó céè-ɖɛ̀-mì páɖá-páɖá ɖò kɔ̃.

Kà à nyùàìn à sɔ̃ ɓèɔ̀ kũ̀à mú ɓó kũ̀à ɖò nyu jèɛɛ, kàà Jɛhova nyùìn ɔ zùù hwɛ̀in-hwɛ̀inɔ̀ kũ̀à mú ɓó kũ̀à nyu jè. Baɓoɔ tɛ̀mɛ̀ìn kà ɓɛ́ zùù hwɛ̀in-hwɛ̀inɔ̀ se nyɔ kɛ, kɛɛ ɔ mɔ̀ kpé ɓɛ́ Jɛhova nyùìn kũ̀à mú ɓɛ́ ɔ ké ɖɛ ɓè nyuɛ. Zà Ðúù 11:13 kè Àpɔ́sò 2:17 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Geɖepɔɔ mu ɔ zùù hwɛ̀in-hwɛ̀inɔ̀ nyɔ séín ɓɛ́ wa zɔ̀ìn ɔ kɛɛ “kɔ̃ púèìn.” Nìí, nì hwòɖò ɖá zùù hwɛ̀in-hwɛ̀inɔ̀ mɔ̀ nyɔɔ̀ mɔɔ ɔ mɔ̀ Geɖepɔɔ kũ̀à-mú-nyùìn-kpèè? Xwíníínɔ̀ nyɛ́ kɔ̃̀ jè m̀ ɖáà ná kɛ́?

Jɛhova nyùìn ɔ zùù hwɛ̀in-hwɛ̀inɔ̀ kũ̀à mú, ɓɛ́ ɔ ké dĩ́ín-dĩ̀ìn-ɖɛ̀ ɓè nyu. Zà Wɛ́ɖɛ́ 33:6 kè 2 Píɖɛ̀ 1:20, 21 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Ðɛ́ mɔ̀ hwìè ɖíɛ́ ɓè kɔ̃̀ mú ɓɛ́ Jɛhova ɖà ɔ zùù hwɛ̀in-hwɛ̀inɔ̀ kũ̀à mú nyùìn nyɛ́?

5. Jɛhova ɓéɖé kpeɖe nɔ̀mɔ̀ dyíin ɓè

Mózè mɔ̀ ma Geɖepɔɔ ɓiè-nyɔ̀ ɖò ɓɛ́ nyɔ ɓɛ́ìn hwòɖò kɔ̃ dèɛ̀ kɛ. Kɛɛ, ɔ mɔ́ ɓɛ́ ɔ ké ma ɔ Mɛ-nyɔ̀ɔ̀ dyí dyuò nɔ̀mɔ̀ dyíin. Ɔ jèɛɛ, Mózè cɛ̃ɛ ma, ké ɔ ɖá: “Zàìn ḿ nì hwòɖòɛ̀-gbɔ-po-ɖɛ̀ ɓèɔ̀ da, nìí, ɓɛ́ ḿ ké nì kũ̀à nyu.” (Ɛ́séɖɔ̀ 33:13) Jɛhova jù ma Mózè gɔ̃̀, ké ɔ zàìn ma Ɔ kpeɖe ɓèɔ̀ ɖíɛ́ ɓè Mózè da. Zà Ɛ́séɖɔ̀ 34:4-6 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Jɛhovaa kpeɖe ɓèɔ̀ nyɛ́ ɔ zàìn ma Mózè da kɛ́?
Jɛhovaa kpeɖe ɓèɔ̀ nyɛ́ nɔ̀mɔ̀ m̀ hwìɖìi jɛ́ɛ́ cá kɛ́?

6. Jɛhova kɔ̃̀ nyɔ ɓè jè gbo

Geɖepɔɔ nyɔ ɓè mɔ̀ ma kà Híìbúɖúù-nyɔ̀ ɓèɔ̀ kɛɛ mɔ̀ ma gìì ɓè ɖé Íjè-ɓòɖòɔ̀ kɔ̃. Xwɛ̀ waà gà-dyé-dyéɔ̀ nyu ma Jɛhova hwòɖòɔ̀ nyuɛ kɛ́? Po KPƆ̃Ɔ-WÙÐÙƆ̀ kũ̀à gbo, ɓɛ́ m̀ kéɛ kíɖíí sí, mɔɔ zà Ɛ́séɖɔ̀ 3:1-10 wuɖuún. Nìí, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.

KPƆ̃Ɔ-WÙÐÙ: Jɛhova Kɔ̃̀ Ma Wa Gà-Dyé-Dyéɔ̀ Jè Gbo (2:45)

Ðɛ́ nɔ́ɔ́ nìà kɛ cɛ̃ m̀ gbo ɓá kà Jɛhova hwòɖò nyu nìɛ̀ ɓá nyɔùn gà dyé jè dyíɛ́?—Dyé ɔ vɔ̀sì 7 kè 8.
Nì hwòɖò ɖá Jɛhova mɔ́ ɓɛ́ ɔ ké nyɔùn gbo kpá jàà cáà, ké ɔ ɓɛ́ìn nyuɛɛ̀? Xwíníínɔ̀ nyɛ́ kɔ̃̀ jè ɔ nìà ná mɔɔ ɔ seà ná nì kɛ́?

7. Mɛɛ-ɖɛ̀ ɓè tɛ̀mɛ̀ìn Jɛhovaa kpeɖe ɓèɔ̀

Poìn dyí: Zimii vɛ̀nɛ̀ ɖò kè ɔ dyú kè cu-bùè ɓè ɔ kè nàa ɖò.

Jɛhova tɛ̀mɛ̀ìn ɔ kpeɖe ɓèɔ̀ dyììn ɖé ɖɛ ɓè ɔ ɖàà mɛɛ mú. Po VÍÐÒƆ̀ kũ̀à gbo. Nìí, zà Wóɖómà 1:20 wuɖuún, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.