Xwɛ̀ Nì Xwéɖé-Dùɔ̀ Ɓɛ́ìn Múàùn Nìɛ̀ Kɛ́?—Wáká 2

Dyú ɓè mɔ̀ nyíí-ɖɛ̀ sɔ̀ìn ɖé Jɛhova gbo. Ɔ mɔ́ ɓɛ́ wóɖóìn-nyɔ̀ ɓè ké nyíí-ɖɛ̀ nìà wɛ gbo gmɔ̀ nɔ̀mɔ̀ dyíin. Jɛhova tò náún-po-wùɖù ɓɛ́ ɔ ɓɛ́ìn wóɖóìn-nyɔ̀ ɓè gbo kpáa ɓɛ́ wa kéɛ náa nyuɛ. Ɔ náún-po-wùɖùɔ̀ ɓɛ́ìn dyú ɓè gbo kpáa, ɓɛ́ wa kéɛ nyu ɓɛ́ xwéɖé-dùɔ̀ ké múàùn nì.

1. Ðɛ́ mɔ̀ náún-po-wùɖù ɓɛ́ Jɛhova nyí wóɖóìn-nyɔ̀ ɓèɛ́?

Jɛhova mɔ́ ɓɛ́ wóɖóìn-nyɔ̀ ɓè ké waà dyú ɓèɔ̀ mú ɖɛ̀ɓɛ̀, kè ɓɛ́ wa ké vɔ̃ kóɖó-kóɖó ɓɛ́ wa kè wa ké da hwèɖè. Ké ɖeɛɛ, ɔ mɔ́ ɓɛ́ wóɖóìn-nyɔ̀ ɓè ké waà dyú ɓèɔ̀ dyí gmɔ̀, kè ɓɛ́ wa ké Baɓoɔ kũ̀à mú nyùìn ɖé waà dyú ɓèɔ̀ kpeɖe-zà-zà mú. (Nɔ́ɔ́ 1:8) Ɔ cɛ̃ɛ ɓà ɓè gbo, ké ɔ ɖá: “Ɓè mɛ gmɔ̀ìn [ɓèɛ̀ dyú ɓèɔ̀] . . . kà Ɓouɓoɔ̀ nyɔ ɓèɔ̀ ɓéɖé ɓɛ́ wa kéɛ nyuɛ.” (Zà Ìfísĩ̀ɔ̀ 6:4 wuɖuún.) Ɔ dè Jɛhova hwòɖò dyi ɔ jù ké wóɖóìn-nyɔ̀ ɓè dyi ɔ náún-po-wùɖùɔ̀ dyi kpɔ̃ ɖé waà dyú ɓèɔ̀ gmɔ̀ìn-gmɔ̀ìn mú, ké wa se kũ̀à nìà wɛ nyɔ kà kò ɖò nyí fɔɔ ní.

2. Ðɛ́ mɔ̀ náún-po-wùɖù ɓɛ́ Jɛhova nyí dyú ɓèɛ́?

Jɛhova cɛ̃ɛ dyú ɓè gbo, ké ɔ ɖá: “Ɓè mɛ nyu ɓèɛ̀ wóɖóìn-nyɔ̀ ɓè wuɖu.” (Zà Kɔ̀ɖɔ́sĩ̀à 3:20 wuɖuún.) Ɔ jù ké dyú ɓè dyi waà wóɖóìn-nyɔ̀ ɓè kpéín dyé, ké wa dyi wa wuɖu nyu ní, nìí, wa nyuɛ ké Jɛhova kè waà wóɖóìn-nyɔ̀ ɓè kpá múàùn. (Nɔ́ɔ́ 23:22-25) Jízɛ̀ dè ma ɓo-bɛ̃̀ nɔ̀mɔ̀ dyíin ti ɔ mɔ̀ ma dyú-gbɔ́ɔ́ kɛ. Ɔ se ma kɛɛ ɖò ɓéɖé dyɛo, kɛɛ ɔ nyu ma ɔ wóɖóìn-nyɔ̀ ɓè wuɖu, ké ɔ dyé ma wa kpéín.—Ðúù 2:51, 52.

