À se cɔ́cì-nàìn-nyɔ̀ ɓě ɓɛ́ wa pɛ́ɛ̀ kɛɛ ɓéɖé ɖé à dyí-poìn-kpòòɔ̀ mú. Kɛɛ kà ɔ nì ma ti ɓɛ́ Kɛ́ɖɛ́ì ɖeín-sí-nyɔ̀ ɓě dè ma dyí-poìn-poìn gbɔ kĩ́ín nyɛɛ, kǎà wa gã ɛ́ɖɔ̀ ɓě ɓɛ́ìn kpéɛ ɓɛ́ wa ké “ɓáɖáá kúɖúú ɓě mɔ̀à Gèɖèpɔ́ɔ̀ nyɔ ɓě” kɛɛ “dyí gmɔ̀.” (Àpɔ́sò 20:28) Ɛ́ɖɔ̀ ɓě nìà kɛ mɔ̀ gàa ɓě ɓɛ́ Gèɖèpɔ́ɔ̀ zùùɔ̀ nì wa kɔ̃, ké wa nì dyí-poìn-kpòɔ̀ dyúa, ké wa gmɔ̀ Gèɖèpɔ́ɔ̀ ɓáɖáá kúɖúú ɓěɔ̀ dyíɛ. Wa ní nyuɛ ‘ɖé hwòɖǒ se wɔ̃́ mú, kɛɛ wa nyuɛ ɖéɛ hwòɖǒ-wɔ̃́-wɔ̃́ mú, ké wa ní nyuɛ ɓó wíɖí dyé jè, kɛɛ wa fṹà ɓó ɔ nyu jè.’ (1 Píɖɛ̀ 5:1-3) Ðɛ́ kũ̀à ɓɛ́ wa nyu ɓó à bììɛ́?

Wa kɔ̃̀ à jè gbo, ké wa gmɔ̀ à dyí. Ɛ́ɖɔ̀ ɓěɔ̀ zàìn nyɔ hwìè da sɔ̀ìn ɖé Báɓòɔ̀ mú, ké wa kpá à gbo ɓɛ́ à ké Jɛ̀hóvà kíɖíí sè. Sepóɛɖé wa dyuòɛ̀ dyí kà ɓɛ́ Gèɖèpɔ́ɔ̀ ɖǎ wa kũ̀à kpa ɖɛ nìà kɛ nyí jèɛɛ, ɛ́ɖɔ̀ ɓěɔ̀ ní kɔ̃̀ ɔ nyɔ ɓěɔ̀ wuɖuí, kɛɛ wa nyuɛ ɓɛ́ à ké mú wóɖó, kè ɓɛ́ à ké múà ɓéɖé. (2 Kɔ̀ɖéíntĩ̀ɔ̀ 1:24) Kà ɓáɖáá dyí-gmɔ̀-nyɔ̀ gmɔ̀à ɔ ɓáɖáá ɖò-ɖò ɓěɔ̀ gbo nɔ̀mɔ̀ dyíin nyɛɛ, kǎà ɛ́ɖɔ̀ ɓě vɔ̃ ɓɛ́ wa ké nyɔ ɓě nìà ɖé dyí-poìn-kpòɔ̀ múɛɛ dyí dyuò ɖò-ɖò séín.—Nɔ́ɔ́ 27:23.

Wa tɛ̀mɛ̀ìn nyɔ kà à ké Gèɖèpɔ́ɔ̀ mɔ́ɔ́-ɖɛ̀ nyuɛ. Wíkì séín xwíníín nyɛɛ, ɛ́ɖɔ̀ ɓěɔ̀ tɛ̀mɛ̀ìn à ɖɛ ɖé dyí-poìn-poìn ɓěɔ̀ mú ɓɛ́ à hwìɖǐǐ-taɓa-taɓaɔ̀ ké dyi ku. (Àpɔ́sò 15:32) Gàa ku dúún ɓě nìà kɛ nì bɔ̃̌ nɔ̀mɔ̀ dyíin kpa kũ̀àɔ̀ dyúa, ké à kè wa nyu kũ̀à nìà kɛ ké wa tɛ̀mɛ̀ìn nyɔ kà séín ɓɛ́ à ké Gèɖèpɔ́ɔ̀-wùɖù-wáɖá-kũ̀àɔ̀ nyuɛ.

Wa po nyɔ kpéí ɖò-ɖò. Ɓɛ́ wa ké à gbo kpá ɓɛ́ gbo-kpɔ̃ìn-kpɔ̃ìn nìà à kè Jɛ̀hóvà pṹa kɛ ké dyi kuɛɛ, ɛ́ɖɔ̀ ɓěɔ̀ ɓɛ́ìn à gboi téɛ ɖé à ɓíɖí-taún mɔɔ ɖé Kĩ́dɔ̃̀ Hɔ́ɔ̀ zɔ̃̀ ɓɛ́ wa ké à gbo kpá-kpá kè hwòɖǒ-dyi-dè-dè nyí sɔ̀ìn ɖé Báɓòɔ̀ mú.—Jĩ́ìn 5:14, 15.

Kɔ ɓó kũ̀à ɓɛ́ wa ɓéɖéà ɖé dyí-poìn-kpòɔ̀ múɛ gboíɛɛ, ɛ́ɖɔ̀ ɖíɛ́ ɓě ɓéɖé kũ̀à kà kò ɖò ɓě kè waà xwéɖé-dù ɓě jè gbo gmɔ̀-gmɔ̀ ɓɛ́ ɔ ɖú wa ti dyí ɖekèɛ̀. À ɓéɖé ɓɛ́ à ké à ɖíí ku dúún ɓě nìà kɛ kpéín dyé.—1 Tɛ̀sàɖónìà 5:12, 13.

• Ðɛ́ kũ̀à ɓɛ́ ɛ́ɖɔ̀ ɓě nìà dyí-poìn-kpòɔ̀ múɛɛ nyu kɛ́?

• Xwɛ̌ ɛ́ɖɔ̀ ɓěɔ̀ mɔ́ à nɔ̀mɔ̀ dyíin dyi dyììn ɖé ɖɛ kò-kò ɓě múɛ́?

Báɓòɔ̀ cɛ̃ nyɔ-dù sɔ̃́ ɓě ɓɛ́ wa mɔ̀ dyí-poìn-kpòɔ̀ dyí-gmɔ̀-nyɔ̀ ɓěɛɛ jè. Jɛ̀hóvà Zàse ɓěɔ̀ ɖáìn wa “ɛ́ɖɔ̀ ɓě kè mìnìsíwɔ́ɖɔ̀ sɛ́vɛ́ìn ɓě.” (Fèɖópĩ̀ɔ̀ 1:1, New World Translation [NW]) Jǎà kɛɛ, gàa ɓě nì kà kɛɛ vò dyí ɖé dyí-poìn-kpò ɖò-ɖò ɓěɔ̀ mú. Ðɛ́ kũ̀à ɓɛ́ mìnìsíwɔ́ɖɔ̀ sɛ́vɛ́ìn ɓěɔ̀ nyu ɓó à kpáná dyé jè kɛ́?

Wa kpá ɛ́ɖɔ̀ ɓěɔ̀ gbo. Mìnìsíwɔ́ɖɔ̀ sɛ́vɛ́ìn ɓěɔ̀ kpɔ̃ Jɛ̀hóvà jè dyi kóɖó-kóɖó, ké wa mɔ̀ hwòɖǒ-kɔ̃-dè-nyɔ̀ ɓě, ké wa kpɔ̃ wa kũ̀à ɓěɔ̀ gboi. Wa ɖíɛ́ ɓě mɔ̀ nyɔ gmɔ̀ ɓě kè gàa vɛ̀nɛ̀ ɓě. Wa nyu kũ̀à kpa ɖɛ ɓě se ɖɛ-tɛ̀mɛ̀ìn-tɛ̀mɛ̀ìn dyí ɓá kɛɛ ɖé dyí-poìn-kpòɔ̀ mú kè Kĩ́dɔ̃̀ Hɔ́ɔ̀ zɔ̃̀. Kũ̀à ɓě wa nyuà kɛɛ kpá ɛ́ɖɔ̀ ɓěɔ̀ gbo ɓɛ́ wa ké ɖɛ tɛ̀mɛ̀ìn kè ɓɛ́ wa ké à gbo kpáa ɓɛ́ìn.

Wa nyu kũ̀à kpa ɖɛ mɛ́nɛ́ɛ́ ɓě. Mìnìsíwɔ́ɖɔ̀ sɛ́vɛ́ìn ɖíɛ́ ɓě mɔ̀ nyɔ ɓě dyià dyí-poìn-poìn ɓěɔ̀ múɛɛ hwìǐ-kpɔ̃-nyɔ̀ ɓě. Wa ɖíɛ́ ɓě gmɔ̀ wùɖù-gbɔ̀ɖɔ̀ɔ̀ kè céè-ɖɛ̀ ɓě ɔ kè dyí-poìn-kpòɔ̀ wíɖí jè gbo. Ké wa ɖíɛ́ ɓě mɔ̀ Gèɖèpɔ́ɔ̀-wùɖùɔ̀ wáɖá-naín da-zà-nyɔ̀ ɓó nyɔ ɓě nìà dyí-poìn-kpòɔ̀ múɛɛ bìì. Ké ɖeɛɛ, wa kpá wa ɖíí ɓěɔ̀ gbo ɓɛ́ wa ké Kĩ́dɔ̃̀ Hɔ́ɔ̀ gbo gmɔ̀. Ɛ́ɖɔ̀ ɓěɔ̀ ɓɛ́ìn wa dyi dièɛ̀ ɓɛ́ wa ké nyɔ sùà ɓě gbo-kpá-sɔ̃̀ nyí. Mìnìsíwɔ́ɖɔ̀ sɛ́vɛ́ìn ɓěɔ̀ nyu kũ̀à séín ɓɛ́ wa nyí wa kɛɛ ɖé hwòɖǒɛ̀-wɔ̃́-wɔ̃́ mú, ké nyɔ ɓě nìà ɖé dyí-poìn-kpòɔ̀ múɛɛ dyé wa kpéín ɓó ɔ náa nyu jè.—1 Tímétè 3:13.

