‘Ɓè Mɛ Gã Nyɔ Ɓè Mɔ́ Ɓièɛ̀ Dyiɛ’

1. Ðɛ́ à mɛ nyu ɓɛ́ à ké múà ɓéɖé jɛ́ɛ́ kɛ́, ké xwíníínɔ̀ nyɛ́ kɔ̃̀ jèɛ́? (Àzédyà 48:​17, 18)

À DYƆÚN-ƁÀƆ̀ ɖɛ̀ɓɛ̀ à mú mìɔ cá, ké ɔ mɔ́ ɓɛ́ à ké fɛ̀ɛ̀ múàùn dyi kpáìn kàùn kè ɖé dyúa. (Ìkí. 3:​12, 13) Ɔ mɛ à ké à ɓéɖé nyíí-ɖɛ̀ kpa ɖɛ ɖíɛ́ ɓè, kɛɛ ɔ se à mɛ ɓɛ́ à ké kpé ɓɛ́ìn, ɓɛ́ à ké à mìɔùn nàìn nɔ̀mɔ̀ dyíin, mɔɔ ɓɛ́ à ké ɖɛ mɔ̀ ɖɛ sɛ́ɖɛ́ìn dyí kè ɖɛ gbà kɛɛ gã ɓó à mìɔùn bìì. (Ìkí. 8:9; Jɛ̀ɖ. 10:23) Ɔ dyuòɛ̀ dyí kà ɓɛ́ à ké múà ɓéɖé jàà ní, à ɓéɖé ɓɛ́ à ké ɔ ɓiè, kè ɓɛ́ à ké ɔ gma ɓèɔ̀ dyi kpɔ̃ɛ.—Zà Àzédyà 48:​17, 18 wuɖuún.

2. Ðɛ́ Sétɔ̃̀ mɔ́ ɓɛ́ à ké jàà po kɛ́, ké ɖɛ́ Jɛhova ɖà nyu ɓá se nìà wɛ jè dyíɛ́?

² Sétɔ̃̀ mɔ́ ɓɛ́ à kéɛ jàà po kà ɓɛ́ à ɓɛ́ìn múàùn kpáa à mìɔùn sɔ̃ kɔ̃, ké nyɔùn-dyù ɓɛ́ìn wa mìɔùn nàìn nɔ̀mɔ̀ dyíin nyɛ. (Jɛ́n. 3:​4, 5) Jɛhova nyu ma ɖɛ ɖò ɓá se nìà wɛ jè dyí dyììn ɖé nyɔùn-dyù dyi-táà-táà mú, ɓɛ́ wa ké wa mìɔùn nàìn ɓó ti wè xwíníín. Ɔ fɛ̃́ìn xwa ɓɛ́ à ké wìì-ɖɛ̀ ɓè sɔ̀ìn ɖé nyɔùn-dyù nàìn-kpè múɛɛ dyé. Kɛɛ, Baɓoɔ cɛ̃ gàa kè màa ɓè ɓɛ́ wa ɓéɖé ma hwòɖò-dyi-dè-dè dyììn ɖé Jɛhova ɓiè-ɓiè múɛɛ pàɖà jè. Nyɔ jɛ́ɛ́ ɖò nì wa hwìɛ̀ kɛɛ mɔ̀ Jizɛ Kɛ́ɖɛ́ì. Kĩ́ín nyɛɛ, ɓèà dyé xwíníín ɓè kɔ̃̀ jè ɔ gãa ma ɓɛ́ ɔ ké ma Jɛhova ɓièɛ. Nìí, à mu xwíníín kɔ̃̀ jè à dyɔún-Ɓàɔ̀ kpaà ɖɛ ɓɛ́ à kéà ɔ ɓiè kɛɛ múin gmɔìn. Ké ɓó kɔ̃in ɖeɛɛ, à mu xwíníín ɖíɛ́ ɓè kɔ̃̀ jè à gãà ɓɛ́ à kéà Jɛhova ɓiè kɛɛ múin gmɔìn.

XWÍNÍÍN KƆ̃̀ JÈ JIZƐ GÃA MA ƁƐ́ Ɔ KÉ MA JƐHOVA ƁIÈƐ

3. Ðɛ́ Sétɔ̃̀ mɔ́ ɓɛ́ ɔ ké ma Jizɛ nyí kɛ́, ké ɖɛ́ Jizɛ gã ma kɛ́?

