Xwɛ̀ Jízɛ̀ɛ̀ Mɛ́-Mɛ́ɔ̀ Ɓɛ́ìn À Póɛ̀n Nyɛ́?

À nyu nàmàùn, ké à dyé gà, ké à mɛ́, sepoɛɖe gàa kè màa kĩ́ín-kĩ́ín mɔ̀ ma Áɖɔ̀ùn kè Íì kɛɛ se ma Geɖepɔɔ wuɖu nyu jè.a Kɛɛ, à jè se ɓó sèìn. Jɛhova ɖà hwìè ɖò kaà, ɓɛ́ ɔ ké à gboò-wùɖù mɔ̀à nàmàùn kè gĩɔ kɛɛ xwaún póìn dyììn ɖé ɔ Dyú-gàà Jízɛ̀ Kɛ́ɖɛ́ì mú. Baɓoɔ tɛ̀mɛ̀ìn kà ɓɛ́ Jízɛ̀ jù ma mú-gbààìn-ɖɛ̀ dyììn ɖé ɔ mɛ́-mɛ́ɔ̀ múɛ. Mú-gbààìn-ɖɛ̀ mɔ̀ ɖɛ ɓɛ́ wa pɛ́ɛ̀ ɓɛ́ wa ké nyɔ ɖò gbàà kɛ. Ðɛ ɓɛ́ Jízɛ̀ pɛ́ɛ̀ ma kɛɛ mɔ̀ ɖɛ ɔ nyɔùn fɛ̀ɛ̀ se kɛɛ ɖò ɓéɖéɛ kpa kɛ. (Zà Máfíò 20:28 wuɖuún.) Ti Jízɛ̀ zà ma ɔ sè-ná-sèɛ̀ fɛ̀ɛ̀ ɔ kɔ̃̀ ɔ ké ma ɓéɖé dà ɓóɖó-kpàà kɔ̃ɛ xwáɖáún wɛ̃ɛ, ɔ kaà ma hwìèɔ̀, ɓɛ́ à ké ɖɛ séín ɓɛ́ Áɖɔ̀ùn kè Íì sè ma xwáɖáún wɛ̃ɛ ɖe dyé. Jízɛ̀ tɛ̀mɛ̀ìn ma ɖekè kà ɔ kè Jɛhova ɖɛ̀ɓɛ̀ à mú mìɔ kɛ. Cɛ̃́ɛ́-ɖɛ̀ nìà kɛ mu à gbo kpáùn, ɓɛ́ à ké Jízɛ̀ɛ̀ mɛ́-mɛ́ɔ̀ jè múàùn dyi kpáìn mìɔ.

1. Xwɛ̀ à ɓɛ́ìn Jízɛ̀ɛ̀ mɛ́-mɛ́ɔ̀ kpáná kɔ̃ún dyéɛ zɛ̃̀ɛ̀ kɛ́?

Sepoɛɖe à mɔ̀ nàmàùn-nyɔ̀ ɓè jèɛɛ, à nyu ɖɛ pàɖà ɓè ɓɛ́ wa se Jɛhova hwìɖìi dèɛ. Kɛɛ, ɔ jù ké à dyi wììn kpá ɓó à nàmàùn ɓèɔ̀ jè, ké à dyi Jɛhova ɓaà dyììn ɖé Jízɛ̀ mú ɓɛ́ ɔ ké à kɔ̃in zĩ̀ìn, ké à dyi vɔ̃, ɓɛ́ à ké se ɖɛ ɓèa ɖò nyu ɖe ní, nìí, gbo-kpɔ̃in-kpɔ̃in mu à kè Geɖepɔɔ pṹa nììn. (1 Jɔ̃́ɔ́ 2:1) Baɓoɔ ɖá: “Kɛ́ɖɛ́ì mìɔùn mɛ́ ma ɓó nàmàùn ɓè jè dyúáɖò. Ɔ mɔ̀à dyí-sɛ́ɖɛ́ìn-nyɔ̀ɔ̀ kɛɛ, ɔ mɛ́ ɓó nyɔ ɓè seà dyí-sɛ́ɖɛ́ìn-nyɔ̀ ɓè kɛɛ jè, ɓɛ́ ɔ ké à Geɖepɔɔ gbo dyà.”—1 Píɖɛ̀ 3:18.