Wa mɔ̀ dyí-tɛ̀mɛ̀ìn-ɖɛ̀ nɔ̀mɔ̀ dyíin kà gàa ɓě mɔ̀à Kɛ́ɖɛ́ì ɖeín-sí-nyɔ̀ ɓěɛɛ kéɔ́ nìɛ̀. Wa gã mìnìsíwɔ́ɖɔ̀ sɛ́vɛ́ìn ɓě, sepóɛɖé wa ɓéɖé Kɛ́ɖɛ́ì ɖeín-sí-nyɔ̀ɛ̀ kpeɖe ɓě. Wa dyi ɖɛ tɛ̀mɛ̀ìn ɖé dyí-poìn-poìnɔ̀ mú ní, nìí, wa kùìn à hwìɖǐǐ-taɓa-taɓaɔ̀ dyi. Dyììn ɖé Gèɖèpɔ́ɔ̀-wùɖù wáɖá-wáɖáɔ̀ dyúa nì-nì múɛɛ, wa po à kpéí. Sepóɛɖé wa kè ɛ́ɖɔ̀ ɓěɔ̀ kpɔ̃ìn gbo ɖé kũ̀à nyu-nyu mú jèɛɛ, wa nyuɛ ké múà kè dyúáɖò-nì-nì nì ɖé dyí-poìn-poìnɔ̀ mú. (Ìfísĩ̀ɔ̀ 4:16) Ti ɖǎ ɖé dyúa mú ní, nìí, wa mɔ̀ùn ɓɛ́ìn kpé ɓɛ́ìn ɓɛ́ wa ké ɛ́ɖɔ̀ ɓě jǔ.

• Gàa ɓěɔ̀ nyɛ́ mɔ̀à mìnìsíwɔ́ɖɔ̀ sɛ́vɛ́ìn ɓě kɛ́?

• Xwɛ̌ mìnìsíwɔ́ɖɔ̀ sɛ́vɛ́ìn ɓěɔ̀ kpá dyí-poìn-kpòɔ̀ gbo ɓɛ́ ɔ ké kũ̀à nyu nɔ̀mɔ̀ dyíin nyɛ́?

Báɓòɔ̀ wáká dyɛ̀ wa céè ma ɖé Gìɖìí-wùɖù múɛɛ cɛ̃ Bànábà kè Pɔ́ɔ̀ jè kpɛ́-kpɛ́. Gàa ɓě nìà kɛ mɔ̀ ma dyí-poìn-kpò kɔ̃in-té-nyɔ̀ ɓě, ké wa té ma dyí-poìn-kpò ɓě nì ma kà kĩ́ín nyɛɛ kɔ̃in. Xwíníínɔ̀ nyɛ́ kɔ̃̀ jè kɛ́? Sepóɛɖé wa ɖíí ɓěɔ̀ mú wóɖó jè kpɔ̃ ma wa hwòɖǒ mìɔ. Pɔ́ɔ̀ cɛ̃ɛ ma kà ɔ mɔ́ ɓɛ́ ɔ ké ma ɔ ‘ɖíí ɓěɔ̀ gbo ɖe kɔ́ìn, ɓɛ́ ɔ ké ma wa kɔ̃in té’ kɛ. Ɔ hwòɖǒ wɔ̃́ ɓɛ́ ɔ ké ma máa hɔ̃dɛ̀ɖɛ̀ pàɖǎ kpa ɓɛ́ ɔ ké ma wa dyi kùìn. (Àpɔ́sò 15:36) Ðɛ dyúáɖòɔ̀ kpɔ̃ à dyí-poìn-kpò kɔ̃in-té-nyɔ̀ ɓě nìà zɛ̃̌ɛ̀ kɛɛ hwòɖǒ ɖekè.

Wa dyi ɓɛ́ wa ké à kpéí po. Dyí-poìn-kpò kɔ̃in-té-nyɔ̀ ɖò-ɖò ɓě té dyí-poìn-kpò ɓɛ́ìn 20 mɔɔ zi kɔ̃ jǔɛ kɛɛ kɔ̃in kpa sɔ̃́ ɖé zɔ̃ dyúáɖò xwíníín, ké wa nyu wíkì dyúáɖò ɖé dyí-poìn-kpò ɓěɔ̀ gbo ɖò-ɖò. À dyé kpáná mìɔ sɔ̀ìn ɖé gàa ɓě nìà kɛ kè waà gmàà ɓěɛ̀ ɖɛ-dyuò-dyuò mú, ɔ jǔ ké wa dyi nyɔ́nɔ́ ɓéɖéín. Wa vɔ̃ ɓɛ́ wa ké nyɔ gmɔ̀ kè nyɔ sùà ɓě dyí dyuò, ké wa hwòɖǒ fṹà ɓɛ́ à kè wa ké Gèɖèpɔ́ɔ̀-wùɖùɔ̀ wáɖáuń mu, ɔ kè ɖé à Báɓò-cɛ̃́-nyɔ̀ ɓěɔ̀ gbo. Dyí-poìn-kpò kɔ̃in-té-nyɔ̀ ɓě nìà kɛ kè ɛ́ɖɔ̀ ɓěɔ̀ nyí à gbo-kpá-kpá ké wa kùìn à dyi. Wa wáɖá nyɔ kpéí-po-wùɖù ɓě ɖé dyí-poìn-poìn mɛ́nɛ́ɛ́ ɓě kè dyí-poìn-poìn vɛ̀nɛ̀ ɓě mú.—Àpɔ́sò 15:35.

Wa kɔ̃̀ ɖé à séín jè gbo. Dyí-poìn-kpò kɔ̃in-té-nyɔ̀ ɓě kɔ̃̀ kà dyí-poìn-kpò ɓěɔ̀ Gèɖèpɔ́ɔ̀ jè gboi-kpɔ̃-kpɔ̃ nyu nìɛ̀ kɛɛ jè gbo. Wa kè ɛ́ɖɔ̀ kè mìnìsíwɔ́ɖɔ̀ sɛ́vɛ́ìn ɓěɔ̀ poìn dyí ɓɛ́ wa ké kà kũ̀àɔ̀ nyu dyúa muɛ kɛɛ kɔ̃in gmɔìn, kè ɓɛ́ kɔ̃in-té-nyɔ̀ɔ̀ ké wa naún po ɓó kà wa ké waà kũ̀à ɓěɔ̀ kpɔ̃-sɔ̃̀ nyuɛ. Wa kpá pàníɛ̀ ɓěɔ̀ gbo ɓɛ́ wa kũ̀àɔ̀ ké mú wóɖó. Wa kpáìn múàǔn dyi ɓɛ́ wa ké nyɔ ɖìè ɓě dyià ɖé dyí-poìn-poìnɔ̀ múɛɛ dyí dyuò, kè ɓɛ́ wa ké kà wa nì dyúa muɛń ɖé waà Gèɖèpɔ́ɔ̀ bũ̌in xwɛ̃́ìn-xwɛ̃́ìn múɛɛ jè wɔ̃́. À ɖíí ɖò-ɖò ɓě nìà kɛ tò wa mìɔùn kà à ‘mǔè kũ̀à-nyu-nyɔ̀ ɓě ɓɛ́ wa ké à gbo kpá.’ (2 Kɔ̀ɖéíntĩ̀ɔ̀ 8:23) À mɛ sí wa hwìɖǐǐ-taɓa-taɓa kè wa Gèɖèpɔ́ɔ̀ ɓiè-ɓièɔ̀ kíɖíí.—Híìbúɖúù 13:7.

• Xwíníínɔ̀ nyɛ́ kɔ̃̀ jè dyí-poìn-kpò kɔ̃in-té-nyɔ̀ ɓě téà dyí-poìn-kpò ɓěɔ̀ kɔ̃in nyɛ́?

• Xwɛ̌ m̀ ɓɛ́ìn kpáná dyéɛ sɔ̀ìn ɖé wa dyi-dyiɔ̀ múɛ́?

Gǎ-ɖɛ̀ ɖò dyi kpáín, Jɛ̀hóvà Zàse ɓě fṹà ɓɛ́ wa ké ɖɛ ɖò nyu ɓó wa ɖíí ɓě ɓɛ́ gǎ-ɖɛ̀ kpáa gboɛɛ gbo kpá jè. Kũ̀à nì kà ɓěa tɛ̀mɛ̀ìn kà ɓɛ́ à ɖɛɓɛìn ɖɛ̀ɓɛ̀ìn mú jǎà kɛ. (Jɔ̃́ɔ́ 13:34, 35; 1 Jɔ̃́ɔ́ 3:17, 18) Xwɛ̌ à nyu wa gbo kpáa kɛ́?

À tò wíɖí. Ti ɓɛ́ mɔ́ vɛ̀nɛ̀ ɖò kpá ma ɖé Júɖìà-ɓòɖòɔ̀ kɔ̃ɛɛ, Kɛ́ɖɛ́ì ɖeín-sí-nyɔ̀ ɓě nì ma ɖé Ã́tìà-hwɔ̀ɖɔ̀ɔ̀ múɛɛ tò ma wíɖí ɓɛ́ wa ké ma wa ɖíí Kɛ́ɖɛ́ì ɖeín-sí-nyɔ̀ ɓě nì ma ɖéɛ gbo kpá. (Àpɔ́sò 11:27-30) Kà dyúáɖòɔ̀ kǎà à dyiɛ wɔ̃́ kà ɓɛ́ à ɖíí ɓěɔ̀ nì gǎ dyéɛń ɖé ɓóɖóɔ̀ wáká ɖò kɔ̃ ní, nìí, à tò wíɖí ɖé à dyí-poìn-kpòɔ̀ mú ɓɛ́ wa ké nyɔ ɓě nìà gǎ dyéɛń nyɛɛ gbo-kpáìn-ɖɛ̀ ɓě nyí.—2 Kɔ̀ɖéíntĩ̀ɔ̀ 8:13-15.

À nyu ɖɛ ɓě ɓɛ́ìn wa gbo kpáa jɛ́ɛ́ kɛ. Gǎ-ɖɛ̀ ɖò dyi kpáín, ɛ́ɖɔ̀ ɓě gã̀à ɓó dyiɛɛ mɔ́ dyí-poìn-kpòɔ̀ nyɔ ɖò-ɖò séín dyi, ké wa dyéɛ gbo ká ɓɛ́ ɖɛ gbà ɖò se wa gbo kpá kɛ. À ɖíí ɓě mɔ̀à gbo-kpá-kpáɔ̀ dyúa-nì-nyɔ̀ ɓěɛɛ dyéɛ gbo ɓɛ́ ɖii-ɖɛ̀ kè náá-nì kè ɖɔ kè pɛ̃́-naín ɔ kè kɔ̃ùn ɓě ké nì. Jɛ̀hóvà Zàse pàɖǎ ɓě ɓɛ́ wa dyuò kũ̀à ɖò-ɖò ɓěɛɛ, tò wa mìɔùn ké wa mu wa mìɔùn sɔ̃ kɔ̃ ɓɛ́ wa ké gbo-kpá-sɔ̃̀ tò, mɔɔ ɓɛ́ wa ké Kĩ́dɔ̃̀ Hɔ́ɔ̀ kè wa ɖíí ɓěɛ̀ gbǒ ɓě nyìnìàìn dyíin nyɛɛ po ɖe. Gbo-kpɔ̃ìn-kpɔ̃ìn ɓɛ́ à kpáìn múàǔn dyi ɖé à dyí-poìn-kpòòɔ̀ mú, kè ɖɛ ɓě à ɖǎ cɛ̃́ sɔ̀ìn ɖé à kè à ɖíí ɓěɔ̀ kũ̀à nyu-nyu múɛɛ nyuɛ ké à ɓɛ́ìn gbo-kpáìn-ɖɛ̀ ɓě kè kũ̀à-nyu-nyɔ̀ ɓě dyí poɛ̀n wàɖà ɖé fũ̀à-fṹá-tì mú. À nyí “nyɔ ɓě ɓɛ́ à kè wa kè mɔ̀à nyɔ dyúáɖò ɖé [hwìɖǐǐ-taɓa-taɓaɔ̀] múɛ” gbo-kpá-kpá dyɛo, kɛɛ ɔ dyi ɓéɖé ɓɛ́ ɔ ké ná nìǐn, à kpá nyɔ tɔ̀ɔ̀ ɓě gbo ɖekè kɛbì wa mɛ sɔ̀ ɓiè-kpò kà kò ɖò múɛ.—Gàɖézìà 6:10.

