CƐ̃́Ɛ́-ÐƐ̀ 60
Gã̀ Dyúa Muɛń Dyi Kánáá Pu
Ðé Baɓo-cɛ̃́ìn-cèè-ɖɛ̀ gàná nìà kɛ múɛɛ, m̀ ɖà ɖɛ pàɖà cɛ̃́ ɓá Jɛhova jè dyí. Ðɛ ɓè ɓɛ́ m̀ ɖàà cɛ̃́ɛ ɖàa nyu ké m̀ ɖà ɔ mú ɖɛ̀ɓɛ̀, ké ɔ ɖàa nyu ké m̀ ɖà m̀ mìɔùn wáɖáún zà ké m̀ ɖà níɔ kpá dyɛ̀. Ɔ se ná nììn, m̀ nìɛ̀ dyɛ̀ hwìɖìi poɛ̀n ɓɛ́ m̀ kéɛ náa nyu ɖé dyúa. Kɛɛ, nì dyúa-mu-muɔ̀ se ɓó níɔ-kpá-kpáɔ̀ gbo sèìn. M̀ ɓɛ́ìn Jɛhova bũ̀in xwɛ̃́ìn nìɛ̀ kánáá pu ɓó sè-ná-sèɛ̀ tiín. Xwɛ̀ kɛ́?
1. Xwíníínɔ̀ nyɛ́ kɔ̃̀ jè m̀ mɛ kùàìn gbo-kpɔ̃ìn-kpɔ̃ìn nìà m̀ kè Jɛhova pṹa kɛɛ dyi kánáá pu kɛ́?
À ɓéɖé ɓɛ́ à ké vɔ̃ kóɖó-kóɖó ɓɛ́ à ké gbo-kpɔ̃ìn-kpɔ̃ìn nìà à kè Jɛhova pṹa kɛɛ dyi kùìn tee. Xwíníínɔ̀ nyɛ́ kɔ̃̀ jèɛ́? “Ɓɛ́ à ní kɔ̃̀ ɖà hwìì sɔ̀ìn.” (Híìbúɖúù 2:1) Ðɛ́ ɓɛ́ìn à gbo kpáa ɓɛ́ à ké Jɛhova gboi kpɔ̃ teeɛ́? À ɓɛ́ìn Geɖepɔɔ-wùɖù-wáɖá-kũ̀àɔ̀ nyuɛ tee, ɓɛ́ à ké hwìè tɔ̀ɔ̀ ɓè dyi mɔ́ ɓɛ́ à ké à Geɖepɔɔ bìì kũ̀à nyu mìɔ ɖekè. (Zà Fèɖópĩ̀ɔ̀ 3:16 wuɖuún.) Jɛhova bìì kũ̀à-nyu-nyu mɔ̀ ɖɛ zi dyíin nɔ̀mɔ̀ùn à ɓɛ́ìn nyuɛ ɖé à cĩ́-cĩ́ɔ̀ múɛ!—Wɛ́ɖɛ́ 84:10.
2. Ðɛ́ kà kò ɖò m̀ mɛ nyu teeɛ́?
Baɓo ɖɛ-cɛ̃́-cɛ̃́ nìà kɛ nìà gbɔ hwɛ̀ìn dyiɛń, kɛɛ kà m̀ mɔ̀à Kɛ́ɖɛ́ì ɖeín-sí-nyɔ̀ kɛɛ, nì cĩ́-cĩ́ɔ̀ mu dyúa muùn kánáá pu. Baɓoɔ ɖá à mɛ “kpɔ̃ nyɔ ɖìè ɓɛ́ [à] ɖàà jù . . . kɛɛ gboi.” (Ìfísĩ̀ɔ̀ 4:23, 24) Kà nì muà Geɖepɔɔ wuɖuɔ̀ cɛ̃́ìn, ké nì muà dyí-poìn-poìn ɓèɔ̀ mú muùn wɛ̃ɛ, nì mu ɖɛ ɖìè ɓè ɓá Jɛhova kè ɔ kpeɖe ɓèɔ̀ jè dyíɛɛ cɛ̃́ìn. Mɔ́ hwìè ɓè dyi ɖé nì cĩ́-cĩ́ɔ̀ mú ɓɛ́ m̀ ké ɔ kpeɖe ɓèɔ̀ kíɖíí sí kóɖó-kóɖó. Gã̀ ɖɛ séín ɖò m̀ kɔ̃̀ m̀ ké gbo zĩàìn nyɛɛ gbo zĩàìn dyi tee, ɓɛ́ m̀ ké Jɛhova múàùn po.
