Ðíí-Gàà Gmɔ̀ Ɓè—Ɓè Dyéìn Máà Kè Tímétèɛ̀ Nyuu-Ðɛ̀ɔ̀

1-2. Ðɛ́ mɔ̀ fũ̀à-fṹá-ɖɛ̀ ɓè ɓɛ́ wa ɓɛ́ìn ma Máà kè Tímétè dyi kpɔ̃ɔ ɓɛ́ wa ké se ma nyɔ tɔ̀ɔ̀ ɓè bìì kũ̀à nyu mìɔ kɛ́?

ÐÍÍ-GÀÀ gmɔ̀ ɓè, ɓè mɔ́ ɓɛ́ ɓè ké kũ̀à pàɖà nyu ɖé Jɛhova ɓiè-ɓiè mú, ɓɛ́ ɓè ké nyɔ ɓè nìà ɖé ɓè dyí-poìn-kpòòɔ̀ múɛɛ gbo kpá mìɔɔ̀? Ɔ nì wáɖáá kà ɓè mɔ́ɔ náa nyuɛ dyiɛ. Ɔ mɔ̀ múà-ɖɛ̀ ɖò cá ɓɛ́ à kéɛ dyé kà gàa-dyù gmɔ̀ kúɖúú ɓè nì wa mìɔùn tòɛ̀n, ɓɛ́ wa ké nyɔ tɔ̀ɔ̀ ɓè gbo kpá ɖé hwòɖò-wɔ̃́-wɔ̃́ múɛ! (Wɛ́ɖɛ́ 110:3) Kɛɛ, m̀ mu dyɛ̀ fũ̀à-fṹá-ɖɛ̀ ɓè dyí dyéìn. M̀ peɖe fã̀à ɓɛ́ m̀ ké nì wuɖu-wáɖá-kũ̀àɔ̀ kɔ̃ poò, sepoɛɖe m̀ se ɖɛ mu kpáùn wɛ̃ dyí dyuò jèè? M̀ ɖà kũ̀à ɖò ɓɔ́ ɖòò, sepoɛɖe m̀ se ma m̀ mìɔùn hwòɖò múin dèìn jèè? Ɔ dyi ná nììn, m̀ se nyɔ kĩ́ín.

² Máà kè Tímétè dyé ma fũ̀à-fṹá-ɖɛ̀ dyúáɖò ɓèa dyí ɖekè. Kɛɛ, wa se ma wɔ̃́ ɓɛ́ se-hwìɖìi-dè-ɖɛ̀ fã̀à-peɖe-peɖe, mɔɔ se ɖɛ pàɖà dyí dyuò jè kéɛ ma nyu ɓɛ́ wa ké se ma nyɔ tɔ̀ɔ̀ ɓè gbo kpá. Ɔ nì pu kà Máà tã́ìn ma ɔ ɖe gbo ɖé taà nɔ̀mɔ̀ dyíin ɖò mú ti àpɔ́sò Pɔ́ɔ̀ kè Bànábà ɖá ma ɔ, ɓɛ́ ɔ ké ma wa kíɖíí sí ɓó waà mísĩ̀ɔ̀nɛ́ɖè-kũ̀à kĩ́ín-kĩ́ínɔ̀ tiín nyɛ. (Àpɔ́. 12:​12, 13, 25) Máà sɔ̀ ma gbɛ̀ kɔ̃̀ mú ɓɛ́ ɔ dyuòìn ma dyiɛɛ mú, ɓɛ́ ɔ ké ma wuɖu-wáɖá-kũ̀àɔ̀ nyu mìɔ. Kĩ́ín nyɛɛ, ɔ jàɖàìn ma ɖé Ã́tìà-hwɔ̀ɖɔ̀ɔ̀ mú. Púɛɛ, ɔ sí ma Pɔ́ɔ̀ kè Bànábà kíɖíí, ké wa mu ma dà vɛ̃in ɓè. (Àpɔ́. 13:​1-5) Kà dyúáɖòɔ̀ kàà Tímétè mɔ̀ùn ɓɛ́ìn ma ɔ wóɖóìn-nyɔ̀ ɓèɔ̀ gbo tã́ìn ke dyɛ̀, ti Pɔ́ɔ̀ ɖá ma ɔ ɓɛ́ ɔ kèɔ̀ kè ké ma Geɖepɔɔ-wùɖù-wáɖá-kũ̀àɔ̀ nyuɛ. Tímétè mɔ̀ ma nyɔ gmɔ̀ ké ɔ séè ma ɖɛ pàɖà dyí dyuò ke jèɛɛ, ɔ ɓɛ́ìn ma wɔ̃́ɔ ɓɛ́ ɔ nììn se ɔ mìɔùn hwòɖò múin dèìn jè kéɛ ma nyu ɓɛ́ ɔ ké ma kũ̀àɔ̀ ɓɔ́. (Kpaìn 1 Kɔ̀ɖéíntĩ̀ɔ̀ 16:​10, 11 kè 1 Tímétè 4:12 gboi.) Kɛɛ, ɔ wɔ̃́ìn ma Pɔ́ɔ̀ɛ̀ ɖá-wùɖùɔ̀ gbo, ké ɔ dyé ma mana pàɖà ɓè.—Àpɔ́. 16:​3-5.

3. (a) Xwɛ̀ Pɔ́ɔ̀ hwòɖò nyu ma nìɛ̀ ɓá Máà kè Tímétè jè dyíɛ́? (2 Tímétè 4:​6, 9, 11) (Dyé dyi-dyé-ɖɛ̀ɔ̀ ɖekè.) (b) Ðɛ́ mɔ̀ dyi-diè-ɖɛ̀ ɓè ɓɛ́ à mu dɔ́ɔ́ kɔ̃in dèìn ɖé cɛ̃́ɛ́-ɖɛ̀ nìà kɛ múɛ́?