À nyí wa hwòɖǒ-dyi-dè-dè sɔ̀ìn ɖé Báɓòɔ̀ mú kè gbo-kpá-kpá ɓɛ́ wa ké gǎ-ɖɛ̀ɔ̀ hwòɖǒ kùìn. Nyɔ ɓě ɓɛ́ gǎ-ɖɛ̀ kpáa gboɛɛ mɔ́ hwòɖǒ-dyi-dè-dè cá. Ðé ti ɓě nì kàà múɛɛ, à kpa kpéí sɔ̀ìn ɖé Jɛ̀hóvà, ɓɛ́ “ɔ dè à hwòɖǒ dyi ɖé à gǎ-dyé-dyé séín mú” kɛɛ gbo. (2 Kɔ̀ɖéíntĩ̀ɔ̀ 1:3, 4) À kpáìn múàǔn dyi ɓɛ́ à ké ɖɛ ɓě Gèɖèpɔ́ɔ̀ ɖáìn nyɔǔn nyɛ́nɛ́ín nyɛɛ nyɔ ɓě ɓɛ́ wa hwòɖǒ kpá ɖé ɖeiɛɛ gbo cɛ̃.Ké à tɛ̀mɛ̀ìn wa jɛ́ɛ́ kà ɓɛ́ Gèɖèpɔ́ɔ̀ Kã́á-ɓòɖòɔ̀ mú gǎ-ɖɛ̀ séín ɓě dyi zĩ̀ìn kàǔn wɛ̃.—Wɛ̀ɖɛ̀ɓèɖésĩ̀ɔ̀ 21:4.

• Ðɛ́ kɔ̃̀ jè Jɛ̀hóvà Zàse ɓě ɓɛ́àìn gbo-kpá-sɔ̃̀ tòɛ̀ wàɖà ɖé fũ̀à-fṹá-tì múɛ́?

• Ðɛ́ mɔ̀ hwòɖǒ-dyi-dè-dè sɔ̀ìn ɖé Báɓòɔ̀ mú ɓɛ́ à ɓɛ́ìn nyɔ ɓě póà gǎ-ɖɛ̀ xwaún wɛ̃ɛ nyíɛ kɛ́?

Hwɛ̀ ɓɛ́ Jízɛ̀ ké ma mɛ́ɛ, ɔ kè ɔ ɖeín-nà-nyɔ̀ ɓěɔ̀ hĩinyɛ ɓɛ́ wa mɔ̀ ma Píɖɛ̀ kè Jĩ́ìn kè Jɔ̃́ɔ́ ɔ kè Ã́dòɖò kɛɛ dè ma sáná-dɔ̀ɔ̌. Ti ɓɛ́ Jízɛ̀ nì ma dyí-tɛ̀mɛ̀ìn-ɖɛ̀ ɓá ɔ kã́á-kpèɔ̀ dyí-ɖú-tì jè dyí ɖé wé hwɛ̀ìn-gbɔ ɓěɔ̀ xwíníín, ɖé ɔ ɖeín-nà-nyɔ̀ ɓěɔ̀ gbo cɛ̃ɛń nyɛɛ, púɛɛ, ɔ diè ma dyi-diè-ɖɛ̀ kpa ɖɛ ɖò dyi, ké ɔ ɖá, “Nyɛ́ mɔ̀ gbo-nì-nyɔ̀ ɓɛ́ ɔ fɔ̀nɔ̀ hwòɖǒ, ké nyɔ ɓɛ́ìn ɔ hwòɖǒ kɔ̃ dèɛ̀ kɛ́? Ɔ mɔ̀ nyɔ ɓɛ́ ɔ gbo-nì-ɓǎɔ̀ sè gbo-nì-nyɔ̀ ɓě nì ɖé ɔ ɓíɖí-gbǒ-xwíníín nyɛɛ gboɛ, ɓɛ́ ɔ ké wa ɖii-ɖɛ̀ nyí ɓó ti wa ɓéɖé ɓɛ́ wa kéɛ dyéìn nyɛ.” (Máfíò 24:3, 45; Máà 13:3, 4) Jízɛ̀ nì ma ɔ ɖeín-nà-nyɔ̀ ɓěɔ̀ gbo cɛ̃ɛń ɓɛ́ wa ké ma ɔ hwòɖǒ kɔ̃ dè kà ɓɛ́ ɔ mɔ̀à wa “gbo-nì-ɓǎɔ̀” kɛɛ, ɔ mu nyɔ ɓě ɓɛ́ wa mu ɔ ɖeín-sí-nyɔ̀ ɓěɔ̀ ɖii-ɖɛ̀ nyíìn ɖé wé hwɛ̀ìn-gbɔɔ̀ tiín nyɛɛ gãùn wɛ̃. Nyɛ́ mu ma gbo-nì-nyɔ̀ nìà kɛ jǔùn wɛ̃́?

Ɔ mɔ̀ Jízɛ̀ ɖeín-sí-nyɔ̀ ɓě xwéɖé wè ɓɛ́ zùùɔ̀ gã kɛ. À dyuò “gbo-nì-nyɔ̀” nìà kɛ dyí kà ɔ mɔ̀ Gàa ɓě nìà Jɛ̀hóvà Zàse ɓě dyúa kɛ. Ɔ nyí ɔ mǔè Jɛ̀hóvà ɓiè-nyɔ̀ ɓě ɖii-ɖɛ̀ sɔ̀ìn ɖé Báɓòɔ̀ muɛ. À dè gbo-nì-nyɔ̀ nìà kɛ hwòɖǒ kɔ̃ ɓɛ́ ɔ ké ‘à ɖii-ɖɛ̀ nyí ɓó ti à ɓéɖé ɓɛ́ à kéɛ dyéìn nyɛ.’—Ðúù 12:42.

Ɔ gmɔ̀ Gèɖèpɔ́ɔ̀ ɓíɖí-gbǒ-xwíníín-nyɔ̀ ɓěɔ̀ dyí. (1 Tímétè 3:15) Jízɛ̀ nyí gbo-nì-nyɔ̀ nìà kɛ kũ̀à ku xwa ɓɛ́ ɔ mɔ̀à Jɛ̀hóvàà kpooɔ̀ wáká dyɛ̀ nìà nɔ̄ ɓóɖó-kpàà kɔ̃ɛɛ gbo gmɔ̀-gmɔ̀ kɛ. Ɔ hwɔìn kà kɔ̃̀ɔ̀-ɖɛ̀ ɓě gbo gmɔ̀-gmɔ̀ kè Gèɖèpɔ́ɔ̀-wùɖù-wáɖá-kũ̀àɔ̀ dyúa nì-nì ɔ kè à ɖɛ-tɛ̀mɛ̀ìn-tɛ̀mɛ̀ìn dyììn ɖé à dyí-poìn-kpò ɓěɔ̀ mú. Ɓɛ́ ɔ ké ɖɛ ɓě à kɔ̃̀ à ké ɓéɖéɛ à nyí ɓó ti à ɓéɖé ɓɛ́ à kéɛ dyéìn nyɛɛ, “gbo-nì-nyɔ̀ ɓɛ́ ɔ fɔ̀nɔ̀ hwòɖǒ, ké nyɔ ɓɛ́ìn ɔ hwòɖǒ kɔ̃ dèɛ̀” kɛɛ nì ɖii-ɖɛ̀ sɔ̀ìn ɖé Báɓòɔ̀ múɛɛ tòɛ̌n dyììn ɖé céè-ɖɛ̀ ɓě à nyùìn kũ̀à mú ɖé Gèɖèpɔ́ɔ̀-wùɖù-wáɖá-kũ̀àɔ̀ múɛ, ɔ kè ɖé à dyí-poìn-poìn ɓěɔ̀ múɛ.

Nyɔ ɓɛ́ìn gbo-nì-nyɔ̀ɔ̀ hwòɖǒ kɔ̃ dèɛ̀, sepóɛɖé ɔ kpɔ̃ ɓó Báɓòɔ̀ jǎà-wùɖù ɓě kè kũ̀à ɓá bɔ̃̌ nɔ̀mɔ̀ dyíinɔ̀ cɛ̃ jè dyíɛɛ gboi kóɖó-kóɖó, ké ɔ fɔ̀nɔ̀ hwòɖǒ ɓó kà ɔ nyu Kɛ́ɖɛ́ì kɔ̃̀ɔ̀-ɖɛ̀ ɓě nìà ɓóɖó-kpàà kɔ̃ɛɛ dyí gmɔ̀ɔ̀ nyuɛ kɛ. (Àpɔ́sò 10:42) Jɛ̀hóvà nì nyɔ pàɖǎ dyàùn ɓɛ́ wa ké ɔ zàse ɓě jǔ, ké ɔ nì gbo-nì-nyɔ̀ɔ̀ gbo kpáuń ɓɛ́ ɔ ké ɖii-ɖɛ̀ sɔ̀ìn ɖé Báɓòɔ̀ múɛɛ nyɔ ɓě nyí.—Àzédyà 60:22; 65:13.

• Nyɛ́ Jízɛ̀ gã ma ɓɛ́ ɔ ké ma ɔ ɖeín-nà-nyɔ̀ ɓěɔ̀ ɖii-ɖɛ̀ nyí sɔ̀ìn ɖé Báɓòɔ̀ múɛ́?

• Xwɛ̌ gbo-nì-nyɔ̀ɔ̀ fɔ̀nɔ̀ hwòɖǒ ké nyɔ ɓɛ́ìn ɔ hwòɖǒ kɔ̃ dèɛ̀ kɛ́?

