• Ðɛ́ Mɔ̀ Geɖepɔɔ Kã́á-Ɓòɖòɔ̀ Kɛ́?
    Kpáìn Fɛ̀ɛ̀ Múàùn Dyi Ɓó Sè-Ná-Sèɛ̀ Tiín!—Baɓoɔ Cɛ̃́-Cɛ̃́ Dɔ́ɔ́-Dè-Kà
    • Cɛ̃́ɛ́-ɖɛ̀ 31. Jízɛ̀ Kɛ́ɖɛ́ì mɔ̀à Kã́á ɖé dyɔún wɛ̃ɛ nì ɓó Jɛhova dyúa.

      CƐ̃́Ɛ́-ÐƐ̀ 31

      Ðɛ́ Mɔ̀ Geɖepɔɔ Kã́á-Ɓòɖòɔ̀ Kɛ́?

      Baɓoɔ hìɖì-kpà jɛ́ɛ́ɔ̀ ɓá Geɖepɔɔ Kã́á-ɓòɖòɔ̀ jè dyí. Jɛhova mu kã́á-ɓòɖò nìà wɛ kũ̀à mú nyùìn, ɓɛ́ ɔ ké ɖɛ ɔ po ma gbɔ kĩ́ín ɓá ɓóɖó-kpàà jè dyíɛɛ nyu. Ðɛ́ mɔ̀à Kã́á-ɓòɖòɔ̀ kɛ́? Xwɛ̀ à nyuɛ dyí dyuòɛ̀ kà ɔ ɖà kpé dyí ɖúɛ́? Ðɛ́ ɔ ɖà nyu kɛ́? Ké ɖɛ́ ɔ mu nyuùn ɖé dyúa kɛ́? Cɛ̃́ɛ́-ɖɛ̀ nìà kɛ kè cɛ̃́ɛ́-ɖɛ̀ sɔ̃́ kɔà ɓó dyíɛɛ mu dyi-diè-ɖɛ̀ ɓè nìà wɛ gɔ̃̀ jùùn.

      1. Ðɛ́ mɔ̀ Geɖepɔɔ Kã́á-ɓòɖòɔ̀ kɛ́, ké nyɛ́ mɔ̀ ɔ Kã́á kɛ́?

      Kã́á-ɓòɖòɔ̀ mɔ̀ gɔ̀mànà ɖò ɓɛ́ Jɛhova Geɖepɔɔ ɖà dyi dèɛ. Ɔ Kã́á mɔ̀à Jízɛ̀ Kɛ́ɖɛ́ì kɛɛ nìɛ̀ nàìn sɔ̀ìn ɖé dyɔún. (Máfíò 4:17; Jɔ̃́ɔ́ 18:36) Baɓoɔ cɛ̃ɛ ɓá Jízɛ̀ jè dyí, ké ɔ ɖá: “Ɔ mu [wa] wuɖuí kɔ̃̀ùn kánáá pu.” (Ðúù 1:32, 33) Kà Jízɛ̀ mɔ̀à Kã́á ɓó Geɖepɔɔ Kã́á-ɓòɖòɔ̀ bììɛɛ, ɔ mu nyɔùn séín nì ɓóɖó-kpàà kɔ̃ɛɛ nàìn.

      2. Nyɛ́ ɓè kè Jízɛ̀ mu Kã́á-ɓòɖòɔ̀ nàìn nyɛ́?

      Jízɛ̀ ɖòùn se Kã́á-ɓòɖòɔ̀ nàìn mu. Nyɔ ɓè sɔ̀ìn ɖé “xwéɖé-dù séín kè nyɔ ɓè po ma wuɖu-dù kò-kò ɓèɛ kè nyɔ-dù kò-kò séín ɔ kè ɓóɖó-dù séín hwìɛ̀ [kɛɛ] . . . mu nyɔùn wuɖuí kɔ̃̀ùn ɓóɖó-kpàɔ̀ kɔ̃.” (Wɛ̀ɖɛ̀ɓèɖésĩ̀ɔ̀ 5:9, 10) Nyɔ-kpò jĩ̀ xwɛ̀ kè Kɛ́ɖɛ́ì mu Kã́á-ɓòɖòɔ̀ nàìn nyɛ́? Sɔ̀ìn ti Jízɛ̀ dyi ma ɓóɖó-kpàà kɔ̃ɛ gboɛɛ, nyɔ méɔ̀ùn ɓè ɖà ɔ ɖeín-sí-nyɔ̀ ɓè jù. Kɛɛ, wa nyɔ-kpò táázĩ̀ìn hɔ̃dɛ̀ɖɛ̀ ɖò kè kpáɖá-nyɔ sɔ̃́ sè hĩinyɛ mɔ̀ nyɔ mu ɖé dyɔún muùn, ɓɛ́ wa kè Jízɛ̀ ké Kã́á-ɓòɖòɔ̀ nàìn. (Zà Wɛ̀ɖɛ̀ɓèɖésĩ̀ɔ̀ 14:1-4 wuɖuún.) Kɛ́ɖɛ́ì ɖeín-sí-nyɔ̀ tɔ̀ɔ̀ séín ɓè nì ɓóɖó-kpàà kɔ̃ɛɛ mu Kã́á-ɓòɖòɔ̀ xwíɖíi nììn.—Wɛ́ɖɛ́ 37:29.

      3. Xwíníínɔ̀ nyɛ́ kɔ̃̀ jè Geɖepɔɔ Kã́á-ɓòɖòɔ̀ kpaà ɖɛ ké ɔ zià nyɔùn gɔ̃̀mànà dyíɛ́?

      Kɛbì nyɔùn nàìn-nyɔ̀ ɓè mɛ vɔ̃ ɓɛ́ wa ké ɖɛ nɔ̀mɔ̀ dyíin ɓè nyuɛɛ, wa seɛ kpé nììn ɓéɖé ɓɛ́ wa ké ɖɛ séín wa mɔ́ nyuɛ dyiɛɛ nyu. Ti wè dyi ziín, wa pòìn wa nàìn-nyɔ̀ tɔ̀ɔ̀ ɓè ɓɛ́ wa se nyɔ ɓè wa nìà nàìn nyɛ jè gbo kɔ̃̀ kɛɛ bɛ̃̀ìn. Kɛɛ, nyɔ ɖò se Geɖepɔɔ Kã́á-ɓòɖòɔ̀ nàìn-nyɔ̀ mɔ̀à Jízɛ̀ kɛɛ bɛ̃̀ìn kpáa mu fɔɔ. Geɖepɔɔ ɖà “kã́á-ɓòɖò ɓɛ́ nyɔ ɖò se dyi gbaà ɓɛ́ìn nyɛɛ dyi [dè].” (Dànyá 2:44) Jízɛ̀ mu ɓóɖó-kpà gànáà nàìn, ké ɔ se nyɔ ɖò mú ɖɛ̀ɓɛ̀ɛ̀ mu ɓɛ́ ɔ ké nyɔ ɖò mɔ̀ùn dyí zi. Ɔ ɓéɖé ɖɛ̀ɓɛ̀ìn-ɖɛ̀ɓɛ̀ìn, ké ɔ nɔ̀mɔ̀ kpeɖeín, ké ɔ nyu dyi-sɛ́ɖɛ́ìn-ɖɛ̀, ké ɔ mu nyɔ ɓè ɖɛ tɛ̀mɛ̀ìn, ɓɛ́ wa ké wa mùè ɓè kpɔ̃ kpeɖeín-nɔ̀mɔ̀-kà kè dyí-sɛ́ɖɛ́ìn-kà ɔ kè ɖé ɖɛ̀ɓɛ̀ìn-ɖɛ̀ɓɛ̀ìn mú.—Zà Àzédyà 11:9 wuɖuún.

      ÐE ÐƐ MÚIN CÁ

      Cɛ̃́ xwíníín kɔ̃̀ jè Geɖepɔɔ Kã́á-ɓòɖòɔ̀ kpaà ɖɛ ké ɔ zià nyɔùn gɔ̃̀mànà dyíɛɛ jè.

      Jízɛ̀ Kɛ́ɖɛ́ì nì ɓóɖó-kpàà nàìn sɔ̀ìn ɖé ɔ zèè nìà ɖé dyɔún wɛ̃ɛ kɔ̃. Ɔ mùè nàìn-nyɔ̀ ɓèɔ̀ dèɖè dya ɖé ɔ ɖeín. Jɛhova nì fãuń ɖéé ɖé wa ɖeín.

