M̀ Ɓɛ́ìn Ðɛ Ðìè Ðò Cɛ̃́ɛ Sɔ̀ìn Ðé Baɓo Tɛ̀mɛ̀ìn-Ðɛ̀ Kĩ́ín Ɓèɔ̀ Múù?

1. Xwɛ̀ Baɓo tɛ̀mɛ̀ìn-ɖɛ̀ ɓè nyu ma nì cĩ́-cĩ́ɔ̀ gbo zĩàìn ti m̀ cɛ̃́ ma jààɔ̀ kĩ́ín nyɛ́?

BAƁO tɛ̀mɛ̀ìn-ɖɛ̀ kĩ́ín ɓè ɖà à cĩ́-cĩ́ɔ̀ gbo zĩàìn. Ɔ hwɔìn-kà, ti à cɛ̃́ɛ ma kà ɓɛ́ Geɖepɔɔ nyɛ́nɛ́ mɔ̀ Jɛhova kɛɛ, à dè ma ɔ ɓàto jùɛ gbɔ. (Àzé. 42:8) Ti à cɛ̃́ ma jàà ɓáà nyɔ ɓè ɖàà mɛ́ɛ jè dyíɛɛ, à se ma hwòɖò dyií gbàìn ɖe fɔɔ kɛbì à ɖɛ̀ɓɛ̀-nyɔ̀ ɓè ɖàà mɛ́ɛ nì ma gà dyéɛń ní. (Ìkí. 9:​10) Ké ti à cɛ̃́ɛ ma kà ɓɛ́ Geɖepɔɔ mu ɓóɖó-kpà nìà kɛ Páɖédà mú nyuùn wɛ̃ɛ, à se ma hwòɖò dyií gbàìn ɖe ɓá ɖé dyúa jè dyí. À dèɛ̀ ma hwòɖò kɔ̃ kà ɓɛ́ à ɓɛ́ìn hwèɖèìn fɛ̀ɛ̀ ɓéɖéɛ kɛ; ɔ se ɓó ti wè bìì pu​—hwɔìn-kà zɔ̃ 70 mɔɔ zɔ̃ 80 bììɛ​—kɛɛ ɓó sè-ná-sèɛ̀ tiín.​—Wɛ́ɖɛ́ 37:​29; 90:10.

2. Xwɛ̀ 2 Píɖɛ̀ 1:​12, 13 nyuɛ tɛ̀mɛ̀ìn kà ɓɛ́ Kɛ́ɖɛ́ì ɖeín-sí-nyɔ̀ hwɛ̀ ɖɛ ɓè dyé ma Baɓo tɛ̀mɛ̀ìn-ɖɛ̀ kĩ́ín ɓè kpáná kɔ̃ún wɛ̃́?

² À ní ɖá ɓɛ́ à ké Baɓo tɛ̀mɛ̀ìn-ɖɛ̀ kĩ́ín ɓèɔ̀ feɖe dyi ɓaɖa. Ðé àpɔ́sò Píɖɛ̀ɛ̀ céè-ɖɛ̀ sɔ̃́ nììnɔ̀ múɛɛ, ɔ céè ma Kɛ́ɖɛ́ì ɖeín-sí-nyɔ̀ ɓè ɓɛ́ wa ‘ku ma dyi ɖé jààɔ̀ múɛɛ’ gbo. (Zà 2 Píɖɛ̀ 1:12, 13 wuɖuún.) Ɓó tia ɓaɖaa, wa nì ma fũ̀à-fṹá-ɖɛ̀ ɓè dyí dyéɛń ɖé zùùn ɖé dyí-poìn-kpòòɔ̀ mú, sepoɛɖe se-ɖɛ-tɛ̀mɛ̀ìn-nyɔ̀ ɓè kè ɖɛ gbà nyu-nyɔ̀ ɓè nì ma ɖé wa hwìɛ̀. (2 Píɖɛ̀ 2:​1-3) Píɖɛ̀ mɔ́ ɓɛ́ ɔ ké ma ɔ ɖíí ɓèɔ̀ dyi kùìn, ɓɛ́ wa ké ma fũ̀à-fṹá-ɖɛ̀ ɓè nìà kɛ gbo vɔ̃ɔ ɓɛ́ìn. Dyììn ɖé ɔ náa nyu-nyu múɛɛ, ɔ dyà ma ɖɛ ɖíɛ́ ɓè ɓɛ́ wa ɖà ma cɛ̃́ kĩ́ín nyɛɛ wa hwìɖìi. Tɛ̀mɛ̀ìn-ɖɛ̀ ɓè nìà wɛ mu ma wa gbo kpáùn ɓɛ́ wa ké ma jààɔ̀ gboi kpɔ̃ kánáá pu.

