CƐ̃́Ɛ́-ÐƐ̀ 12
WƐ́ÐƐ́ 119 We Must Have Faith
Cĩ́ Ðé Hwìɖìi-Taɓa-Taɓa Mú Tee
“À cĩ́ ɖé hwìɖìi-taɓa-taɓa mú. À se cĩ́ ɓó ɖɛ ɓè ɓɛ́ à dyéɖé dyéɛɛ jè.”—2 KƆ̀. 5:7.
DYÉÐÉ-GBO-DÈ-ÐƐ̀
Kà à ké hwìɖìi-taɓa-taɓa mú cĩ́ tee ɔ jù ké à dyi ɖɛ kpa ɖɛ ɓè gbɔ poɛń nììn nyɛ.
1. Xwíníínɔ̀ nyɛ́ kɔ̃̀ jè Pɔ́ɔ̀ hwòɖò dè ma dyi ti ɔ poìn ma ɔ cĩ́-cĩ́ɔ̀ jè hwìɖìiɛ́?
ƁÓ TI ÐÒƐ̀ ɓaɖaa, àpɔ́sò Pɔ́ɔ̀ dyuòɛ̀ ma dyí kà ɔ gĩɔ ɖà ma dyi xwɛ̃́ìn nyɛ, kɛɛ ɔ ɓéɖé ma xwíníín nɔ̀mɔ̀ dyíin ɓó ɔ cĩ́-cĩ́ɔ̀ múàùn dyi kpáìn jè. Ɔ poìn ma ɔ cĩ́-cĩ́ɔ̀ jè hwìɖìi, ké ɔ ɖá: “Ḿ ɖà kpɛɖɛɔ̀ kpaa hwɔ. M̀ ɖà hwìɖìi-taɓa-ɖɛ̀ɔ̀ jè dyi kpɔ̃ tee.” (2 Tím. 4:6-8) Pɔ́ɔ̀ po ma ɖɛ nɔ̀mɔ̀ dyíin gbɔ ɖé ɔ Geɖepɔɔ-kũ̀à nyu-nyuɔ̀ mú, ké ɔ dyuòɛ̀ ma dyí wáɖáá kà ɓɛ́ Jɛhova hwòɖò dèìn ma ɔ múin nyɛ. À mɔ̀ùn mɔ́ ɓɛ́ à ké ɖɛ nɔ̀mɔ̀ dyíin ɓè gbɔ po, ɓɛ́ Geɖepɔɔ hwòɖò ké à múin dèìn. Xwɛ̀ à ɓɛ́ìn náa nyuɛ kɛ́?
2. Ðɛ́ mɔ̀ cĩ́-cĩ́ ɖé hwìɖìi-taɓa-taɓa múɛɛ xwíníín nyɛ́?
2 Pɔ́ɔ̀ cɛ̃ɛ ma ɓá ɔ mìɔùn kè jàà Kɛ́ɖɛ́ì ɖeín-sí-nyɔ̀ tɔ̀ɔ̀ ɓè jè dyí, ké ɔ ɖá: “À cĩ́ ɖé hwìɖìi-taɓa-taɓa mú. À se cĩ́ ɓó ɖɛ ɓè ɓɛ́ à dyéɖé dyéɛɛ jè.” (2 Kɔ̀. 5:7) Ðɛ́ mɔ̀ ma Pɔ́ɔ̀ wuɖuɔ̀ xwíníín nyɛ́? Ɔ jù ké nyɔ ɖò dyi cĩ́ ɓó ɖɛ ɔ dyéɖé dyé puɛ jè ní, ɔ po ɖɛ ɓè gbɔ jɛ́ɛ́ ɓá ɖɛ ɔ dyé, ké ɔ wɔ̃́, kè kà ɔ hwòɖò nyu nìɛ̀ kɛɛ jè dyí. Kɛɛ, ɔ jù ké nyɔ ɖò dyi cĩ́ ɖé hwìɖìi-taɓa-taɓa mú ní, ɔ po ɖɛ ɓè gbɔ ɓá Jɛhova Geɖepɔɔ hwòɖò-kɔ̃-dè-dè dyí. Ɔ nyuu-ɖɛ̀ ɓè tɛ̀mɛ̀ìn kà ɓɛ́ ɔ poɛ jàà kà Geɖepɔɔ mu ɔ pɛ́ìn, kè kà ɔ mu Jɛhovaa náún-po-wùɖù ɓè nìà ɖé Baɓoɔ múɛɛ kíɖíí-sí-sí kpáná kɔ̃ún dyéìn nyɛ.—Wɛ́ɖɛ́ 119:66; Híì. 11:6.
