Jɛhova Nì Ɓó À Gbo Tee

1-2. (a) Xwíníínɔ̀ nyɛ́ kɔ̃̀ jè à ɓɛ́àìn cɛ̃ɛ kà Jɛhova nì à gbo ɖé à fũ̀à-fṹá-tì ɓèɔ̀ múɛ́? (b) Ðɛ́ à mu jè cɛ̃ìn ɖé cɛ̃́ɛ́-ɖɛ̀ nìà kɛ múɛ́?

À DYI fũ̀à-fṹá-ɖɛ̀ ku wɔ̃ ɓè dyí dyé ní, à ɓɛ́ìn hwìɖìi poɛ̀n kà à ɖoún nì xwáɖá-kpò vɛ̀nɛ̀ ɖò mú, ké à sè ɖé wáɖáún wɛ̃. Kɛɛ, à ɖòùn ní vɔ̃ à fũ̀à-fṹá-ɖɛ̀ ɓèɔ̀ gbo. À dyɔún-Ɓà Jɛhova ní dyé à fũ̀à-fṹá-ɖɛ̀ ɓèɔ̀ ɖòùn pu, kɛɛ ɔ cɛ̃ɛ kà ɓɛ́ ɔ mu à gbo kpáùn ɓɛ́ à ké wa mú mùɛ̀n ɓɛ́ìn nyɛ. Jɛhova cɛ̃ɛ ɔ jàà ɓiè-nyɔ̀ ɓèɔ̀ gbo, ké ɔ ɖá: “Ní mu ɓè gbo kpáùn.”—Àzé. 41:10.

² Cɛ̃́ɛ́-ɖɛ̀ nìà kɛ mu kà Jɛhova nyu à gbo kpáa dyììn ɖé (1) à nàìn-nàìn kè (2) à gbo-gmɔ̀-gmɔ̀ kè (3) à dyí-gmɔ̀-gmɔ̀ ɔ kè (4) à hwòɖò-dyi-dè-dè múɛɛ jè cɛ̃ìn. Jɛhova cɛ̃ɛ à gbo wáɖáá, kà kɛbì à mɛ dyé fũ̀à-fṹá-ɖɛ̀ séín ɖò dyí ɖé à cĩ́-cĩ́ɔ̀ múɛɛ, à jè se ɔ hwìɖìi sɔ̀ɔ̀ mu fɔɔ kɛ. Ɔ se à dyi táà mu fɔɔ. Ɔ jèɛɛ, Jɛhova nì ɓó à gbo.

JƐHOVA NÀÌN À

3-4. Xwɛ̀ Jɛhova nyu à nàìn nyɛ́? (Wɛ́ɖɛ́ 48:14)

³ Zà Wɛ́ɖɛ́ 48:14 wuɖuún. Jɛhova dyuòɛ̀ dyí kà à se à mìɔùn nàìn ɓɛ́ìn nyɛ. Xwɛ̀ ɔ nyu ɔ jàà ɓiè-nyɔ̀ ɓèɔ̀ nàìn zɛ̃̀ɛ̀ kɛ́? Hwìè ɖò kɔ̃̀ mú ɓɛ́ ɔ nyuɛ náa kɛɛ mɔ̀ dyììn ɖé Baɓoɔ mú. (Wɛ́ɖɛ́ 119:105) Jɛhova kpá à gbo dyììn ɖé ɔ Wuɖuɔ̀ mú, ɓɛ́ à ké ɖɛ ɓè gbɔ po, kè ɓɛ́ à ké kpeɖe ɓè muɛ nyuùn ɓɛ́ à ké múà ɓéɖé kàùn, kè ɓɛ́ à ké sè-ná-sèɛ̀ fɛ̀ɛ̀ ɓéɖé ɖé dyúá kɛɛ ɓéɖé.a Ɔ hwɔìn-kà, Jɛhova tɛ̀mɛ̀ìn à, ɓɛ́ à ké se nyɔ ɖò xwíníín dyi dèìn, kè ɓɛ́ à ké jàà nyu ɖé à nyuu-ɖɛ̀ séín mú, ɔ kè ɓɛ́ à ké nyɔ tɔ̀ɔ̀ ɓè mú ɖɛ̀ɓɛ̀ hwòɖòɛ̀-ɖé-hwɛ̀-kà. (Wɛ́ɖɛ́ 37:8; Híì. 13:18; 1 Píɖɛ̀ 1:22) À dyi kpeɖe nì kà ɓèa tɛ̀mɛ̀ìn ní, à mu wóɖóìn-nyɔ̀ mɔɔ dyi-kpɔ̃ìn-nyɔ̀ mɔɔ ɓàto nɔ̀mɔ̀ dyíin ɓè jùùn.

