Kà Nyɔ Ké Náún-Po-Wùɖù Tòɛ̀ Nyuɛ

1. Nyɛ́ ɓè kɔ̃̀ wa ké náún-po-wùɖù tò kɛ́? Zaìn kɔ̃in.

XWƐ̀ nì hwòɖò nyu nìɛ̀ ɓá nyɔ tɔ̀ɔ̀ ɓè náún po jè dyíɛ́? Ɔ fɛ̃́ìn xwa ɓó nyɔ ɖíɛ́ ɓè bìì. Nyɔ tɔ̀ɔ̀ ɓè mɔ̀ùn hwɛ̀ kpéí ɓó nyɔ ɓè náún po jè, mɔɔ wa peɖe fã̀à ɔ jù ké wa dyiɛ nyuɛń nììn. Kɛbì ɖɛ ɓèa ɖò mɛ kpá kɛɛ, à séín kɔ̃̀ à ké náún-po-wùɖù tò sɔ̀ìn ti gbo mu ti gboɛ. Xwíníínɔ̀ nyɛ́ kɔ̃̀ jèɛ́? Sepoɛɖe Jizɛ cɛ̃ɛ ma kà ɓɛ́ nyɔ ɓè mu ɔ jàà ɖeín-sí-nyɔ̀ ɓèɔ̀ dyí dyuòùn dyììn ɖé ɖɛ̀ɓɛ̀ìn-ɖɛ̀ɓɛ̀ìn ɓɛ́ wa tɛ̀mɛ̀ìn wa mùè ɖò dyíɛɛ múɛ. (Jɔ̃́ɔ́ 13:35) Ké hwìè ɖò kɔ̃̀ mú ɓɛ́ à tɛ̀mɛ̀ìn ɖɛ̀ɓɛ̀ìn-ɖɛ̀ɓɛ̀ìn nyɛɛ mɔ̀ dyììn ɖé à ɖíí ɓèɔ̀ náún-po-po mú ɔ jù ké à dyi ɓéɖé ɓɛ́ à kéɛ náa nyu ní. Geɖepɔɔ Wuɖuɔ̀ cɛ̃ɛ kà ɓɛ́ “ɓàto” ɓè gbo-kpɔ̃ìn-kpɔ̃ìn sɔ̀ìn ɖé “náún-po-wùɖù sɛ́ɖɛ́ìn dyí” múɛ. —Nɔ́ɔ́ 27:9.

2. Ɛ́ɖɔ̀ ɓè ɓéɖé ɓɛ́ wa ké ɖɛ́ nyuɛ ɓɛ́ìn nyɛ́, ké xwíníínɔ̀ nyɛ́ kɔ̃̀ jèɛ́? (Dyé gbɔ̀ɖɔ̀ɔ̀ nìà kɛ ɖekè, “Náún-Po-Po Ðé Wíkìɔ̀ Hwìɛ̀ìn Dyí-Poìn-Poìnɔ̀ Mú.”)

² Ɛ́ɖɔ̀ ɓèɔ̀ mɔ̀ nyɔ jɛ́ɛ́ ɓè ɓɛ́ wa kɔ̃̀ wa ké náún-po-wùɖù nɔ̀mɔ̀ dyíin ɓè tòɛ. Dyììn ɖé Jizɛ múɛɛ, Jɛhova ɖà gàa ɓè nìà kɛ gã ɓɛ́ wa ké dyí-poìn-kpòòɔ̀ gbo gmɔ̀. (1 Píɖɛ̀ 5:​2, 3) Hwìè ɖò kɔ̃̀ mú ɓɛ́ wa nyuɛ náa kɛɛ mɔ̀ dyììn ɖé dyí-poìn-kpòòɔ̀ náún-po-po mú sɔ̀ìn ɖé Baɓoɔ mú ɖé waà wáɖáá-wùɖù ɓèɔ̀ mú. Wa ɓéɖé ɓɛ́ wa ké ɓáɖáá ɖò-ɖò náún po ɔ kè nyɔ ɓè ɓɛ́ wa ɖà hwìì sɔ̀ìn nyɛ. Xwɛ̀ ɛ́ɖɔ̀ ɓèɔ̀ kè à séín ɓɛ́ìn náún-po-wùɖù nɔ̀mɔ̀ dyíin tòɛ̀ kɛ́?

