Kpá Múàùn Tee Ðé Nì Nyɔ-Sùà Tiɔ̀ Mú

1-2. Xwɛ̀ Jɛhova nyu ɔ ɓiè-nyɔ̀ ɓè ɖàa súá kpá kɛɛ dya gmɔ̀ɔ̀ kɛ́? (Wɛ́ɖɛ́ 92:​12-14; dyé dyi-dyé-ɖɛ̀ɔ̀ ɖekè.)

KÀ NYƆ ɓè nì ɓóɖó-kpàà dà kò-kò ɓèɛɛ nyu súá-kpá-kpá dya gmɔ̀ɔ̀ kɛɛ kpa kòɛ̀. Nàìn ɖɛ nìà kɛ hwìɖìi: Ɔ nì m̀ hwìɖìi ti kĩ́ín ɓɛ́ m̀ dyé ma dyùì-wɔ̀ɖɔ̀ ɖò ɖé nì míɔ múɛɛ̀? M̀ mɔ́ m̀ kéɛ ma hwuɖu zà dyɛ̀ ɓɛ́ nyɔ ɖò ké seɛ ma dyé. Kɛɛ, m̀ wɔ̃́ɔ ma múin kà dyùì-wɔ̀ɖɔ̀ dyúáɖòà hwuɖu zà-zà seɛ ma nyuɛ mu ɓɛ́ dyùì pàɖà ké se ma m̀ dú kpá kɛ. Ðɛ nìà kɛ tɛ̀mɛ̀ìn kà nyɔ pàɖà nyɛ́ súá-kpá-kpá múɛ.

² Kɛɛ, kà à dyɔún-Ɓàɔ̀ nyu ɔ ɓiè-nyɔ̀ ɓè ɖàa súá kpá kɛ dya gmɔ̀ɔ̀ kɛɛ kò ní. (Nɔ́ɔ́ 16:31) Ɔ poìn wa kè cu-gɔ̃̀ ɓɛ́ ɔ wóɖó múɛɛ dyí. (Zà Wɛ́ɖɛ́ 92:​12-14 wuɖuún.) Xwíníínɔ̀ nyɛ́ kɔ̃̀ jè ɖɛ ɖɛi-poìn-poìn nìà kɛ sɛ́ɖɛ́àìn dyíɛ́? Cu-gɔ̃̀ ɓè ɓɛ́ wa ɓéɖé mí pàɖà kè cu-bùè nɔ̀mɔ̀ nyɔ́ún ɓèɛɛ mɔ̀ cu ɓè ɓɛ́ wa ɖà hwèɖèìn mìɔ kɛ. Cu-gɔ̃̀ ɓè ɓɛ́ wa ɖà hwèɖèìn mìɔ kɛɛ ɖò nì ɖé Jèpɛ̃́ìn-ɓòɖòɔ̀ kɔ̃ ké ɔ ɓéɖé cu-bùè nɔ̀mɔ̀ kɔ̃in ɓè. Cu nɔ̀mɔ̀ kɔ̃in ɓèɔ̀ ɖíɛ́ ɓè ɖà zɔ̃ táázĩ̀ìn zi kɔ̃ ɓè nyu. Kà cu-gɔ̃̀ ɓè nìà wɛ nìà kɛɛ, Jɛhova ɓiè-nyɔ̀ ɓè ɓɛ́ wa ɖà súá kpá kɛɛ jè kpa ɖɛ mìɔ ɖé ɔ gbo. Ɔ kɔ̃̀ ɖé wa jè gbo mìɔ. Ké ɔ kpáìn wa kpeɖe nɔ̀mɔ̀ dyíin ɓèɔ̀ múàùn dyi—waà ɖɛ-hwòɖò-kùìn-kùìn kè ɓó ɔ jè gboi-kpɔ̃-kpɔ̃ ɔ kè ɔ ɓiè-ɓiè jàà-kà ɓó zɔ̃ pàɖà xwíníín.

3. Cɛ̃ kà Jɛhova ɖà nyɔ-sùà ɓè kũ̀à mú nyùìn ɓɛ́ ɔ ké ɔ hwòɖòɛ̀-gbɔ-po-ɖɛ̀ ɓè nyuɛ jè.

³ Nyɔ ɖòɛ̀ súá-kpá-kpá seɛ nyu ɓɛ́ ɔ ké se ɖɛ kpa ɖé Jɛhova gbo.a Jàà kɛɛ, Jɛhova nyùìn ma nyɔ-sùà ɓè kũ̀à mú kpɛ́-kpɛ́ ɓɛ́ ɔ ké ma ɔ hwòɖòɛ̀-gbɔ-po-ɖɛ̀ ɓè nyu. Ɔ hwɔìn-kà, Seɖɔ́ mɔ̀ ma nyɔ-sùà ti Jɛhova cɛ̃ɛ ma ɔ gbo kà ɔ mu ma ɓóɖó-dù ɓèɛ̀ ɖe jùùn ké Mɛ̀sádyàɔ̀ mu ma ɖé ɔ mú dyììn nyɛ. (Jɛ́n. 17:​15-19) Mózè ɖà ma zɔ̃ pàɖà nyu ti Jɛhova ɖoɓo ma ɔ ɓɛ́ ɔ ké ma Éézùɖùɛ̀-nyɔ̀ ɓèɔ̀ ɖé Íjè-ɓòɖòɔ̀ kɔ̃ zà kɛ. (Ɛ́sé. 7:​6, 7) Ké àpɔ́sò Jɔ̃́ɔ́ ɖà ma súá kpá ti Jɛhova cɛ̃ɛ ma ɔ gbo ɓɛ́ ɔ ké ma Baɓo-cèè-ɖɛ̀ hm̀m céè kɛ.