Ti Jízɛ̀ ɖǎ ma ɓóɖó-kpàà kɔ̃ sɔ̀ kɛɛ, gàa xwéɖé wè nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɓɛ́ wa mɔ̀ ma “àpɔ́sò ɓěɔ̀ kè nyɔ vɛ̀nɛ̀ ɓěɔ̀” kɛɛ mɔ̀ ma nyɔ-dyúa-nì-nyɔ̀ ɓě ɓɛ́ wa po ma ɖɛ kpa ɖɛ ɓě gbɔ ɓó wa ɖíí Kɛ́ɖɛ́ì ɖeín-sí-nyɔ̀ ɓě nì ma ɖé dyí-poìn-kpò séín ɓěɔ̀ múɛɛ bìì. (Àpɔ́sò 15:2) Hwɛ̀ ɓɛ́ wa séín ké ma ɖɛ ɖò gbo wɔ̃́ìn ní, wa gmɔìn ma ɖɛ Báɓòɔ̀ cɛ̃ ɓá ɖɛɔ̀ jè dyíɛɛ múin kĩ́ín, ké wa wɔ̃́ ɓɛ́ Gèɖèpɔ́ɔ̀ zùùɔ̀ ké ma wa nàìn. (Àpɔ́sò 15:25) Kà dyúáɖòɔ̀ kǎà ɔ nì zɛ̃̌ɛ̀.

Gèɖèpɔ́ɔ̀ nyùìn wa kũ̀à mú ɓɛ́ wa ké ɔ mɔ́ɔ́-ɖɛ̀ nyu. Gàa ɓě ɓɛ́ Gèɖèpɔ́ɔ̀ zùùɔ̀ gã ké wa mɔ̀ Nyɔ-Dyúa-Nì-Nyɔ̀ ɓěɛɛ kpɔ̃ Gèɖèpɔ́ɔ̀ Wuɖuɔ̀ dyi cá, ké wa dyuò ɖɛ ɓě gbɔ poɛ ɓá kũ̀àɔ̀ kè dyi-diè-ɖɛ̀ ɓě ɓá Gèɖèpɔ́ɔ̀ ɓiè jè dyíɛɛ dyí. Wíkì séín xwíníín nyɛɛ, wa poìn dyí ɓɛ́ wa ké ɖɛ ɓě ɓá wa ɖíí ɓě nìà ɓóɖó-kpàà dà séín nyɛ jè dyíɛɛ jè gbo dyé. Kà ɔ nyu ma nìɛ̀ ti ɓɛ́ Jízɛ̀ ɖǎ ma ɓóɖó-kpàà kɔ̃ sɔ̀ kɛɛ, kǎà à dyé Báɓòɔ̀ tɛ̀mɛ̀ìn-ɖɛ̀ ɓě dyììn ɖé céè-ɖɛ̀ ɓě mɔɔ nyɔ-kɔ̃in-té-nyɔ̀ ɓě kè ɖɛ tɔ̀ɔ̀ ɓě mú. Ðɛ nìà kɛ kpá Gèɖèpɔ́ɔ̀ nyɔ ɓěɔ̀ gbo, ké wa hwɔìn hwòɖǒǔn, ké wa nyu ɖɛ dyúáɖòɔ̀. (Àpɔ́sò 16:4, 5) Nyɔ-Dyúa-Nì-Nyɔ̀ ɓěɔ̀ gmɔìn ɖɛ-tɛ̀mɛ̀ìn-tɛ̀mɛ̀ìn sɔ̀àìn ɖé Báɓòɔ̀ múɛɛ kɔ̃in, ké wa po à kpéí ɓɛ́ Gèɖèpɔ́ɔ̀-wùɖù-wáɖá-kũ̀àɔ̀ ké ɖɛ kĩ́ín jǔ ɖé à gbo. Ké ɖeɛɛ, wa gmɔìn gàa ɓě ɓɛ́ìn kpéɛɛ gã jè kɔ̃in.

Wa mùìn ɖɛ Gèɖèpɔ́ɔ̀ zùùɔ̀ cɛ̃ wa gboɛ gbo. Nyɔ-Dyúa-Nì-Nyɔ̀ ɓěɔ̀ gmɔ̀ ɖé Jɛ̀hóvà mɔ̀à Nyɔ-Wuɖuí-Kɔ̃̀-Nyɔ̀ɔ̀ kè Jízɛ̀ mɔ̀à dyí-poìn-kpòɔ̀ kɔ̃in-nì-nyɔ̀ kɛɛ gbo ɓó hwìè da zà jè. (1 Kɔ̀ɖéíntĩ̀ɔ̀ 11:3; Ìfísĩ̀ɔ̀ 5:23) Wa ní dyé wa mìɔùn kà wa mɔ̀ Gèɖèpɔ́ɔ̀ nyɔ ɓěɔ̀ nàìn-nyɔ̀ ɓě kɛ. Wa kè Kɛ́ɖɛ́ì ɖeín-sí-nyɔ̀ séín ɓě ɓɛ́ zùùɔ̀ gã kɛɛ “sí ɓáɖáá-dyùɔ̀ [Jízɛ̀] kíɖíí dɛ̀ séín ɓɛ́ ɔ muɛ.” (Wɛ̀ɖɛ̀ɓèɖésĩ̀ɔ̀ 14:4) À dyi Nyɔ-Dyúa-Nì-Nyɔ̀ ɓěɛ̀ kũ̀à kè wa mìɔùn jè ɓaà ní, wa kpá múàǔn.

• Ti Jízɛ̀ ɖǎ ma ɓóɖó-kpàà kɔ̃ sɔ̀ kɛɛ, nyɛ́ ɓě mɔ̀ ma nyɔ-dyúa-nì-nyɔ̀ ɓěɔ̀ kɛ́?

• Xwɛ̌ Nyɔ-Dyúa-Nì-Nyɔ̀ ɓě nìà zɛ̃̌ɛ̀ kɛɛ nyu Gèɖèpɔ́ɔ̀ hwìè-da-zàìn-zàìnɔ̀ dyi mɔ́ɔ kɛ́?

Bɛ́fèò ɓɛ́ ɔ mɔ̀à Híìbúɖúù-nyɛ̀nɛ̀ kɛɛ xwíníín mɔ̀, “Gèɖèpɔ́ɔ̀ gbǒ.” (Jɛ́nɛ́sì 28:17, 19) Nyɛ́nɛ́ nìà kɛ nɔ̀mɔ̀ dyíin ɓó gbǒ ɓě ɓɛ́ Jɛ̀hóvà Zàse ɓě po ɖé ɓóɖó-kpàà dà séín kɔ̃̀ mú ɓɛ́ wa nìà Gèɖèpɔ́ɔ̀-wùɖù-wáɖá-kũ̀àɔ̀ kɔ̃in gmɔìn nyɛɛ jè. Nyɔ-Dyúa-Nì-Nyɔ̀ ɓěɔ̀ nyu kũ̀à ɖé Bɛ́fèò-gbò vɛ̀nɛ̀ nìà Mɛ́ɖékà-hwɔ̀ɖɔ̀ɔ̀ mɔ̀à New York kɛɛ mú.Ðéɛ̀ wa gmɔìn kũ̀à ɓɛ́ Bɛ́fèò ɖɔ́ɔ́ tɔ̀ɔ̀ ɓě nì nyuɛń ɖé ɓóɖó-dù séín kɔ̃ kɛɛ kɔ̃in. Nyɔ séín ɓě nyuà kũ̀à ɖé gbǒ ɓě nìà kɛ zɔ̃̀ kɛɛ mɔ̀ Bɛ́fèò-xwèɖè-dù. Wa cĩ́ ké wa nyu kũ̀à dà dyúáɖò kà xwéɖé-dù nìà kɛ, ké wa ɖi ɖɛ dà dyúáɖò, ɔ kè wa cɛ̃́ Báɓòɔ̀ ɖé gbo-kpɔ̃ìn-kpɔ̃ìn mú.—Wɛ́ɖɛ́ 133:1.

Ɔ mɔ̀ dɛ̀ ɓɛ́ xwéɖé-dùɔ̀ nyɔ ɓě tò wa mìɔùn wɛ̃. Ðé Bɛ́fèò-gbò séín zɔ̃̀ɛɛ, Kɛ́ɖɛ́ì ɖeín-sí-gàà kè màa ɓě ɓɛ́ wa tò wa mìɔùn ɓó Gèɖèpɔ́ɔ̀ mɔ́ɔ́-ɖɛ̀ kè ɔ Kã́á-ɓòɖòɔ̀ kũ̀à nyu jè kɛɛ nì ɖé. (Máfíò 6:33) Wa ɖò ní dyé pɛ́ɛ̀-ɖɛ̀ ɖò fɔɔ, kɛɛ wa nyí wa pɛ̃́-naín kè ɖii-ɖɛ̀ ɔ kè wíɖí wè ɓó wa mìɔùn gbo gmɔ̀ jè. Nyɔ séín nìà Bɛ́fèò kɛɛ ɓéɖé kũ̀à ɖò-ɖò. Kɛbì ɔ mɛ mɔ̀ ɔ́fè-kũ̀à mɔɔ ɖɛ-pĩ-kũ̀à mɔɔ ɖɛ-ɖììn-naín ɖoɓo-nyu-kũ̀à kɛ. Wa ɖíɛ́ ɓě nyu kũ̀à ɖé céè-ɖɛ̀-nyùìn-naín mɔɔ ɖɔ-wɔìn-naín, ké wa ɖíɛ́ ɓě nyu gbǒ-gbo-gmɔ̀-kũ̀à mɔɔ sɛ́ɖɛ́-kũ̀à ɔ kè ɖɛ tɔ̀ɔ̀ ɓě.

Ɔ mɔ̀ kũ̀à-nyùìn-naín ɓó Kã́á-ɓòɖòɔ̀ bɔ̃̌ cɛ̃ jè. Ðɛ jɛ́ɛ́ ɓɛ́ wa nyu ɖé Bɛ́fèò-gbò séín zɔ̃̀ kɛɛ mɔ̀ ɓɛ́ wa kéɛ nyu ɓɛ́ Báɓòɔ̀ jǎà-wùɖù ké nyɔ̀ pàɖǎ gbo nyiniɛ ɓɛ́ìn. Ɔ hwɔìn-ɖɛ̀ mɔ̀ bòɖòsóò nìà kɛ. Nyɔ-Dyúa-Nì-Nyɔ̀ ɓěɔ̀ mɔ̀ nyɔ dyé ma ɔ céè-céè jè gbo. Wa tòɛ̀n nɛɛ̀-kpà kɔ̃ ɖé céè-ɖɛ̀ wuɖu-dù kà kò ɖò mú-po-nyɔ̀ ɓě gbo ɖé ɓóɖó-kpàà dà séín. Nìí, wa nyùɛ̀n ɖé céè-ɖɛ̀-nyùìn-naín fṹà xwai ɓě nìà Bɛ́fèò-gbò pàɖǎ zɔ̃̀ kɛɛ mú, ké wa tòɛ̀ dyí-poìn-kpò 110,000 zi kɔ̃ ɓě gbo. Wa nyu kũ̀à ɓěa dyɛo, kɛɛ Bɛ́fèò-xwèɖè-dù séín nyu fṹà-kũ̀à mɔ̀à bɔ̃̌ nɔ̀mɔ̀ dyíinɔ̀ cɛ̃-cɛ̃ kɛ.—Máà 13:10.