3. Ðɛ́ mɔ̀ kpáná ɓè ɓɛ́ wa sɔ̀ìn ɖé hwìɖìi-taɓa-taɓa mú-cĩ́-cĩ́ múɛ́? (2 Kɔ̀ɖéíntĩ̀ɔ̀ 4:18)
3 Jàà kɛɛ, à séín po ɖɛ ɖíɛ́ ɓè gbɔ ɓá ɖɛ à dyéɖé dyé mɔɔ à wɔ̃́ kɛɛ jè dyí. Kɛɛ, ɔ mu dyɛ̀ fũ̀à-fṹá dyàùn ɔ jù ké à dyi ɖɛ à dyé, mɔɔ ɖɛ à wɔ̃́ kɛɛ ɖòùn jè hwìɖìi poìn ɖé ɖɛ kpa ɖɛ ɓè gbɔ-po-po mú ní. Xwíníínɔ̀ nyɛ́ kɔ̃̀ jèɛ́? À dyéɖé kè à ɖùù ɔ kè à hwòɖò-dyùàɔ̀ ɓɛ́ìn à cáa tiɔ̀ ɖíɛ́ ɓè ɓaɖa. Ɔ jù ké wa se à cá, kɛɛ à dyi cĩ́ ɓó ɖɛ à dyéɖé dyéɛ jè ní, à ɓɛ́ìn Geɖepɔɔ mɔ́ɔ́-ɖɛ̀ mɔɔ ɔ náún-po-wùɖù ɓèɔ̀ dyéɖé kɔ̃in wã̀ìn. (Ìkí. 11:9; Máf. 24:37-39) Kɛɛ, ɔ jù ké à dyi cĩ́ ɖé hwìɖìi-taɓa-taɓa mú ní, à mu ɖɛ ɓè “dè Bounɓoɔ̀ hwòɖò dyiɛɛ” gbɔ poɛ ɓɛ́ìn. (Ìfí. 5:10) Geɖepɔɔ náún-po-wùɖù ɓèɔ̀ kíɖíí-sí-sí mu à gìɖìi nyíìn, ké ɔ muɛ nyuùn ɓɛ́ à ké múàùn kpá jàà. (Wɛ́ɖɛ́ 16:8, 9; Àzé. 48:17, 18) Ké ɔ jù ké à dyi cĩ́ ɖé hwìɖìi-taɓa-taɓa mú tee ní, à mu sè-ná-sèɛ̀ mana ɓè dyéìn ɖé dyúa.—Zà 2 Kɔ̀ɖéíntĩ̀ɔ̀ 4:18 wuɖuún.
4. Xwɛ̀ nyɔ ɖò ɓɛ́ìn dyí dyuòɛ̀ kɛbì ɔ nì cĩ́ɛń ɖé hwìɖìi-taɓa-taɓa mú mɔɔ ɓó ɖɛ ɓè ɓɛ́ ɔ dyéɖé dyéɛɛ jè níɛ́?
4 Xwɛ̀ à ɓɛ́ìn dyí dyuòɛ̀ kɛbì à nì cĩ́ɛń ɖé hwìɖìi-taɓa-taɓa mú mɔɔ ɓó ɖɛ ɓè ɓɛ́ à dyéɖé dyéɛɛ jè níɛ́? Jɛ́ɛ́ kɛɛ, ɔ ɓá ɖɛ ɓè nìà kɛ dyí: Ðɛ́ mɔ̀ ɖɛ ɓè ɓɛ́ à gbɔ-po-ɖɛ̀ ɓèɔ̀ ɓá dyíɛ́? Wa ɓá ɖɛ ɓè ɓɛ́ à dyéɖé dyéɛ ɖòùn dyíì? Mɔɔ wa ɓá Jɛhova hwòɖò-kɔ̃-dè-dè kè náún-po-wùɖù ɓè sɔ̀ìn ɖé ɔ gboɛ dyíì? Ɓèà dyé hwìè tã ɓè kɔ̃̀ mú à ɓɛ́ìn cĩ́ɛ ɖé hwìɖìi-taɓa-taɓa mú teeɛ: (1) à dyi kũ̀à à ké nyuɛ gãa nììn, (2) à dyi nyɔ à ké dyi kpɔ̃ɛ gãa nììn, kè (3) à dyi hwìè-da-zàìn-wùɖù ɓè dyé sɔ̀ìn ɖé kpooɔ̀ gbo ní. Ɓá wa ɖò-ɖò dyíɛɛ, à mu ɖɛ ɓè à kɔ̃̀ à ké jè hwìɖìi poìn ɓɛ́ à ké ɖɛ nɔ̀mɔ̀ dyíin ɓè gbɔ poɛ ɓɛ́ìn nyɛɛ jè dɔ́ɔ́ kɔ̃in dèìn.
À DYI KŨ̀À À KÉ NYUƐƐ GÃA NÌÌN
5. Ðɛ́ à mɛ poìn jè hwìɖìi ɔ jù ké à dyi kũ̀à à ké nyuɛɛ gãa nììn nyɛ́?
5 À séín mɔ́ ɓɛ́ à ké à mìɔùn kè à xwéɖé-dùɔ̀ gbo gmɔ̀. (Ìkí. 7:12; 1 Tím. 5:8) Kũ̀à ɖíɛ́ ɓè ɓéɖé wíɖí pàɖà. Ɔ ɓɛ́ìn nyuɛ ɓɛ́ kũ̀à-nyu-nyɔ̀ ɖò ké wé séínɛ̀ wíɖí-kɔ̃ún-peɖe-ɖɛ̀ jè gbo dyé, ɓɛ́ ɔ ké wíɖí wè wáká po ɓó ɖé dyúa bìì. Kũ̀à tɔ̀ɔ̀ ɓè nììn wíɖí se dyí vò, ké ɔ ɓɛ́ìn nyuɛ ɓɛ́ kũ̀à nì náa nyu-nyɔ̀ ké ɖɛ kpa ɖɛ jɛ́ɛ́ ɓè ɓɛ́ ɔ xwéɖé-dùɔ̀ kɔ̃̀ ɔ ké ɓéɖéɛ ɖòùn jè gbo dyé. À dyi kũ̀à à ké nyuɛ jè gbɔ poɛń nììn, ɔ mɔ̀ jàà kà ɓɛ́ à mu wíɖí jĩ̀ kà à mu nyuùn wɛ̃ɛ jè hwìɖìi poìn nyɛ. Kɛɛ, nyɔ ɖò ɓɛ́ìn cĩ́ɛ jɛ́ɛ́ ɓó ɖɛ ɓè ɓɛ́ ɔ dyéɖé dyéɛ jè ɔ jù ké ɔ dyi ɖɛa ɖòùn jè hwìɖìi poìn ní.