³ Máà kè Tímétè cɛ̃́ ma fɔ̀nɔ̀-hwòɖò kpa ɖɛ ɓè, ké wa cɛ̃́ ma kũ̀à ku xwa ɓè nyu-nyu ɖé dyí-poìn-kpòòɔ̀ mú ti wa mɔ̀ ma nyɔ gmɔ̀ ɓèɛ. Pɔ́ɔ̀ kpáìn ma gàa-dyù gmɔ̀ ɓè nìà kɛ jè múàùn dyi mìɔ, ké ɔ mɔ́ ɓɛ́ wa ké ma ɔ gbo nì ti ɔ dyéɛ ma kà ɔ fɛ̀ɛ̀ɔ̀ nìà ma mánáín hwɛ̀ìn dyiɛń nyɛ. (Zà 2 Tímétè 4:​6, 9, 11 wuɖuún.) Ðɛ́ mɔ̀ kpeɖe ɓè ɓɛ́ wa nyu ké Pɔ́ɔ̀ dyi ma kà Máà kè Tímétè jè mú ɖɛ̀ɓɛ̀ kɛ́? Xwɛ̀ ɖíí-gàà gmɔ̀ ɓè ɓɛ́ìn waà nyuu-ɖɛ̀ ɓèɔ̀ dyéɛ̀n nyɛ́? Ké xwɛ̀ gàa-dyù gmɔ̀ ɓè ɓɛ́ìn Pɔ́ɔ̀ɛ̀ náún-po-wùɖù nɔ̀mɔ̀ dyíin ɓèɔ̀ kpáná kɔ̃ún dyéɛ kɛ́?

DYÉÌN MÁÀ NYUU-ÐƐ̀Ɔ̀—WƆ̃́ ƁƐ́ M̀ KÉ KŨ̀À NYU

4-5. Xwɛ̀ Máà nyuɛ ma tɛ̀mɛ̀ìn kà ɔ hwòɖò wɔ̃́ ma ɓɛ́ ɔ ké ma nyɔ tɔ̀ɔ̀ ɓè bìì kũ̀à nyu kɛ́?

⁴ Céè-ɖɛ̀ ɖò cɛ̃ɛ kà ɓɛ́ nyɔ tɔ̀ɔ̀ ɓè bìì kũ̀à-nyu-nyu xwíníín mɔ̀ ɓɛ́ m̀ ké wa gbo kpá “dyììn ɖé dúún-ku-ku kè kpàì-kùìn-kùìn múɛ.” Máà dè ma ɓo-bɛ̃̀ nɔ̀mɔ̀ dyíin ɓá ɖɛ nìà kɛ jè dyí. Ti Pɔ́ɔ̀ nɔ́ɔ̀ ma ɓɛ́ ɔ ké ma Máà kpa ɓó ɔ mísĩ̀ɔ̀nɛ́ɖè-kũ̀à sɔ̃́ nììnɔ̀ tiín nyɛɛ, Máà hwòɖò ɓɛ́ìn ma ɖé ɖei kpáa mìɔ. (Àpɔ́. 15:​37, 38) Kɛɛ, ɖɛa se ma Máà ɓɔ́í po ɓɛ́ ɔ ké se ma ɔ ɖíí ɓèɔ̀ bìì kũ̀à nyu.

⁵ Máà wɔ̃́ìn ma gbo ɓɛ́ ɔ kè Bànábà ɓɛ́ ɔ mɔ̀ ma ɔ ɖííɛɛ ké ma dà kà kó ɖò kũ̀à nyu. Ti zɔ̃ pàɖà ɖà ma ziɛɛ, Máà nì ma nyɔ ɓè ɓɛ́ wa kpá ma Pɔ́ɔ̀ gbo ti ɔ nì ma kpɔɖɔ ɖeín ɖé Wóɖóùn wɛ̃ɛ hwìɛ̀. (Fàɖ. 23, 24) Jàà kɛɛ, Pɔ́ɔ̀ kpáìn ma Máà gbo-kpà-sɔ̃̀ɔ̀ múàùn dyi mìɔ, ké ɔ cɛ̃ɛ ma kà Máà “po ma [ɔ] kpéí nɔ̀mɔ̀ dyíin” nyɛ.—Kɔ̀ɖ. 4:​10, 11.

6. Xwɛ̀ Máà nyu ma kpáná dyéɛ dyììn ɖé ɔ kè Kɛ́ɖɛ́ì ɖeín-sí-nyɔ̀ hwɛ̀ ɖɛ ɓè mú-naìn-naìn múɛ́? (Dyé gmɔ̀-ɓíɖíi-bɛ̃̀.)

⁶ Máà dyé ma kpáná dyììn ɖé ɔ kè Kɛ́ɖɛ́ì ɖeín-sí-nyɔ̀ hwɛ̀ ɖɛ ɓè mú-naìn-naìn mú. Ti ɔ ɖà ma ti gbɛ̀i-gbɛ̀i ɖé Pɔ́ɔ̀ gbo nyu ɖé Wóɖóùn wɛ̃ɛ, ɔ mu ma ɖé àpɔ́sò Píɖɛ̀ gbo ɖé Báɓèɖɔ́ùn-hwɔ̀ɖɔ̀ɔ̀ mú. Gbo-kpɔ̃ìn-kpɔ̃ìn nì ma wa sɔ̃́ɔ̀ puà kɛɛ ku mà dyi mìɔ jèɛɛ, Píɖɛ̀ ɖáìn ma Máà “ní dyú-gàà.” (1 Píɖɛ̀ 5:13) Kà wa sɔ̃́ɔ̀ nì ma kũ̀à nyuɛń nyɛɛ, Píɖɛ̀ ɓɛ́ìn ma ɖɛ kpa ɖɛ pàɖà ɓè ɓá ma Jizɛɛ cĩ́-cĩ́ɔ̀ kè ɔ kũ̀àɔ̀ jè dyíɛɛ Máà gbo kɔ̃in zaìn, ké Máà céè ma wa jè ɖé ɔ céè-ɖɛ̀ɔ̀ mú .a