3. Poìn xwíníín kɔ̃̀ jè Kɛ́ɖɛ́ì ɖeín-sí-nyɔ̀ ɓè mɛ nàìn Baɓo tɛ̀mɛ̀ìn-ɖɛ̀ kĩ́ín ɓè jè hwìɖìi teeɛɛ kè ɖɛ ɖò dyí.

³ Kà à muà ɖɛ hwɛ̀ìn ɖé zùùn wɛ̃ɛ, à ɓɛ́ìn cɛ̃́ɛ́-ɖɛ̀ ɖìè cɛ̃́ɛ sɔ̀ìn ɖé Baɓo tɛ̀mɛ̀ìn-ɖɛ̀ kĩ́ín ɓè mú. Ɓèà poɛ̀n kè ɖɛ nìà kɛ dyí: Ðɛ-pĩ-nyɔ̀ sùà ɖò kè ɖɛ-pĩ-nyɔ̀ ɖìè ɖò ɓɛ́ìn pĩ-ɖɛ̀ dyúáɖò ɓèɔ̀ kũ̀à mú nyùɛ̀n ɓɛ́ wa ké ɖii-ɖɛ̀ ɖò pĩ. Kɛɛ, sepoɛɖe ɖɛ-pĩ-nyɔ̀ sùàɔ̀ ɖà ɖɛ pĩɛń hwèɖèìn jèɛɛ, ɔ dyuò pĩ-ɖɛ̀ ɓèa xwaún poɛ̀n ɓɛ́ ɔ ké ɖii-ɖɛ̀ ɖìè nɔ̀mɔ̀ wɔ̃ ɖò pĩ. Kà dyúáɖòɔ̀ kàà, nyɔ ɓè ɓɛ́ wa ɖà Jɛhova ɓièɛ̀n hwèɖèìn kè Baɓo-cɛ̃́-nyɔ̀ ɖìè ɓè ɓɛ́ìn Baɓo tɛ̀mɛ̀ìn-ɖɛ̀ kĩ́ín ɓè dya gmɔ̀ɔ̀ ɖé hwìè kò-kò ɓè mú. À dyí-dyé-ɖɛ̀ ɓè mɔɔ kũ̀à ɓè à ɓéɖé ɖé Jɛhova ɓiè-ɓiè múɛɛ ɖà gbo zĩàìn dyɛ̀ sɔ̀ìn ti à kpá ma níɔ kɛɛ gbo. À dyi tɛ̀mɛ̀ìn-ɖɛ̀ ɓè à ɖà ma cɛ̃́ seeɛ kè ɖɛ ɓè à nì mú mùɛ̀n kàùn wɛ̃ gboi kpaìn ní, à ɓɛ́ìn cɛ̃́ɛ́-ɖɛ̀ ɖìè ɓè ɓɛ́ wa ɓɛ́ìn à gbo kpáa kɛɛ da dyéɛ. Ɓèà dyé ɖɛ Kɛ́ɖɛ́ì ɖeín-sí-nyɔ̀ hwɛ̀ ɖɛ ɓè ɓɛ́ìn cɛ̃́ɛ sɔ̀ìn ɖé Baɓo tɛ̀mɛ̀ìn-ɖɛ̀ kĩ́ín tã ɓè múɛ.

JƐHOVA MƆ̀ ÐƐ SÉÍN MƐ-NYƆ̀

4. Sepoɛɖe à ɖàa cɛ̃́ kà ɓɛ́ Jɛhova mɔ̀ à Mɛ-nyɔ̀ jèɛɛ, xwɛ̀ ɔ ɖàa nyu ké à cĩ́-cĩ́ɔ̀ ɖà gbo zĩàìn nyɛ́?

⁴ “Geɖepɔɔ mɔ̀ nyɔ po ɖɛ séín.” (Híì. 3:4) À dyuòɛ̀ dyí kà Mɛ-nyɔ̀ ɖò ɓɛ́ ɔ fɔ̀nɔ̀ hwòɖò, ké ɔ ɓéɖé kpé séín nyɛɛ mɔ̀ nyɔ mɛ ɓóɖó-kpà nìà kɛ kè fɔ̀ɔ̀-ɖɛ̀ séín nì ɔ kɔ̃ɛ. Ɔ mɔ̀ nyɔ mɛ à. Ɔ jèɛɛ, ɔ dyuò à dyí nɔ̀mɔ̀ dyíin cá. Ké ɖɛ kpa ɖɛ jɛ́ɛ́ kɛɛ mɔ̀, ɔ kɔ̃̀ ɖé à jè gbo. Ɔ dyuò ɖɛ mɔ̀ ɖɛ nɔ̀mɔ̀ dyíin ɓó à bììɛɛ dyí. Sepoɛɖe à dyuòɛ̀ dyí kà ɓɛ́ Jɛhova mɔ̀ à Mɛ-nyɔ̀ kɛ jèɛɛ, ɔ ɖàa nyu ké à cĩ́-cĩ́ɔ̀ ɖà gbo zĩàìn ɖé hwìè nɔ̀mɔ̀ dyíin ɓè mú, ké ɔ nyuɛ ké à cĩ́-cĩ́ɔ̀ ɖà xwíníín jɛ́ɛ́ ɖò ɓéɖé.