⁴ Ɓó kɔ̃in ɖeɛɛ, Jɛhova cɛ̃ nyɔ jɛ́ɛ́ ɓè jè ɖé ɔ Wuɖuɔ̀ mú, ɓɛ́ wa dyé ma fũ̀à-fṹá-ɖɛ̀ ɓè dyí kà à mɔ̀ùn nìà kɛ. (1 Kɔ̀. 10:13; Jĩ́ìn 5:17) Ɔ jù ké à dyi nyɔ ɓè nìà kɛ jè wuɖuún zà, ké à dyi ɖɛ ɓè à cɛ̃́ wa xwaún wɛ̃ kũ̀à mú nyùìn ní, nìí, à mu kpáná dyéìn ɖé hwìè sɔ̃́ ɓè mú. Kĩ́ín nyɛɛ, à muɛ dyí dyuòùn kà à ɖòùn se fũ̀à-fṹá-ɖɛ̀ ɓè dyí dyéɛń nìɛ—kɛɛ nyɔ tɔ̀ɔ̀ ɓè ɖà fũ̀à-fṹá-ɖɛ̀ dyúáɖò ɓè nìà wɛ dyí dyé, ké wa ɖàa hwòɖò kùìn nyɛ. (1 Píɖɛ̀ 5:9) Ké sɔ̃́ ɖeɛɛ, à mu kà à ké à fũ̀à-fṹá-ɖɛ̀ ɓèɔ̀ hwòɖò kùɛ̀n nyuɛɛ cɛ̃́ìn.—Wóɖ. 15:4.

5. Nyɛ́ ɓè Jɛhova nyùìn kũ̀à mú ɓɛ́ ɔ ké à nàìn nyɛ́?

⁵ Jɛhova ɖàa páún po ɖekè, ɓɛ́ à mùè jàà-po-nyɔ̀ ɓè ké à nàìn.b Ɔ hwɔìn-kà, dyi-poìn-kpòò kɔ̃in-té-nyɔ̀ ɓè té dyi-poìn-kpòò ɓè kɔ̃in, ɓɛ́ wa ké à kpéí po. Waà wáɖáá-wùɖù ɓèɔ̀ kùìn à dyi, ké wa kpá à gbo ɓɛ́ à ké à gbo-kpɔ̃ìn-kpɔ̃ìnɔ̀ jè gboi kpɔ̃ tee. (Àpɔ́. 15:40–16:5) Ɛ́ɖɔ̀ ɓèɔ̀ mɔ̀ùn vɔ̃ ɖekè ɓɛ́ wa ké ɖíí ɓèɔ̀ ɖò-ɖò séín dyɔɔ̀ mú wóɖó jè gbo kɔ̃̀. (1 Píɖɛ̀ 5:​2, 3) Wóɖóìn-nyɔ̀ ɓè nàìn waà dyú ɓèɔ̀ ɖé zùùn dyììn ɖé wa gbo-kpá-kpá mú, ɓɛ́ wa ké hwìɖìi-poìn-poìn sɛ́ɖɛ́ìn dyí kè kpeɖe nɔ̀mɔ̀ dyíin ɓè ɓéɖé. (Nɔ́ɔ́ 22:6) Ké ɖíí-màà ɓè ɓɛ́ wa hwɛ̀ ɖɛ kɛɛ kpá ɖíí-màà gmɔ̀ ɓè gbo dyììn ɖé ɓo-bɛ̃̀ nɔ̀mɔ̀ dyíin dè-dè kè náún-po-wùɖù kpa ɖɛ ɓè tò-tò ɔ kè nyɔ-kpéí-po-wùɖù ɓè cɛ̃-cɛ̃ mú.—Tátɔ̀ 2:​3-5.

6. Ðɛ́ à mɛ nyu ɓɛ́ à ké Jɛhovaa nyɔ-nàìn-nàìnɔ̀ kpáná kɔ̃ún dyé kɛ́?

⁶ Jɛhova ɖà ɔ nììn nyu dyììn ɖé hwìè-da-zàìn-zàìn ɓè ɓɛ́ à mɔ́ kɛɛ à nyí-nyí mú. Xwɛ̀ à ɓɛ́ìn tɛ̀mɛ̀ìn kà à po Jɛhova zùo ɓó ɖɛ ɓè ɔ ɖàà à bìì nyuɛɛ jè kɛ́? Nɔ́ɔ́ 3:​5, 6 ɖá: “Taɓa [Jɛhova] hwìɖìi hwòɖòɛ̀-ɖé-hwɛ̀-kà. Mɔ̀ùn ɖá ɓɛ́ m̀ ké m̀ mìɔùn nììn ɖɛ-múin-wɔ̃́-wɔ̃́ mú tè.” À dyiɛ náa nyu ní, Jɛhova mu ‘hwìè à ké kpaa à da zàìn.’ Ɔ xwíníín mɔ̀, Jɛhova mu à gbo kpáùn ɓɛ́ à ké fũ̀à-fṹá-ɖɛ̀ ɓè dyí ɓàɖàìn, kè ɓɛ́ à ké cĩ́-cĩ́ múàùn dyi kpáìn mìɔ. À po Jɛhova zùo mìɔ cá ɓɛ́ ɔ ké à ɖò-ɖò séín náún-po-wùɖù nyí ɖé ɖɛ̀ɓɛ̀ìn-ɖɛ̀ɓɛ̀ìn múɛ!—Wɛ́ɖɛ́ 32:8.