2. Xwɛ̀ à ɓɛ́ìn Jízɛ̀ɛ̀ mɛ́-mɛ́ɔ̀ kpáná kɔ̃ún dyéɛ ɖé dyúa kɛ́?

Jɛhova ɖoɓo ma Jízɛ̀, ɓɛ́ ɔ ké ɔ nyɔùn fɛ̀ɛ̀ se kɛɛ ɖò ɓéɖéɛɛ tò, “ɓɛ́ nyɔùn séín mu [Jízɛ̀] hwìɖìì taɓaùn wɛ̃ɛ ké se mɛ́, kɛɛ wa ké sè-ná-sèɛ̀ fɛ̀ɛ̀ ɓéɖé.” (Jɔ̃́ɔ́ 3:16) À po Jízɛ̀ zùo ɓó ɖɛ ɔ nyuà kɛɛ jè. Jɛhova mu ɖɛ gbà séín ɓɛ́ Áɖɔ̀ùnɛ̀ wuɖu-ɖùù-dyi-zà-zàɔ̀ nyu ké ɔ kpá kɛɛ jè dyi zĩ̀ìn kàùn. Ɔ xwíníín mɔ̀, ɔ jù ké à dyi Jízɛ̀ɛ̀ mɛ́-mɛ́ɔ̀ jè hwìɖìì taɓaín, à mu fɛ̀ɛ̀ múàùn dyi kpáìn ɓɛ́ìn ɓó sè-ná-sèɛ̀ tiín ɖé páɖédà mú dà ɓóɖó-kpàà kɔ̃!—Àzédyà 65:21-23.

ÐE ÐƐ MÚIN CÁ

3. Jízɛ̀ɛ̀ mɛ́-mɛ́ɔ̀ póìn à nàmàùn kè gĩɔ xwaún

VÍÐÒ: Xwíníínɔ̀ Nyɛ́ Kɔ̃̀ Jè Jízɛ̀ Mɛ́à Kɛ́?—Wáká 1 (2:01)

• Ðɛ́ Áɖɔ̀ùn sè ma xwáɖáún ti ɔ zà ma Geɖepɔɔ wuɖu ɖùù dyiɛ́?

Zà Wóɖómà 5:12 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Ðɛ́ Áɖɔ̀ùnɛ̀ nàmàùnɔ̀ ɖà nì cĩ́-cĩ́ɔ̀ bũ̀ nyuɛ́?

Zà Jɔ̃́ɔ́ 3:16 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwíníínɔ̀ nyɛ́ kɔ̃̀ jè Jɛhova ɖoɓo ma ɔ Dyu-gààɔ̀ ɓóɖó-kpàà kɔ̃ɛ́?

1. Áɖɔ̀ùn mɔ̀ ma gàa se kɛɛ ɖò ɓéɖé ɓɛ́ ɔ zà ma Geɖepɔɔ wuɖu ɖùù dyi, ké ɔ nyu ké nàmàùn kè gĩɔ dyi nyɔùn-dyù kɔ̃ɛ

2. Jízɛ̀ mɔ̀ ma gàa se kɛɛ ɖò ɓéɖé ɓɛ́ ɔ nyu ma Geɖepɔɔ wuɖu, ké ɔ nyu ké nyɔùn-dyù ɓɛ́ìn mú hwɛ̀ɛ̀, ɓɛ́ wa ké cĩ́ kánáá puɛ

4. Jízɛ̀ɛ̀ mɛ́-mɛ́ɔ̀ ɓɛ́ìn nyɔ séín kpáná dyí nyuɛ

VÍÐÒ: wíníínɔ̀ Nyɛ́ Kɔ̃̀ Jè Jízɛ̀ Mɛ́à Kɛ́?—Wáká 2 (2:00)

• Xwɛ̀ nyɔ-kpò dyúáɖòɛ̀ mɛ́-mɛ́ ɓɛ́ìn nyɔ séín kpáná dyí nyuɛ kɛ́?

Zà 1 Tímétè 2:5, 6 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Áɖɔ̀ùn mɔ̀ ma gàa se kɛɛ ɖò ɓéɖé ɓɛ́ ɔ nyu ké nàmàùn kè gĩɔ dyi nyɔùn-dyù kɔ̃ɛ. Jízɛ̀ mɔ ma gàa se kɛɛ ɖò ɓéɖéɛ ɖekè. Xwɛ̀ ɔ nyu ma ɔ mìɔùn tòɛ̀, “ɓɛ́ ɔ kéɛ nyu ɓɛ́ nyɔùn séín ké gbàà” kɛ́?

5. Mú-gbààìn-ɖɛ̀ɔ̀ mɔ̀ Jɛhovaa nyíí-ɖɛ̀ ɖé m̀ gbo

Jɛhovaa ɓàto ɓè gmɔ̀ mú-gbààìn-ɖɛ̀ɔ̀ dya kà ɔ mɔ̀ nyíí-ɖɛ̀ ɓó wa bìì jɛ́ɛ́ kɛ. Ɔ hwɔìn-ɖɛ̀ ɖò kɛà kɛ̀. Zà Gàɖézìà 2:20 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwɛ̀ àpɔ́sò Pɔ́ɔ̀ nyuɛ ma tɛ̀mɛ̀ìn kà ɔ gmɔ̀ mú-gbààìn-ɖɛ̀ɔ̀ dya kà ɔ mɔ̀ ma nyíí-ɖɛ̀ ɓó ɔ bìì jɛ́ɛ́ kɛ́?