• Nyɛ́ ɓě nyuà kũ̀à ɖé Bɛ́fèò kɛ́, ké xwɛ̌ wa nyu wa gbo gmɔ̀ɔ̀ kɛ́?

• Ðɛ́ mɔ̀ fṹà-kũ̀à ɓɛ́ Bɛ́fèò ɖò-ɖò séín nyu ɖekèɛ́?

Bɛ́fèò xwéɖé-dùɔ̀ nyɔ ɓě nyu kũ̀à kò-kò ɓě, ɓɛ́ wa ké Gèɖèpɔ́ɔ̀-wùɖù-wáɖá-kũ̀àɔ̀ jè gbo gmɔ̀ ɖé ɓóɖó-dù dyúáɖò mɔɔ ɓóɖó-dù pàɖǎ ɓě mú. Wa ɖíɛ́ ɓě mɔ̀ céè-ɖɛ̀ wuɖu-dù kà kò ɖò mú-po-nyɔ̀ ɓě, mɔɔ mákázĩ̀ìn-nyu-nyɔ̀ ɓě, kè céè-ɖɛ̀ xwaún-poìn-nyɔ̀ ɓě, kè céè-ɖɛ̀ da-po-nyɔ̀ ɓě, kè kpɔ̃ɔ-wùɖù mɔɔ víɖò-nyu-nyɔ̀ ɓě ɔ kè ɖɛ tɔ̀ɔ̀ ɓě ɓá ɓóɖó-dùɔ̀ jè dyíɛɛ jè gbo dyé-nyɔ̀ ɓě.

Bɛ́fèò Ðɔ́ɔ́ Kɔ̃in-Gmɔìn-Nyɔ̀ ɓě gmɔìn kũ̀àɔ̀ kɔ̃in. Bɛ́fèò ɖɔ́ɔ́ ɖò-ɖò séín Kɔ̃in-Gmɔìn-Nyɔ̀ ɓěɔ̀ mɔ̀ nyɔ gmɔ̀ kũ̀à wa nyu ɖéɛɛ dyí. Gàa ɓě nìà kɛ mɔ̀ ɛ́ɖɔ̀ ɓɛ́ìn kpé tã mɔɔ zi kɔ̃ ɓě ɓɛ́ Nyɔ-Dyúa-Nì-Nyɔ̀ ɓěɔ̀ gã kɛ. Bɛ́fèò ɖɔ́ɔ́ kɔ̃in-gmɔìn-nyɔ̀ ɓěɔ̀ po Nyɔ-Dyúa-Nì-Nyɔ̀ ɓěɔ̀ bɔ̃̌ ɓó kà kũ̀àɔ̀ nyu dyúa muɛ kɛ, ɔ kè fũ̀à-fṹá-ɖɛ̀ ɓě ɓɛ́ wa dyé dyí ɖé ɓóɖó kɔ̃̀ mú wa nìà kɛɛ jè. Bɔ̃̌ ɓě nì kà kɛɛ kpá Nyɔ-Dyúa-Nì-Nyɔ̀ ɓěɔ̀ gbo ɓɛ́ wa ké ɖɛ ɓě nyɔ ké cɛ̃́ ɖé céè-ɖɛ̀ ɓě kè dyí-poìn-poìn ɓě muà nììn ɖé dyúa kɛ múɛɛ gbɔ po. Nyɔ-Dyúa-Nì-Nyɔ̀ ɓěɔ̀ wuɖu-wĩín-dè-nyɔ̀ ɓě té Bɛ́fèò ɖɔ́ɔ́ séín kɔ̃in, ké wa nyí Bɛ́fèò ɖɔ́ɔ́ kɔ̃in-gmɔìn-nyɔ̀ ɓěɔ̀ hwìè-da-zàìn-zàìn ɓó kà wa ké wa kũ̀àɔ̀ kpɔ̃-sɔ̃̀ nyuɛ. (Nɔ́ɔ́ 11:14) Wa po dyí-poìn-poìn ɖò kɔ̃̀ mú ɓɛ́ Nyɔ-Dyúa-Nì-Nyɔ̀ ɓěɔ̀ wuɖu-wĩín-dè-nyɔ̀ɔ̀ wáɖá Gèɖèpɔ́ɔ̀-wùɖù kɛɛ páún ɓó nyɔ ɓě nìà ɓóɖó-dùɔ̀ kɔ̃ɛɛ kpéí po jè.

Wa nyí dyí-poìn-kpò ɓěɔ̀ gbo-kpá-kpá. Gàa ɓě ɓɛ́ wa ɓéɖéɛ kpé kɔ̃ún ɖé Bɛ́fèò kɛɛ wɔ̃́ìn dyí-poìn-kpò ɖìè dyi dè jè gbo. Gàa ɓěɛ nyí Pàníɛ̀ ɓě kè mísĩ̀ɔ̀nɛ́ɖè ɓě ɔ kè dyí-poìn-kpò kɔ̃in-té-nyɔ̀ ɓě nyuà kũ̀à ɖé ɓóɖóɔ̀ kɔ̃ɛɛ hwìè-da-zàìn-zàìn. Wa po dyí-poìn-poìn vɛ̀nɛ̀ ɓě páún, ké wa dyé Kĩ́dɔ̃̀ Hɔ́ɔ̀ ɖìè ɓě po jè gbo, ké wa dyéɛ jè gbo ɓɛ́ céè-ɖɛ̀ ɓě ké dyí-poìn-kpò ɓěɔ̀ gbo mu. Ðɛ séín ɓɛ́ wa nyu ɖé Bɛ́fèò kɛɛ nyuɛ ɓɛ́ Gèɖèpɔ́ɔ̀-wùɖù-wáɖá-kũ̀àɔ̀ ké dyúa mu ɖé gìɖìǐ mú.—1 Kɔ̀ɖéíntĩ̀ɔ̀ 14:33, 40.

• Xwɛ̌ Bɛ́fèò Ðɔ́ɔ́ Kɔ̃in-Gmɔìn-Nyɔ̀ ɓěɔ̀ kpá Nyɔ-Dyúa-Nì-Nyɔ̀ ɓěɔ̀ gbo kɛ́?

• Ðɛ́ mɔ̀ kũ̀à ɓě ɓɛ́ wa nyu ɖé Bɛ́fèò ɖɔ́ɔ́ ɓěɔ̀ zɔ̃̀ kɛ́?

Ɓɛ́ à ké “bɔ̃̌ nɔ̀mɔ̀ dyíinɔ̀” kpaa ɓɛ́ìn “ɖé ɓóɖó-dù séín kè xwéɖé-dù séín kè nyɔ ɓě po wuɖu kò-kò ɓěɛ” gboɛɛ, à nyu céè-ɖɛ̀ ɓě ɖé wuɖu-dù 750 zi kɔ̃ ɓě mú. (Wɛ̀ɖɛ̀ɓèɖésĩ̀ɔ̀ 14:6) Xwɛ̌ à nyu kũ̀à kàmà nyuɛń nìà kɛɛ nyuɛ kɛ́? À nyuɛ dyììn ɖé céè-ɖɛ̀ céè-nyɔ̀ ɓě sɔ̀à ɓóɖó-dù kò-kò ɓě kɔ̃ɛɛ kè céè-ɖɛ̀ wuɖu-dù kà kò ɖò mú-po-nyɔ̀ kúɖúú ɓě ɓɛ́ wa tò wa mìɔùn wɛ̃ɛ mú, ké wa séín mɔ̀ Jɛ̀hóvà Zàse ɓě.

Wa céè céè-ɖɛ̀ɔ̀ Xwí-wùɖù mú kĩ́ín. Nyɔ-Dyúa-Nì-Nyɔ̀ ɓěɔ̀ gmɔìn kũ̀à ɓɛ́ wa nyu ɖé Céè-ɖɛ̀ Céè-naínɔ̀ kɛɛ kɔ̃in, ɖé Bɛ́fèò-gbò vɛ̀nɛ̀ɔ̀ zɔ̃̀. Céè-ɖɛ̀ céè-naín nìà kɛ nyuɛ ké kũ̀à ɓɛ́ nyɔ ɓě nyuà ɖéɛɛ kè ɔ dyɛ̀ wa nyuà ɖé Bɛ́fèò ɖɔ́ɔ́ ɖíɛ́ ɓě zɔ̃̀ kɛɛ muìn gbo. Sepóɛɖé à céè-ɖɛ̀ céè-nyɔ̀ ɓěɔ̀ sɔ̀ ɓóɖó-dù kò-kò ɓě kɔ̃ jèɛɛ, ɔ nyuɛ ké à ɓɛ́ìn ɖɛ ɓě kpá nyɔ-dù kò-kò ɓě gboɛɛ jè céèɛ̀, ɓɛ́ à céè-ɖɛ̀ ɓěɔ̀ ké nyɔ ɓě sɔ̀ ɓóɖó-dù pàɖǎ kɔ̃ɛɛ hwìɖǐi nɔ̀mɔ̀ìn.

Wa tò céè-ɖɛ̀ɔ̀ ɖé céè-ɖɛ̀ wuɖu-dù kà kò ɖò mú-po-nyɔ̀ ɓěɔ̀ gbo. Wa ɖǎ céè-ɖɛ̀ɔ̀ bũ̌in gmɔìn ké wa hwòɖǒ ɖǎà múin dèìn ní, nìí, wa tòɛ̀n nɛɛ̀-kpà kɔ̃ ɖé céè-ɖɛ̀ wuɖu-dù kà kò ɖò mú-po-nyɔ̀ ɓě nìà ɓóɖó-kpàà da séín nyɛɛ gbo. Nìí, wa mɔ̀ùn poɛ wuɖu-dù kà kò ɖò ɓě mú, ké wa zàà wuɖuún, ké wa gmɔìn ɔ bũ̌in. Wa vɔ̃ ɓɛ́ wa ké wuɖu ɓě nìà ɖé wa ɓíɖí-wùɖùɔ̀ mú ɓɛ́ wa ‘sɛ́ɖɛ́ìn dyí ké wa mɔ̀ jǎà,’ ké wa kpa fɔ̀nɔ̀ hwòɖǒ jɛ́ɛ́ nìà ɖé xwí-wùɖùɔ̀ múɛɛ gã.—Ìkíɖísìásì 12:10.