6. Xwɛ̀ à ɓɛ́ìn cĩ́ɛ ɖé hwìɖìi-taɓa-taɓa mú ɔ jù ké à dyi kũ̀à à ké nyuɛɛ gãa nììn nyɛ́? (Híìbúɖúù 13:5)
6 Ɔ jù ké à dyi cĩ́ɛń nì ɖé hwìɖìi-taɓa-taɓa mú ní, à mu ɖɛ kũ̀àɔ̀ mu gbo-kpɔ̃ìn-kpɔ̃ìn nìà à kè Jɛhova pṹa kɛ bũ̀ nyuùn wɛ̃ɛ jè hwìɖìi poìn ɖekè. À ɓɛ́ìn à mìɔùn dyi dièɛ̀, ɓɛ́ à ké níin: ‘Kũ̀àɔ̀ muɛ nyuùn ɓɛ́ ḿ ké ɖɛ ɓè ɓɛ́ Jɛhova nyɛ́ múɛɛ sɔ̃ún poò?’ (Nɔ́ɔ́ 6:16-19) ‘Ɔ muɛ nyuùn ɓɛ́ ní ɓiè-ɓièɔ̀ jè ké mú kàmàà, kè ɓɛ́ ḿ kè ní xwéɖé-dùɔ̀ ké gboi tɔmɔìn ɓó ti gbɔɖɔun xwíníínǹ?’ (Fèɖ. 1:10) Ɔ jù ké nì gɔ̃̀-jù-wùɖù ɓó dyi-diè-ɖɛ̀ ɓèa bììɛɛ dyi ǹdye jù ní, nìí, ɔ mu dyíin nɔ̀mɔ̀ùn ɓɛ́ m̀ ké kũ̀àɔ̀ ɓɔ́ kɛbì kũ̀à jè mɛ kàmà mú kɛ. Sepoɛɖe à cĩ́ ɖé hwìɖìi-taɓa-taɓa mú jèɛɛ, à nyu ɖɛ-gbɔ-po-po ɓè ɓɛ́ wa tɛ̀mɛ̀ìn kà à dèɛ̀ hwòɖò kɔ̃ kà ɓɛ́ Jɛhova mu à jè gbo gmɔ̀ùn ɖé hwìè ɖò múɛ.—Máf. 6:33; zà Híìbúɖúù 13:5 wuɖuún.
7-8. Xwɛ̀ ɖíí-gàà ɖò ɓɛ́ ɔ cĩ́ ɖé Mɛ́ɖékà-ɓòɖòɔ̀ zɔ̃̀ìn nyɛɛ nyu ma cĩ́ɛ ɖé hwìɖìi-taɓa-taɓa múɛ́? (Dyé dyi-dyé-ɖɛ̀ɔ̀ ɖekè.)
7 Dyé kà ɖíí-gàà ɖò mɔ̀ Jávéèa ɓɛ́ ɔ cĩ́ ɖé Mɛ́ɖékà-ɓòɖòɔ̀ zɔ̃̀ìn nyɛɛ nyuɛ ma dyéɛ kà ɔ kpa ɖɛ ɓɛ́ nyɔ ké cĩ́ ɖé hwìɖìi-taɓa-taɓa múɛ. Ɔ ɖá: “Ḿ céè ma ɓó kũ̀à ɖò ɓɛ́ ɔ mu ma wíɖí ḿ nì ma nyuɛń nyɛ kɔ̃in deìn, ké ɔ mu ma ḿ hwòɖò-dyi-dè-dè nyíìn nyɛɛ jè.” Kɛɛ, Jávéè mɔ́ ɓɛ́ ɔ ké ma pàníɛ̀ jù xwéé. Ɔ kpa wuɖu dyúa, ké ɔ ɖá: “Wa gã ma ḿ ɓɛ́ kɔ̃́pɛ̀nɛ̀ɔ̀ nyɔ vɛ̀nɛ̀ ɖò ké ma ḿ sɔ̃ kɔ̃ún dyi po. Hwɛ̀ ɔ ké ma ná kpá kɛɛ, ḿ ɓaà ma Jɛhova ɓɛ́ ɔ ké ma ḿ gbo kpá, ké ḿ poɛ ma jàà cá kà Ɔ dyuò ma ɖɛ mɔ̀ ɖɛ nɔ̀mɔ̀ dyíin nyɛɛ dyí ɓó ḿ bììɛ. Ḿ mɔ́ ɓɛ́ ḿ ké ma dyúa mu ɖé ní kũ̀àɔ̀ mú, kɛɛ ḿ se ma kũ̀à nìà kɛ mɔ́ ɔ jù ké ɔ seɛ ma nyuɛń mu ɓɛ́ ḿ ké ma ní zùùn dyí-sɔ́-ɖɛ̀ ɓèɔ̀ nyu ní.”