4. Kà Nɔ́ɔ́ 15:15 nyuà cɛ̃ɛ kɛɛ, ɖɛ́ ɓɛ́ìn nyɔ-sùà ɓè gbo kpáa ɓɛ́ wa ké fũ̀à-fṹá-ɖɛ̀ ɓè wa dyé dyíɛɛ hwòɖò kùìn nyɛ́? (Dyé dyi-dyé-ɖɛ̀ɔ̀ ɖekè.)

⁴ Súá-kpá-kpá dya fũ̀à-fṹá-ɖɛ̀ pàɖà cá. Ðíí-màà ɖò cɛ̃ɛ ma dyɔ́-ɖɛ̀-kà, ké ɔ ɖá, “Súá-kpá-kpá se ɖɛ tííwè.” Kɛɛ, múàb ɓéɖé-ɓéɖé ɓɛ́ìn nyɔ-sùà ɓè gbo kpáa ɓɛ́ wa ké fũ̀à-fṹá-ɖɛ̀ ɓè ɓɛ́ súá-kpá-kpá dya kɛɛ hwòɖò kùìn. (Zà Nɔ́ɔ́ 15:15 wuɖuún.) Ðé cɛ̃́ɛ́-ɖɛ̀ nìà kɛ múɛɛ, à mu xwai-nyu-ɖɛ̀ ɓè ɓɛ́ nyɔ-sùà ɓè ɓɛ́ìn nyuɛ ɓɛ́ wa ké múà ɓéɖé teeɛ jè dɔ́ɔ́ kɔ̃in dèìn. À mu kà nyɔ tɔ̀ɔ̀ ɓè ɓɛ́ìn ɖíí-gàà kè ɖíí-màà súá ɓè nì ɖé waà dyí-poìn-kpòòɔ̀ múɛ gbo kpáa kɛɛ jè dɔ́ɔ́ kɔ̃in dèìn ɖekè. Kɛɛ kĩ́ín nyɛɛ, ɓèà cɛ̃ xwíníín kɔ̃̀ jè ɔ ɓɛ́àìn mú kàmàà ɓɛ́ nyɔ-sùà ɓè kéà múà ɓéɖéɛ jè.

ÐƐ SÚÁ-KPÁ-KPÁ ƁƐ́ÌN NÌ MÚÀƆ̀ BŨ̀ NYUƐ KƐ

5. Ðɛ́ ɓɛ́ìn nyuɛ ɓɛ́ nyɔ-sùà ɖíɛ́ ɓè hwòɖò ké ɖé ɖei kpá kɛ́?

⁵ Ðɛ́ ɓɛ́ìn nyuɛ ɓɛ́ nì hwòɖò ké ɖé ɖei kpá kɛ́? Nì hwòɖò ɓɛ́ìn dyɛ̀ ɖé ɖei kpáa sepoɛɖe m̀ se ɖɛ ɓè m̀ nyu ma kĩ́ín nyɛɛ nyuɛ ɓɛ́ìn ɖe jè. M̀ ɓɛ́ìn ti m̀ mɔ̀ ma nyɔ-gmɔ̀ ké nì dyɔɔ̀ wóɖó ma múɛ kpéɖéɛ. (Ìkí. 7:10) Ɔ hwɔìn-kà, ɖíí-màà ɖò kɔ̃̀ nyɛ́nɛ́ mɔ̀ Wuɖuɓé kɛɛ ɖá: “Ðɔún-po-po kàmà mú ɓó ḿ bìì, sepoɛɖe ní kpóɖó-dyúáɔ̀ dà séín nì ḿ puàùn ké ḿ se nàa ɓɛ́ìn ɖe cá. Ḿ se ní ɓoɔ̀ dyíi ɖúɛ ɓɛ́ìn fóɖóún ɓɛ́ ḿ ké bà-ɖɔ̀ ɓoùn po dyɛ mɔ̀ùn. Ɓóɖó nì ní sɔ̃ɔ̀ mú jèɛɛ, ɔ nì dĩ̀à-dĩ̀à ké ɔ nyuɛ ké ḿ se kũ̀à ɖò nyuɛ ɓɛ́ìn fɔɔ.” Ké ɖíí-gàà ɖò kɔ̃̀ nyɛ́nɛ́ mɔ̀ Háwóɖò ɓɛ́ ɔ nì Bɛ́fèò kũ̀à nyuɛń nyɛɛ ɖá: “Ḿ se ḿ mìɔùn dyí dyuò ɖe, ké tiɔ̀ ɖíɛ́ ɓè ɓaɖaín ní hwòɖò kpá ɖé ɖei. Ḿ ku ma dyi mìɔ, ké m̀ ɖɛ̀ɓɛ̀ ma bɔ́ɔ̀ vɔ̃-vɔ̃ mú. Nyɔ tɔ̀ɔ̀ ɓè ɖɛ̀ɓɛ̀ɛ̀ ma cɛ̃ ɖɛìn, ké wa ɖá, ‘Nyí bɔ́ɔ̀ Háwóɖò xwa, sepoɛɖe ɔ seɛ bĩɛ̀n mu fɔɔ.’ Kɛɛ kàùn wɛ̃ɛ, ḿ seɛ hwìɖìi poìn kà ḿ ɓɛ́ìn bɔ́ɔ̀ poɛ ɖe fóɖóún wɛ̃.”

