Po Jɛhovaa Ðɛ̀ɓɛ̀ìn-Ðɛ̀ɓɛ̀ìnɔ̀ Jè Jàà

1. Xwíníínɔ̀ nyɛ́ kɔ̃̀ jè m̀ zàà m̀ mìɔùn xwáɖáún ɖé Jɛhova gbo kɛ́? (Dyé dyi-dyé-ɖɛ̀ɔ̀ ɖekè.)

TI M̀ zà ma m̀ mìɔùn xwáɖáún ɖé Jɛhova gboɛ jè nì m̀ hwìɖìiì? M̀ po ma ɖɛ nìà wɛ gbɔ, sepoɛɖe m̀ dyuò ma ɔ dyí, ké m̀ ɖɛ̀ɓɛ̀ ma ɔ mú jè. M̀ cɛ̃ɛ ma kà ɓɛ́ nì mu ɔ mɔ́ɔ́-ɖɛ̀ poùn kĩ́ín ɖé nì cĩ́-cĩ́ɔ̀ mú, ké nì mu ɔ mú ɖɛ̀ɓɛ̀ìn hwòɖòɛ̀-ɖé-hwɛ̀-kà teeɛ. (Máà 12:30) Sɔ̀ìn ɓó tia gboɛɛ, nì ɖɛ̀ɓɛ̀ìn-ɖɛ̀ɓɛ̀ìn ɓó ɔ bììɛɛ ɖà kɔ̃ kpá mìɔ cá. Nìí, ɔ jù ké nyɔ ɖò dyi m̀ dyi die, ké ɔ dyi níiń, “M̀ ɖɛ̀ɓɛ̀ Jɛhova mú cáà” ní, xwɛ̀ nì mu ɔ gɔ̃̀ jùùn wɛ̃́? Nì muɛ cɛ̃ìn wàɖà, ɓɛ́ m̀ ké níiń, “Ḿ ɖɛ̀ɓɛ̀ ɔ mú ké ɔ zi nyɔ séín ɖò mɔɔ ɖɛ séín ɖò dyí!”

2-3. Ðɛ́ Jɛhova mɔ́ ɓɛ́ à ké jàà po kɛ́, ké ɖɛ́ à mu dɔ́ɔ́ kɔ̃in dèìn ɖé cɛ̃́ɛ́-ɖɛ̀ nìà kɛ múɛ́? (Jɛ̀ɖèmádyà 31:3)

² Ɔ jù ké nyɔ ɖò dyi m̀ dyi diè, ké ɔ dyi níiń, “Jɛhova ɖɛ̀ɓɛ̀ m̀ mú cáà” ní, xwɛ̀ nì mu ɔ gɔ̃̀ jùùn wɛ̃́? Nì mu fɛ̃̀ìn ɓɛ́ m̀ ké ɔ gɔ̃̀ jùù, sepoɛɖe m̀ poɛ̀n dyɛ̀ hwìɖìi kà ɓɛ́ m̀ se ɖɛ kpa ɓó ɔ ɖɛ̀ɓɛ̀ìn-ɖɛ̀ɓɛ̀ìnɔ̀ jèɛɛ̀? Ðíí-màà ɖò ɓɛ́ ɔ dyé ma fũ̀à-fṹá dyí ti ɔ nì ma ɓíɖíi wóɖóɛń nyɛɛ ɖá: “Ḿ dyuòɛ̀ dyí kà ɓɛ́ ḿ ɖɛ̀ɓɛ̀ Jɛhova múɛ. Ḿ dyuòɛ̀ náa dyí jɛ́ɛ́ cá. Kɛɛ, ɖɛ ḿ poìn jè hwìɖìi kpɛ́-kpɛ́ kɛɛ mɔ̀, kɛbì Jɛhova ɖɛ̀ɓɛ̀ ḿ mú ní.” Kɛɛ, xwɛ̀ Jɛhova hwòɖò nyu nìɛ̀ jɛ́ɛ́ cá ɓá m̀ jè dyíɛ́?