8 Jávéè ɖá: “Ɓó sɔ̃-kɔ̃ún-dyi-po-poɔ̀ tiín nyɛɛ, máníjàɔ̀ cɛ̃ɛ ma ḿ gbo kà ḿ mu kũ̀à nyuùn tee kũ̀à-nyu-tì dyi hwɛ̀ níɛ. Ḿ cɛ̃ɛ ma ɔ gbo kpéín-dyé-kà kà ḿ seɛ ma nyuɛ ɓɛ́ìn mu ɓó ní Geɖepɔɔ kũ̀àɔ̀ nyu jèɛ.” Ǹdye, Jávéè ɓɔ́ ma kũ̀àɔ̀ ní. Wíkì sɔ̃́ ɖà ma ziɛɛ, ɔ dè ma pàníɛ̀-kũ̀à nyuɛ gbɔ. Ké ɖé zɔ̃ dyúáɖòà xwíníín nyɛɛ, ɔ dyé ma kũ̀à ɖò ɓɛ́ ɔ se nyuɛń mu wé séín nyɛ. Ɔ ɖá: “Jɛhova wɔ̃́ ma ní ɓaà-wùɖùɔ̀, ké ɔ nyí ma ḿ kũ̀à ɓɛ́ ɔ kè ní pàníɛ̀-kũ̀àɔ̀ muìn ma gboɛ. Ḿ kpá múàùn mìɔ cá, sepoɛɖe ḿ ɓéɖé kũ̀à ɓɛ́ ɔ nyí ḿ ti ɓɛ́ ḿ ké kũ̀à pàɖà nyu ɓó Jɛhova kè ḿ ɖíí ɓèɔ̀ bììɛ.”
Ɔ jù ké wa dyi m̀ dyíi kpaa mɔ́ ɖé nì kũ̀à-kpàɔ̀ dyí ní, ɖɛ nì mu gãùn wɛ̃ɛ muɛ tɛ̀mɛ̀ìn kà m̀ poɛ jàà kà ɓɛ́ Jɛhova dyuò ɖɛ mɔ̀ ɖɛ nɔ̀mɔ̀ dyíin nyɛ dyí ɓó m̀ bììɛɛ̀? (Dyé zaìn-kɔ̃in 7-8)
9. Ðɛ́ m̀ cɛ̃́ Teɖesɔ́ xwaún wɛ̃́?
9 Ɔ jù ké m̀ dyiɛ dyé kà kũ̀à m̀ nìà nyuɛń kàùn wɛ̃ɛ se m̀ ti nyíɛń nì, ɓɛ́ m̀ ké cĩ́ ɖé hwìɖìi-taɓa-taɓa mú ní ɖé? Poìn ɖɛ Teɖesɔ́, ɓɛ́ ɔ sɔ̀àìn ɖé Kóúgò-ɓòɖòɔ̀ kɔ̃ɛ dyé ma dyíɛɛ jè hwìɖìi. Ɔ ɖá: “Ní kũ̀à ɖìèɔ̀ mɔ̀ ma mana vɛ̀nɛ̀ ɖò cá ɓɛ́ ḿ se ma dyéɛ ɓɛ́ìn ɖeɛ. Wíɖí ɓɛ́ kũ̀àɔ̀ ɓéɖé ma kɛɛ deìn wíɖí ḿ nì ma nyuɛń kĩ́ín nyɛɛ kɔ̃in kpa tã, ké nyɔ ɓè dyé ma ḿ kpéín mìɔ cá.” Kɛɛ, Teɖesɔ́ bĩ ma dyí-poìn-poìn ɓèɔ̀ xwa kpɛ́-kpɛ́, sepoɛɖe ɔ nì ma kũ̀à nyuɛń ɓó kũ̀à-nyu-tìɔ̀ kɔ̃in. Wa dè ma ɔ dyí ɖekè ɓɛ́ ɔ ké ma gbá-gbá-ɖɛ̀ ɖɛ kɔ̃in ɓáìn. Teɖesɔ́ mɔ́ ɓɛ́ ɔ ké ma kũ̀àɔ̀ dyi táà, kɛɛ ɔ gbaìn ma hwòɖò dyií kà ɔ se ma kũ̀à ɖò ɓéɖéɛ muɛ. Ðɛ́ kpá ma ɔ gboɛ́? Ɔ ɖá: “Hàbákù 3:17-19 kpá ma ḿ gbo ɓɛ́ ḿ kéɛ ma múin wɔ̃́ kà kɛbì ḿ mɛ se wíɖí jĩ̀ kà wɛ nyuɛ ní ɖeɛɛ, Jɛhova mu ma ḿ gbo gmɔ̀ùn ɖé hwìè ɖò múɛ. Ɔ jèɛɛ, ḿ sɔ̀ ma kũ̀àɔ̀ kɔ̃ún.” Ɔ jaɖa ɔ wuɖuɔ̀, ké ɔ ɖá: “Nyɔ-kũ̀à-nyí-nyɔ̀ pàɖà ɓè poɛ̀n hwìɖìi kà nyɔ ɖò mu ɖɛ séín ɖò, hwɛ̀ ḿ po níin ɔ xwéɖé-dùɔ̀ kè ɔ zùùn-ɖɛ̀ ɓè kɔ̃ín pòìn ɓó kũ̀à ɓéɖé wíɖí pàɖà ɖò jèɛ. Ḿ kpá múàùn ɓɛ́ ḿ ké gbo-kpɔ̃ìn-kpɔ̃ìn nìà ḿ kè Jɛhova kè ní xwéɖé-dùɔ̀ pṹa kɛɛ jè gboi kpɔ̃ kɛ. Ti zɔ̃ dyúáɖò ɖà ma ziɛɛ, Jɛhova kpá ma ḿ gbo ké ḿ dyé ma kũ̀à wè ɖò ɓɛ́ ɔ nyu ké nì cĩ́-cĩ́ɔ̀ fɛ̃́ìn ma xwa, ké ḿ ɓéɖé ma ti ɓó zùùn-ɖɛ̀ ɓè nyu jèɛ. À dyi Jɛhova jè po kĩ́ín ní, à mu dyɛ̀ wíɖí gà dyéìn ɓó ti wè xwíníín dyɛo, kɛɛ Jɛhova mu à gbo gmɔ̀ùn.” Ǹdye, ɔ jù ké à dyi Jɛhovaa náún-po-wùɖù ɓèɔ̀ kè ɔ nyɛ́nɛ́ín-ɖáìn-ɖɛ̀ ɓèɔ̀ hwòɖò kɔ̃ dè ní, à mu cĩ́ìn ɖé hwìɖìi-taɓa-taɓa mú tee, ké ɔ mu à mana kɔ̃ poùn.