6. (a) Ðɛ́ mɔ̀ xwíníín tɔ̀ɔ̀ ɓè kɔ̃̀ jè nyɔ-sùà ɓè hwòɖò ɓɛ́ìn ɖé ɖei kpáa kɛ́? (b) Ðɛ́ ɓɛ́ìn nyɔ-sùà ɓè gbo kpáa ɓɛ́ wa kéɛ gbɔ po kɛbì wa mɛ nàìn hwòtimo mɔɔ wa mɛ ɓɔ́ɔ nàìn níɛ́? (Dyé cɛ̃́ɛ́-ɖɛ̀ nìà dyí-gmɔ̀ìn-gbo-cèè-ɖɛ̀ nìà kɛ mú kɔ̃̀ hìɖì-kpà mɔ̀à “Ḿ mɛ ɓɔ́ hwòtimo nàìn ɖeè?” kɛ)

⁶ Nì hwòɖò ɓɛ́ìn ɖé ɖei kpáa dyɛ̀, sepoɛɖe m̀ se ɖɛ ɓè nyuɛ ɓɛ́ìn ɖe ɓó m̀ mìɔùn bìì. Kàà ɔ nì jɛ́ɛ́ ɔ jù ké nyɔ ɖò dyi ɓéɖé ɓɛ́ ɔ ké m̀ gbo gmɔ̀ mɔɔ m̀ dyi ɓéɖé ɓɛ́ m̀ ké nì dyú ɓèɔ̀ ɖò ɓíɖí-taún jàɖàìn ní. Mɔɔ nì hwòɖò ɓɛ́ìn ɖé ɖei kpáa sepoɛɖe m̀ nì wɛ́ɛń mìɔ, mɔɔ m̀ se dyi dyéɛ ɓɛ́ìn nɔ̀mɔ̀ dyíin ɓɛ́ m̀ ɖòùn ké dà ɖò mu mɔɔ ɓɛ́ m̀ ké hwòtimo nàìn. Ɔ mɔ̀ wìì-ɖɛ̀ ɖò cá! Kɛɛ, ɔ mɛ nì m̀ hwìɖìi kà à ɖɛ-kpa-kpa ɖé Jɛhova kè nyɔ tɔ̀ɔ̀ ɓè gboɛ se kɛbì à ɓɛ́ìn à mìɔùn gbo gmɔ̀ɔ̀ mɔɔ à ɖòùn ɓɛ́ìn da cĩ́ɛ mɔɔ à ɓɛ́ìn hwòtimo nàìn níɛ dyí ɓá. Ké à ɓɛ́ìn hwòɖò kɔ̃ dèɛ̀ kà ɓɛ́ Jɛhova wɔ̃́ kà à hwòɖòɔ̀ nyu nìɛ̀ kɛɛ múin nyɛ. Ðɛ kpa ɖɛ ɖé ɔ gboɛ mɔ̀ nyɔ à jù ɖé à hwòɖò bũ̀ɛ—nyɔ ɓɛ́ ɔ ɓéɖé ɖɛ̀ɓɛ̀ìn-ɖɛ̀ɓɛ̀ìn kè zùo-po-hwòɖò ɓó Jɛhova kè ɔ mùè Geɖepɔɔ ɓiè-nyɔ ɓè bììɛ.—1 Sám. 16:7.

7. Ðɛ́ ɓɛ́ìn nyɔ ɓè ɓɛ́ wa kpáa wììn kà wa se toɖo-kɔ̃ nìɛ̀ mu ɓɛ́ ɓóɖó-kpà nìà kɛ ké mánáín hwɛ̀ kɛɛ gbo kpáa kɛ́?

⁷ M̀ ɓɛ́ìn dyɛ̀ wììn kpáa sepoɛɖe m̀ poɛ̀n hwìɖìi kà m̀ se toɖo-kɔ̃ nìɛ̀ mu ɓɛ́ ɓóɖó-kpà nìà kɛ ké mánáín hwɛ̀ kɛ. Ɔ jù ké nì hwòɖò dyi ná nììn, ɖɛ́ ɓɛ́ìn m̀ gbo kpáa kɛ́? Ɔ mɛ nì m̀ hwìɖìi kà Jɛhova ku hwòɖò ké ɔ nì fòɛ̀n ɓɛ́ ɔ ké ɓóɖó-kpà nìà kɛ mú gbɔɔ̀ kɛ. (Àzé. 30:18) Kɛɛ, ɔ se hwòɖò kuɛń nì pídyi. Ɔ hwòɖò-ku-kuɔ̀ nì nyɔ méɔ̀ùn ɓè ti nyíɛń ɓɛ́ wa ké ɔ dyí dyuò kè ɓɛ́ wa ké ɔ ɓiè. (2 Píɖɛ̀ 3:9) Ɔ jèɛɛ, ɔ jù ké nì hwòɖòɔ̀ dyi ɖé ɖei kpá ní, vɔ̃ ɓɛ́ m̀ ké nyɔ jĩ̀-kà mu Jɛhovaa hwòɖò-ku-kuɔ̀ kpáná kɔ̃ún dyéìn hwɛ̀ ɓɛ́ ɓóɖó-kpàà ké mánáín hwɛ̀ kɛɛ jè hwìɖìi poìn. Wa ɖíɛ́ ɓè ɓɛ́ìn nì xwéɖé-dùɔ̀ nyɔ ɓè jùɛ̀?

