Ḿ Ðà Ti Dyéè?
Ḿ Ðà Ti Dyé Ɓɛ́ Ḿ Kè Ðíí Ɓèɔ̀ Ké Geɖepɔɔ-Wùɖù Wáɖáà?
Nì mu ti dyéìn ɓɛ́ m̀ ké Geɖepɔɔ-wùɖù-wáɖá-nyɔ̀ jù ɔ jù ké m̀ dyi . . .
Ɓaɓoɔ cɛ̃́ ti séín, ké m̀ dyi ɓaà, ké m̀ dyi dyí-poìn-poìn ɓèɔ̀ mú mu ní.
Ðɛ m̀ nìà cɛ̃́ɛń nyɛɛ mú ɖɛ̀ɓɛ̀, ké m̀ dyiɛ jàà po, ké m̀ dyiɛ mɔ́ ɓɛ́ m̀ kéɛ jè nyɔ tɔ̀ɔ̀ ɓè gbo cɛ̃ ní.
Jɛhova mú ɖɛ̀ɓɛ̀, ké m̀ dyi nyɔ ɓè ɖɛ̀ɓɛ̀ ɔ múɛɛ gã, ɓɛ́ wa ké nì ɓàto ɓè jù ní.
Gbèè-kpòò mɔɔ ɓiè-kpòò ɓè se jàà kɛɛ mú sɔ̃̀ ní.
Jɛhova gma ɓèɔ̀ dyi kpɔ̃, ké m̀ dyi mɔ́ ɓɛ́ m̀ ké Jɛhova Zàse ɓèɔ̀ ɖò jù ní.
Ɔ jù ké m̀ dyiɛ hwìɖìi poìn kà m̀ ɖà ti dyé ɓɛ́ m̀ kè ɖíí ɓèɔ̀ ké Geɖepɔɔ-wùɖù wáɖá ní, nì ɖɛ-tɛ̀mɛ̀ìn-nyɔ̀ɔ̀ ɓɛ́ìn páún poɛ, ɓɛ́ m̀ kè ɛ́ɖɔ̀ ɓèɔ̀ ké dyéìn, ɓɛ́ ɓè ké ɖɛ ɓè m̀ kɔ̃̀ m̀ ké nyuɛɛ dɔ́ɔ́ kɔ̃in dèìn.
Ḿ Ðà Ti Dyé Ɓɛ́ Ḿ Ké Níɔ Kpáà?
Nì mu ti dyéìn ɓɛ́ m̀ ké níɔ kpá ɔ jù ké . . .
M̀ dyi Geɖepɔɔ-wùɖù-wáɖá-nyɔ̀ jùìn.
M̀ dyi Geɖepɔɔ-wùɖù wáɖá ti séín ɖé nì kpé séín mú ní.
M̀ dyi “gbò-nì-nyɔ̀ ɓɛ́ ɔ fɔ̀nɔ̀ hwòɖò, ké nyɔ ɓɛ́ìn ɔ hwòɖò kɔ̃ dèɛ̀” kɛɛ hwìè-da-zàìn-zàìnɔ̀ kíɖíí sí ní.—Máfíò 24:45-47.
M̀ ɖà m̀ mìɔùn xwáɖáún zà ɖé Jɛhova gbo ɖé ɓaà-ɓaà mú, ké m̀ dyi mɔ́ ɓɛ́ m̀ ké ɔ ɓiè ɓó sè-ná-sèɛ̀ tiín ní.
Ɔ jù ké m̀ dyiɛ hwìɖìi poìn kà m̀ ɖà ti dyé ɓɛ́ m̀ ké níɔ kpá ní, nì ɖɛ-tɛ̀mɛ̀ìn-nyɔ̀ɔ̀ ɓɛ́ìn páún poɛ, ɓɛ́ m̀ kè ɛ́ɖɔ̀ ɓèɔ̀ ké dyéìn, ɓɛ́ ɓè ké ɖɛ ɓè m̀ kɔ̃̀ m̀ ké nyuɛɛ dɔ́ɔ́ kɔ̃in dèìn.