Kà À Ké Se-Dyí-Sɛ́ɖɛ́ìn-Ðɛ̀ Kpɔ̃ɔ Nyu Nɔ̀mɔ̀ Dyíin Nyɛ

1-2. Xwɛ̀ nyɔ pàɖà nyu se-dyí-sɛ́ɖɛ́ìn-ɖɛ̀ kpɔ̃ɔ kɛ́, ké ɖɛ́ à ɓɛ́ìn jè hwìɖìi poɛ̀n nyɛ́?

À CĨ́ ɓóɖó-kpà ɓɛ́ se-dyí-sɛ́ɖɛ́ìn-ɖɛ̀ nì kɔ̃ɛɛ kɔ̃. Wa kpɔ̃ nyɔ ɓè se-dyí-sɛ́ɖɛ́ìn-kà ɓó xwíníín pàɖà ɓè jè. Wa kpɔ̃ nyɔ ɓè gbà-kà sepoɛɖe wa se wíɖí ɓéɖé jè, mɔɔ nyɔ wa jùɛ jè, mɔɔ wa sɔ̀ xwéɖé-dù kà kò ɖò mú mɔɔ ɓóɖó-dù kà kò ɖò kɔ̃ jè. Nyɔ ɓè dyé ɓóɖó-kpàà mú-gbɔɔ̀-ɖɛ̀ ɓè gà dyí sɔ̀ìn ɖé bã-nyɔ̀ ɓè ɓɛ́ wa kàmà wíɖí jèɛ kè gɔ̀mànà-nyɔ̀ ɓè ɓɛ́ wa mɔ̀ gbá-gbá-nyɔ̀ ɓèɛɛ xwaún. À séín dyé ɖɛ ɓèa kè se-dyí-sɛ́ɖɛ́ìn-ɖɛ̀ tɔ̀ɔ̀ ɓè dyí, kɛbì wa mɛ kpá à mìɔùn gbo, mɔɔ wa mɛ kpá à dyí-dyuò-nyɔ̀ ɖò gboɛ.

² Ɔ se dyi giniìn ɖɛ ɖò ɓɛ́ à kéɛ dyé kà nyɔ pàɖà hwòɖò kpá ɖé ɖei ɓá se-dyí-sɛ́ɖɛ́ìn-ɖɛ̀ ɓè nì kpáuń zɛ̃̀ɛ̀ kɛɛ jè dyíɛ. À séín mɔ́ ɓɛ́ nyɔ ɓè ké à kpɔ̃ dyí-sɛ́ɖɛ́ìn-kà ké à mɔ́ cĩ́ɛ̀ dyi ɖé gìɖìi mú. Ðɛa jèɛɛ, nyɔ ɖíɛ́ ɓè kpá kpoo ɓè mú ɓɛ́ wa ké ɖɛ ɓè dyí sɛ́ɖɛ́ìn. Wa vɔ̃ gɔ̀mànà ɓè gbo ké wa po gbèè-po-nyɔ̀ ɓè ɓɛ́ wa cɛ̃ɛ kà wa mu se-dyí-sɛ́ɖɛ́ìn-ɖɛ̀ ɓè jè dyi zĩ̀ìn nyɛɛ gmɛ̀ìn. Kɛɛ, à mɔ̀ Kɛ́ɖɛ́ì ɖeín-sí-nyɔ̀ ɓèɛɛ, à cɛ̃́ɛ kà ɓɛ́ à “se ɓóɖó-kpàà nyɔ ɓè” kɛ kè kà à mɛ fòìn Geɖepɔɔ Kã́á-ɓòɖòɔ̀ ɓɛ́ ɔ ké se-dyí-sɛ́ɖɛ́ìn-ɖɛ̀ séín dyi zĩ̀ìn nyɛ. (Jɔ̃́ɔ́ 17:16) Kɛɛ, à kpá dyoɖoún ɔ jù ké à dyiɛ dyé ké nyɔ ɖò dyi se-dyí-sɛ́ɖɛ́ìn-ɖɛ̀ dyí dyé ní. À ɓɛ́ìn dyɛ hwìɖìi poɛ̀n: ‘Xwɛ̀ ḿ mɛ nyuɛ kpɔ̃ɔ kɛ́? Ðɛ ɖò nì ɓó ɓɛ́ ḿ ɓɛ́ìn nyuɛ kàùn ɓá se-dyí-sɛ́ɖɛ́ìn-ɖɛ̀ jè dyíɛ́?’ Ɓɛ́ à ké dyi-diè-ɖɛ̀ ɓèa gɔ̃̀ jù ní, ɓèa cɛ̃́ kà ɓɛ́ Jɛhova kè Jizɛ hwòɖò nyu nìɛ̀ ɓá se-dyí-sɛ́ɖɛ́ìn-ɖɛ̀ ɓè jè dyíɛɛ kĩ́ín.

