Dyéìn Jizɛɛ Nyuu-Ðɛ̀ɔ̀ Ɓɛ́ Wuɖu-Wáɖá-Kũ̀àɔ̀ Jè Ké M̀ Hwòɖò Kpɔ̃ Mìɔ

1. Ðɛ́ mɔ̀ ɖɛ dyúáɖò ɓɛ́ ɔ nyu ké Jɛhovaa nyɔ ɓèɔ̀ kò ɓó ɓóɖó-kpàà nyɔ ɓè gbo kɛ́?

ÐƐ DYÚÁÐÒ ɓɛ́ ɔ nyu ké Jɛhovaa ɓiè-nyɔ̀ ɓè kò ɓó nyɔ ɓè ɖáìn wa mìɔùn Kɛ́ɖɛ́ì ɖeín-sí-nyɔ̀ ɓèɛ gboɛɛ mɔ̀ kà wuɖu-wáɖá-kũ̀àɔ̀ jè nyuà wa hwòɖò kpɔ̃ɔa kɛ. (Tátɔ̀ 2:14) Tiɔ̀ ɖíɛ́ ɓè ɓaɖaín, ɔ ɓɛ́ìn mú kàmàà ɓɛ́ Geɖepɔɔ-wùɖùɔ̀ wáɖá jè ké m̀ hwòɖò kpɔ̃. Nì hwòɖò ɓɛ́ìn dyɛ̀ nìɛ̀ kà ɛ́ɖɔ̀ ɖò ɓɛ́ ɔ ku ma dúún wɛ̃ɛ hwòɖò nyu ma nìɛ kɛ. Ɔ ɖá, “Tiɔ̀ ɖíɛ́ ɓè ɓaɖaín, wuɖuɔ̀ wáɖá jè hwɔ ḿ kpéí fɔɔ cá.”

2. Ðɛ́ ɓɛ́ìn nyuɛ ɓɛ́ wuɖu-wáɖá-kũ̀àɔ̀ jè ké se à hwòɖò kpɔ̃ mìɔ ɓó tiɔ̀ ɖíɛ́ ɓè ɓaɖa kɛ́?

² Geɖepɔɔ kũ̀à tɔ̀ɔ̀ ɓè nyu jè ɓɛ́ìn à múàùn poɛ mìɔ ké ɔ zi wuɖu-wáɖá-kũ̀àɔ̀ jè dyí. Xwíníínɔ̀ nyɛ́ kɔ̃̀ jèɛ́? À ɓɛ́ìn ɖɛ ɓè sɔ̀ìn ɖéɛɛ dyéɛ wàɖà, ké à ɓɛ́ìn dyéɛ kà à kũ̀àɔ̀ wóɖó ɖɛín-ɖɛ̀ gboɛ ɔ jù ké à dyi Kĩ́-Dɔ̃̀ Hɔ́ɔ̀ ɓè kè gbo tɔ̀ɔ̀ ɓè po, ké à dyi wa xwa nɔ̀mɔ̀ìn, mɔɔ à dyi gbo-kpá-sɔ̃̀ tò ɓó gà-ɖɛ̀ ɓè tiín, mɔɔ à dyi à ɖíí ɓèɔ̀ kpéí po níɛ. À kpáìn gìɖìi kè ɖɛ̀ɓɛ̀ìn-ɖɛ̀ɓɛ̀ìn ɓɛ́ à dyéà ɔ jù ké à kè à ɖíí ɓèɔ̀ dyi kũ̀à nyu níɛɛ múàùn dyi, ké à dyuòɛ̀ dyí kà ɖɛ ɓè ɓɛ́ à nyu wa bììɛɛ dè wa hwòɖò dyiɛ. Kɛɛ, à ɖà dyɛ̀ wuɖu wáɖá ɓó zɔ̃ pàɖà xwíníín ɖé gbɛ̀ dyúáɖòɔ̀ mú, ké nyɔ xwéɖé wè mɔ̀ nyɔ tò ɖùù. Mɔɔ à ɓɛ́ìn nyɔ ɓè ɓɛ́ wa ɓɔ́ bɔ̃̀ nɔ̀mɔ̀ dyíinɔ̀ kɛɛ dyéɛ. À dyuòɛ̀ dyí ɖekè kà nyɔ ɓè mu bɔ̃̀ nɔ̀mɔ̀ dyíinɔ̀ mú nyɛ́ìn ɖé wé hwɛ̀ìn-gbɔ ɓè nìà kɛ múɛ. (Máf. 10:22) Ðɛ́ ɓɛ́ìn à gbo kpáa ɓɛ́ wuɖu-wáɖá-kũ̀àɔ̀ jè ké à hwòɖò kpɔ̃ mìɔ kɛ́?