      4. Gɔ̀mànà ɓéɖé kpé ɖò mu ɓóɖó-kpà gànáà nàìn

      Kpé ɓɛ́ Jízɛ̀ Kɛ́ɖɛ́ì ɓéɖé ɓɛ́ ɔ ké nyɔùn nàìn nyɛɛ zi nàìn-nyɔ̀ séín ɖò ɓɛ́ ɔ ɖà cĩ́ɛɛ kpé kɔ̃. Zà Máfíò 28:18 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

      • Xwɛ̀ Jízɛ̀ɛ̀ kpé nyu nyɔùn nàìn-nyɔ̀ séín ɖò kpé kɔ̃ ziɛ kɛ́?

      Wa zĩàìn nyɔùn gɔ̃̀mànà ɓè gbo kpɛ́-kpɛ́, ké wa ɖò-ɖò séín nàìn ɓóɖó-kpàà wáká ɖò pu. Geɖepɔɔ Kã́á-ɓòɖòɔ̀ mɔ̀ùn ɖé? Zà Dànyá 7:14 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

      • Xwíníínɔ̀ nyɛ́ kɔ̃̀ jè kà nyɔ ɖò seà Geɖepɔɔ Kã́á-ɓòɖòɔ̀ “dyi gbaà ɓɛ́ìn nyɛɛ” mɔ̀à ɖɛ nɔ̀mɔ̀ dyíin nyɛ́?

      • Xwíníínɔ̀ nyɛ́ kɔ̃̀ jè kà ɔ muà ɓóɖó-kpà gànáà nàìn nyɛɛ mɔ̀à ɖɛ nɔ̀mɔ̀ dyíin nyɛ́?

      5. Nyɔùn-dyùɛ̀ nàìn-kpè jè ɓéɖé ɓɛ́ ɔ ké dyi zi

      Xwíníínɔ̀ nyɛ́ kɔ̃̀ jè Geɖepɔɔ Kã́á-ɓòɖòɔ̀ ɓéɖé ɓɛ́ ɔ kéà nyɔùn gɔ̃̀mànà bɛ̃̀ìn kpá kɛ́? Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.

      VÍÐÒ: Ðɛ́ Mɔ̀à Geɖepɔɔ Kã́á-Ɓòɖòɔ̀ Kɛ́?—Wáká Ðò (1:41)

      • Ðɛ́ ɖà nyɔùn-dyùɛ̀ nyɔ-nàìn-nàìn mú sɔ̀ìn nyɛ́?

      Zà Ìkíɖísìásì 8:9 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

      • Nì hwòɖò ɖá Geɖepɔɔ Kã́á-ɓòɖòɔ̀ mɛ kpá nyɔùn gɔ̃̀mànà bɛ̃̀ìnǹ? Xwíníínɔ̀ nyɛ́ kɔ̃̀ jèɛ́?

      6. Geɖepɔɔ Kã́á-ɓòɖòɔ̀ ɓéɖé nàìn-nyɔ̀ ɓè ɓɛ́ wa wɔ̃́ à jè múin nyɛ

      Sepoɛɖe à Kã́á mɔ̀à Jìzɛ̀ kɛɛ mɔ̀ ma nyɔùn-dyù jèɛɛ, ɔ se nyɔ ɓɛ́ “wìì ké se nyuɛ ɓɛ́ìn ɓó à kpéí-hwɛ̀-hwɛ̀ ɓèɔ̀ jèɛ.” (Híìbúɖúù 4:15) Jɛhova ɖà gàa kè màa táázĩ̀ìn hɔ̃dɛ̀ɖɛ̀ ɖò kè kpáɖá-nyɔ sɔ̃́ sè hĩinyɛ ɓè ɓɛ́ nyɔ ɓɛ́ìn hwòɖò kɔ̃ dèɛ̀ kɛɛ gã “sɔ̀ìn ɖé xwéɖé-dù séín kè nyɔ ɓè po ma wuɖu-dù kò-kò ɓèɛ kè nyɔ-dù kò-kò séín ɔ kè ɓóɖó-dù séín hwìɛ̀.”—Wɛ̀ɖɛ̀ɓèɖésĩ̀ɔ̀ 5:9.

      • Ɔ dè nì hwòɖòɔ̀ dyi ɓɛ́ m̀ kéɛ dyí dyuò kà Jízɛ̀ kè ɔ mùè nàìn-nyɔ̀ séín ɓèɔ̀ dyuò ɖɛ mɔ̀ nyɔùn-dyùɛ̀ cĩ́-cĩ́ xwíníín nyɛ dyíɛɛ̀? Xwíníínɔ̀ nyɛ́ kɔ̃̀ jèɛ́?

      Gàa kè Màa ɓè ɓɛ́ zùùɔ̀ ɖà gã sɔ̀ìn ti kò-kò ɓè gbo kè nyɔ-dù kò-kò ɓè hwìɛ̀ kɛ.

      Jɛhova ɖà gàa kè màa ɓè sɔ̀ìn nyɔ-dù kò-kò ɓè hwìɛ̀ kɛɛ gã, ɓɛ́ wa kè Jízɛ̀ ké Kã́á-ɓòɖòɔ̀ nàìn

      7. Geɖepɔɔ Kã́á-ɓòɖòɔ̀ gma ɓèɔ̀ nɔ̀mɔ̀ dyíin ké wa zi nyɔùn gɔ̃̀mànà ɓèɛ̀ nììn dyí

      Gɔ̀mànà ɓè dè gma ɓè ɓɛ́ wa ɓéɖé wa ké wa nyɔ ɓèɔ̀ kpáná dyí nyu, kè ɓɛ́ wa ké wa dyí gmɔ̀ kɛ. Geɖepɔɔ Kã́á-ɓòɖòɔ̀ mɔ̀ùn ɓéɖé gma ɓè ɓɛ́ ɔ nyɔ ɓèɔ̀ ɓéɖé ɓɛ́ wa ké dyi kpɔ̃ kɛ. Zà 1 Kɔ̀ɖéíntĩ̀ɔ̀ 6:9-11 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

      • Ɔ jù ké nyɔ séín dyi Geɖepɔɔ gma ɓèɔ̀ dyi kpɔ̃ ní, nì hwòɖò ɖá xwɛ̀ ɓóɖó-kpàà mu nììn nyɛ́?a

      • Nì hwòɖò ɖá ɔ nyu fɔ̀nɔ̀ hwòɖò ɓɛ́ Jɛhova kéɛ hwìɖìi dè ɓɛ́ Kã́á-ɓòɖòɔ̀ nyɔ ɓè ké gma ɓè nìà kɛ dyi kpɔ̃ɔ̀? Xwíníínɔ̀ nyɛ́ kɔ̃̀ jèɛ́?

      • Ðɛ́ tɛ̀mɛ̀ìn kà nyɔ ɓè seà gma ɓè nìà kɛ dyi kpɔ̃ɔ nìɛɛ ɓɛ́ìn gbo zĩàìn nyɛ́?—Dyé vɔ̀sì 11.

      Pòɖésì-gàà ɖò nì hwòtimo ɓè ɓɔ́í poɛń ɓó hwìè-gmá ɖò dyí. Nyɔ kò-kò ɓè se ɓɛ́ìn nyɛɛ nì hwìèɔ̀ cɛ̃ɛń.

      Gɔ̀mànà ɓè dè gma ɓè ɓɛ́ wa ké wa nyɔ ɓèɔ̀ dyí gmɔ̀ kè ɓɛ́ wa ké wa kpáná dyí nyu. Geɖepɔɔ Kã́á-ɓòɖòɔ̀ ɓéɖé gma ɓè ɓɛ́ wa nì gma séín kɔ̃in nyɛ, ɓɛ́ wa ké Kã́á-ɓòɖòɔ̀ nyɔ ɓè dyí gmɔ̀ kè ɓɛ́ wa ké wa kpáná dyí nyu

      NYƆ ÐÒ ƁƐ́ÌN NÍIŃ: “Ðɛ́ mɔ̀ Geɖepɔɔ Kã́á-ɓòɖòɔ̀ kɛ́?”

