CƐ̃́Ɛ́-ÐƐ̀ 42
Ðɛ́ Baɓoɔ Cɛ̃ Ɓá Xwíá-Jù-Jù Kè Dyi-Kpɔ̃ìn-Kpɔ̃ìn Jè Dyíɛ́?
Ðé nyɔ-dù ɖíɛ́ ɓè hwìɛ̀ kɛɛ, nyɔ ɓè poɛ jàà kà ɓɛ́ nyɔ ɖò se dyú-ɓà mɔɔ nyɔ́nɔ́ dyi kpɔ̃ ní, ɔ se múàùn kpáa ɓɛ́ìn nyɛ. Kɛɛ, ɔ se ɖɛ ɓɛ́ dyi-kpɔ̃ìn-nyɔ̀ séín ké múà ɓéɖéɛ, kè ɓɛ́ xwíá séín ké se múà ɓéɖéɛ. Jààɔ̀ mɔ̀, Baɓoɔ cɛ̃ɛ kà ɓɛ́ xwíá-jù-jù kè dyi-kpɔ̃ìn-kpɔ̃ìn mɔ̀ ɖɛ nɔ̀mɔ̀ dyíin nyɛ.
1. Ðɛ́ mɔ̀ kpáná ɓè ɓɛ́ wa nì xwíá-jù-jù múɛ́?
Baɓoɔ ɖá: “Nyɔ ɓɛ́ ɔ kèɔ̀ kè niìn kà wuɖuún wɛ̃ɛ dyi dyi kpɔ̃̀ìn ní, nìí, ɔ nyu ɖɛ nɔ̀mɔ̀ dyíin. Kɛɛ nyɔ ɓɛ́ ɔ kèɔ̀ kè niìn kà wuɖuún wɛ̃ɛ se dyi kpɔ̃̀ìn ní, nìí, ɖɛ ɔ nyuà ná kɛɛ nɔ̀mɔ̀ dyíin mìɔ.” (Zà 1 Kɔ̀ɖéíntĩ̀ɔ̀ 7:32, 33, 38 wuɖuún.) Hwìè nyɛ́ ɓè kɔ̃̀ mú xwíá ɖò nyu ɖɛ “nɔ̀mɔ̀ dyíin mìɔ” kɛ́? Kɛ́ɖɛ́ì ɖeín-sí-nyɔ̀ ɓè ɓɛ́ wa mɔ̀ xwíà ɓèɛɛ se kɔ̃̀ wa ké dyú-ɓà mɔɔ nyɔ́nɔ́ ɖò gbo gmɔ̀. Ɔ jèɛɛ, xwíá ɓè ɓéɖé buɛ̀-buɛ̀ fɔɔ cá. Ɔ hwɔìn kà, wa ɖíɛ́ ɓè ɓɛ́ìn Geɖepɔɔ-wùɖù-wáɖá-kũ̀àɔ̀ nyuɛ mìɔ ɖé hwìè kpa ɖɛ ɓè mú, hwɔìn kà ɓóɖó-dù kà kò ɖò kɔ̃ mu-mu ɓó bɔ̃̀ nɔ̀mɔ̀ dyíinɔ̀ cɛ̃ jè. Ɓó kɔ̃in ɖeɛɛ, wa ɓɛ́ìn ti pàɖà dyí ɖúɛ ɓɛ́ wa ké Jɛhova bũ̀in xwɛ̃́ìn.
2. Ðɛ́ mɔ̀ kpáná ɓè ɓɛ́ wa nì dyi-kpɔ̃ìn-kpɔ̃ìn ɖé gɔ̀mànà dyúa kɛɛ múɛ́?