3. Xwɛ̀ Ðúù 13:​6-9 nyu kà wuɖu-wáɖá-kũ̀àɔ̀ jè nyu ma Jizɛ hwòɖò kpɔ̃ɔ kɛɛ kɔ̃in zaìn nyɛ́?

³ À ɓɛ́ìn kà wuɖu-wáɖá-kũ̀àɔ̀ ké à hwòɖò kpɔ̃ɛ jè cɛ̃́ɛ dyììn ɖé Jizɛɛ nyuu-ɖɛ̀ɔ̀ jè hwìɖìi-poìn-poìn mú. Jizɛɛ se ma sa fɔɔ wuɖu-wáɖá-kũ̀àɔ̀ nyu-nyu mú. Ké ɔ nyu ma kũ̀à kóɖó-kóɖó kà tiɔ̀ nì ma ɖé dyúa muɛń nyɛ. (Zà Ðúù 13:​6-9 wuɖuún.) Kà géɖéè-gbà-dyí-gmɔ̀-nyɔ̀ ɓɛ́ ɔ ɖú ma zɔ̃ tã dyí ɓó féè-cù ɖò ɓɛ́ ɔ se ma ɓo ɖò tòɖòɛ̀n nìɛ gbo gmɔ̀ jèɛɛ, kàà Jizɛ ɖú ma zɔ̃ tã dyí, ɓɛ́ ɔ ké ma Júù-nyɔ̀ ɓè ɓɛ́ wa pàɖà se ma ɖùù tòɛɛ gbo wuɖu wáɖá. Kɛɛ, kà géɖéè-gbà-dyí-gmɔ̀-nyɔ̀ɔ̀ se ma kà féè-cùɔ̀ jè dyí sa kɛɛ, kà dyúáɖòɔ̀ kàà, Jizɛ se ma nyɔ ɓè mɔɔ wuɖu-wáɖá-kũ̀àɔ̀ jè dyí sa fɔɔ. Ɔ jèɛɛ, ɔ vɔ̃ ma kóɖó-kóɖó ɓɛ́ ɔ ké ma nyɔ ɓè hwòɖò dyi tó.

4. Ðɛ́ mɔ̀ ɖɛ hĩinyɛ ɓè ɓá Jizɛɛ nyuu-ɖɛ̀ ɓèɔ̀ dyí ɓɛ́ à mú jè cɛ̃ìn nyɛ́?

⁴ Ðé cɛ̃́ɛ́-ɖɛ̀ nìà kɛ múɛɛ, à mu kà Jizɛ nyuɛ ma tɛ̀mɛ̀ìn kà wuɖu-wáɖá-kũ̀àɔ̀ jè kpɔ̃ ma ɔ hwòɖò, jɛ́ɛ́ ɓó dɛ̀nɛ̀ mɛ̀nɛìn-ɖò hwɛ̀ìn-gbɔ ɔ ɓéɖé ma dà ɓóɖó-kpàà kɔ̃ɛ xwíníín nyɛɛ jè dɔ́ɔ́ kɔ̃in dèìn. Ɔ jù ké à dyi cɛ̃́ɛ́-ɖɛ̀ ɓè nì ɖé ɖɛ Jizɛ tɛ̀mɛ̀ìn ma kɛ múɛ cɛ̃́, ké à dyi ɔ nyuu-ɖɛ̀ ɓèɔ̀ dyéìn ní, ɔ mu à gbo kpáùn ɓɛ́ wuɖu-wáɖá-kũ̀àɔ̀ jè ké à hwòɖò kpɔ̃ zɛ̃̀ɛ̀. Ɓèà dyé ɖɛ hĩinyɛ ɓè kɔ̃̀ mú à ɓɛ́ìn Jizɛ ɖɛ xwaún cɛ̃́ɛ kɛ: (1) Ɔ vòìn ma Jɛhovaa mɔ́ɔ́-ɖɛ̀ nyu jè gbo, (2) ɔ dè ma Baɓo kpáá-ɖɛ̀ ɓè dyéɖé gbo, (3) ɔ dè ma Jɛhova hwòɖò kɔ̃ ɓɛ́ ɔ ké ma ɔ gbo kpá, ɔ kè (4) ɔ dèɛ̀ ma hwòɖò kɔ̃ kà nyɔ ɖíɛ́ ɓè mu ma ɖùù tòùn wɛ̃.

Ɔ VÒÌN MA JƐHOVAA MƆ́Ɔ́-ÐƐ̀ NYU JÈ GBO

5. Xwɛ̀ Jizɛ nyuɛ ma tɛ̀mɛ̀ìn kà ɔ vòìn ma Geɖepɔɔ mɔ́ɔ́-ɖɛ̀ nyu jè gbo kɛ́?

⁵ Jizɛ po ma ɖé kpé ɓó “bɔ̃̀ nɔ̀mɔ̀ dyíin ɓá Geɖepɔɔ kã́á-ɓòɖòɔ̀ jè dyíɛɛ” cɛ̃ jè, sepoɛɖe ɔ dyuòɛ̀ ma dyí kà ɔ mɔ̀ kũ̀à ɓɛ́ Geɖepɔɔ mɔ́ ɓɛ́ ɔ ké ma nyuɛ. (Ðúù 4:43) Jizɛ po ma wuɖu-wáɖá-kũ̀àɔ̀ jè kĩ́ín ɖé ɔ cĩ́-cĩ́ɔ̀ mú. Ké ɖé ɔ wuɖu-wáɖá-kũ̀àɔ̀ mánáín nyɛɛ, ɔ kpa ma nyɔ ɓè ɖɛ tɛ̀mɛ̀ìn ɖé “hwɔɖɔ ɓè [mú] kè hwɔɖɔ-kpàà ɓè” kɔ̃. (Ðúù 13:22) Ɔ tɛ̀mɛ̀ìn ma ɖeín-nà-nyɔ̀ tɔ̀ɔ̀ ɓè ɖɛ, ɓɛ́ wa ké ma wuɖu-wáɖá-nyɔ̀ ɓè jù.—Ðúù 10:1.

