CƐ̃́Ɛ́-ÐƐ̀ 22
Xwɛ̀ M̀ Ɓɛ́ìn Bɔ̃̀ Nɔ̀mɔ̀ Dyíinɔ̀ Nyɔ Tɔ̀ɔ̀ Ɓè Gbo Cɛ̃ɛ Kɛ́?
Kà nì muà Baɓoɔ jàà-ɖɛ̀ ɓè cɛ̃́ɛ níìn nyɛɛ, m̀ ɓɛ́ìn dyɛ̀ hwìɖìi poɛ̀n, ‘Nyɔ séín kɔ̃̀ wa ké ɖɛ nìà kɛ jè dyuò!’ Ɔ mɔ̀ jàà kà nyɔ séín kɔ̃̀ wa ké ɖɛ nìà kɛ jè dyuòɛ! Kɛɛ, m̀ ɓɛ́ìn dyɛ̀ fãa peɖeɛ ɓɛ́ m̀ ké ɖɛ m̀ nìà cɛ̃́ɛń nyɛɛ nyɔ tɔ̀ɔ̀ ɓè gbo cɛ̃. Ɓèà dèìn kà m̀ ɓɛ́ìn fãa-peɖe-peɖe nìà wɛ wɔ̃ ziɛ ɓɛ́ m̀ ké bɔ̃̀ nɔ̀mɔ̀ dyíinɔ̀ nyɔ tɔ̀ɔ̀ ɓè gbo cɛ̃ɛ ɖé múà múɛɛ jè dɔ́ɔ́ kɔ̃in.
1. Xwɛ̀ m̀ ɓɛ́ìn ɖɛ ɓè m̀ ɖàà cɛ̃́ɛ nyɔ ɓè m̀ dyuò dyíɛɛ gbo cɛ̃ɛ kɛ́?
Jízɛ̀ɛ̀ ɖeín-nà-nyɔ̀ ɓèɔ̀ cɛ̃ɛ ma, ké wa ɖá: “Ðɛ ɓè ɓɛ́ à ɖà dyéɛ kè ɖɛ ɓè à ɖà wɔ̃́ɛɛ, à seɛ cɛ̃ɛ ɓɔ́ɔ ɓɛ́ìn.” (Àpɔ́sò 4:20) Wa ɖɛ̀ɓɛ̀ ma jààɔ̀ mú mìɔ jèɛɛ, wa mɔ́ wa kéɛ ma nyɔ séín gbo cɛ̃. Kà nì hwòɖòɔ̀ nì ɖekèè? Ɔ dyi ná nììn, mɔ́ hwìè dyi, ɓɛ́ m̀ ké ɖɛ m̀ ɖàà cɛ̃́ɛ nì xwéɖé-dù kè ɓàto ɓè gbo cɛ̃ ɖé kpéín-dyé-dyé mú.—Zà Kɔ̀ɖɔ́sĩ̀à 4:6 wuɖuún.
Hwìè ɖíɛ́ ɓè kɔ̃̀ mú m̀ ɓɛ́ìn gbɔ dèɛ̀ kɛ
M̀ kè nì ɓíɖí-gbò-xwíníín-nyɔ̀ ɖò dyi wùɖùɛ̀n nììn, cɛ̃ Baɓo cɛ̃́ɛ́-ɖɛ̀ ɖò jè kà kɛ: “Ḿ cɛ̃́ ma ɖɛ nɔ̀mɔ̀ dyíin ɖò wíkì nìà kɛ xwíníín.”
Tɛ̀mɛ̀ìn Baɓo vɔ̀sì ɖò nì ɓàto ɖò ɓɛ́ ɔ gbàìn hwòɖò dyií mɔɔ ɔ nì wɛ́ɛń nyɛɛ dyí.
Nì kũ̀à-nyu-mùè ɓè dyi m̀ dyi diè ɓó kà wíkìɔ̀ nì ma ɓó m̀ bììɛɛ ní, nìí, cɛ̃ ɖɛ ɖò m̀ cɛ̃́ ma ɖé nì Baɓo-cɛ̃́-cɛ̃́ɔ̀ mɔɔ dyí-poìn-poìn ɖò múɛɛ jè wa gbo.
Tɛ̀mɛ̀ìn nì ɓàto ɓè jw.org pàɔ̀ dyí.