³ Jɛhova mɔ́ ɓɛ́ m̀ kéɛ jàà po kà ɓɛ́ ɔ ɖɛ̀ɓɛ̀ m̀ múɛ. (Zà Jɛ̀ɖèmádyà 31:3 wuɖuún.) Jàà-ɖɛ̀ɔ̀ mɔ̀, Jɛhova mɔ̀ nyɔ nyuɛ ma ké m̀ xwɛ̃́ìn ma ɔ bũ̀in. Ké ti m̀ zà ma m̀ mìɔùn xwáɖáún ɖé ɔ gbo, ké m̀ kpá ma níɔ kɛɛ, ɔ nyí ma m̀ nyíí-ɖɛ̀ zi ɖɛ kpauń ɖò—mɔ̀à ɔ ɖɛ̀ɓɛ̀ìn-ɖɛ̀ɓɛ̀ìn se sèìn-naín kɔ̃̀ɔ̀ kɛ. Ɔ xwíníín mɔ̀, ɔ ɖɛ̀ɓɛ̀ m̀ mú mìɔ, ké ɔ se m̀ dyi táà mu fɔɔ. Ðɛ̀ɓɛ̀ìn-ɖɛ̀ɓɛ̀ìn nìà wɛ nyuɛ ké ɔ gmɔ̀ ɔ jàà ɓiè-nyɔ̀ ɓè—ɓɛ́ m̀ mɔ̀à wa ɖòɛɛ dya—kà ɔ “nyɔ ɓè” nìà kɛ. (Máɖ. 3:17) Jɛhova mɔ́ ɓɛ́ m̀ ké ɔ ɖɛ̀ɓɛ̀ìn-ɖɛ̀ɓɛ̀ìnɔ̀ jè jàà po kà dyúáɖò kà àpɔ́sò Pɔ́ɔ̀ po ma ɔ ɖɛ̀ɓɛ̀ìn-ɖɛ̀ɓɛ̀ìnɔ jè jàà kɛ. Pɔ́ɔ̀ céèɛ̀ ma, ké ɔ ɖá: “Ḿ dyuòɛ̀ dyí jɛ́ɛ́ ká ɖɛ ɖò se à Geɖepɔɔ ɖɛ̀ɓɛ̀ìn-ɖɛ̀ɓɛ̀ìn nìà ɖé Kɛ́ɖɛ́ì Jizɛ mɔ̀à à Bounɓoɔ̀ kɛ múɛɛ gbo zàà ɓɛ́ìn gàná cáa. Gĩɔ kè fɛ̀ɛ̀ kè ínjà ɓèɔ̀ kè nyɔ-wuɖuí-kɔ̃̀-nyɔ̀ ɓè kè ɖɛ ɓè nì kàùn kè ɖɛ ɓè ké dyiɛ kè kpé ɓè kè ɖɛ nì ɖé dyiíɛ ɔ kè ɖɛ nì ɖé hwuɖuɛ, hwɛ̀ ḿ po níiń, ɖɛ séín ɓè ɖà ma mɛɛ ɖò, wa se à Geɖepɔɔ ɖɛ̀ɓɛ̀ìn-ɖɛ̀ɓɛ̀ìn ɓɛ́ ɔ nìà ɖé Kɛ́ɖɛ́ì Jizɛ múɛɛ gbo zàà ɓɛ́ìn.” (Wóɖ. 8:​38, 39) Ðé cɛ̃́ɛ́-ɖɛ̀ nìà kɛ múɛɛ, à mu xwíníín kɔ̃̀ jè à kɔ̃̀ à kéà jàà po cá kà ɓɛ́ Jɛhova ɖɛ̀ɓɛ̀ à múɛ, kè ɖɛ ɓɛ́ìn à gbo kpáa ɓɛ́ à kéɛ náa nyuɛɛ jè dɔ́ɔ́ kɔ̃in dèìn.

XWÍNÍÍN KƆ̃̀ JÈ À KƆ̃̀ À KÉÀ JÀÀ PO KÀ ƁƐ́ JƐHOVA ÐƐ̀ƁƐ̀ À MÚƐ

4. Xwɛ̀ à ɓɛ́ìn Sétɔ̃̀ɛ̀ sɛ́ɖɛ́-ɖɛ̀ ɓèɔ̀ ɖò gbo vɔ̃ɔ kɛ́?

⁴ À dyi Jɛhovaa ɖɛ̀ɓɛ̀ìn-ɖɛ̀ɓɛ̀ìnɔ̀ jè jàà po ní, à mu sétɔ̃̀ɛ̀ “sɛ́ɖɛ́-ɖɛ̀” ɓèɔ̀ ɖò gbo vɔ̃ɔ ɓɛ́ìn. (Ìfí. 6:11) Sétɔ̃̀ mu vɔ̃ùn ɖé hwìè séín xwíníín ɓɛ́ ɔ kéɛ nyu ɓɛ́ à ké Jɛhova ɓièɛ̀ ɓɔ́. Sétɔ̃̀ɛ̀ sɛ́ɖɛ́-ɖɛ̀ ɓèɔ̀ ɖò mɔ̀, ɔ nyuɛ ɓɛ́ nyɔ ɓè kéɛ jàà po kà ɓɛ́ Jɛhova se à mú ɖɛ̀ɓɛ̀ kɛ. Ɔ mɛ nì m̀ hwìɖìi kóɖó-kóɖó kà ɓɛ́ Sétɔ̃̀ nyùìn à kpéɛ̀-dyí-hwɛ̀-hwɛ̀ ɓèɔ̀ kũ̀à múɛ. Ɔ vɔ̃ à gbo kpɛ́-kpɛ́ ti à hwòɖò kpá ɖé ɖei ɓó ɖɛ ɓè à dyé ma dyíɛ mɔɔ fũ̀à-fṹá-ɖɛ̀ ɓè à nì dyí dyéɛń kàùn wɛ̃ɛ jèɛ, mɔɔ ɔ jù ké à dyi hwòɖò dyií gbàìn ɓá ɖé dyúa jè dyí ní. (Nɔ́ɔ́ 24:10) Sétɔ̃̀ nì kà ganìà ɖò ɓɛ́ ɔ nì nimii hwɛ̀ kpéí ɖò dyi mɔ́uń ɓɛ́ ɔ ké kpɔ̃ kɛɛ nìà kɛ. Ɔ jèɛɛ, ɔ vɔ̃ ɓɛ́ ɔ ké à kpéɛ-dyí-hwɛ̀-hwɛ̀ɔ̀ kũ̀à mú nyùìn ɓɛ́ à ké Jɛhova ɓièɛ̀ ɓɔ́. Kɛɛ, ɔ jù ké à dyiɛ jàà po tee kà ɓɛ́ Jɛhova ɖɛ̀ɓɛ̀ à múɛ ní, à mu kpé ɓɛ́ìn ɓɛ́ à ké Sétɔ̃̀ kè ɔ sɛ́ɖɛ́-ɖɛ̀ ɓèɔ̀ “gbo vɔ̃.”—1 Píɖɛ̀ 5:​8, 9; Jĩ́ìn 4:7.