3. Xwɛ̀ Jɛhova mu m̀ gbo kpáùn ɓɛ́ m̀ ké dyúa mu kɛ́?
Baɓoɔ ɖá: “Geɖepɔɔ . . . Mìɔùn muɛ nyuùn ɓɛ́ ɓè ké gbɔ hwɛ̀. Ɔ mu ɓè dyi kùìn, ké ɔ mu ɓè kpé nyíìn, ké ɔ mu ɓè hìɖì-kpà nɔ̀mɔ̀ dyíin kɔ̃ poùn.” (1 Píɖɛ̀ 5:10) À séín dyé mú-dɔ̃̀-dɔ̃̀ ɓè dyí. Kɛɛ Jɛhova nyí à ɖɛ ɓè à kɔ̃̀ à ké ɓéɖé ɓɛ́ à ké wa wɔ̃ ziɛ. (Wɛ́ɖɛ́ 139:23, 24) Ɔ ɖá ɔ muɛ nyuùn ɓɛ́ ɓè hwòɖò ké wɔ̃́, ɓɛ́ ɓè ké kpé ɓɛ́ìn, ɓɛ́ ɓè ké ɔ bìì kũ̀à nyu jàà-kà.—Zà Fèɖópĩ̀ɔ̀ 2:13 wuɖuún.
ÐE ÐƐ MÚIN CÁ
Cɛ̃́ kà m̀ ɓɛ́ìn dyúa muɛ teeɛ kè kà Jɛhova mu m̀ mana kɔ̃ poùn wɛ̃ɛ jè.
4. Wùɖù nì ɓàto xwɛ̃́ìn bũ̀inɔ̀ gbo tee
Ɓaà-ɓaà kè Baɓoɔ cɛ̃́-cɛ̃́ ɖà m̀ gbo kpá ɓɛ́ m̀ ké Jɛhovaa ɓàto jù. Xwɛ̀ nyuu-ɖɛ̀ ɓè nìà wɛ ɓɛ́ìn m̀ gbo kpáa ɓɛ́ m̀ ké ɔ bũ̀in xwɛ̃́ìn mìɔ kɛ́?
Zà Wɛ́ɖɛ́ 62:8 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Ɓɛ́ m̀ ké gbo-kpɔ̃ìn-kpɔ̃ìn nìà m̀ kè Jɛhova pṹa kɛɛ dyi kùìn ní, xwɛ̀ m̀ ɓɛ́ìn nì ɓaà-ɓaàɔ̀ dyíin nɔ̀mɔ̀ìn nyɛ́?
Zà Wɛ́ɖɛ́ 1:2 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Ɓɛ́ m̀ ké gbo-kpɔ̃ìn-kpɔ̃ìn nìà m̀ kè Jɛhova pṹa kɛɛ dyi kùìn ní, xwɛ̀ m̀ ɓɛ́ìn dyúa muɛ ɖé nì Baɓo wuɖuún-zà-zàɔ̀ múɛ́?
Xwɛ̀ m̀ ɓɛ́ìn Baɓoɔ cɛ̃́-cɛ̃́ ɓó m̀ mìɔùn bììɛɛ kpáná kɔ̃ún dyéɛ mìɔ kɛ́? Ɓɛ́ m̀ ké ɔ fɔ̀nɔ̀-hwòɖò ɖíɛ́ ɓè dyé ní, po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.
Fɔ̀nɔ̀-hwòɖò ɓèɔ̀ nyɛ́ nì ɖé víɖòɔ̀ mú ɓɛ́ m̀ ɓɛ́ìn kũ̀à mú nyùɛ̀n nyɛ́?
Ðɛ́ nì mu jè cɛ̃́ɛ mɔ́ùn wɛ̃́?
5. Sɔ́ zùùn-ɖɛ̀ ɓè dyí
Ðɛ-dyí-sɔ́-sɔ́ ɖé Jɛhova bìì kũ̀à-nyu-nyu múɛɛ mu m̀ gbo kpáùn ɓɛ́ m̀ ké dyúa mu kánáá pú. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.
Ðé víɖòɔ̀ múɛɛ, xwɛ̀ Kàmàwúɖúùn nyu ma kpáná dyíɛ dyììn ɖé zùùn-ɖɛ̀ dyí-sɔ́-sɔ́ múɛ́?
Nyɔ séín ní jàɖàìn ɓóɖó-dù kà kò ɖò kɔ̃ ɓó Geɖepɔɔ-wùɖùɔ̀ wáɖá jè. Kɛɛ, à séín ɓɛ́ìn ɖɛ ɓè à ɓɛ́ìn nyuɛ kɛɛ dyí sɔ́ɔ. Zà Nɔ́ɔ́ 21:5 wuɖuún, ɓɛ́ ɓè kéɛ dɔ́ɔ́ kɔ̃in dèìn ɖɛ ɓè nì mu mɔ́ùn ɓɛ́ m̀ ké dyí sɔ́ ɖé . . .
dyí-poìn-kpòòɔ̀ múɛ.
Geɖepɔɔ-wùɖù-wáɖá-kũ̀àɔ̀ múɛ.
