Gã Péé Mɔɔ Múà-Nyu-Nyu Ɓɛ́ Ɔ Dè Jɛhova Hwìɖìiɛ

Jɛhova mɔ̀ “múà Geɖepɔɔ.” (1 Tímétè 1:11, NWT) Ɔ mɔ́ ɓɛ́ à ké múàùn kpá, kè ɓɛ́ à ké à cĩ́-cĩ́ɔ̀ múàùn dyi kpáìn. Ɔ dè ɔ hwìɖìi ɔ jù ké à dyi ti wáká po ɓɛ́ à ké fɔ̀ ní. Ðé cɛ̃́ɛ́-ɖɛ̀ nìà kɛ múɛɛ, à mu kà à ɓɛ́ìn à fɔ̀-tìɔ̀ kũ̀à mú nyuɛ̀n ɓɛ́ ɔ ké à hwòɖò dyi dè, kè ɓɛ́ ɔ ké Jɛhova hwòɖò dyi dè kɛɛ jè cɛ̃́ìn.

1. Ðɛ́ mɛ nì à hwìɖìi ɔ jù ké à dyi péé mɔɔ múà-nyu-nyu gãa níìn nyɛ́?

M̀ dyi fɔ̀ùn nììn, ɖɛ́ m̀ ɖɛ̀ɓɛ̀ ɓɛ́ m̀ ké nyu kɛ́? Nyɔ ɖíɛ́ ɓè ɖɛ̀ɓɛ̀ ɓɛ́ wa ké fɔ̀ ɖé taún, ɓɛ́ wa ké céè-ɖɛ̀ wuɖuún zà mɔɔ wɛ́ɖɛ́ ɖùù gbo to mɔɔ dyi-dyé-ɖɛ̀ dyi dyé mɔɔ íntànɛ́ɛ̀ kɔ̃ mu. Nyɔ tɔ̀ɔ̀ ɓè mɔ̀ùn ɖɛ̀ɓɛ̀ ɓɛ́ wa kè ɓàto ɓè ké ɖɛ ɓè nyu. Ɔ hwɔìn-kà, dyi-té-té mɔɔ níɔ-kpá-kpá mɔɔ gĩ́ìn vɔ̃-vɔ̃. Ðɛ séín ɖò ɓɛ́ à mu mú ɖɛ̀ɓɛ̀ìn à ké nyuɛɛ, à kɔ̃̀ à ké vɔ̃ kóɖó-kóɖó, ɓɛ́ péé mɔɔ múà-nyu-nyu à mu gãùn wɛ̃ɛ ké ɖɛ ɓɛ́ ɔ “dè Bounɓoɔ̀ hwòɖò dyiɛɛ” jù. (Ìfísĩ̀ɔ̀ 5:10) Ɔ kpa ɖɛ ɓɛ́ à ké ɖɛ nìà kɛ múin wɔ̃́, sepoɛɖe péé mɔɔ múà-nyu-nyu pàɖà ɓè ɓéɖé ɖɛ ɓè ɓɛ́ Jɛhova nyɛ́ múɛ. Ɔ hwɔìn kà, vɔ̃-vɔ̃ mɔɔ gbàɖàùn-po-po mɔɔ hwĩɔ̀-nyu-nyu. (Zà Wɛ́ɖɛ́ 11:5 wuɖuún.) Ðɛ́ mu à gbo kpáùn ɓɛ́ à ké péé mɔɔ múà-nyu-nyu nɔ̀mɔ̀ dyíin ɓè gã kɛ́?

Ɔ jù ké à dyi ɓàto ɓè ɓɛ́ wa ɖɛ̀ɓɛ̀ Jɛhova múɛɛ gã ní, wa mu à gbo kpáùn ɓɛ́ à ké péé mɔɔ múà-nyu-nyu ɓè ɓɛ́ wa nɔ̀mɔ̀ dyíin nyɛɛ gã. Kà à nyuà cɛ̃́ɛ ɖé cɛ̃́ɛ́-ɖɛ̀ ɖò ɓɛ́ à ɖà dyíin zi kɛ múɛɛ, “nyɔ ɓɛ́ ɔ kè hwòɖò-fɔ̀nɔ̀-nyɔ̀ naìn múɛɛ fɔ̀nɔ̀ hwòɖò.” Kɛɛ, ɔ jù ké à kè nyɔ ɓè ɓɛ́ wa se Geɖepɔɔ gma ɓèɔ̀ kpéín dyéɛɛ dyi mú naìn ní, nìí, à mu ‘mú gbɔɔ̀ùn.’—Nɔ́ɔ́ 13:20.