5. Xwíníínɔ̀ nyɛ́ kɔ̃̀ jè à kɔ̃̀ à kéà dyí dyuò kà ɓɛ́ Jɛhova ɖɛ̀ɓɛ̀ à múɛ́?

⁵ À dyi Jɛhovaa ɖɛ̀ɓɛ̀ìn-ɖɛ̀ɓɛ̀ìnɔ̀ jè jàà po ní, à mu ɔ bũ̀in xwɛ̃́ìn ɓɛ́ìn. Xwíníínɔ̀ nyɛ́ kɔ̃̀ jè à cɛ̃à náa kɛ́? Jɛhova mɛ ma à ɓɛ́ à ké nyɔ tɔ̀ɔ̀ ɓè mú ɖɛ̀ɓɛ̀ kè ɓɛ́ wa ké à mɔ̀ùn mú ɖɛ̀ɓɛ̀ ɖekè. Nyɔ ɖò dyi à mú ɖɛ̀ɓɛ̀ ní, à mɔ́ wa mú ɖɛ̀ɓɛ̀ɛ̀ dyi ɖekè. Ɔ jèɛɛ, à dyiɛ dyí dyuò kà ɓɛ́ Jɛhova ɖɛ̀ɓɛ̀ à múɛ ní, à mu ɔ mú ɖɛ̀ɓɛ̀ìn ɖekè. (1 Jɔ̃́ɔ́ 4:19) Ké kà à mu ɔ mú ɖɛ̀ɓɛ̀ìn mìɔ kɛɛ, kàà ɔ mu à mú ɖɛ̀ɓɛ̀ìn mìɔ. Baɓoɔ cɛ̃ɛ à gbo wáɖáá, ké ɔ ɖá: “Ɓè xwɛ̃́ìn Geɖepɔɔ bũ̀in, nìí, ɔ mu ɓè mɔ̀ùn bũ̀in xwɛ̃́ìn.” (Jĩ́ìn 4:8) Nìí, xwɛ̀ à ɓɛ́ìn jàà poɛ jɛ́ɛ́ cá kà ɓɛ́ Jɛhova ɖɛ̀ɓɛ̀ à múɛ́?

ÐƐ́ ƁƐ́ÌN À GBO KPÁA ƁƐ́ À KÉ JƐHOVAA ÐƐ̀ƁƐ̀ÌN-ÐƐ̀ƁƐ̀ÌNƆ̀ JÈ JÀÀ PO KƐ́?

6. Ɓɛ́ à ké Jɛhovaa ɖɛ̀ɓɛ̀ìn-ɖɛ̀ɓɛ̀ìnɔ̀ jè jàà po ní, ɖɛ́ à mɛ ɓaà jè kɛ́?

⁶ Ku dúún ɓɛ́ m̀ ké ɖɛ jɛ́ɛ́ ɓè nyɛ́nɛ́ ɖá ɖé nì ɓaà-wùɖùɔ̀ mú. (Ðúù 18:1; Wóɖ. 12:12) Ɓaà Jɛhova kpa vò-vò ɓó wé ɖò-ɖò séín ɓaɖa ɔ jù ké ɔ dyi ná nìɛ̀ ɓɛ́ìn ní—ɓɛ́ Ɔ ké m̀ gbo kpá ɓɛ́ m̀ ké m̀ mìɔùn dya gmɔ̀ kà ɔ nyuà m̀ dya gmɔ̀ɔ̀ kɛ. Jàà kɛɛ, ɔ kàmà mú ɓɛ́ nyɔ ɓɛ́ ɔ se ɔ mìɔùn ɖɛ ɖá kɛɛ kéɛ jàà po kà ɓɛ́ Jɛhova ɖɛ̀ɓɛ̀ ɔ múɛ. Kɛɛ, ɔ mɛ nì m̀ hwìɖìi kà ɓɛ́ Jɛhova kpa ɖɛ ké ɔ zi nì hwòɖò-dyùàɔ̀ dyíɛ. (1 Jɔ̃́ɔ́ 3:​19, 20) Jɛhova dyuò m̀ dyí nɔ̀mɔ̀ dyíin ké ɔ zi m̀ mìɔùn dyí, ké ɔ dyé ɖɛ ɓè ɓɛ́ m̀ se dyéɛ ɓɛ́ìn nyɛ. (1 Sám. 16:7; 2 Ká. 6:30) Ɔ jèɛɛ, ɓɔ́ fɛ̃̀ìn ɓɛ́ m̀ ké nì “fũ̀à-fṹá-ɖɛ̀ séínɔ̀” ɔ gbo cɛ̃, ké ɓaà ɔ ɓɛ́ ɔ ké m̀ gbo kpá, ɓɛ́ m̀ ké ɔ ɖɛ̀ɓɛ̀ìn-ɖɛ̀ɓɛ̀ìnɔ̀ jè jàà po. (Wɛ́ɖɛ́ 62:8) Nìí, vɔ̃ ɓɛ́ nì ɓaà-wùɖùɔ̀ kè nì nyuu-ɖɛ̀ ké gbo muìn dyììn ɖé ɖɛ ɓè nìà kɛ nyu-nyu mú.

7-8. Xwɛ̀ wɛ́ɖɛ́-céè-nyɔ̀ nyuɛ cɛ̃ɛ kà ɓɛ́ Jɛhova ɖɛ̀ɓɛ̀ à múɛ́?

