CƐ̃́Ɛ́-ÐƐ̀ 32
WƐ́ÐƐ́ 38 Ɔ Mu À Dyi Kùìn
Kà Jɛhova Nyu À Gbo Kpáa Ɓɛ́ À Ké Ðɛ Hwòɖò Kùìn Nyɛ
“Geɖepɔɔ mɔ̀ nyɔ kɔ̃̀à kpeɖeɛ̀-dyíin-nɔ̀mɔ̀-nɔ̀mɔ̀ séín [nyɛɛ] . . . Mu ɓè dyi kùìn, ké ɔ mu ɓè kpé nyíìn, ké ɔ mu ɓè hìɖì-kpà nɔ̀mɔ̀ dyíin kɔ̃ poùn.”—1 PÍÐƐ̀ 5:10.
DYÉÐÉ-GBO-DÈ-ÐƐ̀
Ðɛ ɓè ɓɛ́ Jɛhova nyí à ɓɛ́ wa ɓɛ́ìn à gbo kpáa ɓɛ́ à ké ɖɛ hwòɖò kùìn, kè ɖɛ à ɓɛ́ìn nyuɛ ɓɛ́ à ké wa ɖò-ɖò séín kpáná kɔ̃ún dyé mìɔ kɛ.
1. Xwíníínɔ̀ nyɛ́ kɔ̃̀ jè à kɔ̃̀ à kéà ɖɛ hwòɖò kùìn nyɛ́, ké ɖɛ́ mɔ̀ gbo-kpá-kpá ɓɛ́ à ɓéɖé kɛ́? (1 Píɖɛ̀ 5:10)
JƐHOVAA nyɔ ɓèɔ̀ kɔ̃̀ wa ké ɖɛ hwòɖò kùìn ɖé ti-kàmàùn-kàmàùn ɓè nìà kɛ mú. Nyɔ ɖíɛ́ ɓè ɓéɖé wɛ́ ku wɔ̃ ɓè. Nyɔ tɔ̀ɔ̀ ɓè nì waà ɖɛ̀ɓɛ̀-nyɔ̀ ɓèɛ̀ mɛ́ jè hwòɖò kùɛ̀n. Ké nyɔ tɔ̀ɔ̀ ɓè mɔ̀ùn nì gbo-vɔ̃-vɔ̃ dyí dyéɛń, kɛbì ɔ mɛ sɔ̀ìn ɖé waà gbò-xwíníín-nyɔ̀ ɓè mɔɔ gɔ̀mànà-nyɔ̀ vɛ̀nɛ̀ ɓè gboɛ. (Máf. 10:18, 36, 37) Dèɛ̀ hwòɖò kɔ̃ kà Jɛhova ɓɛ́ìn m̀ gbo kpáa, ɓɛ́ m̀ ké ti-kàmàùn-kàmàùn séín ɖò m̀ nì dyí dyéɛń nyɛɛ hwòɖò kùìn nyɛ.—Zà 1 Píɖɛ̀ 5:10 wuɖuún.
2. Dɛ̀ Kɛ́ɖɛ́ì ɖeín-sí-nyɔ̀ ɓè zà kpé ɓɛ́ wa ké ɖɛ hwòɖò kùìn nyɛ́?
2 Ðɛ-hwòɖò-kùìn-kùìn mɔ̀ ɓɛ́ m̀ ké dúún ku, kè ɓɛ́ m̀ ké ɖɛ hwòɖò kɔ̃ dèɛ̀ ɓɛ́ìn kánáá pu ɖé dyí-gbò-ɖɛ̀ ɓè mɔɔ nyɔ-gà-dyéìn-dyéìn mɔɔ mú-dɔ̃̀-dɔ̃̀ ɓè xwaún. Ɓɛ́ à mɔ̀ Kɛ́ɖɛ́ì ɖeín-sí-nyɔ̀ ɓèɛɛ ké ɖɛ hwòɖò kùɛ̀n ɓɛ́ìn nyɛɛ se ɖé à mìɔùn nììn kpé mú sɔ̀ìn; kɛɛ, ɔ sɔ̀ìn ɖé Jɛhova mɔ̀ nyɔ ɓɛ́àìn à “kpé [zià] dyí ɓúáuń mìɔ” kɛ nyíɛ kɛɛ gbo. (2 Kɔ̀. 4:7) Ðé cɛ̃́ɛ́-ɖɛ̀ nìà kɛ múɛɛ, à mu ɖɛ hĩinyɛ ɓè ɓɛ́ Jɛhova ɖà à nyí ɓɛ́ wa ɓɛ́ìn à gbo kpáa ɓɛ́ à ké ɖɛ hwòɖò kùìn nyɛɛ jè dɔ́ɔ́ kɔ̃in dèìn. À mu ɖɛ à ɓɛ́ìn nyuɛ ɓɛ́ à ké ɖɛ ɓèa ɖò-ɖò kpáná kɔ̃ún dyéɛɛ dyéìn ɖekè.