6. Xwɛ̀ wuɖu-wáɖá-kũ̀àɔ̀ kè Geɖepɔɔ-kũ̀à tɔ̀ɔ̀ ɓè ɓɛ́ à ɓɛ́ìn ɓéɖéɛ kɛɛ nyu gbo muɛ̀n nyɛ́? (Dyé dyi-dyé-ɖɛ̀ɔ̀ ɖekè.)

⁶ Zɛ̃̀ɛ̀ kɛɛ, wuɖu-wáɖá-kũ̀àɔ̀ mɔ̀ kũ̀à jɛ́ɛ́ ɓɛ́ Jɛhova kè Jizɛ mɔ́ ɓɛ́ à ké nyuɛ. (Máf. 24:14; 28:​19, 20) Wuɖu-wáɖá-kũ̀àɔ̀ kè Geɖepɔɔ-kũ̀à tɔ̀ɔ̀ ɓè muìn gbo gàná cá. Ɔ hwɔìn-kà, à po poo-ɖɛ̀ ɓè, mɔɔ à nyu kũ̀à ɖé Bɛ́fèò ɓɛ́ à ké wuɖu-wáɖá-kũ̀àɔ̀ sɔ̃ xwíɖíi dè. À tò gbo-kpá-sɔ̃̀ ɓó gà-ɖɛ̀ ɓè tiín, ɓɛ́ à ké à ɖíí ɓèɔ̀ gbo kpá ɖé kpóɖóún dyɛo, kɛɛ à nyuɛ náa ɓɛ́ ɔ ké wa gbo kpá ɓɛ́ wa ké wa zùùn-ɖɛ̀ ɓè ɓɛ́ ɔ ɖò mɔ̀à wuɖu-wáɖá-wáɖá kɛɛ dyúa kpaa ɓɛ́ìn ɖe. Ɔ jù ké à dyi wuɖu-wáɖá-kũ̀àɔ̀ ɖɛ-kpa-kpa dyí dyuò, ké ɔ dyi à hwìɖìi nì kà ɔ mɔ̀ kũ̀à jɛ́ɛ́ ɓɛ́ Jɛhova mɔ́ ɓɛ́ à ké nyuɛ ní, nìí, à mu kpéí kpáùn ɓɛ́ à ké wuɖu-wáɖá-kũ̀àɔ̀ nyu ti séín. Dyánò, ɓɛ́ ɔ mɔ̀ ɛ́ɖɔ̀ ɖé Hɔ̃̀gáɖè-ɓòɖòɔ̀ kɔ̃ɛɛ ɖá: “Ḿ dyàà ḿ mìɔùn hwìɖìi tee kà ɓɛ́ Geɖepɔɔ-kũ̀à ɖò se wuɖu-wáɖá-kũ̀àɔ̀ bɛ̃̀ìn síɛ ɓɛ́ìn fɔɔ kɛ; ɔ mɔ̀ kũ̀à jɛ́ɛ́ ɓɛ́ à ɓéɖéɛ.”

7. Xwíníínɔ̀ nyɛ́ kɔ̃̀ jè Jɛhova mɔ́ ɓɛ́ à kéà wuɖu wáɖá teeɛ́? (1 Tímétè 2:​3, 4)

⁷ Wuɖu-wáɖá-kũ̀àɔ̀ jè ɓɛ́ìn à hwòɖò kpɔ̃ɔ mìɔ ɔ jù ké à dyi nyɔ ɓè dya gmɔ̀ kà Jɛhova gmɔ̀à wa dya kɛɛ ní. Ɔ mɔ́ ɓɛ́ nyɔ ɓáún-ɓáún ké bɔ̃̀ nɔ̀mɔ̀ dyíinɔ̀ wɔ̃́, ɓɛ́ wa kéɛ jè dyi kpɔ̃. (Zà 1 Tímétè 2:​3, 4 wuɖuún.) Ɔ ná nì jèɛɛ, ɔ tɛ̀mɛ̀ìn à ɖɛ ɓɛ́ à ké bɔ̃̀ ɓɛ́ìn nyɔ póɛ̀n nìà kɛɛ cɛ̃ɛ ɓɛ́ìn nɔ̀mɔ̀ dyíin. Ɔ hwɔìn-kà, bòɖòsóò mɔ̀à Ðɛ̀ɓɛ̀ Nyɔ Ɓè Mú—Nyu Wa Ðeín-Nà-Nyɔ̀ Mú kɛɛ tò fɔ̀nɔ̀-hwòɖò ɓè ɓɛ́ wa ɓɛ́ìn à gbo kpáa, ɓɛ́ à ké dɔ́ɔ́ gbɔ dèɛ̀ ɓɛ́ìn, kè ɓɛ́ à ké nyɔ ɓè ɖeín-nà-nyɔ̀ mú nyuɛ ɓɛ́ìn nyɛ. Kɛbì nyɔ ɓè mɛ se ɖùù tò kàùn wɛ̃ɛ, wa mu ti ɓéɖéìn ɓɛ́ wa kéɛ náa nyu hwɛ̀ ɓɛ́ gà-dyé-dyé vɛ̀nɛ̀ɔ̀ ké dyi zi. Ðɛ à mu wa gbo cɛ̃ìn kàùn wɛ̃ɛ muɛ nyuùn ɓɛ́ wa ké ɖùù tò ɖé dyúa. Ɔ ɓɛ́ìn ná kpáa jɛ́ɛ́ ɔ jù ké à dyi wuɖu wáɖá tee ní.