Kà dyúáɖò kà dyi-kpɔ̃ìn-kpɔ̃ìn dyàà kpáná kɛɛ, kàà xwíá-jù-jù dyà kpáná ɖekè. Baɓoɔ ɖá “nyɔ sɔ̃́ kpa ɖɛ ké ɔ zi nyɔ dyúáɖò dyí.” (Ìkíɖísìásì 4:9) Ðɛ nìà kɛ mɔ̀ jàà jɛ́ɛ́ ɓó Kɛ́ɖɛ́ì ɖeín-sí-nyɔ̀ ɓè ɓɛ́ wa nyùìn Baɓoɔ hwìè-da-zàìn-wùɖù ɓè kũ̀à mú ɖé waà dyi-kpɔ̃ìn-kpɔ̃ìnɔ̀ múɛɛ bìì. Nyɔ ɓè ɓɛ́ wa kpɔ̃ìn dyi ɖé gɔ̀mànà dyúa kɛɛ ɖi wuɖu ɓɛ́ wa ké mú ɖɛɓɛìn ɖɛ̀ɓɛ̀ìn kè kpéín dyéìn dyèìn ɔ kè ɓɛ́ wa ké wa mùèɔ̀ kpɔ̃ nɔ̀mɔ̀ dyíin. Dyììn ɖé ɔ náa nyu-nyu múɛɛ, wa hwòɖò dè dyi mìɔ ké ɔ zi nyɔ ɓè ɓɛ́ wa niìn mú puɛɛ dyí. Ké dyi-kpɔ̃ìn-kpɔ̃ìn nyuɛ ké dyú ɓè wóɖó ɓíɖíi nɔ̀mɔ̀ dyíin ɖé xwéɖé-dù ɖò mú.
3. Xwɛ̀ Jɛhova nyu dyi-kpɔ̃ìn-kpɔ̃ìn dya gmɔ̀ɔ̀ kɛ́?
Ti Jɛhova po ma dyi-kpɔ̃ìn-kpɔ̃ìn kĩ́ín-kĩ́ínɔ̀ páún wɛ̃ɛ, ɔ cɛ̃ɛ ma, ké ɔ ɖá: “Gàaɔ̀ mu ɔ ɖe kè ɔ ɓà dyi táàùn, ɓɛ́ ɔ kè ɔ gmààɔ̀ ké xwaún kpáìn.” (Jɛ́nɛ́sì 2:24) Jɛhova mɔ́ ɓɛ́ gàa kè ɔ gmàà ké mú ɖɛɓɛìn ɖɛ̀ɓɛ̀ìn kè ɓɛ́ wa ké mú seìn tee kà wa muà cĩ́ìn nyɛ. Ðɛ ɖòùn kɔ̃̀ jè ɔ wɔ̃́ìn gbo ɓɛ́ dyi-kpɔ̃ìn-nyɔ̀ ɓè ké ɓɔ́ìn nyɛɛ mɔ̀, ɔ jù ké wa mùè ɖò dyi gbàɖàùn po ní. Ðé ɖɛ nì náa múɛɛ, Jɛhova nyí nyɔ tɔ̀ɔ̀ kpé ɓɛ́ ɔ kéɛ gbɔ po kɛbì ɔ mu ɔ mùèɔ̀ ɓɔ́ùn mɔɔ ɔ se ɔ ɓɔ́ɔ mu ní.a (Máfíò 19:9) Jɛhova se nyɔ́nɔ́ vò-vò dyi-kpɔ̃-kpɔ̃ jè gbo wɔ̃́ìn.—1 Tímétè 3:2.
ÐE ÐƐ MÚIN CÁ
Cɛ̃́ kà m̀ ké múà ɓéɖéɛ nyuɛ —kè kà m̀ ké Jɛhova múàùn poɛ nyu— kɛbì m̀ mɛ mɔ̀ xwíá mɔɔ dyi-kpɔ̃ìn-nyɔ̀ kɛ.
4. Nyùìn nyíí-ɖɛ̀ mɔ̀à xwíá-jù-jù kɛɛ kũ̀à mú nɔ̀mɔ̀ dyíin
Jízɛ̀ gmɔ̀ ma xwíá-jù-jù dya kà nyíí-ɖɛ̀ nìà kɛ. (Máfíò 19:11, 12) Zà Máfíò 4:23 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Xwɛ̀ Jízɛ̀ nyu ma xwíá-jù-jù kũ̀à mú nyùɛ̀n ɓɛ́ ɔ ké ma ɔ Ɓà bìì kũ̀à nyu, kè ɓɛ́ ɔ ké ma nyɔ tɔ̀ɔ̀ ɓè gbo kpá kɛ́?