      • Xwɛ̀ nì muɛ gɔ̃̀ jùùn wɛ̃́?

      SṸÌN-XWÍNÍÍN

      Geɖepɔɔ Kã́á-ɓòɖòɔ̀ mɔ̀ gɔ̀mànà jɛ́ɛ́ ɖò nì ɖé dyɔún ɓɛ́ ɔ mu ɓóɖó-kpà gànáà nàìn nyɛ.

      Ðɛ-kɔ̃in-kpa-kpa

      • Nyɛ́ ɓè mɔ̀à Geɖepɔɔ Kã́á-ɓòɖòɔ̀ nàìn-nyɔ̀ ɓèɛ́?

      • Xwɛ̀ Geɖepɔɔ Kã́á-ɓòɖòɔ̀ nyu nyɔùn gɔ̃̀mànà séín ɖò kɔ̃in nìɛ̀ kɛ́?

      • Ðɛ́ mɔ̀ ɖɛ ɖíɛ́ ɓè ɓɛ́ Jɛhova mɔ́ ɓɛ́ Kã́á-ɓòɖòɔ̀ nyɔ ɓè ké nyu kɛ́?

      Dyí-sɔ́-ɖɛ̀

      CƐ̃́ ÐƐ PÀÐÀ

      Cɛ̃́ ɖɛ Jízɛ̀ tɛ̀mɛ̀ìn ma ɓá dɛ̀ Kã́á-ɓòɖòɔ̀ nì kɛɛ jè dyíɛ.

      “Geɖepɔɔ Kã́á-Ɓòɖòɔ̀ Nì Ðé Nì Hwòɖòɔ̀ Xwíníínǹ?” (Ðúú-kɔ̃-cèè-ɖɛ̀)

      Xwíníínɔ̀ nyɛ́ kɔ̃̀ jè Jɛhova Zàse ɓè gãà ɓɛ́ wa kéà Geɖepɔɔ Kã́á-ɓòɖòɔ̀ kíɖíí sí ké wa seà nyɔùn gɔ̃̀mànà kíɖíí síɛ́?

      À Sí Geɖepɔɔ Kã́á-Ɓòɖòɔ̀ Kíɖíí (1:43)

      Gmɔìn ɖɛ Baɓoɔ tɛ̀mɛ̀ìn ɓá nyɔ-kpò táázĩ̀ìn hɔ̃dɛ̀ɖɛ̀ ɖò kè kpáɖá-nyɔ sɔ̃́ sè hĩinyɛ ɓè ɓɛ́ Jɛhova gãà ɓɛ́ wa kè Jízɛ̀ kéà Kã́á-ɓòɖòɔ̀ nàìn nyɛ jè dyíɛɛ múin.

      “Nyɛ́ Ɓè Mu Ðé Dyɔún Muùn Wɛ̃́?” (Ðúú-kɔ̃-cèè-ɖɛ̀)

      Ðɛ́ nyuɛ ké màa ɖò nì ma kpɔɖɔ ɖeín nyɛɛ dyiɛ ma jàà po kà Geɖepɔɔ ɖòùn mɔ̀ nyɔ ɓɛ́ìn ɓóɖó-kpàà gbo zĩàìn nyɛ́?

      “Kà Ḿ Nyu Ma Se-Dyí-Sɛ́ɖɛ́ìn-Ðɛ̀ Kpɔ̃ Kà Dyí Dyuòɛ̀ Kɛ” (Wóɖó Nyíɔún!, Gbàɖà-Gbàɖà 2013)

      a Wa mu gma ɓè nìà kɛ ɖíɛ́ ɓè jè kɔ̃in zàìn ɖé Ge-Mú 3 mú.

  • Geɖepɔɔ Kã́á-Ɓòɖòɔ̀ Ðà Nàìn-Kpè Dyí Ðú!
    Kpáìn Fɛ̀ɛ̀ Múàùn Dyi Ɓó Sè-Ná-Sèɛ̀ Tiín!—Baɓoɔ Cɛ̃́-Cɛ̃́ Dɔ́ɔ́-Dè-Kà
    • Cɛ̃́ɛ́-ɖɛ̀ 32. Jízɛ̀ Kɛ́ɖɛ́ì mɔ̀ Kã́á ɖé dyɔún ké ɔ ɓéɖé kùì-kpà ɖò xwa ké ɔ nì ɓóɖó-kpàà nàìn.

      CƐ̃́Ɛ́-ÐƐ̀ 32

      Geɖepɔɔ Kã́á-Ɓòɖòɔ̀ Ðà Nàìn-Kpè Dyí Ðú!

      Geɖepɔɔ Kã́á-ɓòɖòɔ̀ ɖú ma nàìn-kpè dyí ɖé zɔ̃ mɔ̀à 1914 kɛɛ xwíníín. Zɔ̃ dyúáɖòà xwíníín ɖé wé hwɛ̀ìn-gbɔ ɓè ɓá nyɔùn-dyùɛ̀ nàìn-kpè jè dyíɛɛ dè ma gbɔ. Xwɛ̀ à nyuɛ dyí dyuòɛ̀ kɛ́? Dyé kà Baɓo kpáá-ɖɛ̀ ɓè kè nyɔùn-dyùɛ̀ cĩ́-cĩ́ kè wa kpeɖe ɓè ɖà wáɖáá nì sɔ̀ìn 1914 gboɛ.

      1. Ðɛ́ Baɓo kpáá-ɖɛ̀ ɓè tɛ̀mɛ̀ìn nyɛ́?

      Baɓo-cèè-ɖɛ̀ mɔ̀à Dànyá kɛɛ tɛ̀mɛ̀ìn kà ɓɛ́ Geɖepɔɔ Kã́á-ɓòɖòɔ̀ mu ma nàìn-kpè dyí ɖúùn ɓó ti wa ɖáìn “zɔ̃ mɛ̀nɛ̀ìn-sɔ̃́” kɛɛ mánáín nyɛ. (Dànyá 4:16, 17) Zɔ̃ hɔ̃dɛ̀ɖɛ̀ pàɖà ɓè ɖà ma ziɛɛ, Jízɛ̀ ɖáìn ti dyúáɖò nìà wɛɛ “ɓóɖó-dù kà kò ɖò ɓèɛ̀ nyɔ ɓèɔ̀ tiɔ̀,” ké ɔ cɛ̃ɛ ma kà ɔ séè mánáín hwɛ̀ keɛ. (Ðúù 21:24) À muɛ dyéìn kà ɓɛ́ zɔ̃ mɛ̀nɛ̀ìn-sɔ̃́ɔ̀ hwɛ̀ ma mánáín ɖé zɔ̃ mɔ̀à 1914 kɛ xwíníín nyɛ.

      2. Nyɔùn-dyùɛ̀ cĩ́-cĩ́ kè kpeɖe ɓèɔ̀ nyɛ́ ɖà wáɖáá nì sɔ̀ìn 1914 gbo kɛ́?

      Jízɛ̀ɛ̀ ɖeín-nà-nyɔ̀ ɓèɔ̀ diè ma ɔ dyi, ké wa ɖá: “Ðɛ́ mɔ̀ dyí-tɛ̀mɛ̀ìn-ɖɛ̀ ɓè, ɓɛ́ wa kéɛ à dyí tɛ̀mɛ̀ìn kà ɔ mɔ̀á nì ɖe-dyi-tì kè ɓóɖó-kpàà mánáín-hwɛ̀-tììn nyɛ́?” (Máfíò 24:3) Ðé wa gɔ̃̀-jù-jù múɛɛ, Jízɛ̀ cɛ̃ ma ɖɛ pàɖà ɓè ɓɛ́ wa mu ma kpáùn ti ɔ mu ma Geɖepɔɔ Kã́á-ɓòɖòɔ̀ nàìn-nàìn gbɔ dèìn ɖé dyɔún wɛ̃. Ðɛ ɓèa ɖíɛ́ ɓè mɔ̀ to kè mɔ́ ɔ kè ɓóɖó-kpàà dyi-túò-túò. (Zà Máfíò 24:7 wuɖuún.) Baɓoɔ cɛ̃ɛ ma ɖekè kà ɓɛ́ kpeɖe ɓè ɓɛ́ nyɔ ɓè mu ɓéɖéín ɖé “wé hwɛ̀ìn-gbɔ ɓèɔ̀ xwíníín” nyɛɛ muɛ nyuùn ké “ti-kàmàùn-kàmàùn ɓè mu nììn” nyɛ. (2 Tímétè 3:1-5) Ðɛ ɓè nìà kɛ kè nyɔùn-dyùɛ̀ kpeɖe ɓè ɖà wáɖáá nì sɔ̀ìn 1914 gbo.