7. Xwɛ̀ ɖíí-gàà gmɔ̀ ɖò kɔ̃̀ nyɛ́nɛ́ mɔ̀ Sɔ̃́ùn-Woó kɛɛ nyu ma Máà nyuu-ɖɛ̀ɔ̀ dyéɛ̀n nyɛ́? (Dyé dyi-dyé-ɖɛ̀ɔ̀ ɖekè.)

⁷ Máà gã̀ ma Jɛhova bìì kũ̀à nyuɛ dyi tee, ké ɔ nɛ́ ma ɖíí-gàà hwɛ̀ ɖɛ ɓè dyí kánáá pu. Xwɛ̀ m̀ ɓɛ́ìn Máà ɓo-bɛ̃̀ìn síɛ kɛ́? Ɔ jù ké m̀ séè kpé ɓɛ́ìn ɓó Geɖepɔɔ-kũ̀à jɛ́ɛ́ ɖò ɓɛ́ m̀ mɔ́ kɛɛ jè ní, ku hwòɖò ɓɛ́ m̀ ké hwìè tɔ̀ɔ̀ ɓè dyi mɔ́ tee, ɓɛ́ m̀ ké Jɛhova kè dyí-poìn-kpòòɔ̀ bìì kũ̀à nyu. Ɔ hwɔìn-ɖɛ̀ ɖò mɔ̀ Sɔ̃́ùn-Woó, ɓɛ́ ɔ mɔ̀ ɛ́ɖɔ̀ kàùn wɛ̃. Ti ɔ mɔ̀ ma nyɔ gmɔ̀ kɛɛ, ɔ ɖɛ̀ɓɛ̀ ma ɔ mìɔùn kè ɖíí-gàà gmɔ̀ tɔ̀ɔ̀ ɓè dyí poìn ɖɛ̀ìn. Wa ɖíɛ́ ɓè dyé ma kũ̀à ɓè ɖé dyí-poìn-kpòòɔ̀ mú kĩ́ín hwɛ̀ ɔ mɔ̀ùn dyé ma kũ̀à. Sɔ̃́ùn-Woó hwòɖò ɖáìn wa nì ma ɔ dyéɖé kɔ̃in wã̀ìn. Ti wè ɖà ma ziɛ púɛɛ, ɔ zaìn ma ɔ hwòɖò-kpɔ̃-ɖɛ̀ɔ̀ ɖíí-gàà hwɛ̀ ɖɛ ɓè gbo kɔ̃in. Ɛ́ɖɔ̀ ɖò po ma ɔ náún kà ɔ mɛ nyu ɖɛ ɔ ɓɛ́ìn ma nyuɛ kɛ, ɓɛ́ ɔ ké nyɔ tɔ̀ɔ̀ ɓè bìì kũ̀à nyu, kɛbì nyɔ tɔ̀ɔ̀ ɓè mɛ se ma ɔ kũ̀àɔ̀ dyéɖé gbo dè ɓó tiɔ̀ ɖíɛ́ ɓè ɓaɖa kɛ. Náún-po-wùɖù nìà wɛ nyuɛ ké Sɔ̃́ùn-Woó tò ma ɔ mìɔùn, ɓɛ́ ɔ ké ma nyɔ sùà ɓè kè nyɔ ɓè mɔ́ ma gbo-kpá-kpá ɓó dyí-poìn-poìn ɓèɔ̀ mú mu jèɛɛ gbo kpá. Ti Sɔ̃́ùn-Woó poìn ma ti ɓèa jè hwìɖìiɛɛ, ɔ ɖá: “Ɔ nyuɛ ké ḿ wɔ̃́ ɖɛ mɔ̀ nyɔ tɔ̀ɔ̀ ɓè gbo-kpá-kpá xwíníín nyɛɛ múin nɔ̀mɔ̀ dyíin. Ḿ dyé ma múà ɓɛ́ ɔ sɔ̀ìn ɖé nyɔ tɔ̀ɔ̀ ɓè gbo-kpá-kpá múɛ.”

DYÉÌN TÍMÉTÈƐ̀ NYUU-ÐƐ̀Ɔ̀—KƆ̃̀ NYƆ TƆ̀Ɔ̀ ƁÈ JÈ GBO

8. Xwíníínɔ̀ nyɛ́ kɔ̃̀ jè Pɔ́ɔ̀ gã ma kà Tímétè ɓɛ́ ɔ kèɔ̀ kè ké ma mú naìn nyɛ́? (Fèɖópĩ̀ɔ̀ 2:​19-22)

⁸ Pɔ́ɔ̀ mɔ́ ma ɖíí-gàà ɓè ɓɛ́ wa se ma fã̀à peɖeɛ, ɓɛ́ ɔ kè wa kè ké ma hwɔɖɔ ɓè kɔ̃̀ mú wa dyéìn ma ɔ gà kɛɛ mú ɖe kɔ́ìn. Kĩ́ín nyɛɛ, ɔ gã ma Sáɖè ɓɛ́ ɔ ɖà ma Geɖepɔɔ-kũ̀à nyuɛń hwèɖèìn nyɛ, ɓɛ́ ɔ kèɔ̀ kè ké ma mu. (Àpɔ́. 15:​22, 40) Ké ɖeɛɛ, Pɔ́ɔ̀ gã ma Tímétè ɓɛ́ ɔ kèɔ̀ kè ké ma mú naìn. Xwíníínɔ̀ nyɛ́ kɔ̃̀ jè Pɔ́ɔ̀ gã ma kà Tímétè kɛ́? Ɔ mɔ̀ sepoɛɖe ɔ ɓéɖé ma nyɛ́nɛ́ín-nyɛ̀nɛ̀ jè. (Àpɔ́. 16:​1, 2) Ké ɔ kɔ̃̀ ma nyɔ tɔ̀ɔ̀ ɓè jè gbo mìɔ cá.—Zà Fèɖópĩ̀ɔ̀ 2:​19-22 wuɖuún.