Ðá nyɔ tɔ̀ɔ̀ ɓè ɓɛ́ wa ké nì Baɓo-cɛ̃́-cɛ̃́ɔ̀ múin gã̀, mɔɔ tɛ̀mɛ̀ìn wa kà wa ké ɖò jè ɖoɓoɛ nyu ɖé jw.org kɔ̃ɛ.
2. Xwíníínɔ̀ nyɛ́ kɔ̃̀ jè à kè dyí-poìn-kpòòɔ̀ Geɖepɔɔ-wùɖù-wáɖá-wáɖá mɔ̀à dyí-sɔ́-ɖɛ̀ nɔ̀mɔ̀ dyíin nyɛ́?
Jízɛ̀ɛ̀ ɖeín-nà-nyɔ̀ ɓèɔ̀ se ma bɔ̃̀ nɔ̀mɔ̀ dyíinɔ̀ cɛ̃ ɖòùn pu ɖé nyɔ ɓè wa dyuò dyíɛɛ gbo. Jízɛ̀ “ɖoɓo ma wa sɔ̃́-sɔ̃́ ɖé ɔ dyúa, ɖé hwɔɖɔ séín ɔ kè dà séín ɓɛ́ ɔ mìɔùn mu ma mùìn nyɛ,” ɓɛ́ wa ké ma Geɖepɔɔ-wùɖùɔ̀ wáɖá. (Ðúù 10:1) Geɖepɔɔ-wùɖù-wáɖá-kũ̀à nì páún nìà wɛ nyuɛ ké nyɔ ɓáún-ɓáún wɔ̃́ ma bɔ̃̀ nɔ̀mɔ̀ dyíinɔ̀. Ðeín-nà-nyɔ̀ ɓèɔ̀ kè waà múè ɓè Geɖepɔɔ-wùɖù-wáɖá-wáɖáɔ̀ po ma wa múàùn ɖekè. (Ðúù 10:17) Nì muɛ mɔ́ùn ɓɛ́ m̀ kéɛ dyí sɔ́, ɓɛ́ m̀ kè ɖíí ɓèɔ̀ ké Geɖepɔɔ-wùɖùɔ̀ wáɖáà?
ÐE ÐƐ MÚIN CÁ
Cɛ̃́ kà m̀ ɓɛ́ìn fãa-peɖe-peɖe wɔ̃ ziɛ nyuɛ, ɓɛ́ m̀ ké múà ɓɛ́ ɔ sɔ̀ìn ɖé bɔ̃̀ nɔ̀mɔ̀ dyíinɔ̀ jè cɛ̃-cɛ̃ múɛɛ ɖò ɓéɖéɛ.
3. Jɛhova mu ɓó m̀ gbo nììn
Nyɔ ɖíɛ́ ɓè ɓɛ́ wa mɔ́ wa ké bɔ̃̀ nɔ̀mɔ̀ dyíinɔ̀ wáɖáa ɓɛ́ìn fãa peɖeɛ ɓá kà nyɔ ɓè mu wa dya gmɔ̀ùn wɛ̃ mɔɔ kà wa mu wa kpɔ̃ɔ nyuùn wɛ̃ɛ jè dyí.
M̀ peɖe fãa ɓó ɖɛ m̀ ɖàa cɛ̃́ kɛɛ nyɔ tɔ̀ɔ̀ ɓè gbo cɛ̃ jèè? Xwíníínɔ̀ nyɛ́ kɔ̃̀ jè ɔ nìà ná mɔɔ ɔ seà ná nì kɛ́?
Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.
Xwɛ̀ nyɔ gmɔ̀ ɓè nìà kɛ nyu ma fãa-peɖe-peɖe wɔ̃ ziɛ kɛ́?
Zà Àzédyà 41:10 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Ɔ jù ké m̀ dyi fɛ̃̀ìn ɓó Geɖepɔɔ-wùɖùɔ̀ wáɖá jè ní, xwɛ̀ ɓaà-ɓaà mu m̀ gbo kpáùn wɛ̃́?