3. (a) Xwɛ̀ à ɓɛ́ìn nyɔ-náún-po-nyɔ̀ nɔ̀mɔ̀ dyíin jù-jù cɛ̃́ɛ kɛ́? (Àzédyà 9:6; dyé gbɔ̀ɖɔ̀ɔ̀ nìà kɛ ɖekè, “Sí Jizɛ Ɓo-Bɛ̃̀ìn Ɔ Jù Ké M̀ Dyi Náún-Po-Wùɖù Tòɛ̀n Nììn.”) (b) Ðɛ́ à mu jè cɛ̃ìn ɖé cɛ̃́ɛ́-ɖɛ̀ nìà kɛ múɛ́?

³ À ɓɛ́ìn ɖɛ pàɖà cɛ̃́ɛ ɓá nyɔ-náún-po-nyɔ̀ nɔ̀mɔ̀ dyíin jù jè dyí dyììn ɖé nyɔ ɓè ɓɛ́ wa dè ma bo-bɛ̃̀ nɔ̀mɔ̀ dyíin ɖé Baɓoɔ múɛɛ jè cɛ̃́-cɛ̃́ mú. Nyɔ ɓèa ɖò mɔ̀ ma Jizɛ. Dya-dè-nyɛ̀nɛ̀ ɖò ɓɛ́ ɔ ɓéɖéɛɛ mɔ̀ “Nyɔ-náún-po-nyɔ̀ dĩ́ín-dĩ̀ìn.” (Zà Àzédyà 9:6 wuɖuún.) Ðé cɛ̃́ɛ́-ɖɛ̀ nìà kɛ múɛɛ, à mu ɖɛ à ɓɛ́ìn nyuɛ ɔ jù ké wa dyi à dyi diè ɓɛ́ à ké náún-po-wùɖù tò níɛ kè ɖɛ à ɓɛ́ìn nyuɛ ɔ jù ké à dyi ɓéɖé ɓɛ́ à ké náún-po-wùɖù tò ɔ jù ké wa se à dyi diè níɛɛ jè dɔ́ɔ́ kɔ̃in dèìn. À mu xwíníín kɔ̃̀ jè ɔ kpaà ɖɛ ɓɛ́ à kéà náún-po-wùɖù tò ɓó ti jɛ́ɛ́ɔ̀ ɓaɖa kè ɖé hwìɛ̀ sɛ́ɖɛ́ìn dyí múɛɛ jè cɛ̃ìn ɖekè.

NYƆ ÐÒ DYI À NÁÚN-PO-WÙÐÙ ZƆ̀ÌN NÍ

4-5. Nyɔ ɖò dyi à náún-po-wùɖù zɔ̀ìn ní, ɖɛ́ mɔ̀ dyi-diè-ɖɛ̀ ɓɛ́ à mɛ diè à mìɔùn dyi kĩ́ín nyɛ? Cɛ̃ ɔ hwɔìn-ɖɛ̀ ɖò jè.

⁴ Ɔ jù ké nyɔ ɖò dyi à náún-po-wùɖù zɔ̀ìn ní, ɖɛ́ mɔ̀ ɖɛ kĩ́ín ɓɛ́ à mɛ nyu kɛ́? À ɓɛ́ìn múàùn kpáa ɓɛ́ à ké nyɔɔ̀ gbo kpáa mɔ́ wàɖà. Kɛɛ kĩ́ín nyɛɛ, à mɛ diè à mìɔùn ɖɛ nìà kɛ dyi, ‘Ḿ ɓɛ́ìn kpé ɓɛ́ ḿ ké náún-po-wùɖù tò ɓá ɖɛ nìà kɛ jè dyíì?’ Tiɔ̀ ɖíɛ́ ɓè ɓaɖaín, ɖɛ mu dyíin nɔ̀mɔ̀ùn ɓɛ́ à ké nyuɛɛ mɔ̀, ɓɛ́ à ké nyɔ ɓɛ́ ɔ ɓɛ́ìn kpé ɓɛ́ ɔ ké náún-po-wùɖù tò ɓá ɖɛ nìà wɛ jè dyíɛɛ nyɔɔ̀ da zàìn.