9. Xwɛ̀ Tímétè nyuɛ ma tɛ̀mɛ̀ìn kà ɔ kɔ̃̀ ma ɖé ɔ ɖíí ɓèɔ̀ jè gbo jàà kɛ́?

⁹ Ti Tímétè kè Pɔ́ɔ̀ dè ma wuɖu-wáɖá-kũ̀àɔ̀ nyuɛ gbɔɛɛ, Tímétè tɛ̀mɛ̀ìn ma kà ɔ kɔ̃̀ ma nyɔ tɔ̀ɔ̀ ɓè jè gbo mìɔ ké ɔ zi ma ɔ mìɔùn dyíɛ. Ɓó xwíníín nìà wɛ jèɛɛ, Pɔ́ɔ̀ sè ma Tímétè ɖé Bèwíɖíà-hwɔ̀ɖɔ̀ɔ̀ mú, ɓɛ́ ɔ ké ma ɖeín-ná-nyɔ̀ ɖìè ɓèɔ̀ kpéí po. (Àpɔ́. 17:​13, 14) Ɓó tia ɓaɖaa, ɔ nì wáɖáá kà Tímétè cɛ̃́ ma Sáɖè ɓɛ́ ɔ sè ma ɖé Bèwíɖíà-hwɔ̀ɖɔ̀ɔ̀ mú ɖekèɛɛ ɖɛ xwaún wɛ̃. Ti wè ɖà ma ziɛ púɛɛ, Pɔ́ɔ̀ ɖoɓo ma Tímétè ɖòùn ɖé Tɛ̀sàɖònákà-hwɔ̀ɖɔ̀ɔ̀ mú, ɓɛ́ ɔ ké ma Kɛ́ɖɛ́ì ɖeín-sí-nyɔ̀ ɓè nì ma ɖéɛɛ kpéí po. (1 Tɛ̀s. 3:2) Ɓó zɔ̃ ɓaɖa-bùè sè hm̀m̀ mɔɔ zi kɔ̃ kɔ ma ɓó dyíɛ xwíníín nyɛɛ, Tímétè cɛ̃́ ma nyɔ ɓè jè gbo-kɔ̃̀-kɔ̃̀, ké ‘nyɔ ɖò dyi ma vĩìn, ɔ kèɔ̀ kè vĩ ma,’ ké ɔ tɛ̀mɛ̀ìn ma wìì-hwòɖò ɓó nyɔ séín ɓè nì ma gà dyéɛń nyɛɛ bìì. (Wóɖ. 12:15; 2 Tím. 1:4) Xwɛ̀ ɖíí-gàà gmɔ̀ ɓè ɓɛ́ìn Tímétè ɓo-bɛ̃̀ìn síɛ kɛ́?

10. Xwɛ̀ ɖíí-gàà ɖò kɔ̃̀ nyɛ́nɛ́ mɔ̀ Woó Jéè kɛɛ nyu ma kà ɔ ké nyɔ tɔ̀ɔ̀ ɓè jè gbo kɔ̃̀ mìɔ kɛɛ cɛ̃́ɛ nyuɛ kɛ́?

¹⁰ Ðíí-gàà ɖò kɔ̃̀ nyɛ́nɛ́ mɔ̀ Woó Jéè kɛɛ cɛ̃́ɛ ma kà ɔ ké ma nyɔ tɔ̀ɔ̀ ɓè jè gbo kɔ̃̀ɔ̀ nyu mìɔ kɛ. Ti Woó Jéè mɔ̀ ma gàa-dyù gmɔ̀ kɛɛ, ɔ kàmà ma mú ɓɛ́ ɔ ké ma ɖíí-gàà kè ɖíí-màà sùà ɓè dɔ́ɔ́ gbo dè. Ɔ jèɛɛ, ɔ zà ma wa nyíɔún pu ɖé Kĩ́-Dɔ̃̀ Hɔ́ɔ̀ zɔ̃̀, ké ɔ zi ma wa dyíin. Ɛ́ɖɔ̀ ɖò nyí ma Woó Jéè fɔ̀nɔ̀-hwòɖò ɓɛ́ ɔ ké ma dɔ́ɔ́ gbɔ dè dyììn ɖé ɖɛ ɓè ɔ ɖɛ̀ɓɛ̀ mú ɓá ɔ mùè jàà-po-nyɔ̀ ɓè jè dyíɛɛ wa gbo-cɛ̃-cɛ̃ mú. Ɛ́ɖɔ̀ɔ̀ cɛ̃ɛ ma ɔ gbo ɖekè, ɓɛ́ ɔ ké ɖɛ nyɔ tɔ̀ɔ̀ ɓè ɖɛ̀ɓɛ̀ múɛɛ jè hwìɖìi poìn. Woó Jéè nyùìn ma náún-po-wùɖù nìà kɛ kũ̀à mú ɖé nyɔ tɔ̀ɔ̀ ɓè gbo-wùɖù-wùɖù mú. Woó Jéè ɓɛ́ ɔ mɔ̀ ɛ́ɖɔ̀ kàùn wɛ̃ɛ ɖá: “Ɔ ɖà xwa fɛ̃́ìn kàùn ɓɛ́ ḿ kè nyɔ ɓè mɔ̀ zɔ̃ kò-kò ɓèɛɛ ké dɔ́ɔ́ dè nɔ̀mɔ̀ dyíin. Ɔ dè nì hwòɖòɔ̀ dyi mìɔ ɓɛ́ ḿ kéɛ dyí dyuò kà ḿ wɔ̃́ nyɔ tɔ̀ɔ̀ ɓèɛ̀ hwòɖò-kpɔ̃-ɖɛ̀ ɓèɔ̀ jè múin nyɛ. Ðɛ nìà kɛ ɖà ḿ gbo kpá mìɔ, ɓɛ́ ḿ ké ḿ mùè jàà-po-nyɔ̀ ɓèɔ̀ gbo kpá.”