2. Xwíníínɔ̀ nyɛ́ kɔ̃̀ jè ɔ kpaà ɖɛ ɓɛ́ nyɔ kéà ti jĩ̀ kà à ɖú dyí ɓó péé mɔɔ múà nyu jè kɛɛ mú màìn nyɛ́?

Kɛbì péé mɔɔ múà-nyu-nyu à gã kɛ mɛ nɔ̀mɔ̀ dyíin nyɛɛ, à kɔ̃̀ à ké mú ma kóɖó-kóɖó ɓó ti jĩ̀ kà à mu dyí ɖúùn wɛ̃ɛ jè. À seɛ náa nyuín, à se ti pàɖà ɓéɖéɛ mu ɓó ɖɛ zi ɖɛ kpauń ɓè jè. Baɓoɔ po à kpéí kà à mɛ “nyùìn ti [à] ɓéɖéà kɛɛ kũ̀à mú nɔ̀mɔ̀ dyíin” nyɛ.—Zà Ìfísĩ̀ɔ̀ 5:15, 16 wuɖuún.

ÐE ÐƐ MÚIN CÁ

Cɛ̃́ kà m̀ ké ɖɛ ɓè gbɔ poɛ nyu nɔ̀mɔ̀ dyíin ɓá péé mɔɔ múà nyu jè dyíɛ.

3. Ɓàɖàìn péé mɔɔ múà-nyu-nyu ɓɛ́ ɔ se dyíin nɔ̀mɔ̀ kɛɛ dyí

Xwíníínɔ̀ nyɛ́ kɔ̃̀ jè à mɛ maà mú kóɖó-kóɖó ɓɛ́ à kéà péé mɔɔ múà à ké nyuɛɛ gã kɛ́? Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.

VÍÐÒ: Péé-Nyu-Nyu Nyɛ́ Ḿ Mɛ Gãɛ́? (4:39)

• Xwɛ̀ kú-ɖáɓá-gbàà-vɔ̃-pèè nì ma ɖé ti sùà múɛɛ kè péé mɔɔ múà-nyu-nyu ɖíɛ́ ɓè nì zɛ̃̀ɛ̀ kɛɛ nyu hwɔìn nyɛ́?

• Ðé víɖòɔ̀ múɛɛ, ɖɛ́ Dànyá cɛ̃́ ma ɓá péé mɔɔ múà nyu jè dyíɛ́?

Zà Wóɖómà 12:9 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwɛ̀ vɔ̀sì nìà kɛ mɛ nyu m̀ gbo kpáa ɓɛ́ m̀ ké péé mɔɔ múà-nyu-nyu nɔ̀mɔ̀ dyíin gã kɛ́?

Ðɛ́ mɔ̀ ɖɛ ɖíɛ́ ɓè ɓɛ́ Jɛhova nyɛ́ múɛ́? Zà Nɔ́ɔ́ 6:16, 17 kè Gàɖézìà 5:19-21 wuɖuún. M̀ ɖà vɔ̀sì ɖò-ɖò ɓèɔ̀ wuɖuún zàà hwɔ ní, nìí, ɓè dèìn dyi-diè-ɖɛ̀ nìà kɛ dɔ́ɔ́ kɔ̃in:

• Ðɛ ɓè ɓɛ́ wa cɛ̃à jè ɖé vɔ̀sì ɓè nìà kɛ múɛɛ, waà nyɛ́ nì péé mɔɔ múà-nyu-nyu ɓè nì zɛ̃̀ɛ̀ kɛɛ múɛ́?

Kà m̀ ké péé mɔɔ múà-nyu-nyu gãa nyu hwòɖò-fɔ̀nɔ̀-kà kɛ

Diè m̀ mìɔùn dyi:

• Ðɛ́ kɛ́? Ɔ ɓéɖé ɖɛ ɖò ɓɛ́ Jɛhova nyɛ́ múɛɛ̀?

• Tiɔ̀ nyɛ́? Ɔ mu ɖɛ zi ɖɛ kpauń ɓè ḿ ké nyuɛɛ ti dyí ɖúùnǹ?

• Nyɛ́ kɛ́? Ɔ muɛ nyuùn ɓɛ́ ḿ kè nyɔ ɓè ɓɛ́ wa se Jɛhova mú ɖɛ̀ɓɛ̀ kɛɛ ké bũ̀in xwɛ̃́ìnǹ, mɔɔ ḿ ké wa gbo wùɖù kpɛ́-kpɛ́ɛ̀?

Ɔ nɔ̀mɔ̀ dyíin ɓɛ́ nyɔ ké nàdì dyí ɓàɖàìn vɛ̃in cá. Ðɛa kɔ̃̀ jè à kɔ̃̀ à kéà péé mɔɔ múà-nyu-nyu séín ɖò ɓɛ́ à dyé ɓɛ́ ɔ ké ɖɛ gbà jù ɓó à bììɛɛ dyí ɓàɖàìn nyɛ̀

4. Nyùìn nì tiɔ̀ kũ̀à mú nɔ̀mɔ̀ dyíin

VÍÐÒ: Ðɛ́ Kɔ̃̀ Nì Tiɔ̀ Kpé Kɔ̃ún Wɛ̃́? (2:45)

• Ðíí-gàà nìà víɖòɔ̀ múɛ se ma ɖɛ gbà ɖò dyi dyéɛń nì dyɛo, kɛɛ kà ɔ nyu ma ɔ tiɔ̀ kũ̀à mú nyuɛ̀n nyɛɛ nyu ma ɔ ɖɛ́ bũ̀ kɛ́?