³ Ti Jizɛ nì ma dà ɓóɖó-kpàà kɔ̃ɛɛ, ɔ kɔ̃̀ ɔ ké ma nyɔ ɔ mu ma ɓièìn nyɛɛ gã. Ti Jizɛ kpá ma níɔ nyɛ̀nɛ̀ɛ̀ kɛɛ, Sétɔ̃̀ ɖá ɔ mu ma ɔ kã́á-ɓòɖò séín nì ɓóɖó-kpàà kɔ̃ɛɛ nyíìn ɔ jù ké ɔ dyi ma ɔ ɓiè kpa dyúáɖò nyɛ̀nɛ̀ɛ̀ ní. Jizɛ jù ma ɔ gɔ̃̀, ké ɔ ɖá: “Sɔ̀ ḿ bũ̀, Nɔɔ́-nàmàùn. Geɖepɔɔ-cèè-ɖɛ̀ɔ̀ ɖá, ‘Ɓè mɛ ɓiè [Jɛhova] mɔ̀à ɓèɛ̀ Geɖepɔɔ kɛ, ké ɔ ɖòùn kɔ̃̀ kũ̀à ɖé ɓè mɛ nyu.’” (Máf. 4:​8-10) Xwíníínɔ̀ nyɛ́ kɔ̃̀ jè Jizɛ gã ma kà ɖɛ nì náa kɛ́? Poìn xwíníín ɓèɔ̀ ɖíɛ́ ɓè jè hwìɖìi.

4-5. Ðɛ́ mɔ̀ xwíníín ɖíɛ́ ɓè kɔ̃̀ jè Jizɛ gãa ma ɓɛ́ ɔ ké ma Jɛhova ɓiè kɛ́?

⁴ Xwíníín jɛ́ɛ́ kɔ̃̀ jè Jizɛ gãa ma ɓɛ́ ɔ ké ma Jɛhova ɓiè kɛɛ mɔ̀ ɖɛ̀ɖɛ̀ìn-ɖɛ̀ɓɛ̀ìn—Jizɛ ɖɛ̀ɓɛ̀ ma ɔ Ɓà mú mìɔ cá. (Jɔ̃́ɔ́ 14:31) Ɓó kɔ̃in ɖeɛɛ, Jizɛ ɓiè ma Jɛhova, sepoɛɖe ɔ mɔ̀ ma ɖɛ sɛ́ɖɛ́ìn dyí ɓɛ́ ɔ kɔ̃̀ ɔ ké ma nyuɛ. (Jɔ̃́ɔ́ 8:​28, 29; Wɛ̀ɖ. 4:11) Ɔ dyuòɛ̀ kà fɛ̀ɛ̀ sɔ̀ìn ɖé Jɛhova gbo, ké Ɔ mɔ̀ hwòɖò-kɔ̃-dè-nyɔ̀ kè jĩ́á-jè nyu-nyɔ̀ kɛ. (Wɛ́ɖɛ́ 33:4; 36:9; Jĩ́ìn 1:17) Jɛhova ɖà Jizɛ jàà gbo cɛ̃ tee, ké ɔ mɔ̀ nyɔ nyí Jizɛ ɖɛ séín ɔ ɓéɖéà kɛ. (Jɔ̃́ɔ́ 1:14) Kɛɛ, Sétɔ̃̀ mɔ̀ nyɔ nyu ké nyɔ mɛ́à kɛ̀. Ɔ mɔ̀ se-tɔ́mɔ́-nyɔ̀ ɓɛ́ ɔ mɔ́ ɖɛ séín, ké ɔ kàmà ɔ ɖòùn jèɛ. (Jɔ̃́ɔ́ 8:44) Sepoɛɖe Jizɛ dyuò ma jàà ɓè nìà kɛ dyí jèɛɛ, ɔ seɛ ma hwìɖìi poìn fóɖóún ɓɛ́ ɔ ké ma Sétɔ̃̀ kíɖíí sí dyììn ɖé Jɛhova wuɖu ɖùù-dyi-zà-zà mú.—Fèɖ. 2:​5-8.

⁵ Xwíníín kà kò ɖò kɔ̃̀ jè Jizɛ gãa ma ɖe ɓɛ́ ɔ ké ma Jɛhova ɓièɛɛ mɔ̀, ɔ gmɔ̀ ma ɖɛ ɔ wuɖu-nyu-nyuɔ̀ mu ma gbo wóɖóùn ɖé dyúa kɛɛ dya. (Híì. 12:2) Ɔ dyuòɛ̀ ma dyí kà ɓɛ́ ɔ dyi wuɖu nyu tee ní, ɔ mu ma ɔ Ɓàà nyɛ́nɛ́ɔ̀ mú hwɔùn, ké ɔ mu ma hwìè ɖò kaàùn, ɓɛ́ gà-dyé-dyé séín ɓɛ́ Nɔɔ́-nàmàùn dyàà kɛɛ jè ké dyi ziɛ.

XWÍNÍÍN KƆ̃̀ JÈ JƐHOVAA KPAÀ ÐƐ ƁƐ́ À KÉÀ Ɔ ƁIÈƐ

6-7. Xwíníínɔ̀ nyɛ́ kɔ̃̀ jè nyɔ ɓáún-ɓáún seà Jɛhova ɓièɛ̀n nì zɛ̃̀ɛ̀ kɛ́, kɛɛ ɖɛ́ kɔ̃̀ jè Jɛhova kpaà ɖɛ ɓɛ́ à kéà ɔ ɓiè kɛ́?