5. Jààɔ̀ nyɛ́ ɓɛ́ìn à gbo kpáa ɓɛ́ à ké à mìɔùn ɓíɖíi dyà kɛ́? (Àzédyà 45:​9-​12)

⁵ Jàà ɓáà Jɛhova Mɛ-nyɔ̀ jù jè dyíɛɛ ɓɛ́ìn à cɛ̃́ɛ́-ɖɛ̀ ɖò tɛ̀mɛ̀ìn ɓá nyɔ mìɔùn ɓíɖíi dyà jè dyí. Ti ɓɛ́ Jóɓò vòìn ma ɔ mìɔùn kè nyɔùn tɔ̀ɔ̀ ɓè jè gbo mìɔ kɛɛ, Jɛhova dyàà ma ɔ hwìɖìi kà ɓɛ́ Ɔ mɔ̀ nyɔ mɔ̀ kpé-séín-ɓéɖé-nyɔ̀ kè ɖɛ séín Mɛ-nyɔ̀ɔ̀ kɛ. (Jóɓò 38:​1-4) Ðɛ-hwìɖìi-dyà-dyà nìà kɛ kpá ma Jóɓò gbo ɓɛ́ ɔ kéɛ ma dyé kà Geɖepɔɔ xwai-nyuu-ɖɛ̀ ɓèɔ̀ nì ɖéé ɖé nyɔùn-dyù nììn xwai-nyuu-ɖɛ̀ ɓèɔ̀ kɔ̃in nyɛ. Kpáá-ɖɛ̀-cɛ̃-nyɔ̀ Àzédyà céè ma ɓá ɖɛ nìà kɛ jè dyí, ké ɔ ɖá: “Mɛɔ̀ ɓɛ́ìn ɔ mɛ-nyɔ̀ɔ̀ gbo cɛ̃ɛ, ɓɛ́ ɔ ké níiń: ‘Ðɛ́ m̀ nìà mɛiń nyɛ́ɛ̀?’”​—Zà Àzédyà 45:​9-​12 wuɖuún.

6. Tiɔ̀ nyɛ́ à ɓɛ́ìn hwìɖìi poɛ̀n kà Jɛhova mɔ̀à à Mɛ-nyɔ̀ɔ̀ kɛɛ ɓéɖé kpé kɛ́? (Dyé dyi-dyé-ɖɛ̀ ɓèɔ̀ ɖekè.)

⁶ Ɔ jù ké Kɛ́ɖɛ́ì ɖeín-sí-nyɔ̀ ɖò dyi jààɔ̀ mú hwèɖèìn ní, ɔ ɓɛ́ìn ɔ mìɔùn nììn ɖɛ-múin-wɔ̃́-wɔ̃́ mú tèɛ̀, ɓɛ́ ɔ ké se Jɛhova kè Ɔ Wuɖuɔ̀ gbo gmɔ̀ìn ɓó ɔ hwìè da zàìn jè. (Jóɓò 37:​23, 24) Kɛɛ, ɔ jù ké nyɔ ɖò dyi fɔ̀nɔ̀-hwòɖò kè dĩ́ín-dĩ̀ìn zi dyí ɓúáuń ɓɛ́ ɔ Mɛ-nyɔ̀ɔ̀ ɓéɖéɛɛ jè hwìɖìi poìn ní ɖé? (Àzé. 40:​22; 55:​8, 9) Jàà nìà kɛ ɓɛ́ìn ɔ gbo kpáa, ɓɛ́ ɔ ké ɔ mìɔùn ɓíɖíi dyà, kè ɓɛ́ ɔ kéɛ dyí dyuò kà Jɛhovaa fɔ̀nɔ̀-hwòɖòɔ̀ sɛ́ɖɛ́ìn dyí ké ɔ zi ɔ nììnɔ̀ dyíɛ.

7. Ðɛ́ Wàɖàhíɖà nyu ma ɓɛ́ ɔ ké ma ɖɛ-gbo-zĩàìn-zĩàìn dyi kpɔ̃ kɛ́?

⁷ Wàɖàhíɖà, ɓɛ́ ɔ cĩ́ ɖé Sòɖòvénìà-ɓòɖòɔ̀ kɔ̃ɛɛ ɖàa dyé kà ɓɛ́ ɔ Mɛ-nyɔ̀ɔ̀ jè hwìɖìi-poìn-poìn ɖà ɔ gbo kpá ɓɛ́ ɔ ké ɖɛ-gbo-zĩàìn-zĩàìn ɓè ɓɛ́ wa kpá ɖé kpooɔ̀ múɛɛ dyi kpɔ̃ɛ. Ɔ cɛ̃ɛ ma, ké ɔ ɖá: “Tiɔ̀ ɖíɛ́ ɓè ɓaɖaín, ɔ kàmà ma mú ɓɛ́ ḿ ké ma ɖɛ-gbo-zĩàìn-zĩàìn ɓɛ́ ɖíí ɓè nìà kũ̀àɔ̀ dyúa kɛ nyuɛɛ dyi kpɔ̃. Ɔ hwɔìn-kà, ḿ dyé ma 2023 Nyɔ-Dyúa-Nì-Nyɔ̀ Ɓèɔ̀ Bɔ̃̀-Dyi-Po-Po #8 víɖòɔ̀ dyi dyɛo, kɛɛ ḿ giniìn ma dyi mìɔ cá ti ḿ dyé ma ɖíí-gàà nì vɛ̃̀ wĩin ɖò wuɖu wáɖáa kɛ. Ɔ jèɛɛ, ḿ ɓaà ma Jɛhova ɓɛ́ ɔ ké ma ḿ gbo kpá, ɓɛ́ ḿ ké ma ɖɛ-gbo-zĩàìn-zĩàìn nìà kɛ dyi kpɔ̃.” Wàɖàhíɖà dyuòɛ̀ ma dyí kà ɓɛ́ Jɛhova mɔ̀à dyɔɔ̀ kè ɓóɖó-kpàà Mɛ-nyɔ̀ kɛɛ ɓɛ́ìn ɔ kpooɔ̀ nàìn ɖé hwìè sɛ́ɖɛ́ìn dyí múɛ. Ɔ jù ké ɔ dyi mú kàmà ɓó m̀ bìì ɓɛ́ m̀ ké ɖɛ-múin-wɔ̃́-wɔ̃́ mɔɔ hwìè-da-zàìn-zàìn ɖìè ɖò dyi kpɔ̃ ní, m̀ mɛ dyà m̀ mìɔùn ɓíɖíi, ɓɛ́ m̀ ké kpé kè fɔ̀nɔ̀-hwòɖò zi dyí ɓúáuń ɓɛ́ à Mɛ-nyɔ̀ɔ̀ ɓéɖéɛɛ jè hwìɖìi nàìn.​—Wóɖ. 11:​33-​36.