8. Ðɛ́ wɛ́ ɓɛ́ìn nyɔ-sùà ɓè bũ̀ nyuɛ kɛ́?

⁸ Kɛbì à mɛ mɔ̀ nyɔ-gmɔ̀ mɔɔ nyɔ-sùà kɛɛ, ɔ jù ké à dyɔɔ̀ se mú wóɖó ní, à ɓɛ́ìn ɖɛ ɓè à se kɔ̃̀ à ké cɛ̃ kɛɛ cɛ̃ɛ mɔɔ ɖɛ ɓè à se kɔ̃̀ à ké nyu kɛɛ nyuɛ. (Ìkí. 7:7; Jĩ́ìn. 3:2) Ɔ hwɔìn-kà, ti Jóɓò ɓɛ́ ɔ mɔ̀ ma Jɛhovaa jàà ɓiè-nyɔ̀ kɛɛ nì ma gà dyéɛń nyɛɛ, ɔ cɛ̃ ma “gana-wùɖù” ɓè. (Jóɓò 6:​1-3) Ɓó kɔ̃in ɖeɛɛ, wɛ́ ɓɛ́ìn nyuɛ ɓɛ́ nyɔ-sùà ɖò ké ɖɛ ɓè ɔ seɔ́ nyuɛ mu mɔɔ cɛ̃ɛ mu ɔ jù ké ɔ seɔ́ má wɛ́ɛ nììn nyɛɛ nyu mɔɔ cɛ̃. Jàà kɛɛ, à séín ɖò se mɔ́ ɓɛ́ à ké à súá kpá jè kè à dyɔɔ̀ se mú wóɖó jè kũ̀à mú nyùìn ɓɛ́ à ké se kpeɖeín nɔ̀mɔ̀ ɖé nyɔ tɔ̀ɔ̀ ɓè gbo. Ɔ jù ké à dyiɛ dyí dyuò kà à ɖà ɖɛ̀ ɖò ɓɛ́ ɔ se dyí sɛ́ɖɛ́ìn nyɛɛ nyɔ ɖò gbo cɛ̃ ní, à mɛ ɓɔ́ ti zĩ̀ɛ̀n ɓó gɔ̃̀ tò jè.—Máf. 5:​23, 24.

KÀ M̀ KÉ MÚÀ ƁÉÐÉ TEEƐ

9. Xwíníínɔ̀ nyɛ́ kɔ̃̀ jè m̀ mɛ wɔ̃́àìn gbo ɓɛ́ nyɔ tɔ̀ɔ̀ ɓè kéà m̀ gbo kpá kɛ́? (Dyé dyi-dyé-ɖɛ̀ ɓèɔ̀ ɖekè.)

⁹ Wɔ̃́ìn gbo ɓɛ́ nyɔ tɔ̀ɔ̀ ɓè ké m̀ gbo kpá. (Gàɖ. 6:2) Kĩ́ín nyɛɛ, ɔ náa nyu-nyu ɓɛ́ìn dyɛ̀ mú kàmàà ɓó m̀ bìì. Ðíí-màà ɖò kɔ̃̀ nyɛ́nɛ́ mɔ̀ Gɛ̀ɖɛ̀tò kɛɛ ɖá: “Tiɔ̀ ɖíɛ́ ɓè ɓaɖaín, ɔ kàmà mú ɓɛ́ ḿ kéɛ gbo wɔ̃́ìn ɓɛ́ nyɔ tɔ̀ɔ̀ ɓè ké ḿ gbo kpá, sepoɛɖe ní hwòɖò ɖá ḿ mu gbɛ̀ jùùn ɓó wa bìì. Ɔ ɖú ma ti pàɖà dyí ɓɛ́ ḿ ké ma ní hwìɖìi-poìn-kàɔ̀ gbo zĩàìn ɓɛ́ ḿ kéɛ ma gbo wɔ̃́ìn ɓɛ́ nyɔ tɔ̀ɔ̀ ɓè ké ma ḿ gbo kpá.” Ɔ jù ké m̀ dyiɛ gbo wɔ̃́ìn ɓɛ́ nyɔ tɔ̀ɔ̀ ɓè ké m̀ gbo kpá ní, nìí, nì muɛ nyuùn ɓɛ́ wa ké múà sɔ̀àìn ɖé nyɔ ɖɛ nyí-nyí múɛɛ ɓéɖé. (Àpɔ́. 20:35) Ké nì hwòɖò mu dyi dèìn sepoɛɖe nì muɛ dyéìn kà nyɔ tɔ̀ɔ̀ ɓè ɖɛ̀ɓɛ̀ m̀ mú ké wa kɔ̃̀ ɖé nì jè gboɛ.