3. Xwɛ̀ xwéɖé-dù gànáà ɓɛ́ìn Geɖepɔɔ bũ̀in xwɛ̃́ìn nyɛ́?

Ɔ jù ké m̀ dyi wóɖóìn-nyɔ̀ jùìn, ɔ nì wáɖáá kà ɓɛ́ m̀ mɔ́ ɓɛ́ nì dyú ɓèɔ̀ ké Jɛhova mú ɖɛ̀ɓɛ̀ kà m̀ ɖɛ̀ɓɛ̀à ɔ múɛ. Ðɛ́ m̀ ɓɛ́ìn nyuɛ ɓɛ́ nì hwòɖòɛ̀-mɔ́-ɖɛ̀ nìà wɛ ké kpá kɛ́? Ɔ mɔ̀ dyììn ɖé ɖɛ Baɓoɔ cɛ̃à kɛɛ nyu-nyu mú. Ɔ ɖá: “Ɓè mɛ tɛ̀mɛ̀ìn [Jɛhovaa] gma ɓèɔ̀ ɓèɛ̀ dyú ɓèɔ̀ hwòɖòɛ̀-ɖé-hwɛ̀-kà. Ɓè mɛ dèìn gma ɓèɔ̀ jè dɔ́ɔ́ múin, ti ɓè mu ɖé taún nììn nyɛ, kè ti ɓè mu hwìè xwíníín nàùn nììn nyɛ.” (Dìtɔ̀wáɖánámɛ̀ 6:7) Ðɛ-tɛ̀mɛ̀ìn-tɛ̀mɛ̀ìn xwíníín mɔ̀ ɖɛ ɖò kɔ̃in-kpa-kpa. M̀ dyuòɛ̀ dyí dyɛ̀ kà m̀ ɓéɖé ɓɛ́ m̀ ké ɖɛ ɖò kɔ̃in kpa ɖé nì dyú ɓèɔ̀ gbo, ɓɛ́ ɔ ké wa hwìɖìi sèɛ. Vɔ̀sì nìà kɛ xwíníín mɔ̀, m̀ mɛ mɔ́ ti nɔ̀mɔ̀ dyíin dyi ti séín, ɓɛ́ m̀ ké Jɛhova jè nì dyú ɓèɔ̀ gbo cɛ̃. Ɔ mɔ̀ ɖɛ nɔ̀mɔ̀ dyíin ɓɛ́ xwéɖé-dù gànáà ké ti ɖò wáká po wíkì séín ɓɛ́ wa ké dyí poìn ɓó Geɖepɔɔ ɓiè jè. Ɔ jù ké m̀ se dyú ɓéɖéín, m̀ ɓɛ́ìn ti ɖò wáká poɛ ɖekè ɓó wíkì séín, ɓɛ́ m̀ ké Geɖepɔɔ wuɖuɔ̀ cɛ̃́.

ÐE ÐƐ MÚIN CÁ

4. Zà nì dyú ɓèɔ̀ kpeɖe ɖé ɖɛ̀ɓɛ̀ìn-ɖɛ̀ɓɛ̀ìn mú

Dyú kpeɖe-zà-zà mɔ̀ ɖɛ kàmàùn-kàmàùn ɖò cá. Xwɛ̀ Baɓoɔ ɓɛ́ìn m̀ gbo kpáa kɛ́? Zà Jĩ́ìn 1:19, 20 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• Xwɛ̀ wóɖóìn-nyɔ̀ ɓè ɓɛ́ìn ɖɛ̀ɓɛ̀ìn-ɖɛ̀ɓɛ̀ìn tɛ̀mɛ̀ìn ɔ jù ké wa dyi waà dyú ɓè gbo wùɖùɛ̀n nììn nyɛ́?

• Xwíníínɔ̀ nyɛ́ kɔ̃̀ jè wóɖóìn-nyɔ̀ ɖò mɛ ɓɔ́à ɔ dyú ɓèɔ̀ kpeɖe zàà ɔ jù ké ɔ dyi dyoɖoún kpáín nyɛ́?a

5. Gmɔ̀ nì dyú ɓèɔ̀ dyí

Ɓɛ́ m̀ ké nì dyú ɓèɔ̀ dyí gmɔ̀ ní, ɔ kpa ɖɛ mìɔ ɓɛ́ m̀ ké wa gbo wùɖù ɖò-ɖò ɓá gmaɖe po jè dyí. Ðɛ nìà kɛɛ ɓɛ́ìn mú kàmàà. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.