⁶ Nyɔ ɓáún-ɓáún nì zɛ̃̀ɛ̀ kɛɛ se Jɛhova ɓièɛ̀n nì, sepoɛɖe wa séè ɔ kpeɖe nɔ̀mɔ̀ dyíin ɓèɔ̀ dyí dyuò ke, ké wa se ɖɛ nɔ̀mɔ̀ dyíin séín ɓè ɓɛ́ ɔ ɖà wa bìì nyuɛɛ dyí dyuò. Kàà nyɔ ɓè ɓɛ́ Pɔ́ɔ̀ wáɖá ma Geɖepɔɔ-wùɖùɔ̀ gbo ɖé Átɛ̃̀-hwɔ̀ɖɔ̀ɔ̀ múɛ nì ma.—Àpɔ́. 17:​19, 20, 30, 34.

⁷ Pɔ́ɔ̀ zaìn ma nyɔ ɓè nì ma ɖé Átɛ̃̀-hwɔ̀ɖɔ̀ɔ̀ múɛɛ gbo kɔ̃in kà ɓɛ́ jàà Geɖepɔɔ mɔ̀ nyɔ “nyuɛ ké nyɔùn séín ɓéɖé fɛ̀ɛ̀, ké wa cĩ́, ké ɔ nyí wa ɖɛ séín” nyɛ. Ɔ cɛ̃ɛ ma ɖe, ké ɔ ɖá: “Ðé ɔ mú ɖé à nì, ɖé à cĩ́, ké ɖé à té dyi.” Geɖepɔɔ mɔ̀ Nyɔ-mɛ-nyɔ̀ ɓɛ́ ɔ “nyu ɓóɖó-dù séínɛ̀ nyɔ sɔ̀ìn ɖé gàa dyúáɖò mú” kɛ. Ɔ jèɛɛ, ɔ ɖòùn ɖé à ɓéɖé ɓɛ́ à ké ɓiè.—Àpɔ́. 17:​25, 26, 28.

8. Ðɛ́ Jɛhova se nyuɛń mu sɔ̃̀ùn wɛ̃́? Zaìn kɔ̃in.

⁸ Sepoɛɖe Jɛhova mɔ̀ Nyɔ-mɛ-nyɔ̀, ké ɔ kɔ̃̀ ɓóɖó-kpàà kè dyɔɔ̀ wuɖuí jèɛɛ, Ɔ ɓɛ́ìn nyɔ ɓè ganaún kpɔ̃̀ìn, ɓɛ́ wa ké ɔ ɓiè. Kɛɛ, Jɛhova seɛ náa nyuɛń mu sɔ̃̀ùn. Kɛɛ, ɔ tɛ̀mɛ̀ìn à dyí kà ɔ nì kɛ, kè kà ɔ ɖɛ̀ɓɛ̀ à ɖò-ɖò séín mú mìɔ kɛ. Ɔ mɔ́ ɓɛ́ nyɔ ɓáún-ɓáún ké ɔ ɓàto jù ɓó sè-ná-sèɛ̀ tiín. (1 Tím. 2:​3, 4) Ɔ ná nì jèɛɛ, Jɛhova ɖà à ɖɛ tɛ̀mɛ̀ìn, ɓɛ́ à ké nyɔ tɔ̀ɔ̀ ɓè ɖɛ tɛ̀mɛ̀ìn ɓá ɔ hwòɖòɛ̀-gbɔ-po-ɖɛ̀ ɓèɔ̀ jè dyí, kè ɓɛ́ à ké ɖɛ nɔ̀mɔ̀ dyíin ɓè ɓɛ́ ɔ mu nyɔùn bìì nyuùn wɛ̃ɛ jè wa gbo cɛ̃. (Máf. 10:​11-13; 28:​19, 20) Ɔ ɖà à dyí-poìn-kpòò ɓè nyí, ké ɔ ɖàa páún po ɓɛ́ kɔ̃in-nì-nyɔ̀ ɓè ɓɛ́ wa ɓéɖé ɖɛ̀ɓɛ̀ìn-ɖɛ̀ɓɛ̀ìn nyɛɛ ké à gbo gmɔ̀.—Àpɔ́. 20:28.