XWÍNÍÍN KƆ̃̀ JÈ GEÐEPƆƆ WƆ̃́ÀÌN GÀ-DYÉ-DYÉ GBOƐ

8. Xwɛ̀ xwíníín kɔ̃̀ jè Geɖepɔɔ wɔ̃́àìn gà-dyé-dyé gboɛɛ jè cɛ̃́-cɛ̃́ ɖà à kpáná dyí nyu kɛ́?

⁸ Xwíníínɔ̀ nyɛ́ kɔ̃̀ jè Geɖepɔɔ wɔ̃́àìn gà-dyé-dyé gbo kɛ́? Nyɔ ɖíɛ́ ɓè ɓɛ́ wa se dyi-diè-ɖɛ̀ nìà wɛ gɔ̃̀-jù-wùɖù dyí dyuòɛɛ kpáìn Geɖepɔɔ dyoɖoún, mɔɔ wa cɛ̃ɛ kà ɓɛ́ Geɖepɔɔ ɖò se nì fɔɔ kɛ! (Nɔ́ɔ́ 19:3) Kɛɛ, m̀ ɖàa cɛ̃́ kà ɓɛ́ nàmàùn kè kɛɛ ɓɛ́ à sèà dúíɛɛ mɔ̀ nyɔ dyàà gà-dyé-dyé, ké ɔ se Jɛhova kɛ. M̀ ɖàa cɛ̃́ ɖekè kà ɓɛ́ Jɛhovaa hwòɖò-ku-kuɔ̀ ɖàa nyu ké nyɔ méɔ̀ùn ɓè ɖà ɔ dyí dyuò, ké wa ɖàa dyé ɓó wa mìɔùn bìì kà ɓɛ́ Jɛhova mu gà-dyé-dyé ɓɔ́í poùn gàná cá kɛ. (2 Píɖɛ̀ 3:​9, 15) Jàà ɓè nìà kɛ ɖàa nyu ké nì hwòɖòɔ̀ ɖà dyi dè, ké m̀ ɖà Jɛhova bũ̀in xwɛ̃́ìn mìɔ.

9. Ðɛ́ ɓè kɔ̃̀ mú à ɓɛ́ìn xwíníín kɔ̃̀ jè Jɛhova wɔ̃́àìn gà-dyé-dyé gboɛɛ jè hwìɖìi poɛ̀n nyɛ́?

⁹ À wɔ̃́ɔ múin kà à kɔ̃̀ à ké hwòɖò ku kà à muà Jɛhova fòìn ɓɛ́ ɔ kéà gà-dyé-dyé jè dyi zĩ̀ìn nyɛ. Kɛɛ, ɔ jù ké à mìɔùn, mɔɔ à ɖɛ̀ɓɛ̀-nyɔ̀ ɖò dyi fũ̀à-fṹá-ɖɛ̀ ɖò mɔɔ se-dyí-sɛ́ɖɛ́ìn-ɖɛ̀ mɔɔ gĩɔ dyí dyé ní, à ɓɛ́ìn hwìɖìi poɛ̀n kà Jɛhova nì ti zĩ̀ɛ̀n nyɛ. (Hàb. 1:​2, 3) Ɓó ti nì kà ɓèa ɓaɖaa, ɔ mu dyíin nɔ̀mɔ̀ùn ɓɛ́ à ké xwíníín kɔ̃̀ jè Jɛhova wɔ̃́àìn gbo ɓɛ́ dyí-sɛ́ɖɛ́ìn-nyɔ̀ ɓè kéà gà dyéɛɛ jè hwìɖìi poìn.a (Wɛ́ɖɛ́ 34:​19) À ɓɛ́ìn ɔ hwòɖòɛ̀-gbɔ-po-ɖɛ̀ ɓáà gà-dyé-dyé ɓɔ́í po jè dyíɛɛ jè hwìɖìi poɛ̀n ɖekè.

