Sɔ́ Ðɛ Ɓè Dyí Ɓó Ðɛ-Hwìɖìi-Dyà-Hwɔ̀ɔ̀ Jè

Ɓó zɔ̃ séín xwíníín nyɛɛ, Jɛhovaa nyɔ ɓèɔ̀ gmɔ̀ hwìi, ɓɛ́ wa ké dyí poìn ɓó Ðɛ-Hwìɖìi-Dyà-Hwɔ̀ɔ̀ jè. Ɓó wíkì ɓè zià hwɛ̀ Ðɛ-Hwìɖìi-Dyà-Hwɔ̀ɔ̀ dyià síɛ kè wíkì ɓè kɔà ɓó ɔ ɖeín dyíɛ xwíníín nyɛɛ, à nyùìn ti kpa ɖɛ ɓè nìà kɛ kũ̀à mú ɓɛ́ à ké Jɛhova zùo-po-po kè ɓàìn-ɓàìn nyí ɓó mú-gbàìn-ɖɛ̀ɔ̀ jè. (Ìfí 1:3, 7) Ɔ hwɔìn-kà, à vɔ̃ kóɖó-kóɖó ɓɛ́ à ké nyɔ tɔ̀ɔ̀ ɓè ɖá, ɓɛ́ wa ké Ðɛ-Hwìɖìi-Dyà-Hwɔ̀ɔ̀ gbo dyi. Nyɔ ɖíɛ́ ɓè zàìn waà nyuu-ɖɛ̀ ɓè dyí ɓɛ́ wa ké pàníɛ̀ kpá-gbo ɓè jù ɓɛ́ wa ké áɓà 30 mɔɔ 50 tò ɓó Dunu-Tòɖò mɔɔ Zágìɖìɔ̀ dɛ̀nɛ̀ɔ̀ xwíníín. Nì muɛ mɔ́ùn ɓɛ́ m̀ ké nì kũ̀à-sɔ̃̀ɔ̀ kɔ̃ po ɖé wuɖu-wáɖá-kũ̀àɔ̀ mú ɓó Ðɛ-Hwìɖìi-Dyà-Hwɔ̀ muà wóɖóùn wɛ̃ tiínǹ? Ðɛ́ ɓɛ́ìn m̀ gbo kpáa ɓɛ́ nì nyuu-ɖɛ̀ ké mú wóɖóɛ́?

À nyu ɖɛ pàɖà tee ɔ jù ké à dyi ti ɖé dyúa sè ké à dyi ɖɛ dyí sɔ́ ní. (Nɔ́ 21:5) Kà Ðɛ-Hwìɖìi-Dyà-Hwɔ̀ɔ̀ ɖàà dyi xwɛ̃́ìn nyɛɛ, kàùn mɔ̀ ti ɓɛ́ à ké ɖɛ dyí sɔ́ɔ gbɔ dè. Poìn kà nì mu nì kũ̀à-sɔ̃̀ɔ̀ kɔ̃ poùn ɖé wuɖu-wáɖá-kũ̀àɔ̀ mú ɓó Ðɛ-Hwìɖìi-Dyà-Hwɔ̀ɔ̀ tiín nyɛɛ jè hwìɖìi, ké po ɖɛ m̀ kɔ̃̀ m̀ ké nyu ɓɛ́ m̀ ké nì dyí-sɔ́-ɖɛ̀ɔ̀ nyuɛɛ jè gbɔ. Nìí, ɓaà Jɛhova ɓɛ́ ɔ ké nì dúún-ku-kuɔ̀ mana kɔ̃ po.—1Jɔ̃́ 5:14, 15.

M̀ ɓɛ́ìn hwìè ɖíɛ́ ɓè kɔ̃̀ mú m̀ ɓɛ́ìn nì kũ̀à-sɔ̃̀ɔ̀ kɔ̃ poɛ ɖé wuɖu-wáɖá-kũ̀àɔ̀ mú ɓó Ðɛ-Hwìɖìi-Dyà-Hwɔ̀ɔ̀ tiín nyɛ jè hwìɖìi poɛ̀nǹ?