⁷ Po Jɛhova wuɖuɔ̀ jàà. Jɛhova nàìn ma gàa ɓè céè ma kà Baɓoɔ kɛ ɓɛ́ wa ké ma nyɔ ɔ jù jɛ́ɛ́ kɛɛ jè céè. Poìn kà wɛ́ɖɛ́-céè-nyɔ̀ mɔ̀à Dèɓé kɛɛ nyu ma Jɛhova mɛ dèɛ̀ nɔ̀mɔ̀ dyíin nyɛɛ jè hwìɖìi. Ɔ ɖá, “[Jɛhova] xwɛ̃́ìn nyɔ ɓè kɔ̃̀ hwòɖò kpá ɖé ɖeiɛɛ bũ̀in, ké ɔ póìn nyɔ ɓè ɓɛ́ wa se hwòɖò-po-naín ɖò kɔ̃̀ɛ.” (Wɛ́ɖɛ́ 34:18) Ɔ jù ké nì hwòɖò dyi ɖé ɖei kpá ní, m̀ ɓɛ́ìn hwìɖìi poɛ̀n kà ɓɛ́ nyɔ ɖò se ɖé nì jè gbo kɔ̃̀ɛ. Kɛɛ, Jɛhova cɛ̃ɛ kà ɓɛ́ ɓó ti ɓèà ɓaɖaa, ɔ xwɛ̃́ìn m̀ bũ̀in, sepoɛɖe ɔ dyéɛ kà m̀ mɔ́ ɔ gbo-kpá-sɔ̃̀ cá kɛ. Ðé wɛ́ɖɛ́ kà kò ɖò múɛɛ, Dèɓé cɛ̃ɛ, ké ɔ ɖá: “Po ní mícɛ̃̀ɔ̀ tɛ̀ɓɛ̀ìn.” (Wɛ́ɖɛ́ 56:8) Jɛhova dyé nì gà-dyé-dyéɔ̀ ní. Ɔ kɔ̃̀ ɖé nì jè gbo mìɔ, ké ɖɛ m̀ nìà mú mùɛ̀n nyɛɛ jè kpɔ̃ ɔ hwòɖò. Ɔ xwíníín mɔ̀, nì mícɛ̃̀ɔ̀ jè kpá ɖɛ ɖé ɔ gbo ká ní jè nyuà ɖɛ kpaa ɖé nyɔ ɖò ɓɛ́ ɔ nì dyóɖó-kpà vɛ̀nɛ̀ ɖò múin nàùn wɛ̃ gboɛɛ nìà kɛ. Wɛ́ɖɛ́ 139:3 ɖá: “M̀ [Jɛhova] dyuò ɖɛ séín ɓá ḿ dyíɛɛ dyí.” Jɛhova dyé ɖɛ séín ɓá m̀ dyíɛ, kɛɛ ɖɛ nɔ̀mɔ̀ dyíin ɓè ɓɛ́ m̀ nyuɛɛ, wa ɖé ɔ dè dyéɖé gbo. (Híì. 6:10) Xwíníínɔ̀ nyɛ kɔ̃̀ jèɛ́? Sepoɛɖe ɔ kpáìn ɖɛ séín ɓɛ́ m̀ nyu ɓɛ́ m̀ ké ɔ hwòɖò dyi dèɛɛ múàùn dyi.a

⁸ Dyììn ɖé nyɔ-hwòɖò-dyi-dè-wùɖù ɓè nìà wɛ múɛɛ, Jɛhova nìɛ̀ cɛ̃ɛ, ké ɔ ɖá: “Ḿ mɔ́ ɓɛ́ m̀ kéɛ dyi dyuò kà ɓɛ́ ḿ ɖɛ̀ɓɛ̀ m̀ mú, ké ḿ kɔ̃̀ ɖé nì jè gboɛ.” À ɖàa máa cɛ̃́ kà ɓɛ́ Sétɔ̃̀ nyuɛ ɓɛ́ m̀ kéɛ jàà po kà ɓɛ́ Jɛhova se m̀ mú ɖɛ̀ɓɛ̀ kɛ. Ɔ jèɛɛ, ɔ jù ké nì hwòɖò dyi gbà tiɔ̀ ɖíɛ́ ɓè ɓaɖa kɛbì Jɛhova ɖɛ̀ɓɛ̀ m̀ mú ní, nìí, m̀ mɛ gbà mú ɓɛ́ m̀ ké m̀ mìɔùn dyi diè, ɓɛ́ m̀ ké níiń ‘Nyɛ́ kɔ̃̀ wuɖu ní mu jàà poùn wɛ̃́—‘seɛ̀ ɓàà’ mɔɔ “jàà Geɖepɔɔ”?’—Jɔ̃́ɔ́ 8:44; Wɛ́ɖɛ́ 31:5.

9. Ðɛ́ Jɛhova ɖáìn nyɔ ɓè ɓɛ́ wa ɖɛ̀ɓɛ̀ ɔ múɛɛ nyɛ́nɛ́ín nyɛ́? (Ɛ́séɖɔ̀ 20:​5, 6)