Ɔ DÈ MA BAƁO KPÁÁ-ÐƐ̀ ƁÈ DYÉÐÉ GBO

8. Xwɛ̀ Jizɛ nyu ma ɔ tiɔ̀ kũ̀à mú nyùɛ̀n, sepoɛɖe ɔ dyuò ma Baɓo kpáá-ɖɛ̀ ɓè dyí jèɛ́?

⁸ Jizɛ wɔ̃́ ma kà Baɓo kpáá-ɖɛ̀ ɓè mu ma jàà kpáa nyuùn wɛ̃ɛ jè múin. Ɔ dyuòɛ̀ ma dyí kà ɔ wuɖu-wáɖá-kũ̀àɔ̀ mu ma zɔ̃ tã kè fáún-fáún dyí ɖúùn nyɛ̀nɛ̀ɛ̀ kɛ. (Dàn. 9:​26, 27) Ɔ dyuòɛ̀ ma dyí sɔ̀ìn ɖé kpáá-ɖɛ̀ mú ɓó ti kè kà ɔ mu ma mɛ́ɛ nyuùn wɛ̃. (Ðúù 18:​31-34) Sepoɛɖe Jizɛ dyuò ɖɛ mu ma kpáùn wɛ̃ dyí jèɛɛ, ɔ nyùìn ma ɔ tiɔ̀ kũ̀à mú nɔ̀mɔ̀ dyíin. Ɔ ná nì jèɛɛ, ɔ po ma ɖé kpé ɖé wuɖu-wáɖá-kũ̀àɔ̀ nyu-nyu mú, ɓɛ́ ɔ ké ma kũ̀à ɔ ɓéɖé ma kɛɛ gbɔ hwɔɔ ɓɛ́ìn.

9. Xwíníínɔ̀ nyɛ́ kɔ̃̀ jè Baɓo kpáá-ɖɛ̀ ɓè poà à kpéí ɓɛ́ wuɖuɔ̀ wáɖá jè kéà à hwòɖò kpɔ̃ mìɔ kɛ́?

⁹ Baɓo kpáá-ɖɛ̀ ɓè jè múin-wɔ̃́-wɔ̃́ ɓɛ́ìn nyuɛ ɓɛ́ wuɖu-wáɖá-kũ̀àɔ̀ jè ké à hwòɖò kpɔ̃ mìɔ. À dyuòɛ̀ dyí kà ɓɛ́ ɓóɖó-kpà nìà kɛ mu mánáín hwɛ̀ìn kàùn wɛ̃. À dyuòɛ̀ dyí ɖekè kà ɖɛ ɓè nìà kpáuń kàùn wɛ̃ kè kpeɖe ɓè ɓɛ́ nyɔ ɓè ɓéɖé zɛ̃̀ɛ̀ kɛɛ tɛ̀mɛ̀ìn ɖɛ Baɓoɔ cɛ̃ zɔ̃ɔ̀ ɓá wé hwɛ̀ìn-gbɔ ɓèɔ̀ jè dyíɛ. À dèɛ̀ dyéɖé gbo kà ɓɛ́ gbo-vɔ̃ìn-vɔ̃ìn ɓɛ́ ɔ nìà Mɛ́ɖékà kè Wɔ́ɖɔ́sìà-ɓòɖòɔ̀ pṹa kɛɛ nyuɛ ké kpáá-ɖɛ̀ ɓáà Kã́á nìà ɖé xwía kè kã́á nìà ɖé zɔ̃̀ìn nyɛ jè dyíɛ kpá jàà ɓó “ɖɛ séínɛ̀ mánáín-hwɛ̀-tìɔ̀” ɓaɖa kɛ. (Dàn. 11:40) À wɔ̃́ɔ múin ɖekè kà ɓɛ́ mɛɛ-ɖɛ̀ ɓɛ́ wa dèà mɛ ɖé Dànyá 2:​43-45 múɛɛ ɓo-pìɔ̀ mɔ̀ Mɛ́ɖékà-ɓòɖòɔ̀ kɛ. Kà kpáá-ɖɛ̀ɔ̀ nyuà tɛ̀mɛ̀ìn nyɛɛ, à dyuòɛ̀ dyí wáɖáá kà ɓɛ́ Geɖepɔɔ Kã́á-ɓòɖòɔ̀ mu nyɔùn-gɔ̃̀mànà ɓè mú gbɔùn kàùn wɛ̃. Kpáá-ɖɛ̀ ɓè nìà kɛ séín tɛ̀mɛ̀ìn dɛ̀ à ɓɛ̀ɖɛ̀ìn dyí ɖé tiɛ̀ múɛ, ké ɔ po à kpéí ɓɛ́ wuɖuɔ̀ wáɖá jè ké à hwòɖò kpɔ̃ mìɔ.