Kɛ́ɖɛ́ì ɖeín-sí-nyɔ̀ ɓè ɓɛ́ìn waà xwíá-jù-jùɔ̀ kũ̀à-mú-nyùìn-nyùìn múàùn dyi kpáìn kà Jízɛ̀ nyuɛ ma kà kɛ. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.
Ðɛ́ mɔ̀ hwìè nɔ̀mɔ̀ dyíin ɓè kɔ̃̀ mú Kɛ́ɖɛ́ì ɖeín-sí-nyɔ̀ ɓè ɓɛ́ìn waà xwíá-jù-jùɔ̀ kũ̀à mú nyùɛ̀n nyɛ́?
M̀ Dyuòɛ̀ Ma Dyíì,
kà Baɓoɔ se zɔ̃ jĩ̀ kà nyɔ ɖò ké jù hwɛ̀ ɔ ké nyɔ́nɔ́ mɔɔ dyú-ɓà dyi kpɔ̃ kɛ jè cɛ̃ kɛɛ̀? Kɛɛ, ɔ po nyɔ gmɔ̀ ɓè náún ɓɛ́ wa ké ti kɔ̃̀ ɓaɖa ɓɛ́ wa seà wa mìɔùn dyí kpɔ̃ɔ ɓɛ́ìn nyɛɛ dyíin zi hwɛ̀.—1 Kɔ̀ɖéíntĩ̀ɔ̀ 7:36.
5. Gã nyɔ m̀ ké dyi kpɔ̃ɛ hwòɖò-fɔ̀nɔ̀-kà
Nyɔ m̀ ké dyi kpɔ̃ɛɛ gã-gã mɔ̀ ɖɛ zi ɖɛ kpauń ɖò cá ɓɛ́ nì mu gbɔ poùn wɛ̃. Zà Máfíò 19:4-6, 9 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Xwíníínɔ̀ nyɛ́ kɔ̃̀ jè Kɛ́ɖɛ́ì ɖeín-sí-nyɔ̀ ɖò mɛ ɓɔ́à cɛ-cɛ nyuɛ ɓó nyɔ́nɔ́ mɔɔ dyú-ɓà dyi kpɔ̃ jè kɛ́?
Baɓoɔ ɓɛ́ìn m̀ gbo kpáa ɓɛ́ m̀ ké kpeɖe ɓè ɓɛ́ wa nyu nyɔ ɖò dyú-ɓà mɔɔ nyɔ́nɔ́ nɔ̀mɔ̀ dyíin múɛɛ dyí dyuò. Ðɛ kpa ɖɛ jɛ́ɛ́ kɛɛ mɔ̀, m̀ mɛ mɔ́ nyɔ ɓɛ́ ɔ ɖɛ̀ɓɛ̀ Jɛhova múɛɛ dyi.b Zà 1 Kɔ̀ɖéíntĩ̀ɔ̀ 7:39 kè 2 Kɔ̀ɖéíntĩ̀ɔ̀ 6:14 wuɖuún. Nìí, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
Xwíníínɔ̀ nyɛ́ kɔ̃̀ jè à mɛ kpɔ̃à à ɖíí Kɛ́ɖɛ́ì ɖeín-sí-nyɔ̀ ɓè ɖòùn dyiɛ́?
Nì hwòɖò ɖá xwɛ̀ Jɛhova hwòɖò mu nììn ɔ jù ké à dyi nyɔ ɖò ɓɛ́ ɔ se ɔ mú ɖɛ̀ɓɛ̀ kɛɛ dyi kpɔ̃ níɛ́?