9. Xwɛ̀ Jɛhovaa ɖɛ̀ɓɛ̀ìn-ɖɛ̀ɓɛ̀ìnɔ̀ nyu wáɖáá nìɛ̀ kɛ́?

⁹ Jɛhovaa jàà ɖɛ̀ɓɛ̀ìn-ɖɛ̀ɓɛ̀ìnɔ̀ nì wáɖáá dyììn ɖé kà ɔ nyu nyɔ ɓè ɓɛ́ wa seà ɔ nì jè jàà poɛ mɔ́ kɛ kpɔ̃ɔ kɛɛ mú. Poìn jàà ɓè nìà kɛ jè hwìɖìi: Sɔ̀ìn ti nyɔùn-dyù dè ma cĩ́ɛ gbɔ kɛ gboɛɛ, nyɔ béɔ̀ùn ɓè ɖàa gã ɓɛ́ wa ké ɖɛ mɔ̀ ɖɛ sɛ́ɖɛ́ìn dyí mɔɔ ɖɛ gbà kɛɛ gbɔ po ɓó wa mìɔùn bìì. Ɔ nì ná dyɛo, kɛɛ Jɛhova ɖà ɖɛ wa kɔ̃̀ wa ké ɓéɖé ɓɛ́ wa ké waà cĩ́-cĩ́ɔ̀ múàùn dyi kpáìn nyɛɛ wa nyí. (Máf. 5:​44, 45; Àpɔ́. 14:​16, 17) Ɔ ɖàa nyu ɓɛ́ wa kè nyɔ tɔ̀ɔ̀ ɓè ké gbo-kpɔ̃ìn-kpɔ̃ìn ɓéɖéɛ ɓɛ́ìn, kè ɓɛ́ wa ké dyú ɓè wóɖóɛ̀n ɓɛ́ìn, ɔ kè ɓɛ́ wa ké waà sɔ̃ɔ̀ kũ̀à ɓè múàùn dyi kpáìn. (Wɛ́ɖɛ́ 127:3; Ìkí. 2:24) Dyí-tɛ̀mɛ̀ìn-ɖɛ̀ɔ̀ nì wáɖáá kà ɓɛ́ à dyɔún-Ɓàɔ̀ ɖɛ̀ɓɛ̀ nyɔùn séín múɛ. (Ɛ́sé. 34:6) Ɓèà cɛ̃á xwíníín ɖíɛ́ ɓè kɔ̃̀ jè à gãà ɓɛ́ à kéà Jɛhova ɓiè kɛ, kè kà ɔ nyu à mana kɔ̃ poɛ kɛɛ jè.

XWÍNÍÍN KƆ̃̀ JÈ À GÃÀ ƁƐ́ À KÉÀ JƐHOVA ƁIÈƐ

10. (a) Ðɛ́ mɔ̀ xwíníín jɛ́ɛ́ kɔ̃̀ jè à ɓièà Jɛhova kɛ́? (Máfíò 22:37) (b) Xwɛ̀ m̀ ɖà Jɛhovaa hwòɖò-ku-kuɔ̀ kpáná kɔ̃ún dyé kɛ́? (Wɛ́ɖɛ́ 103:​13, 14)

¹⁰ Kà Jizɛ nyuɛ ma kà kɛɛ, kàà à ɓiè Jɛhova jɛ́ɛ́ ɓó ɖɛ̀ɓɛ̀ìn-ɖɛ̀ɓɛ̀ìn à ɓéɖéà ɓó ɔ bììɛɛ jè. (Zà Máfíò 22:37 wuɖuún.) À xwɛ̃́ìn Jɛhova bũ̀in ɔ jù ké à dyi ɔ kpeɖe ɓèɔ̀ jè cɛ̃́ ní. Poìn kà Jɛhova nyu à jè hwòɖò kuɛ kɛɛ jè hwìɖìi. Ti Éézùɖùɛ̀-nyɔ̀ ɓèɔ̀ zà ma ɔ wuɖu ɖùù dyiɛɛ, ɔ po ma wa pɛ́í, ké ɔ ɖá: “Ɓè ɖò-ɖò séín mɛ táà ɔ xwai-nyu-ɖɛ̀ gbà ɓèɔ̀ dyi.” (Jɛ̀ɖ. 18:11) Jɛhova dyuòɛ̀ dyí kà à se mú hwɛ̀, mɔɔ kà à mɔ̀ púu-púu kɛ. (Zà Wɛ́ɖɛ́ 103:​13, 14 wuɖuún.) M̀ dyi Jɛhovaa hwòɖò-ku-kuɔ̀ kè ɔ kpeɖe nɔ̀mɔ̀ dyíin tɔ̀ɔ̀ ɓèɔ̀ jè hwìɖìi nàìn ní, má ɔ nyuɛ ké m̀ mɔ́ ɔ ɓièɛ̀ dyi kánáá pue?

11. Ðɛ́ mɔ̀ xwíníín tɔ̀ɔ̀ ɖíɛ́ ɓè kɔ̃̀ jè à gãà ɓɛ́ à kéà à dyɔún-Ɓàɔ̀ ɓiè kɛ́?