ƁAÀ-ƁAÀ
3. Xwíníínɔ̀ nyɛ́ kɔ̃̀ jè à ɓɛ́àìn cɛ̃ɛ kà ɓɛ́ ɓaà-ɓaà mɔ̀ dĩ́ín-dĩ̀ìn-ɖɛ̀ ɖò cá kɛ́?
3 Jɛhova ɖà à dĩ́ín-dĩ̀ìn-ɖɛ̀ ɖò nyí ɓɛ́ ɔ ɓɛ́ìn à gbo kpáa ɓɛ́ à ké ɖɛ hwòɖò kùìn nyɛ. À mɔ̀ nàmàùn-nyɔ̀ ɓè dyɛo, kɛɛ ɔ ɖàa nyu ɓɛ́ à ké ɔ gbo wùɖùɛ̀ ɓɛ́ìn. (Híì. 4:16) Poɛ̀n jè hwìɖìi: À ɓɛ́ìn Jɛhova ɓaà ɓó ti séín ɖò kè ɓá ɖɛ séín ɖò jè dyí. Ɔ ɓɛ́ìn à wuɖu wɔ̃́ɔ ɖé wuɖu-dù séín ɖò mú, ké ɔ ɓɛ́ìn à wuɖu wɔ̃́ɔ sɔ̀ìn dà séín ɖò, kɛbì à mɛ nì dà-kpái-kpái ɖò mɔɔ kpɔɖɔ ɖeín nyɛ. (Jónà 2:1, 2; Àpɔ́. 16:25, 26) Ɔ jù ké à dyi hwòɖò dyií gbàìn mìɔ, ké à se à hwòɖòɛ̀-kpɔ̃-ɖɛ̀ ɓè cɛ̃ɛ ɓɛ́ìn ní, Jɛhova ɓɛ́ìn ɖɛ à mɔ́ cɛ̃ɛ dyiɛ múin wɔ̃́ɔ. (Wóɖ. 8:26, 27) Jɛ́ɛ́ kɛɛ, ɓaà-ɓaà mɔ̀ dĩ́ín-dĩ̀ìn-ɖɛ̀ ɖò cá!
4. Xwíníínɔ̀ nyɛ́ kɔ̃̀ jè à ɓɛ́àìn cɛ̃ɛ kà ɔ mɔ̀ Jɛhova mɔ́ɔ́-ɖɛ̀ ɓɛ́ à ké ɓaà ɓó ɖɛ hwòɖò kùìn jè kɛ́?
4 Ðé Baɓoɔ múɛɛ, Jɛhova cɛ̃ɛ à gbo wáɖáá kà ɓɛ́ “à dyi ɔ ɖɛ ɖò zɔ̀ìn, ké ɔ dyi ɔ mɔ́ɔ́-ɖɛ̀ jùìn, nìí, ɔ mu à wuɖu wɔ̃́ùn” wɛ̃. (1 Jɔ̃́ɔ́ 5:14) À ɓɛ́ìn Jɛhova gbo-kpá-sɔ̃̀ zɔ̀ìn ɓó ɖɛ hwòɖò kùìn jèè? Ǹdye! Ɔ náa nyu-nyu mɔ̀ ɔ mɔ́ɔ́-ɖɛ̀. Xwíníínɔ̀ nyɛ́ kɔ̃̀ jè à ɓɛ́àìn náa cɛ̃ɛ kɛ́? À dyi mú-dɔ̃̀-dɔ̃̀ hwòɖò kùìn ní, à nyuɛ ké Jɛhova ɓɛ́ìn ɔ nyɛ́nɛ́ɔ̀ kɔ́ìn-nyɔ̀ mɔ̀à Nɔɔ́-nàmàùn wɛ̃ɛ gɔ̃̀-jù-wùɖù nyíɛ. (Nɔ́ɔ́ 27:11) Ké ɓó kɔ̃in ɖeɛɛ, Baɓoɔ cɛ̃ɛ kà ɓɛ́ Jɛhova hwòɖòɔ̀ nyu cà-cà “ɓɛ́ ɔ ké nyɔ ɓè ɓɛ́ wa sí ɔ kíɖíí hwòɖòɛ̀-ɖé-hwɛ̀-kà kɛɛ kpéí po” kɛ. (2 Ká. 16:9) Ɔ jèɛɛ, à ɓɛ́ìn hwòɖò kɔ̃ dèɛ̀ kà Jɛhova ɓéɖé hwòɖò-wɔ̃́-wɔ̃́ kè kpéɔ̀ ɓɛ́ ɔ ké à gbo kpá ɓɛ́ à ké ɖɛ hwòɖò kùìn nyɛ.—Àzé. 30:18; 41:10; Ðúù 11:13.