⁵ Ɔ hwɔìn-ɖɛ̀ ɖò kɛà kɛ̀. Poɛ̀n hwìɖìi kà nì ɓàto xwɛ̃́ìn bũ̀in ɖò ɓéɖé wɛ́ gbà ɖòɛ. Ɔ cɛ̃ɛ m̀ gbo kà ɔ ɖà kɔ̃ùn kò-kò ɓè jè múin ɖeɛ, ké ɔ diè m̀ dyi ɓɛ́ m̀ ké ɔ nyɔ nì hwòɖò ɖá ɔ mu dyíin nɔ̀mɔ̀ùn wɛ̃ɛ ɔ gbo cɛ̃. M̀ ɓɛ́ìn m̀ mìɔùn nììn hwìɖìi-poìn-ɖɛ̀ ɓè ɓéɖéɛ ɓá wɛ́ɔ̀ jè dyí, kɛɛ m̀ se nyɔ-hwòo-nyɔ̀ ɖò, ké m̀ se ɖɛ-múin-wɔ̃́-wɔ̃́ ɖò ɓéɖé ɓá wɛ́ɔ̀ kpɔ̃-kà jè dyí. Ðé ɖɛ nìà wɛ múɛɛ, gbo-kpá-kpá nɔ̀mɔ̀ dyíin ɓɛ́ m̀ ɓɛ́ìn nì ɓàtoɔ̀ nyíɛ kɛɛ mɔ̀ ɓɛ́ m̀ ké ɔ gbo kpá, ɓɛ́ ɓè ké nyɔ ɖò ɓɛ́ ɔ ɓɛ́ìn kpé ɓɛ́ ɔ ké ɔ gbo kpá kɛɛ dyi mɔ́.

6. Xwíníínɔ̀ nyɛ́ kɔ̃̀ jè ɔ muà dyíin nɔ̀mɔ̀ùn ɓɛ́ à kéà fòìn hwɛ̀ à kéà náún-po-wùɖù tò kɛ́?

⁶ Ɔ jù ké à dyiɛ hwìɖìi poìn kà à ɓɛ́ìn kpé ɓɛ́ à ké náún-po-wùɖù tò ɓá ɖɛ jɛ́ɛ́ ɖò jè dyí ní, ɔ mu dyíin nɔ̀mɔ̀ùn ɓɛ́ à ké fòìn ɖɛ wè hwɛ̀ à ké nyɔ ɖò ɓɛ́ ɔ zɔ̀ìn à náún-po-wùɖù kɛɛ gɔ̃̀ jù. Xwíníínɔ̀ nyɛ́ kɔ̃̀ jèɛ́? Nɔ́ɔ́ 15:28 ɖá “dyí-sɛ́ɖɛ́ìn-nyɔ̀ poìn hwìɖìi hwɛ̀ ké ɔ jù gɔ̃̀.” Ɔ jù ké à dyi gɔ̃̀-jù-wùɖùɔ̀ dyí dyuò ní ɖé? À ɓɛ́ìn ti wè dyí ɖúɛ ɓɛ́ à ké ɖɛ múin ɖe, kè ɓɛ́ à ké ɓaà, ɔ kè ɓɛ́ à ké ɖɛ hwìɖìi nàìn. Nìí, à muɛ hwòɖò kɔ̃ dèìn wáɖáá kà à gɔ̃̀-jù-wùɖùɔ̀ kè Jɛhovaa hwìɖìi-poìn-kà ɓá ɖɛɔ̀ jè dyíɛɛ muìn gboɛ. Poìn Nétɔ̃̀ɛ̀ nyuu-ɖɛ̀ɔ̀ jè hwìɖìi.

7. Ðɛ́ à cɛ̃́ sɔ̀ìn ɖé Nétɔ̃̀ɛ̀ nyuu-ɖɛ̀ɔ̀ múɛ́?