⁹ Poìn kà Jɛhova hwòɖò nyu nìɛ̀ ɓá nyɔ ɓè ɓɛ́ wa ɖɛ̀ɓɛ̀ ɔ múɛ jè dyíɛɛ jè hwìɖìi. Poìn ɖɛ Jɛhova cɛ̃ ma Mózè kè Éézùɖùɛ̀-nyɔ̀ ɓèɔ̀ gboɛɛ jè hwìɖìi. (Zà Ɛ́séɖɔ̀ 20:​5, 6 wuɖuún.) Jɛhova cɛ̃ɛ kà ɓɛ́ ɔ mu nyɔ ɓè ɓɛ́ wa ɖɛ̀ɓɛ̀ ɔ múɛɛ ɔ ɖɛ̀ɓɛ̀ìn-ɖɛ̀ɓɛ̀ìn se sèìn-naín kɔ̃̀ɔ̀ wa dyí tɛ̀mɛ̀ìn nyɛ. Wuɖu ɓè nìà wɛ tɛ̀mɛ̀ìn à dyí wáɖáá kà ɓɛ́ nyɔ ɓè ɓè ɓɛ́ wa ɓiè jàà Geɖepɔɔ kɛɛ dyi ɔ mú ɖɛ̀ɓɛ̀ ní, ɔ mu wa mɔ̀ùn mú ɖɛ̀ɓɛ̀ìn ɖekèɛ. (Níò. 1:5) Ɔ jèɛɛ, ɔ jù ké m̀ dyi kɔ̃̀ m̀ kéɛ dyí dyuò tiɔ̀ ɖíɛ́ ɓè ɓaɖa kà Jɛhova ɖɛ̀ɓɛ̀ m̀ múɛ ní, m̀ mɛ gbà mú ɓɛ́ m̀ ké m̀ mìɔùn dyi diè ɓɛ́ m̀ ké níiń, ‘Ḿ ɖɛ̀ɓɛ̀ Jɛhova múù?’ Nìí, poìn ɖɛ nìà kɛ jè hwìɖìi: Ɔ jù ké m̀ dyi ɔ mú ɖɛ̀ɓɛ̀, ké m̀ dyi vɔ̃uń nì ɓɛ́ m̀ ké ɔ hwòɖò dyi dè ní, m̀ ɓɛ́ìn hwòɖò kɔ̃ dèɛ̀ kà ɔ ɖɛ̀ɓɛ̀ m̀ mú mìɔ kɛ. (Dàn. 9:4; 1 Kɔ̀. 8:3) Ɔ xwíníín mɔ̀, ɔ jù ké m̀ dyiɛ jàà po kà ɓɛ́ m̀ ɖɛ̀ɓɛ̀ Jɛhova múɛ ní, xwíníínɔ̀ nyɛ́ kɔ̃̀ jè m̀ seà jàà poɛ ɓɛ́ìn kà ɓɛ́ ɔ ɖɛ̀ɓɛ̀ m̀ múɛ́? M̀ ɓɛ́ìn hwòɖò dèɛ̀ kà ɔ ɖɛ̀ɓɛ̀ m̀ mú, ké ɔ mu m̀ jè gboi kpɔ̃ùn teeɛ.

10-11. Xwɛ̀ Jɛhova mɔ́ ɓɛ́ m̀ ké mú-gbààìn-ɖɛ̀ɔ̀ dya gmɔ̀ kɛ́? (Gàɖézìà 2:20)

¹⁰ Nàìn mú-gbààìn-ɖɛ̀ɔ̀ jè hwìɖìi. Mú-gbààìn-ɖɛ̀ɔ̀ mɔ̀ nyíí-ɖɛ̀ zi ɖɛ kpauń ɓɛ́ Jɛhova nyí nyɔùn wɛ̃. (Jɔ̃́ɔ́ 3:16) Kɛɛ, ɔ mɔ̀ nyíí-ɖɛ̀ ɓó m̀ bìì jɛ́ɛ́ɛ̀? Ǹdye! Poìn ɖɛ kpá ma àpɔ́sò Pɔ́ɔ̀ gboɛɛ jè hwìɖìi. Hwɛ̀ ɓɛ́ ɔ ké ma Kɛ́ɖɛ́ì ɖeín-sí-nyɔ̀ jùɛɛ, ɔ nyu ma nàmàùn ku wɔ̃ ɓè, ké ɔ kɔ̃̀ ɔ ké ma ɔ mìɔùn nììn kpéɛ̀-dyí-hwɛ̀-hwɛ̀ ɓèɔ̀ gbo vɔ̃ kánáá pu. (Wóɖ. 7:​24, 25; 1 Tím. 1:​12-14) Kɛɛ, ɔ gmɔ̀ ma mú-gbààìn-ɖɛ̀ɔ̀ dya kà ɔ mɔ̀ nyíí-ɖɛ̀ ɓó ɔ bììɛ. (Zà Gàɖézìà 2:20 wuɖuún.) Ɔ mɛ nì m̀ hwìɖìi kà Jɛhova nàìn ma Pɔ́ɔ̀ ɓɛ́ ɔ ké ma wuɖu ɓè nìà wɛ céèɛ. Ké ɖɛ séín ɓè nìà ɖé Baɓoɔ múɛɛ mɔ̀ ɓó à ɖɛ tɛ̀mɛ̀ìn jè. (Wóɖ. 15:4) Pɔ́ɔ̀ wuɖu ɓèɔ̀ tɛ̀mɛ̀ìn kà ɓɛ Jɛhova mɔ́ ɓɛ́ m̀ ké mú-gbààìn-ɖɛ̀ɔ̀ dya gmɔ̀ kà ɔ mɔ̀ nyíí-ɖɛ̀ ɓɛ́ Ɔ nyí m̀ wɛ̃. M̀ dyi kàa mú-gbààìn-ɖɛ̀ɔ̀ dya gmɔ̀ ní, nì muɛ jàà poùn jɛ́ɛ́ cá kà ɓɛ́ Jɛhova ɖɛ̀ɓɛ̀ m̀ múɛ.