JƐHOVA GMƆ̀ À GBO

7. Ðɛ́ mɔ̀ hwìè ɖíɛ́ ɓè kɔ̃̀ mú ɓɛ́ Jɛhova gmɔ̀ à gbo kɛ́? (Fèɖópĩ̀ɔ̀ 4:19)

⁷ Zà Fèɖópĩ̀ɔ̀ 4:19 wuɖuún. Ɓó à nàìn-nàìn ɖé zùùn wɛ̃ kɔ̃in nyɛɛ, Jɛhova po à dúún-ku-kuɔ̀ mana kɔ̃, ɓɛ́ à ké ɖii-ɖɛ̀ kè mú-po-ɖɔ̀ ɔ kè pɛ̃́-naín ɓɛ́ à kɔ̃̀ à ké ɓéɖéɛɛ dyéɛ ɓɛ́ìn. (Máf. 6:33; 2 Tɛ̀s. 3:12) Ɔ se ɖɛ gbà ɓɛ́ à ké ɖɛ ɓè à mɔ́ kɛ jè hwìɖìi poìn dyɛo, kɛɛ Jɛhova po à náún kà à mɛ ɓɔ́ ɖɛ ɓè nì náa jè hwòɖò dyií gbàìn mìɔ kɛ. (Dyé cɛ̃́ɛ́-ɖɛ̀ ɓáà Máfíò 6:25 dyíɛ.) Xwíníínɔ̀ nyɛ́ kɔ̃̀ jèɛ́? Ɔ mɔ̀ sepoɛɖe Geɖepɔɔ se ɔ jàà ɓiè-nyɔ̀ ɓèɔ̀ dyi táà mu fɔɔ ɖé ti-kàmàùn-kàmàùn ɓè mú. (Máf. 6:8; Híì. 13:5) À ɓɛ́ìn ɔ wuɖuɔ̀ hwòɖò kɔ̃ dèɛ̀ kà ɔ ɖá ɔ muà à gbo gmɔ̀ùn wɛ̃.

8. Ðɛ́ Jɛhova nyu ma Dèɓé bììɛ́?

⁸ Poìn kà Jɛhova nyu ma Dèɓé gbo kpáa kɛɛ jè hwìɖìi. Ɓó fũ̀à-fṹá-zɔ̃̀ ɓè kɔ̃̀ xwíníín ɓɛ́ Dèɓé mɔ̀ ma kà ɓee-ɓee-nyɔ̀ kɛɛ, Jɛhova gmɔ̀ ma ɔ kè ɔ gàa ɓèɔ̀ gbo dyììn ɖé ɖɛ wa mɔ́ ma ɓɛ́ wa ké ma cĩ́ɛɛ wa nyí-nyí mú. Ti Dèɓé poìn ma kà Jɛhova nyu ma ɔ jè gbo kɔ̃̀ɔ̀ ɖé zɔ̃ ɓèa xwíníín nyɛ jè hwìɖìiɛɛ, ɔ cɛ̃ɛ ma, ké ɔ ɖá: “Sɔ̀ìn ɖé ní dyú-gbɔ́ɔ́-tììn ké ní nyɔ-sùà-tìɛ̀ dyɛ̀ìn nyɛɛ, ḿ séèɛ̀ dyé ɖò ɓɛ́ Bounɓoɔ ké dyí-sɛ́ɖɛ́ìn-nyɔ̀ ɓèɔ̀ dyi táà, mɔɔ ɓɛ́ waà xwíníín-dyù ɓè ké xwa-kíé-dè-nyɔ̀ jù ɓó ɖii-ɖɛ̀ jè.” (Wɛ́ɖɛ́ 37:25) M̀ ɖàa dyɛ̀ dyé ɖé m̀ mìɔùn nììn cĩ́-cĩ́ɔ̀ mú kà Jɛhova gmɔ̀ ɔ jàà ɓiè-nyɔ̀ ɓèɔ̀ gboɛ.