VÍÐÒ Gmɔ̀ Nì Dyú Ɓèɔ̀ Dyí Sɔ̀ìn Ðé Ðɛ Gbà Xwaún (2:58)

• Xwíníínɔ̀ nyɛ́ kɔ̃̀ jè ɔ kàmàà mú ɓɛ́ wóɖóìn-nyɔ̀ ɖíɛ́ ɓè kéà wa dyú ɓèɔ̀ gbo wùɖù ɓá gmaɖe po jè dyíɛ́?

• Hwìè nyɛ́ kɔ̃̀ mú wóɖóìn-nyɔ̀ ɖíɛ́ ɓè ɖà gmaɖe po jè kɔ̃in zaìn ɖé waà dyú ɓè gboɛ́?

Baɓoɔ cɛ̃ɛ zɔ̃̀ɔ̀ kà ɓóɖó-kpà ɓɛ́ Sétɔ̃̀ kɔ̃̀à wuɖuíɛɛ mu gbà gbo kpáùn mìɔ kɛ. Zà 2 Tímétè 3:1, 13 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Ðɛ-gbà-nyu-nyɔ̀ ɓè ɓɛ́ vɔ̀sì 13 cɛ̃à jèɛɛ ɖíɛ́ ɓè nyu dyú gbɔ́ɔ́ ɓè nyɔ́nɔ́ún. Ɔ jèɛɛ, xwíníínɔ̀ nyɛ́ kɔ̃̀ jè ɔ kpaà ɖɛ ɓɛ́ wóɖóìn-nyɔ̀ ɓè kéà waà dyú ɓèɔ̀ ɖɛ tɛ̀mɛ̀ìn ɓá gmaɖe po jè dyí, kè kà wa ké wa mìɔùn dyí gmɔ̀ɔ̀ nyu ɖé ɖɛ-gbà-nyu-nyɔ̀ ɓè xwaún wɛ̃́?

M̀ dyuòɛ̀ ma dyíì,

kà Jɛhova Zàse ɓè nyu céè-ɖɛ̀ pàɖà ɓè ɓɛ́ wa ɓɛ́ìn wóɖóìn-nyɔ̀ ɓè gbo kpáa, ɓɛ́ wa ké waà dyú ɓè ɖɛ tɛ̀mɛ̀ìn ɓá gmaɖe po jè dyí, kè ɓɛ́ wa ké wa dyí gmɔ̀ ɖé ɖɛ-gbà-nyu-nyɔ̀ ɓè xwaún wɛ̃ɛ̀? Dyé ɔ hwɔ̀ìn-ɖɛ̀ ɓè nìà kɛ:

• Gmɔ̀ Nì Dyú Ɓèɔ̀ Dyí (víɖò)

• Cɛ̃́ Ðɛ-Tɛ̀mɛ̀ìn-Nyɔ̀ Vɛ̀nɛ̀ɔ̀ Ðɛ Xwaún, wuɖu-kpà 10 kè 32

• “Nì Dyú Ɓèɔ̀ Ðɛ-Tɛ̀mɛ̀ìn-Tɛ̀mɛ̀ìn Ɓá Gmaɖe Po Jè Dyí” (Wóɖó Nyíɔún! Nɔ̀. 5 2016)

6. Dyé nì wóɖóìn-nyɔ̀ ɓèɔ̀ kpéín

VÍÐÒ: Xwɛ̀ Ḿ Ɓɛ́ìn Ní Wóɖóìn-Nyɔ̀ Ɓèɔ̀ Gbo Wùɖùɛ̀ Kɛ́? (2:19)

• Xwíníínɔ̀ nyɛ́ kɔ̃̀ jè ɔ kpaà ɖɛ mìɔ ɓɛ́ nyɔ gmɔ̀ ɖò kéà ɔ wóɖoìn-nyɔ̀ ɓè gbo wùɖù kpéín-dyé-kà kɛ́?