À DYI NYƆ À KÉ DYI KPƆ̃Ɛ GÃA NÌÌN
10. Ðɛ́ ɓɛ́ìn nyuɛ ɓɛ́ à ké cĩ́ ɓó ɖɛ à dyéɖé dyéɛɛ jè, ɔ jù ké à dyi nyɔ à ké dyi kpɔ̃ɛɛ gãa nììn nyɛ́?
10 Dyi-kpɔ̃ìn-kpɔ̃ìn mɔ̀ nyíí-ɖɛ̀ sɔ̀ìn ɖé Jɛhova gbo, ké Geɖepɔɔ poɛ ɖéɛ à hwòɖò xwíníín ɓɛ́ à ké nyɔ́nɔ́ mɔɔ dyú-ɓà dyi kpɔ̃ɔ mɔ́. Ɔ jù ké ɖíí-màà ɖò dyi ɖíí-gàà ɖò dyi kpɔ̃ jè hwìɖìi poɛ̀n nììn, ɔ ɓɛ́ìn ɖɛ ɖíɛ́ ɓè dyéɖé gbo dèɛ̀ ɓá ɖíí-gààɔ̀ jè dyí. Ɔ hwɔìn-kà, ɔ kpeɖe kè kà ɔ nyu nìɛ̀ kɛ kè kà nyɔ tɔ̀ɔ̀ ɓè nyu ɔ dya gmɔ̀ɔ̀ kɛ kè kà ɔ nyu wíɖí peɖeɛ kɛ kè ɖɛ ɔ kɔ̃̀ ɔ ké ɔ gbò-xwíníín-nyɔ̀ ɓè bìì nyuɛ ɔ kè kà ɔ nyu ɔ múàùn poɛ kɛ.b Ðɛ ɓè nìà kɛ kpa ɖɛ. Kɛɛ, ɔ jù ké ɔ dyi ɖɛ ɓè nìà kɛ ɖòùn jè hwìɖìi poìn ní, nìí, ɔ nì dyɛ̀ cĩ́ɛń ɓó ɖɛ ɓè ɔ dyéɖé dyéɛɛ jè.
11. Xwɛ̀ à ɓɛ́ìn cĩ́ɛ ɖé hwìɖìi-taɓa-taɓa mú ɔ jù ké à dyi nyɔ à ké dyi kpɔ̃ɛɛ gãa nììn nyɛ́? (1 Kɔ̀ɖéíntĩ̀ɔ̀ 7:39)
11 Jɛhova kpáìn à ɖíí-màà kè à ɖíí-gàà ɓè ɓɛ́ wa síà ɔ náún-po-wùɖù kíɖíí ɖé nyɔ wa ké dyi kpɔ̃ kɛ gã-gã múɛɛ jè múàùn dyi mìɔ cá! Ɔ hwɔìn-kà, wa kpɔ̃ Baɓoɔ náún-po-wùɖùɔ̀ dyi ɓɛ́ wa ké “ɖɛ hwɛ̀” hwɛ̀ wa ké nyɔ ɖò gbo ɓaɖaìn. (1 Kɔ̀. 7:36 NWT) Wa gã nyɔ wa ké dyi kpɔ̃ɛ ɓá kpeɖe ɓè ɓɛ́ Jɛhova ɖá ɔ nyu nyɔ ɖò nyɔ́nɔ́-ɓà mɔɔ nyɔ́nɔ́ nɔ̀mɔ̀ dyíin múɛɛ dyí jɛ́ɛ́. (Nɔ́ɔ́ 31:10-13, 26-28; Ìfí. 5:33; 1 Tím. 5:8) Ɔ jù ké nyɔ se Jɛhova Zàse kɛ dyi wa mú ɖɛ̀ɓɛ̀ ní, wa kpɔ̃ náún-po-wùɖù ɓáà “Geɖepɔɔ-nyɔ̀” dyi kpɔ̃ jè dyí ɓɛ́ ɔ nìà ɖé 1 Kɔ̀ɖéíntĩ̀ɔ̀ 7:39 múɛɛ dyi. (Zàà wuɖuún.) Wa cĩ́ ɖé hwìɖìi-taɓa-taɓa mú tee, ké wa dèɛ̀ hwòɖò kɔ̃ kà ɓɛ́ Jɛhova ɓɛ́ìn wa hwòɖò dyi dèɛ̀ ɖé hwìè kɔ̃̀ mú ɓɛ́ nyɔ kà kò ɖò se nyuɛ ɓɛ́ìn nyɛ mú.—Wɛ́ɖɛ́ 55:22.