Nɛɛ̀-kpà ɓě nyuɛ ké kũ̀àɔ̀ fṹà. Nɛɛ̀-kpà ɖò se céè-ɖɛ̀ céè-nyɔ̀ ɓě kè ɔ wuɖu-dù kà kò ɖò mú-po-nyɔ̀ ɓě bɛ̃̌ǐn síɛ ɓɛ́ìn fɔɔ. Kɛɛ wa ɓɛ́ìn wa kũ̀à ɓěɔ̀ gboi fṹàà dyììn ɖé nɛɛ̀-kpà kè nɛɛ̀-kpà-kɔ̃-cèè-ɖɛ̀ ɓě kũ̀à mú nyùìn-nyùìn mú. Jɛ̀hóvà Zàse ɓě poìn nɛɛ̀-kpà kũ̀à-mú-nyùìn-ɖɛ̀ ɖò ɓɛ́ wa ɖáìn ɖé xwí-wùɖù mú, Multilanguage Electronic Publishing System (MEPS) kɛɛ xwaún. Ðɛ nìà kɛ kpá wa gbo ɓɛ́ wa ké wuɖu-dù hɔ̃dɛ̀ɖɛ̀ zi kɔ̃ ɓě céè, kè ɓɛ́ wa ké dyi-dyé-ɖɛ̀ ɓě ɖé céè-ɖɛ̀ ɓě mú po, ɔ kè ɓɛ́ wa kéɛ ti dyéìn ɓó kpoùn po jè.

Xwíníínɔ̀ nyɛ́ kɔ̃̀ jè à vɔ̃ ɓɛ́ à kéà céè-ɖɛ̀ ɓě ɖé wuɖu-dù pàɖǎ ɓě mú po kɛ́? Sepóɛɖé ɔ mɔ̀ Jɛ̀hóvà mɔ́ɔ́-ɖɛ̀ “ɓɛ́ nyɔǔn séín ké pó, ɓɛ́ wa ké jǎàɔ̀ dyí dyuò.”—1 Tímétè 2:3, 4.

• Ðɛ́ mɔ̀ kũ̀à ɓě ɓɛ́ wa nyu ɓɛ́ wa ké à céè-ɖɛ̀ ɓěɔ̀ céè kɛ́?

• Xwíníínɔ̀ nyɛ́ kɔ̃̀ jè à poà à céè-ɖɛ̀ ɓěɔ̀ ɖé wuɖu-dù pàɖǎ ɓě mú kɛ́?

À dyí-poìn-kpòòɔ̀ zà Báɓò kè céè-ɖɛ̀ méɔ̀ùn hɔ̃dɛ̀ɖɛ̀ zi kɔ̃ ɓě xwa kɔ̃, ké ɔ tòɛ̌n dyi pídyi ɖé zɔ̃ séín xwíníín. À po Kĩ́dɔ̃̀ Hɔ́ɔ̀ ɓě ɔ kè Bɛ́fèò-gbò ɓě, ké à gmɔ̀ wa jè gbo. Ké ɖeɛɛ, à gmɔ̀ Bɛ́fèò-nyɔ̀ ɓě kè mísĩ̀ɔ̀nɛ́ɖè táázĩ̀ìn zi kɔ̃ ɓě jè gbo, ké à tò gbo-kpá-kpá ɔ jǔ ké gǎ-ɖɛ̀ ɖò dyi kpáìn. Ɔ jèɛɛ, m̀ ɓɛ́ìn hwìɖǐi poɛ̌n, ɓɛ́ m̀ ké níiń, ‘xwɛ̌ wa nyu wíɖí dyéɛ ɓó kũ̀à séín ɓě nìà kɛ nyu jè kɛ́?’

À ní tò ɓàɖàìn-bùè, ké à ní kpɔ̃ pɛ́nɛ̀. À bɔ̃̌-nɔ̀mɔ̀-dyíin-cɛ̃-kũ̀àɔ̀ jè gbo gmɔ̀-gmɔ̀ kpa wíɖí pàɖǎ dyɛo, kɛɛ à ní zɔ̀ wíɖí fɔɔ. Ɓó zɔ̃ hɔ̃dɛ̀ɖɛ̀ zi kɔ̃ ɖǎà ziɛ xwíníín nyɛɛ, à mákázĩ̀ìn mɔ̀à Watchtower kɛɛ nyùìn kpà sɔ̃́ nììnɔ̀ cɛ̃ɛ kà ɓɛ́ à poɛ jǎà kà Jɛ̀hóvà mɔ̀ nyɔ nyí à gbo-kpá-kpá, ké à “se nyɔ ɖò ɖɛ zɔ̀ǐn mu ɓó gbo kpá jè,” ké à séèɛ̀ náa nyu ɖò fɔɔ!—Máfíò 10:8.

À dyé gbo-kpá-kpá ɓó à kũ̀à ɓěɔ̀ jè sɔ̀ìn ɖé hwòɖǒɛ̀-wɔ̃́ín nyíí-ɖɛ̀ mú. Nyɔ pàɖǎ kpáìn à Báɓò-tɛ̀mɛ̀in-kũ̀àɔ̀ múàǔn dyi, ké wa tò nyíí-ɖɛ̀ ɓó ɔ nyu jè. Jɛ̀hóvà Zàse ɓěɔ̀ mìɔùn kpá múàǔn ɓɛ́ wa ké waà ti kè gana kè wíɖí ɔ kè ɖɛ tɔ̀ɔ̀ ɓě tò ɓó Gèɖèpɔ́ɔ̀ mɔ́ɔ́-ɖɛ̀ nyu jè ɖé ɓóɖó-kpàà da séín. (1 Kánáníkɔ̀ 29:9) Ðé Kĩ́dɔ̃̀ Hɔ́ɔ̀ zɔ̃̀ kè ɖé à dyí-poìn-poìn vɛ̀nɛ̀ ɓěɔ̀ múɛɛ, à ɓéɖé wíɖí-po-naín ɓě ɓɛ́ nyɔ ɓě ɓɛ́ wa mɔ́ wíɖí tòɛ̀ dyi ɖé hwòɖǒ wɔ̃́-wɔ̃́ múɛɛ kéɛ ɖéɛ po. Mɔɔ wa ɓɛ́ìn ɖéɛ à ɖúú-kɔ̃-pà mɔ̀à jw.org kɛɛ kɔ̃ tòɛ̀n. Nyɔ pàɖǎ ɓɛ́ wa po ɖé wíɖíɛɛ se bã-nyɔ̀ ɓě. Wa nì kà jɔ̌ɔ̀-màà ɓɛ́ ɔ po ma jɛ̃̀-pĩ̀à sɔ̃́ ɖé wíɖí-po-naín nì ma kà ɖé Gèɖèpɔ́ɔ̀-gbòɔ̀ mú ɓɛ́ Jízɛ̀ cɛ̃ ma kà jèɛɛ nì ma kà kɛ. (Ðúù 21:1-4) Ɔ jèɛɛ, nyɔ séín ɖò ɓɛ́ìn ‘wíɖí ɖò wáká poɛ’ ɓɛ́ ɔ kéɛ tò kà ɔ “nyuà gbɔ poɛ” kɛ.—1 Kɔ̀ɖéíntĩ̀ɔ̀ 16:2; 2 Kɔ̀ɖéíntĩ̀ɔ̀ 9:7.

À dyuòɛ̀ dyí jǎà cá kà ɓɛ́ Jɛ̀hóvà mu nyɔ ɓě ɓɛ́ wa mɔ́ ‘ɔ dya dèɛ̀ dyi dyììn ɖé wa kɔ́mɔ́-ɖɛ̀ ɓěɔ̀ tò-tò mú,’ ɓɛ́ wa ké gbo-kpá-sɔ̃̀ tò ɓó Kã́á-ɓòɖò-kũ̀àɔ̀ jè kɛɛ hwòɖǒ dyi tóùn kánáá pū ɓɛ́ ɔ mɔ́ɔ́-ɖɛ̀ ké nìɛ̀ ɓɛ́ìn nyɛ.—Nɔ́ɔ́ 3:9.

• Ðɛ́ kɔ̃̀ jè à dyí-poìn-kpòòɔ̀ kè ɓiè-kpò tɔ̀ɔ̀ ɓě seà hwɔìn nyɛ́?

• Xwɛ̌ wa nyùìn hwòɖǒɛ̀-wɔ̃́ín nyíí-ɖɛ̀ ɓěɔ̀ kũ̀à mú kɛ́?

Báɓò tɛ̀mɛ̀ìn-ɖɛ̀ ɓě ɓɛ́ à cɛ̃́à ɖé Kĩ́dɔ̃̀ Hɔ́ɔ̀ zɔ̃̀ kɛɛ ɓá Gèɖèpɔ́ɔ̀ Kã́á-ɓòɖò ɓɛ́ ɔ mɔ̀ ma Jízɛ̀ɛ̀ Gèɖèpɔ́ɔ̀-wùɖù-wáɖá-kũ̀àɔ̀ hìɖì-kpà kɛɛ jè dyí.

Wa mɔ̀ dɛ̀ ɓě ɓɛ́ wa nyu jǎà ɓiè-ɓiè kɛ. Ðéɛ̀ Jɛ̀hóvà Zàse ɓě po Gèɖèpɔ́ɔ̀-wùɖù-wáɖá-kũ̀àɔ̀ páún ɓɛ́ wa ké bɔ̃̌ nɔ̀mɔ̀ dyíin ɓá Kã́á-ɓòɖòɔ̀ jè dyíɛɛ cɛ̃. (Máfíò 24:14) Kĩ́dɔ̃̀ Hɔ́ɔ̀ séín ɓě se ɓɛ́ìn, ké wa kpa kòɛ̀, kɛɛ wa nɔ̀mɔ̀ dyíin. Ðé wa ɖíɛ́ ɓě múɛɛ, dyí-poìn-kpò dyúáɖò mɔɔ ɔ zi kɔ̃ ɓě poìn ɖé dyí. Ðé zɔ̃ ɓě zià dyiɛ xwíníín nyɛɛ, à ɖǎ Kĩ́dɔ̃̀ Hɔ́ɔ̀ táázĩ̀ìn ɓaɖa-bùè zi kɔ̃ ɖìè ɓě po. Ɔ xwíníín mɔ̀, à po Kĩ́dɔ̃̀ Hɔ́ɔ̀ hm̀m̌ wé ɖò-ɖò séín xwíníín ɓɛ́ wa ké dyí-poìn-kpò pàɖǎ ɓě nìà wóɖóɛń nyɛɛ dyi kpɔ̃ɔ ɓɛ́ìn. Xwɛ̌ ɖɛ nìà kɛ nyu kpáa kɛ́?—Máfíò 19:26.