5. Xwɛ̀ ɓaà-ɓaà ɓɛ́ìn à gìɖìi nyíɛ kɛ́? (Àzédyà 26:3)
5 Baɓoɔ cɛ̃ɛ kà ɓɛ́ à dyi ɓaà kóɖó-kóɖó ɓá à hwòɖò-kpɔ̃-ɖɛ̀ ɓèɔ̀ jè dyí ní, nìí, “Geɖepɔɔ gìɖìi kɔ̃̀ jè nyɔùn-dyù seà múin ɓɛ́ìn nyɛɛ mú [à] hwòɖò-dyùàɔ̀ kè [à] fɔ̀nɔ̀-hwòɖòɔ̀ gbo kpáùn, ɓɛ́ ɔ ké wa dyí gmɔ̀” kɛ. (Fèɖ. 4:7) Poìn ɖɛ mɔ̀ ɔ xwíníín nyɛɛ jè hwìɖìi. Nyɔ ɓè ɓɛ́ wa seà Jɛhova ɓièɛ̀n nì kɛɛ ɓɛ́ìn ti-kàmàùn-kàmàùn ɓè dyí dyéɛ, ké wa ɓɛ́ìn vɔ̃ɔ ɖé hwìè kò-kò ɓè mú ɓɛ́ wa ké gìɖìi ɓéɖé. Ɔ hwɔìn-kà, nyɔ ɖíɛ́ ɓè nyùìn ɖɛ-hwìɖìi-nàìn-nàìnɔ̀ dú ɖò kũ̀à mú, ɓɛ́ wa ké hwìɖìi-poìn-ɖɛ̀ séín ɖé wa hwòɖòɔ̀ bũ̀ zà, ɓɛ́ wa ké gìɖìi ɓéɖé. Ðɛ séín ɖé nyɔ hwòɖòɔ̀ bũ̀ zà-zà po nyɔ nàdì mú ɖé zùùn. (Poɛ̀n kè Máfíò 12:43-45 dyí.) Ké ɖeɛɛ, gìɖìi ɓɛ́ Jɛhova nyí à ɔ jù ké à dyi ɓaà níɛɛ kpa ɖɛ ké ɔ zi gìɖìi séín ɖò ɓɛ́ nyɔ ɖò ɓɛ́ìn vɔ̃ɔ ɓɛ́ ɔ ké ɓéɖé dyììn ɖé ɖɛ-hwìɖìi-nàìn-nàìn nì kà ɓèa múɛɛ dyí vɛ̃in. À dyi Jɛhova ɓaà ní, à tɛ̀mɛ̀ìn kà à dè ɔ hwòɖò kɔ̃ gàná cá kɛ, ké ɔ muɛ nyuùn ɓɛ́ à ké “gìɖìi ɓéɖé kánáá pu.” (Zà Àzédyà 26:3 wuɖuún.) Hwìè ɖò kɔ̃̀ mú ɓɛ́ Jɛhova nyí à gìɖìiɛɛ mɔ̀, dyììn ɖé à gbo-kpá-kpá mú ɓɛ́ à ké jàà ɓè à ɖà cɛ̃́ sɔ̀ìn ɖé ɔ Wuɖuɔ̀ múɛɛ jè hwìɖìi dyà. Jàà ɓè nìà wɛ nyuɛ ké à hwòɖò dè dyi, sepoɛɖe à dyuòɛ̀ dyí kà ɓɛ́ Jɛhova kɔ̃̀ ɖé à jè gbo, ké ɔ mɔ́ ɓɛ́ à nyuu-ɖɛ̀ ké mú wóɖóɛ.—Wɛ́ɖɛ́ 62:1, 2.
6. Xwɛ̀ m̀ ɓɛ́ìn nyíí-ɖɛ̀ mɔ̀à ɓaà-ɓaà kɛɛ kpáná kɔ̃ún dyéɛ mìɔ kɛ́? (Dyé dyi-dyé-ɖɛ̀ɔ̀ ɖekè.)
6 Ðɛ m̀ ɓɛ́ìn nyuɛ kɛ. Kà nì muà mú-dɔ̃̀-dɔ̃̀ ɓè hwòɖò kùìn nyɛɛ, m̀ mɛ “nyí nì fũ̀à-fṹá-ɖɛ̀ ɓèɔ̀ [Jɛhova] xwa,” ké m̀ mɛ ɓaà ɓó gìɖìi jè. (Wɛ́ɖɛ́ 55:22) Ɓaà ɖekè ɓɛ́ m̀ ké fɔ̀nɔ̀-hwòɖò ɓéɖé ɓɛ́ m̀ ké nì fũ̀à-fṹá-ɖɛ̀ ɓèɔ̀ kpɔ̃-kà dyuò. (Nɔ́ɔ́ 2:10, 11) Kà nì muà ɓaàùn ɓó ɖɛ hwòɖò kùìn jèɛɛ, m̀ mɛ po Geɖepɔɔ zuò ɖekè ɖé nì ɓaà-wùɖùɔ̀ mú. (Fèɖ. 4:6) Vɔ̃ ɓɛ́ m̀ ké gbo-kpá-kpá ɓè ɓɛ́ Jɛhova nì m̀ nyíɛń ɖé nì mú-dɔ̃̀-dɔ̃̀ɔ̀ múɛɛ dyé, ɓɛ́ m̀ ké ɔ zùo po. Ɓɔ́ wɔ̃́ɔ ɓɛ́ nì mú-dɔ̃̀-dɔ̃̀ɔ̀ kéɛ nyu ɓɛ́ m̀ ké mana ɓè ɓɛ́ m̀ ɖà dyé nɔ̀ɔ̀ kɛɛ dyéɖé kɔ̃in wã̀ìn.—Wɛ́ɖɛ́ 16:5, 6.
M̀ dyi ɓaà ní, m̀ wùɖù Jɛhova gbo. M̀ dyi Baɓoɔ wuɖuún zà ní, Jɛhova wùɖù m̀ gbo (Dyé zaìn-kɔ̃in 6)b