Ɔ jù ké wa dyi nimii ɓè ɓɛ́ wa kò fɔɔ cá kɛɛ dyí poìn ní, wa mu gà dyéìn. Kà dyúáɖòɔ̀ kàà, Kɛ́ɖɛ́ì ɖeín-sí-nyɔ̀ ɖò ɓɛ́ ɔ kpɔ̃ nyɔ se Jɛhova ɓiè-nyɔ̀ kɛ dyiɛɛ mu fũ̀à-fṹá pàɖà ɓè ɓéɖéìn
6. Gmɔ̀ dyi-kpɔ̃ìn-kpɔ̃ìn dya kà Jɛhova nyuà dya gmɔ̀ɔ̀ kɛ
Ðé Éézùɖùɛ̀-ɓòɖòɔ̀ kɔ̃ɛɛ, gàa ɖíɛ́ ɓè ɓɔ́ ma wa gmàà ɓè ɓó xwíníín se dyí sɛ́ɖɛ́ìn ɓè jè. Zà Máɖékà 2:13, 14, 16 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Xwíníínɔ̀ nyɛ́ kɔ̃̀ jè Jɛhova nyɛ́à ɓɔ́ìn-ɓɔ́ìn se dyí sɛ́ɖɛ́ìn nyɛɛ múɛ́?
Gbàɖàùn-po-po kè ɓɔ́ìn-ɓɔ́ìn puà nyɔɔ̀ mùèɔ̀ kè dyú ɓèɔ̀
Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.
Ɔ jù ké m̀ dyi nyɔ ɓɛ́ ɔ se Jɛhova ɓièɛ̀n nìɛɛ dyi kpɔ̃ ní, ɖɛ́ m̀ ɓɛ́ìn nyuɛ ɓɛ́ nì dyi-kpɔ̃ìn-kpɔ̃ìnɔ̀ ké mú wóɖóɛ́?
7. Kpɔ̃ Jɛhova gma ɓè ɓá dyi kpɔ̃ìn jè dyíɛɛ dyi
Nyɔ ɖò kɔ̃̀ ɔ ké dúún ku kóɖó-kóɖó ɓɛ́ ɔ ké Jɛhovaa gma ɓè ɓá dyi kpɔ̃ìn jè dyíɛɛ dyi kpɔ̃.c Kɛɛ, Jɛhova po nyɔ ɓè nyuà náa kɛɛ mana kɔ̃. Po VÍÐÒƆ̀ kũ̀à gbo.
Zà Híìbúɖúù 13:4 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
Nì hwòɖò ɖá Jɛhovaa gma ɓè ɓá dyi kpɔ̃ìn jè dyíɛɛ nyu fɔ̀nɔ̀-hwòɖòò? Xwíníínɔ̀ nyɛ́ kɔ̃̀ jè ɔ nìà ná mɔɔ ɔ seà ná nì kɛ́?
Jɛhova mɔ́ ɓɛ́ Kɛ́ɖɛ́ì ɖeín-sí-nyɔ̀ ɓè ké waà dyi kpɔ̃ìn jè kè waà ɓɔ́ìn jè gɔ̀mànà xwaún po kà gɔ̀mànà ɓè mɔ́à náa ɖé ɓóɖó-dù pàɖà ɓè kɔ̃ɛ. Zà Tátɔ̀ 3:1 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Ɔ jù ké m̀ kè nì mùèɔ̀ dyi dyi kpɔ̃ìn ní, m̀ poɛ jàà kà gɔ̀mànà dyuò ɓè dyi-kpɔ̃ìn-kpɔ̃ìnɔ̀ jè dyíɛɛ̀?
NYƆ ÐÒ ƁƐ́ÌN NÍIŃ: “Xwíníínɔ̀ nyɛ́ kɔ̃̀ jè ḿ mɛ kpɔ̃ nyɔ́nɔ́ mɔɔ dyú-ɓà dyiɛ́? Màa ɖò kè gàa ɖò ní niìn mú puù?”
Xwɛ̀ nì muɛ gɔ̃̀ jùùn wɛ̃́?
SṸÌN-XWÍNÍÍN
Xwíá-jù-jù kè dyi-kpɔ̃ìn-kpɔ̃ìn mɔ̀ nyíí-ɖɛ̀ sɔ̀ìn ɖé Jɛhova gboɛ. Wa séín ɖò ɓɛ́ìn múà kè hwòɖò-dyi-dè-dè dyàà ɔ jù ké ɔ kè Jɛhovaa mɔ́ɔ́-ɖɛ̀ dyi gbo muìn ní.