9. Xwɛ̀ Jɛhova nyu ɔ nyɔ ɓèɔ̀ gbo gmɔ̀ɔ̀ zɛ̃̀ɛ̀ ɔ jù ké gà-ɖɛ̀ ɓè dyi kpá níɛ́? (Dyé dyi-dyé-ɖɛ̀ɔ̀ ɖekè.)

⁹ Jɛhova gmɔ̀ ɔ nyɔ ɓèɔ̀ gbo ɖekè ɓó gà-ɖɛ̀ ɓè tiín. Ɔ hwɔìn-kà, ti mɔ́ vɛ̀nɛ̀ ɖò kpá ma ɖé Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛ tiín nyɛɛ, Kɛ́ɖɛ́ì ɖeín-sí-nyɔ̀ ɓè sɔ̀ìn ma ɓóɖó-dù kò-kò ɓè kɔ̃ɛɛ tò ma nyíí-ɖɛ̀ ɓè ɖé wa ɖíí ɓè mɔ́ ma gbo-kpá-kpá kɛɛ gbo. (Àpɔ́. 11:​27-30; Wóɖ. 15:​25, 26) Geɖepɔɔ nyɔ ɓè nì zɛ̃̀ɛ̀ kɛɛ tɛ̀mɛ̀ìn nyɔ-ɖɛ-nyí-kpèɖè dyúáɖòɔ̀ ɖekè. Gà-ɖɛ̀ ɖò dyi kpá ní, Jɛhova tìnììn ɔ nyɔ ɓèɔ̀ hwòɖò-dyùà dyi, ɓɛ́ wa ké ɖii-ɖɛ̀ kè ní kè ɖɔ ɔ kè kũùn ɓè tò ɓó nyɔ ɓè cĩ́à dɛ̀ gà-ɖɛ̀ɔ̀ kpáà kɛɛ bìì. Poo-ɖɛ̀-po-kpòò ɓè nɔ̀mɔ̀ìn mú-pɛ̃́-gbò ɓè kè Kĩ́-Dɔ̃̀ Hɔ́ɔ̀ ɓè xwa. Ké Jɛhova nyɔ ɓèɔ̀ fṹà ɓɛ́ wa ké nyɔ ɓè ɓɛ́ wa kɔ̃̀ɔ̀-ɖɛ̀ ɓè mɔɔ wa ɖɛ̀ɓɛ̀-nyɔ̀ ɓè sɔ̀à wa xwaa hwòɖò dyi dè, kè ɓɛ́ wa ké wa kpéí po.c

10-11. Ðɛ́ m̀ cɛ̃́ Bówèɖè xwaún wɛ̃́?

¹⁰ Jɛhova nyu nyɔ ɓè ɓɛ́ wa séè ɔ ɓièɛ̀n nì keɛɛ nɔ̀mɔ̀ dyíin dyí ɖekè. Kà dyúáɖòɔ̀ kàà, à mɔ́ hwìè ɓè dyi ɓɛ́ à ké kpeɖeín nɔ̀mɔ̀ ɖé nyɔ ɓè ɓɛ́ wa se à jàà-po-ɖɛ̀ ɓèɔ̀ dyi kpɔ̃ɛɛ gbo. (Gàɖ. 6:10) Ðɛ nìà kɛ nyu zàse ɖé wa gbo tee. Poìn ɖɛ Bówèɖè dyé ma dyíɛɛ jè hwìɖìi. Ɔ mɔ̀ ma sùkúù ɖòɛ̀ kɔ̃in-nì-nyɔ̀ ɖé Dyùkíníì-ɓòɖòɔ̀ kɔ̃. Bówèɖè se ma Jɛhova Zàse ɓèɔ̀ ɖò dyɛo, kɛɛ ɔ nɔ̀mɔ̀ ma kpeɖeín ɖé sùkúù-dyù ɓè mɔ̀ ma Jɛhova Zàse ɓèɛɛ gbo, ké ɔ dyé ma waà jàà-po-ɖɛ̀ ɓèɔ̀ kpéín. Ti Bówèɖè poɛ ma gbɔ ɓɛ́ ɔ ké ma dɛ̀ toɔ̀ ku ma wɔ̃ɛɛ sɔ̀ ɓɛ́ ɔ ké ma ɓóɖóɔ̀ dɛ̀ wa se ma vɔ̃uń nìɛ muɛɛ, à ɖíí ɓèɔ̀ kpá ma ɔ gbo. Ti ɖà ma ziɛɛ, Bówèɖè mu ma Kɛ́ɖɛ́ì mɛ́-mɛ́ɔ̀ jè Hwìɖìi-dyà-hwɔ̀ɔ̀ kɔ̃. Ti Bówèɖè poìn ma ɖɛ ɔ dyé ma dyíɛ jè hwìɖìiɛɛ, ɔ cɛ̃ɛ ma, ké ɔ ɖá: “Jɛhova Zàse ɓèɔ̀ kɔ̃̀ ma ní jè gbo mìɔ, ké wa gmɔ̀ ma ḿ gbo. Ḿ po Jɛhova Zàse ɓèɔ̀ zùo mìɔ cá.”

¹¹ À mɔ̀ùn ɓɛ́ìn à dyɔún-Ɓà mɔ̀à nyɔ-wììn-dyé-nyɔ̀ kɛɛ ɓo-bɛ̃̀ìn síɛ dyììn ɖé nyɔ ɓè mɔ́ gbo-kpá-kpá kɛɛ sɔ̃ nyí-nyí mú, kɛbì wa mɛ mɔ̀ à mùè jàà-po-nyɔ̀ ɓè mɔɔ wa mɛ se wa ɖòɛ. (Ðúù 6:​31, 36) À dèɛ̀ hwòɖò kɔ̃ kà ɓɛ́ à dúún-ku-ku ɓó nyɔ ɓè mú ɖɛ̀ɓɛ̀ jèɛɛ muɛ nyuùn ɓɛ́ wa ké Kɛ́ɖɛ́ì ɖeín-nà-nyɔ̀ ɓè jùɛ. (1 Píɖɛ̀ 2:12) Kɛbì ɖɛ séín ɖò mɛ sɔ̀ìn ɖéɛɛ, à mu múà vɛ̀nɛ̀ ɓɛ́ ɔ sɔ̀ìn ɖé nyɔ-ɖɛ-nyí-nyí múɛɛ ɓéɖéìn mìɔ.—Àpɔ́. 20:35.