GEÐEPƆƆ WUÐUƆ̀
7. Xwɛ̀ Baɓoɔ cɛ̃́-cɛ̃́ ɓɛ́ìn à gbo kpáa ɓɛ́ à ké ɖɛ hwòɖò kùìn nyɛ́?
7 Jɛhova ɖà ɔ Wuɖuɔ̀ à nyí ɓɛ́ ɔ ké à gbo kpá ɓɛ́ à ké ɖɛ hwòɖò kùìn. Baɓoɔ dà pàɖà ɓè cɛ̃ɛ à gbo kà ɓɛ́ Jɛhova mu à gbo kpáùn wɛ̃. Poìn ɔ hwɔìn-ɖɛ̀ dyúáɖò jè hwìɖìi. Máfíò 6:8 ɖá: “Ɓè Ɓàɔ̀ dyuò ɖɛ ɓɛ́ ɓè kɔ̃̀ ɓè ké dyé kɛɛ dyí kĩ́ín, hwɛ̀ ké ɓè zɔ̀à kɛ̀.” Jizɛ mɔ̀ nyɔ cɛ̃ ma wuɖu ɓèa, ké ɔ dyuò Jɛhova dyí mìɔ ké ɔ zi nyɔ séín ɖò dyí. Ɔ jèɛɛ, à kɔ̃̀ à kéɛ hwòɖò kɔ̃ dè kóɖó-kóɖó kà ɓɛ́ Jɛhova mu à jè gbo kɔ̃̀ùn ɖé ti-kàmàùn-kàmàùn ɓè múɛ. Nyɔ-kpéí-po-wùɖù nì kà ɓèa pàɖà nì ɖé Baɓoɔ mú, ké wa ɓɛ́ìn à gbo kpáa ɓɛ́ à ké ɖɛ hwòɖò kùìn kánáá pu.—Wɛ́ɖɛ́ 94:19.
8. (a) Cɛ̃ Baɓo hwìè-da-zàìn-wùɖù ɖò ɓɛ́ ɔ ɓɛ́ìn à gbo kpáa ɓɛ́ à ké ɖɛ hwòɖò kùìn nyɛɛ jè. (b) Ðɛ́ ɓɛ́ìn à gbo kpáa ɓɛ́ Baɓo hwìè-da-zàìn-wùɖù ɓè ké à hwìɖìi dyi ti à mu wa mɔ́ùn wɛ̃́?
8 Baɓo hwìè-da-zàìn-wùɖù ɓè ɓɛ́ìn à gbo kpáa ɓɛ́ à ké ɖɛ hwòɖò kùìn. Ké jɛ́ɛ́ kɛɛ, ɔ ɓéɖé fɔ̀nɔ̀-hwòɖò ɓè ɓɛ́ wa ɓɛ́ìn à gbo kpáa ɓɛ́ à ké ɖɛ nɔ̀mɔ̀ dyíin ɓè gbɔ poɛ. (Nɔ́ɔ́ 2:6, 7) Ɔ hwɔìn-kà, Baɓoɔ po à kpéí ɓɛ́ à ké zɛ̃̀ɛ̀ jè hwìɖìi poìn, ɓɛ́ à ké se ɖɛ mu kpáùn mɔɔ ɖɛ se kpáa mu gàɖàà kɛɛ jè hwòɖò dyií gbàìn. (Máf. 6:34) Ɔ jù ké Baɓoɔ wuɖuún-zà-zà kèɛ̀ jè hwìɖìi-nàìn-nàìn dyi à nyuu-ɖɛ̀ jù tee ní, à mu hwìè-da-zàìn-wùɖù ɓè hwìɖìi dyàà ɓɛ́ìn ɓó ti jɛ́ɛ́ ɓè ɓɛ́ à mu wa mɔ́ùn wɛ̃.
9. Xwɛ̀ Baɓo-nɔ̀ɔ̀ ɓè nyu à gbo kpáa ɓɛ́ à ké Jɛhova hwòɖò kɔ̃ dè mìɔ kɛ́?
9 Baɓoɔ ɓéɖé jàà-nɔ̀ɔ̀ ɓè ɓá nyɔ ɓè ɓɛ́ wa dè ma Jɛhova hwòɖò kɔ̃ ké ɔ kpá ma wa gboɛɛ jè dyí ɖekè. (Híì. 11:32-34; Jĩ́ìn 5:17) À dyi nɔ́ɔ́ nì kà ɓèa jè hwìɖìi nàìn ní, ɔ muɛ nyuùn ɓɛ́ à kéɛ hwòɖò kɔ̃ dè kà ɓɛ́ Jɛhova mɔ̀ “à pèɖèìn-naín, ké ɔ mɔ̀ à kpé-nyí-nyɔ̀,” ké “ti séín ɓɛ́ fũ̀à-fṹá-ɖɛ̀ ɖò dyi à kɔ̃ɛɛ, ɔ dyé ti ɓɛ́ ɔ ké à gbo kpá” kɛ. (Wɛ́ɖɛ́ 46:1) À dyi Jɛhovaa jàà ɓiè-nyɔ̀ ɓè nì ma ɖé ti sùà múɛɛ dyéɖé gbo dè ní, ɔ muɛ nyuùn ɓɛ́ à ké waà hwìɖìi-taɓa-taɓaɔ̀ kè waà ɖɛ-hwòɖò-kùìn-kùìnɔ̀ dyéìn.—Jĩ́ìn 5:10, 11.