M̀ dyuòɛ̀ ma dyíì,
kà Jɛhova Zàse ɓáún-ɓáún poɛ̀n ma hwìɖìi kà wa se ma bɔ̃̀ nɔ̀mɔ̀ dyíinɔ̀ nyɔ tɔ̀ɔ̀ ɓè gbo cɛ̃ɛ ɓɛ́ìn mu fɔɔ kɛɛ̀? Ɔ hwɔìn-kà, Sɛ̀ɛ̀géè poɛ̀n ma hwìɖìi kà ɔ se ma ɖɛ kpa, ké ɔ se ma wùɖùɛ̀ dyuòɛ. Kɛɛ, ɔ cɛ̃́ ma Baɓoɔ. Ɔ ɖá: “Ḿ peɖe ma fãa dyɛo, kɛɛ ḿ ɖú ma nyɔ tɔ̀ɔ̀ ɓè gbo wùɖù kpàì ɓá ɖɛ ḿ nì ma cɛ̃́ɛń nyɛɛ jè dyí. Ɔ gìnììn ma ḿ dyi kà nyɔ tɔ̀ɔ̀ ɓè Baɓoɔ jè gbo-cɛ̃-cɛ̃ po ma ḿ kpéíɛ. Ɔ kùìn ma ní hwìɖìì-taɓa-taɓaɔ̀ dyi ɖekè.”
4. Dyé nyɔ ɓè kpéín
Ɔ jù ké m̀ dyi bɔ̃̀ nɔ̀mɔ̀ dyíinɔ̀ nyɔ ɖò gbo cɛ̃ɛń níìn, ɓɔ́ ɖɛ m̀ muà cɛ̃ìn nyɛɛ ɖòùn jè hwìɖìi poɛ̀n, kɛɛ m̀ mɛ poìn kà nì muɛ cɛ̃ìn nyɛɛ jè hwìɖìi ɖekè. Zà 2 Tímétè 2:24; kè 1 Píɖɛ̀ 3:15, 16 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
M̀ dyi nyɔ tɔ̀ɔ̀ ɓè gbo wùɖùɛ̀n nì ɓá Baɓoɔ jè dyí ní, xwɛ̀ m̀ ɓɛ́ìn vɔ̀sì ɓè nìà kɛ kũ̀à mú nyuɛ̀n nyɛ́?
Nì gbò-xwíníín-nyɔ̀ kè ɓàto ɖíɛ́ ɓè se ɖɛ nì muà cɛ̃ìn nyɛɛ gbo wɔ̃́ìn mu. Ðɛ́ m̀ ɓɛ́ìn nyuɛ kɛ́? Ðɛ́ m̀ mɛ ɓɔ́ nyuɛ kɛ́?
Xwíníínɔ̀ nyɛ́ kɔ̃̀ jè ɔ nɔ̀mɔ̀à dyíin ɓɛ́ à ké ɖɛ dyi diè kpéín-dyé-kà, ké ɔ zi ɖɛ ɓè nyɔ ɓè kɔ̃̀ wa ké jàà poɛɛ jè wa gbo cɛ̃-cɛ̃ dyíɛ́?
5. Bɔ̃̀ nɔ̀mɔ̀ dyíinɔ̀ jè cɛ̃-cɛ̃ po nyɔ múàùn
Jɛhova nyí ma Jízɛ̀ bɔ̃̀ nɔ̀mɔ̀ dyíinɔ̀ cɛ̃ kũ̀à. Xwɛ̀ Jízɛ̀ nyu ma kũ̀à nìà wɛ dya gmɔ̀ɔ̀ kɛ́? Zà Jɔ̃́ɔ́ 4:34 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
Ðii-ɖɛ̀ nɔ̀mɔ̀ dyíin ɖi-ɖi nyuɛ ké à cĩ́, ké ɔ po à múàùn. Xwíníínɔ̀ nyɛ́ kɔ̃̀ jè Jízɛ̀ poìn ma Geɖepɔɔ mɔ́ɔ́-ɖɛ̀ nyu-nyu ɓɛ́ ɔ ɖò mɔ̀à bɔ̃̀ nɔ̀mɔ̀ dyíinɔ̀ cɛ̃-cɛ̃ kɛɛ ɖii-ɖɛ̀ ɖi-ɖi dyíɛ́?
Ní hwòɖò ɖá múàɔ̀ nyɛ́ ɓɛ́ìn bɔ̃̀ nɔ̀mɔ̀ dyíinɔ̀ cɛ̃-cɛ̃ mú sɔ̀ìn nyɛ́?
Fɔ̀nɔ̀-hwòɖò ɓè
Ðé dyí-poìn-poìn nìà wíkìɔ̀ hwìɛ̀n nyɛ múɛɛ, mɔ́ hwìè ɓè kɔ̃̀ mú m̀ ɓɛ́ìn dɔ́ɔ́ gbɔ dèɛ̀ kɛɛ dyi.