      3. Xwíníínɔ̀ nyɛ́ kɔ̃̀ jè ɓóɖó-kpàà ɖàà gbàà gbo kpá mìɔ sɔ̀ìn ti Geɖepɔɔ Kã́á-ɓòɖòɔ̀ ɖú ma nàìn-kpè dyíɛɛ gbo kɛ́?

      Ti Jízɛ̀ jù ma Kã́á ɓó Geɖepɔɔ Kã́á-ɓòɖòɔ̀ bìì, ké ti wè ɖà ma ziɛɛ, ɔ kè Sétɔ̃̀ kè zùù gbà ɓèɔ̀ vɔ̃ ma to ɖé dyɔún. Sétɔ̃̀ se ma toa ɖu. Baɓoɔ ɖá “wa po ma ɔ kè ɔ ínjà ɓèɔ̀ ɓíɖíi nɔ ɓóɖó-kpàà kɔ̃.” (Wɛ̀ɖɛ̀ɓèɖésĩ̀ɔ̀ 12:9, 10, 12) Sétɔ̃̀ kpá dyoɖoún mìɔ, sepoɛɖe ɔ dyuòɛ̀ kà ɔ mu mú gbɔɔ̀ùn wɛ̃. Ɔ jèɛɛ, ɔ nyuɛ ké nyɔ-ɖɛ-puà-puà kè gà-dyé-dyé hwɔ ɓóɖó-kpàà dà séín dyi. Mɛ̀nɛ̀kèìn ɖɛa kɔ̃̀ jè ɖé ɓóɖó-kpàà kpáà kà gbà gbo kɛ̀ wà! Geɖepɔɔ Kã́á-ɓòɖòɔ̀ mu fũ̀à-fṹá-ɖɛ̀ ɓè nìà kɛ séín jè dyi zĩ̀ìn.

      ÐE ÐƐ MÚIN CÁ

      Cɛ̃́ kà à nyuɛ dyí dyuòɛ̀ kà Kã́á-ɓòɖòɔ̀ ɖú ma nàìn-kpè dyí ɖé 1914 xwíníín kè ɖɛ mɔ̀ ɔ xwíníín ɓó à bììɛɛ jè.

      4. Ti-dyí-gbɛìn-gbɛìn ɓá Baɓo kpáá-ɖɛ̀ ɓè dyíɛɛ taɓa 1914 jìì

      Po VÍÐÒƆ̀ kũ̀à gbo.

      VÍÐÒ: Geɖepɔɔ Kã́á-Ɓòɖòɔ̀ Ðú Ma Nàìn-Kpè Dyí 1914 Xwíníín (5:02)

      Geɖepɔɔ nyuɛ ké Nɛ̀ɓùkànɛ́zà mɔ̀ ma Báɓèɖɔ́ùn-kã̀à kɛɛ ɓéɖé ma dya-dya ɖò. Dya-dya nìà wɛ kè ɔ xwíníín-mú-zà-zà ɓɛ́ Dànyá nyu ma kɛɛ tɛ̀mɛ̀ìn kà ɔ ɓá Nɛ̀ɓùkànɛ́zàà nàìn-kpèɔ̀ kè Geɖepɔɔ Kã́á-ɓòɖòɔ̀ dyíɛ.—Zà Dànyá 4:17 wuɖuún.a

      Zà Dànyá 4:20-26 wuɖuún, ɓɛ́ ɓè ké ɖɛ-tɛ̀mɛ̀ìn-mɛ̀ɛ̀-ɖɛ̀ɔ̀ kũ̀à mú nyùìn ɓɛ́ ɓè ké dyi-diè-ɖɛ̀ ɓè nìà kɛ gɔ̃̀ jù:

      • (A) Ðɛ́ Nɛ̀ɓùkànɛ́zà dyé ma ɖé ɔ dya-dyaɔ̀ múɛ́?—Dyé vɔ̀sì 20 kè 21.

      • (B) Ðɛ́ mu ma cuɔ̀ gbo kpáùn wɛ̃́?—Dyé vɔ̀sì 23.

      • (C) Ðɛ́ mu ma kpáùn ɖé “zɔ̃ mɛ̀nɛ̀ìn-sɔ̃́ɔ̀” mánáín nyɛ́?—Dyé vɔ̀sì 26.

      Kà Dya-Dya Ɓáà Cuɔ̀ Jè Dyíɛɛ Nyu Geɖepɔɔ Kã́á-Ɓòɖòɔ̀ Dyí Ɓáa Kɛ

      KPÁÁ-ÐƐ̀Ɔ̀ (Dànyá 4:20-36)

      Nàìn-kpè

      (A) Cu vɛ̀nɛ̀ ɖò

      Cu vɛ̀nɛ̀ tɔ̀mɔ̀ dya ɖò.

      Ɔ nàìn-kpèɔ̀ sɔ̀ ma ɔ xwa

      (B) “Ɓè ɖaɓa cuɔ̀,” ɓɛ́ “zɔ̃ mɛ̀nɛ̀ìn-sɔ̃́ ké zi hwɛ̀”

      Cu gmùnùù ɖò ɓɛ́ wa sã̀ìn nɛɛ̀-kpà kè ɓàɖàsì kɛ.

      Ɔ ɖú ma nàìn-kpè dyí ɖe

      (C) “Ɔ mu nì kã́á-ɓòɖòɔ̀ ɖe tòùn”

      Cu vɛ̀nɛ̀ tɔ̀mɔ̀ dya ɖò.

      Ðé kpáá-ɖɛ̀ nìà kɛ jàà-kpá-kpá múɛɛ . . . 

      • (D) Nyɛ́ mɔ̀ ma cuɔ̀ hwɛ̀ìn-ɖɛ̀ kɛ́?—Dyé vɔ̀sì 22.

      • (E) Xwɛ̀ ɔ nàìn-kpèɔ̀ nyu ma ɔ xwa sɔ̀ɔ̀ kɛ́?—Zà Dànyá 4:29-33 wuɖuún.

      • (F) Ðɛ́ kpá ma Nɛ̀ɓùkànɛ́zà gbo ɖé “zɔ̃ mɛ̀nɛ̀ìn-sɔ̃́ɔ̀” mánáín nyɛ́?—Zà Dànyá 4:34-36 wuɖuún.

      JÀÀ-KPÁ-KPÁ KĨ́ÍN-KĨ́ÍNƆ̀

      Nàìn-kpè

      (D) Nɛ̀ɓùkànɛ́zà mɔ̀ ma kà Báɓèɖɔ́ùn-kã̀àɔ̀ kɛ

      Kã́á Nɛ̀ɓùkànɛ́zà kpá múàùn ké ɔ nyànà dyi.

      Ɔ nàìn-kpèɔ̀ sɔ̀ ma ɔ xwa

      (E) Ti 606 B.C.E. ɖà ma ziɛɛ, Nɛ̀ɓùkànɛ́zà sí ma xwáɖáún dyi, ké ɔ se ma ɓóɖóɔ̀ nàìn ɓɛ́ìn ɓó zɔ̃ mɛ̀nɛ̀ìn-sɔ̃́ bììc

      Nɛ̀ɓùkànɛ́zà pɛ̃́ ɓó ɓíɖíi dyi ké ɔ nì pìì ɖiɛń kà nimii ɖò nìà kɛ.

      Ɔ ɖú ma nàìn-kpè dyí ɖe

      (F) Nɛ̀ɓùkànɛ́zà dyi ma ɔ mìɔùn gbo ɖe, ké ɔ ɖú ma ɔ nàìn-kpèɔ̀ dyí ɖe

      Kã́á Nɛ̀ɓùkànɛ́zà nyànà dyi ké ɔ tò sɔ̃ dyií.

      Ðé kpáá-ɖɛ̀ nìà kɛ jàà-kpá-kpá sɔ̃́ nììnɔ̀ múɛɛ . . . 

      • (G) Nyɛ́ mɔ̀ ma cuɔ̀ hwɛ̀ìn-ɖɛ̀ kɛ́?—Zà 1 Kánáníkɔ̀ 29:23 wuɖuún.