JƐHOVA KÈ JIZƐ NYƐ́ SE-DYÍ-SƐ́ÐƐ́ÌN-ÐƐ̀ MÚ

3. Xwíníínɔ̀ nyɛ́ kɔ̃̀ jè ɔ sea ɖɛ gbà ɓɛ́ à kéà dyoɖoún kpá ɓá se-dyí-sɛ́ɖɛ́ìn-ɖɛ̀ jè dyíɛ́? (Àzédyà 5:7)

³ Baɓoɔ zaìn xwíníín kɔ̃̀ jè à hwòɖò kpáa ɖé ɖei ɓá se-dyí-sɛ́ɖɛ́ìn-ɖɛ̀ jè dyíɛɛ jè kɔ̃in. Ɔ cɛ̃ɛ kà ɓɛ́ Jɛhova mɛ à kà ɔ mìɔùn nìà kɛ kè kà ɔ “ɖɛ̀ɓɛ̀ dyí-sɛ́ɖɛ́ìn-ɖɛ̀ nyu-nyu mú, ké ɔ ɖɛ̀ɓɛ̀ dyí-sɛ́ɖɛ́ì-ɖɛ̀ wɔ̃-po-po mú” kɛ. (Wɛ́ɖɛ́ 33:5; Jɛ́n. 1:26) Ɔ ní nyu se-dyí-sɛ́ɖɛ́ìn-ɖɛ̀ fɔɔ, ké ɔ se mɔ́ ɓɛ́ nyɔ séín ɖò ké se-dyí-sɛ́ɖɛ́ìn-ɖɛ̀ nyu! (Dìtɔ̀. 32:​3, 4; Mákà 6:8; Zɛ́k. 7:9) Ɔ hwɔìn-kà, ɖé kpáá-ɖɛ̀-cɛ̃-nyɔ Àzédyà tiín nyɛɛ, Jɛhova wɔ̃́ ma Éézùɖùɛ̀-nyɔ̀ ɓè ɓɛ́ “wa pĩ́à dyiɛɛ kpé-po-wùɖù” sɔ̀ìn ɖé wa mìɔùn nììn nyɔ ɓèɔ̀ xwaún. (Zà Àzédyà 5:7 wuɖuún.) Jɛhova dyéín ma nyɔ ɓè ɓɛ́ wa se ma ɔ gmaɔ̀ kíɖíí sí ké wa nyu ma kà se-dyí-sɛ́ɖɛ́ìn-ɖɛ̀ nyɔ tɔ̀ɔ̀ ɓè bũ̀ɛɛ gà.—Àzé. 5:​5, 13.

4. Ðɛ́ tɛ̀mɛ̀ìn kà Jizɛ hwòɖò nyu nìɛ̀ ɓá se-dyí-sɛ́ɖɛ́ìn-ɖɛ̀ jè dyíɛ́? (Dyé dyi-dyé-ɖɛ̀ɔ̀ ɖekè.)

⁴ Kà Jɛhova nìà kɛɛ, Jizɛ ɖɛ̀ɓɛ̀ dyí-sɛ́ɖɛ́ìn-ɖɛ̀ nyu-nyu mú ké ɔ nyɛ́ se-dyí-sɛ́ɖɛ́ìn-ɖɛ̀ mú. Wé ɖòɛ̀ ɓaɖa ti Jizɛ nì ma wuɖu wáɖáún wɛ̃ɛ, ɔ dyé ma gàa ɖò ɓɛ́ ɔ sɔ̃ɔ̀ kɔ́ɖɔ́ ma kɛ. Jizɛ kpá ma gàaɔ̀ gbo, kɛɛ cɔ́cì-nyɔ̀ vɛ̀nɛ̀ ɓèɔ̀ hwòɖò se ma dyi dè. Ðɛ kpɔ̃ ma wa hwòɖò cá kɛɛ mɔ̀, ɓɛ́ nyɔ ɓè ké ma gma ɓáà fɔ̀-wèɔ̀ dyíɛɛ dyi kpɔ̃ ké wa se ma ɖé gàaɔ̀ dyi-káná-kánáɔ̀ jè gbo kɔ̃̀. Xwɛ̀ Jizɛ hwòɖò nyu ma nìɛ̀ ɓá waà nyuu-ɖɛ̀ɔ̀ jè dyíɛ́? “Ɔ hwòɖò kpá ma ɖé ɖei ɓó waà hwòɖò-dyùàɔ̀ kùmù jè.”—Máà 3:​1-6.

5. Ðɛ́ mɛ nì à hwìɖìi ɓó dyoɖo à kpáa mú ɓá se-dyí-sɛ́ɖɛ́ìn-ɖɛ̀ ɓè jè dyíɛ́?

⁵ Ɔ po Jɛhova kè Jizɛ dyoɖoún ɓɛ́ wa kéɛ dyé ɓɛ́ nyɔ ɓè ké se-dyí-sɛ́ɖɛ́ìn-ɖɛ̀ dyí dyé kɛ, ɔ jèɛɛ ɔ se ɖɛ gbà ɓɛ́ à hwòɖò ké ná nì ɖekè. (Ìfí. 4:26 ké dyé cɛ̃́ɛ́-ɖɛ̀ ɓáà “Ɓè dyi dyoɖoún kpáín” kɛ) Kɛɛ, ɔ mɛ nì à hwìɖìi kà dyoɖo séín ɖò à mu mú kpáùn—kɛbì ɔ mɛ ɓéɖé xwíníín nyɛɛ—ɔ se se-dyí-sɛ́ɖɛ́ìn-ɖɛ̀ dyi zĩ̀ɛ̀ìn ɓɛ́ìn nyɛ. Jàà kɛɛ, à dyi dyoɖoún kpáuń zi ní ɔ ɓɛ́ìn nyuɛ ɓɛ́ à ké wɛ́. (Wɛ́ɖɛ́ 37:​1, 8; Jĩ́ìn 1:20) Nìí, xwɛ̀ à mɛ nyu se-dyí-sɛ́ɖɛ́ìn-ɖɛ̀ ɓè kpɔ̃ɔ kɛ́? À ɓɛ́ìn Jizɛ ɖɛ xwaún cɛ̃́ɛ.