⁷ Kã́á Dèɓé cɛ̃ɛ ma Nétɔ̃̀ gbo kà ɔ mɔ́ ɓɛ́ ɔ ké ma gbò ɖò po ɓó Jɛhova bììɛ. Nétɔ̃̀ cɛ̃ɛ ma ɔ gbo wàɖà ɓɛ́ ɔ kéɛ ma nyu. Kɛɛ, Nétɔ̃̀ ɓéɖé ɓɛ́ ɔ ké ma Jɛhova wĩín dyi wɔ̃́ kĩ́ín hwɛ̀. Xwíníínɔ̀ nyɛ́ kɔ̃̀ jèɛ́? Sepoɛɖe Jɛhova seɛ ma mɔ́ ɓɛ́ Dèɓé ké ma gbòɔ̀ po. (1 Ká. 17:​1-4) Kà ɖɛ nìà kɛ nyuà tɛ̀mɛ̀ìn nyɛɛ, ɔ jù ké nyɔ ɖò dyi à náún-po-wùɖù zɔ̀ìn ní, ɔ mu dyíin nɔ̀mɔ̀ùn ɓɛ́ à ké “mɛɛ̀ ɓó wùɖù jè.”—Jĩ́ìn 1:19.

8. Ðɛ́ mɔ̀ xwíníín kà kò ɖò kɔ̃̀ jè à mɛ maà mú ɔ jù ké à dyi nyɔ ɖò náún poɛń nììn nyɛ́?

⁸ Poìn xwíníín kà kò ɖò kɔ̃̀ jè à mɛ maà mú ɔ jù ké à dyi nyɔ ɖò náún poɛń nììn nyɛɛ jè hwìɖìi: À ɓɛ́ìn kpa dyí ɖúɛ ɔ jù ké à náún-po-wùɖùɔ̀ dyiɛ nyu ké nyɔ ɖò dyi ɖɛ ɖò gbɔ po ké ɔ dyi fũ̀à-fṹá ɓè gbo wóɖó ní. Jɛ́ɛ́ kɛɛ, ɔ nɔ̀mɔ̀ dyíin ɓɛ́ à ké hwìɖìi poìn kóɖó-kóɖó hwɛ̀ ɓɛ́ à ké nyɔ ɖò náún po.

KÀ NYƆ KÉ NÁÚN-PO-WÙÐÙ TÒƐ̀ NYU Ɔ JÙ KÉ WA SEƐ NYƆ ZƆ̀ÌN NÍ

9. Hwɛ̀ ɛ́ɖɔ̀ ɓèɔ̀ ké ɖíí ɖò náún po ní, ɖɛ́ wa ɓéɖé ɓɛ́ wa ké dyí dyuò wáɖáá kɛ́? (Gàɖézìà 6:1)

⁹ Sɔ̀ìn ti gbo mu ti gboɛɛ, ɛ́ɖɔ̀ ɓè ɓéɖé ɓɛ́ wa ké ɖíí-gàà mɔɔ ɖíí-màà ɖò ɓɛ́ ɔ nyu “ɖɛ gbà ɖò” kɛɛ náún po. (Zà Gàɖézìà 6:1 wuɖuún.) Nyɔɔ̀ nì dyɛ̀ hwìè nyìnììn dyíin ɖò ɓɛ́ ɔ ɓɛ́ìn nàmàùn ku wɔ̃ ɖò gbo wóɖóɛ kɛɛ kpauń. Ðɛ ɛ́ɖɔ̀ ɓèɔ̀ mɔ́ kɛɛ mɔ̀ ɓɛ́ wa ké nyɔɔ̀ gbo kpá ɓɛ́ ɔ ké pó-pó hwìèɔ̀ xwíníín sè. (Jĩ́ìn 5:​19, 20) Ɓɛ́ waà náún-po-wùɖùɔ̀ ké dyíin nɔ̀mɔ̀ ní, wa kɔ̃̀ wa kéɛ dyí dyuò wáɖáá kɛbì nyɔɔ̀ ɖà ɖɛ gbà ɖò nyu jàà ní. Jɛhova wɔ̃́ìn gbo ɓɛ́ à ɖò-ɖò séín ké ɖɛ gbɔ po ɓá à mìɔùn nììn hwòɖò-xwíníín-hwòɖò-dyùàɔ̀ dyí. (Wóɖ. 14:​1-4) Kɛɛ, ɔ jù ké ɖíí ɖò ɖà ɖɛ gbà ɖò nyu jàà, ké ɛ́ɖɔ̀ ɓèɔ̀ dyiɛ gbɔ po kà wa ɓéɖé ɓɛ́ wa ké ɔ náún poɛ ní ɖé?