¹¹ Ké ɖeɛɛ, à ɓiè Jɛhova, sepoɛɖe ɔ mɔ̀ ɖɛ sɛ́ɖɛ́ìn dyí ɓɛ́ à ɓéɖé ɓɛ́ à ké nyuɛ. (Máf. 4:10) Ké ɓó kɔ̃in ɖeɛɛ, à dyuò ɖɛ ɓè ɓɛ́ à jàà ɓiè-ɓièɔ̀ mu gbo wóɖóùn wɛ̃ɛ dyí. À jàà ɓiè-ɓièɔ̀ nyuɛ ké Jɛhova nyɛ́nɛ́ɔ̀ hwɛ̀ mú, ké ɔ tɛ̀mɛ̀ìn kà Nɔɔ́-nàmàùn mɔ̀ se-nyɔ̀ kɛ, ké ɔ nyuɛ ké à dyɔún-Ɓàɔ̀ hwòɖò dè dyi. Ké ɔ jù ké à dyiɛ gã ɓɛ́ à ké Jɛhova ɓiè zɛ̃̀ɛ̀ ní, à mu ɔ ɓièɛ̀ ɓɛ́ìn kánáá pu!—Jɔ̃́ɔ́ 17:3.

12-13. Ðɛ́ à cɛ̃́ Jínì kè Pã́à xwaún wɛ̃́?

¹² Ti à mɔ̀ dyú-gbɔ́ɔ́ keɛɛ, à ɓɛ́ìn jàà ɖɛ̀ɓɛ̀ìn-ɖɛ̀ɓɛ̀ìn ɓéɖéɛ ɓó Jɛhova bìì, ɖɛ̀ɓɛ̀ìn-ɖɛ̀ɓɛ̀ìn ɓɛ́ ɔ mu kɔ̃ kpáuń nì tee ɓɛ́ ɔ ké à nyɔ-vɛ̀nɛ̀-tì dyɛ̀ìn nyɛ. Dyé ɖɛ kpá ma ɖíí sɔ̃́ ɓè mɔ̀ Jínì kè Pã́à kɛɛ gboɛ.a Jínì mɔ̀ ma zɔ̃ ɓaɖa-bùè sè dyúáɖò ké Pã́à mɔ̀ ma zɔ̃ ɓaɖa-bùè ti wa dè ma Baɓoɔ cɛ̃́ɛ gbɔɛ. Wa wóɖóìn-nyɔ̀ ɓèɔ̀ se ma Baɓoɔ cɛ̃́ɛ mɔ́ dyɛo, kɛɛ wa wɔ̃́ìn ma gbo ɓɛ́ Jínì kè Pã́à ké ma Baɓoɔ cɛ̃́ ɔ jù ké wa kè xwéɖé-dùɔ̀ dyi ma cɔ́cì mu ɖé wíkìɔ̀ mánáín ní. Jínì ɖá, “Ðɛ ɓè ɓɛ́ Jɛhova Zàse ɓèɔ̀ tɛ̀mɛ̀ìn ma ḿ sɔ̀ìn ɖé Baɓoɔ múɛɛ kpá ma ḿ gbo, ɓɛ́ ḿ ké ma nyɔ-dyí-dè-dè ɓɛ́ ɔ sɔ̀ìn ma ɖé ní mùè ɓèɔ̀ gbo ɓó náá-ɖɛ̀ vɛ̀nɛ̀ ná jè, kè gbàɖàùn po jèɛɛ gbo vɔ̃.”

¹³ Ti wa ɖà ma màa-dyù-hwà ɓè jùɛɛ, wa sɔ̃́ɔ̀ jù ma wuɖu-wáɖá-nyɔ̀ ɓè. Ti wè ɖà ma ziɛɛ, wa ɖú ma pàníɛ̀-kũ̀à nyu kpàì, ké wa nì ma waà wóɖóìn-nyɔ̀ ɓè ɖà ma súá kpá kɛɛ gbo gmɔ̀ùn. Ɓá ɖɛ wa dyé ma dyíɛ jè dyíɛɛ, Jínì ɖá: “Ḿ ɖàa cɛ̃́ kà ɓɛ́ Jɛhova kɔ̃̀ ɖé ɔ ɓàto ɓèɔ̀ jè gbo jàà kà 2 Tímétè 2:19 nyuà cɛ̃ɛ, ɓɛ́ ɔ dyià níin, ‘[Jɛhova] dyuò nyɔ mɔ̀ ɔ nyɔ ɓèɛɛ dyí’ kɛ.” Ɔ nì wáɖáá kà ɓɛ́ Jɛhova kɔ̃̀ ɖé nyɔ ɓè ɓɛ́ wa gãà, ɓɛ́ wa kéà ɔ mú ɖɛ̀ɓɛ̀, kè ɓɛ́ wa kéà ɔ ɓiè kɛɛ jè gboɛ!