      • (H) Xwɛ̀ waà nàìn-kpèɔ̀ nyu ma ɓɔ́í kpáa kɛ́? Xwɛ̀ à nyuɛ dyí dyuòɛ̀ kà ɔ nì ma ná ke ti Jízɛ̀ nì ma ɓóɖó-kpàà kɔ̃ɛ́?—Zà Ðúù 21:24 wuɖuún.

      • (I) Tiɔ̀ nyɛ́ kè dɛ̀ nàìn-kpè nìà kɛ dè ma gbɔ ɖeɛ́?

      JÀÀ-KPÁ-KPÁ SƆ̃́ NÌÌNƆ̀

      Nàìn-kpè

      (G) Éézùɖùɛ̀-kã̀à ɓè ɓɛ́ wa nyànà ma Geɖepɔɔ nàìn-kpèɔ̀ bɛ̃̀ìn nyɛ

      Éézùɖùɛ̀-kã̀à ɓèɔ̀ bɛ̃̀ìn-kpá-nyɔ̀ ɖò kò zèè ɖò kɔ̃. Ce ɖò nì wa dyai fã̀ìn.

      Ɔ nàìn-kpèɔ̀ sɔ̀ ma ɔ xwa

      (H) ùɖúsɛ̀ɖɛ̀ìn gbɔɔ̀ ma mú, ké ɔ po ma Éézùɖùɛ̀-kã̀à ɓèɔ̀ jè ɓɔ́í ɓó zɔ̃ 2,520 bìì

      Nyɛ ɖò nì Jùɖúsɛ̀ɖɛ̀ìn-hwɔ̀ɖɔ̀ sùàɔ̀ mú gbɔɔ̀ùn ɓó 607 B.C.E. Sɔ̀ìn ɓóɛ gboɛɛ, zɔ̃ 2,520 zĩ̀ɛ̀n kɔ̃in.

      Ɔ ɖú ma nàìn-kpè dyí ɖe

      (I) Jízɛ̀ jù ma Kã́á, ké ɔ dè ma Geɖepɔɔ Kã́á-ɓòɖòɔ̀ nàìn gbɔ ɖé dyɔún

      Jízɛ̀ nì ɓóɖó-kpàà nàìn sɔ̀ìn ɖé ɔ zèè nìà ɖé dyɔún wɛ̃ɛ kɔ̃ ɖé 1914 C.E xwíníín. Ce ɖò nì ɔ dyai fã̀ìn.

      Ðɛ́ mɔ̀ zɔ̃ mɛ̀nɛ̀ìn-sɔ̃́ɔ̀ ɓoún-tɔ̀mɔ̀-tɔ̀mɔ̀ kɛ́?

      Baɓoɔ wáká ɖíɛ́ ɓè kpá à gbo ɓɛ́ à ké ɔ wáká tɔ̀ɔ̀ ɓè múin wɔ̃́. Ɔ hwɔìn-kà, Baɓo-cèè-ɖɛ̀ mɔ̀à Wɛ̀ɖɛ̀ɓèɖésĩ̀ɔ̀ kɛɛ cɛ̃ɛ kà ɓɛ́ zɔ̃ tã kè fáún-fáún ɓoún-tɔ̀mɔ̀-tɔ̀mɔ̀ mɔ̀ wé 1,260 kɛ. (Wɛ̀ɖɛ̀ɓèɖésĩ̀ɔ̀ 12:6, 14) Zɔ̃ mɛ̀nɛ̀ìn-sɔ̃́ mɔ̀ nɔ̀ɓà nìà wɛ deìn-kɔ̃in, mɔɔ wé 2,520. Tiɔ̀ ɖíɛ́ ɓè ɓaɖaín Baɓoɔ ɖú wé dyí ɓɛ́ ɔ ké zɔ̃ dyúáɖò jù. (Ìzíkìò 4:6) Kà dyúáɖòɔ̀ kàà ɔ nì ɓá zɔ̃ mɛ̀nɛ̀ìn-sɔ̃́ wa cɛ̃à jè ɖé Dànyá-cèè-ɖɛ̀ɔ̀ múɛɛ jè dyí—ɔ mɔ̀ zɔ̃ 2,520.

      5. Ɓóɖó-kpàà ɖà gbo zĩàìn sɔ̀ìn 1914 gbo

      Po VÍÐÒƆ̀ kũ̀à gbo.

      VÍÐÒ: Ɓóɖó-Kpàà Ðà Gbo Zĩàìn Sɔ̀ìn 1914 Gbo (1:10)

      Jízɛ cɛ̃ɛ zɔ̃̀ɔ̀ kà ɓɛ́ ɖɛ ɓè mu ma wáɖáá nììn ti ɔ mu ma Kã́á jùùn wɛ̃. Zà Ðúù 21:9-11 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

      • Ðɛ ɓè nìà kɛ nyɛ́ m̀ ɖà dyé mɔɔ m̀ ɖà jè wɔ̃́ kɛ́?

      Àpɔ́sò Pɔ́ɔ̀ zaìn ma kà nyɔ ɓè kpeɖe mu nììn ɖé wé hwɛ̀ìn-gbɔ ɓèɔ̀ múɛɛ jè kɔ̃in. Zà 2 Tímétè 3:1-5 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

      • Kpeɖe ɓè nìà kɛ nyɛ́ m̀ ɖà nyɔ ɓè mú dyé zɛ̃̀ɛ̀ kɛ́?

      Fótò-poìn-dyí: Ðɛ ɓè ɓɛ́ wa tɛ̀mɛ̀ìn ɓóɖó-kpàà nì-kà ɖé wé hwɛ̀ìn-gbɔ ɓèɔ̀ xwíníín nyɛ. 1. Sójà ɓèɔ̀ nyɔ vɛ̀nɛ̀ ɖò nyànà ɖɛ ɖò kɔ̃ ké ɔ tò sɔ̃ dyií ké ɔ nì mú pánáuń. 2. Gbò ɓè gbɔɔ̀ mú ti ɓóɖó-kpàà túò ma dyiɛ. 3. Sójà ɓèɔ̀ dyɔún-dò-ɖúú ɓè. 4. Nyɔ kúɖúú ɓè jìnììn ɖɔ mánáín ké wa nì píé síɛń. 5. Gbò tɔ̀mɔ̀ dya sɔ̃́ ɓè nìà Nìì Dyɔ́ɔ̀ kɛɛ nyɛín sɔ̀ìn ɖé ɖɛ-gbà-nyu-nyɔ̀ ɓè xwaún. 6. Gàa ɖò nì náá-ɖɛ̀ vɛ̀nɛ̀ ɖò dyí ɖúɛń. 7. Nyɔ́nɔ́-ɓà ɖò páɖá ɓɔ̀ táà ké ɔ nì ɔ gmàà du dyi pánáìn. 8. Náá-ɖɛ̀ vɛ̀nɛ̀ kò-kò ɓè kè nɔmɔɔ. 9. Màa kpò sɔ̃́ po ɖɔ ɖìè ɓè kè bɛ̃̀ìn-ɖɛ̀ ɓè bùɛɛ nì fótò dyí ɖúɛń. 10. Wɛ́ɖɛ́ ɖìè kũ̀à-gbo-po-nyɔ̀ ɖò nì wɛ́ɖɛ́ kũ̀à gbo poɛń ɖé hwɔ ɖò kɔ̃. 11. Hwɔ̀ɖɔ̀-gbà dyi-po-nyɔ̀ ɖò nì ɖɛ ɖò poɛń.

      6. Geɖepɔɔ Kã́á-ɓòɖòɔ̀ nàìn-kpè dyí-ɖú-ɖú mɛ po à kpéí

      Zà Máfíò 24:3, 14 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

      • Kũ̀à kpa ɖɛɔ̀ nyɛ́ tɛ̀mɛ̀ìn kà Geɖepɔɔ Kã́á-ɓòɖòɔ̀ nì nyɔ nàìn kàùn wɛ̃́?

      • Xwɛ̀ m̀ ɓɛ́ìn kũ̀à nìà kɛ ɖò nyuɛ kɛ́?