10-12. Ɔ jù ké ɛ́ɖɔ̀ ɓèɔ̀ dyi náún-po-wùɖù ɓɛ́ nyɔ ɖò se zɔ̀ kɛɛ tòɛ̀n nììn, ɖɛ́ wa mɛ nyu kɛ́? Poɛ̀n kè ɖɛ ɖò dyí. (Dyé dyi-dyé-ɖɛ̀ ɓèɔ̀ ɖekè.)

¹⁰ Ɛ́ɖɔ̀ ɓè ɓɛ́ wa kɔ̃̀ wa ké náún-po-wùɖù ɓɛ́ nyɔ ɖò se zɔ̀ kɛɛ tòɛɛ dyé fũ̀à-fṹá-ɖɛ̀ jɛ́ɛ́ ɖò dyí. Xwɛ̀ kɛ́? Àpɔ́sò Pɔ́ɔ̀ cɛ̃ɛ ma kà ɓɛ́ nyɔ ɖò ɓɛ́ìn ɖɛ gbà ɖò nyuɛ hwɛ̀ ɓɛ́ ɔ kéɛ dyí dyuòɛ. Ɔ jèɛɛ, ɛ́ɖɔ̀ ɓèɔ̀ mɛ dyéìn nyɔɔ̀ ti kĩ́ín, ɓɛ́ ɔ ké náún-po-wùɖùɔ̀ ɖùù gbo tòɛ̀ ɓɛ́ìn.

¹¹ Náún-po-wùɖù ɓɛ́ wa se nyɔ zɔ̀ìn nyɛɛ tò-tò ɓɛ́ìn nìɛ̀ kà nyɔ kéɔ́ ɓóɖó dyɛ-dyɛ ɖò ɖɛ kɔ̃ ɓáuń nìɛ. Hwɛ̀ ɖɛ-ɓá-nyɔ̀ ɖò ké ɖɛ ɓá ní, ɔ wa ɓóɖóɔ̀ kĩ́ín. Ðɛ nìà kɛ nyuɛ ké ɓóɖóɔ̀ nì bùɛ̀-bùɛ̀ ɓó ɖɛ ɓá jè. Sɔ̀ìn ɓóɛ gbo ní, ɔ ɓá ɓáá-ɖɛ̀-dyùàɔ̀. Púín, ɔ wáɖáa ní gbo, ɓɛ́ ɔ ké mɛ. Kà dyúáɖòɔ̀ kàà, hwɛ̀ ɓɛ́ ɛ́ɖɔ̀ ɖò ké náún-po-wùɖù ɓɛ́ nyɔ se zɔ̀ kɛɛ tòɛɛ, ɔ kɔ̃̀ ɔ ké ɓóɖóɔ̀ mɔɔ nyɔɔ̀ ti dyéìn. Ɔ hwɔìn-kà, ɓó ti nɔ̀mɔ̀ dyíín ɖò ɓaɖa kɛɛ, ɛ́ɖɔ̀ɔ̀ cɛ̃ɛ ɖíí-gààɔ̀ gbo kà ɔ kɔ̃̀ ɖé ɔ jè gbo, ké ɔ mɔ́ ɓɛ́ ɔ kèɔ̀ kè ké wùɖùɛ. Ɔ jù ké nyɔ-náún-po-nyɔ̀ ɖò dyi ɖɛ̀ɓɛ̀ìn-ɖɛ̀ɓɛ̀ìn ɓéɖé ké ɔ dyi kpeɖeín nɔ̀mɔ̀ ní, ɔ mu xwa fɛ̃́ìn ɓɛ́ nyɔ tɔ̀ɔ̀ ɓè ké ɔ náún-po-wùɖùɔ̀ ɖùù gbo tò.