¹¹ À po Jɛhova zùo ɓɛ́ ɔ ké Jizɛ ɓóɖó-kpàà kɔ̃ ɖoɓo ɓɛ́ ɔ ké à bìì mɛ́ kɛɛ jè. Kɛɛ, xwíníín kà kò ɖò kɔ̃̀ jè ɓɛ́ Jizɛ dyi ma ɓóɖó-kpàà kɔ̃ɛɛ mɔ̀, ɓɛ́ ɔ ké ma jàà ɓáà Geɖepɔɔ jè dyíɛɛ nyɔ tɔ̀ɔ̀ ɓè gbo cɛ̃. (Jɔ̃́ɔ́ 18:37) Jàà nìà wɛ ɖò mɔ̀ kà Jɛhova hwòɖò nyu nìɛ̀ ɓá ɔ dyú ɓèɔ̀ jè dyíɛ.

KÀ JIZƐ NYU À GBO KPÁA ƁƐ́ À KÉ JƐHOVAA ÐƐ̀ƁƐ̀ÌN-ÐƐ̀ƁƐ̀ÌNƆ̀ JÈ JÀÀ POƐ

12. Xwíníínɔ̀ nyɛ́ kɔ̃̀ jè à ɓɛ́àìn kà Jizɛ nyu ma Jɛhova mɛ dèɛ̀ kɛɛ jè jàà poɛ kɛ́?

¹² Ti Jizɛ nì ma ɓóɖó-kpàà kɔ̃ɛɛ, ɔ hwòɖò wɔ̃́ ma ké ɔ zaìn ma nyɔ Jɛhova jù kɛɛ jè kɔ̃in. (Ðúù 10:22) À ɓɛ́ìn kà Jizɛ nyuà Jɛhova mɛ dèɛ̀ kɛɛ jè jàà poɛ, sepoɛɖe Jizɛ cĩ́ ma ɖé Jɛhova gbo ɓó ti tɔ̀mɔ̀ùn-tɔ̀mɔ̀ùn xwíníín hwɛ̀ ɔ dyi ma dà ɓóɖó-kpàà kɔ̃. (Kɔ̀ɖ. 1:15) Sepoɛɖe Jizɛ nì ma ɖé Jɛhova gbo jèɛɛ, ɔ dyuòɛ̀ ma dyí jɛ́ɛ́ kà ɓɛ́ Jɛhova ɖɛ̀ɓɛ̀ Ɔ dyú séín ɓè ɓɛ́ wa kpɔ̃ ɓó ɔ jè gboiɛɛ múɛ. Xwɛ̀ Jizɛ nyu nyɔ tɔ̀ɔ̀ ɓè gbo kpáa ɓɛ́ wa ké Geɖepɔɔ ɖɛ̀ɓɛ̀ìn-ɖɛ̀ɓɛ̀ìnɔ̀ jè jàà po kɛ́?

13. Xwɛ̀ Jizɛ mɔ́ ɓɛ́ à ké Jɛhova dya gmɔ̀ kɛ́?

¹³ Jizɛ mɔ́ ɓɛ́ à ké Jɛhova dya gmɔ̀ kà ɔ nyuà ɔ dya gmɔ̀ɔ̀ kɛ. Ðé céè-ɖɛ̀ ɓè mɔ̀à Máfíò kè Máà kè Ðúù ɔ kè Jɔ̃́ɔ́ kɛ múɛɛ, Jizɛ ɖáìn Jɛhova “Ɓà” kpa hɔ̃dɛ̀ɖɛ̀ ɖò kè kpáɖá-nyɔ tã zi kɔ̃. Ké ti Jizɛ nì ma ɔ ɖeín-sí-nyɔ̀ ɓèɔ̀ gbo wùɖùɛ̀n nyɛɛ, ɔ nyùìn ma wuɖu ɓè mɔ̀à “ɓè Ɓà” mɔɔ “ɓè Ɓà nìà ɖé dyɔún” wɛ̃ɛ kũ̀à mú. (Máf. 5:16; 6:26) Cɛ̃́ɛ́-ɖɛ̀ ɓáà Máfíò 5:16 dyíɛɛ ɖá: “Geɖepɔɔ ɓiè-nyɔ̀ ɓè nì ma kĩ́ín nyɛɛ nyùìn ma dya-dè-nyɛ̀nɛ̀ vɛ̀nɛ̀-vɛ̀nɛ̀ ɓè mɔ̀à, ‘Kpé-Séín-Ɓéɖé-Nyɔ̀’ kè ‘Ðɛɓíɔ́’ ɔ kè ‘Ðɛ Séín Mɛ-Nyɔ̀’ kɛɛ kũ̀à mú, ɓɛ́ wa ké ma Jɛhova mɛ dè, kè ɓɛ́ wa ké ma ɔ gbo wùɖù, kɛɛ wuɖu fɛ̃́ìn xwa ɓɛ́ nyɔ séín dyuò dyí mɔ̀à ‘Ɓà’ ɓɛ́ Jizɛ nyùàìn kũ̀à múɛɛ tɛ̀mɛ̀ìn kà ɓɛ́ gbo-kpɔ̃ìn-kpɔ̃ìn nì Geɖepɔɔ kè ɔ ɓiè-nyɔ̀ ɓèɔ̀ pṹa kɛ.” Wáɖáá kɛɛ, Jizɛ mɔ́ ɓɛ́ à ké Jɛhova dya gmɔ̀ kà ɔ mɔ̀ à ɖɛ̀ɓɛ̀ìn-ɖɛ̀ɓɛ̀ìn Ɓà ɓɛ́ ɔ kɔ̃̀ ɖé Ɔ dyú ɓè jè gbo mìɔ kɛ. Ɓèà dyé hwɔìn-ɖɛ̀ sɔ̃́ ɓè kɔ̃̀ mú ɓɛ́ Jizɛ nyùìn ma wuɖu mɔ̀à “Ɓà” kɛ kũ̀à múɛ.