10. Hwìè tɔ̀ɔ̀ ɓè nyɛ́ kɔ̃̀ mú Baɓo kpáá-ɖɛ̀ ɓè po à kpéí ɓɛ́ wuɖuɔ̀ wáɖá jè ké à hwòɖò kpɔ̃ mìɔ kɛ́?

¹⁰ Baɓo kpáá-ɖɛ̀ ɓè nyí à bɔ̃̀ ɖò ɖekè ɓɛ́ à dyɔɔ̀ nyu cà-cà ɓó cɛ̃ jèɛ. Kawíɖí, ɓɛ́ ɔ mɔ̀ ɖíí-màà ɓɛ́ ɔ nì Geɖepɔɔ-kũ̀à nyuɛń ɖé Dòmíníkɛ̃̀-ɓòɖòɔ̀ kɔ̃ɛɛ ɖá, “Jɛhovaa nyɛ́nɛ́ín-ɖáìn-ɖɛ̀ ɓè ɓáà cĩ́-cĩ́ nɔ̀mɔ̀ dyíin ɖé dyúa kɛ jè dyíɛɛ po ḿ kpéí, ɓɛ́ ḿ ké nyɔ tɔ̀ɔ̀ ɓè bɔ̃̀ nɔ̀mɔ̀ dyíinɔ̀ gbo cɛ̃.” Ɔ cɛ̃ɛ ɖe, ké ɔ ɖá: “Ḿ dyi ɖɛ ɓè ɓɛ́ nyɔ ɓè nì mú mùɛ̀n zɛ̃̀ɛ̀ kɛɛ dyé ní, ɔ tɛ̀mɛ̀ìn ḿ dyí wáɖáá kà nyɛ́nɛ́ín-ɖáìn-ɖɛ̀ ɓè nìà kɛ se nì ɓó ḿ ɖòùn bììɛ, kɛɛ ɔ nì ɓó wa mɔ̀ùn bìì ɖekèɛ.” Baɓo kpáá-ɖɛ̀ ɓè po à kpéí ɓɛ́ à ké se ɓo dɔ̀, sepoɛɖe à dyuòɛ̀ dyí kà ɓɛ́ Jɛhova nì à wuɖu-wáɖá-kũ̀àɔ̀ ɖeín nyɛ. Ðiɖá, ɓɛ́ ɔ cĩ́ ɖé Hɔ̃̀gáɖè-ɓòɖòɔ̀ kɔ̃ɛɛ ɖá: “Àzédyà 11:​6-9 po ḿ kpéí, ɓɛ́ ḿ ké bɔ̃̀ nɔ̀mɔ̀ dyíinɔ̀ nyɔ tɔ̀ɔ̀ ɓè kè nyɔ ɓè ɓɛ́ wa nì kà wa seɛ dyi kpɔ̃uń muɛɛ gbo cɛ̃. Ḿ dyuòɛ̀ dyí kà ɓɛ́ nyɔ séín ɖò ɓɛ́ìn gbo zĩàìn ɖé Jɛhovaa kpé múɛ.” Ké Keɖesefɔ́, ɓɛ́ ɔ mɔ̀ ɖíí-gàà ɖò sɔ̀ìn ɖé Zã́ɓíà-ɓòɖòɔ̀ kɔ̃ɛɛ ɖá: “Kà Máà 13:10 nyuà cɛ̃ɛ kɛɛ, kà ɔ nì kpáuń. Bɔ̃̀ nɔ̀mɔ̀ dyíinɔ̀ nì dyi ɓèɛ̀n ɖé ɓóɖó-kpàà dà séín, ké ɔ mɔ̀ dya-dè-dè ɓó ḿ bìì ɓɛ́ ḿ ké gbo-kpá-sɔ̃̀ tò ɖé kpáá-ɖɛ̀ nìà kɛ jàà-kpá-kpá múɛ.” Baɓo kpáá-ɖɛ̀ ɓèɔ̀ nyɛ́ po m̀ kpéí ɓɛ́ m̀ ké wuɖuɔ̀ wáɖá teeɛ́?

Ɔ DÈ MA JƐHOVA HWÒÐÒ KƆ̃ ƁO Ɔ GBO KPÁ JÈ

11. Xwíníínɔ̀ nyɛ́ kɔ̃̀ Jizɛ kɔ̃̀ ɔ ké ma Jɛhova hwòɖò kɔ̃ dè ɓɛ́ ɔ ké ma ɔ gbo kpá ɓɛ́ ɔ ké ma kpé ɖé wuɖu-wáɖá-kũ̀àɔ̀ mú po teeɛ́? (Ðúù 12:​49, 53)

¹¹ Jizɛ dè ma Jɛhova hwòɖò kɔ̃ ɓɛ́ ɔ ké ma ɔ gbo kpá ɓɛ́ ɔ ké ma kpé ɖé wuɖu-wáɖá-kũ̀àɔ̀ mú po tee. Jizɛ màìn ma ɔ wuɖuɔ̀ mú dyɛo, kɛɛ ɔ dyuòɛ̀ ma dyí kà ɓɛ́ bɔ̃̀ nɔ̀mɔ̀ dyíinɔ̀ mu ma zà-ɖɛín vɛ̀nɛ̀ dyi poùn, ké ɔ mu ma gbo-vɔ̃-vɔ̃ ku wɔ̃ dyàùn wɛ̃. (Zà Ðúù 12:​49, 53 wuɖuún.) Sepoɛɖe cɔ́cì-nyɔ̀ vɛ̀nɛ̀ ɓèɔ̀ nyɛ́ wuɖu Jizɛ wáɖá ma kɛ mú jèɛɛ, wa vɔ̃ ma ɖé hwìè séín mú ɓɛ́ wa ké ma ɔ ɖáɓá. (Jɔ̃́ɔ́ 8:59; 10:​31, 39) Kɛɛ, Jizɛ wáɖá ma wuɖuɔ̀ tee, sepoɛɖe ɔ dyuòɛ̀ ma dyí kà ɓɛ́ Jɛhova nì ma ɓó ɔ gboɛ. Ɔ cɛ̃ɛ ma, ké ɔ ɖá: “Ɓà mɔ̀ nyɔ ɖoɓoà ḿ wɛ̃ɛ nì ɓó ḿ gbo. . . . Ɔ se ɓó ḿ gbo sɔ̀, sepoɛɖe ḿ nyu ɖɛ dè ɔ hwìɖìiɛɛ tee.”—Jɔ̃́ɔ́ 8:​16, 29.