• Xwɛ̀ nyɔ gmɔ̀ ɖò ɓɛ́ìn ɔ wóɖóìn-nyɔ̀ ɓè gbo wùɖùɛ̀ ɓɛ́ ɔ kéɛ tɛ̀mɛ̀ìn kà ɔ dè wa dya kɛ́?

Zà Nɔ́ɔ́ 1:8 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Ðɛ́ nyɔ gmɔ̀ ɖò mɛ nyu ɔ jù ké ɔ wóɖóìn-nyɔ̀ ɓè dyi ɖɛ ɔ ké nyuɛɛ ɔ gbo cɛ̃ níɛ́?

7. Xwéɖé-dùɔ̀ mɛ poìn dyí ɓɛ́ wa ké Jɛhova ɓiè

Xwéɖé-dù ɓè ɓɛ́ wa mɔ̀ Jɛhova Zàse ɓèɛɛ po ti jɛ́ɛ́ ɖò wáká wíkì séín, ɓɛ́ wa ké dyí poìn ɓó ɓiè jè. Xwɛ̀ xwéɖé-dù Geɖepɔɔ ɓiè-ɓiè nìà kɛ mɛ nyu nìɛ̀ kɛ́? Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.

VÍÐÒ: Xwéɖé-Dùɔ̀ Geɖepɔɔ Ɓiè-Ɓiè—Dyí-Gbò-Ðɛ̀ Ɓè Kè Kpáná Ɓè (8:04)

• Xwɛ̀ xwéɖé-dù ɖò ɓɛ́ìn xwéɖé-dù Geɖepɔɔ ɓiè-ɓièɔ̀ nyuɛ ti séín nyɛ́?

• Ðɛ́ wóɖóìn-nyɔ̀ ɖò ɓɛ́ìn nyuɛ ɓɛ́ xwéɖé-dù Geɖepɔɔ ɓiè-ɓièɔ̀ ké múà nì, ɓɛ́ nyɔ séín ké ɖé ɖɛ cɛ̃́ kɛ́?—Dyé cɛ̃́ɛ́-ɖɛ̀ nìà kɛ dyi-dyé-ɖɛ̀ kĩ́ín-kĩ́ínɔ̀.

• Ðɛ́ ɓɛ́ìn nyuɛ ɓɛ́ ɔ ké mú kàmà ɓɛ́ ɓè ké dyí poìn ɓɛ́ ɓè ké ɖɛ cɛ̃́ kɛ́?

Ðé Éézùɖùɛ̀-ɓòɖòɔ̀ kɔ̃ɛɛ, Jɛhova cɛ̃ɛ ma xwéɖé-dù ɓè gbo, ɓɛ́ wa ké ma Baɓoɔ dɔ́ɔ́ kɔ̃in dèìn ti séín. Zà Dìtɔ̀wáɖánámɛ̀ 6:6, 7 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwɛ̀ m̀ ɓɛ́ìn Baɓo hwìè-da-zàìn-wùɖù nìà kɛ kũ̀à mú nyùɛ̀n nyɛ́?

Fɔ̀nɔ̀-hwòɖò ɓè ɓɛ́ wa ɓá xwéɖé-dùɔ̀ Geɖepɔɔ ɓiè jè dyíɛ:

• Dyé ti ɓó dyí-poìn-poìn ɓèɔ̀ jè.

• Zà Baɓo-nɔ̀ɔ̀ ɖò ɓɛ́ nì xwéɖé-dùɔ̀ mu múàùn dyi kpáìn nyɛɛ wuɖuún, ɓɛ́ ɓè kéɛ dɔ́ɔ́ kɔ̃in dèìn.

• Ɔ jù ké m̀ dyi dyú mɛ́nɛ́ɛ́ ɓè ɓéɖéín, zà nyuu-ɖɛ̀ ɓè ɓó dyú ɓè bììɛɛ jw.org kɔ̃.

• Ɔ jù ké m̀ dyi nyɔ gmɔ̀ ɓè ɓéɖéín, ɓè dèìn cɛ̃́ɛ́-ɖɛ̀ ɖò nì jw.org kɔ̃ ɓó nyɔ gmɔ̀ ɓè bììɛɛ dɔ́ɔ́ kɔ̃in.

• M̀ kè nì dyú ɓèɔ̀ mɛ nyu Baɓo-nɔ̀ɔ̀ ɖò xwai.

