CƐ̃́Ɛ́-ÐƐ̀ 46
Xwíníínɔ̀ Nyɛ́ Kɔ̃̀ Jè M̀ Mɛ Zàà M̀ Mìɔùn Xwáɖáún Ɓɛ́ M̀ Kéà Níɔ Kpá Kɛ́?
M̀ dyiɛ Jɛhova gbo cɛ̃ ɖé ɓaà-ɓaà mú kà nì mu ɔ ɖòùn ɓièìn, ké nì mu ɔ mɔ́ɔ́-ɖɛ̀ poùn kĩ́ín ɖé nì cĩ́-cĩ́ɔ̀ mú ní, nìí, m̀ zà m̀ mìɔùn xwáɖáún ɖé Jɛhova gbo. (Wɛ́ɖɛ́ 40:8) Sɔ̀ìn ɓóɛ gbo ní, nìí, ɔ mɔ̀ níɔ-kpá-kpá. M̀ dyiɛ náa nyu ní, m̀ tɛ̀mɛ̀ìn nyɔ tɔ̀ɔ̀ ɓè dyí kà m̀ ɖà m̀ mìɔùn xwáɖáún zà kɛ. À mìɔùn xwáɖáún-zà-zà ɖé Jɛhova gboɛɛ mɔ̀ ɖɛ-gbɔ-po-po zi ɖɛ kpáuń ɓɛ́ à mu nyuùn wɛ̃. Ðɛ́ ɓɛ́ìn m̀ kpéí poɛ ɓɛ́ m̀ ké ɖɛ ku wɔ̃ kè cĩ́-cĩ́-gbo-zĩàìn-ɖɛ̀ nì náa gbɔ po kɛ́?
1. Ðɛ́ ɓɛ́ìn nyɔ ɖò kpéí poɛ ɓɛ́ ɔ ké ɔ mìɔùn xwáɖáún zà kɛ́?
Ðɛ ɓɛ́ìn à kpéí poɛ ɓɛ́ à ké à mìɔùn xwáɖáún zà ɖé Jɛhova gboɛɛ mɔ̀ ɖɛ̀ɓɛ̀ìn-ɖɛ̀ɓɛ̀ìn. (1 Jɔ̃́ɔ́ 4:10, 19) Baɓoɔ cɛ̃ɛ à gbo, ké ɔ ɖá: “Ɓè mɛ ɖɛ̀ɓɛ̀ [Jɛhova] mɔ̀à ɓèɛ̀ Geɖepɔɔ kɛɛ mú hwòɖòɛ̀-ɖé-hwɛ̀-kà ɖé ɓèɛ̀ hwìɖìi-poìn-ɖɛ̀ séín mú ɔ kè ɖé ɓèɛ̀ kpé séín mú.” (Máà 12:30) À ní tɛ̀mɛ̀ìn kà à ɖɛ̀ɓɛ̀ Geɖepɔɔ mú dyììn ɖé ɖɛ ɓè à cɛ̃ kɛ mú ɖòùn kɛɛ dyììn ɖé ɖɛ ɓè à nyuɛɛ mú ɖekè. Kà gàa kè màa ɓɛ́ wa ɖɛɓɛìn ɖɛ̀ɓɛ̀ìn múɛ kpɔ̃àìn dyiɛɛ, kàà à ɖɛ̀ɓɛ̀ìn-ɖɛ̀ɓɛ̀ìn ɓó Jɛhova bììɛɛ nyuɛ ké à zà à mìɔùn xwáɖáún ɖé ɔ gbo, ké à kpá níɔ.
2. Ðɛ́ mɔ̀ mana ɓè ɓɛ́ Jɛhova nyí ɔ Zàse ɓè ɓɛ́ wa ɖà níɔ kpá kɛ́?