JƐHOVA GMƆ̀ À DYÍ

12. Dyí-gmɔ̀-gmɔ̀ɔ̀ nyɛ́ Jɛhova ɖá ɔ muà nyuùn ɓó ɔ nyɔ séín ɓèɔ̀ bììɛ́? (Wɛ́ɖɛ́ 91:​1, 2, 14)

¹² Zà Wɛ́ɖɛ́ 91:​1, 2, 14 wuɖuún. Zɛ̃̀ɛ̀ kɛɛ, Jɛhova cɛ̃ɛ kà ɓɛ́ ɔ mu à dyí gmɔ̀ùn ɖé zùùn wɛ̃. Ɔ se wɔ̃́uń mu fɔɔ ɓɛ́ Sétɔ̃̀ ké jàà ɓiè-ɓiè jè kɔ̃in cá. (Jɔ̃́ɔ́ 17:15) Ké “gà-dyé-dyé vɛ̀nɛ̀ɔ̀” dyi dyi ní, à ɓɛ́ìn hwòɖò kɔ̃ dèɛ̀ gàná cá kà ɓɛ́ Jɛhova mu à dyí gmɔ̀ùn ɖé zùùn kè ɖé kpóɖóún ɖekèɛ.—Wɛ̀ɖ. 7:​9, 14.

13. Hwìè nyɛ́ ɓè kɔ̃̀ mú Jɛhova gmɔ̀ à ɖò-ɖò dyíɛ́?

¹³ Ðɛ́ mɔ̀ dyí-gmɔ̀-gmɔ̀ ɓɛ́ Jɛhova mu nyuùn ɓó à ɖò-ɖò séín bììɛ́? Dyììn ɖé Baɓoɔ múɛɛ, Jɛhova kpá à gbo ɓɛ́ à ké dyí-sɛ́ɖɛ́ìn-ɖɛ̀ kè ɖɛ gbà zaìn gboi dyí dyuò. (Híì. 5:14) À dyi hwìè-da-zàìn-wùɖù ɓè nìà ɖé Geɖepɔɔ Wuɖuɔ̀ múɛɛ kíɖíí sí ní, à mu à mìɔùn nàdì ɓè dyí vìeɛ̀n ɓɛ́ìn ɖé zùùn kè ɖé kpóɖóún. (Wɛ́ɖɛ́ 91:4) Ɓó kɔ̃in ɖeɛɛ, Jɛhova gmɔ̀ nyɔ dyí dyììn ɖé dyí-poìn-kpòòɔ̀ mú. (Àzé. 32:​1, 2) À dyi nyɔ ɓè ɓɛ́ wa ɖɛ̀ɓɛ̀ Jɛhova mú, ké wa kpɔ̃ ɔ gma ɓèɔ̀ dyiɛɛ hwìɛ̀ nì tee ní, wa mu à kpéí poùn, ké wa mu à dyi kùìn ɓɛ́ à ké ɖɛ gbà ɓè kè ɓàto gbà ɓè dyí ɓàɖàìn.—Nɔ́ɔ́ 13:20.

14. (a) Xwíníínɔ̀ nyɛ́ kɔ̃̀ jè Geɖepɔɔ ní gmɔ̀à à dyí ɖé mú-dɔ̃̀-dɔ̃̀ séín xwaún wɛ̃́? (b) Ðɛ́ mɔ̀ hwòɖò-kɔ̃-dè-ɖɛ̀ ɓɛ́ Wɛ́ɖɛ́ 9:10 nyí à kɛ́? (Dyé Gmɔ̀-ɓíɖíi-bɛ̃̀ɔ̀ ɖekè.)