Xwɛ̀ hwìè-da-zàìn-wùɖù nìà ɖé vɔ̀sìɔ̀ múɛɛ ɓɛ́ìn m̀ gbo kpáa ɓɛ́ m̀ ké nì dyí-sɔ́-ɖɛ̀ɔ̀ nyu kɛ́?
Dyí-sɔ́-ɖɛ̀ ɓè m̀ ké jè hwìɖìi poìn nyɛ
Nɔ̀mɔ̀ìn nì ɓaà-ɓaàɔ̀ dyíin.
Zà Baɓo gànáà wuɖuún.
Vɔ̃ ɓɛ́ m̀ ké nyɔ séín dyí dyuò ɖé nì dyí-poìn-kpòòɔ̀ mú.
Dè nyɔ ɖò Baɓoɔ tɛ̀mɛ̀ìn gbɔ.
Jù pàníɛ̀ kpá gbo mɔɔ pàníɛ̀ jɛ́ɛ́.
M̀ dyi ɖíí-gàà jùìn, nyuɛ ɓɛ́ m̀ ké kpé ɓɛ́ìn ɓɛ́ m̀ ké mìnìsíwɔ́ɖɔ̀ sɛ́vɛ́ìn jù.
6. Kpáìn fɛ̀ɛ̀ múàùn dyi ɓó sè-ná-sèɛ̀ tiín!
Zà Wɛ́ɖɛ́ 22:26 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Ðɛ́ m̀ ɓɛ́ìn nyuɛ ɓɛ́ m̀ ké fɛ̀ɛ̀ múàùn dyi kpáìn kàùn kè ɓó sè-ná-sèɛ̀ tiín nyɛ́?
SṸÌN-XWÍNÍÍN
Gã̀ gbo-kpɔ̃ìn-kpɔ̃ìn nìà m̀ kè Jɛhova pṹa kɛɛ dyi kùɛ̀n dyi tee, kè ɓɛ́ m̀ ké zùùn-ɖɛ̀ ɓè dyí sɔ́. Nìí, nì mu fɛ̀ɛ̀ múàùn dyi kpáìn ɓɛ́ìn ɓó sè-ná-sèɛ̀ tiín!
Ðɛ-kɔ̃in-kpa-kpa
Xwíníínɔ̀ nyɛ́ kɔ̃̀ jè m̀ ɓɛ́àìn hwòɖò kɔ̃ dèɛ̀ kà Jɛhova mu m̀ gbo kpáùn ɓɛ́ m̀ ké ɔ ɓiè jàà-kà kɛ́?
Xwɛ̀ m̀ ɓɛ́ìn gbo-kpɔ̃ìn-kpɔ̃ìn nìà m̀ kè Jɛhova pṹa kɛɛ dyi kùɛ̀n nyɛ́?
Xwɛ̀ zùùn-ɖɛ̀ ɓè dyí-sɔ́-sɔ́ ɓɛ́ìn m̀ gbo kpáa ɓɛ́ m̀ ké dyúa mu kɛ́?
CƐ̃́ ÐƐ PÀÐÀ
Ðɛ́ kpa ɖɛ mìɔ ɖé Jɛhova gbo kɛ́, ɔ mɔ̀ m̀ ké ɔ ɓiè jè dyí ɓɔ́ɖɔ́ìn kpa dyúáɖòò mɔɔ m̀ ké ɔ jè gboi kpɔ̃ ɖé nì fɛ̀ɛ̀-wè gànáà múù?
Múà ɓɛ́ìn Jɛhova bìì jàà kũ̀à-nyu-nyɔ̀ ɖò xwa sɔ̀ɔ̀. Dyé kà nyɔ ɓɛ́ìn ɓéɖéɛ ɖeɛ.
Ɓéɖé Múà Ðe Dyììn Ðé Ðɛ-Cɛ̃́-Cɛ̃́ Kè Ðɛ-Hwìɖìi-Nàìn-Nàìn Mú (5:25)
Xwɛ̀ m̀ ɓɛ́ìn zùùn-ɖɛ̀ ɓè dyí sɔ́ɔ ɓɛ́ m̀ kéɛ nyu ɓɛ́ wa ké kpá kɛ́?
Xwíníínɔ̀ nyɛ́ kɔ̃̀ jè ɖɛ-hwɛ̀-hwɛ̀ ɖé zùùɔ̀ wáká kɔ̃ɛɛ kpaà ɖɛ kɛ́, ké xwɛ̀ m̀ ɓɛ́ìn ɖɛ hwɛ̀ɛ̀ kɛ́?
“Mu Dyúa—‘[Jɛhovaa] Wé Vɛ̀nɛ̀ɔ̀ Ðà Dyi Xwɛ̃́ìn’” (Dyí-Gmɔ̀ìn-Gbò-Cèè-Ðɛ̀ɔ̀, Dùò 15, 2009)