12. Ðɛ́ m̀ cɛ̃́ Woɖosá xwaún wɛ̃́?
12 Poìn ɖɛ ɖíí-màà ɖò mɔ̀ Woɖosá, ɓɛ́ ɔ mɔ̀ pàníɛ̀ ɖé Kòɖóúnɓìà-ɓòɖòɔ̀ kɔ̃ɛ dyé ma dyíɛɛ jè hwìɖìi. Ɔ kũ̀àɔ̀ nyuɛ ké ɔ kè gàa ɖò ɓɛ́ ɔ se ma Jɛhova Zàse kɛɛ ɓɛɖɛìn ma dyí kpɛ́-kpɛ́, ké gàaɔ̀ ɖú ma ɔ mú ɖɛ̀ɓɛ̀ kpàì. Woɖosá ɖɛ̀ɓɛ̀ ma ɔ mú ɖekè. Woɖosá ɖá: “Gàaɔ̀ nì ma kpeɖeín-nɔ̀mɔ̀-kà cá. Ɔ kpá ma nyɔ ɓè gbo ɖé ɔ gbɛ̀ɔ̀ mú, ké ɔ cĩ́-kàɔ̀ nɔ̀mɔ̀ ma dyíin. Ɔ kɔ̃̀ ma ɖé ḿ jè gbo. Ɔ ɓéɖé ma kpeɖe séín ɓè ɓɛ́ ḿ mɔ́ ma ɖé gàa ɖò múɛ, kɛɛ ɔ se ma Jɛhova Zàse.” Ɔ kpa ma wuɖu dyúa, ké ɔ ɖá: “Ɔ kàmà ma mú ɓɛ́ ḿ ké ma nɔ́ɔ̀, sepoɛɖe ɔ mɔ̀ ma ɖɛ ɖò ɓɛ́ ḿ mɔ́ ma xwéé kɛ. Ɓó tia ɓaɖaa, ḿ kpá ma kpɛín dyi, ké ḿ mɔ́ ɓɛ́ ḿ ké ma dyú-ɓà dyi kpɔ̃, kɛɛ ḿ se ma nyɔ ɖò dyéɛ ɓɛ́ìn ɖé jààɔ̀ mú.” Ɔ nì ma ná dyɛo, kɛɛ Woɖosà se ma ɖɛ ɔ dyéɖé ɓɛ́ìn ma dyéɛ kɛɛ ɖòùn gbo vòìn. Ɔ poìn ma ɖɛ gbɔ-po-ɖɛ̀ nìà kɛ mu ma gbo-kpɔ̃ìn-kpɔ̃ìn nìà ɔ kè Jɛhova pṹa kɛ bũ̀ nyuùn wɛ̃ɛ jè hwìɖìi. Ɔ jèɛɛ, ɔ ɓɔ́ ma gàaɔ̀ gbo wùɖùɛ̀ ɖé hwìè séín mú, ké ɔ vòìn ma zùùn-ɖɛ̀ ɓè nyu-nyu gbo. Sɔ̀ìn ɓóɛ gboɛɛ, ɔ se hwèɖèìn, ké wa ɖá ma ɔ ɓɛ́ ɔ ké ma SKE sùkúùɔ̀ mu, ké ɔ mɔ̀á pàníɛ̀ kpá wáká kàùn. Woɖosá ɖá: “Jɛhova ɖàa nyu ké múà ɖà ní hwòɖò-dyùàɔ̀ múin dyíìn.” Ɔ kàmà mú ɓɛ́ nyɔ ké cĩ́ ɖé hwìɖìi-taɓa-taɓa mú, ɔ dyi ɖɛ ɓè ɓɛ́ à ɖɛ̀ɓɛ̀ múɛ jè gbo dyi ní dyɛo, kɛɛ ɔ náa nyu-nyu nyu nyɔ kpáná dyí mìɔ.
À DYI HWÌÈ-DA-ZÀÌN-WÙÐÙ ƁÈ DYÉ SƆ̀ÌN ÐÉ KPOOƆ̀ GBO NÍ
13. Ðɛ́ ɓɛ́ìn nyuɛ ɓɛ́ à ké cĩ́ ɓó ɖɛ à dyéɖé dyéɛ jè ɔ jù ké à dyi hwìè-da-zàìn-wùɖù ɓè sɔ̀ìn ɖé kpooɔ̀ gboɛɛ dyé níɛ́?
13 À dyé hwìè-da-zàìn-wùɖù ɓè kpɛ́-kpɛ́ sɔ̀ìn ɖé ɛ́ɖɔ̀ ɓèɔ̀ mɔɔ dyí-poìn-kpòò kɔ̃in-té-nyɔ̀ mɔɔ bɛ́fèò mɔɔ Nyɔ-Dyúa-Nì-Nyɔ̀ Ɓèɔ̀ gbo—ɓɛ́ wa kpá à gbo ɓɛ́ à ké Geɖepɔɔ ɓièɛ. Kɛɛ, ɔ jù ké à se ɖɛ mɔ̀ hwìè-da-zàìn-wùɖùɔ̀ xwíníín nyɛɛ jè múin wɔ̃́ tiɔ̀ ɖíɛ́ ɓè ɓaɖa ní ɖé? À ɓɛ́ìn ɖɛ gbà ɓè ɓá hwìè-da-zàìn-wùɖùɔ̀ dyíɛ ɖòùn dyéɖé gbo dèɛ̀. Ké ɔ ɓɛ́ìn nyuɛ ɓɛ́ à ké ɖíí ɓè tòà hwìè-da-zàìn-wùɖùɔ̀ kɛɛ ɖɛ-xwa-bĩ-bĩ ɓè dya gmɔ̀ mìɔ.