¹⁴ Ðé ti sùà múɛɛ, Jɛhova gmɔ̀ ma ɔ ɓiè-nyɔ̀ ɓèɔ̀ dyí ɖé kpóɖóún tiɔ̀ ɖíɛ́ ɓè ɓaɖa. Kɛɛ, ɔ seɛ ma náa nyu ɓó ti séín ɓaɖa. À dyé gà-ɖɛ̀ ɓè dyí tiɔ̀ ɖíɛ́ ɓè ɓaɖa, sepoɛɖe “nyɔ ɖò se ti nyìnììn dyíin nì ɔ kɔ̃ dyiɛń nyɛɛ dyuò.” (Ìkí. 9:​11, 12) Ké ɖeɛɛ, Jɛhova ɖàa gbo wɔ̃́ìn tee sɔ̀ìn ɖé ti sùà mú ɓɛ́ ɔ ɓiè-nyɔ̀ ɓè ké nyɔ-gà-dyéìn-dyéìn mɔɔ gĩɔ dyí dyé, ɓɛ́ wa kéɛ tɛ̀mɛ̀ìn kà Sétɔ̃̀ mɔ̀ se-tɔ́mɔ́-nyɔ̀ kɛ. (Jóɓò 2:​4-6; Máf. 23:34) Kàà ɔ nì zɛ̃̀ɛ̀ ɖekè. Jɛhova se à mú-dɔ̃̀-dɔ̃̀ɔ̀ ɓó zàà mu dyɛo, kɛɛ à ɓɛ́ìn hwòɖò kɔ̃ dèɛ̀ kà ɔ se nyɔ ɓè ɓɛ́ wa ɖɛ̀ɓɛ̀ ɔ múɛɛ dyi táà mu fɔɔ kɛ.d—Wɛ́ɖɛ́ 9:10.

JƐHOVA DÈ À HWÒÐÒ DYI

15. Xwɛ̀ à nyu hwòɖò-dyi-dè-dè dyéɛ dyììn ɖé ɓaà-ɓaà kè Geɖepɔɔ Wuɖuɔ̀ ɔ kè à mùè Kɛ́ɖɛ́ì ɖeín-sí-nyɔ̀ ɓè múɛ́? (2 Kɔ̀ɖéíntĩ̀ɔ̀ 1:​3, 4)

¹⁵ Zà 2 Kɔ̀ɖéíntĩ̀ɔ̀ 1:​3, 4 wuɖuún. Tiɔ̀ ɖíɛ́ ɓè ɓaɖaín, à dyé hwòɖò-ɖé-ɖei-kpá-ɖɛ̀ ɓè mɔɔ hwòɖò-dyií-gbàìn-ɖɛ̀ ɓè mɔɔ fũ̀à-fṹá-ɖɛ̀ ɓè dyí. M̀ nì dyɛ̀ fũ̀à-fṹá-ɖɛ̀ ɖò dyí dyéɛń kàùn ɓɛ́ ɔ nyu ké m̀ poɛ̀n hwìɖìi kà nyɔ ɖò se nì jè gbo kɔ̃̀ɛ. Nì hwòɖò ɖá nyɔ ɖò wɔ̃́ kà nì hwòɖòɔ̀ nyu nìɛ̀ kɛ múinǹ? Jɛhova wɔ̃́ɔ múin. À kèɔ̀ kè se à puà-ɖɛ̀ ɓèɔ̀ mú peɖeìn ɖòùn pu, kɛɛ ɔ “dè à hwòɖò dyi ɖé à gà-dyé-dyé séín mú.” Xwɛ̀ kɛ́? À dyi Jɛhova kpé dyi pòìn ɖé ɓaà-ɓaà mú ní, ɔ nyí à “gìɖìi kɔ̃̀ jè nyɔùn-dyù seà múin wɔ̃́ɔ ɓɛ́ìn” nyɛ. (Fèɖ. 4:​6, 7) À dyé hwòɖò-dyi-dè-dè ɖekè ɔ jù ké à dyi Jɛhovaa Wuɖu mɔ̀à Baɓoɔ kɛɛ wuɖuún zà ní. Wuɖu nɔ̀mɔ̀ dyíin ɓè kè fɔ̀nɔ̀-hwòɖò ɔ kè hwòɖò-kɔ̃-dè-ɖɛ̀ nìà ɖé kɔ́mɔ́-ɖɛ̀ nìà wɛ múɛɛ ɓɛ́ìn à kpéí poɛ. Ké dyí-poìn-poìn ɓèɔ̀ nyí à hwòɖò-dyi-dè-dè dyììn ɖé ɖíí ɓèɔ̀ hwìɛ̀-nì-nì kè nyɔ-kpéí-po-wùɖù ɓè sɔ̀ìn ɖé Baɓoɔ múɛɛ mú.

16. Ðɛ́ m̀ cɛ̃́ Nétɔ̃̀ kè Pìɖìsíɖà xwaún wɛ̃́?