10. Xwíníínɔ̀ nyɛ́ kɔ̃̀ jè ɔ mɛ nìà à hwìɖìi ɓɛ́ à kéà zùo-po-hwòɖò tɛ̀mɛ̀ìn nyɛ́? (Dyé dyi-dyé-ɖɛ̀ ɓèɔ̀ ɖekè.)

¹⁰ Tɛ̀mɛ̀ìn zùo-po-hwòɖò. (Kɔ̀ɖ. 3:15; 1 Tɛ̀s. 5:18) Ɔ jù ké nyɔ tɔ̀ɔ̀ ɓè dyi ɖɛín-ɖɛ̀ ɓè nyu ɓó à bìì ní, ɔ dè à hwòɖò dyi kɛɛ ɔ ɓɛ́ìn dyɛ̀ à hwìɖìi sɔ̀ɔ̀ ɓɛ́ à ké wa zùo po. Kɛɛ, ɔ jù ké à dyi wĩín-kéɛ̀ ké à dyi wa zùo po ní, à nyuɛ ké à ɓàto ɓèɔ̀ dyuòɛ̀ dyí kà wa kpa ɖɛ ké à kpáìn ɖɛ ɓè wa nyuà à bììɛ múàùn dyiɛ. Ðéà ɓɛ́ ɔ nì nyɔ-sùà ɓè gbo gmɔ̀ùn ɖé Bɛ́fèò kɛɛ ɖá: “Ðíí-màà ɓè ɓɛ́ ḿ níà gbo gmɔ̀ùn wɛ̃ɛ ɖò sè ma nì zùo-cèè-ɖɛ̀ ɓè ɓíɖíi tee ɓó ḿ bìì. Ɔ ní céè ma ɖɛ pàɖà dyɛo, kɛɛ wa dè ní hwòɖòɔ̀ dyi. Ḿ ɖɛ̀ɓɛ̀ ɓɛ́ ḿ ké céè-ɖɛ̀ ɓèa wuɖuún zà, ké ɔ po ḿ múàùn ɓɛ́ ḿ kéɛ dyi dyuò kà ɔ kpáìn ní gbo-kpá-sɔ̃̀ɔ̀ múàùn dyiɛ.”

11. Xwɛ̀ m̀ ɓɛ́ìn nyɔ tɔ̀ɔ̀ ɓè gbo kpáa kɛ? (Dyé dyi-dyé-ɖɛ̀ ɓèɔ̀ ɖekè.)

¹¹ Vɔ̃ ɓɛ́ m̀ ké nyɔ tɔ̀ɔ̀ ɓè gbo kpá. Ɔ jù ké m̀ dyi nì tiɔ̀ kè nì ganaɔ̀ kũ̀à mú nyùìn ɓó nyɔ tɔ̀ɔ̀ ɓè gbo kpá jè ní, ɔ muɛ nyuùn ɓɛ́ m̀ ké se nì fũ̀à-fṹá-ɖɛ̀ ɓèɔ̀ jè hwìɖìi poìn mìɔ. Nɔ́ɔ́ ɖò ɓɛ́ Áféɖékà-nyɔ̀ ɓè poɛɛ ɖá, nyɔ-sùà ɓè hwɔìn céè-ɖɛ̀-dyi-dèìn-naín ɓɛ́ ɔ ɓéɖé céè-ɖɛ̀ ɓè ɓɛ́ fɔ̀nɔ̀-hwòɖò kpa ɖɛ ɓè nì múɛ. Kɛɛ, céè-ɖɛ̀ ɓè nìà céè-ɖɛ̀-dyi-dèìn-naín ɓèa kɛɛ ní tɛ̀mɛ̀ìn nyɔ ɓè ɖɛ wa mìɔùn sɔ̃ kɔ̃. Ɔ jèɛɛ, kà m̀ mɔ̀à “céè-ɖɛ̀-dyi-dèìn-naín” nì cĩ́ɛń nyɛɛ, ɖú ti dyí ɓɛ́ m̀ ké ɖɛ ɓè m̀ dyuò dyíɛɛ nyɔ-gmɔ̀ ɓè gbo cɛ̃. Diè wa dyi, ké tò wa ɖúú gbo. Cɛ̃ xwíníín kɔ̃̀ jè Jɛhovaa gmà ɓèɔ̀ dyi kpɔ̃-kpɔ̃ sɛ́ɖɛ́àìn dyí, kè kà ɔ muɛ nyuùn ɓɛ́ wa ké múà ɓéɖéɛ jè wa gbo. Jàà kɛɛ, nì mu múà ɓéɖéìn ɔ jù kè m̀ dyi nyɔ-gmɔ̀ ɓè mɔ̀à nì ɓàto ɓè kɛɛ hwòɖò dyi dè ké m̀ dyi wa kpéí po ní.—Wɛ́ɖɛ́ 71:18.