14. Ðɛ́ mu à gbo kpáùn ɓɛ́ à ké cĩ́ ɖé hwìɖìi-taɓa-taɓa mú ɔ jù ké à dyi hwìè-da-zàìn-wùɖù ɓè dyé sɔ̀ìn ɖé kpooɔ̀ gbo níɛ́? (Híìbúɖúù 13:17)
14 À dyi cĩ́ ɖé hwìɖìi-taɓa-taɓa mú ní, à dèɛ̀ hwòɖò kɔ̃ kà Jɛhova mɔ̀ nyɔ nì à nàìn ké ɔ dyuò ɖɛ ɓè à nì mú mùɛ̀n nyɛɛ dyíɛ. Ɔ nyuɛ ké à fṹà ɓó wuɖu nyu jè, ké à nyuɛ náa ɖé hwòɖò wáɖáá mú. (Zà Híìbúɖúù 13:17.) À dyuòɛ̀ dyí kà à wuɖu-nyu-nyu dyà gbo-kpɔ̃ìn-kpɔ̃ìn ɖé dyí-poìn-kpòòɔ̀ múɛ. (Ìfí. 4:2, 3) Ðíí ɓè nìà kũ̀àɔ̀ dyúa kɛɛ se mú hwɛ̀ dyɛo, kɛɛ à dèɛ̀ hwòɖò kɔ̃ kà ɓɛ́ Jɛhova mu à wuɖu-nyu-nyuɔ̀ mana kɔ̃ poùn wɛ̃. (1 Sám. 15:22) Ɓó ti déínɔ̀ ní, ɔ mu ɖɛ séín ɖò ɓɛ́ ɔ mɔ́ dyí-sɛ́ɖɛ́ìn-sɛ́ɖɛ́ìn jàà kɛɛ dyí sɛ́ɖɛ́ìn.—Mákà 7:7.
15-16. Ðíí-gàà ɖò hwòɖò gbà ma ɓá hwìè-da-zàìn-wùɖù ɔ dyé ma kɛ jè dyí dyɛo, kɛɛ ɖɛ́ kpá ma ɔ gbo ɓɛ́ ɔ ké ma cĩ́ ɖé hwìɖìi-taɓa-taɓa múɛ́? (Dyé dyi-dyé-ɖɛ̀ɔ̀ ɖekè.)
15 Poìn dyí-tɛ̀mɛ̀ìn-ɖɛ̀ ɖò ɓɛ́ ɔ tɛ̀mɛ̀ìn kà cĩ́-cĩ́ ɖé hwìɖìi-taɓa-taɓa múɛ nyu nyɔ kpáná dyíɛɛ jè hwìɖìi. Ðé Pɛ̀wúɖúù-ɓòɖòɔ̀ kɔ̃ɛɛ, wa po Sépéìn-wùɖù ɖé dà pàɖà ɓè dyɛo, kɛɛ gbo-kɔ̃̀-nyɔ̀ ɓáún-ɓáún po kɔ́nɛ̀-wùɖù ɓè. Wa ɖò mɔ̀ Kícúà-wùɖùɔ̀. Ðíí ɓè mɔ̀ Kícúà-wùɖù po-nyɔ̀ ɓèɛɛ mɔ́ ma nyɔ ɓè po ma Kícúà-wùɖùɛɛ dyi ɖé gbɛ̀ɔ̀ mú ɓó zɔ̃ pàɖà xwíníín. Kɛɛ ɓó gɔ̀mànà wuɖu nyu jèɛɛ, wa zĩàìn ma ɖɛ gbo ɓá kà nyɔ ké ma nyɔ ɓè wuɖuɔ̀ gbo wáɖáá nyuɛɛ jè dyí. (Wóɖ. 13:1) Ɔ jèɛɛ, nyɔ ɖíɛ́ ɓè poɛ̀n ma hwìɖìi kɛbì ɖɛ nìà kɛ mu ma kũ̀àɔ̀ dyi nɛ́ìn ɖé gbɛ̀ɔ̀ mú ní. Sepoɛɖe ɖíí ɓèɔ̀ kpɔ̃ ma ɖɛ-gbo-zĩàìn-zĩàìnɔ̀ dyi jèɛɛ, Jɛhova po ma wa dúún-ku-kuɔ̀ mana kɔ̃, ké wa ɓɛ́ìn ma Kícúà-wùɖù po-nyɔ̀ pàɖà ɓè da dyéɛ.