¹⁶ Ɓɛ́ à ké kà Jɛhova nyu nyɔ hwòɖò dyi dèɛ̀, kè kà ɔ nyu nyɔ kpéí poɛ dyììn ɖé ɔ Wuɖuɔ̀ múɛ mɛ dèɛɛ, poìn ɖɛ Nétɔ̃̀ kè Pìɖìsíɖà, ɓɛ́ wa cĩ́ ɖé Mɛ́ɖékà-ɓòɖòɔ̀ kɔ̃ɛ dyé ma dyíɛɛ jè hwìɖìi. Ɔ ɖà zɔ̃ gbɛ̀i-gbɛ̀i zĩ̀ìn, ké wa poɛ ma gbɔ ɓɛ́ wa ké ma dɛ̀ wa mɔ́ ma wuɖu-wáɖá-nyɔ̀ pàɖà kɛɛ jàɖàìn. Nétɔ̃̀ cɛ̃ɛ ma, ké ɔ ɖá, “À dèɛ̀ ma hwòɖò kɔ̃ kà ɓɛ́ Jɛhova mu ma à dúún-ku-kuɔ̀ mana kɔ̃ poùn wɛ̃.” Kɛɛ, ti wa nyini ma ɖé dàà kɛɛ, wa dyé ma se-hwìɖìi-dè-wɛ̀ ɓè kè wíɖí-gà-kpá-kpá dyí. Púɛɛ, wa kɔ́ìn ma wa ɓíɖí ɖe, ké wa nì ma wíɖí gà dyéɛń ke kánáá pu. Nétɔ̃̀ ɖá, “Ḿ poɛ̀n ma hwìɖìi xwíníín kɔ̃̀ jè Geɖepɔɔ séè ma à mana kɔ̃ po kà à nyuɛ ma hwìɖìi dèɛ̀ kɛ. Ḿ ɖúɛ ma hwìɖìi poìn kpàì ɖekè kɛbì ḿ ɖà ma ɖɛ gbà ɖò nyu ní.” Ti wè ɖà ma ziɛ púɛɛ, Nétɔ̃̀ kè Pìɖìsíɖà ɖúɛ ma múin wɔ̃́ kpàì kà ɓɛ́ Geɖepɔɔ séè ma wa dyi táà ke ɖé waà fũ̀à-fṹá-tìɔ̀ múɛ. Nétɔ̃̀ cɛ̃ɛ ɖe, ké ɔ ɖá, “Ɓó fũ̀à-fṹá-tì ɓèa ɓaɖaa, Baɓoɔ nì ma kà ɓàto fɔ̀nɔ̀ hwòɖò ɖò ɓɛ́ ɔ nì ma à kpéí poɛń kè à hwìè da zàìn nyɛɛ nìà kɛ. À dè ma kà Jɛhova nyu ma à gbo kpáa ɓɛ́ à ké ma ti-kàmàùn-kàmàùn nìà wɛ hwòɖò kùìn nyɛ dyéɖé gbo, ké ɔ se ma ti-kàmàùn-kàmàùnɔ̀. Ɔ jèɛɛ, ɔ nyuɛ ké à dyé ma ti ɓɛ́ à ké fũ̀à-fṹá-ɖɛ̀ ɓè nì ɖé dyúa kɛɛ mú zĩ̀ɛ̀n ɓɛ́ìn ɖé hwìɖìi-taɓa-taɓa mú.”

17. Xwɛ̀ ɖíí-màà ɖò kɔ̃̀ nyɛ́nɛ́ mɔ̀ Hɛ́gà kɛɛ nyu ma hwòɖò-dyi-dè-dè dyéɛ kɛ́? (Dyé dyi-dyé-ɖɛ̀ɔ̀ ɖekè.)

¹⁷ À ɖíí-gàà kè à ɖíí-màà ɓèɔ̀ ɓɛ́ìn à hwòɖò dyi dèɛ̀ ɖekè. Xwɛ̀ kɛ́? Poìn Hɛ́gà ɓɛ́ ɔ cĩ́ ɖé Hɔ̃̀gáɖè-ɓòɖòɔ̀ kɔ̃ɛɛ nyuu-ɖɛ̀ jè hwìɖìi. Ɓó zɔ̃ pàɖà xwíníín nyɛɛ, ɔ mùìn ma fũ̀à-fṹá-ɖɛ̀ kò-kò ɓè mú, ké ɔ nyuɛ ké ɔ hwòɖò kpá ma ɖé ɖei mìɔ, ké ɔ poɛ̀n ma hwìɖìi kà ɔ se ma ɖɛ kpa kɛ. Ɔ dyi ɖɛ ɓèa jè hwìɖìi poìn ní, ɔ ɓɛ́ìn dyéɛ kà Jɛhova dè ma ɔ hwòɖò dyi dyììn ɖé dyí-poìn-kpòòɔ̀ múɛ. Ɔ ɖá: “Jɛhova kpá ma ḿ gbo tee ti kpé hwɛ̀ ma ḿ dyí, sepoɛɖe ḿ nì ma kũ̀à nyuɛń, ké ḿ nì ma ní dyú nì ma wɛ́ɛń nyɛɛ gbo gmɔ̀ùn, ké ḿ nì ma fũ̀à-fṹá-ɖɛ̀ tɔ̀ɔ̀ ɓè dyí dyéɛń nyɛ. Ðé zɔ̃ kpáɖá-nyɔ ɓaɖa-bùè ɓè ɖàà ziɛ xwíníín nyɛɛ, wé ɖò séè zi ɖò ɓɛ́ Jɛhova ké se ní hwòɖòɔ̀ dyi dè kà ɔ nyuà cɛ̃ɛ kɛ. Ɔ kùìn ḿ dyi tee dyììn ɖé wuɖu nɔ̀mɔ̀ dyíin ɓè kè zùo-po-wùɖù ɓè ɓɛ́ nyɔ tɔ̀ɔ̀ ɓè cɛ̃ ḿ gboɛɛ mú. Ḿ dyé ma cuò-wùɖù ɓè mɔɔ zuò-po-wùɖù ɓè ɓó ti jɛ́ɛ́ ɓè ɓɛ́ ḿ mɔ́ ma wa kɛ.”