10. Xwɛ̀ m̀ ɓɛ́ìn nyíí-ɖɛ̀ mɔ̀à Geɖepɔɔ Wuɖuɔ̀ kɛɛ kpáná kɔ̃ún dyéɛ mìɔ kɛ́?
10 Ðɛ m̀ ɓɛ́ìn nyuɛ kɛ. Zà Baɓoɔ wuɖuún wé séín, ké tã́ vɔ̀sì ɓè ɓɛ́ nì hwòɖò ɖá wa ɓɛ́ìn m̀ gbo kpáa jɛ́ɛ́ kɛɛ ɓíɖíi. Nyɔ pàɖà ɖàa dyé ɖekè kà ɓɛ́ wé séínɛ̀ vɔ̀sìɔ̀ wuɖuún-zà-zà kpá wa gbo ɓɛ́ wa ké nyɔ-kpéí-po-ɖɛ̀ ɖò sɔ̀ìn ɖé Baɓoɔ múɛɛ jè hwìɖìi poìn ɓó wéa ɓaɖa kɛ. Ðíí-màà ɖò kɔ̃̀ nyɛ́nɛ́ mɔ̀ Mawíɖía kɛɛ po ma ɖɛ nìà kɛ jè jàà ti ɔ wóɖóìn-nyɔ̀ ɓèɔ̀ ɓéɖé ma kĩ́ásɔ̀-wɛ̀ kɛ. Ðɛ́ kpá ma ɔ gbo ɓɛ́ ɔ ké ma ɖɛ hwòɖò kùìn ɓó dɛ̀nɛ̀ ɓè kɔ̃̀ xwíníín ɔ gmɔ̀ ma ɔ wóɖóìn-nyɔ̀ ɓèɔ̀ gbo hwɛ̀ wa dyi ma mɛ́ kɛ́? Ɔ ɖá, “M̀ zà ma vɔ̀sì sɔ̀àìn ɖé Baɓoɔ Múin-Gmɔìn-Gmɔìn Wé Séín nyɛ múɛɛ wuɖuún, ké ḿ nàìn ma hwìɖìi. Ðɛ nìà kɛ nyu-nyu nyuɛ ma ké ḿ poìn ma Baɓo vɔ̀sì ɓè jè hwìɖìi, ké ɔ kpá ma ḿ gbo ɓɛ́ ḿ ké ma zùùn-ɖɛ̀ ɓè hwòɖò gbo po mìɔ, ké ɔ se ma ḿ mìɔùn kè fũ̀à-fṹá ɓɛ́ ḿ nì ma mú mùɛ̀n nyɛ.”—Wɛ́ɖɛ́ 61:2.
MÙÈ JÀÀ-PO-NYƆ̀ ƁÈ
11. Xwíníín nyɛ́ kɔ̃̀ jè ɔ poà à kpéí ɓɛ́ à kéà dyí dyuò kà à ɖòùn se fũ̀à-fṹá-ɖɛ̀ ɓè hwòɖò kùɛ̀n nì kɛ́?
11 Jɛhova nyuɛ ké à nì à ɖíí Kɛ́ɖɛ́ì ɖeín-sí-nyɔ̀ ɓè hwìɛ̀, ɓɛ́ wa ké à gbo kpá ɓɛ́ à ké ɖɛ hwòɖò kùìn. Sepoɛɖe à dyuòɛ̀ dyí kà à “ɖíí Kɛ́ɖɛ́ì ɖeín-sí-nyɔ̀ ɓè nìà ɓóɖó-kpàà dà séín nyɛɛ nì gà-dyé-dyé dyúáɖòɔ̀ mú mùɛ̀n nyɛ” jèɛɛ, ɔ nyuɛ ké à dyuòɛ̀ dyí kà à ɖòùn se gà dyéɛń nìɛ. (1 Píɖɛ̀ 5:9) À dyuòɛ̀ dyí jɛ́ɛ́ kà ɓɛ́ fũ̀à-fṹá-ɖɛ̀ séín ɖò ɓɛ́ à dyé dyíɛɛ, nyɔ tɔ̀ɔ̀ ɓè mɔ̀ùn ɖà ɖɛ dyúáɖò ɓèa dyí dyé, ké wa ɖàa hwòɖò kùìn nyɛ. Ɔ xwíníín mɔ̀, à mɔ̀ùn ɓɛ́ìn ɖɛ hwòɖò kùɛ̀n ɖekè!—Àpɔ́. 14:22.
12. Xwɛ̀ à ɖíí jàà-po-nyɔ̀ ɓè ɓɛ́ìn à gbo kpáa kɛ́, ké ɖɛ́ à ɓɛ́ìn wa mɔ̀ùn bìì nyuɛ kɛ́? (2 Kɔ̀ɖéíntĩ̀ɔ̀ 1:3, 4)
12 À ɖíí jàà-po-nyɔ̀ ɓè ɓɛ́ìn à kpéí poɛ kà à muà ɖɛ hwòɖò kùìn nyɛ. Ðɛ nìà kɛ kpá ma jàà ɓó àpɔ́sò Pɔ́ɔ̀ bìì. Ɔ po ma nyɔ ɓè ɓɛ́ wa kpá ma ɔ gbo ti ɔ nì ma kpɔɖɔ ɖeín nyɛɛ zùo kpɛ́-kpɛ́, ké ɔ ɖá ma wa nyɛ́nɛ́. Wa nyí ma Pɔ́ɔ̀ hwòɖò-dyi-dè-dè kè kpéí-po-po ɔ kè gbo-kpá-kpá. (Fèɖ. 2:25, 29, 30; Kɔ̀ɖ. 4:10, 11) À ɓɛ́ìn ɖɛ dyúáɖòɔ̀ dyí dyéɛ zɛ̃̀ɛ̀. À dyi gbo-kpá-kpá mɔ́ ɓɛ́ à ké ɖɛ hwòɖò kùìn ní, à ɖíí ɓèɔ̀ kpɔ̃̀ìn ɓó à gbo; ké wa mɔ̀ùn dyi gbo-kpá-kpá mɔ́ ní, à dyàìn wa sɔ̃ tɛ̃̀ìn dyi ɖekè.—Zà 2 Kɔ̀ɖéíntĩ̀ɔ̀ 1:3, 4 wuɖuún.
13. Ðɛ́ kpá ma ɖíí-màà ɖò kɔ̃̀ nyɛ́nɛ́ mɔ̀ Mádyà kɛɛ gbo ɓɛ́ ɔ ké ma ɖɛ hwòɖò kùìn nyɛ́?