      Geɖepɔɔ Kã́á-ɓòɖòɔ̀ nì nyɔ nàìn kàùn, ké ti kɔ̃̀ ɓaɖa ɔ mu ɓóɖó-kpà gànáà kpé kɔ̃ún kɔ̃̀ùn wɛ̃ɛ ɖà dyi xwɛ̃́ìn. Zà Híìbúɖúù 10:24, 25 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

      • Ðɛ́ à ɖò-ɖò séín mɛ nyu kà à nìà ‘dyéɛń kà ɓɛ́ wéɔ̀ nìà dyiɛń nyɛ́’?

      Fótò-poìn-dyí: 1. Baɓo-cɛ̃́-nyɔ̀ ɖò nì Jɛhova Zàse ɓèɛ̀ dyí-poìn-poìn ɖò mú. 2. Baɓo-cɛ̃́-nyɔ̀ dyúáɖòɔ̀ nì nyɔ ɖò ɔ dyuò dyíɛɛ Geɖepɔɔ-wùɖù gbo wáɖáuń.

      Ɔ jù ké m̀ dyi ɖɛ ɖò ɓɛ́ ɔ ɓɛ́ìn nyɔ tɔ̀ɔ̀ ɓè gbo kpáa ké ɔ ɓɛ́ìn wa póɛ̀n nyɛɛ jè cɛ̃́ ní, ɖɛ́ nì mu nyuùn wɛ̃́?

      NYƆ ÐÒ ƁƐ́ÌN NÍIŃ: “Xwíníínɔ̀ nyɛ́ kɔ̃̀ jè Jɛhova Zàse ɓè cɛ̃à 1914 jè mìɔ cá kɛ́?”

      • Ðɛ́ nì mu cɛ̃ìn nyɛ́?

      SṸÌN-XWÍNÍÍN

      Baɓo kpáá-ɖɛ̀ ɓè kè wa ti-dyí-gbɛìn-gbɛìn ɔ kè ɖɛ ɓè nì ɓóɖó-kpàà kɔ̃ kpáuń wɛ̃ɛ tɛ̀mɛ̀ìn kà ɓɛ́ Geɖepɔɔ Kã́á-ɓòɖòɔ̀ ɖà nàìn-kpè dyí ɖúɛ. À tɛ̀mɛ̀ìn kà à po ɖɛ nìà kɛ jàà dyììn ɖé ɔ jè zio-po-po kè Kɛ́ɖɛ́ì ɖeín-sí-nyɔ̀ ɓèɛ̀ dyí-poìn-poìn ɓèɔ̀ mú mu-mu mú.

      Ðɛ-kɔ̃in-kpa-kpa

      • Ðɛ́ kpá ma ɖé zɔ̃ mɛ̀nɛ̀ìn-sɔ̃́ wa cɛ̃à jè ɖé Dànyá-cèè-ɖɛ̀ɔ̀ múɛɛ mánáín nyɛ́?

      • Ðɛ́ nyuɛ ɓɛ́ m̀ kéɛ jàà po kà Geɖepɔɔ Kã́á-ɓòɖòɔ̀ ɖú ma nàìn-kpè dyí ɖé 1914 xwíníín nyɛ́?

      • Xwɛ̀ m̀ ɓɛ́ìn tɛ̀mɛ̀ìn kà m̀ poɛ jàà kà ɓɛ́ Kã́á-ɓòɖòɔ̀ nì nyɔ nàìn kàùn wɛ̃́?

      Dyí-sɔ́-ɖɛ̀

      CƐ̃́ ÐƐ PÀÐÀ

      Cɛ̃́ ɖɛ ɓóɖó-sùàùn-cèè-ɖɛ̀ céè-nyɔ̀ ɓè kè nyɔ tɔ̀ɔ̀ ɓè cɛ̃ ɓá ɓóɖó-kpàà gbo zĩàìn jè dyí sɔ̀ìn 1914 gboɛ.

      “Nyɔ Ɓè Kpeɖe Dyi Dyí Zàìn Mìɔ Ní” (Wóɖó Nyíɔún!, Zágìɖìɔ̀ 2007)

      Zà ɖɛ kpáá-ɖɛ̀ nìà ɖé Máfíò 24:14 múɛ nyu ma gàa ɖòɛ̀ cĩ́-cĩ́ bũ̀ɛɛ jè wuɖuún.

      “Ḿ Ðɛ̀ɓɛ̀ Ma Béèbɔ́ɔ̀ Mú Mìɔ Ké Ɔ Zi Ma Ðɛ Séín Ðò Dyí!” (Dyí-Gmɔ̀ìn-Gbò-Cèè-Ðɛ̀ɔ̀ Nɔ̀. 3 2017)

      Xwɛ̀ à nyuɛ dyí dyuòɛ̀ kà kpáá-ɖɛ̀ céèà ɖé Dànyá wuɖu-kpà 4 múɛɛ ɓá Geɖepɔɔ Kã́á-ɓòɖòɔ̀ jè dyíɛ́?

      “Tiɔ̀ Nyɛ́ Geɖepɔɔ Kã́á-Ɓòɖòɔ̀ Ðú Ma Nàìn-Kpè Dyíɛ́? (Wáká 1)” (Dyí-Gmɔ̀ìn-Gbò-Cèè-Ðɛ̀ɔ̀, Kpadyua 1, 2014)

      Ðɛ́ tɛ̀mɛ̀ìn kà “zɔ̃ mɛ̀nɛ̀ìn-sɔ̃́” wa cɛ̃à jè ɖé Dànyá wuɖu-kpà 4 múɛɛ hwɛ̀ ma mánáín ɖé 1914 xwíníín nyɛ́?

      “Tiɔ̀ Nyɛ́ Geɖepɔɔ Kã́á-Ɓòɖòɔ̀ Ðú Ma Nàìn-Kpè Dyíɛ́? (Wáká 2)” (Dyí-Gmɔ̀ìn-Gbò-Cèè-Ðɛ̀ɔ̀, Gbàɖà-Gbàɖà 1, 2014)

      a Dyé cɛ̃́ɛ́-ɖɛ̀ hwɛ̀ìn-gbɔ sɔ̃́ nìà Cɛ̃́ Ðɛ Pàɖà wákáɔ̀ xwíɖíi nɔ cɛ̃́ɛ́-ɖɛ̀ nìà kɛ múɛ.

  • Ðɛ Kã́á-Ɓòɖòɔ̀ Mu Nyuùn Wɛ̃
    Kpáìn Fɛ̀ɛ̀ Múàùn Dyi Ɓó Sè-Ná-Sèɛ̀ Tiín!—Baɓoɔ Cɛ̃́-Cɛ̃́ Dɔ́ɔ́-Dè-Kà
    • Cɛ̃́ɛ́-ɖɛ̀ 33. Nyɔ ɓè nì páɖédà mú cĩ́ɛń dà ɓóɖó-kpàà kɔ̃.

      CƐ̃́Ɛ́-ÐƐ̀ 33

      Ðɛ Kã́á-Ɓòɖòɔ̀ Mu Nyuùn Wɛ̃

      Geɖepɔɔ Kã́á-ɓòɖòɔ̀ ɖà nàìn-kpè dyí ɖú nɔ̀ɔ̀. Ɔ mu ɖɛ-gbo-zĩàìn-zĩàìn vɛ̀nɛ̀ ɓè nyuùn dà ɓóɖó-kpàà kɔ̃ kàùn. Ɓèà cɛ̃ ɖɛ nɔ̀mɔ̀ kɔ̃in ɓèa ɖíɛ́ ɓè ɓɛ́ m̀ ɓɛ́ìn jè hwìì gmɔ̀ɔ̀ ɖé Kã́á-ɓòɖòɔ̀ nàìn-kpè xwíɖíiɛɛ jè.