¹² Ɓó dɔ́ɔ́ɔ̀ tiín ní, ɛ́ɖɔ̀ɔ̀ ɓɛ́ìn ɓóɖóɔ̀ bùɛ̀-bùɛ̀ nyuɛ kánáá pu dyììn ɖéɛ nyɔɔ̀ gbo-cɛ̃-cɛ̃ mú kà ɓɛ́ nyɔ séín bĩ ɖɛ xwa, ké wa mɔ́ náún-po-wùɖù sɔ̀ìn ti gbo mu ti gboɛ. (Wóɖ. 3:23) Ðé wuɖu ɓɛ̀ɖɛ̀ɛ̀-ɓɛ̀ɖɛ̀ɛ̀ kè kpéín-dyé-dyé múɛɛ, ɛ́ɖɔ̀ɔ̀ ɓɛ́ìn ɖíí-gààɔ̀ dyí tɛ̀mɛ̀ìn wáɖáá sɔ̀ìn ɖé Baɓoɔ mú kà ɔ ɖà ɖɛ gbà ɖò nyuɛ. Ɔ jù ké ɖíí-gààɔ̀ ɖàa dyí dyuò kà ɔ ɖà ɖɛ xwa bĩɛ ní, ɛ́ɖɔ̀ɔ̀ “ɓá ɓáá-ɖɛ̀-dyùàɔ̀” dyììn ɖé ɖɛ ɓè ɓɛ́ ɖíí-gààɔ̀ ɓɛ́ìn nyuɛ ɓɛ́ ɔ ké ɖɛ dyí sɛ́ɖɛ́ìn nyɛɛ ɔ gbo kɔ̃in-zaìn-zaìn mú ɖé wuɖu fɛ̃́ìn-xwa ɓè mú. Nìí, ɛ́ɖɔ̀ɔ̀ “wáɖá ɓáá-ɖɛ̀ɔ̀ ní gbo” dyììn ɖé ɖíí-gààɔ̀ zùo-po-po mú kè ɓaà-ɓaà mú.—Jĩ́ìn 5:15.

13. Xwɛ̀ ɛ́ɖɔ̀ ɓèɔ̀ ɓɛ́ìn dyí dyuòɛ̀ kà nyɔɔ̀ wɔ̃́ náún-po-wùɖùɔ̀ múin nyɛ́?

¹³ Tiɔ̀ ɖíɛ́ ɓè ɓaɖaín, ɖɛ nyɔ-náún-po-nyɔ̀ɔ̀ cɛ̃ kɛ kè ɖɛ nyɔ tòà náún-po-wùɖùɔ̀ ɖùù gboɛ wɔ̃́ kɛɛ kò ní. Ðɛ́ ɛ́ɖɔ̀ ɓèɔ̀ ɓɛ́ìn nyuɛ ɓɛ́ ɔ ní kɔ̃̀ ɖà ná kpá kɛ́? Wa ɓɛ́ìn nyuɛ ɓɛ́ ɖɛ jɛ́ɛ́ɔ̀ ké wáɖáá nì dyììn ɖé dyi-diè-ɖɛ̀ sɛ́ɖɛ́ìn dyí ɓè dyi-diè-diè mú kpéín-dyé-kà. (Ìkí. 12:11) Gɔ̃̀-jù-wùɖù ɓɛ́ nyɔɔ̀ mu tòùn wɛ̃ɛ mu nyɔ-náún-po-nyɔ̀ɔ̀ gbo kpáùn, ɓɛ́ ɔ kéɛ dyí dyuò kɛbì nyɔɔ̀ wɔ̃́ náún-po-wùɖùɔ̀ múin ní.

NYƆ-NÁÚN-PO-PO ƁÓ TI JƐ́Ɛ́Ɔ̀ ƁAÐA KÈ ÐÉ HWÌÈ SƐ́ÐƐ́ÌN DYÍ MÚ

14. À mɛ tò náún-po-wùɖù ti à kpá dyoɖoún wɛ̃ɛ̀? Zaìn kɔ̃in.