M̀ dyi níɔ kpá ní, nì mu Jɛhovaa múà-xwèɖè-dùɔ̀ nyɔ ɖò jùùn. Nìí, nì mu ɔ ɖɛ̀ɓɛ̀ìn-ɖɛ̀ɓɛ̀ìn ɓó m̀ bììɛɛ dyéìn ɖé hwìè kò-kò ɓè mú, ké nì mu ɔ bũ̀in xwɛ̃́ìn mìɔ ké ɔ zi kà ɔ nyuà nìɛ̀ kàùn wɛ̃ɛ dyí. (Zà Máɖékà 3:16-18 wuɖuún.) Jɛhova mu nì Ɓà jùùn, ké nì mu ɖíí-gàà kè ɖíí-màà ɓè sɔ̀ìn ɓóɖó-kpàà dà séín ɓɛ́ wa ɖɛ̀ɓɛ̀ Jɛhova mú ké wa ɖɛ̀ɓɛ̀ m̀ múɛɛ ɓéɖéìn ɖé zùùn. (Zà Máà 10:29, 30 wuɖuún.) Kɛɛ, m̀ ɓéɖé ɓɛ́ m̀ ké ɖɛ ɖíɛ́ ɓè nyu hwɛ̀ m̀ ké níɔ kpá. M̀ ɓéɖé m̀ ké Jɛhova jè cɛ̃́ ɓɛ́ m̀ ké ɔ mú ɖɛ̀ɓɛ̀, ɔ kè ɓɛ́ m̀ ké ɔ Dyú-gààɔ̀ hwìɖìi taɓa. Ké ɔ hwɛ̀ìn-gbɔɔ̀ mɔ̀, m̀ ɓéɖé ɓɛ́ m̀ ké nì fɛ̀ɛ̀ɔ̀ xwáɖáún zà ɖé Jɛhova gbo. Ɔ jù ké m̀ dyi ɖɛ ɓèa nyu, ké m̀ dyi níɔ kpáín, nì mu fɛ̀ɛ̀ múàùn dyi kpáìn ɓɛ́ìn ɓó sè-ná-sèɛ̀ tiín. Geɖepɔɔ wuɖuɔ̀ ɖá: “Ní nìà kɛ mɔ̀ níɔ-kpá-kpá ɓɛ́ ɔ póàìn ɓè kàùn wɛ̃ɛ dyí-tɛ̀mɛ̀ìn-ɖɛ̀.”—1 Píɖɛ̀ 3:21.
ÐE ÐƐ MÚIN CÁ
Cɛ̃́ xwíníín kɔ̃̀ jè ɔ kpaà ɖɛ ɓɛ́ m̀ kéà m̀ mìɔùn Jɛhova xwáɖáún zàìn, kè ɓɛ́ m̀ kéà níɔ kpá kɛ.
3. À séín ɓéɖé ɓɛ́ à ké nyɔ à mu ɓièìn nyɛɛ gã
Ðé Éézùɖùɛ̀-ɓòɖòɔ̀ kɔ̃ɛɛ, nyɔ ɖíɛ́ ɓè poɛ̀n ma hwìɖìi kà wa ɓɛ́ìn ma Jɛhova kè kũùn-kpò geɖepɔɔ mɔ̀ ma Béò kɛɛ dyí poɛ̀n ɓɛ́ wa ké wa ɓiè kɛ. Kɛɛ, Jɛhova ɖoɓo ma ɔ kpáá-ɖɛ̀-cɛ̃-nyɔ̀ Ìɖáájɔ̀ ɓɛ́ ɔ ké ma wa hwìɖìi-poìn-poìnɔ̀ dyí sɛ́ɖɛ́ìn. Zà 1 Kĩ́ìn 18:21 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Ðɛ́ Éézùɖùɛ̀-nyɔ̀ ɓèɔ̀ ɓéɖé ɓɛ́ wa ké ma gã kɛ́?
Kà Éézùɖùɛ̀-nyɔ̀ ɓèɔ̀ nì ma kà kɛɛ, kàà à mɔ̀ùn ɓéɖé ɓɛ́ à ké nyɔ à mu ɓièìn nyɛɛ gã ɖekè. Zà Ðúù 16:13 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
Xwíníínɔ̀ nyɛ́ kɔ̃̀ jè à seà Jɛhova ɓièɛ̀ ɓɛ́ìn ɓɛ́ à kéà nyɔ kà kò ɖò mɔɔ ɖɛ kà kò ɖò ɓiè ɖeɛ́?
Xwɛ̀ à ɓɛ́ìn Jɛhova dyí tɛ̀mɛ̀ìn kà à gã ɔ, ɓɛ́ à ké ɔ ɓiè kɛ́?
4. Nàìn Jɛhovaa ɖɛ̀ɓɛ̀ìn-ɖɛ̀ɓɛ̀ìn ɓó m̀ bììɛɛ jè hwìɖìi
Jɛhova ɖà à nyíí-ɖɛ̀ kpa ɖɛ pàɖà nyí. Ðɛ́ à mɔ̀ùn ɓɛ́ìn ɔ nyíɛ kɛ́? Po VÍÐÒƆ̀ kũ̀à gbo.