Ti Áɖɔ̀ùn nyu ma nàmàùn wɛ̃ɛ, gĩɔ dyi ma ɔ kè ɔ dyú séín ɓèɔ̀ kɔ̃. Kɛɛ, Jɛhova ɖoɓo ma ɔ Dyú-gààɔ̀, ɓɛ́ ɔ ké ma mɛ́, ɓɛ́ m̀ ké fɛ̀ɛ̀ múàùn dyi kpáìn ɓɛ́ìn ɓó sè-ná-sèɛ̀ tiín.

Kà nì muà vɔ̀sì ɓè nìà kɛ wuɖuún zàùn wɛ̃ɛ, nàìn kà Jɛhova hwòɖò nyu ma nìɛ̀ ti ɔ Dyú-gààɔ̀ dyé ma gà kɛɛ jè hwìɖìi. Zà Jɔ̃́ɔ́ 19:1-7, 16-18 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwɛ̀ nì hwòɖòɔ̀ nyu nìɛ̀ ɓá ɖɛ Jɛhova kè Jízɛ̀ nyuà m̀ bììɛɛ jè dyíɛ́?

SṸÌN-XWÍNÍÍN

Jízɛ̀ɛ̀ mɛ́-mɛ́ɔ̀ nyuɛ ɓɛ́ Jɛhova ké à nàmàùn ɓèɔ̀ kɔ̃in zĩ̀ɛ̀n ɓɛ́ìn, ké ɔ nyuɛ ɓɛ́ à ké fɛ̀ɛ̀ múàùn dyi kpáìn ɓɛ́ìn ɓó sè-ná-sèɛ̀ tiín.

Ðɛ-kɔ̃in-kpa-kpa

• Xwíníínɔ̀ nyɛ́ kɔ̃̀ jè Jízɛ̀ mɛ́à kɛ́?

• Xwɛ̀ Jízɛ̀ɛ̀ nyɔùn fɛ̀ɛ̀ se kɛɛ ɖò ɓéɖéɛɛ nyuɛ ma ɓɛ́ nyɔùn séín ké gbàà kɛ́?

• Xwɛ̀ Jízɛ̀ɛ̀ mɛ́-mɛ́ɔ̀ ɓɛ́ìn m̀ kpáná dyí nyuɛ kɛ́?

CƐ̃́ ÐƐ PÀÐÀ

Cɛ̃́ xwíníín kɔ̃̀ jè wa ɖáìn Jízɛ̀ɛ̀ nyɔùn fɛ̀ɛ̀ se kɛɛ ɖò ɓéɖéɛ mú-gbààìn-ɖɛ̀ kɛɛ jè.

“Xwɛ̀ Jízɛ̀ɛ̀ Mɛ́-Mɛ́ɔ̀ Nyu ‘Mú-Gbààìn-Ðɛ̀ Jùɛ Ɓó Nyɔ Pàɖà’ Ɓè Bììɛ́?” (Ðúú-kɔ̃-cèè-ɖɛ̀)

Dyé ɖɛ à ɓéɖé à ké nyu ɓɛ́ à ké póɛ.

“Jízɛ̀ Póìn Nyɔ—Xwɛ̀ Kɛ́?” (Ðúú-kɔ̃-cèè-ɖɛ̀)

Jɛhova ɓɛ́ìn nàmàùn vɛ̀nɛ̀ ɖò kɔ̃in zĩ̀ɛ̀nǹ?

“Dyi-Diè-Ðɛ̀ Ɓè Ɓá Baɓoɔ Dyíɛɛ Gɔ̃̀-Jù-Wùɖù” (Dyí-Gmɔ̀ìn-Gbò-Cèè-Ðɛ̀ɔ̀, Dùò 1, 2013)

Dyé kà Jízɛ̀ɛ̀ mɛ́-mɛ́ɔ̀ jè cɛ̃́-cɛ̃́ nyu ma gàa ɖò gbo kpáa ɓɛ́ ɔ ké ma ɔ kpeɖeɔ̀ gbo zĩàìn nyɛ.

“Ḿ Se Nyɔ-Ðɛ-Gana-Xwa-Zàìn-Zàìn Gìi Ðe” (Ðúú-kɔ̃-cèè-ɖɛ̀)