14. Xwɛ̀ à wĩín-wùɖù kè à nyuu-ɖɛ̀ ɓè ɓɛ́ìn Jɛhova nyɛ́nɛ́ɔ̀ mú hwɔɔ kɛ́? (Dyé dyi-dyé-ɖɛ̀ ɓèɔ̀ ɖekè.)

¹⁴ À mɔ́ ɓɛ́ à kéɛ nyu ɓɛ́ Jɛhova nyɛ́nɛ́ɔ̀ ké mú hwɛ̀ gàná cá. Poìn ɖɛ nìà kɛ jè hwìɖìi: M̀ ɓéɖé ɓàto ɖò ɓɛ́ ɔ nɔ̀mɔ̀ kpeɖeín, ké ɔ nyu jĩ́á-jè, ké ɔ zĩ̀ìn nyɔ kɔ̃in nyɛ. Púɛɛ, wé ɖòɛ̀ ɓaɖaa, m̀ wɔ̃́ɔ ké nyɔ ɖò kpɔ̃ nì ɓàtoɔ̀ kànà-ɖɛ̀ kè gbá-gbá nyu jè. Ðɛ́ nì mu nyuùn wɛ̃́? M̀ mu ɔ gbo ziìn. Kà dyúáɖòɔ̀ kàà, ɔ jù ké Sétɔ̃̀ kè nyɔ ɓè nìà ɔ kpé xwíɖíiɛɛ dyi vɔ̃, ɓɛ́ wa ké Jɛhova nyɛ́nɛ́ɔ̀ mú gbɔɔ̀ dyììn ɖé ɔ se ɓè wĩin-tɔ́mɔ́ìn-tɔ́mɔ́ìn mú ní, à mu jàà ɓá Jɛhova jè dyíɛɛ cɛ̃ìn, ɓɛ́ à ké Ɔ nyɛ́nɛ́ɔ̀ jè vɔ̃ kóɖó-kóɖó. (Wɛ́ɖɛ́ 34:1; Àzé. 43:10) À tɛ̀mɛ̀ìn kà à mɔ́ Jɛhova ɓièɛ̀ dyi hwòɖòɛ̀-ɖé-hwɛ̀-kà kɛ dyììn ɖé à wĩín-wùɖù kè à nyuu-ɖɛ̀ ɓè mú.

15. Xwɛ̀ àpɔ́sò Pɔ́ɔ̀ nyu ma ɔ dyí-sɔ́-ɖɛ̀ ɓèɔ̀ dyí-zàìn-zàìn kpáná kɔ̃ún dyéɛ kɛ́? (Fèɖópĩ̀ɔ̀ 3:​7, 8)

¹⁵ À hwòɖò wɔ̃́ ké à zàìn à dyí-sɔ́-ɖɛ̀ ɓè dyí ɖé à cĩ́-cĩ́ɔ̀ mú, ɓɛ́ à ké Jɛhova ɓiè jàà-kà mɔɔ gàná cá. Ɔ hwɔìn-kà, àpɔ́sò Pɔ́ɔ̀ gãa ma ɓɛ́ ɔ ké ma kũ̀à kpa ɖɛ ɓɛ́ ɔ ɓéɖé ma kɛɛ dyi táà, ɓɛ́ ɔ ké ma Jizɛ kíɖíí sí, kè ɓɛ́ ɔ ké ma Jɛhova ɓiè. (Gàɖ. 1:14) Dyììn ɖé ɔ náa nyu-nyu múɛɛ, Pɔ́ɔ̀ ɓéɖé ma cĩ́-cĩ́ nɔ̀mɔ̀ dyíin, ké ɔ kè Kɛ́ɖɛ́ì mu ɓóɖó-kpàà nàìn sɔ̀ìn ɖé dyɔún. Ɔ hwòɖò se ma ɖé ɖei kpá fɔɔ ɓó Jɛhova ɓiè jè, ké kàà à nììn hwòɖò se ɖé ɖei kpáuń mu ɖekè.—Zà Fèɖópĩ̀ɔ̀ 3:​7, 8 wuɖuún.

16. Ðɛ́ à cɛ̃́ Júɖìà xwaún wɛ̃́? (Dyé dyi-dyé-ɖɛ̀ ɓèɔ̀ ɖekè.)