12. Kà Àzédyà 46:4 nyuà cɛ̃ɛ kɛɛ, ɖɛ́ Jɛhova ɖá ɔ mu nyɔ-sùà ɓè bìì nyuùn wɛ̃́? (Dyé dyi-dyé-ɖɛ̀ ɓèɔ̀ ɖekè.)

¹² Zɔ̀ìn Jɛhova kpé. À ɓɛ́ìn saà mɔɔ kpé ɓɛ́ìn à dyí hwɛ̀ɛ̀ dyɛo, kɛɛ Jɛhova “ní sa, mɔɔ ké kpé ní hwɛ̀ ɔ dyí.” (Àzé. 40:28) Xwɛ̀ Jɛhova nyu ɔ kpé zi dyí ɓúáùnɔ̀ kũ̀à mú nyuɛ̀n nyɛ́? Hwìè ɖò kɔ̃̀ mú ɔ nyuɛ náa kɛɛ mɔ̀ dyììn ɖé nyɔ-sùà ɓè kpéí-po-po mú. (Àzé. 40:​29-31) Jàà kɛɛ, ɔ cɛ̃ɛ kà ɓɛ́ ɔ mu wa gbo kpáùn wɛ̃. (Zà Àzédyà 46:4 wuɖuún.) Ké Jɛhova nyu ɖɛ ɓè ɔ cɛ̃ kɛ tee. (Jas. 23:14; Àzé. 55:​10, 11) M̀ dyi ɓaà ké m̀ dyi kà Jɛhova ɖɛ̀ɓɛ̀ m̀ mú ké ɔ nì m̀ gbo kpáuń wɛ̃ɛ dyé ní, ɔ muɛ nyuùn ɓɛ́ m̀ ké múà ɓéɖé.

13. Kà 2 Kɔ̀ɖéíntĩ̀ɔ̀ 4:​16-18 nyuà cɛ̃ɛ kɛɛ, ɖɛ́ mɛ nì à hwìɖìi kɛ́? (Dyé dyi-dyé-ɖɛ̀ ɓèɔ̀ ɖekè.)

¹³ Dyàà m̀ mìɔùn hwìɖìi kà nì fũ̀à-fṹá-ɖɛ̀ ɓèɔ̀ se hwèɖèɛ̀n muɛ. Ɔ jù ké ɔ dyi à hwìɖìi nì kà fũ̀à-fṹá-ɖɛ̀ ku wɔ̃ ɖò nì ɓó ti-wè bììɛ ní, ɔ mu xwa fɛ̃́ìn ɓɛ́ à kéɛ hwòɖò kùìn. Ké Baɓoɔ cɛ̃ɛ wáɖáá kà ɓɛ́ súá-kpá-kpá kè wɛ́-wɛ́ nì ɓó ti-wè bììɛ. (Jóɓò 33:25; Àzé. 33:24) Ɔ jèɛɛ, m̀ ɓɛ́ìn múà ɓéɖéɛ sepoɛɖe m̀ dyuòɛ̀ dyí kà ɓɛ́ ti nɔ̀mɔ̀ dyíin ɓè nì ɖé m̀ dyúa ké ɔ se ɖé m̀ ɖeín nyɛ. (Zà 2 Kɔ̀ɖéíntĩ̀ɔ̀ 4:​16-18 wuɖuún.) Kɛɛ, ɖɛ́ nyɔ tɔ̀ɔ̀ ɓè ɓɛ́ìn nyuɛ ɓɛ́ wa ké gbo-kpá-sɔ̃̀ tò kɛ́?

KÀ NYƆ TƆ̀Ɔ̀ ƁÈ ƁƐ́ÌN GBO-KPÁ-SƆ̃̀ TÒƐ̀ KƐ

14. Xwíníínɔ̀ nyɛ́ kɔ̃̀ jè ɔ kpaà ɖɛ ɓɛ́ à kéà nyɔ-sùà ɓè gboi té mɔɔ wa ɖá kɛ́?

¹⁴ Té ɖíí-gàà kè ɖíí-màà sùà ɓè gboi, ké ɖá wa tee. (Híì. 13:16) Nyɔ-sùà ɓè hwòɖò ɓɛ́ìn nìɛ̀ kà wa kpá kpɛín dyiɛ. Ðíí-gàà ɖò ɓɛ́ ɔ se dà ɖò síɛ ɓɛ́ìn kɔ̃̀ nyɛ́nɛ́ mɔ̀ Kàmíì kɛɛ ɖá: “Ḿ kò gbòùn tee sɔ̀ìn gànà-kṹún gbo mu hwìo gboɛ. Ɔ jèɛɛ, fũ̀à-fṹá dè ḿ dyí. Tiɔ̀ ɖíɛ́ ɓè ɓaɖaín, ní hwòɖò ɖá ḿ nì kà ganìà ɓɛ́ ɔ nì kòò múɛ nìà kɛ. Ní hwòɖò kpá ɖé ɖei ké ḿ kpá dyoɖoún.” À dyi nyɔ-sùà ɓè gboi té ní, à tɛ̀mɛ̀ìn wa dyí kà wa kpa ɖɛ ɖé à gboɛ kè kà à ɖɛ̀ɓɛ̀ wa múɛ. Jɛ́ɛ́ kɛɛ, ɔ ɓɛ́ìn dyɛ̀ à hwìɖìi nìɛ̀ ti à mɔ́ ma ɖíí-gàà mɔɔ ɖíí-màà sùà ɖò ɖáa dyi mɔɔ gboi téɛ dyi, kɛɛ à seɛ ma náa nyuɛ. À séín ɓéɖé ɖɛ pàɖà ɓó nyu jè. Ɔ jèɛɛ, ɖɛ́ ɓɛ́ìn à gbo kpáa ɓɛ́ à ké “ɖɛ mɔ̀ ɖɛ nɔ̀mɔ̀ dyíin nyɛɛ dyí dyuòɛ̀ ɓɛ́ìn,” dè nyɔ-sùà ɓè gboi té-té kɔ̃ kɛ́? (Fèɖ. 1:10) M̀ ɓɛ́ìn nyɔ-sùà ɓè nì ɖé nì dyí-poìn-kpòòɔ̀ múɛɛ nyɛ́nɛ́ kè ti nì mu wa ɖáùn mɔɔ gboi téìn nyɛɛ ɓíɖíi céèɛ̀. M̀ ɓɛ́ìn ti páún poɛ ɓɛ́ m̀ ké wa gboi té; ké gã ti jɛ́ɛ́ ɖò.