11. Xwɛ̀ ɖíí-gàà gmɔ̀ ɓè ɓɛ́ìn nyɔ tɔ̀ɔ̀ ɓè nìà ɖé waà dyí-poìn-kpòòɔ̀ múɛɛ jè gbo kɔ̃̀ɔ̀ kɛ́? (Dyé dyi-dyé-ɖɛ̀ɔ̀ ɖekè.)

¹¹ Ɓè mɔ̀ ɖíí-gàà gmɔ̀ ɓèɛɛ, ɓè mɔ̀ùn ɓɛ́ìn cɛ̃́ɛ ɖekè ɓɛ́ ɓè ké nyɔ tɔ̀ɔ̀ ɓè jè gbo kɔ̃̀ mìɔ. Ðé dyí-poìn-poìn ɓèɔ̀ múɛɛ, vɔ̃ ɓɛ́ m̀ ké nyɔ ɓè mɔ̀ zɔ̃ kò-kò ɓè, ké wa sɔ̀ xwéɖé-dù kò-kò ɓè múɛɛ jè gbo kɔ̃̀. Diè kà wa jè nyu nìɛ̀ kɛɛ jè ɖɛi, ɓɛ́ m̀ ké ɖùù tò kóɖó-kóɖó. Ti ɖà ɖé dyúa muín, nì mu kà m̀ ké wa gbo kpáa nyuɛɛ dyí dyuòùn. M̀ muɛ dyɛ̀ dyéìn kà dyi-kpɔ̃ìn-nyɔ̀ ɓè ɓɛ́ wa mɔ̀ nyɔ sùà ɓèɛɛ mɔ́ gbo-kpá-kpá ɓɛ́ wa ké JW Library^® app kũ̀à mú nyùìn nyɛ. Mɔɔ m̀ muɛ dyɛ̀ dyéìn kà wa se nyɔ ɖò ɓéɖé ɓɛ́ wa kèɔ̀ kè ké nà ɖé wuɖu-wáɖá-kũ̀àɔ̀ múɛ. M̀ ɓɛ́ìn nyɔ nì ná ɓèa gbo-kpá-sɔ̃̀ nyíɛ ɓó waà nɛɛ̀-kpà ɓèɔ̀ kũ̀à mú nyùìn jèè, mɔɔ ɓɛ́ m̀ kè wa kè ké wuɖu wáɖáà? Ɔ jù ké m̀ dyi m̀ mìɔùn tò ɓó nyɔ tɔ̀ɔ̀ ɓè gbo kpá jè ní, nìí, nì mu ɓo-bɛ̃̀ nɔ̀mɔ̀ dyíin dèìn ɓó nyɔ séín bìì.

DYÉ PƆ́Ɔ̀Ɛ̀ NÁÚN-PO-WÙÐÙƆ̀ KPÁNÁ KƆ̃ÚN

12. Xwɛ̀ gàa-dyù gmɔ̀ ɓè ɓɛ́ìn náún-po-wùɖù ɓɛ́ Pɔ́ɔ̀ nyí ma kà Tímétè kɛɛ kpáná kɔ̃ún dyéɛ kɛ́?

¹² Pɔ́ɔ̀ nyí ma Tímétè náún-po-wùɖù nɔ̀mɔ̀ dyíin ɓè, ɓɛ́ wa ké ma ɔ gbo kpá ɓɛ́ ɔ nyuu-ɖɛ̀ ké ma mú wóɖó ɖé ɔ cĩ́-cĩ́ɔ̀ kè ɔ wuɖu-wáɖá-kũ̀àɔ̀ mú. (1 Tím. 1:18; 2 Tím. 4:5) Ɓè mɔ̀ ɖíí-gàà gmɔ̀ ɓèɛɛ, ɓè ɓɛ́ìn Pɔ́ɔ̀ɛ̀ náún-po-wùɖùɔ̀ kpáná kɔ̃ún dyéɛ ɖekè. Xwɛ̀ kɛ́? Zà céè-ɖɛ̀ sɔ̃́ ɓè ɓɛ́ Pɔ́ɔ̀ céè ma kà Tímétè gboɛɛ wuɖuún kà mɔ̀ nyɔ ɖé wa céèɔ́ máa kà gboɛ, ɓɛ́ m̀ ké náún-po-wùɖù m̀ ɓɛ́ìn kũ̀à mú nyùɛ̀n ɖé nì cĩ́-cĩ́ɔ̀ múɛɛ dyé. Dyé ɔ hwɔìn-ɖɛ̀ ɖíɛ́ ɓè.

13. Ðɛ́ Jɛhova jè gboi-kpɔ̃-kpɔ̃ ɓá dyíɛ́?