      1. Xwɛ̀ Geɖepɔɔ Kã́á-ɓòɖòɔ̀ mu gìɖìì kè dyí-sɛ́ɖɛ́ìn-sɛ́ɖɛ́ìn ɓóɖó-kpàà kɔ̃ dyàùn wɛ̃́?

      Jízɛ̀, ɓɛ́ ɔ mɔ̀à Kã́á ɓó Geɖepɔɔ Kã́á-ɓòɖòɔ̀ bììɛɛ mu hwòɖò-kɔ̃in-nyìnììn-nyɔ̀ ɓè kè gɔ̀mànà ɓè mú gbɔɔ̀ùn ɖé to mɔ̀à Àmàgɛ́ɖɔ̀ùn wɛ̃ɛ mú. (Wɛ̀ɖɛ̀ɓèɖésĩ̀ɔ̀ 16:14, 16) Ɓó tia ɓaɖaa, Baɓo kpáá-ɖɛ̀ nìà kɛ mu jàà kpáùn gàná cá. Kpáá-ɖɛ̀ɔ̀ ɖá: “Ti wè dyi ziín, hwòɖò-kɔ̃in-nyìnììn-nyɔ̀ ɓèɔ̀ se nìɛ̀ mu ɖe.” (Wɛ́ɖɛ́ 37:10) Dyììn ɖé Kã́á-ɓòɖòɔ̀ múɛɛ, Jízɛ̀ muɛ jè gbo dyéìn, ɓɛ́ gìɖìì kè dyí-sɛ́ɖɛ́ìn-sɛ́ɖɛ́ìn ké ɓóɖó-kpàà kɔ̃ dyi dyíìn.—Zà Àzédyà 11:4 wuɖuún.

      2. Xwɛ̀ cĩ́-cĩ́ mu nììn ti wa mu Geɖepɔɔ mɔ́ɔ́-ɖɛ̀ nyuùn dà ɓóɖó-kpàà kɔ̃ kɛ́?

      Ðé Geɖepɔɔ Kã́á-ɓòɖòɔ̀ xwíɖíiɛɛ, “dyí-sɛ́ɖɛ́ìn-nyɔ̀ ɓèɔ̀ mu ɓóɖóɔ̀ wuɖuí kɔ̃̀ùn, ɓɛ́ wa kéɛ mú cĩ́ kánáá pu.” (Wɛ́ɖɛ́ 37:29) Nàìn ɓóɖó-kpà kɔ̃̀ kɔ̃ ɓɛ́ nyɔ séín sɛ́ɖɛ́ìn dyí, ké wa séín ɖɛ̀ɓɛ̀ Jɛhova kè wa mùè ɓè múɛɛ kɔ̃ cĩ́ jè hwìɖìi! Nyɔ ɖò se wɛ́ɛ mu, ké nyɔ séín mu cĩ́ìn ɓó sè-ná-sèɛ̀ tiín.

      3. Hwòɖò-kɔ̃in-nyìnììn-nyɔ̀ ɓèɔ̀ ɖà mú gbɔɔ̀ ní, ɖɛ́ Geɖepɔɔ Kã́á-ɓòɖòɔ̀ mu nyuùn wɛ̃́?

      Hwòɖò-kɔ̃in-nyìnììn-nyɔ̀ ɓèɔ̀ ɖà mú gbɔɔ̀ ní, Jízɛ̀ mu Kã́á jùùn ɓó zɔ̃ 1,000 bìì. Ɓó tia ɓaɖaa, ɔ kè nyɔ-kpò táázĩ̀ìn hɔ̃dɛ̀ɖɛ̀ ɖò kè kpáɖá-nyɔ sɔ̃́ sè hĩinyɛ ɓèɔ̀ mu nyɔ ɓè nì ɓóɖó-kpàà kɔ̃ɛɛ gbo kpáùn, ɓɛ́ wa ké mú hwɛ̀, ɓɛ́ wa ké se kɛɛ ɖò ɓéɖé ɖe. Ðé tia mánáín nyɛɛ, ɓóɖó-kpàà mu páɖédà nɔ̀mɔ̀ dyíin ɖò jùùn, ké nyɔ ɓè ɓɛ́ wa kpá múàùn, ké wa dyé Jɛhovaa gma ɓèɔ̀ dyi-kpɔ̃-kpɔ̃ kpáná kɔ̃ún wɛ̃ɛ mu ɔ kɔ̃ dyi dyíìn. Jízɛ̀ mu nyɔ-wuɖuí-kɔ̃̀-kpèɔ̀ ɔ Ɓà Jɛhova dyí tòùn ɖe. Ké kà Jɛhova ‘nyɛ́nɛ́ɔ̀ mu mú hwɛ̀ìn nyɛɛ’ séè ná kpá ɖò. (Máfíò 6:9, 10) Ɓó tia ɓaɖaa, ɔ mu wáɖáá nììn kà Jɛhova mɔ̀ Nyɔ-nàìn-nyɔ̀ nɔ̀mɔ̀ dyíin ɖò ɓɛ́ ɔ kɔ̃̀ ɖé ɔ nyɔ ɓèɔ̀ jè gboɛ. Nìí, Jɛhova mu Sétɔ̃̀ kè zùù gbà ɓèɔ̀ ɔ kè nyɔ tɔ̀ɔ̀ séín ɓè ɓɛ́ wa gãà ɓɛ́ wa kéà Ɔ nyɔ-wuɖuí-kɔ̃̀-kpèɔ̀ gbo vɔ̃ kɛɛ mú gbɔɔ̀ùn. (Wɛ̀ɖɛ̀ɓèɖésĩ̀ɔ̀ 20:7-10) Ɓóɖó-kpàà xwai-nɔ̀mɔ̀ìn-nɔ̀mɔ̀ìn ɓɛ́ Geɖepɔɔ Kã́á-ɓòɖòɔ̀ muà nyuùn wɛ̃ɛ mu nììn ɓó sè-ná-sèɛ̀ tiín.

      ÐE ÐƐ MÚIN CÁ

      Cɛ̃́ xwíníín kɔ̃̀ jè à ɓɛ́àìn hwòɖò kɔ̃ dèɛ̀ kà ɓɛ́ Geɖepɔɔ mu ɔ Kã́á-ɓòɖòɔ̀ kũ̀à mú nyùìn ɓɛ́ ɔ kéɛ nyu ɓɛ́ Baɓoɔ nyɛ́nɛ́ín-ɖáìn-ɖɛ̀ ɓè ɓó ɖé dyúa bììɛɛ séín ké jàà kpá kɛ.

      4. Geɖepɔɔ Kã́á-ɓòɖòɔ̀ mu nyɔùn gɔ̃̀mànà ɓè jè dyi zĩ̀ìn

      “Nyɔ ɖíɛ́ ɓè kɔ̃̀ nyɔ wuɖuí dà ɓóɖó-kpàà kɔ̃, ké wa nyuɛ ké nyɔùn ɓè dyé gà.” (Ìkíɖísìásì 8:9) Dyììn ɖé Kã́á-ɓòɖòɔ̀ múɛɛ, Jɛhova mu se-dyí-sɛ́ɖɛ́ìn-ɖɛ̀ nìà kɛ ɓɔ́í poùn.

      Zà Dànyá 2:44 kè 2 Tɛ̀sàɖónìà 1:6-8 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

      • Ðɛ́ Jɛhova kè ɔ Dyú-gàà Jízɛ̀ mu nyɔùn gɔ̃̀mànà ɓè kè waà gbo-zi-nyɔ̀ ɓè bũ̀ nyuùn wɛ̃́?

      • Xwɛ̀ ɖɛ m̀ ɖàà cɛ̃́ ɓá Jɛhova kè Jízɛ̀ jè dyíɛɛ nyuɛ ɓɛ́ m̀ kéɛ hwòɖò kɔ̃ dè kà ɓɛ́ waà nyuu-ɖɛ̀ ɓèɔ̀ mu dyí sɛ́ɖɛ́ìn nyɛ́?

      Jízɛ̀ mɔ̀ Kã́á ɖé dyɔún ké ɔ nì ɓóɖó-kpàà nàìn.

      5. Jízɛ̀ mɔ̀ Kã́á kpa ɖɛ ɓɛ́ ɔ zi kã́á séín dyíɛ

      Kà Jízɛ̀ mɔ̀à Kã́á ɓó Geɖepɔɔ Kã́á-ɓòɖòɔ̀ bììɛɛ, ɔ mu nyɔ ɓè gbo kpáún dà ɓóɖó-kpàà kɔ̃ ɖé hwìè pàɖà ɓè mú. Po VÍÐÒƆ̀ kũ̀à gbo, ɓɛ́ m̀ kéɛ dyé kà Jízɛ̀ ɖàa tɛ̀mɛ̀ìn kà ɔ mɔ́ ɓɛ́ ɔ ké nyɔ ɓè gbo kpá, ké Geɖepɔɔ ɖà ɔ kpé nyí ɓɛ́ ɔ kéɛ náa nyuɛ.