15. Ðɛ́ nyɔ-gmɔ̀ ɓè kè nyɔ-sùà ɓè ɓɛ́ìn nyuɛ kɛ́?

¹⁵ Ɔ jù ké m̀ dyi nyɔ-gmɔ̀ jùìn, m̀ ɓɛ́ìn dyɛ̀ ɖɛ ɓè m̀ kè nyɔ-sùà ɓè ké jè cɛ̃ mɔɔ ɓè ké nyuɛ jè hwìɖìi poɛ̀n. Kɛɛ, ɓɔ́ɔ jè hwìɖìi poɛ̀n mìɔ. Jù ɓàto nɔ̀mɔ̀ dyíin pu. (Nɔ́ɔ́ 17:17) Ðú ti dyí ɓɛ́ m̀ kè nyɔ-sùà ɓè ké dɔ́ɔ́ dè hwɛ̀ dyí-poìn-poìn ɓèɔ̀ ké gbɔ dè mɔɔ wa ɖà hwɛ̀ ní. M̀ ɓɛ́ìn dyɛ̀ wa dyi dièɛ̀ ɓɛ́ wa ké Baɓo vɔ̀sì ɖò wa ɖɛ̀ɓɛ̀ mú mìɔ mɔɔ péé ɓè wa ɖɛ̀ɓɛ̀ ma nyu ɖɛín ti wa mɔ̀ ma dyú-gbɔ́ɔ́ kɛɛ jè m̀ gbo cɛ̃. M̀ ɓɛ́ìn wa gbo cɛ̃ɛ ɓɛ́ m̀ kè wa ké JW Broadcasting^® víɖò ɖò dyi dyé. M̀ ɓɛ́ìn wa gbo kpáa ɖé hwìè tɔ̀ɔ̀ ɓè mú ɖekè. Ɔ hwɔìn-kà, m̀ ɓɛ́ìn jè gbo dyéɛ ɓɛ́ wa gàɖàfò-ɖúúɔ̀ ké kũ̀à nyu nɔ̀mɔ̀ dyíin mɔɔ m̀ ɓɛ́ìn céè-ɖɛ̀ ɖìè ɓè nɛɛ̀ kɔ̃ zàà ɓó wa bìì. Ðíí-màà ɖò kɔ̃̀ nyɛ́nɛ́ mɔ̀ Káwóɖò kɛɛ ɖá: “M̀ kè nyɔ-sùà ɓè mɛ nyu ɖɛ m̀ kpáìn múàùn dyiɛ. Ḿ ɖà nyɛ dyɛo, kɛɛ ḿ mɔ́ ḿ ké cĩ́-cĩ́ múà dyi kpáìn. Ḿ ɖɛ̀ɓɛ̀ ɖɛ dɔ̃-dɔ̃ kè ḿ ké nyɔ tɔ̀ɔ̀ ɓè ɖɛ ɖi-ɖi kè dà kò-kò ɓè mu-mu ɔ kè mɛɛ́-ɖɛ̀ ɓè dyi dyé-dyé mú.” Ké ɖíí-màà ɖò kɔ̃̀ nyɛ́nɛ́ mɔ̀ Máwáɖà kɛɛ ɖá: “Ní ɓàto ɓèɔ̀ ɖò mɔ̀ zɔ̃ kpáɖá-nyɔ hĩinyɛ ɓaɖa-bùè. Zɔ̃ kpáɖá-nyɔ sɔ̃́ ɓaɖa-bùè sè mɛ̀nɛ̀ìn-sɔ̃́ nì à sɔ̃́ɔ̀ pṹa. Kɛɛ, zɔ̃ ɓèa jè sɔ̀ ḿ hwìɖìi sepoɛɖe à sɔ̃́ɔ̀ nyu péé ké à dyé víɖò ɓè dyi. Ké à ɖò dyi fũ̀à-fṹá-ɖɛ̀ ɓè dyi dyé ní, à diè à mùè ɖò dyi.”