KÀ JIZƐ NYU MA SE-DYÍ-SƐ́ÐƐ́ÌN-ÐƐ̀ ƁÈ KPƆ̃Ɔ KƐ

6. Ðɛ́ mɔ̀ se-dyí-sɛ́ɖɛ́ìn-ɖɛ̀ ɓè ɓɛ́ wa hwɔ ma dyi ti Jizɛ nì ma dà ɓóɖó-kpàà kɔ̃ kɛ́? (Dyé dyi-dyé-ɖɛ̀ɔ̀ ɖekè.)

⁶ Jizɛ dyé ma se-dyí-sɛ́ɖɛ́ìn-ɖɛ̀ pàɖà ti ɔ nì ma dà ɓóɖó-kpàà kɔ̃ɛ. Ɔ dyéɛ ma ké cɔ́cì-nyɔ̀ vɛ̀nɛ̀ ɓèɔ̀ pĩ́à ma nyɔ ɓèɔ̀ dyi. (Máf. 23:​2-4) Kà Wóɖóùn-gɔ̀mànàɔ̀ nyu ma nyɔ ɓèɔ̀ gbà-kà kpɔ̃ɔ kɛɛ jè se ma Jizɛ dyí vìè. Júù-nyɔ̀ ɓèɔ̀ pàɖà mɔ́ ma gbaà-gbaà sɔ̀ìn Wóɖóùn-gɔ̀mànàɔ̀ xwaún. Wa ɖíɛ́ ɓè po ma wa mìɔùn kpoún ké wa vɔ̃ ma Wóɖóùn-gɔ̀mànàɔ gbo. Kɛɛ, Jizɛ se ma kpoo vɔ̃ ma gɔ̀mànàɔ̀ gboɛɛ mú kpá. Ti Jizɛ dyéɛ ma kà nyɔ ɓèɔ̀ mɔ́ ma ɔ Kã́á mú nyuɛ dyiɛɛ, ɔ gbù ma ní.—Jɔ̃́ɔ́ 6:15.

7-8. Xwíníínɔ̀ nyɛ́ kɔ̃̀ jè Jizɛ se ma vɔ̃ ɓɛ́ ɔ ké ma se-dyí-sɛ́ɖɛ́ìn-ɖɛ̀ ɓè jè dyi zĩ̀ìn ti ɔ nì ma dà ɓóɖó-kpàà kɔ̃ kɛ́? (Jɔ̃́ɔ́ 18:36)

⁷ Ti Jizɛ nì ma dà ɓóɖó-kpàà kɔ̃ɛɛ, ɔ se ma vɔ̃ ɓɛ́ ɔ ké ma gbèè-po-kpòò ɓè nì ma tià ɓaɖa kɛɛ mú kpá, ɓɛ́ wa ké ma se-dyí-sɛ́ɖɛ́ìn-ɖɛ̀ ɓè dyi zĩ̀ìn. Xwíníínɔ̀ nyɛ́ kɔ̃̀ jè ɔ seɛ ma kà náa nyu kɛ́? Ɔ dyuòɛ̀ dyí kà nyɔùn-dyù se kpé ɓɛ́ìn ɓɛ́ wa ké wa mìɔùn nàìn nyɛ. (Wɛ́ɖɛ́ 146:3; Jɛ̀ɖ. 10:23) Ké nyɔùn-dyù se ɖɛ jɛ́ɛ́ ɓè ɓɛ́ wa nyuà ké à nìà gà dyéɛń nyɛɛ dà ɓó zàà ɓɛ́ìn. Nyɔ nì ɓóɖó-kpàɔ̀ nàìn nyɛ mɔ̀ Sétɔ̃́ ɓɛ́ ɔ mɔ̀à nɔ́ɔ́-nàmàùn ɓɛ́ ɔ mɔ̀à kú-ɖáɓá-nyɔ̀ kɛ. Ɔ nì ɔ kpéɔ̀ kũ̀à mú nyùɛ̀ìn ɓɛ́ ɔ kéɛ nyu ɓɛ́ nyɔ ɓè ké se-dyí-sɛ́ɖɛ́ìn-ɖɛ̀ ɓè nyu. (Jɔ̃́ɔ́ 8:44; Ìfí. 2:2) Ké sepoɛɖe nyɔùn-dyù se mú hwɛ̀ jèɛɛ, ɔ kàmà mú ɓɛ́ nyɔ ɓè ɓéɖé kpeɖe nɔ̀mɔ̀ dyíin nyɛɛ ké jàà-ɖɛ̀ nyu ti séín.—Ìkí. 7:20.