13 Ðíí ɓèɔ̀ po ma ɖíí-màà ɖò sɔ̀ìn ɖé Wɔ́ɖɔ́sìà-ɓòɖòɔ̀ kɔ̃ kɔ̃̀ nyɛ́nɛ́ mɔ̀ Mádyà kɛɛ kpéí. Wa gmɔìn ma ɔ ɓíɖí taàɔ̀ múin ɖé 2020 xwíníín, ké wa kpa ma ɔ kótì ɓó ɔ hwìɖìi-taɓa-ɖɛ̀ ɓèɔ̀ nyɔ tɔ̀ɔ̀ ɓè gbo cɛ̃ jè. Mádyà ɖá, “Ti nì hwòɖò kpá ma ɖé ɖei ɓó ti ɖò ɓaɖaa, ɖíí-gàà kè ɖíí-màà ɓèɔ̀ ɖá ma ḿ, ké wa céè ma ḿ gbo, ké wa cɛ̃ɛ ma ḿ gbo kà wa ɖɛ̀ɓɛ̀ ḿ múɛ. Ḿ dyuòɛ̀ ma dyí tee kà ḿ ɓéɖé ma ɖɛ̀ɓɛ̀ìn-ɖɛ̀ɓɛ̀ìn-xwèɖè-dù vɛ̀nɛ̀ ɖòɛ. Ḿ ɖà ɖɛ nìà kɛ múin wɔ̃́ jɛ́ɛ́ sɔ̀ìn zɔ̃ mɔ̀à 2020 kɛɛ gbo.”
14. Xwɛ̀ à ɓɛ́ìn à ɖíí jàà-po-nyɔ̀ ɓèɛ̀ gbo-kpá-sɔ̃̀ kpáná kɔ̃ún dyéɛ ɔ jù ké à dyi fũ̀à-fṹá-ɖɛ̀ ɖò hwòɖò kùɛ̀n nììn nyɛ́? (Dyé dyi-dyé-ɖɛ̀ɔ̀ ɖekè.)
14 Ðɛ m̀ ɓɛ́ìn nyuɛ kɛ. Kà nì muà ɖɛ hwòɖò kùìn nyɛɛ, m̀ mɛ nì ɖíí Kɛ́ɖɛ́ì ɖeín-sí-nyɔ̀ ɓèɔ̀ hwìɛ̀. Ɓɔ́ fã̀à peɖeɛ ɓó ɛ́ɖɔ̀ ɓèɔ̀ gbo-kpá-sɔ̃̀ zɔ̀ìn jè. Wa ɓɛ́ìn nìɛ̀ “kà pìɔ̀-dyí-zĩ̀ìn-ɖɛ̀ nìà kɛ,” ké wa ɓɛ́ìn nìɛ̀ “kà dìì-pèɖèìn-naín nìà kɛ.” (Àzé. 32:2) Ɔ mɛ nì m̀ hwìɖìi ɖekè kà ɓɛ́ nì ɖíí Kɛ́ɖɛ́ì ɖeín-sí-nyɔ̀ ɓèɔ̀ nì ti-kàmàùn-kàmàùn ɓè hwòɖò kùɛ̀n ɖekèɛ. Nyɔ ɖò ɓɛ́ ɔ mɔ́ gbo-kpá-kpá kɛɛ jĩ́á-jè dyí-nyu-nyu mu m̀ gbo kpáùn, ɓɛ́ nì hwòɖò ké dyi dè, kè ɓɛ́ m̀ ké ɖɛín-ɖɛ̀ jè hwìɖìi poìn kà nì muà m̀ mìɔùn nììn fũ̀à-fṹá-ɖɛ̀ ɓèɔ̀ hwòɖò kùɛ̀n nììn nyɛ.—Àpɔ́. 20:35.
Xwɛ̃́ìn nì ɖíí Kɛ́ɖɛ́ì ɖeín-sí-nyɔ̀ ɓèɔ̀ bũ̀in kánáá pu (Dyé zaìn-kɔ̃in 14)c
À HWÒÐÒ-KƆ̃-DÈ-ÐƐ̀ ƁÈƆ̀
15. Ðɛ́ hwòɖò-kɔ̃-dè-ɖɛ̀ ɖà nyu ɓó jàà-nyɔ̀ ɓè ɓɛ́ wa ɖò mɔ̀à Jizɛ kɛɛ bììɛ́? (Híìbúɖúù 12:2)
15 Jɛhova ɖà à hwòɖò-kɔ̃-dè-ɖɛ̀ ɖò nyí ɓɛ́ ɔ ké à gbo kpá, ɓɛ́ à ké ɖɛ hwòɖò kùìn. (Wóɖ. 15:13) Poìn kà hwòɖò-kɔ̃-dè-ɖɛ̀ nyu ma Jizɛ gbo kpáa ɓɛ́ ɔ ké ma ti-kàmàùn-kàmàùn ku wɔ̃ ɖò hwòɖò kùìn ɖé ɔ cĩ́-cĩ́ɔ̀ mú dà ɓóɖó-kpàà kɔ̃ɛɛ jè hwìɖìi. (Zà Híìbúɖúù 12:2 wuɖuún.) Jizɛ dyuòɛ̀ ma dyí kà ɓɛ́ ɔ dyi ma jààɔ̀ jè gboi kpɔ̃ ní, ɔ muɛ ma nyuùn ɓɛ́ Jɛhovaa nyɛ́nɛ́ɔ̀ ké ma dya-dè-dè ɓéɖéɛ. Jizɛ dèɛ̀ ma hwòɖò kɔ̃ ɖekè kà ɓɛ́ ɔ kè ɔ Ɓà mu ma dà dyúáɖò nììn ɖeɛ, ké ɔ dèɛ̀ ma hwòɖò kɔ̃ ɖe kà ɓɛ́ ɔ kè ɔ ɖíí ɓèɔ̀ mu ma Kã́á-ɓòɖòɔ̀ nàìn ɖé dyɔún wɛ̃. Kà dyúáɖòɔ̀ kàà, à hwòɖò-kɔ̃-dè-ɖɛ̀ ɓáà sè-ná-sèɛ̀ fɛ̀ɛ̀ jè dyí ɖé Geɖepɔɔ ɓóɖó ɖìèɔ̀ múɛɛ ɓɛ́ìn à gbo kpáa, ɓɛ́ à ké ti-kàmàùn-kàmàùn séín ɖò ɓɛ́ ɓóɖó-kpà ɓɛ́ Sétɔ̃̀ kɔ̃̀à wuɖuíɛ dyà à kɔ̃ɛɛ hwòɖò kùìn.