16 Kɛfĩ́ín, ɓɛ́ ɔ mɔ̀ ma ɛ́ɖɔ̀ ɖé Kícúà dyí-poìn-kpòòɔ̀ múɛɛ, mɔ̀ ma nyɔ ɓè gbaìn ma kà hwòɖò dyiíɛɛ ɖò. Ɔ cɛ̃ɛ, ké ɔ ɖá: “Ḿ cɛ̃ɛ ma ḿ mìɔùn gbo, ké ḿ ɖá, ‘Xwɛ̀ à mu nyɔ ɓè po Kícúà-wùɖùɛɛ dyéɛ nyuùn wɛ̃́?’” Ðɛ́ Kɛfĩ́ín nyu ma kɛ́? Ɔ ɖá: “Nɔ́ɔ́ 3:5 jè dyi ma ḿ hwìɖìi. Ké ḿ poìn ma Mózè jè hwìɖìi. Jɛhova cɛ̃ɛ ma ɔ gbo ɓɛ́ ɔ ké ma Éézùɖùɛ̀-nyɔ̀ ɓèɔ̀ ɖé Íjè-ɓòɖòɔ̀ kɔ̃ zà, ɓɛ́ ɔ ké ma wa dɛ̀ hwɔìn ma wa mɛ́ìn-naín nyɛɛ kpa, dɛ̀ ɓɛ́ Íjè-nyɔ̀ ɓèɔ̀ ɓɛ́ìn ma wa kpɔ̃̀ìn wàɖà kɛ. Kɛɛ, ɔ nyu ma wuɖu, ké Jɛhova po ma ɔ wuɖu-nyu-nyuɔ̀ mana kɔ̃ ɖé hwìè kɔ̃̀ mú ɓɛ́ ɔ giniìn ma ɔ dyiɛ.” (Ɛ́sé. 14:1, 2, 9-11, 21, 22) Kɛfĩ́ín hwòɖò wɔ̃́ ma ɓɛ́ ɔ ké ma ɔ wuɖu-wáɖá-kàɔ̀ gbo zĩàìn. Ðɛ́ sɔ̀ìn ma ɖéɛ́? Ɔ ɖá: “Kà Jɛhova nyu ma à mana kɔ̃ poɛ kɛɛ giniìn ma ḿ dyi. Kĩ́ín nyɛɛ, à nà ma cá hwɛ̀ à dyé ma nyɔ-kpò dyúáɖò mɔɔ sɔ̃́ ɓè ɓɛ́ wa po ma Kícúà-wùɖùɛ. Kàùn wɛ̃ɛ, à vòìn gbɛ̀ ɓè kɔ̃̀ mú ɓɛ́ Kícúà-wùɖù po-nyɔ̀ ɓèɔ̀ vò dyíɛɛ gbo. Ɔ jèɛɛ, à kè nyɔ pàɖà ɓè dè dɔ́ɔ́, ké à ɓéɖé kɔ́ìn-ɖe-kpà ɓè kè Baɓo-cɛ̃́-nyɔ̀ ɓè. Nyɔ ɓè dyià à dyí-poìn-poìnɔ̀ múɛɛ ɖà kɔ̃ kpá.” Ǹdye, ɔ jù ké à dyi cĩ́ ɖé hwìɖìi-taɓa-taɓa mú ní, Jɛhova mu à mana kɔ̃ poùn tee.
Nyɔ pàɖà ɓè ɓɛ́ wa kè ɖíí ɓèɔ̀ dyéìn ma kɛɛ zà ma dà ɓè ɓɛ́ wa ɓɛ́ìn ma nyɔ ɓè po ma Kícúà-wùɖù kɛ dyéɛ kɛɛ da (Dyé zaìn-kɔ̃in 15-16)
17. Ðɛ́ à ɖà cɛ̃́ ɖé cɛ̃́ɛ́-ɖɛ̀ nìà kɛ múɛ́?
17 À ɖà kà à ké cĩ́ ɖé hwìɖìi-taɓa-taɓa mú tee dyììn ɖé hwìè kpa ɖɛ tã ɓè múɛɛ jè dɔ́ɔ́ kɔ̃in dèìn. Kɛɛ, à ɓéɖé ɓɛ́ à ké cĩ́ ɖé hwìɖìi-taɓa-taɓa mú tee ɖé ɖɛ séín ɓá à cĩ́-cĩ́ gànáɔ̀ dyíɛɛ mú, ɔ hwɔìn-kà, à dyi péé mɔɔ múà-nyu-nyu gãa nììn, kè à dyi céè-ɖɛ̀ jĩ̀-kà à ké cɛ̃́ kɛ mɔɔ kà à ké à dyú ɓè gmɛ̀ìn nyuɛ jè gbɔ poɛń nììn. Ðé ɖɛ séín ɖò gbɔ-po-po múɛɛ, à mɛ ɓɔ́ wɔ̃́ɔ ɓɛ́ ɖɛ ɓè à dyéɖé dyéɛɛ ɖòùn ké à hwìè da zàìn, kɛɛ à mɛ wɔ̃́ ɓɛ́ gbo-kpɔ̃ìn-kpɔ̃ìn nìà à kè Jɛhova pṹa kɛ kè ɔ náún-po-wùɖù ɓèɔ̀ ɔ kè kà Jɛhova ɖá ɔ mu à gbo gmɔ̀ùn wɛ̃ɛ ké à hwìè da zàìn ɖekè. À dyiɛ náa nyu ní, à mu kpé ɓɛ́ìn ɓɛ́ à ké “[Jehovah] mɔ̀à à nììn Geɖepɔɔ kɛɛ nyɛ́nɛ́ɔ̀ mú nàìn ɓó sè-ná-sèɛ̀ tiín.”—Mákà 4:5.
WƐ́ÐƐ́ 156 With Eyes of Faith
a Nyɛ́nɛ́ ɖíɛ́ ɓè ɖà gbo zĩàìn.
b Ɓó ɖɛ xwa fɛ̃́ìn jèɛɛ, zaìn-kɔ̃in nìà kɛ ɓá ɖíí-màà ɖò ɓɛ́ ɔ nì dyú-ɓà dyi mɔ́uń wɛ̃ɛ dyí. Náún-po-wùɖù dyúáɖòɔ̀ ɓá ɖíí-gàà ɖò ɓɛ́ ɔ nì nyɔ́nɔ́ dyi mɔ́uń wɛ̃ɛ dyí ɖekè.