Ðɛ́ mɔ̀ hwìè ɖíɛ́ ɓè kɔ̃̀ mú ɓɛ́ Jɛhova ɖà m̀ ɖɛ̀ɓɛ̀ìn-ɖɛ̀ɓɛ̀ìn dyí tɛ̀mɛ̀ìn nyɛ́? Zà Wɛ́ɖɛ́ 104:14, 15 kè 1 Jɔ̃́ɔ́ 4:9, 10 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
Ðɛ́ mɔ̀ nyíí-ɖɛ̀ jɛ́ɛ́ ɓè sɔ̀ìn ɖé Jɛhova gbo ɓɛ́ m̀ kpáìn jè múàùn dyi mìɔ kɛ́?
Xwɛ̀ nyíí-ɖɛ̀ ɓè nìà wɛ nyu nì hwòɖòɔ̀ nyuɛ ɓá ɔ jè dyíɛ́?
À dyi nyíí-ɖɛ̀ ɖò ɓɛ́ à ɖɛ̀ɓɛ̀ múɛ dyé ní, à muɛ mɔ́ùn ɓɛ́ à ké nyɔ nyíà à ɖɛɔ̀ kɛɛ zùo po. Zà Dìtɔ̀wáɖánámɛ̀ 16:17 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
M̀ dyi ɖɛ séín ɓè ɓɛ́ Jɛhova ɖà m̀ bìì nyuɛɛ jè hwìɖìi poìn ní, ɖɛ́ nì hwòɖòɔ̀ po gbɔ ɓɛ́ m̀ ké ɔ nyíɛ́?
5. Nyɔ-mìɔùn-xwáɖáún-zà-zà dyà mana ɓáún-ɓáún
Nyɔ pàɖà poɛ jàà kà ɓɛ́ nyɔ-nyɛ́nɛ́-mu-mu mɔɔ kũ̀à nɔ̀mɔ̀ dyíin mɔɔ wíɖí ɓɛ́ìn wa múàùn poɛ kɛ. Ɔ mɔ̀ jàà? Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.
Díe-vɔ̃-nyɔ̀ nìà víɖò nìà kɛ múɛɛ ɖɛ̀ɓɛ̀ ma díe-vɔ̃-vɔ̃ mú dyɛo, kɛɛ xwíníínɔ̀ nyɛ́ kɔ̃̀ jè ɔ táà ma kũ̀à nìà wɛ dyiɛ́?
Ɔ poɛ ma gbɔ ɓɛ́ ɔ ké ma ɔ mìɔùn xwáɖáún zà ɖé Jɛhova gbo, ké ɔ se ma ɖé díe-vɔ̃-vɔ̃ gbo. Nì hwòɖò ɖá ɖɛ ɔ po ma kà gbɔɛɛ sɛ́ɖɛ́ìn dyíì? Xwíníínɔ̀ nyɛ́ kɔ̃̀ jèɛ́?
Hwɛ̀ ɓɛ́ àpɔ́sò Pɔ́ɔ̀ ké ma Kɛ́ɖɛ́ì ɖeín-sí-nyɔ̀ jùɛɛ, ɔ mɔ̀ ma ɖɛ-dyuò-nyɔ̀ vɛ̀nɛ̀ ɖò cá. Ɔ cɛ̃́ ma Júù-nyɔ̀ ɓèɔ̀ gmaɔ̀ ɖé ɖɛ-tɛ̀mɛ̀ìn-nyɔ̀ vɛ̀nɛ̀ ɖò xwaún. Kɛɛ, ɔ po ma ɖɛ séín ɓèa wáká, ɓɛ́ ɔ ké ma Kɛ́ɖɛ́ì ɖeín-sí-nyɔ̀ jù. Pɔ́ɔ̀ hwòɖò mu ma ɖɛ ɓèa gbo ɖeè? Zà Fèɖópĩ̀ɔ̀ 3:8 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
Xwíníínɔ̀ nyɛ́ kɔ̃̀ jè Pɔ́ɔ̀ ɖáìn ɖɛ ɓè ɔ nyu ma hwɛ̀ ɔ dyi ma Kɛ́ɖɛ́ì ɖeín-sí-nyɔ̀ jùɛɛ séín “sĩ̀ɔ̀” mɔɔ ɖɛ se ɖɛ kpa ɓèɛ́?