12. Xwɛ̀ Jizɛ nyu ma ɔ ɖeín-nà-nyɔ̀ ɓèɔ̀ ti dyéɛ̀n ɓɛ́ wa ké ma wuɖuɔ̀ wáɖá tee ɖé nyɔ-gà-dyéìn-dyéìn xwaún wɛ̃́?

¹² Jizɛ dyàà ma ɔ ɖeín-nà-nyɔ̀ ɓèɔ̀ hwìɖìi kà wa ɓɛ́ìn ma Jɛhova hwòɖò kɔ̃ dèɛ̀ ɓɛ́ ɔ ké ma wa gbo kpá kɛ. Ɔ cɛ̃ɛ ma wa gbo tee kà ɓɛ́ Jɛhova mu ma wa gbo kpáùn kɛbì wa mɛ dyéìn ma wa gà kɛ. (Máf. 10:​18-20; Ðúù 12:​11, 12) Ɓó wa gà-dyéìn-dyéìnɔ̀ jèɛɛ, Jizɛ po ma wa náún ɓɛ́ wa ké ma mú ma. (Máf. 10:16; Ðúù 10:3) Ɔ cɛ̃ɛ ma wa gbo kà wa mɛ ɓɔ́ ma bɔ̃̀ nɔ̀mɔ̀ dyíinɔ̀ nyɔ ɓè ɓɛ́ wa se ma ɖùù tòɛ̀ mɔ́ kɛɛ kíɖíí nɛ́ìn nyɛ. (Ðúù 10:​10, 11) Ké ɔ cɛ̃ɛ ma wa gbo kà wa mɛ gbù ɔ jù ké wa dyi ma wa gà dyéìn níɛ. (Máf. 10:23) Wuɖu-wáɖá-kũ̀àɔ̀ jè kpɔ̃ ma Jizɛ hwòɖò, ké ɔ dè ma Jɛhova hwòɖò kɔ̃ dyɛo, kɛɛ ɔ se ma ɔ mìɔùn nàdì xwaún dyi po.—Jɔ̃́ɔ́ 11:​53, 54.

13. Xwíníínɔ̀ nyɛ́ kɔ̃̀ jè m̀ ɓɛ́àìn hwòɖò kɔ̃ dèɛ̀ kà Jɛhova mu m̀ gbo kpáùn wɛ̃́?

¹³ À mɔ́ Jɛhova gbo-kpá-sɔ̃̀ ɓɛ́ à ké kpé ɖé wuɖu-wáɖá-kũ̀àɔ̀ mú po tee ɖé nyɔ-gà-dyéìn-dyéìn xwaún zɛ̃̀ɛ̀. (Wɛ̀ɖ. 12:17) Xwíníínɔ̀ nyɛ́ kɔ̃̀ jè m̀ ɓɛ́àìn hwòɖò kɔ̃ dèɛ̀ kà Jɛhova mu m̀ gbo kpáùn wɛ̃́? Poìn Jizɛɛ ɓaà-wùɖù céèà ɖé Jɔ̃́ɔ́ wuɖu-kpà 17 múɛɛ jè hwìɖìi. Jizɛ ɓaà ma Jɛhova ɓɛ́ ɔ ké ma àpɔ́sò ɓèɔ̀ dyí gmɔ̀, ké Jɛhova jù ma ɓaà-wùdù nìà wɛ gɔ̃̀. Àpɔ́sò-cèè-ɖɛ̀ɔ̀ zaìn kà Jɛhova nyu ma àpɔ́sò ɓèɔ̀ gbo kpáa ɓɛ́ wa ké ma wuɖuɔ̀ wáɖá tee ɖé nyɔ-gà-dyéìn-dyéìn xwaún wɛ̃ɛ jè kɔ̃in. Ðé Jizɛɛ ɓaà-wùɖùɔ̀ múɛɛ, ɔ ɓaà ma ɖekè ɓɛ́ Jɛhova ké ma nyɔ ɓè ɓɛ́ wa mu ma àpɔ́sò ɓèɔ̀ wuɖuɔ̀ dyi kpɔ̃ùn wɛ̃ɛ dyí gmɔ̀. M̀ mɔ̀ nyɔ ɓèà ɖò. Jɛhova nì Jizɛɛ ɓaà-wùɖùɔ̀ gɔ̃̀ jùɛ̀n ke kánáá pu; Jɛhova mu m̀ gbo kpáùn kà dyúáɖò kà Ɔ nyu ma àpɔ́sò ɓèɔ̀ gbo kpáa kɛ.—Jɔ̃́ɔ́ 17:​11, 15, 20.