• Ɓè dyé víɖò ɖò dyi ɖé jw.org kɔ̃, ɓɛ́ ɓè kéɛ dɔ́ɔ́ kɔ̃in dèìn.

SṸÌN-XWÍNÍÍN

Jɛhova mɔ́ ɓɛ́ wóɖóìn-nyɔ̀ ɓè ké waà dyú ɓèɔ̀ mú ɖɛ̀ɓɛ̀, kè ɓɛ́ wa ké wa kpeɖe zà, ɔ kè ɓɛ́ wa ké wa dyí gmɔ̀; ké ɔ mɔ́ ɓɛ́ dyú ɓè ké waà wóɖóìn-nyɔ̀ ɓè kpéín dyé, kè ɓɛ́ wa ké wa wuɖu nyu; ké ɔ mɔ́ ɓɛ́ xwéɖé-dù ɓè ké dyí poìn ɓɛ́ wa ké Geɖepɔɔ ɓiè.

Ðɛ-kɔ̃in-kpa-kpa

• Xwɛ̀ wóɖóìn-nyɔ̀ ɓè ɓɛ́ìn waà dyú ɓèɔ̀ kpeɖe zàà kè wa dyí gmɔ̀ɔ̀ kɛ́?

• Xwɛ̀ dyú ɓè ɓɛ́ìn tɛ̀mɛ̀ìn kà wa dè waà wóɖóìn-nyɔ̀ ɓèɔ̀ dya kɛ́?

• Ðɛ́ mɔ̀ kpáná ɓè ɓɛ́ wa sɔ̀ìn ɖé ti ɖò wáká po-po wíkì séín ɓɛ́ xwéɖé-dùɔ̀ ké dyí poìn ɓɛ́ wa ké Geɖepɔɔ ɓiè kɛɛ múɛ́?

CƐ̃́ ÐƐ PÀÐÀ

Ðɛ́ mɔ̀ cɛ̃́ɛ́-ɖɛ̀ ɓè ɓɛ́ wa mu nì dyúɔ̀ ti dyéìn ɖé ɔ nyɔ-vɛ̀nɛ̀-tììn nyɛ́?

“Cɛ̃́ɛ́-Ðɛ̀ Mɛ̀nɛ̀ìn-Ðò Ɓè Ɓɛ́ Dyú Ɓè Kɔ̃̀ Wa Ké Cɛ̃́ Kɛ” (Wóɖó Nyíɔún! Nɔ̀. 2 2019)

Cɛ̃́ náún-po-wùɖù ɓè ɓɛ́ Baɓoɔ nyí nyɔ ɓè ɓɛ́ wa gmɔ̀ waà wóɖóìn-nyɔ̀ ɓè ɓɛ́ wa ɖà súá kpá kɛ gboɛɛ jè.

“Ðɛ́ Baɓoɔ Cɛ̃ Ɓá Wóɖóìn-Nyɔ̀ Ɓè Ðàà Súá Kpá Kɛɛ Gbo Gmɔ̀ Jè Dyíɛ́?” (Ðúú-kɔ̃-cèè-ɖɛ̀)

Dyé kà gàa ɖò ɓɛ́ ɔ se ma dyú gmɛ̀ìn dyuòɛɛ nyuu-ɖɛ̀ nyu ma mú wóɖóɛ kɛ.

Jɛhova Tɛ̀mɛ̀ìn Ma À Ðɛ, Ɓɛ́ À Ké À Dyú Ɓèɔ̀ Gmɛ̀ìn (5:58)

Cɛ̃́ kà ɓà ɓè ɓɛ́ìn gbo-kpɔ̃ìn-kpɔ̃ìn nì wa kè waà dyú-gàà ɓè pṹa kɛɛ dyi kùɛ̀n nyɛ.

“Xwɛ̀ Ɓà Ɓè Ɓɛ́ìn Waà Dyú-Gàà Ɓè Bũ̀ìn Xwɛ̃́ìn Kánáá Pu Kɛ́?” (Dyí-Gmɔ̀ìn-Gbò-Cèè-Ðɛ̀ɔ̀, Gbàɖà-Gbàɖà 1, 2011)