Wa po wa sɔ̀ìn ɖé nyíí-ɖɛ̀ ɓě ɓɛ́ wa tò ɓó Kĩ́dɔ̃̀ Hɔ́ɔ̀ po jè kɛɛ mú. Wa tò nyíí-ɖɛ̀ ɓě nìà kɛ ɖé Bɛ́fèò-gbòɔ̀ zɔ̃̀, ɓɛ́ wa ké dyí-poìn-kpò ɓě ɓɛ́ wa kɔ̃̀ wa ké Kĩ́dɔ̃̀ Hɔ́ɔ̀ po mɔɔ dyíin nɔ̀mɔ̀ìn nyɛɛ wíɖí nyí.

Wa ní pɛ́ɛ̀ nyɔ ɓě poà wa kɛ, ké wa mɔ̀ nyɔ-dù kò-kò ɓě ɓɛ́ wa dyuò kũ̀à kò-kò ɓěɛ. Ðé ɓóɖó-dù pàɖǎ ɓě kɔ̃ɛɛ, à ɓéɖé Kĩ́dɔ̃̀ Hɔ́ɔ̀ Po-kpò Ɓě. Kĩ́dɔ̃̀ Hɔ́ɔ̀ po-nyɔ̀ ɓě kè nyɔ ɓě ɓɛ́ wa tò wa mìɔùn wɛ̃ɛ, sɔ̀ dyí-poìn-kpò dyúáɖò mú, ké wa mu ɖé dyí-poìn-kpò kà kò ɖò ɓě mú ɖé wa ɓíɖí-ɓòɖòɔ̀ kɔ̃, ɓɛ́ wa ké dyí-poìn-kpò ɓě gbo kpá ɓó wa Kĩ́dɔ̃̀ Hɔ́ɔ̀ ɓěɔ̀ po jè. Ðé ɓóɖó kà kò ɖò ɓě kɔ̃ɛɛ, wa gã Jɛ̀hóvà Zàse ɓě ɓɛ́ìn kpéɛ ɓɛ́ wa ké Kĩ́dɔ̃̀ Hɔ́ɔ̀ po kũ̀àɔ̀ kè ɔ dyíin nɔ̀mɔ̀ìn-nɔ̀mɔ̀ìn dyúa nì ɖé dɛ̀ ɓɛ́ wa tò wa kɛ. Kũ̀à-dyuò-nyɔ̀ ɓě nìà ɖéɛɛ tò wa mìɔùn ɓó Kĩ́dɔ̃̀ Hɔ́ɔ̀ séín po jè dyɛo, kɛɛ kũ̀à-nyu-nyɔ̀ ɓěɔ̀ pàɖǎ sɔ̀ ɖé dyí-poìn-kpò kɔ̃̀ Kĩ́dɔ̃̀ Hɔ́ɔ̀ wa nìà poɛń nyɛɛ mú. Jɛ̀hóvà zùùɔ̀ kè ɔ nyɔ ɓěɔ̀ dúún ku-ku nyuɛ ké ɖɛ ɓě nìà kɛ kpá.—Wɛ́ɖɛ́ 127:1; Kɔ̀ɖɔ́sĩ̀à 3:23.

• Xwɛ̌ Kĩ́dɔ̃̀ Hɔ́ɔ̀ ɓě po-po ɖé ɓóɖó-kpàà dà séín nyɛɛ ɓɛ́ìn ná kpáa kɛ́?

Jɛ̀hóvà Zàse ɓěɛ̀ Kĩ́dɔ̃̀ Hɔ́ɔ̀ séín kpa Gèɖèpɔ́ɔ̀ nyɛ́nɛ́ hwɛ̀ǐn-hwɛ̀ǐnɔ̀. Ɔ jèɛɛ, à dyéɛ kà Kĩ́dɔ̃̀ Hɔ́ɔ̀ múin kè ɔ bũ̌in nɔ̀mɔ̀ìn-nɔ̀mɔ̀ìn mɔ̀ dya-dè-dè kè ɖɛ kpa ɖɛ ɖò ɖé à Gèɖèpɔ́ɔ̀ ɓiè-ɓiè mú. À séín ɓɛ́ìn kũ̀àɔ̀ ɖò nyuɛ.

Dyí-poìn-poìn ɖò ɖǎ hwɛ̀ ní, tò m̀ mìɔùn ɓɛ́ m̀ ké Kĩ́dɔ̃̀ Hɔ́ɔ̀ múin wúò. Ðé dyí-poìn-poìn ɖò-ɖò mánáín ní, à ɖíí-gàà kè ɖíí-màà ɓě kpáìn Kĩ́dɔ̃̀ Hɔ́ɔ̀ múin wúò-wúò múàǔn dyi. Wíkì ɖò-ɖò séín xwíníín ní, wa nyu Kĩ́dɔ̃̀ Hɔ́ɔ̀ kũ̀à kɔ̃ cá. Ɛ́ɖɔ̀ mɔɔ mìnìsíwɔ́ɖɔ̀ sɛ́vɛ́ìn ɖò dyé ɖɛ ɓě wa ké nyuɛ jè gbo. Ɔ jǔ ké dàà dyi zɛ̀nɛ̌ kpɔ̃ ní, nyɔ ɖíɛ́ ɓě tò wa mìɔùn ɓɛ́ wa ké ɖé dyi wúò mɔɔ ɖé dyi wɔɔ̀ mɔɔ ɖɛ ɓěɔ̀ kè wúɖɛ̀-wɔ̃̀ ɓěɔ̀ bũ̌in sámá mɔɔ gmɛ̀ɛ̌ ɓěɔ̀ dyí sɛ́ɖɛ́ìn mɔɔ ɖé dèɖèìn-gbòɔ̀ múin wɔɔ̀ mɔɔ sĩ̀ɔ̌ ɓěɔ̀ xwáɖáún kpa ɔ kè pìǐ ɓěɔ̀ kpana. Wa po wé ɖò wáká ɖé zɔ̃ séín xwíníín ɓɛ́ wa ké kũ̀à ɓě kpa kpé mìɔ kɛɛ nyu. À dyi à dyú ɓěɔ̀ kũ̀à ɖíɛ́ ɓě gbo kpa ní, nìí, à nìɛ̀ wa tɛ̀mɛ̀ìn ɓɛ́ wa ké à ɓièìn-naínɔ̀ kpéín dyé.—Ìkíɖísìásì 5:1.

Tò gbo-kpá-sɔ̃̀ ɓó ɖɛ séín ɖò xwa nɔ̀mɔ̀ìn jè. Ðé zɔ̃ séín xwíníín nyɛɛ, wa gmɔìn Kĩ́dɔ̃̀ Hɔ́ɔ̀ múin kè ɔ bũ̌in. Ðɛ wa dyéɛ nyuɛ ké wa nyu kũ̀à ɓě ɓá ɔ xwa nɔ̀mɔ̀ìn jè dyíɛ. Ké ɔ nyuɛ ké wa ní peɖe wíɖí pídyi. (2 Kánáníkɔ̀ 24:13; 34:10) Kĩ́dɔ̃̀ Hɔ́ɔ̀ ɓɛ́ ɔ hwɛ̀ múɛɛ, mɔ̀ dɛ̀ ɓɛ́ ɔ sɛ́ɖɛ́ìn dyí ɓó à Gèɖèpɔ́ɔ̀ ɓiè jè kɛ. Dyììn ɖé kũ̀à ɓě nìà kɛ ɖò nyu-nyu múɛɛ, à tɛ̀mɛ̀ìn kà ɓɛ́ à ɖɛ̀ɓɛ̀ Jɛ̀hóvà mú ké à dyé à ɓièìn-naínɔ̀ kpéín nyɛ. (Wɛ́ɖɛ́ 122:1) Ðɛ nìà kɛ nyuɛ ké nyɔ ɓě ɓàìn à Gèɖèpɔ́ɔ̀ɔ̀.—2 Kɔ̀ɖéíntĩ̀ɔ̀ 6:3.

• Xwíníínɔ̀ nyɛ́ kɔ̃̀ jè à ɓièìn-naínɔ̀ jè mɛ ɓɔ́à à hwìɖǐi sɔ̀ɔ̀ kɛ́?

• Ðɛ́ ɓě wa po páún ɓɛ́ wa ké Kĩ́dɔ̃̀ Hɔ́ɔ̀ gbo gmɔ̀ kɛ́?

Nì muɛ mɔ́ùn ɓɛ́ m̀ ké fɔ̀nɔ̀-hwòɖǒ ɖìè ɓé dyi mɔ́ ɓɛ́ m̀ ké nì Báɓò dyuò-dyuòɔ̀ kɔ̃ poò? M̀ mɔ́ ɓɛ́ m̀ ké Báɓò vɔ̀sì jɛ́ɛ́ ɖò mɔɔ nyɔ ɖò kè dà ɖò mɔɔ ɖɛ ɓě nìà ɖé Báɓòɔ̀ múɛɛ jè dyuòò? Mɔɔ m̀ ɖǎà hwìɖǐi poìn ɖò kɛbì Gèɖèpɔ́ɔ̀ wuɖuɔ̀ ɓɛ́ìn m̀ gbo kpáa ɓá nì hwòɖǒ-kpɔ̃-ɖɛ̀ ɖò jè dyíì? Ɔ dyi ná nìǐn, nìí, m̀ mɛ nyùìn Kĩ́dɔ̃̀ Hɔ́ɔ̀ céè-ɖɛ̀-dyi-dèìn-naínɔ̀ kũ̀à mú.

Ɔ ɓéɖé ɖɛi-mɔ́ìn-ɖɛ̀ ɓě ɓɛ́ìn m̀ gbo kpáa kɛ. M̀ mɛ se Jɛ̀hóvà Zàse ɓěɛ̀ Báɓò-cèè-ɖɛ̀ séín ɓě nìà nì ɓíɖí-wùɖùɔ̀ múɛɛ ɓéɖé dyɛ̀, kɛɛ céè-ɖɛ̀-dyi-dèìn-naín nìà ɖé Kĩ́dɔ̃̀ Hɔ́ɔ̀ zɔ̃̀ɛɛ ɓéɖé céè-ɖɛ̀ ɖìè ɓěɔ̀ pàɖǎ. Ɔ ɓɛ́ìn Báɓò-dù kò-kò ɓě kè wuɖu-xwíníín-mú-zà-cèè-ɖɛ̀ nɔ̀mɔ̀ dyíin ɔ kè céè-ɖɛ̀ tɔ̀ɔ̀ ɓě ɓéɖéɛ ɖekè. M̀ ɓɛ́ìn céè-ɖɛ̀-dyi-dèìn-naínɔ̀ kũ̀à mú nyùɛ̀n hwɛ̀ ɓɛ́ dyí-poìn-poìnɔ̀ ké gbɔ dè mɔɔ ɔ ɖǎ mánáín hwɛ̀ìn. Ɔ jǔ ké nɛɛ̀-kpà ɖò dyi ɖé nììn, ɔ ɓɛ́ìn céè-ɖɛ̀-dyi-dèìn-naín mɔ̀à Watchtower Library kɛɛ ɓéɖéɛ. Ðɛ nìà kɛ mɔ̀ nɛɛ̀-kpà kũ̀à-mú-nyùìn-ɖɛ̀ ɓɛ́ ɔ ɓéɖé céè-ɖɛ̀ poìn dyí pàɖǎ ɓě kɛ. Ɔ se kũ̀à mú nyùɛ̀n kàmà ɓó cɛ̃́ɛ́-ɖɛ̀ ɖò kè wuɖu ɖò mɔɔ Báɓò vɔ̀sì ɖò dyi mɔ́ jè.