¹⁶ Ɔ jù ké à dyi Jɛhova ɓiè jè po kĩ́ín ní, à mu cĩ́-cĩ́ nɔ̀mɔ̀ dyíin ɓéɖéìn kàùn kè ɖé dyúa. Poìn ɖɛ ɖíí-màà ɖò kɔ̃̀ nyɛ́nɛ́ mɔ̀ Júɖìà kɛ dyé ma dyíɛɛ jè hwìɖìi. Hwɛ̀ Júɖìà ké ma jààɔ̀ cɛ̃́ɛ, ɔ mɔ̀ ma kúádyà ɖé ɔ cɔ́cìɔ̀ mú sɔ̀ìn ti ɔ mɔ̀ ma màà-dyù-gmɔ̀ kɛ gbo. Ɓeɖe-nyɔ̀ vɛ̀nɛ̀ ɖò ɓɛ́ ɔ se cɔ́cì-wɛ̀ɖɛ̀ ɓeɖe-nyɔ̀ kɛɛ dè ma Júɖìà dyéɖé gbo, ké ɔ tɛ̀mɛ̀ìn ma ɔ ɖɛ. Júɖìà nyɛ́nɛ́ ɖú ma mu kpàì, ké ɔ ɓeɖe ma ɖé dà kpa ɖɛ ɓè. Ti Júɖìà nì ma súkúù vɛ̀nɛ̀ ɖò kɔ̃̀ mú ɓɛ́ wa cɛ̃́ ɓeɖe-ɓeɖe kɛ muɛń nyɛɛ, ɔ mùè-ɖɛ-cɛ̃́-nyɔ̀ ɖò ɖú ma ɔ Geɖepɔɔ jè gbo cɛ̃ kpàì, ké ɔ mùèɔ̀ zaìn ma kɔ̃in kà ɓɛ́ Geɖepɔɔ nyɛ́nɛ́ mɔ̀ Jɛhova kɛ. Ɔ se hwèɖèìn, ké Júɖìà nì ma Baɓoɔ cɛ̃́ɛń kpa sɔ̃́ ɓó wíkì séín. Púɛɛ, ɔ poɛ ma gbɔ, ɓɛ́ ɔ ké ma ɓeɖe jèɔ̀ dyi táà, ɓɛ́ ɔ ké ma Jɛhova ɓiè-ɓiè gbo vòìn ɖé ɔ cĩ́-cĩ́ɔ̀ mú. Ðɛ-gbɔ-po-po nìà wɛ se ma xwa fɛ̃́ìn. Júɖìà ɖá, “Nyɔ pàɖà cɛ̃ɛ ma ḿ gbo kà ḿ nì ma ní nyíí-ɖɛ̀ɔ̀ xwáɖáún poɛń nyɛ, kɛɛ ḿ mɔ́ ɓɛ́ ḿ ké ma ní cĩ́-cĩ́ɔ̀ kũ̀à mú nyùìn gàná cá ɓó Jɛhova ɓiè jè.” Xwɛ̀ ɔ hwòɖò nyu nìɛ̀ zɛ̃̀ɛ̀ ɓá ɖɛ ɔ gã ma ké ɔ ɖàà zɔ̃ kpáɖá-nyɔ ɓaɖa-bùè zĩ̀ìn nyɛɛ jè dyíɛ́? Ɔ ɖá, “Ḿ ɓéɖé gìɖìi, ké ḿ dèɛ̀ hwòɖò kɔ̃ kà ɓɛ́ Jɛhova mu ní hwòɖòɛ̀-mɔ́ɔ́-ɖɛ̀ séín ḿ nyíìn ɖé dyúa kɛ.”—Wɛ́ɖɛ́ 145:16.

ƁIÈ JƐHOVA KÁNÁÁ PU

17. Ðɛ́ wé hwɛ̀ìn-gbɔ ɓèɔ̀ mú cĩ́-cĩ́ nyu nyɔ ɓè ɓɛ́ wa ɖàa gã ɓɛ́ wa ké Geɖepɔɔ ɓiè kè nyɔ ɓè séèà náa nyu keɛɛ bììɛ́?

¹⁷ À nì wé hwɛ̀ìn-gbɔ ɓèɔ̀ mú cĩ́ɛń. Àpɔ́sò Pɔ́ɔ̀ ɖá: “Ti tííwè ɖà zi ní, nyɔ ɓéɖé ɓɛ́ ɔ kéà dyiɛɛ mu dyiìn. Ɔ mu dyiìn wàɖà.” (Híì. 10:37) Ðɛ́ ɖɛ nìà kɛ nyu à bììɛ́? Ti sèà ɓó ɓɛ́ nyɔ ɓè kéɛ gã ɓɛ́ wa ké Jɛhova ɓièɛɛ se dyí vò ɖe fɔɔ. (1 Kɔ̀. 7:29) Ké ɔ jù ké à ɖàa gã ɓɛ́ à ké Geɖepɔɔ ɓiè ní, à dyuòɛ̀ dyí kà à ɓéɖé ɓɛ́ à ké mú-dɔ̃̀-dɔ̃̀ ɓè hwòɖò kùìn nyɛ, kɛɛ ɔ mɔ̀ ɓó “ti tííwè” bìì pu.

18. Ðɛ́ Jɛhova kè Jizɛ mɔ́ ɓɛ́ à ké nyu kɛ́?

