CƐ̃́Ɛ́-ÐƐ̀ 10
Xwɛ̀ Jɛhova Zàse Ɓèɛ̀ Dyí-Poìn-Poìn Ɓèɔ̀ Ɓɛ́ìn M̀ Kpáná Dyí Nyuɛ Kɛ́?
Wa ɖà m̀ ɖá ɖò ɖé Jɛhova Zàse ɓèɛ̀ dyí-poìn-poìn ɓèɔ̀ ɖò múù? Ɔ jù ké m̀ séè ɖé mu ɖò ní, m̀ ɓɛ́ìn fã̀à peɖeɛ ɖɛ-wè, ɓɛ́ m̀ ké ɖé mu ɓó nì ti kĩ́ín. M̀ ɓɛ́ìn hwìɖìi poɛ̀n dyɛ̀, ɓɛ́ m̀ ké níín: ‘Ðɛ́ wa nyu ɖé dyí-poìn-poìn ɓèa múɛ́? Xwíníínɔ̀ nyɛ́ kɔ̃̀ jè wa kpaà ɖɛ kɛ́? Ðɛ́ kɔ̃̀ jè ḿ mɛ muà ɖéɛ́?’ Ðé cɛ̃́ɛ́-ɖɛ̀ nìà kɛ múɛɛ, nì mu xwíníín kɔ̃̀ jè m̀ kè nyɔ tɔ̀ɔ̀ ɓè dyí-poìn-poìn ɓɛ́àìn nyuɛ, ɓɛ́ m̀ kéà Geɖepɔɔ bũ̀in xwɛ̃́ìn nyɛ ɔ kè kà ɔ ɓɛ́ìn m̀ gbo kpáa kɛɛ jè cɛ̃́ìn.
1. Xwíníín kpa ɖɛɔ̀ nyɛ́ kɔ̃̀ jè Jɛhova Zàse ɓè poàìn dyí kɛ́?
Dyé kà Baɓo-céè-nyɔ̀ ɖò nyu ma xwíníín kɔ̃̀ jè à kè nyɔ tɔ̀ɔ̀ ɓè dyí-poìn-poìn kpaà ɖɛ kɛɛ jè cɛ̃ɛ kɛ. Ɔ ɖá: “Ní mu m̀ ɓàìn ɖé vòò-nyɔ̀ ɓèɔ̀ hwìɛ̀.” (Wɛ́ɖɛ́ 26:12) Kà dyúáɖòɔ̀ kàà Jɛhova Zàse ɓè kpáìn waà dyí-poìn-poìn ɓèɔ̀ múàùn dyi. Ðé ɓóɖó-kpàà dà séín nyɛɛ, wa poìn dyí ɓɛ́ wa ké Geɖepɔɔ ɓàìn, kè ɓɛ́ wa ké ɓeɖe, ɔ kè ɓɛ́ wa ké ɓaà. Ɓó zɔ̃ séín xwíníín nyɛɛ, wa mu dyí-poìn-poìn vɛ̀nɛ̀ ɓè gbo kpa gbɛ̀ì-gbɛ̀ì ɓó ɓiè jè ɖekè.
2. Ðɛ́ nì mu cɛ̃́ìn ɖé à dyí-poìn-poìn ɓèɔ̀ mú kɛ́?
Ðé à dyí-poìn-poìn ɓèɔ̀ múɛɛ, à tɛ̀mɛ̀ìn ɖɛ sɔ̀ìn ɖé Baɓoɔ múɛ, ké à ‘zaìn kɔ̃in nɔ̀mɔ̀ dyíin, ɓɛ́ nyɔ ɓèɔ̀ kéɛ múin wɔ̃́.’ (Zà Níòmádyà 8:8 wuɖuún.) M̀ dyi ɖé mu ní, nì mu Jɛhova kè ɔ kpeɖe nɔ̀mɔ̀ dyíin ɓèɔ̀ jè cɛ̃́ìn. Kà nì muà ɔ ɖɛ̀ɓɛ̀ìn-ɖɛ̀ɓɛ̀ìn ɓó m̀ bììɛɛ jè cɛ̃́ìn nyɛɛ, kàà nì mu ɔ bũ̀in xwɛ̃́ìn. Nì mu kà ɔ ɓɛ́ìn m̀ gbo kpáa ɓɛ́ m̀ ké nì cĩ́-cĩ́ɔ̀ múàùn dyi kpáìn nyɛɛ jè cɛ̃́ìn ɖekè.—Àzédyà 48:17, 18.