¹³ “Gmɔ̀ m̀ mìɔùn dyí, ɓɛ́ m̀ ké Geɖepɔɔ bìì cĩ́.” (1 Tím. 4:7b) Ðɛ́ mɔ̀à Geɖepɔɔ bìì cĩ́-cĩ́ kɛ́? Ɔ mɔ̀ Jɛhova jè gboi-kpɔ̃-kpɔ̃, ɔ kè ɓɛ́ m̀ ké ɖɛ dè ɔ hwìɖìiɛɛ nyuɛ mɔ́ xwéé. Sepoɛɖe à se kpeɖe nìà kɛ wóɖóìn jèɛɛ, à kɔ̃̀ à kéɛ cɛ̃́. Xwɛ̀ kɛ́? Gíɖíì-wùɖù kɔ̃̀ xwíníín-mú-zà-zà mɔ̀à “gmɔ̀ m̀ mìɔùn dyí” kɛɛ fɔ̀nɔ̀-hwòɖò mɔ̀ kpɛɖɛ-kpa-nyɔ̀ ɓè ɓɛ́ wa dyéìn wa mìɔùn ti kóɖó-kóɖó ɓó kpɛɖɛ kpa jèɛ. Kpɛɖɛ-kpa-nyɔ̀ ɓè nìà kɛ kɔ̃̀ wa ké ma wa mìɔùn kpeɖe zà. À mɔ̀ùn kɔ̃̀ à ké à mìɔùn kpeɖe zà ɓɛ́ à ké kpeɖe ɓè ɓɛ́ wa muɛ nyuùn ɓɛ́ à ké Jɛhova bũ̀in xwɛ̃́ìn mìɔ kɛɛ cɛ̃́.

14. Ðɛ́ mɛ mɔ̀ à dyí-sɔ́-ɖɛ̀ ɔ jù ké à dyi Baɓoɔ wuɖuún zà níɛ́? Poɛ̀n ɖɛí.

¹⁴ Kà nì muà cɛ̃́ìn ɓɛ́ Baɓo wuɖuún-zà-zà kéà m̀ múin dyuòìn nyɛɛ, ɔ mɛ nì m̀ hwìɖìi kà xwíníín kɔ̃̀ jè m̀ nìà náa nyuɛń nyɛɛ mɔ̀ ɓɛ́ m̀ ké Jɛhova bũ̀in xwɛ̃́ìn mìɔ jèɛ. Ɔ hwɔìn-kà, m̀ dyi nɔ́ɔ́ ɓáà Jizɛ kè gàa-dyù gmɔ̀ bã-bãɔ̀ jè dyíɛɛ wuɖuún zà ní, ɖɛ́ m̀ ɓɛ́ìn cɛ̃́ɛ sɔ̀ìn ɖéɛ múɛ́? (Máà 10:​17-22) Gàa-dyù gmɔ̀ɔ̀ poɛ ma jàà kà ɓɛ́ Jizɛ mɔ̀ ma Mɛ̀sádyàɔ̀ kɛ, kɛɛ ɔ se ma hwìɖìi-taɓa-taɓa ɓéɖé ɓɛ́ ɔ ké ma Jizɛ kíɖíí sí. Ɔ nì ná dyɛo, kɛɛ Jizɛ “ɖɛ̀ɓɛ̀ ma ɔ mú.” Má ɔ tó nì hwòɖòɔ̀ dyi cá ɓá kà Jizɛ nyu ma gàa-dyù gmɔ̀ɔ̀ gbo wùɖùɛ̀ kɛ jè dyíe? Ɔ nì wáɖáá kà Jizɛ mɔ́ ɓɛ́ gàa-dyù gmɔ̀ɔ̀ ké ma ɖɛ gbɔ po hwòɖò-fɔ̀nɔ̀-kà kɛ. Jizɛ nìɛ̀ ma tɛ̀mɛ̀ìn ɖekè kà ɓɛ́ Jɛhova ɖɛ̀ɓɛ̀ ma gàa-dyù gmɔ̀ɔ̀ múɛ. (Jɔ̃́ɔ́ 14:9) Kà nì muà nɔ́ɔ́ nìà kɛ kè ɖɛ ɓè ɓá m̀ dyíɛ jè hwìɖìi poìn nyɛɛ, m̀ mɛ diè m̀ mìɔùn dyi-diè-ɖɛ̀ nìà kɛ dyi, ‘Ðɛ́ ḿ kɔ̃̀ ḿ ké nyu ɓɛ́ ḿ ké Jɛhova bũ̀in xwɛ̃́ìn mìɔ, kè ɓɛ́ ḿ ké nyɔ tɔ̀ɔ̀ ɓè bìì kũ̀à nyu mìɔ kɛ́?’