Zà Fèɖópĩ̀ɔ̀ 1:10 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwɛ̀ vɔ̀sì nìà kɛ ɓɛ́ìn à gbo kpáa ɓɛ́ à ké ti jĩ̀ kà à mu dyí ɖúùn ɓó múà nyu jè kɛɛ gbɔ po kɛ́?

5. Gã péé mɔɔ múà-nyu-nyu nɔ̀mɔ̀ dyíin ɓè

Péé mɔɔ múà-nyu-nyu ɖíɛ́ ɓè se Jɛhova hwìɖìi dè dyɛo, kɛɛ múà-ɖɛ̀ pàɖà ɓè nì ɓó ɓɛ́ à ɓɛ́ìn nyuɛ kɛ. Zà Ìkíɖísìásì 8:15 kè Fèɖópĩ̀ɔ̀ 4:8 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Ðɛ́ mɔ̀ péé mɔɔ múà-nyu-nyu nɔ̀mɔ̀ dyíin ɓɛ́ m̀ ɖɛ̀ɓɛ̀ múɛ́?

SṸÌN-XWÍNÍÍN

Jɛhova mɔ́ ɓɛ́ à ké péé mɔɔ múà-nyu-nyu nɔ̀mɔ̀ dyíin ɓè gã ɓɛ́ à ké wa múàùn dyi kpáìn.

Ðɛ-kɔ̃in-kpa-kpa

• Ðɛ́ mɔ̀ péé mɔɔ múà-nyu-nyu ɓè ɓɛ́ Kɛ́ɖɛ́ì ɖeín-sí-nyɔ̀ ɓè mɛ ɓàɖàìn dyéɛ́?

• Xwíníínɔ̀ nyɛ́ kɔ̃̀ jè à mɛ maà mú ɓá ti jĩ̀ kà à ɖú dyí ɓó péé mɔɔ múà nyu jè kɛɛ jè dyíɛ́?

• Xwíníínɔ̀ nyɛ́ kɔ̃̀ jè m̀ mɔ́ ɓɛ́ m̀ kéà péé mɔɔ múà-nyu-nyu ɓɛ́ ɔ dè Jɛhova hwìɖìiɛɛ gã kɛ́?

CƐ̃́ ÐƐ PÀÐÀ

Cɛ̃́ nyɔ ɓéɖé péé mɔɔ múà à ké nyuɛɛ gã-gã kpé kɔ̃ún wɛ̃ɛ jè.

“Jɛhova Zàse Ɓè Po Dyi-Dyé-Ðɛ̀ Mɔɔ Céè-Ðɛ̀ Mɔɔ Wɛ́ɖɛ́ Ðíɛ́ Ɓè Ɓɔ́íì?” (Ðúú-kɔ̃-cèè-ɖɛ̀)

Dyé kà m̀ ɓɛ́ìn ɖɛ ɓè gbɔ poɛ nɔ̀mɔ̀ dyíin ɓá péé mɔɔ múà nyu jè dyíɛ.

“Péé Mɔɔ Múà M̀ Nyuɛ Nì M̀ Kpáná Dyí Nyuɛńǹ?” (Dyí-Gmɔ̀ìn-Gbò-Cèè-Ðɛ̀ɔ̀, Kpadyua 15, 2011)

Ðé nɔ́ɔ́ mɔ̀à “Ḿ Zi Ma Ní Nyɔ-Mú-Nyɛ́-Nyɛ́ɔ̀ Wɔ̃” kɛ múɛɛ, dyé xwíníín kɔ̃̀ jè gàa ɖò zĩàìn ma péé mɔɔ múà-nyu-nyu ɔ ɖɛ̀ɓɛ̀ ma múɛɛ gbo kɛ.

“Baɓoɔ Zĩàìn Cĩ́-Kà Gbo” (Dyí-Gmɔ̀ìn-Gbò-Cèè-Ðɛ̀ɔ̀, Fóɖó-Vĩ̀ 1, 2010)

Dyé kà màa ɖò nyu ma ɖɛ nɔ̀mɔ̀ dyíin gbɔ poɛ ɓá péé mɔɔ múà-nyu-nyu ɓɛ́ ɔ ɓéɖé nɔ́ɔ́ ɓè ɓá gĩɔ-nyɔ̀ mɔɔ zùù ɓè jè dyíɛ.

Ɓàɖàìn Péé Mɔɔ Múà-Nyu-Nyu Ɓɛ́ Ɔ Ɓéɖé Hwĩɔ̀-Nyu-Nyu Kɛɛ Dyí (2:02)