¹⁴ À séín se mú hwɛ̀. Ɔ jèɛɛ, à nyu ɖɛ ɓè mɔɔ à cɛ̃ ɖɛ ɓè ɓɛ́ wa po nyɔ tɔ̀ɔ̀ ɓè dyoɖoún wɛ̃. (Kɔ̀ɖ. 3:13) Geɖepɔɔ Wuɖuɔ̀ cɛ̃ɛ kà ɓɛ́ à ɓɛ́ìn nyuɛ ɓɛ́ à mùè ɖò ké dyoɖoún kpá tiɔ̀ ɖíɛ́ ɓè ɓaɖa kɛ. (Ìfí. 4:26) Kɛɛ, à mɛ ɓɔ́ nyɔ ɖò náún poɛ ti à kpá dyoɖoún wɛ̃. Xwíníínɔ̀ nyɛ́ kɔ̃̀ jèɛ́? Ɔ mɔ̀ sepoɛɖe “nyɔùn-dyùɛ̀ dyoɖo seɛ nyuɛ ɓɛ́ìn, ɓɛ́ Geɖepɔɔ dyí-sɛ́ɖɛ́ìn-ɖɛ̀ ɓèɔ̀ ké nì.” (Jĩ́ìn 1:20) Ɔ jù ké à dyi náún-po-wùɖù tò ti à kpá dyoɖoún wɛ̃ ní, à ɓɛ́ìn fũ̀à-fṹáɔ̀ gbà gbo poɛ. À seɛ cɛ̃iń nì kà ɓɛ́ à mɛ ɓɔ́ nyɔ ɓɛ́ ɔ poà à dyoɖoún wɛ̃ɛ à hwìɖìi-poìn-ɖɛ̀ ɓè kè kà à hwòɖòɔ̀ nyu nìɛ̀ kɛɛ jè ɔ gbo cɛ̃ɛ fɔɔ kɛ. Kɛɛ, à ɓɛ́ìn wùɖùɛ̀ nɔ̀mɔ̀ dyíin ɔ jù ké à dyoɖo-hwòɖòɔ̀ dyi wáɖá ní. Dè ɓo-bɛ̃̀ nɔ̀mɔ̀ dyíin ɓɛ́ Ɛ̀ɖíhù mɔ̀ ma kà Jóɓòɛ̀ náún-po-nyɔ̀ kɛ dè ma kɛɛ dyéɖé gbo.

15. Ðɛ́ à cɛ̃́ sɔ̀ìn ɖé Ɛ̀ɖíhùɛ̀ nyuu-ɖɛ̀ɔ̀ múɛ́? (Dyé dyi-dyé-ɖɛ̀ɔ̀ ɖekè.)

¹⁵ Ɛ̀ɖíhù ɖú ma wé goun dyí, ké ɔ tò ma Jóɓò ɖùù gbo ti ɔ nì ma ɔ ɓàto ɓè ɓɛ́ wa kpɔ̃ ma ɔ ɖɛ gbà nyu jèɛɛ gɔ̃̀ jùɛ̀n nyɛ. Ɛ̀ɖíhù kpá ma wììn ɓó Jóɓò jè. Kɛɛ, Ɛ̀ɖíhù kpá ma dyoɖoún mìɔ, sepoɛɖe Jóɓò nyìnììn ma Jɛhova nyɛ́nɛ́ dyíin, ké ɔ ɓɔ́ɖɔ́ìn ma ɔ mìɔùn dyí jè. Ɔ nì ma ná dyɛo, kɛɛ Ɛ̀ɖíhù gmɔ̀ ma ɔ ti dya, ké ɔ wùɖù ma ɖé wuɖu ɓɛ̀ɖɛ̀ɛ̀-ɓɛ̀ɖɛ̀ɛ̀ kè kpéín-dyé-dyé mú ti ɔ nì ma Jóɓò náún poɛń nyɛ. (Jóɓò 32:2; 33:​1-7) Ɛ̀ɖíhùɛ̀ nyuu-ɖɛ̀ɔ̀ tɛ̀mɛ̀ìn à jàà kpa ɖɛ ɖò: Ɔ nɔ̀mɔ̀ dyíin ɓɛ́ nyɔ ké náún-po-wùɖù tò ɓó ti jɛ́ɛ́ɔ̀ ɓaɖa kè ɖé hwìè sɛ́ɖɛ́ìn dyí mú—dyììn ɖé kpéín-dyé-dyé kè ɖɛ̀ɓɛ̀ìn-ɖɛ̀ɓɛ̀ìn mú.—Ìkí. 3:​1, 7.