10. Xwɛ̀ Ã́à nyu ɔ ɖeɛ̀ mɛ́ jè hwòɖò kùɛ̀n nyɛ́?

¹⁰ Jàà ɓáà gà-dyé-dyé jè dyíɛɛ ɓɛ́ìn à gbo kpáa, ɓɛ́ à ké ɖɛ hwòɖò kùìn. Ã́à, ɓɛ́ ɔ cĩ́ ɖé Màdyótì-Tòò-kpò nìà ɖé Índìà-dyòòɔ̀ kɔ̃ kɛ kɔ̃ɛɛ cɛ̃ɛ, ké ɔ ɖá: “Ḿ ɖeɛ̀ mɛ́ jè po ma ní hwòɖòɔ̀ ɖé ɖei mìɔ cá. Kɛɛ, ḿ dyàà ma ḿ mìɔùn hwìɖìi ti séín kà ɓɛ́ Jɛhova mɔ̀ nyɔ seɛ nyu ɓɛ́ gà-dyé-dyé kéà nì kɛ̀. Ɔ mɔ́ ɓɛ́ ɔ ké gà-dyé-dyé séín jè dyi zĩ̀ìn, kè ɓɛ́ ɔ ké à ɖɛ̀ɓɛ̀-nyɔ̀ ɓèɔ̀ gĩɔ zà. Jàà ɓè nìà wɛ jè hwìɖìi-nàìn-nàìn nyuɛ ké ḿ ɓéɖé gìɖìi ɓɛ́ ɔ jè fɔ̀nɔ̀ìn ḿ wɔ̃ɛ.”

11. Xwɛ̀ xwíníín kɔ̃̀ jè Jɛhova wɔ̃́àìn gà-dyé-dyé gboɛɛ ɓɛ́ìn à gbo kpáa ɓɛ́ à ké wuɖuɔ̀ wáɖá teeɛ́?

¹¹ Xwíníín kɔ̃̀ jè Geɖepɔɔ wɔ̃́àìn gà-dyé-dyé gboɛɛ dyí-dyuò-dyuò ɓɛ́ìn à kpéí poɛ, ɓɛ́ à ké wuɖuɔ̀ wáɖá tee. Ti ɓɛ́ Píɖɛ̀ ɖàa ma kɔ̃in zaìn kà ɓɛ́ Jɛhovaa hwòɖò-ku-kuɔ̀ ɓɛ́ìn nyɔ ɓè ɓɛ́ wa táà waà nàmàùn ɓèɔ̀ dyiɛ póɛ̀n nyɛɛ, ɔ cɛ̃ɛ ma ɖe, ké ɔ ɖá: “Nyɛ́ mɔ̀ nyɔ ɓè ɓéɖé ɓè ké jùɛ́? Ɓè ɓéɖé ɓè ké ɓèɛ̀ fɛ̀ɛ̀ɔ̀ Geɖepɔɔ xwáɖáún zàìn, ɓɛ́ ɓè ké ɔ kpeɖe nyu.” (2 Píɖɛ̀ 3:​11) “Ɔ kpeɖe” ɓèɔ̀ ɖò mɔ̀ à wuɖu-wáɖá-kũ̀àɔ̀. À ɖɛ̀ɓɛ̀ nyɔ ɓè mú kà dyúáɖò kà à dyɔún-Ɓàɔ̀ ɖɛ̀ɓɛ̀à wa múɛ. À mɔ́ ɓɛ́ wa ké ɖé Geɖepɔɔ ɓóɖó ɖìèɔ̀ mú cĩ́. Jɛhova nì nyɔ ɓè nì ɖé nì gbɛ̀ɔ̀ múɛɛ ti nyíɛń ɓɛ́ wa ké ɔ ɓiè. Ɔ mɔ̀ mana vɛ̀nɛ̀ ɖò cá ɓɛ́ m̀ kè Geɖepɔɔ ké kũ̀à nyu, kè ɓɛ́ m̀ ké nyɔ ɓáún-ɓáún gbo kpá ɓɛ́ wa ké ɔ jè cɛ̃́ hwɛ̀ ɓɛ́ ɖɛ séín mánáín-hwɛ̀-tìɔ̀ ké nyiniɛ!​—1 Kɔ̀. 3:9.

À NÌ “WÉ HWƐ̀ÌN-GBƆ ƁÈƆ̀” MÚ CĨ́ƐŃ

12. Sepoɛɖe à ɖàa cɛ̃́ kà à nì “wé hwɛ̀ìn-gbɔ ɓèɔ̀” mú cĩ́ɛń jèɛɛ, ɖɛ́ mɔ̀ kpáná ɓɛ́ ɔ nyu à dyíɛ́?

¹² Baɓoɔ zaìn kà nyɔ ɓè mu nììn ɖé “wé hwɛ̀ìn-gbɔ ɓèɔ̀” múɛɛ jè kɔ̃in wáɖáá. (2 Tím. 3:​1-5) À dyi à ɖei gmɔìn ní, à dyéɛ wáɖáá kà ɓɛ́ kpáá-ɖɛ̀ nìà kɛ nì jàà kpáuń wɛ̃. À dyiɛ dyé ké nyɔ ɓè kpeɖe dyi gbà gbo kpáuń nììn, ɔ nyuɛ ké à poɛ jàà cá kà ɓɛ́ Geɖepɔɔ Wuɖuɔ̀ ní tɔ́mɔ́ seɛ.​—2 Tím. 3:​13-​15.