⁸ Jizɛ dyuòɛ̀ kà Geɖepɔɔ Kã́á-ɓòɖòɔ̀ ɖòùn mu ɖɛ jɛ́ɛ́ ɓè ɓɛ́ wa nyuà ké à nìà gà dyéɛń nyɛɛ jè dyi zĩ̀ìn nyɛ. Ɓó xwíníína jèɛɛ, ɔ nyùìn ma ɔ ti kè ɔ kpéɔ̀ kũ̀à mú ɓɛ́ ɔ ké ma “bɔ̃̀ nɔ̀mɔ̀ dyíin ɓá Geɖepɔɔ kã́á ɓòɖòɔ̀ jè dyíɛɛ” cɛ̃ (Ðúù 8:1) Jizɛ cɛ̃ɛ ma nyɔ ɓè ɓɛ́ “ɖɛ kɔ̃̀ tó nyu wa mìɔ kɛɛ mɔ̀ ɖɛ ɓè ɓɛ́ Geɖepɔɔ mɔ́ ɓɛ́ wa ké nyuɛɛ” gbo kà ɓɛ́ se-dyí-sɛ́ɖɛ́ìn-ɖɛ̀ séín jè mu dyi ziìn nyɛ. (Máf. 5:6 ké dyé cɛ̃́ɛ́-ɖɛ̀ɔ̀; Ðúù 18:​7, 8) Kɛɛ, gɔ̀mànà gbo vɔ̃-vɔ̃ se se-dyí-sɛ́ɖɛ́ìn-ɖɛ̀ ɓè jè dyi zĩ̀ɛ̀ìn mu, ɔ sèìn Geɖepɔɔ Kã́á-ɓòɖò ɓɛ́ ɔ sea “ɓóɖó-kpà nìà kɛ dyí ɓá” kɛɛ ɖòùn.—Zà Jɔ̃́ɔ́ 18:36 wuɖuún.

SÍ JIZƐ ƁO-BƐ̃̀ÌN Ɔ JÙ KÉ M̀ DYI SE-DYÍ-SƐ́ÐƐ́ÌN-ÐƐ̀ DYÍ DYÉƐŃ NÌÌN

9. Xwíníínɔ̀ nyɛ́ kɔ̃̀ m̀ poà jàà kà ɓɛ́ Geɖepɔɔ Kã́á-ɓòɖòɔ̀ ɖòùn mɔ̀ nyɔ mu se-dyí-sɛ́ɖɛ́ìn-ɖɛ̀ séín jè dyi zĩ̀ìn nyɛ́?

⁹ Zɛ̃̀ɛ̀ kɛɛ, à nì se-dyí-sɛ́ɖɛ́ìn-ɖɛ̀ pàɖà ɓè dyéɛń ké ɔ zi Jizɛ dyí ti ɔ nì ma dà ɓóɖó-kpàà kɔ̃ɛ. Kɛɛ, se-dyí-sɛ́ɖɛ́ìn-ɖɛ̀ ɓè ɓɛ́ wa nìà kpáuń ɖé “wé hwɛ̀ìn-gbɔ” ɓèɛ̀ múɛɛ sɔ̀ìn ɖé Sétɔ̃̀ kè nyɔ ɓè nìà ɔ kpé xwíɖíiɛɛ gbo kà ɔ nìà teeɛ. (2 Tím. 3:​1-5, 13; Wɛ̀ɖ. 12:12) À dyuòɛ̀ dyí kà ɓɛ́ Geɖepɔɔ Kã́á-ɓòɖòɔ̀ ɖòùn mɔ̀ nyɔ mu ɖɛ mɔ̀à se-dyí-sɛ́ɖɛ́ìn-ɖɛ̀ dyà-nyɔ̀ kɛɛ jè dyi zĩ̀ìn nyɛ. Sepoɛɖe à dè Kã́á-ɓòɖòà sɔ̃ xwíɖíi jèɛɛ, à ní kpá cíɖì-wɔ̃̀ kɔ̃ kpá-kpá kè ɖɛ tɔ̀ɔ̀ séín ɖò hwìɛ̀ ɓó ɖɛ gbo zĩàìn jè. Poìn ɖɛ ɖíí-màà ɖò mɔ̀ Sésì dyé ma dyíɛɛ jè hwìɖìi.a Hwɛ̀ Sésì ké ma jààɔ̀ cɛ̃́ɛ, ɔ kpá ma kpoo ɓè mú kpɛ́-kpɛ́ ɓó ɖɛ gbo zĩàìn jè. Kɛɛ, ɔ hwòɖò ɖú ma gbà kpàì ɓá ɖɛ ɓè ɔ nì ma nyuɛń nyɛɛ jè dyí. Ɔ ɖá: “Ḿ dyi ma cíɖì-wɔ̃̀ kɔ̃ kpá ɓó ɖɛ gbo zĩàìn jè ní, ḿ ɖɛ̀ɓɛ̀ ma ḿ mìɔùn dyi diè ɖɛ̀ìn kɛbì ḿ nì ma ɖɛ sɛ́ɖɛ́ìn dyí nyuɛń ní. Kà ḿ nìà Geɖepɔɔ Kã́á-ɓòɖòɔ̀ sɔ̃ xwíɖíi dèɛ̀n kàùn wɛ̃ɛ, ḿ dyuòɛ̀ dyí kà ḿ nì wáká sɛ́ɖɛ́ìn dyíɔ̀ kɔ̃ɛ. Ḿ dyuòɛ̀ dyí kà ɓɛ́ Jɛhova mu nyɔ séín ɓè ɓɛ́ wa dyé dyi-pĩ́à-pĩ́à dyíɛɛ bìì vɔ̃ùn ɓɛ́ ɔ ké kà séín ɖò ɓɛ́ ḿ ɓɛ́ìn nyuɛ kɛɛ dyí ziɛ.”—Wɛ́ɖɛ́ 72:​1, 4.

10. Hwìèɔ̀ nyɛ́ kɔ̃̀ mú ɖɛ-gbo-zĩàìn-kpòò ɓèɛ̀ nyuu-ɖɛ̀ kè Jizɛɛ náún-po-wùɖù nìà ɖé Máfíò 5:​43-48 múɛɛ se gbo muìn nyɛ́? (Dyé dyi-dyé-ɖɛ̀ɔ̀ ɖekè.)