14. Xwɛ̀ à nyuɛ dyí dyuòɛ̀ kà à mu ɖé kpé poɛ ɓɛ́ìn, ɓɛ́ à ké wuɖuɔ̀ wáɖá teeɛ́? (Dyé dyi-dyé-ɖɛ̀ɔ̀ ɖekè.)

¹⁴ Kɛbì ɔ mɛ kàmà mú mìɔ ɓɛ́ bɔ̃̀ nɔ̀mɔ̀ dyíinɔ̀ cɛ̃ jè ké à kpéí po ɖé wé hwɛ̀ìn-gbɔ ɓè nìà kɛ múɛɛ, à mu gbo-kpá-kpá séín ɓɛ́ à mɔ́ kɛɛ dyéìn. (Ðúù 21:​12-15) Kà Jizɛ kè ɔ ɖeín-nà-nyɔ̀ ɓèɔ̀ nì ma kà kɛɛ, kàà à mɔ̀ùn táà nyɔ ɓè dyi ɓɛ́ wa kéɛ gbɔ po kɛbì wa mu ɖùù tòùn, mɔɔ wa se ɖùù tòɛ̀ mu ní, ké à ɓàɖàìn dòìn-zà-zà se xwíníín ɖò kɔ̃̀ɛɛ dyí. Ké ɔ jù ké wa dyi à kũ̀àɔ̀ sɔ̃ kɔ̃ pɛ́ìn ní, à ɖíí ɓèɔ̀ vɔ̃ ké wa cɛ̃ bɔ̃̀ nɔ̀mɔ̀ dyíinɔ̀ tee, sepoɛɖe wa se wa mìɔùn hwòɖò kɔ̃ dè, kɛɛ wa dè Jɛhova hwòɖò kɔ̃. Kà dyúáɖò kà Jɛhova nyí ma ɔ ɓiè-nyɔ̀ ɓè nì ma Kɛ́ɖɛ́ì ɖeín-sí-nyɔ̀ ɓèɔ̀ tiín nyɛɛ kpé kɛɛ, kàà ɔ nyí à kpé ɓɛ́ à ké “bɔ̃̀ nɔ̀mɔ̀ dyíinɔ̀ jè zio po gàná” ɓó ɔ hwòɖò-dyi-dè-kà. (2 Tím. 4:17) M̀ ɓɛ́ìn hwòɖò kɔ̃ dèɛ̀ jɛ́ɛ́ kà ɔ jù ké m̀ dyi Jɛhova hwòɖò kɔ̃ dè ní, nì mu ɖé kpé poɛ ɓɛ́ìn, ɓɛ́ m̀ ké wuɖuɔ̀ wáɖá teeɛ.

Ɔ DÈƐ̀ MA HWÒÐÒ KƆ̃ TEE KÀ NYƆ ƁÈ MU MA ÐÙÙ TÒÙN WƐ̃

15. Ðɛ́ tɛ̀mɛ̀ìn kà Jizɛ poìn ma ɖɛín-ɖɛ̀ jè hwìɖìi ɓá wuɖu-wáɖá-kũ̀àɔ̀ jè dyíɛ́?

¹⁵ Jizɛ poìn ma ɖɛín-ɖɛ̀ jè hwìɖìi ɓá wuɖu-wáɖá-kũ̀àɔ̀ jè dyí. Ðɛ nìà wɛ kpá ma ɔ gbo ɓɛ́ wuɖu-wáɖá-kũ̀àɔ̀ jè ké ma ɔ kpéí po. Ɔ hwɔìn-kà, ɖé 30 C.E. mánáín nyɛɛ, Jizɛ dyéɛ ma kà ɓɛ́ nyɔ pàɖà ɖà ma ti dyé ɓɛ́ wa ké ma ɔ ɖùù gbo tòɛ̀, ké ɔ poìn ma wa kè geɖe ɓɛ́ ɔ ɖà kɔ́ kɛɛ dyí. (Jɔ̃́ɔ́ 4:35) Sɔ̀ìn ɓóɛ gboɛɛ, ɔ ɓɛ́ìn ma zɔ̃ dyúáɖò zĩ̀ɛ̀n ké ɔ cɛ̃ɛ ma ɔ ɖeín-nà-nyɔ̀ ɓèɔ̀ gbo, ké ɔ ɖá: “Geɖe ɖà kɔ́ɛɛ ɓúá dyí.” (Máf. 9:​37, 38) Ti wè ɖà ma ziɛɛ, ɔ kpaa ma kɔ̃in ɖe, ké ɔ ɖá: “Mɔɔ́ ɖàà kɔ́ɛɛ vò dyí mìɔ. . . . Ɓè mɛ ɓaà nyɔ kɔ̃̀à geɖeɔ̀ wuɖuíɛ, ɓɛ́ ɔ ké kũ̀à-nyɔ̀ ɓáún-ɓáún tò, ɓɛ́ wa ké ɔ mɔɔ́ɔ̀ cɛ̃.” (Ðúù 10:2) Jizɛ dèɛ̀ ma hwòɖò tee kà nyɔ ɓè mu ma bɔ̃̀ nɔ̀mɔ̀ dyíinɔ̀ dyi kpɔ̃ùn wɛ̃, ké ɔ kpá ma múàùn ti wa nyuɛ ma náa kɛ.—Ðúù 10:21.

16. Xwɛ̀ Jizɛɛ ɖɛí-poìn-poìn ɓèɔ̀ nyuɛ ma tɛ̀mɛ̀ìn kà wuɖu-wáɖá-kũ̀àɔ̀ mu ma ɖɛín-ɖɛ̀ gbo wóɖóùn wɛ̃́? (Ðúù 13:​18-21) (Dyé dyi-dyé-ɖɛ̀ɔ̀ ɖekè.)