13. Ɓá Jizɛɛ nɔ́ɔ́ nìà ɖé Ðúù 12:​15-​21 múɛ dyíɛɛ, ɖɛ́ mɔ̀ dyi-diè-ɖɛ̀ ɓè ɓɛ́ à ɓɛ́ìn à mìɔùn dyi dièɛ̀ kɛ́?

¹³ Sepoɛɖe à nì wé hwɛ̀ìn-gbɔ ɓèɔ̀ mú cĩ́ɛń jèɛɛ, à hwòɖò-dyùà fṹà ɓó ɖɛ ɓè kpa ɖɛ mìɔ kɛɛ nyu jè. À ɓɛ́ìn hwòɖò-dyùà fṹà jè cɛ̃́ɛ sɔ̀ìn ɖé nɔ́ɔ́ ɓɛ́ Jizɛ po ma ɓɛ́ ɔ nìà ɖé Ðúù 12:​15-​21 múɛɛ mú. (Zàà wuɖuún.) Wa ɖá bã-gààɔ̀ “zuɖu“ ma ní. Xwíníínɔ̀ nyɛ́ kɔ̃̀ jèɛ́? Ɔ se ɖɛ ɓɛ́ gàaɔ̀ bã ma jèɛ, kɛɛ ɔ mɔ̀ sepoɛɖe ɔ nì ma ɖɛ ɓè se ɖɛ kpa mìɔ kɛɛ poɛń kĩ́ín jè. Ɔ dè ma ɔ “mìɔùn bìì bãa-ɖɛ̀ ɓè dyi,” ké ɔ se ma “bã ɖé Geɖepɔɔ dyéɖéín.” Ðɛ́ nyu ma ɖɛ nìà kɛ fṹà-ɖɛ̀ múɛ́? Geɖepɔɔ cɛ̃ɛ ma gàaɔ̀ gbo, ké ɔ ɖá: “Máaùn nìà kɛɛ, ní mu nì fɛ̀ɛ̀ɔ̀ m̀ xwa zàùn.” Kà ɓóɖó-kpà nìà kɛ nìà mánáín hwɛ̀ìn nyɛɛ, à ɓɛ́ìn à mìɔùn dyi dièɛ̀, ɓɛ́ à ké níiń: ‘Ðɛ́ ní dyí-sɔ́-ɖɛ̀ ɓèɔ̀ tɛ̀mɛ̀ìn ɓá ní hwòɖò-dyùàɔ̀ fṹà jè dyíɛ́? Ðɛ́ mɔ̀ dyí-sɔ́-ɖɛ̀ ɓè ɓɛ́ ḿ po nì dyú ɓèɔ̀ dú xwíníín nyɛ́? Ḿ nyùìn ní ganaɔ̀ kè ní tiɔ̀ ɔ kè ní wíɖí ɓèɔ̀ kũ̀à mú jɛ́ɛ́ ɓɛ́ ḿ ké ḿ mìɔùn bìì bãa-ɖɛ̀ ɓè dyi dèè, mɔɔ ɓɛ́ ḿ ké bãa-ɖɛ̀ ɓè dyi dè ɖé dyɔúnǹ?’

14. Xwíníínɔ̀ nyɛ́ kɔ̃̀ jè ɔ nyuà fɔ̀nɔ̀-hwòɖò ɓɛ́ à kéà ɖɛ ɓè ɓɛ́ Baɓoɔ tɛ̀mɛ̀àìn kà à nì wé hwɛ̀ìn-gbɔ ɓèɔ̀ mú cĩ́ɛń nyɛɛ jè hwìɖìi nàìn nyɛ́?