Ɔ mɔ̀ kũ̀à-mú-nyùìn-ɖɛ̀ ɓó ɖɛ-cɛ̃́-nyɔ̀ ɓě nìà Cĩ́-Cĩ́ Kè Kũ̀à Dyí-Poìn-Poìnɔ̀ múɛɛ bìì. M̀ ɓɛ́ìn Kĩ́dɔ̃̀ Hɔ́ɔ̀ Céè-Ðɛ̀-Dyi-Dèìn-Naínɔ̀ kũ̀à mú nyùɛ̀n nɔ̀mɔ̀ dyíin, ɓɛ́ m̀ ké nì kũ̀à ɓěɔ̀ ɖoɓo nyu. Cĩ́-Cĩ́ Kè Kũ̀à Dyí-Poìn-Poìnɔ̀ kɔ̃in-nyɔ̀ɔ̀ mɔ̀ nyɔ kɔ̃̀ céè-ɖɛ̀-dyi-dèìn-naínɔ̀ kpé gbo. Ɔ mɔ̀ nyɔ̀ dyéɛ jè gbo ɓɛ́ céè-ɖɛ̀ ɖìè ɓě ké ɖé nì, kè ɓɛ́ wa ké páún nì nɔ̀mɔ̀ dyíin. Sùkúù kɔ̃in-nyɔ̀ɔ̀ mɔɔ nì Báɓò-tɛ̀mɛ̀ìn-nyɔ̀ɔ̀ ɓɛ́ìn kà m̀ ké ɖɛ ɓě dyéɛ nyuɛɛ m̀ dyí tɛ̀mɛ̀ìn. Kɛɛ céè-ɖɛ̀ ɖò mɛ ɓɔ́ céè-ɖɛ̀-dyi-dèìn-naín nìà Kĩ́dɔ̃̀ Hɔ́ɔ̀ zɔ̃̀ kɛɛ mú sɔ̀ɔ̀. Ké jɛ́ɛ́ kɛɛ, à mɛ màìn céè-ɖɛ̀ ɓěɔ̀ mú, ké à ní ɖá ɓɛ́ à ké ɖò bɛ̃̌ mú po.

Ɓɛ́ à ké ‘Gèɖèpɔ́ɔ̀ dyí dyuò’ ní, Báɓòɔ̀ zaìn kɔ̃in kà ɓɛ́ ɔ mɛ jǔ à hwòɖǒɛ̀-mɔ́ɔ́-ɖɛ̀ ɓɛ́ à ké ɔ dyi mɔ́ “kà nyɔ kéɔ́ kà kɔ́mɔ́-ɖɛ̀ vǐè-vǐè ɖò” dyi mɔ́ɛ. (Nɔ́ɔ́ 2:1-5) Kĩ́dɔ̃̀ Hɔ́ɔ̀ céè-ɖɛ̀-dyi-dèìn-naínɔ̀ ɓɛ́ìn m̀ gbo kpáa ɓɛ́ m̀ ké nì ɖɛi-mɔ́-mɔ́ɔ̀ gbɔ dè.

• Ðɛ́ mɔ̀ ɖɛi-mɔ́ìn-ɖɛ̀ ɓě ɓɛ́ wa nì ɖé Kĩ́dɔ̃̀ Hɔ́ɔ̀ céè-ɖɛ̀-dyi-dèìn-naínɔ̀ kɛ́?

• Nyɛ́ ɓě ɓɛ́ìn m̀ gbo kpáa ɓɛ́ m̀ ké céè-ɖɛ̀-dyi-dèìn-naínɔ̀ kũ̀à mú nyuìn nɔ̀mɔ̀ dyíin nyɛ́?

Jízɛ̀ cɛ̃ɛ ma ɔ ɖeín-sí-nyɔ̀ ɓěɔ̀ gbo, ké ɔ ɖá, “Kà dyúáɖòɔ̀ kǎà ɓěɛ̀ ceɔ̀ mɛ fã ɖé nyɔǔn dyéɖéín, ɓɛ́ wa ké ɖɛ nɔ̀mɔ̀ kɔ̃in ɓě ɓɛ́ ɓě nyuɛɛ dyé, ɓɛ́ wa ké ɓě Ɓǎ nìà ɖé dyɔún wɛ̃ɛ ɓàìn.” (Máfíò 5:16) Ɔ jèɛɛ, à nì nɛɛ̀-kpà-ɖɛ̀ ɖìè ɓě kè nɛɛ̀-kpà-ɖúúɔ̀ kũ̀à mú nyùɛ̀n nɔ̀mɔ̀ dyíin. À ɖúú-kɔ̃-pà mɔ̀à jw.org kɛɛ mɔ̀ pá jɛ́ɛ́ ɓɛ́ ɔ ɓéɖé bɔ̃̌ ɓě ɓá ɖɛ ɓě ɓɛ́ Jɛ̀hóvà Zàse ɓě po jǎà, kè kũ̀à ɓě ɓɛ́ wa nyuɛ jè dyíɛ. Ðɛ́ ɓě nì ɔ kɔ̃ kɛ́?

Báɓòɔ̀ gɔ̃̌-jǔ-wùɖù ɓě ɓó dyi-diè-ɖɛ̀ ɓě bìì. M̀ ɓɛ́ìn ɖé gɔ̃̌-jǔ-wùɖù ɓě ɓó dyi-diè-ɖɛ̀ kpa ɖɛ ɓě ɓɛ́ nyɔ ɖíɛ́ ɓě ɖǎ dyi dièɛɛ dyéɛ. Ɔ hwɔìn kà ɖíféɖè mɔ̀à Gǎ-Dyé-Dyé Mú Náá Mánáín Hwɛ̀ìnǹ? nyɛ ɔ kè Nyɔ Ɓě Ðǎà Mɛ́ɛ Ɓɛ́ìn Cĩ́ɛ Ðe Jǎà? kɛɛ nì ɖúú kɔ̃ ɖé wuɖu-dù 600 zi kɔ̃ ɓě mú. M̀ ɓɛ́ìn ɖé Báɓò mɔ̀à New World Translation ɓɛ́ ɔ nì wuɖu-dù 130 zi kɔ̃ ɓě múɛ kè Báɓò-cɛ̃́ìn-cèè-ɖɛ̀ ɓě ɔ kè céè-ɖɛ̀ mɔ̀à Ðɛ́ Báɓòɔ̀ Ɓɛ́ìn À Tɛ̀mɛ̀ìn Nyɛ́? kɛɛ dyéɛ ɖekè. Ké ɖeɛɛ, m̀ ɓɛ́ìn ɖé The Watchtower kè Awake! mákázĩ̀ìn ɖie ɓě dyéɛ. M̀ ɓɛ́ìn céè-ɖɛ̀ ɓě nìà kɛ pàɖǎ wuɖuún zàà mɔɔ ɖùǔ gbo tòɛ̀ mɔɔ ɖúú kɔ̃ zàà ɖé nɛɛ̀-kpà-ɖúúɔ̀ kɔ̃. Wa ɖíɛ́ ɓě mɔ̀ MP3 kè PDF mɔɔ EPUB ɓɛ́ nyɔ pàɖǎ dyuò jè dyíɛ. M̀ ɓɛ́ìn ɖò ɖúúɔ̀ kɔ̃ zàà ɓɛ́ m̀ kéɛ nyɔ ɓě mɔ́ Báɓòɔ̀ cɛ̃́ɛ dyiɛɛ nyí ɖé wa mìɔùn nììn ɓíɖí-wùɖù mú! Víɖò pàɖǎ ɓě nì ɖé ɓoo-ɓoo-wùɖù kò-kò ɓě mú. M̀ ɓɛ́ìn Báɓòɔ̀ wuɖuún-zà-zà kà ɖɛ ɓě nyu kpáa kɛ kè Báɓò dyí-tɛ̀mɛ̀ìn-ɖɛ̀ ɓě ɔ kè wɛ́ɖɛ́ nɔ̀mɔ̀ kɔ̃in ɓě ɖé zàà ɓɛ́ m̀ ké wa ɖùǔ gbo tò.

Jǎà bɔ̃̌ ɓá Jɛ̀hóvà Zàse ɓě jè dyíɛ. Ké ɖɛ ɓě m̀ ɓɛ́ìn ɖé dyéɛ ɖekèɛɛ mɔ̀, bɔ̃̌ ɖìè ɓě kè víɖò ɓě ɓá à kũ̀àɔ̀ jè dyí, kè ɖɛ ɓě nì Jɛ̀hóvà Zàse ɓě gbo kpáuń ɖé ɓóɖó-kpàà dà séín nyɛ, ɔ kè nyɔ ɓě ɓɛ́ gǎ-ɖɛ̀ ɓě kpá gboɛɛ gbo-kpá-kpá. M̀ ɓɛ́ìn ɖé bɔ̃̌ ɓě ɓá à dyí-poìn-poìn vɛ̀nɛ̀ ɓě muà dyiìn nyɛɛ kè kà m̀ ké à Bɛ́fèò ɖɔ́ɔ́ ɓěɔ̀ zɔ̃̀ ɖá kɛɛ dyéɛ.

Dyììn ɖé ɖɛ ɓě nìà kɛ múɛɛ, jǎà cèɔ̀ nì fãuń ɖé ɓóɖó-kpàà dà vɛ̃in. Nyɔ ɓě sɔ̀à ɓóɖó-kpàà dà séín kè ɔ dà zi pɛɛ̌n kɔ̃̀ nyɛ́nɛ́ mɔ̀à Antarctica kɛɛ nì kpáná dyéɛń. À nì ɓaàǔn ɓɛ́ “[Jɛ̀hóvà] wuɖuɔ̀ ké dyi ɓèìn wàɖà” ɖé ɓóɖó-kpàà dà séín ɓɛ́ ɔ ké ɓàìn-ɓàìn ɓéɖé.—2 Tɛ̀sàɖónìà 3:1.

• Xwɛ̌ jw.org nì nyɔ pàɖǎ gbo kpáuń ɓɛ́ wa ké Báɓòɔ̀ jǎà-wùɖù cɛ̃́ kɛ́?

• Ðɛ́ nì mu mɔ́ùn ɓɛ́ m̀ ké dyi mɔ́ ɖé à páɔ̀ kɔ̃ kɛ́?