16. Xwɛ̀ hwòɖò-kɔ̃-dè-ɖɛ̀ nyu ma ɖíí-màà ɖò gbo kpáa ɓɛ́ ɔ ké ma ɖɛ hwòɖò kùìn nyɛ́, ké ɖɛ́ m̀ cɛ̃́ sɔ̀ìn ɖé ɖɛ ɔ cɛ̃à kɛ múɛ́?
16 Poìn kà hwòɖò-kɔ̃-dè-ɖɛ̀ ɓáà Kã́á-ɓòɖòɔ̀ jè dyíɛ nyu ma ɖíí-màà ɖò sɔ̀ìn ɖé Wɔ́ɖɔ́sìà-ɓòɖòɔ̀ kɔ̃ kɔ̃̀ nyɛ́nɛ́ mɔ̀ Aɖá kɛ gbo kpáa kɛɛ jè hwìɖìi. Wa kpɔ̃ ma ɔ dyú-ɓàɔ̀, ké wa po ma ɔ kpɔɖɔ ɖeín. Ti ɖɛ nìà kɛ kpá ma kɛɛ, Aɖá cɛ̃ɛ ma, ké ɔ ɖá: “À hwòɖò-kɔ̃-dè-ɖɛ̀ ɓèɔ̀ jè ɓaà-ɓaà kè wa jè hwìɖìi-nàìn-nàìn nyuɛ ké ní hwòɖò se ma ɖé ɖei kpá mìɔ. Ḿ dyuòɛ̀ kà ɖɛ nɔ̀mɔ̀ dyíin ɓè nì ɖé dyúa kɛ. Jɛhova mu toɔ̀ ɖuùn, ké à mu mana dyéìn.”
17. Xwɛ̀ à ɓɛ́ìn zùo-po-hwòɖò tɛ̀mɛ̀ìn ɓó à hwòɖò-kɔ̃-dè-ɖɛ̀ ɓèɔ̀ jè kɛ́? (Dyé dyi-dyé-ɖɛ̀ɔ̀ ɖekè.)
17 Ðɛ m̀ ɓɛ́ìn nyuɛ kɛ. Ðú ti dyí, ɓɛ́ m̀ ké dĩ́ín-dĩ̀ìn-ɖɛ̀ ɓè ɓɛ́ Jɛhova ɖàà nyɛ́nɛ́ ɖá kɛɛ jè hwìɖìi poìn. Nàìn Geɖepɔɔ ɓóɖó ɖìèɔ̀ kè mana ɓè ɓɛ́ à mu dyéìn nyɛɛ jè hwìɖìi. Nìí, fũ̀à-fṹá-ɖɛ̀ séín ɖò ɓɛ́ à nì dyí dyéɛń kàùn wɛ̃ɛ mu nììn kà ɖɛ “fɛ̃̀ìn xwa” ɓɛ́ ɔ se hwèɖèɛ̀n muɛɛ nìà kɛ. (2 Kɔ̀. 4:17) Ké ɖeɛɛ, nyu ɖɛ m̀ ɓɛ́ìn nyuɛ kɛ, ɓɛ́ m̀ ké nì hwìɖìi-taɓa-ɖɛ̀ ɓèɔ̀ jè nyɔ tɔ̀ɔ̀ ɓè gbo cɛ̃. Wa nì ti-kàmàùn-kàmàùn ɓè dyí dyéɛń ɖé ɓóɖó-kpà nìà kɛ kɔ̃, ké wa se Geɖepɔɔ hwòɖòɛ̀-gbɔ-po-ɖɛ̀ ɓó ɖé dyúa bììɛɛ dyí dyuò. Nàìn kà ɔ nyu nìɛ̀ ɓó wa bììɛɛ jè hwìɖìi. M̀ ɓɛ́ìn nyuɛ ɓɛ́ wa ké hwòɖò-kɔ̃-dè-ɖɛ̀ ɓáà Kã́á-ɓòɖòɔ̀ jè dyíɛɛ jè múàùn dyi kpáìn, dyììn ɖé wa dɔ́ɔ́ xwã́-xwã́ ɖò wa gbo dè-dè mú ɖòùn.