¹⁸ Jizɛ se ma ɔ ɖeín-nà-nyɔ̀ ɓèɔ̀ kpéí po ɓɛ́ wa ké ma ɔ ɖeín-sí-sí gbɔ dè pu, kɛɛ ɔ po ma wa kpéí ɓɛ́ wa ké ma ɔ ɖeín sí kánáá pu. (Máf. 16:24) Ɔ jèɛɛ, ɔ jù ké à ɖà Jɛhova ɓièɛ̀n hwèɖèìn ɓó zɔ̃ pàɖà xwíníín ní, à ní ɖá ɓɛ́ à ké sa fɔɔ. À ɓéɖé ɓɛ́ à ké vɔ̃ kóɖó-kóɖó ɓɛ́ à ké ɔ ɓièɛ̀n dyi gã̀ tee. Ɔ se dyɛ̀ xwa fɛ̃́ɛ̀n mu dyɛo, kɛɛ à mu mana pàɖà kè hwòɖò-dyi-dè-dè múàùn dyi kpáìn kàùn!—Wɛ́ɖɛ́ 35:27.

19. Ðɛ́ à cɛ̃́ Jɛ́nì xwaún wɛ̃́?

¹⁹ Nyɔ ɖíɛ́ ɓè poɛ̀n hwìɖìi kà ɖɛ ɓè nyɔ kɔ̃̀ nyɔ ké kɔ̃ín pòìn ɓɛ́ nyɔ ké Jɛhova ɓièɛɛ zi kpéín ɓúáuń mìɔ kɛ. Ɔ jù ké m̀ dyi nyɔ gmɔ̀ jùìn, m̀ poɛ̀n hwìɖìi kà m̀ dyi Jɛhova ɓiè ní, nì mu ɖɛ ɖò xwa bĩìn nyɛɛ̀? Ðíí-gàà gmɔ̀ ɖò mɔ̀ Jɛ́nì kɛɛ ɖá: “Ḿ poɛ̀n ma hwìɖìi kà ɓɛ́ Jɛhova Zàse jù-jù nɛ́ìn nyɔ dyi mìɔ kɛ. Ɔ nì ma pu kà dyú ɓè ɓɛ́ ḿ kè wa kè wóɖó ma ɓíɖíiɛɛ nì ma hwɔ-pa-pa mɔɔ ɓaɖaìn-ɓaɖaìn mɔɔ hwɔ̀ɖɔ̀-gbà-vɔ̃-pèè ɓè múàùn dyi kpáìn, ké ḿ nì ma ní tiɔ̀ dyí-poìn-poìn ɓèɔ̀ kè wuɖu-wáɖá-kũ̀àɔ̀ kɔ̃ún peɖeɛń nyɛ.” Xwɛ̀ hwìɖìi-poìn-poìn nìà kɛ nyu ma Jɛ́nì kpeɖe dyí zàìn nyɛ́? Ɔ ɖá, “Ḿ ɖú ma ɖɛ gbà ɓè sɔ̃ún po kpàì, ké ɔ mɔ̀ ma múà-ɖɛ̀ ɓó ti wè bìì. Kɛɛ, ní múàɔ̀ se ma hwèɖèìn fɔɔ. Ḿ ɖú ma Baɓoɔ jàà-wùɖù ɓè ɓɛ́ ḿ pòìn ma kà kɔ̃ín nyɛɛ jè hwìɖìi poìn kpàì, ké ḿ poɛ ma gbɔ ɓɛ́ ḿ ké ma Jɛhova ɓiè hwòɖòɛ̀-ɖé-hwɛ̀-kà. Sɔ̀ìn ɓó tia gboɛɛ, ɔ nì kà Jɛhova ɖà ní ɓaà-wùɖù ɖò-ɖò séín ɓèɔ̀ gɔ̃̀ jùɛ.”

20. Ðɛ́ à mɛ jìnììn kɔ̃ kɛ́?

²⁰ Wɛ́ɖɛ́-ɓeɖe-nyɔ̀ ɖò ɓèɖèìn ma Jɛhova gbo, ké ɔ ɖá: “Mana nì nyɔ ɓè ɓɛ́ m̀ gãà ɓɛ́ m̀ dyià wa ɓó m̀ mìɔùn bũ̀in xwɛ̃́ìn, ɓɛ́ wa kéà ɖé nì gbòɔ̀ mú cĩ́ɛɛ kɔ̃.” (Wɛ́ɖɛ́ 65:4) Ɓèà mɛ jìnììn ɖɛ dyúáɖò ɓɛ́ Jasúé jìnììn ma kɔ̃ɛɛ kɔ̃. Ɔ ɖá: “Ɔ dyi ḿ kè ḿ nììn gbò-xwíníín-nyɔ̀ ɓèɔ̀ jè jùìn, à mu [Jɛhova] ɓièìn.”—Jas. 24:15.