¹⁴ Kà à nyu cĩ́-cĩ́ dya gmɔ̀ɔ̀ kɛɛ ɓɛ́ìn gbo zĩàìn ɔ jù ké à dyi ɖɛ ɓè ɓɛ́ wa tɛ̀mɛ̀ìn kà à nì wé hwɛ̀ìn-gbɔ ɓèɔ̀ mú cĩ́ɛń nyɛɛ jè hwìɖìi poìn ní. Ðɛa ɖé ɖíí-màà ɖò mɔ̀ Mìkíì kɛɛ dyé ma dyí. Ɔ ɖá: “Ti ḿ ɖà ma sùkúù gbɔ hwɔɛɛ, ḿ mɔ́ ɓɛ́ ḿ ké ma káɖè-jè mu, ɓɛ́ ḿ ké ma nimii ɓè jè cɛ̃́. Ḿ mɔ́ ɓɛ́ ḿ ké ma pàníɛ̀ jù, kè ɓɛ́ ḿ ké ma dɛ̀ wa mɔ́ ma wuɖu-wáɖá-nyɔ̀ pàɖà kɛɛ mu ɖekè. Ɓàto hwɛ̀ ɖɛ ɓè po ma ḿ náún ɓɛ́ ḿ kéɛ ma hwìɖìi poìn kóɖó-kóɖó kɛbì ḿ ɓɛ́ìn ma káɖè-jè muɛ hwɛ̀ ḿ ké ma zùùn dyí-sɔ́-ɖɛ̀ ɓè nyu ɓó kɔ̃in ní. Wa dyàà ma ḿ hwìɖìi kà ɓóɖó-kpà nìà kɛ nì mánáín hwɛ̀ìn dyiɛń nyɛ. Ké wa cɛ̃ɛ ma ɖekè kà ɖé ɓóɖó ɖìèɔ̀ múɛɛ, ní mu ti pàɖà ɓéɖéìn ɓɛ́ ḿ ké nimii jĩ̀-kà ḿ mɔ́ jè cɛ̃́ɛ dyiɛɛ jè cɛ̃́ kɛ. Ɔ jèɛɛ, ḿ gãa ma ɓɛ́ ḿ ké ma ɖɛ ɖò cɛ̃́ ɓó ti xwã́ún-xwã́ún xwíníín. Ɔ náa nyu-nyu kpá ma ḿ gbo, ké ḿ dyé ma kũ̀à ɓɛ́ ɔ nyí ma ḿ ti ɓɛ́ ḿ ké ma pàníɛ̀ jùɛ, ké sɔ̀ìn ɓóɛ gboɛɛ, ḿ jàɖàìn ma ɖé Ɛ́kúéɖɔ̀-ɓòɖòɔ̀ kɔ̃, dɛ̀ ɓɛ́ wa mɔ́ ma wuɖu-wáɖá-nyɔ̀ pàɖà kɛ.” Mìkíì kè ɔ dyú-ɓà mɔ̀á dyí-poìn-kpòò kɔ̃in-té-nyɔ̀ kàùn ɖé ɓóɖó nìà wɛ kɔ̃.

15. Ðɛ́ nyɔ ɓè ɓɛ́ìn nyuɛ ke ɓá bɔ̃̀ nɔ̀mɔ̀ dyíinɔ̀ jè dyíɛ́? Cɛ̃ ɔ hwɔìn-ɖɛ̀ ɖò jè. (Dyé dyi-dyé-ɖɛ̀ ɓèɔ̀ ɖekè.)

¹⁵ À hwòɖò mɛ ɓɔ́ ɖe ɖei kpáa ɔ jù ké nyɔ ɓè dyi bɔ̃̀ nɔ̀mɔ̀ dyíinɔ̀ ɓɔ́ kĩ́ín ní. Nyɔ ɓè ɓɛ́ìn gbo zĩàìn. Poìn Jĩ́ìn mɔ̀ ma kà Jizɛɛ ɖíí-gàà kɛɛ nyuu-ɖɛ̀ɔ̀ jè hwìɖìi. Ɔ dyéɛ ma ké Jizɛ wóɖó ma ɓíɖíi, ké ɔ jù ma Mɛ̀sádyàɔ̀, ké ɔ tɛ̀mɛ̀ìn ma ɖɛ ɖé hwìè kɔ̃̀ mú ɓɛ́ ɔ séè ma kpá ɖòɛ. Kɛɛ, zɔ̃ pàɖà zi ma, ké Jĩ́ìn se ma Jizɛ kíɖíí sí. Ɔ nì ma ná tee ké Jizɛ wóɖó ma gĩɔ hwɛ̀ ké ɔ ɖíí-gààɔ̀ jù ma ɔ ɖeín-nà-nyɔ̀​—ké ɔ jù ma ɖeín-nà-nyɔ̀ kui-kui ɖò cá!b (Jɔ̃́ɔ́ 7:5; Gàɖ. 2:9) Ɓɔ́ nì gbò-xwíníín-nyɔ̀ ɓè ɓɛ́ wa séè bɔ̃̀ nɔ̀mɔ̀ dyíinɔ̀ ɖùù gbo tò keɛ gbo wùɖù-wùɖù, mɔɔ nyɔ ɓè ɓɛ́ wa séè bɔ̃̀ nɔ̀mɔ̀ dyíinɔ̀ dyi kpɔ̃ keɛɛ gbo ɖé kɔ́ìn-kɔ́ìn feɖe dyi ɓaɖaa. Ɔ mɛ nì m̀ hwìɖìi kà ɓɛ́ à nì wé hwɛ̀ìn-gbɔ ɓèɔ̀ mú cĩ́ɛń nyɛ. Ɔ jèɛɛ, à wuɖu-wáɖá-kũ̀àɔ̀ mɔ̀ cɛ-cɛ-ɖɛ̀. Ðɛ m̀ cɛ̃ wa gbo zɛ̃̀ɛ̀ kɛɛ ɓɛ́ìn wa hwòɖò-dyùà gbo zĩàìn gàɖàà, mɔɔ ɓó gà-dyé-dyé vɛ̀nɛ̀ɔ̀ gbɔ-dè-tììn dyɛ̀.c

ƁÉÐÉ ZÙO-PO-HWÒÐÒ TEE ƁÓ ÐƐ ƁÈ ƁƐ́ JƐHOVA DYÀ NYƆ HWÌÐÌIƐƐ JÈ

16. Xwɛ̀ m̀ ɖà ɖɛ ɓè Jɛhova dyàà nyɔ hwìɖìiɛɛ kpáná kɔ̃ún dyé kɛ́? (Dyé gbɔ̀ɖɔ̀ɔ̀ nìà kɛ ɖekè, “Nyùìn Wa Kũ̀à Mú Ɓɛ́ M̀ Ké Nyɔ Tɔ̀ɔ̀ Ɓè Gbo Kpá.”)