¹⁰ Nyɔ ɓè ɓɛ́ wa nì ɖɛ-gbo-zĩàìn-kpòò ɓè múɛɛ wáɖá gma ɓè, ké wa kpá dyoɖoún kpɛ́-kpɛ́. Kpeɖe ɓè nìà wɛ kè Jizɛɛ nyuu-ɖɛ̀ kè ɔ tɛ̀mɛ̀ìn-ɖɛ̀ ɓèɔ̀ se gbo muìn. (Ìfí. 4:31) Ðíí-gàà ɖò mɔ̀ Jɛféɖé kɛɛ dè ɖɛ nìà kɛ dyéɖé gbo, ké ɔ ɖá: “Ḿ dyuòɛ̀ dyí kà ɓɛ́ nyɔ ɓè dyi cíɖì-wɔ̃̀ kɔ̃ kpá ɓó ɖɛ dyí sɛ́ɖɛ́ìn jè ní, ɔ wóɖó hwɔ̀ɖɔ̀-gbà kè dyíɖí-dyíɖí gbo wàɖà kɛ.” Kɛɛ, Jizɛ tɛ̀mɛ̀ìn à ɖɛ ɓɛ́ à ké nyɔ séín mú ɖɛ̀ɓɛ̀, hwɛ̀ ḿ po níiń nyɔ ɓè ɓɛ́ wa se à jàà-po-ɖɛ̀ ɓèɔ̀ gbo wɔ̃́ìn mɔɔ wa dyéìn à gà kɛ. (Zà Máfíò 5:​43-48 wuɖuún.) À mɔ̀ Kɛ́ɖɛ́ì ɖeín-sí-nyɔ̀ ɓèɛɛ, à vɔ̃ ɓɛ́ à ké ɖɛ séín ɖò ɓɛ́ ɔ kè ɓo-bɛ̃̀ ɓɛ́ Jizɛ dèà à bììɛ se gbo muìn nyɛɛ dyí ɓàɖàìn.

11. Ðɛ́ ɓɛ́ìn nyuɛ ɓɛ́ ɔ ké xwa fɛ̃́ìn ɓɛ́ à ké ɖɛ-dyí-zàìn-kpòò ɖò sɔ̃ xwíɖíi dè kɛ́?

¹¹ À dyuòɛ̀ dyí kà ɓɛ́ Geɖepɔɔ Kã́á-ɓòɖòɔ̀ mu se-dyí-sɛ́ɖɛ́ìn-ɖɛ̀ jè dyi zĩ̀ìn gàná cá kɛ dyɛo, kɛɛ ɔ ɓɛ́ìn mú kàmàà ɓɛ́ à ké Jizɛ ɓo-bɛ̃̀ìn sí ɔ jù ké nyɔ ɓè dyi à kpɔ̃ se-dyí-sɛ́ɖɛ́ìn-kà ní. Poìn ɖɛ kpá ma Jànídyà ɓɛ́ ɔ dyé ma nyɔ-mú-nyɛ́-nyɛ́ dyíɛ gboɛɛ jè hwìɖìi. Ɔ ɖá: “Ḿ kpá ma dyoɖoún mìɔ. Ní hwòɖò-dyùàɔ̀ síà ma mìɔ, ké ḿ mɔ́ ɓɛ́ nyɔ ɓè nyu ma kà ḿ se-dyí-sɛ́ɖɛ́ìn-ɖɛ̀ɔ̀ bũ̀ɛɛ kéɛ ma gà dyí dyé. Púɛɛ, ḿ poɛ̀n ma hwìɖìi ɓɛ́ ḿ ké ma kpoo ɖò ɓɛ́ ɔ nì ma nyɔ-mú-nyɛ́-nyɛ́ gbo vɔ̃uń wɛ̃ɛ mú kpá. Ní hwòɖò ɖá ɔ mɔ̀ ma hwìè nɔ̀mɔ̀ dyíin ɖò kɔ̃̀ mú ɓɛ́ ḿ ɓɛ́ìn ma ɖɛ dyí sɛ́ɖɛ́ìn nyɛ.” Ti wè ɖà ma ziɛ púɛɛ, Jànídyà dyéɛ ma kà ɔ kɔ̃̀ ɔ ké ma gbo zĩàìn nyɛ. Ɔ ɖá, “Ḿ nìɛ̀ ma gbo wɔ̃́ìn ɓɛ́ nyɔ tɔ̀ɔ̀ ɓè ké ma ní hwìɖìi-poìn-poìnɔ̀ kpé kɔ̃ún ɓéɖé, ké wa nìɛ̀ ma nyuɛń ɓɛ́ ḿ ké ma nyɔùn-dyù hwòɖò kɔ̃ dè, ɓɛ́ ḿ ké se ma Jɛhova hwòɖò kɔ̃ dè. Ḿ poɛ ma gbɔ ɓɛ́ ḿ ké ma kpooɔ̀ mú sɔ̀ gàná cá.” À mɛ ɓɔ́ wɔ̃́ɔ ɓɛ́ xwíníín nɔ̀mɔ̀ dyíin séín ɖò ɓó dyoɖoún kpá jèɛɛ kéɛ nyu ɓɛ́ à ké ɓóɖó-kpà nìà kɛ gɔ̀mànà jè ɖò sɔ̃ún po fɔɔ.—Jɔ̃́ɔ́ 15:19.