¹⁶ Jizɛ tɛ̀mɛ̀ìn ma ɔ ɖeín-nà-nyɔ̀ ɓèɔ̀ ɖɛ, ɓɛ́ wa ké ma ɖɛín-ɖɛ̀ jè hwìɖìi poìn tee ɓá bɔ̃̀ nɔ̀mɔ̀ dyíinɔ̀ jè dyí, sepoɛɖe ɔ mu ma wa kpéí poùn ɓɛ́ wuɖu-wáɖá-kũ̀àɔ̀ jè ké ma wa hwòɖò kpɔ̃. Poìn Jizɛɛ ɖɛí-poìn-poìn ɓèɔ̀ sɔ̃́ jè hwìɖìi. (Zà Ðúù 13:​18-21 wuɖuún.) Jizɛ nyùìn ma dyɛ̀ɛ̀-dyùà kũ̀à mú ɓɛ́ ɔ kéɛ ma tɛ̀mɛ̀ìn kà bɔ̃̀ nɔ̀mɔ̀ dyíin ɓáà kã́á-ɓòɖòɔ̀ jè dyíɛɛ mu ma mú zaìn ɖé hwìè kɔ̃̀ mú ɓɛ́ nyɔ ɖò se ma hwìɖìi dèɛ, ké ɔ mú-zaìn-zaìnɔ̀ se ɓɔ́í kpáa muɛ. Ké ɖeɛɛ, Jizɛ nyùìn ma bɛɖɛɛ̀-dyáìn-ɖɛ̀ kũ̀à mú, ɓɛ́ ɔ kéɛ ma tɛ̀mɛ̀ìn kà bɔ̃̀ ɓáà kã́á-ɓòɖòɔ̀ jè dyíɛɛ mu ma dyi ɓèìn ɖé ɓóɖó-kpàà dà séín, ké ɔ mu ma gbo-zĩàìn-zĩàìn ɓɛ́ nyɔ ɖò se dyéɛ ɓɛ́ìn wàɖà kɛɛ dyàùn wɛ̃. Ɔ jèɛɛ, Jizɛ kpá ma ɔ ɖeín-nà-nyɔ̀ ɓèɔ̀ gbo, ɓɛ́ wa kéɛ ma dyé kà ɓɛ́ wa wuɖu-wáɖá-kũ̀àɔ̀ mu ma mú wóɖóùn jàà kɛ.

17. Xwíníínɔ̀ nyɛ́ kɔ̃̀ jè à mɛ poàìn ɖɛín-ɖɛ̀ jè hwìɖìi ɓá wuɖu-wáɖá-kũ̀àɔ̀ jè dyíɛ́?

¹⁷ Ɔ jù ké à dyi ɖɛín-ɖɛ̀ ɓè nìà kũ̀àɔ̀ gbo wóɖóɛń zɛ̃̀ɛ̀ ɖé ɓóɖó-kpàà dà séín nyɛɛ jè hwìɖìi poìn ní, ɔ po à kpéí ɓɛ́ à ké wuɖuɔ̀ wáɖá tee. Zɔ̃ ɖò-ɖò séín xwíníín nyɛɛ, nyɔ méɔ̀ùn ɓè dyi ɖɛ-hwìɖìi-dyà-hwɔ̀ɔ̀ kɔ̃, ké wa cɛ̃́ Baɓoɔ. Nyɔ táàzĩ̀ìn hɔ̃dɛ̀ɖɛ̀ ɓè kpá níɔ zɔ̃ séín, ké wa kpá wuɖu-wáɖá-kũ̀àɔ̀ hwìɛ̀. À se nyɔ-kpò jĩ̀ kà mu bɔ̃̀ nɔ̀mɔ̀ dyíinɔ̀ dyi kpɔ̃ùn ɖeɛɛ dyí dyuò, kɛɛ à dyuòɛ̀ dyí kà ɓɛ́ Jɛhova nì nyɔ kúɖúú ɓè ɓɛ́ wa mu gà-dyé-dyé vɛ̀nɛ̀ɔ̀ xwaún póùn wɛ̃ɛ dyí poɛ̀n nyɛ. (Wɛ̀ɖ. 7:​9, 14) Geɖe-kɔ̃̀-nyɔ̀ɔ̀ nì ɖɛín-ɖɛ̀ dyéɛń ke kánáá pu ɖé geɖeɔ̀ gbo, ɔ jèɛɛ à ɓéɖé xwíníín nɔ̀mɔ̀ dyíin ɓɛ́ à ké wuɖuɔ̀ wáɖá tee.

18. Ðɛ́ à mɔ́ ɓɛ́ nyɔ tɔ̀ɔ̀ ɓè ké dyéɖé gbo dè ɓá à jè dyíɛ́?

¹⁸ Wa dyuò Jizɛɛ ɖeín-nà-nyɔ̀ ɓèɔ̀ dyí tee ɓó kà wa nyu kpé ɖé wuɖu-wáɖá-kũ̀àɔ̀ mú poɛ kɛɛ jè. Ti nyɔ ɓè dyé ma àpɔ́sò ɓèɔ̀ wuɖuɔ̀ wáɖáa fã̀à-wɔ̃-zi-kà kɛɛ, ɔ dyi ma wa hwìɖìi kà “wa kè Jizɛ ɖà ma mú naìn kĩ́ín nyɛ.” (Àpɔ́. 4:13) Kà nyɔ ɓè muà à dyéɖé gbo dèìn ɖé wuɖu-wáɖá-kũ̀àɔ̀ múɛɛ, wa mɛ dyéɛ ɖekè kà à mɔ̀ùn nì Jizɛɛ nyuu-ɖɛ̀ kíɖíí síɛń nyɛ.