      VÍÐÒ: Jízɛ̀ Tɛ̀mɛ̀ìn Ðɛ Kã́á-Ɓòɖòɔ̀ Mu Nyuùn Wɛ̃ (1:13)

      Ðɛ Jízɛ̀ nyu ma ti ɔ nì ma ɓóɖó-kpàà kɔ̃ɛɛ mɔ̀ dyí-tɛ̀mɛ̀ìn-ɖɛ̀ ɓá ɖɛ Kã́á-ɓòɖòɔ̀ mu nyuùn wɛ̃ɛ jè dyí. Mana ɓè wa zɛɖɛà dà kɛɛ, waà nyɛ́ m̀ mɔ́ dyéɛ dyi xwééɛ́? Zà vɔ̀sì ɓè céèà ɓó ɓɛ́ wa cɛ̃à mana ɓè nìà kɛ jèɛɛ wuɖuún.

      TI JÍZƐ̀ NÌ MA ƁÓÐÓ-KPÀÀ KƆ̃ƐƐ, Ɔ . . . 

      SƆ̀ÌN ÐÉ DYƆÚN WƐ̃Ɛ, JÍZƐ̀ MU . . . 

      • po ma dìì ɓè ɓɔ́í.—Máà 4:36-41.

      • ɓóɖó-kpàà dà séín ɓè ɖà mú gbɔɔ̀ kɛɛ xwai nɔ̀mɔ̀ìn.—Àzédyà 35:1, 2.

      • nyí ma nyɔ táázĩ̀ìn ɓè ɖii-ɖɛ̀ dyììn ɖé zɛ̃̀ìn-ɖɛ̀ nyu-nyu mú. —Máfíò 14:17-21.

      • mɔ́ jè dyi zĩ̀ìn ɓóɖó-kpàà kɔ̃.—Wɛ́ɖɛ́ 72:16.

      • kánáìn ma nyɔ pàɖà dyi. —Ðúù 18:35-43.

      • dyi-káná-káná dyàùn gàná cá.—Àzédyà 33:24.

      • zà ma nyɔ ɓè gĩɔ.—Ðúù 8:49-55.

      • ɖɛ ɓè ɓɛ́ gĩɔ ɖà nyuɛɛ jè dyi zĩ̀ìn. —Wɛ̀ɖɛ̀ɓèɖésĩ̀ɔ̀ 21:3, 4.

      6. Geɖepɔɔ Kã́á-ɓòɖòɔ̀ mu cĩ́-cĩ́ nɔ̀mɔ̀ dyíin dyàùn

      Kã́á-ɓòɖòɔ̀ muɛ nyuùn ɓɛ́ ɖɛ ɓɛ́ Jɛhova hwòɖò po ma gbɔ kĩ́ín ɓó nyɔùn bììɛɛ ké kpá gàná cá. Wa mu cĩ́ìn ɓó sè-ná-sèɛ̀ tiín ɖé páɖédà mú dà ɓóɖó-kpàà kɔ̃. Po VÍÐÒƆ̀ kũ̀à gbo, ɓɛ́ m̀ ké kà Jɛhova nì kũ̀à nyuɛń dyììn ɖé ɔ Dyú-gàà Jízɛ̀ mú ɓɛ́ ɔ hwòɖòɛ̀-gbɔ-po-ɖɛ̀ ké jàà kpá kɛɛ dyé.

      VÍÐÒ: Ðɛ Nɔ̀mɔ̀ Dyíin Ɓè Nì Ðé Dyúa Kɛɛ Dyéɖé-Dyai-Ɓaɖa-Ɓaɖa (4:38)

      Zà Wɛ́ɖɛ́ 145:16 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

      • Xwɛ̀ ɔ nyu nì hwòɖòɔ̀ nyuɛ ɓɛ́ m̀ kéɛ dyí dyuò kà Jɛhova mu ‘fɔ̀ɔ̀-ɖɛ̀ séín hwòɖò dyi dèìn’ nyɛ́?

      NYƆ ÐÍƐ́ ƁÈ ÐÁ: “Ɔ jù ké à séín dyi sɔ̃ xwaún poìn ké à dyi kũ̀à nyuín, à ɓɛ́ìn ɓóɖó-kpàà fũ̀à-fṹá-ɖɛ̀ ɓè jè dyi zĩ̀ɛ̀n.”

      • Ðɛ́ mɔ̀ fũ̀à-fṹá-ɖɛ̀ ɓè ɓɛ́ Geɖepɔɔ Kã́á-ɓòɖòɔ̀ mu dyi zĩ̀ìn ɓɛ́ nyɔùn gɔ̃̀mànà se dyi zĩ̀ɛ̀n ɓɛ́ìn nyɛ́?

      SṸÌN-XWÍNÍÍN

      Geɖepɔɔ Kã́á-ɓòɖòɔ̀ mu Geɖepɔɔ mɔ́ɔ́-ɖɛ̀ nyuùn. Ɔ mu ɓóɖó-kpà gànáà páɖédà mu nyuùn, ɓɛ́ nyɔ nɔ̀mɔ̀ kpeɖeín ɓè ɓɛ́ wa ɓièà Jɛhova kɛɛ kéɛ mú cĩ́ ɓó sè-ná-sèɛ̀ tiín.

      Ðɛ-kɔ̃in-kpa-kpa

      • Xwɛ̀ Geɖepɔɔ Kã́á-ɓòɖòɔ̀ mu Jɛhovaa nyɛ́nɛ́ɔ̀ mú hwɔùn wɛ̃́?

      • Xwíníínɔ̀ nyɛ́ kɔ̃̀ jè à ɓɛ́àìn jàà poɛ kà ɓɛ́ Geɖepɔɔ Kã́á-ɓòɖòɔ̀ muɛ nyuùn ɓɛ́ Baɓoɔ nyɛ́nɛ́ìn-ɖáìn-ɖɛ̀ ɓè ké jàà kpá kɛ́?

      • Ðɛ ɓè ɓɛ́ Kã́á-ɓòɖòɔ̀ mu nyuùn wɛ̃ɛ, waà nyɛ́ m̀ mɔ́ dyéɛ dyi xwééɛ́?

      Dyí-sɔ́-ɖɛ̀

      CƐ̃́ ÐƐ PÀÐÀ

      Cɛ̃́ ɖɛ mɔ̀ Àmàgɛ́ɖɔ̀ùn xwíníín nyɛɛ jè.

      “Ðɛ́ Mɔ̀à Àmàgɛ́ɖɔ̀ùn-Tòɔ̀ Kɛ́?” (Ðúú-kɔ̃-cèè-ɖɛ̀)

      Zà ɖɛ ɓè mu kpáùn ɓó zɔ̃ 1,000 ɓɛ́ Jízɛ̀ muà Kã́á jùùn wɛ̃ɛ tiín kè ɖé ɔ mánáín nyɛɛ jè wuɖuún.

      “Ðɛ́ Mu Kpáùn Ɓó Zaa-Wɔ̃-Po Wèɔ̀ Ɓaɖa Kɛ́?” (Dyí-Gmɔ̀ìn-Gbò-Cèè-Ðɛ̀ɔ̀, Dìù 1, 2012)

      Dyé kà xwéɖé-dù ɓè ɓɛ́ìn mana ɓè ɓɛ́ Kã́á-ɓòɖòɔ̀ mu dyàùn wɛ̃ɛ jè hwìɖìi nàìn nyɛ.

      Dyé M̀ Mìɔùn Ðé Páɖédà Mú (1:50)

      Ðé cɛ̃́ɛ́-ɖɛ̀ mɔ̀à “Dyi-Diè-Ðɛ̀ Pàɖà Ɓè Dè Ma Ḿ Fũ̀à-Fṹá Dyí” kɛ múɛɛ, cɛ̃́ kà gɔ̀mànà gbo-vɔ̃-nyɔ̀ ɖò nyu ma gɔ̃̀-jù-wùɖù ɔ nì ma dyi mɔ́uń wɛ̃ dyéɛ kɛɛ jè.

      “Baɓoɔ Zĩàìn Cĩ́-Kà Gbo” (Dyí-Gmɔ̀ìn-Gbò-Cèè-Ðɛ̀ɔ̀, Dùà-Dù 1, 2012)