12. Xwíníínɔ̀ nyɛ́ kɔ̃̀ jè ɔ nyuà fɔ̀nɔ̀-hwòɖò ɓɛ́ à kéà bɔ̃̀ ɓè à tò ɖùù gbo mɔɔ à zà wuɖuún wɛ̃ɛ múin mɔ́ kɛ́?

¹² Ðɛ́ ɓɛ́ìn à gbo kpáa ɓɛ́ à ké à dyoɖo-hwòɖò dyí kpɔ̃ ɓá se-dyí-sɛ́ɖɛ́ìn-ɖɛ̀ ɖò jè dyíɛ́? Nyɔ pàɖà ɖàa dyé kà ɓɛ́ ɔ nɔ̀mɔ̀ dyíin ɓɛ́ m̀ ké ɖɛ m̀ zà wuɖuún wɛ̃ kè ɖɛ m̀ tò ɖùù gboɛ ɔ kè ɖɛ m̀ dyé dyiɛɛ múin mɔ́ kɛ. Ðúú-kɔ̃-pà ɖíɛ́ ɓè zà nyɔ ɓè hwòɖò-dyùà hwuɖu ɓá se-dyí-sɛ́ɖɛ́ìn-ɖɛ̀ ɓè jè dyí, ké wa nyuɛ ɓɛ́ nyɔ ɓè ké ɖɛ-gbo-zĩàìn-kpòò ɓè sɔ̃ xwíɖíi dè. Bɔ̃̀-dyi-po-nyɔ̀ ɓè zi nyɔ ɓè gbo kpɛ́-kpɛ́ ɖé waà bɔ̃̀-dyi-po-po ɓèɔ̀ mú. Kɛɛ, kɛbì à mɛ wɔ̃́ jàà-bɔ̃̀ ɖò ɓá se-dyí-sɛ́ɖɛ́ìn-ɖɛ̀ ɖò jè dyíɛɛ, ɔ jè hwìɖìi-poìn-poìn mu à kpáná dyí nyuùn jɛ́ɛ́ cáà? Ɔ jù ké à dyi ti pàɖà dyí ɖú ɓó bɔ̃̀ nì kà ɓèa wúɖuún zà jè ní, ɔ ɓɛ́ìn nyuɛ ɓɛ́ à ké dyoɖoún kpá, mɔɔ ɓɛ́ à hwòɖò ké ɖé ɖei kpá pídyi. (Nɔ́ɔ́ 24:10) Ké ɖeɛɛ, ɔ ɓɛ́ìn nyuɛ ɓɛ́ à hwòɖò ké ɖé Geɖepɔɔ Kã́á-ɓòɖò ɓɛ́ ɔ ɓɛ́àìn se-dyí-sɛ́ɖɛ́ìn-ɖɛ̀ séín jè dyi zĩ̀ɛ̀n nyɛɛ gbo sɔ̀.

13. Xwɛ̀ Baɓoɔ wuɖuún-zà-zà wé séín nyɛɛ ɓɛ́ìn à gbo kpáa ɓɛ́ à ké se-dyí-sɛ́ɖɛ́ìn-ɖɛ̀ ɓè wɔ̃ zi kɛ́?

¹³ Baɓoɔ wuɖuún-zà-zà wé séín kè ɔ jè hwìɖìi-nàìn-nàìn ɓɛ́ìn à gbo kpáa ɓɛ́ à ké se-dyí-sɛ́ɖɛ́ìn-ɖɛ̀ ɓè wɔ̃ zi. Ðíí-màà ɖò kɔ̃̀ nyɛ́nɛ́ mɔ̀ Àɖíà kɛɛ hwòɖò kpá ma ɖé ɖei mìɔ ɓá kà wa nyu ma nyɔ ɓè nì ma ɖé ɔ gbɛ̀ɔ̀ múɛ gbà-kà kpɔ̃ɔ kɛɛ jè dyí. Ɔ nì pu kà wa se ma nyɔ ɓè ɓɛ́ wa nì nyɔ tɔ̀ɔ̀ ɓè kpɔ̃uń gbà-kà kɛɛ ɖɛ ɖò bũ̀ nyuɛń nìɛ. Ɔ ɖá: “Ḿ kò ma dyi, ké ḿ diè ma ḿ mìɔùn dyi, ké ḿ ɖá, ‘Ḿ poɛ jàà jɛ́ɛ́ cá kà ɓɛ́ Jɛhova mu fũ̀à-fṹá ɓè nìà kɛ jè dyi zĩ̀ìn nyɛɛ̀?’ Ɓó tia ɓaɖaa, ḿ zà ma Jóɓò 34:​22-29 wuɖuún. Vɔ̀sì ɓèa dyàà ma ḿ hwìɖìi kà ɓɛ́ nyɔ ɖò se Jɛhova dyí vìèɛ̀ ɓɛ́ìn nyɛ. Ɔ ɖòùn mɔ̀ nyɔ dyuò dyí-sɛ́ɖɛ́ìn-sɛ́ɖɛ́ìn dyí gàná cá, ké ɔ ɖòùn mɔ̀ nyɔ mu ɖɛ ɓè dyí sɛ́ɖɛ́ìn.” Kà à muà Geɖepɔɔ Kã́á-ɓòɖòɔ̀ fòìn ɓɛ́ ɔ kéà jàà dyí-sɛ́ɖɛ́ìn-sɛ́ɖɛ́ìn dyà kɛɛ, à kɔ̃̀ à ké se-dyí-sɛ́ɖɛ́ìn-ɖɛ̀ ɓè wɔ̃ zi kàùn. Xwɛ̀ kɛ́?