15. Xwíníínɔ̀ nyɛ́ kɔ̃̀ jè ɖíí-gàà gmɔ̀ ɓè mɛ poàìn ɓo-bɛ̃̀ ɓɛ́ wa dè kɛɛ jè hwìɖìiɛ́? Poɛ̀n ɖɛí. (1 Tímétè 4:​12, 13)

¹⁵ “Jù dyí-tɛ̀mɛ̀ìn-ɖɛ̀ ɖé nyɔ ɓè ɖàà Geɖepɔɔ hwìɖìi taɓa kɛɛ gbo.” (Zà 1 Tímétè 4:​12, 13 wuɖuún.) Pɔ́ɔ̀ cɛ̃ɛ ma Tímétè gbo ɓɛ́ ɔ ké ma sɛ́ɖɛ́ ɓè cɛ̃́—hwɔìn kà céè-ɖɛ̀ wuɖuún-zà-zà kè ɖɛ-tɛ̀mɛ̀ìn-tɛ̀mɛ̀ìn—ké ɔ cɛ̃ɛ ma ɔ gbo, ɓɛ́ ɔ ké ma kpeɖe ɓè—hwɔìn kà ɖɛ̀ɓɛ̀ìn-ɖɛ̀ɓɛ̀ìn kè hwìɖìi-taɓa-taɓa ɔ kè mú-hwɛ̀-hwɛ̀ cɛ̃́ ɖekè. Xwíníínɔ̀ nyɛ́ kɔ̃̀ jèɛ́? Ɔ mɔ̀ sepoɛɖe ɓo-bɛ̃̀ nɔ̀mɔ̀ dyíin kpa ɖɛ ké ɔ zi wuɖu dyí. Poɛ̀n hwìɖìi kà m̀ ɓéɖéɔ́ má wáɖáá-wùɖù ɖò ɓɛ́ ɔ ɓá wuɖu-wáɖá-kũ̀àɔ̀ kɔ̃ po jè dyíɛ. Nì hwòɖò mu dyi zaìn ɓɛ́ m̀ ké ɖɛ nìà kɛ jè cɛ̃ ɔ jù ké m̀ mìɔùn dyi vɔ̃uń nì ɓɛ́ m̀ ké wuɖu-wáɖá-kũ̀àɔ̀ nyu ní. Nì nyuu-ɖɛ̀ɔ̀ mu nì wuɖuɔ̀ kpé nyíìn.—1 Tím. 3:13.

16. (a) Hwìè hm̀m̀ nyɛ́ ɓè kɔ̃̀ mú ɖíí-gàà gmɔ̀ ɓè ɓɛ́ìn dyí-tɛ̀mɛ̀ìn-ɖɛ̀ nɔ̀mɔ̀ dyíin jùɛ kɛ́? (b) Xwɛ̀ ɖíí-gàà gmɔ̀ ɖò ɓɛ́ìn dyí-tɛ̀mɛ̀ìn-ɖɛ̀ jùɛ ɖé ɔ “wuɖu” múɛ́?

¹⁶ Kà ɔ nyuà céèɛ̀ ɖé 1 Tímétè 4:12 múɛɛ, Pɔ́ɔ̀ cɛ̃ hwìè hm̀m̀ ɓè kɔ̃̀ mú ɓɛ́ ɖíí-gàà ɖò ɓɛ́ìn dyí-tɛ̀mɛ̀ìn-ɖɛ̀ nɔ̀mɔ̀ dyíin jùɛ kɛɛ jè. Ðé m̀ mìɔùn sɔ̃ kɔ̃ ɖɛ-cɛ̃́-cɛ̃́ múɛɛ, m̀ ɓɛ́ìn hwìè ɓèa jè hwìɖìi poɛ̀n ɖò-ɖò. Ɔ hwɔìn-kà, ɔ jù ké m̀ dyi mɔ́ ɓɛ́ m̀ ké dyí-tɛ̀mɛ̀ìn-ɖɛ̀ nɔ̀mɔ̀ dyíin jù ɖé nì “wuɖu” mú ní ɖé? Poìn kà m̀ ɓɛ́ìn nì wuɖuɔ̀ kũ̀à mú nyuɛ̀n ɓɛ́ m̀ ké nyɔ tɔ̀ɔ̀ ɓè kpéí poɛɛ jè hwìɖìi. Ɔ jù ké m̀ dyi nì wóɖóìn-nyɔ̀ ɓè gbo tã́ìn ke ní, m̀ ɓɛ́ìn zùo-po-hwòɖò tɛ̀mɛ̀ìn mìɔ ɓó ɖɛ wa nìà m̀ bìì nyuɛń nyɛ jèè? Dyí-poìn-poìn ɓèɔ̀ ɖà hwɛ̀ ní, m̀ ɓɛ́ìn ɖíí-gàà ɖò mɔɔ ɖíí-màà ɖò zùo poɛ ɓó wuɖu ɔ wáɖá ɖé dyí-poìn-poìnɔ̀ múɛ jèè? M̀ ɓɛ́ìn vɔ̃ɔ ɖekè ɓɛ́ m̀ ké gɔ̃̀-jù-wùɖù tò ɖé m̀ mìɔùn nììn wuɖu mú ɖé dyí-poìn-poìn ɓèɔ̀ mú. M̀ dyi dúún ku ɓɛ́ m̀ ké dyí-tɛ̀mɛ̀ìn-ɖɛ̀ nɔ̀mɔ̀ dyíin jù ɖé nì wuɖu mú ní, nì muɛ tɛ̀mɛ̀ìn kà m̀ nì dyúa muɛń ɖé zùùn wɛ̃.—1 Tím. 4:15.

17. Ðɛ́ ɓɛ́ìn ɖíí-gàà gmɔ̀ ɖò gbo kpáa ɓɛ́ ɔ ké ɔ zùùn dyí-sɔ́-ɖɛ̀ ɓèɔ̀ nyu kɛ́? (2 Tímétè 2:22)