Ðɛ́ ɔ dyé ma ɓó wa bɛ̃̀ìn nyɛ́?
Nì hwòɖò ɖá Jɛhova ɓiè-ɓiè kè nì fɛ̀ɛ̀ɔ̀ ɖɛ kà kò ɖò mú-nyùìn-nyùìn, waà nyɛ́ kpa ɖɛ mìɔ kɛ́?
Ðɛ ɓè ɓɛ́ Pɔ́ɔ̀ ɓéɖé ma ti ɔ jù ma Kɛ́ɖɛ́ì ɖeín-sí-nyɔ̀ kɛɛ zi ɖɛ ɓè ɔ pòìn ma kɔ̃ín nyɛɛ dyí vɛ̃in
NYƆ ÐÍƐ́ ƁÈ ÐÁ: “Ɔ se fɔ̀nɔ̀-hwòɖò nyu ɓɛ́ à ké à fɛ̀ɛ̀ɔ̀ xwáɖáún zà ɖé Geɖepɔɔ gbo.”
Nì hwòɖò ɖá xwíníínɔ̀ nyɛ́ kɔ̃̀ jè ɔ nyuà fɔ̀nɔ̀ hwòɖò ɓɛ́ m̀ kéà nì fɛ̀ɛ̀ɔ̀ xwáɖáún zà ɖé Jɛhova gbo kɛ́?
SṸÌN-XWÍNÍÍN
Ðɛ̀ɓɛ̀ìn-ɖɛ̀ɓɛ̀ìn po à kpéí, ɓɛ́ à ké à mìɔùn xwáɖáún zà ɖé Jɛhova gbo, kè ɓɛ́ à ké níɔ kpá.
Ðɛ-kɔ̃in-kpa-kpa
Xwíníínɔ̀ nyɛ́ kɔ̃̀ jè à ɓéɖé ɓɛ́ à kéà Jɛhova mú ɖɛ̀ɓɛ̀ kè ɓɛ́ à kéà ɔ ɓiè hwòɖòɛ̀-ɖé-hwɛ̀-kà kɛ́?
Xwɛ̀ Jɛhova nyu ɔ Zàse ɓè ɓɛ́ wa ɖà níɔ kpá kɛɛ mana kɔ̃ poɛ kɛ́?
Nì muɛ mɔ́ùn ɓɛ́ m̀ ké m̀ mìɔùn xwáɖáún zà ɖé Jɛhova gboò?
CƐ̃́ ÐƐ PÀÐÀ
Dyé xwíníín kɔ̃̀ jè ɓeɖe-nyɔ̀ ɖò kè díe-vɔ̃-nyɔ̀ ɖò gãa ma ɓɛ́ wa ké ma wa mìɔùn xwáɖáún zà ɖé Jɛhova gboɛ.
Nyɔ Gmɔ̀ Ɓè Diè Ðɛi—Ðɛ́ Ḿ Mu Ní Fɛ̀ɛ̀ɔ̀ Mú Nyùìn Nyɛ́?—Ðe Gmɔ̀-Gmɔ̀ (6:54)
Cɛ̃́ xwíníín tɔ̀ɔ̀ ɓè kɔ̃̀ jè à mɛ zà à mìɔùn xwáɖáún wɛ̃.
Ðé víɖò-wɛ̀ɖɛ̀ nìà kɛ múɛɛ, dè múà ɓɛ́ nyɔ ɓè ɓɛ́ wa zàà wa mìɔùn xwáɖáún ɖé Jɛhova gboɛ ɓéɖéɛɛ dyéɖé gbo.
Ðé nɔ́ɔ́ mɔ̀à “Ḿ Poɛ̀n Ma Hwìɖìi Ɓó Zɔ̃ Pàɖà Xwíníín, ‘Xwíníínɔ̀ Nyɛ́ Kɔ̃̀ Jè Ḿ Nìà Dà Kɛ́?’” kɛ múɛɛ, dyé ɖɛ kpá ma màa ɖò gbo ɓɛ́ ɔ ké ma ɖɛ kpa ma ɖɛ mìɔ ɖé ɔ gboɛɛ jè hwìɖìi poìn nyɛ.
“Baɓoɔ Zĩàìn Cĩ́-Kà Gbo” (Dyí-Gmɔ̀ìn-Gbò-Cèè-Ðɛ̀ɔ̀, Gbàɖà-Gbàɖà 1, 2012)