ÐƐ À ƁƐ́ÌN NYUƐ KÀÙN ƁÁ SE-DYÍ-SƐ́ÐƐ́ÌN-ÐƐ̀ JÈ DYÍƐ

14. Ðɛ́ à ɓɛ́ìn nyuɛ ɓɛ́ à ké ɓóɖó-kpàà se-dyí-sɛ́ɖɛ́ìn-ɖɛ̀ ɓè sɔ̃-xwíɖíi-dè-dè dyí ɓàɖàìn nyɛ́? (Kɔ̀ɖɔ́sĩ̀à 3:​10, 11)

¹⁴ À se nyɔ tɔ̀ɔ̀ ɓè se-dyí-sɛ́ɖɛ́ìn-ɖɛ̀ nyu-nyu kpé kɔ̃ún ɓéɖéɛ ɓɛ́ìn, kɛɛ à ɓɛ́ìn à mìɔùn nììn nyuu-ɖɛ̀ ɓè kpé kɔ̃ún ɓéɖéɛ. À ɖàa cɛ̃́ kà à sí Jizɛ ɓo-bɛ̃̀ìn dyììn ɖé nyɔ tɔ̀ɔ̀ ɓè mú ɖɛ̀ɓɛ̀-ɖɛ̀ɓɛ̀ múɛ. Ðɛ̀ɓɛ̀ìn-ɖɛ̀ɓɛ̀ìn nì náa ɓɛ́ìn nyuɛ ɓɛ́ à ké nyɔ tɔ̀ɔ̀ ɓè—kɛbì wa mɛ mɔ̀ se-dyí-sɛ́ɖɛ́ìn-ɖɛ̀ nyu-nyɔ̀ ɓèɛɛ kpéín dyé. (Máf. 7:12; Wóɖ. 12:17) Ɔ dè Jɛhova hwòɖò dyi ɔ jù ké à dyi nyɔ séín kpɔ̃ kpeɖeín-nɔ̀mɔ̀-kà kè dyí-sɛ́ɖɛ́ìn-kà ní.—Zà Kɔ̀ɖɔ́sĩ̀à 3:​10, 11 wuɖuún.

15. Ðɛ́ nyɔ tɔ̀ɔ̀ ɓè Baɓoɔ tɛ̀mɛ̀ìn-tɛ̀mɛ̀ìn ɓɛ́ìn se-dyí-sɛ́ɖɛ́ìn-ɖɛ̀ bũ̀ nyuɛ kàùn wɛ̃́?

¹⁵ Hwìè kpa ɖɛ kɔ̃̀ mú à ɓɛ́ìn se-dyí-sɛ́ɖɛ́ìn-ɖɛ̀ gbo vɔ̃ɔ kɛɛ mɔ̀ dyììn ɖé Geɖepɔɔ-wùɖùɔ̀ nyɔ tɔ̀ɔ̀ ɓè gbo cɛ̃-cɛ̃ mú. Xwíníínɔ̀ nyɛ́ kɔ̃̀ jè à ɖáà ná kɛ́? Ɔ mɔ̀ sepoɛɖe “Jɛhova dyí-dyuò-dyuò” ɓɛ́ìn nyuɛ ɓɛ́ nyɔ ɓɛ́ ɔ mɔ̀ ma kpeɖeín-nyìnììn-nyɔ̀ kɛɛ ké kpeɖeín-nɔ̀mɔ̀-nyɔ̀ kè gìɖìi-nyɔ̀ jù. (Àzé. 11:​6, 7, 9) Hwɛ̀ ɓɛ́ gàa ɖò kɔ̃̀ nyɛ́nɛ́ mɔ̀ ma Jèmɔ́ɔ̀ kɛ ké ma jààɔ̀ cɛ̃́ kɛɛ, ɔ kpá ma sójà-kpòò ɖò mú ɓɛ́ wa ké ma ɓóɖóɔ̀ gɔ̀mànà ɓɛ́ ɔ hwòɖò ɖá ɔ nì ma wa dyi pĩ́àìn nyɛɛ gmɛ̀ìn zà. Jèmɔ́ɔ̀ ɖá: “M̀ se nyɔ ɓè ganaún kpɔ̃̀ìn ɓɛ́ìn ɓɛ́ wa ké gbo zĩàìn. Nyɔ ɖò se ma ḿ ganaún kpɔ̃̀ìn ɓɛ́ ḿ ké ma gbo zĩàìn, kɛɛ ḿ zĩàìn ma gbo dyììn ɖé jàà ɓɛ́ ḿ cɛ̃́ ma sɔ̀ìn ɖé Baɓoɔ múɛɛ mú.” Ðɛ Jèmɔ́ɔ̀ cɛ̃́ ma kɛɛ kpá ma ɔ gbo ɓɛ́ ɔ ké ma vɔ̃ɔ ɓɔ́. Ɔ jù ké nyɔ pàɖà dyi gbo zĩàìn dyììn ɖé Baɓoɔ cɛ̃́-cɛ̃́ mú ní, nìí se-dyí-sɛ́ɖɛ́ìn-ɖɛ̀ nyu-nyɔ̀ ɓè mu kɔ̃ cɛ̃̀ìn.