¹⁶ Zùùn ɖii-ɖɛ̀ ɖíɛ́ ɓè ɓɛ́ à dyé kɛɛ nì ɓó nyɔ ɓè ɓɛ́ wa séè Baɓo tɛ̀mɛ̀ìn-ɖɛ̀ kĩ́ín ɓè wɔ̃́ ɖòɛɛ bìì. Ɔ hwɔìn-kà, wa poìn wíkì séínɛ̀ wáɖáá-wùɖù ɓè kè cɛ̃́ɛ́-ɖɛ̀ ɖíɛ́ ɓè kè víɖò ɓè nìà jw.org kɔ̃ɛ ɔ kè mákázĩ̀ìnɔ̀ píé nììn ɓè xwaún jɛ́ɛ́ ɓó nyɔ ɓè seà Jɛhova Zàse ɓèɛɛ bìì. Ɔ nì ná dyɛo, kɛɛ à dyé ɖɛ-hwìɖìi-dyà-dyà ɓèa kpáná kɔ̃ún. Wa nyuɛ ké à ɖɛ̀ɓɛ̀ Jɛhova mú mìɔ, ké wa nyuɛ ké à dè ɔ Wuɖuɔ̀ hwòɖò kɔ̃ mìɔ, ké wa kpá à gbo ɓɛ́ à ké sɛ́ɖɛ́ ɓéɖé ɖé nyɔ tɔ̀ɔ̀ ɓè Baɓo tɛ̀mɛ̀ìn-ɖɛ̀ kĩ́ín ɓèɔ̀ tɛ̀mɛ̀ìn-tɛ̀mɛ̀ìn mú.​—Wɛ́ɖɛ́ 19:7.

17. Ðɛ́ ɓè kɔ̃̀ mú à ɓɛ́ìn Baɓo tɛ̀mɛ̀ìn-ɖɛ̀ kĩ́ín ɓè jè hwìɖìi nàìn nyɛ́?

¹⁷ À mɔ̀ Jɛhova Zàse ɓèɛɛ, à kpá múàùn ɔ jù ké à dyi ɖɛ-múin-wɔ̃́-wɔ̃́ ɖìè ɖò dyé ɓá Baɓo tɛ̀mɛ̀ìn-ɖɛ̀ ɖò jè dyí ní. Kɛɛ, à kpá múàùn ɓó Baɓo tɛ̀mɛ̀ìn-ɖɛ̀ kĩ́ín ɓè ɓɛ́ wa nyu ké à xwɛ̃́àìn Jɛhova bũ̀in nyɛɛ jè ɖekè. Ti séín ɖò ɓɛ́ à mu à mìɔùn nììn ɖɛ-múin-wɔ̃́-wɔ̃́ mú tèɛ̀ mɔ́ùn, ɓɛ́ à ké se hwìè-da-zàìn-zàìn ɓɛ́ ɔ sɔ̀ìn ɖé Jɛhovaa kpooɔ̀ gboɛ kíɖíí síɛ mɔ́ kɛɛ, à ɓɛ́ìn à mìɔùn ɓíɖíi dyàà, ɓɛ́ à ké nyɔ nìà kpoo nìà wɛ nàìn nyɛɛ jè hwìɖìi dyà​—nyɔ mɔ̀à kpé-séín-ɓéɖé-nyɔ̀ kè ɖɛ séín Mɛ-nyɔ̀ɔ̀ kɛ. Ɔ jù ké à mìɔùn, mɔɔ à ɖɛ̀ɓɛ̀-nyɔ̀ ɖò dyi mú-dɔ̃̀-dɔ̃̀ dyí dyéɛń nììn, à ɓɛ́ìn hwòɖò kuɛ, ɓɛ́ à ké xwíníín kɔ̃̀ jè Jɛhova wɔ̃́àìn gà-dyé-dyé gboɛɛ jè hwìɖìi nàìn. Ké ɔ jù ké à dyi kà à ké à tiɔ̀ kè à kɔ̃̀ɔ̀-ɖɛ̀ ɓè kũ̀à mú nyùìn nyɛ jè gbɔ poɛń nììn, à ɓɛ́ìn kà ɓɛ́ wé hwɛ̀ìn-gbɔ ɓèɛ̀ jè mɔ̀ cɛ-cɛ-ɖɛ̀ kɛɛ jè hwìɖìi dyàà. Ðɛ ɓè ɓɛ́ Jɛhova dyàà à hwìɖìiɛɛ mɛ kùìn à dyi tee, ɓɛ́ wa ké à kpéí po, kè ɓɛ́ wa ké à hwòɖò-fɔ̀nɔ̀-fɔ̀nɔ̀ nyí.