Ðɛ-kɔ̃in-kpa-kpa
Xwɛ̀ nyɔ ɖò ɓɛ́ìn ɔ xwíá-jù-jùɔ̀ kũ̀à mú nyùɛ̀n nɔ̀mɔ̀ dyíin nyɛ́?
Xwíníínɔ̀ nyɛ́ kɔ̃̀ jè Baɓoɔ ɖá à mɛ kpɔ̃à à ɖíí Kɛ́ɖɛ́ì ɖeín-sí-nyɔ̀ ɓè ɖòùn dyiɛ́?
Ðɛ́ mɔ̀ xwíníín ɖòùn kɔ̃̀ jè Baɓoɔ ɖá dyi-kpɔ̃ìn-nyɔ̀ ɓè ɓɛ́ìn ɓɔ́ìn nyɛ́?
CƐ́ ÐƐ PÀÐÀ
Ðɛ́ mɔ̀ “Geɖepɔɔ-nyɔ̀” dyi-kpɔ̃-kpɔ̃ xwíníín nyɛ́?
Dyé dyí-tɛ̀mɛ̀ìn-ɖɛ̀ sɔ̃́ ɓè ɓɛ́ wa mu m̀ gbo kpáùn, ɓɛ́ m̀ ké ɖɛ ɓè gbɔ po nɔ̀mɔ̀ dyíin ɓá dyi kpɔ̃ìn jè dyíɛɛ dyi.
Dyé xwíníín kɔ̃̀ jè ɖíí-gàà ɖò poɛ̀n hwìɖìi kà ɖɛ ɓɛ́ Jɛhova ɖà ɔ nyíɛɛ kpa ɖɛ mìɔ ké ɔ zi ɖɛ séín ɖò ɓɛ́ ɔ ɖà kɔ̃ín pòìn nyɛɛ dyíɛ.
Ðɛ́ mɔ̀ ɖɛ ɖíɛ́ ɓè ɓɛ́ nyɔ ɖò mɛ poìn jè hwìɖìi kĩ́ín hwɛ̀ ɔ ké ɓɔ́ìn jè mɔɔ bũ̀ sɔ̀ìn jè dyí sɔ́ kɛ́?
“Dè ‘Ðɛ Geɖepɔɔ Ðà Xwaún Poìn Nyɛɛ’ Dya” (Dyí-Gmɔ̀ìn-Gbò-Cèè-Ðɛ̀ɔ̀, Sè-Bɛ̃̀-Bàɖàùn 2018)
a Dyé Mánáín-hwɛ̀ìn-wùɖù 4 ɓá mú-sɔìn-sɔìn jè dyí ɔ jù ké ɔ dyi gbàɖàùn-po-po dyí ɓáín.
b Ðé nyɔ-dù ɖíɛ́ ɓè hwìɛ̀ kɛɛ, wóɖóìn-nyɔ̀ ɓè gã nyɔ wa dyú-màà mɔɔ dyú-gàà ké dyi kpɔ̃ kɛ. Ɔ dyi ná nììn, wóɖóìn-nyɔ̀ ɓè ɓɛ́ wa ɓéɖé ɖɛ̀ɓɛ̀ìn-ɖɛ̀ɓɛ̀ìn nyɛɛ muɛ hwìɖìi poìn kɛbì nyɔɔ̀ ɖɛ̀ɓɛ̀ Jɛhova mú ní, ké ɔ se wíɖí nyɔ̀ɔ̀ ɓéɖéɛ mɔɔ kũ̀à ɔ nyuɛ.
c Ɔ jù ké m̀ kè nyɔ ɖò dyi mú niìn, ké ɓè se dyi kpɔ̃ìn ní, ɔ hwɔ ɖé m̀ gboi ɓɛ́ m̀ kéɛ gbɔ po kɛbì nì mu nyɔɔ̀ dyi táàùn mɔɔ nì mu ɔ dyi kpɔ̃ùn ní.