Ðú ti dyí, ɓɛ́ m̀ ké dĩ́í-dĩ̀ìn-ɖɛ̀ ɓè ɓɛ́ Jɛhova ɖàà nyɛ́nɛ́ ɖá kɛɛ jè hwìɖìi poìn (Dyé zaìn-kɔ̃in 17)d
18. Xwíníínɔ̀ nyɛ́ kɔ̃̀ jè à ɓɛ́àìn Jɛhovaa nyɛ́nɛ́ìn-ɖáìn-ɖɛ̀ ɓèɔ̀ hwòɖò kɔ̃ dèɛ̀ kɛ́?
18 Ti ɓɛ́ Jóɓò ɖà ma mú-dɔ̃̀-dɔ̃̀ pàɖà ɓè hwòɖò kùìn nyɛɛ, ɔ cɛ̃ɛ ma Jɛhova gbo, ké ɔ ɖá: “Ḿ dyuòɛ̀ dyí kà m̀ ɓɛ́ìn ɖɛ séín nyuɛ kɛ, ké kà nyɔ ɖò se ɖɛ m̀ ɖà dyí sɔ́ ɓɛ́ m̀ ké nyuɛɛ ɓɔ́í poɛ ɓɛ́ìn nyɛ.” (Jóɓò 42:2) Jóɓò cɛ̃́ɛ ma kà ɓɛ́ ɖɛ ɖò se Jɛhovaa hwòɖòɛ̀-gbɔ-po-ɖɛ̀ ɖò jàà-kpá-kpá ɓɔ́í poɛ ɓɛ́ìn nyɛ. Jàà nìà kɛ ɓɛ́ìn à dyi kùɛ̀n, ɓɛ́ à ké ɖɛ hwòɖò kùìn. Ɓèà poɛ̀n kè ɖɛ ɖò dyí. Nàìn hwìɖìi kà màa ɖò nì wɛ́ɛń, ké ɔ hwòɖò kpá ɖé ɖei, sepoɛɖe hwòo-nyɔ̀ pàɖà ɓè se ɔ dyi kánáìn ɓɛ́ìn jèɛ. Kɛɛ, hwòo-nyɔ̀ ɖò ɓɛ́ ɔ ɖà kũ̀àɔ̀ nyuɛń hwèɖèìn, ké ɔ mɔ̀ hwòɖò-kɔ̃-dè-nyɔ̀ kɛɛ dyé fũ̀à-fṹáɔ̀ da, ké ɔ zaìn màaɔ̀ gbo kɔ̃in kà ɔ mu ɔ wɛ́ɔ̀ dyi kánáìn nyɛ. Ti goun mu ziìn hwɛ̀ ɔ ké dyi káná dyɛo, kɛɛ ɔ hwòɖò dè dyi. Ɔ ɓɛ́àìn ɖɛ hwòɖò kùɛ̀n, sepoɛɖe ɔ dyuò dyí kà ɓɛ́ hwòɖò-kɔ̃-dè-ɖɛ̀ ɖò nì ɓó ɔ bììɛ—ɔ dèɛ̀ hwòɖò kɔ̃ kà ɔ mu dyi kánáùn wɛ̃. Kà dyúáɖòɔ̀ kàà à dyi Páɖédà muà dyiìn nyɛɛ hwòɖò kɔ̃ dè kóɖó-kóɖó ní, ɔ mu à gbo kpáùn ɓɛ́ à ké ɖɛ hwòɖò kùìn.
19. Ðɛ́ à mɔ́ ɓɛ́ à ké ɖɛ hwòɖò kùɛ̀n ɓɛ́ìn nyɛ́?
19 À ɖàa dyé kà ɓɛ́ Jɛhova kpá à gbo ɓɛ́ à ké à fũ̀à-fṹá-ɖɛ̀ ɓèɔ̀ hwòɖò kùìn dyììn ɖé ɓaà-ɓaà kè ɔ Wuɖuɔ̀ kè à ɖíí jàà-po-nyɔ̀ ɓè ɔ kè à hwòɖò-kɔ̃-dè-ɖɛ̀ ɓèɔ̀ múɛ. Ɔ jù ké à dyi nyíí-ɖɛ̀ ɓè nìà kɛ kũ̀à mú nyùìn nɔ̀mɔ̀ dyíin ní, nìí, Jɛhova mu à gbo kpáùn ɖé fũ̀à-fṹá-ɖɛ̀ séín ɖò ɓɛ́ à mu dyí dyéìn hwɛ̀ ɓɛ́ ti-kàmàùn-kàmàùn ɓè nìà ɓóɖó-kpàà kɔ̃ɛ ké dyi ziɛɛ mú.—Fèɖ. 4:13.
WƐ́ÐƐ́ 33 Throw Your Burden on Jehovah
a Nyɛ́nɛ́ ɖíɛ́ ɓè ɖà gbo zĩàìn ɖé cɛ̃́ɛ́-ɖɛ̀ nìà kɛ mú.
b DYI-DYÉ-ÐƐ̀ MƐ-DÈ-DÈ: Ðíí-gàà ɖò mɔ̀ nyɔ sùà kɛɛ kpɔ̃ Jɛhova jè gboi kánáá pu, ké ɔ nì ɖɛ hwòɖò kùɛ̀n sɔ̀ìn ti gbo mu ti gboɛ.
c DYI-DYÉ-ÐƐ̀ MƐ-DÈ-DÈ: Ðíí-gàà ɖò mɔ̀ nyɔ sùà kɛɛ kpɔ̃ Jɛhova jè gboi kánáá pu, ké ɔ nì ɖɛ hwòɖò kùɛ̀n sɔ̀ìn ti gbo mu ti gboɛ.
d DYI-DYÉ-ÐƐ̀ MƐ-DÈ-DÈ: Ðíí-gàà ɖò mɔ̀ nyɔ sùà kɛɛ kpɔ̃ Jɛhova jè gboi kánáá pu, ké ɔ nì ɖɛ hwòɖò kùɛ̀n sɔ̀ìn ti gbo mu ti gboɛ.