18. Xwɛ̀ à ɓɛ́ìn nyɔ tɔ̀ɔ̀ ɓè hwòɖò dyi dèɛ̀ kɛ́?

¹⁸ Ɔ mɔ̀ dya-dè-dè ɓɛ́ à ké Geɖepɔɔ ɓo-bɛ̃̀ìn sí dyììn ɖé nyɔ tɔ̀ɔ̀ ɓè hwòɖò-dyi-dè-dè múɛ. Xwɛ̀ à ɓɛ́ìn náa nyuɛ kɛ́? À ɓɛ́ìn wa ɖùù gbo tòɛ̀ kóɖó-kóɖó, ké à ɓɛ́ìn wa gbo wùɖùɛ̀ nyɔ-kpéí-po-kà, ké à ɓɛ́ìn wa gbo kpáa ɖé kpóɖóún. (Nɔ́ɔ́ 3:27) À vɔ̃ ɓɛ́ à ké nyɔ séín ɓè dyé gà kɛ kè nyɔ ɓè séè Geɖepɔɔ ɓièɛ̀n nì keɛɛ hwòɖò dyi dè. Ɔ jù ké à mùè ɓè dyi wìì-ɖɛ̀ mɔɔ wɛ́ mɔɔ hwòɖò-dyií-gbàìn-ɖɛ̀ ɖò dyí dyé ní, à té wa gboi, ké à tò wa ɖùù gbo, ké à cɛ̃ kpéí-po-wùɖù ɓè sɔ̀ìn ɖé Baɓoɔ múɛɛ wa gbo. À dyi Jɛhova kɔ̃̀ xwaún ɓɛ́ “nyɔ hwòɖò-dyi-dè-dè séín” sɔ̀ìn kà kɛɛ ɓo-bɛ̃̀ìn sí ní, à se à mùè jàà-po-nyɔ̀ ɓè ɖòùn gbo kpáuń mu ɓɛ́ wa ké fũ̀à-fṹá-ɖɛ̀ ɓè hwòɖò kùìn, kɛɛ à mu nyɔ ɓè se jàà-po-nyɔ̀ ɓèɛɛ hwòɖò dyi tóùn, ɓɛ́ wa ké jàà ɓiè-ɓiè gbo gmɔ̀ìn.—Máf. 5:16.

JƐHOVA NÌ ƁÓ À GBO TEE

19. Ðɛ́ Jɛhova nyu à bììɛ́, ké xwɛ̀ à ɓɛ́ìn ɔ ɓo-bɛ̃̀ìn síɛ kɛ́?

¹⁹ Nyɔ séín ɓè ɓɛ́ wa ɖɛ̀ɓɛ̀ Jɛhova múɛɛ, wa jè kpɔ̃ ɔ hwòɖò. Ɔ ní táà à dyi ɖé à fũ̀à-fṹá-tì ɓèɔ̀ mú. Kà wóɖóìn-nyɔ̀ ɖò nyuà ɔ dyú gbo gmɔ̀ɔ̀ kɛɛ, kàà Jɛhova nyu ɔ jàà ɓiè-nyɔ̀ ɓèɔ̀ gbo gmɔ̀ɔ̀. Ɔ nàìn à, ké ɔ gmɔ̀ à gbo, ké ɔ gmɔ̀ à dyí, ké ɔ dè à hwòɖò dyi. À sí à ɖɛ̀ɓɛ̀ìn-ɖɛ̀ɓɛ̀ìn Ɓà nìà ɖé dyɔún wɛ̃ɛ ɓo-bɛ̃̀ìn ɔ jù ké à dyi nyɔ tɔ̀ɔ̀ ɓè gbo kpá, ké à dyi wa kpéí po ɖé wa fũ̀à-fṹá-tì ɓèɔ̀ mú ní. À ɓɛ́ìn fũ̀à-fṹá-ɖɛ̀ ɓè kè hwòɖò-ɖé-ɖei-kpá-ɖɛ̀ ɓè dyí dyéɛ dyɛo, kɛɛ à ɓɛ́ìn hwòɖò kɔ̃ dèɛ̀ kà ɓɛ́ Jɛhova nì ɓó à gboɛ. Ɔ ɖáìn à nyɛ́nɛ́ín, ké ɔ ɖá: “Ɓè ɓɔ́ fɛ̃̀ìn, sepoɛɖe ḿ nì ɓó ɓè gbo.” (Àzé. 41:10) Ɔ mɔ̀ hwòɖò-kɔ̃-dè-ɖɛ̀ ɖò cá ɓó à bìì! Jɛhova nì ɓó à gbo jàà.