14. Xwɛ̀ Jizɛ nyuɛ ma tɛ̀mɛ̀ìn kà ɓɛ́ à ɖò-ɖò séín jè kpa ɖɛ ɖé à dyɔún Ɓàɔ̀ gbo kɛ́? (Máfíò 10:​29-31) (Dyé dyi-dyé-ɖɛ̀ɔ̀ ɖekè.)

¹⁴ Kĩ́ín nyɛɛ, poìn Jizɛɛ wuɖu ɓè nìà ɖé Máfíò 10:​29-31 múɛɛ jè hwìɖìi. (Zàà wuɖuún.) Dyùì ɓè mɔ̀ naà mɛ́nɛ́ɛ́ ɓè ɓɛ́ wa se Jɛhova ɓièɛ̀ mu, mɔɔ wa se ɔ mú ɖɛ̀ɓɛ̀ɛ̀ mu fɔɔ kɛ. Kɛɛ, dyùì-dyù dyúáɖò jè kpa ɖɛ ɖé à Ɓàɔ̀ gbo mìɔ, ké ɔ dyuòɛ̀ dyí ɔ jù ké wa dyúáɖò dyi ɓíɖíi kpá ní. Ɔ jèɛɛ, à ɓɛ́ìn jàà poɛ kà ɓɛ́ ɔ kɔ̃̀ ɖé ɔ jàà ɓiè-nyɔ̀ ɓè ɓɛ́ wa ɓiè ɔ, sepoɛɖe wa ɖɛ̀ɓɛ̀ ɔ mú jèɛɛ ɖò-ɖò séín jè gboɛ! Ɓá wuɖu ɓè mɔ̀à, “Geɖepɔɔ ɖà mí-wɔ́ɖɔ́ séín nì ɓè dúɛɛ zɛɖɛ nyɛ̀nɛ̀ɛ̀” kɛ jè dyíɛɛ, cɛ̃́ɛ́-ɖɛ̀ ɓáà vɔ̀sì 30 dyíɛɛ ɖá: “Sepoɛɖe Jɛhova dyuò ɖɛ tííwè ɓèà jè dyí jèɛɛ, ɔ tɛ̀mɛ̀ìn kà ɓɛ́ ɔ kɔ̃̀ ɖé Kɛ́ɖɛ́ì ɖeín-sí-nyɔ̀ ɖò-ɖò séín jè gboɛ.” Jɛ́ɛ́ kɛɛ, Jizɛ mɔ́ ɓɛ́ à kéɛ jàà po kà ɓɛ́ à ɖò-ɖò séín jè kpa ɖɛ ɖé à dyɔún Ɓàɔ̀ gboɛ.

15. Ðɛ́ Jizɛɛ wuɖu ɓè nìà ɖé Jɔ̃́ɔ́ 6:44 múɛɛ cɛ̃ m̀ gbo ɓá nì dyɔún Ɓàɔ̀ jè dyíɛ́?

¹⁵ Dè hwɔìn-ɖɛ̀ sɔ̃́ nììn kɔ̃̀ mú ɓɛ́ Jizɛ nyùìn ma wuɖu mɔ̀à “Ɓà” kɛ kũ̀à múɛɛ dyéɖé gbo. (Zà Jɔ̃́ɔ́ 6:44 wuɖuún.) M̀ Ɓà nìà ɖé dyɔún wɛ̃ɛ mɔ̀ nyɔ dyà ma m̀—mɔɔ ɔ mɔ̀ nyɔ nyuɛ—ké m̀ dyi ma jààɔ̀ mú. Xwíníínɔ̀ nyɛ́ kɔ̃̀ jè ɔ dyà ma m̀ wɛ̃́? Ɔ mɔ̀ sepoɛɖe ɔ dyé ma ɖɛín-ɖɛ̀ ɖò ɖé m̀ mú jè. (Àpɔ́. 13:48) Cɛ̃́ɛ́-ɖɛ̀ ɓáà Jɔ̃́ɔ́ 6:44 dyíɛɛ ɖá, Jizɛ nì ma Jɛ̀ɖèmádyàà wuɖu ɓè nìà ɖé vɔ̀sì ɓɛ́ cɛ̃́ɛ́-ɖɛ̀ nìà kɛ ɓáà dyíɛ jè cɛ̃ɛń dyɛ̀: “Ðɛ̀ɓɛ̀ìn-ɖɛ̀ɓɛ̀ìn ɓɛ́ ḿ ɓéɖé ɓó ɓè bììɛɛ se sèìn-naín kɔ̃̀.” (Jɛ̀ɖ. 31:3; poɛ̀n kè Hòzéà 11:4 dyí.) Poìn ɖɛ mɔ̀ ɔ xwíníín nyɛɛ jè hwìɖìi. À dyɔún Ɓàɔ̀ dyé kpeɖe nɔ̀mɔ̀ dyíin ɓè nì ɖé m̀ mú ɓɛ́ m̀ se dyéɛ ɓɛ́ìn nyɛ tee.

16. (a) Ðɛ́ Jizɛ ɖà à gbo cɛ̃ kɛ́, ké xwíníínɔ̀ nyɛ́ kɔ̃̀ jè à mɛ poà ɔ wuɖu ɓèɔ̀ jàà kɛ́? (b) Xwɛ̀ m̀ ɓɛ́ìn jàà poɛ jɛ́ɛ́ cá kà ɓɛ́ Jɛhova mɔ̀ Ɓà ɓɛ́ m̀ mɔ́ kɛ́? (Dyé gbɔ̀ɖɔ̀ɔ̀ nìà kɛ, “Ɓà Ɓɛ́ À Séín Mɔ́ Kɛ.”)