16. Xwíníínɔ̀ nyɛ́ kɔ̃̀ jè ɔ kpaà ɖɛ ɓɛ́ à kéà nyɔ-sùà ɓè píɖɛín kpa kɛ́?

¹⁶ Wa dyi píɖɛín muɛń nììn kpa wa. Ɓó nyɔ-sùà ɓè píɖɛín gbò zɔ̃̀ kpá-kpá kɔ̃in nyɛɛ, m̀ ɓɛ́ìn jè gbo dyéɛ ɓɛ́ nyɔ-hwoò-nyɔ̀ ɓèɔ̀ ké wa hwoò kè ɓɛ́ wa ké wa gbo gmɔ̀ nɔ̀mɔ̀ dyíin. (Àzé. 1:17) M̀ ɓɛ́ìn wa gbo kpáa ɓɛ́ m̀ ké ɖɛ ɓè nyɔ-hwoò-nyɔ̀ɔ̀ cɛ̃ kɛɛ ɓíɖíi céè ɓó wa bìì. Ðíí-màà sùà ɖò kɔ̃̀ nyɛ́nɛ́ mɔ̀ Wuɖufí kɛɛ ɖá: “Ɔ jù ké ḿ ɖòùn dyi píɖɛín mu ní, nyɔ-hwoò-nyɔ̀ ɓèɔ̀ ní tò ḿ ɖùù gbo kóɖó-kóɖó. Tiɔ̀ ɖíɛ́ ɓè ɓaɖaín, wa cɛ̃ɛ ké wa ɖá, ‘M̀ se wɛ́ɛ nì; m̀ nì ɖɛi ɓɔ́ɖɔ́ɛ̀n pu.’ Kɛɛ, ɔ jù ké ḿ ké nyɔ ɖò dyi mu ní, kà nyɔ-hwoò-nyɔ̀ ɓèɔ̀ nyu ḿ kpɔ̃ɔ kɛ kò ní. Ḿ po ɖíí-gàà kè ɖíí-màà ɓè ɓɛ́ wa ɖú wa ti dyí ɓó ḿ píɖɛín kpa jèɛɛ zùo mìɔ.”

17. Hwìè nyɛ́ kɔ̃̀ mu m̀ kè nyɔ-sùà ɓè ɓɛ́ìn wuɖu wáɖáá kɛ́?

¹⁷ M̀ kè wa mɛ wáɖá Geɖepɔɔ-wùɖù. Nyɔ-sùà ɖíɛ́ ɓè se kpéí nì ɖe ɓɛ́ wa ké wuɖu wáɖá sɔ̀ gbò gbo mu gbò gbo. Ɔ jèɛɛ, m̀ ké ɖíí-màà sùà ɖò ɓɛ́ìn hwìì kũ̀à mú nyuɛ̀n ɓó wuɖu wáɖá jèè? M̀ ɓɛ́ìn dyɛ̀ ɔ gmɛ̀ nyíɛ ɓɛ́ ɔ ké ɓó hwììɔ̀ wáún dya dèɖè. Mɔɔ m̀ ké ɖíí-gàà sùà ɖò ɓɛ́ìn nì Baɓo cɛ̃́-nyɔ̀ ɖò gbo muɛɛ̀, mɔɔ ɓè ɓɛ́ìn Baɓo cɛ̃́-cɛ̃́ɔ̀ ɖé ɔ ɓíɖí-taún nyuɛ̀nǹ? Ɛ́ɖɔ̀ ɓè ɓɛ́ìn páún poɛ ɓɛ́ wa ké dyí-poìn-poìn ɓó Geɖepɔɔ-wùɖù wáɖá jèɛ ɓéɖé ɖé nyɔ-sùà ɖò ɓíɖí-taún ɓɛ́ ɔ kéɛ múin gã̀a ɓɛ́ìn. Ðɛ séín ɖò ɓɛ́ à nyu ɓó nyɔ-sùà ɓè dya dè jèɛɛ zi ɖɛ kpáùn mìɔ.—Nɔ́ɔ́ 3:27; Wóɖ. 12:10.

18. Ðɛ́ à mu dɔ́ɔ́ kɔ̃in dèìn ɖé cɛ̃́ɛ́-ɖɛ̀ nyɔ kɔà ɓó dyíɛ múɛ́?

¹⁸ Cɛ̃́ɛ́-ɖɛ̀ nìà kɛ ɖàa à hwìɖìi dyà kà ɓɛ́ Jɛhova ɖɛ̀ɓɛ̀ nyɔ-sùà ɓè mú ké ɔ kpáìn wa jè múàùn dyiɛ. Ké kàà à séín nìà dyí-poìn-kpòòɔ̀ múɛɛ hwòɖò nyu nìɛ̀! Sùà-kpá-kpá mɔ̀ ɖɛ kàmàùn-kàmàùn, kɛɛ dyììn ɖé Jɛhovaa gbo-kpá-sɔ̃̀ múɛɛ, m̀ ɓɛ́ìn múà ɓéɖéɛ tee. (Wɛ́ɖɛ́ 37:25) Ɔ mɔ̀ nyɔ kpéí-po-ɖɛ̀ ɖò cá ɓɛ́ m̀ kéɛ dyí dyuò kà ɓɛ́ ti nɔ̀mɔ̀ dyíin ɓè nì ɖé m̀ dyúa ké ɔ se ɖé m̀ ɖeín nyɛ! À mɔ̀ nyɔ ɓè mɔ̀à nyɔ-sùà ɓè mɔɔ dyú ɓè mɔɔ à ɓàto ɓè nì wɛ́ɛń nyɛɛ gbo-gmɔ̀-nyɔ̀ kɛɛ mɔ̀ùn ɖé? Xwɛ̀ m̀ ɓɛ́ìn múà ɓéɖéɛ teeɛ́? À mu dyi-diè-ɖɛ̀ nìà wɛ gɔ̃̀-jù-wùɖùɔ̀ dɔ́ɔ́ kɔ̃in dèìn ɖé cɛ̃́ɛ́-ɖɛ̀ nyɔ kɔà ɓó dyíɛ mú.