¹⁷ “Táà ɖɛ gbà ɓè kɔ̃̀ tó nyu nyɔ gmɔ̀ ɓè kɛɛ jè dyi. M̀ mɛ vɔ̃ ɓɛ́ m̀ ké dyí-sɛ́ɖɛ́ìn-sɛ́ɖɛ́ìn . . . ɓéɖé.” (Zà 2 Tímétè 2:22 wuɖuún.) Pɔ́ɔ̀ cɛ̃ɛ ma Tímétè gbo ɓɛ́ ɔ ké hwòɖòɛ̀-mɔ́ɔ́-ɖɛ̀ ɓè ɓɛ́ wa mu ɔ dyéɖé hwìi zàìn ɓá zùùn dyí-sɔ́-ɖɛ̀ ɓè jè dyí, ké wa mu gbo-kpɔ̃ìn-kpɔ̃ìn nìà ɔ kè Jɛhova pṹa kɛ mú gbɔùn wɛ̃ɛ gbo vɔ̃. M̀ ɓɛ́ìn dyéɛ kà nyuu-ɖɛ̀ ɖíɛ́ ɓè ɓɛ́ wa se ɖɛ gbà kɛɛ ɓɛ́ìn nyuɛ ɓɛ́ m̀ ké se ti pàɖà ɓéɖé ɓó zùùn-ɖɛ̀ ɓè nyu jèɛ. Poɛ̀n hwìɖìi ti jĩ̀ kà m̀ ɖú dyí ɓó péé ɓè nyu jè mɔɔ ɖé nɛɛ̀-kpà-ɖúúɔ̀ kɔ̃ mɔɔ ɓó víɖò gĩ́ìn ɓè vɔ̃ jèɛ. M̀ ɓɛ́ìn ti ɓèa ɖò kũ̀à mú nyùɛ̀n ɓó zùùn-ɖɛ̀ ɓè nyu jèè? M̀ ɓɛ́ìn dyɛ̀ gbo-kpá-sɔ̃̀ tòɛ̀ ɓó nì Kĩ́-Dɔ̃̀ Hɔ́ɔ̀ gbo gmɔ̀ jè mɔɔ hwíì kɔ̃ wuɖu-wáɖá-kũ̀à nyu jè. M̀ dyi nyuu-ɖɛ̀ ɓè nì kà kɛ nyu ní, nì mu dyɛ̀ ɓàto ɖìè ɓè ɓɛ́ wa mu m̀ gbo kpáùn ɓɛ́ m̀ ké zùùn-ɖɛ̀ ɓè dyí sɔ́ kè ɓɛ́ m̀ ké wa nyuɛɛ kpɔ̃ùn.

NYƆ TƆ̀Ɔ̀ ƁÈ BÌÌ KŨ̀À-NYU-NYU DYÀ MANA ƁÈ

18. Xwíníínɔ̀ nyɛ́ kɔ̃̀ jè à ɓɛ́àìn cɛ̃ɛ kà ɓɛ́ Máà kè Tímétè ɓéɖé ma múà kè hwòɖò-dyi-dè-dè ɖé waà cĩ́-cĩ́ɔ̀ múɛ́?

¹⁸ Máà kè Tímétè pòìn ma ɖɛ ɓè kɔ̃ín, ɓɛ́ wa ké ma nyɔ tɔ̀ɔ̀ ɓè bìì kũ̀à nyu gàná cá, ké ɔ nyuɛ ké wa ɓéɖé ma múà kè hwòɖò-dyi-dè-dè ɖé waà cĩ́-cĩ́ɔ̀ mú. (Àpɔ́. 20:35) Máà mu ma ɓóɖó-kpàà dà kò-kò ɓè ɓɛ́ ɔ ké ma ɔ mùè jàà-po-nyɔ̀ ɓè gbo kpá. Ɔ céè ma nyɔ-hwòɖò-dyi-tó-ɖɛ̀ ɓè ɖekè ɓá Jizɛɛ cĩ́-cĩ́ɔ̀ kè ɔ wuɖu-wáɖá-kũ̀àɔ̀ jè dyí. Tímétè kpá ma Pɔ́ɔ̀ gbo ɓɛ́ wa ké ma dyí-poìn-kpòò ɓè dyi dè, kè ɓɛ́ wa ké ma ɖíí ɓèɔ̀ kpéí po. Ɔ nì wáɖáá kà Jɛhova hwòɖò dèìn ma nyɔ-mìɔùn-tò-kpèɖè ɓɛ́ Máà kè Tímétè tɛ̀mɛ̀ìn ma kɛɛ múin nyɛ.

19. Xwíníínɔ̀ nyɛ́ kɔ̃̀ jè ɖíí-gàà gmɔ̀ ɓè mɛ síà náún-po-wùɖù ɓɛ́ Pɔ́ɔ̀ nyí ma kà Tímétè kɛɛ kíɖííɛ́, ké ɖɛ́ mu ɖé sɔ̀ìn nyɛ́?

¹⁹ Ðɛ̀ɓɛ̀ìn-ɖɛ̀ɓɛ̀ìn ɓɛ́ Pɔ́ɔ̀ ɓéɖé ma ɓó Tímétè bììɛɛ nì wáɖáá ɖé céè-ɖɛ̀ ɓè ɓɛ́ ɔ céè ma ɔ gboɛɛ mú. Céè-ɖɛ̀ ɓè nìà kɛ tɛ̀mɛ̀ìn ɖekè kà ɓɛ́ Jɛhova ɖɛ̀ɓɛ̀ ɓè mɔ̀ gàa-dyù gmɔ̀ ɓèɛɛ mú mìɔ kɛ. Ɔ mɔ́ ɓɛ́ ɓèɛ̀ nyuu-ɖɛ̀ ké mú wóɖó. Ɔ jèɛɛ, ɓè mɛ sí Pɔ́ɔ̀ɛ̀ náún-po-wùɖù ɓèɔ̀ kíɖíí, ɓɛ́ ɓè ké nyɔ tɔ̀ɔ̀ ɓè bìì kũ̀à nyu mìɔ. Ɓè dyiɛ náa nyu ní, ɓè mu cĩ́-cĩ́ nɔ̀mɔ̀ dyíin ɓéɖéìn kàùn, ké ɓè mu kpé ɓɛ́ìn “ɓɛ́ [ɓè] ké fɛ̀ɛ̀ jɛ́ɛ́ɔ̀ jè gboi kpɔ̃” ɖé dyúa.—1 Tím. 6:​18, 19.