¹⁶ Jizɛ ɖáìn Jɛhova à Ɓà. Ðɛ jɛ́ɛ́ ɓɛ́ Jizɛ nìà cɛ̃iń dyììn ɖé wuɖu ɓèa múɛɛ mɔ̀: “Jɛhova se ḿ ɖòùn Ɓà; ɔ mɔ̀ nì Ɓà ɖekè. Ké ḿ mɔ́ ɓɛ́ m̀ kéɛ dyí dyuò kà ɓɛ́ ɔ ɖɛ̀ɓɛ̀ m̀ mú, ké ɔ kɔ̃̀ ɖé nì jè gbo mìɔ kɛ.” Ɔ jèɛɛ, ɔ jù ké m̀ seɛ jàà po tiɔ̀ ɖíɛ́ ɓè ɓaɖa kà ɓɛ́ Jɛhova ɖɛ̀ɓɛ̀ m̀ múɛ ní, m̀ mɛ gbà mú, ɓɛ́ m̀ ké m̀ mìɔùn dyi diè, ɓɛ́ m̀ ké níiń, ‘Ḿ mɛ ɓɔ́ dyú-gàà ɓɛ́ ɔ dyuòà à Ɓàɔ̀ dyí nɔ̀mɔ̀ dyíin, ké ɔ cɛ̃à jàà teeɛ wuɖu ɓèɔ̀ jàà poɛɛ̀?’—1 Píɖɛ̀ 2:22.

PO JƐHOVAA ÐƐ̀ƁƐ̀ÌN-ÐƐ̀ƁƐ̀ÌNƆ̀ JÈ JÀÀ TEE

17. Xwíníínɔ̀ nyɛ́ kɔ̃̀ jè à mɛ poà jàà tee kà ɓɛ́ Jɛhova ɖɛ̀ɓɛ̀ à múɛ́?

¹⁷ À kɔ̃̀ à kéɛ jàà po tee kà ɓɛ́ Jɛhova ɖɛ̀ɓɛ̀ à múɛ. Ká à nyuɔ́ kà cɛ̃́ɛ kɛɛ, à mú-nyɛ́-nyɔ̀ ɓéɖé sɛ́ɖɛ́ mɔ̀à Sétɔ̃̀ kɛɛ mu vɔ̃ùn kánáá pu, ɓɛ́ ɔ kéɛ nyu ɓɛ́ à ké Jɛhova ɓièɛ̀ ɓɔ́. Sepoɛɖe Sétɔ̃̀ mɔ́ ɓɛ́ ɔ ké à kpéí hwɔ jèɛɛ, ɔ mu vɔ̃ùn tee ɓɛ́ ɔ kéɛ nyu, ɓɛ́ à ké seɛ jàà po kà ɓɛ́ Jɛhova ɖɛ̀ɓɛ̀ à múɛ. À mɛ ɓɔ́ wɔ̃́ɔ̀ ɓɛ́ Sétɔ̃̀ ké à toún ɖu!—Jóɓò 27:5.

18. Xwɛ̀ m̀ ɓɛ́ìn Jɛhovaa ɖɛ̀ɓɛ̀ìn-ɖɛ̀ɓɛ̀ìnɔ̀ jè jàà poɛ cá kɛ́?

¹⁸ Ɓɛ́ m̀ ké Jɛhovaa ɖɛ̀ɓɛ̀ìn-ɖɛ̀ɓɛ̀ìnɔ̀ jè jàà po cá ní, m̀ mɛ ɓaà tee ɓɛ́ ɔ ké m̀ gbo kpá, ɓɛ́ m̀ ké m̀ mìɔùn dya gmɔ̀ kà ɔ nyuà m̀ dyà gmɔ̀ɔ̀ kɛ. Nàìn kà Baɓo céè-nyɔ̀ ɓè nyu ɔ ɖɛ̀ɓɛ̀ìn-ɖɛ̀ɓɛ̀ìnɔ̀ mɛ dèɛ̀ kɛɛ jè hwìɖìi. Poìn ɖɛ ɔ nyu ɔ jù ké nyɔ ɖò dyi ɔ mú ɖɛ̀ɓɛ̀ níɛɛ jè hwìɖìi; ɔ tɛ̀mɛ̀ìn nyɔ ɓè ɖɛ̀ɓɛ̀ ɔ múɛ ɖɛ̀ɓɛ̀ìn-ɖɛ̀ɓɛ̀ìn dyí tee. Nàìn xwíníín kɔ̃̀ jè m̀ ɓɛ́àìn mú-gbààìn-ɖɛ̀ɔ̀ dya gmɔ̀ɔ̀ kà ɔ mɔ̀ nyíí-ɖɛ̀ ɖò ɓó m̀ bììɛɛ jè hwìɖìi. Ké po ɖɛ ɓɛ́ Jizɛ cɛ̃à kà ɓɛ́ Jɛhova mɔ̀ nì dyɔún Ɓà kɛɛ jè jàà. Nìí, ɔ jù ké nyɔ ɖò dyiɔ́ m̀ dyi diè, ké ɔ dyi níiń, “Jɛhova ɖɛ̀ɓɛ̀ m̀ mú cáà?” ní, nì muɛ cɛ̃ìn ɖɛ ɖò jàà-po-kà, ɓɛ́ m̀ ké níiń, “Ǹdye, ɔ ɖɛ̀ɓɛ̀ ḿ mú! Ké ḿ vɔ̃ wé séín ɓɛ́ ḿ kéɛ tɛ̀mɛ̀ìn kà ḿ ɖɛ̀ɓɛ̀ ɔ múɛ!”