16. Xwíníínɔ̀ nyɛ́ kɔ̃̀ jè m̀ mɔ́ ɓɛ́ m̀ kéà Geɖepɔɔ Kã́á-ɓòɖòɔ̀ jè nyɔ tɔ̀ɔ̀ ɓè gbo cɛ̃ kɛ́?

¹⁶ À hwòɖò-dyùàɔ̀ nyu cà-cà kà Jizɛ nì ma kà kɛ ɓɛ́ à ké Geɖepɔɔ Kã́á-ɓòɖòɔ̀ jè nyɔ tɔ̀ɔ̀ ɓè gbo cɛ̃ kà ɔ ɖòùn mɔ̀ nyɔ mu se-dyí-sɛ́ɖɛ́ìn-ɖɛ̀ jè dyi zĩ̀ìn gàná cá kɛ. Hwòɖò-kɔ̃-dè-ɖɛ̀ nìà wɛ ɓɛ́ìn nyɔ ɓè ɓɛ́ wa ɖà se-dyí-sɛ́ɖɛ́ìn-ɖɛ̀ dyí dyéɛɛ kpéí poɛ. (Jɛ̀ɖ. 29:11) Sésì, ɓɛ́ wa cɛ̃ɔ́ kà jè kĩ́ín nyɛɛ ɖá: “Jààɔ̀ cɛ̃́-cɛ̃́ ɖà ḿ gbo kpá, ɓɛ́ ḿ ké se-dyí-sɛ́ɖɛ́ìn-ɖɛ̀ ɓè ɓɛ́ ḿ ɖà dyé kè ɔ nyɔ ɓè ɓɛ́ ḿ ɖà mú mùìn nyɛɛ hwòɖò kùìn. Jɛhova nyùìn Baɓoɔ wuɖu ɓèɔ̀ kũ̀à mú ɓɛ́ ɔ ké nyɔ hwòɖò dyi dè.” Ɓɛ́ m̀ ké nyɔ-hwòɖò-dyi-dè-wùɖù ɓè nìà ɖé Baɓoɔ mú ɓáà se-dyí-sɛ́ɖɛ́ìn-ɖɛ̀ ɓè jè dyíɛ nyɔ tɔ̀ɔ̀ ɓè gbo cɛ̃ ní, m̀ kɔ̃̀ m̀ ké ti dyé nɔ̀mɔ̀ dyíin cá. Ɔ jù ké m̀ dyi Baɓo-wùɖù ɓè wa dèàìn dɔ́ɔ́ kɔ̃in ɖé cɛ̃́ɛ́-ɖɛ̀ nìà kɛ múɛ jè jàà po cá ní, nìí, nì mu kpé ɓɛ́ìn ɓɛ́ m̀ ké dɔ́ɔ́ nìà kɛ dèɛ̀ ɓɛ́ìn sɛ́ɖɛ́-kà ɖé sùkúù mɔɔ ɖé nì kũ̀à-nyùìn-naínɔ̀.b

17. Xwɛ̀ Jɛhova nyu à gbo kpáa ɓɛ́ à ké se-dyí-sɛ́ɖɛ́ìn-ɖɛ̀ ɓè hwòɖò kùìn kàùn wɛ̃́?

¹⁷ À dyuòɛ̀ dyí kà ɓɛ́ à mu se-dyí-sɛ́ɖɛ́ìn-ɖɛ̀ dyí dyéìn kánáá pu kà ɓɛ́ Sétɔ̃̀ mɔ̀à “ɓóɖó-kpà nìà kɛ wuɖuí-kɔ̃̀-nyɔ̀ɔ̀” keɛ. Kɛɛ, à ɓéɖé gbo-kpá-kpá kè hwòɖò-kɔ̃-dè-ɖɛ̀ kà à nìà ti wa muà Sétɔ̃̀ “ɓó zàùn” wɛ̃ɛ fòɛ̀n nyɛ. (Jɔ̃́ɔ́ 12:31) Ðé Baɓoɔ múɛɛ, Jɛhova zà xwíníín kɔ̃̀ jè se-dyí-sɛ́ɖɛ́ìn-ɖɛ̀ vòà dyí mìɔ kɛɛ da, ké ɔ tɛ̀mɛ̀ìn à dyí kà ɔ hwòɖò nyu nìɛ̀ ɓá fũ̀à-fṹá-ɖɛ̀ ɓè ɓɛ́ se-dyí-sɛ́ɖɛ́ìn-ɖɛ̀ dyà à kɔ̃ɛɛ jè dyí. (Wɛ́ɖɛ́ 34:​17-19) Jɛhova tɛ̀mɛ̀ìn à dyììn ɖé ɔ Dyú-gààɔ̀ mú ɓó kà à ké se-dyí-sɛ́ɖɛ́ìn-ɖɛ̀ nìà kàùn wɛ̃ kpɔ̃ɔ nyuɛ, kè kà ɓɛ́ ɔ Kã́á-ɓòɖòɔ̀ mu se-dyí-sɛ́ɖɛ́ìn-ɖɛ̀ ɓè jè dyi zĩ̀ìn gàná cá kɛ. (2 Píɖɛ̀ 3:13) Ɓèà hwòɖò-dyùàɔ̀ mɛ nyu cà-cà, ɓɛ́ ɓèà ké bɔ̃̀ nɔ̀mɔ̀ dyíin ɓáà Kã́á-ɓòɖò nìà wɛ jè dyíɛɛ cɛ̃, ɓɛ́ à ké ti kɔ̃̀ ɓaɖa ɓɛ́ “jàà kè dyí-sɛ́ɖɛ́ìn-sɛ́ɖɛ́ìn” muà ɓóɖó-kpàà kɔ̃ dyi dyíìn nyɛɛ jè hwìi gmɔ̀ kóɖó-kóɖó.—Àzé. 9:7.