TÒ NÁÚN-PO-WÙÐÙ, KÉ KPƆ̃ NÁÚN-PO-WÙÐÙ DYI TEE

16. Ðɛ́ m̀ cɛ̃́ ɖé Wɛ́ɖɛ́ 32:8 múɛ́?

¹⁶ Vɔ̀sì ɓɛ́ cɛ̃́ɛ́-ɖɛ̀ɔ̀ ɓá dyíɛɛ cɛ̃ɛ kà ɓɛ́ ‘Jɛhova mu à ɖɛ tɛ̀mɛ̀ìn, ɓɛ́ ɔ ké à náún po, ɓɛ́ ɔ ké à dyí gmɔ̀’ kɛ. (Zà Wɛ́ɖɛ́ 32:8 wuɖuún.) Ðɛ nìà kɛ tɛ̀mɛ̀ìn kà ɓɛ́ Jɛhova kpá à gbo kánáá puɛ. Ɔ ní po à náún ɖòùn pu, kɛɛ ɔ kpá à gbo ɓɛ́ à ké náún-po-wùɖùɔ̀ kũ̀à mú nyùìn. Ɔ mɔ̀ dyí-tɛ̀mɛ̀ìn-ɖɛ̀ nɔ̀mɔ̀ ɖò cá ɓó à bìì! Ɔ jù ké à dyi ɓéɖé ɓɛ́ à ké nyɔ tɔ̀ɔ̀ ɓè náún po ní, ɓèà mɛ sí Jɛhova ɓo-bɛ̃̀ìn dyììn ɖé wa dyéɖé-gbo-dè-dè mú, ɓɛ́ à ké wa gbo kpá ɓɛ́ wa nyuu-ɖɛ̀ ké mú wóɖó.

17. Ɔ jù ké ɛ́ɖɔ̀ ɓè dyi náún-po-wùɖù jɛ́ɛ́ ɓè tò sɔ̀ìn ɖé Baɓoɔ mú ní, ɖɛ́ wa mu jùùn wɛ̃́? Zaìn kɔ̃in. (Àzédyà 32:​1, 2)

¹⁷ À kɔ̃̀ à ké náún-po-wùɖù nɔ̀mɔ̀ dyíin tò, kè ɓɛ́ à kéɛ dyi kpɔ̃ kàùn ké ɔ zi ti séín ɖò dyí. (2 Tím. 3:1) Ɛ́ɖɔ̀ ɓè ɓɛ́ wa tò náún-po-wùɖù jɛ́ɛ́ ɓè sɔ̀ìn ɖé Baɓoɔ múɛɛ nì “kà ní-dyù ɓè ɓɛ́ wa zĩ̀ìn ɖé gbàùn-fúɖúá ɖò kɔ̃ɛɛ nìà kɛ.” (Zà Àzédyà 32:​1, 2 wuɖuún.) Ɓàto ɓè ɓɛ́ wa dyuò ɖɛ à mɔ́ wɔ̃́ɔ dyiɛ dyí, kɛɛ wa cɛ̃ ɖɛ à kɔ̃̀ à ké wɔ̃́ kɛ à gboɛɛ mɔ̀ ɓàto kpa ɖɛ ɓè kà “góò-kpò ɖò ɓɛ́ ɔ wɛ̃̀ìn ɖé séɓàɖà-kɛ̀ɓɛ̀ɛ̀ mú dyiɛɛ nìà kɛ.” (Nɔ́ɔ́ 25:11) Ɓèà séín mɛ cɛ̃́ kà nyɔ ké náún-po-wùɖù nɔ̀mɔ̀ dyíin tòɛ̀ nyu kè kà nyɔ kéɛ dyi kpɔ̃ɔ nyuɛ kánáá pu.