Vɔ̃ ɓɛ́ m̀ ké súkúù wa ɓéɖéà ɖé wíkìɔ̀ hwìɛ̀n dyí-poìn-poìnɔ̀ múɛɛ kɔ̃ nì. Súkúùɔ̀ kɔ̃ nì-nì ɓɛ́ìn m̀ gbo kpáa, ɓɛ́ m̀ ké naɓaà nɔ̀mɔ̀ dyíin ɓó ɖɛ m̀ nìà cɛ̃́ɛń nyɛɛ nyɔ tɔ̀ɔ̀ ɓè gbo cɛ̃ jè.
Nyùìn céè-ɖɛ̀ nìà kɛ wáká mɔ̀à “Nyɔ Ðíɛ́ Ɓè Ðá” mɔɔ “Nyɔ Ðò Ɓɛ́ìn Níiń” nyɛɛ kũ̀à mú, ɓɛ́ m̀ ké kà m̀ ké dyi-diè-ɖɛ̀ ɓè kè ɖɛ tɔ̀ɔ̀ ɓè gɔ̃̀ jùɛ nyuɛɛ cɛ̃́.
NYƆ ÐÒ ƁƐ́ÌN NÍIŃ: “À wɔ̃́ ɖé m̀ gboe?”
Xwɛ̀ m̀ ɓɛ́ìn ti nìà kɛ kũ̀à mú nyùɛ̀n, ɓɛ́ m̀ ké ɖɛ ɓè m̀ ɖà cɛ̃́ ɖé nì Baɓo-cɛ̃́-cɛ̃́ɔ̀ múɛɛ jè nyɔɔ̀ gbo cɛ̃ kɛ́?
SṸÌN-XWÍNÍÍN
Bɔ̃̀ nɔ̀mɔ̀ dyíinɔ̀ nyɔ tɔ̀ɔ̀ ɓè gbo cɛ̃-cɛ̃ dyà múà, ké ɔ gbɔ-dè-dè ɓɛ́ìn xwa fɛ̃́ɛ̀n cá.
Ðɛ-kɔ̃in-kpa-kpa
Xwíníínɔ̀ nyɛ́ kɔ̃̀ jè m̀ mɛ cɛ̃à bɔ̃̀ nɔ̀mɔ̀ dyíinɔ̀ nyɔ tɔ̀ɔ̀ ɓè gbo kɛ́?
Xwɛ̀ m̀ ɓɛ́ìn náa nyuɛ ɖé kpéín-dyé-dyé múɛ́?
Xwɛ̀ m̀ ɓɛ́ìn fã̀à séín ɖò ɓá Geɖepɔɔ-wùɖùɔ̀ wáɖá jè dyíɛɛ wɔ̃ ziɛ kɛ́?
CƐ̃́ ÐƐ PÀÐÀ
Cɛ̃́ hwìè hĩinyɛ ɓè kɔ̃̀ mú m̀ ɓɛ́ìn bɔ̃̀ nɔ̀mɔ̀ dyíinɔ̀ nyɔ ɓè gbo cɛ̃ɛ dyììn ɖé jw.org kɔ̃́tàkáàɔ̀ kũ̀à-mú-nyùìn-nyùìn múɛ.
Cɛ̃́ kpeɖe hĩinyɛ ɓè ɓɛ́ wa ɓɛ́ìn m̀ gbo kpáa, ɓɛ́ m̀ ké bɔ̃̀ nɔ̀mɔ̀ dyíinɔ̀ nyɔ tɔ̀ɔ̀ ɓè gbo cɛ̃ kɛɛ jè.
“M̀ Ðà Ti Dyé Ɓɛ́ M̀ Ké Nyɔùn Kpɔ̃ Kà Nyɔ Kpɔ̃à Zimii Nyɛɛ̀?” (Dyí-Gmɔ̀ìn-Gbò-Cèè-Ðɛ̀ɔ̀, Dìù 2020)
Dyé dyí-tɛ̀mɛ̀ìn-ɖɛ̀ ɖò nì ɖé Baɓoɔ mú ɓɛ́ ɔ ɓɛ́ìn à dyi kùɛ̀n, ɓɛ́ à ké bɔ̃̀ nɔ̀mɔ̀ dyíinɔ̀ cɛ̃ kɛbì à mɛ mɔ̀ nyɔ gmɔ̀ kɛɛ dyi.
Dyé kà m̀ ɓɛ́ìn nì gbò-xwíníín-nyɔ̀ ɖò ɓɛ́ ɔ séè Jɛhova jè cɛ̃́ ɖòɛɛ gbo wùɖùɛ̀n ɓá Baɓoɔ jè dyíɛ.