3. Xwɛ̀ nyɔ ɓè gbo-wùɖù-wùɖù ɖé à dyí-poìn-poìn ɓèɔ̀ múɛɛ ɓɛ́ìn m̀ kpáná dyí nyuɛ kɛ́?
Jɛhova ɖá “à mɛ kɔ̃̀ à muè tɔ̀ɔ̀ ɓè jè gbo, ɓɛ́ à ké gbo kpáìn kpàìn, ɓɛ́ à ké nyɔùn mú ɖɛ̀ɓɛ̀, ɓɛ́ à ké nɔ̀mɔ̀ dyíin nyu. À ní ɖá ɓɛ́ à ké dyí-poìn-poìnɔ̀ mú muɛ ɓɔ́.” (Híìbúɖúù 10:24, 25) Ðé dyí-poìn-poìn ɓèɔ̀ múɛɛ, nì mu nyɔ ɓè ɓɛ́ wa kɔ̃̀ nyɔ tɔ̀ɔ̀ ɓè jè gbo, ké wa mɔ́ wa ké Geɖepɔɔ jè cɛ̃́ mìɔ kà mɔ̀ùn nìà kɛɛ dyéìn. Nì mu nyɔ-kpéí-po-wùɖù ɓè wa cɛ̃ sɔ̀ìn ɖé Baɓoɔ múɛɛ wɔ̃́ùn. (Zà Wóɖómà 1:11, 12 wuɖuún.) Nì mu xwíá ɓè kè dyi-kpɔ̃ìn-nyɔ̀ ɓè ɓɛ́ wa nì fũ̀à-fṹá-ɖɛ̀ ɓè mú zĩ̀ɛ̀n, kɛɛ wa kpá múàùn wɛ̃ɛ gbo wùɖùùn ɖekè. Ðɛ ɓè nìà kɛ mɔ̀ xwíníín ɓèɔ̀ ɖíɛ́ ɓè kɔ̃̀ jè Jɛhova mɔ́ ɓɛ́ à kéà dyí poìn ti séín nyɛ̀!
ÐE ÐƐ MÚIN CÁ
Dyé kà Jɛhova Zàse ɓèɛ̀ dyí-poìn-poìn ɓèɔ̀ nyu nìɛ̀ kɛ kè xwíníín kɔ̃̀ jè ɔ kpaà ɖɛ ɓɛ́ nyɔ kéà dyí-poìn-poìn ɓè nìà wɛ mú muɛ.
4. Jɛhova Zàse ɓèɛ̀ dyí-poìn-poìn ɓèɔ̀
Ðé Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛ tiín nyɛɛ, wa poìn ma dyí ti séín, ɓɛ́ wa ké ma Jɛhova ɓiè. (Wóɖómà 16:3-5) Zà Kɔ̀ɖɔ́sĩ̀à 3:16 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Xwɛ̀ Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛɛ nyu ma Jɛhova ɓièɛ̀ kɛ́?
Zɛ̃̀ɛ̀ kɛɛ, Jɛhova Zàse ɓèɔ̀ poìn dyí ti séín ɖé waà ɓiè-naín ɓèɔ̀ ɖekè. Ɓɛ́ m̀ ké kà wa dyí-poìn-poìn ɓèɔ̀ nyu nìɛ̀ kɛɛ dyé ní, po VÍÐÒƆ̀ kũ̀à gbo. Nìí, ɓè gmɔ̀ dyí-poìn-kpòò ɖòɛ̀ dyí-poìn-poìnɔ̀ fótò dya, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.
Ðɛ́ mɔ̀ hwɔ̀ìn-ɖɛ̀ ɓè ɓɛ́ m̀ dè dyéɖé gbo ɓó ɖɛ kpá ɖé Kĩ́dɔ̃̀ Hɔ́ɔ̀ ɖò zɔ̃̀ kè ɖɛ m̀ zàà wuɖuún ɖé Kɔ̀ɖɔ́sĩ̀à 3:16 múɛɛ pṹa kɛ́?
Ðé víɖòɔ̀ mɔɔ fótòɔ̀ múɛɛ, m̀ dyé ɖé ɖɛ kà kò ɖò ɓɛ́ ɔ nɔ̀mɔ̀ m̀ hwìɖìi ɓá dyí-poìn-poìn ɓèɔ̀ jè dyíɛɛ̀?
Zà 2 Kɔ̀ɖéíntĩ̀ɔ̀ 9:7 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Xwíníínɔ nyɛ́ kɔ̃̀ jè pɛ́nɛ́-kpɔ̃-kpɔ̃ ɖò seà ɖé Jɛhova Zàse ɓèɛ̀ dyí-poìn-poìn ɓèɔ̀ mú nì kɛ́?
M̀ kè nì ɖɛ-tɛ̀mɛ̀ìn-nyɔ̀ɔ̀ mɛ gmɔ̀ ɖɛ wa mu dɔ́ɔ́ kɔ̃in dèìn ɖé wíkì nìà kɛ dyí-poìn-poìn ɓèɔ̀ ɖò múɛɛ dya.
Dyí-poìn-poìnɔ̀ wáká nyɛ́ nɔ̀mɔ̀ m̀ hwìɖìi mìɔ mɔɔ ɔ kpa ɖɛ ɖé m̀ gboɛ́?
M̀ dyuòɛ̀ ma dyíì,
kà ɖé jw.org kɔ̃ɛɛ, m̀ ɓɛ́ìn ti kè dɛ̀ dyí-poìn-poìn ɓè nì ɖé ɓóɖó-kpàà dà séín nyɛɛ dyéɛ kɛɛ̀?
À dyí-poìn-poìn ɓèɔ̀ ɓéɖé wáɖáá-wùɖù ɓè kè dyí-tɛ̀mɛ̀ìn-ɖɛ̀ ɓè ɔ kè víɖò ɓè. Dyí-poìn-poìn ɓèɔ̀ dè gbɔ ké wa hwɛ̀ gbɔ ɖé wɛ́ɖɛ́ kè ɓaà-ɓaà mú
Ðé dyí-poìn-poìnɔ̀ wáká ɖò tiín nyɛɛ, wa ɓéɖé ɖɛi-diè-diè kè gɔ̃̀-jù-wùɖù tò-tò
Nyɔ séín ɓɛ́ìn ɖé muɛ—xwéɖé-dù ɓè kè xwíá ɓè kè nyɔ sùà ɓè ɔ kè dyú ɓè
Wíɖí-kpɔ̃-kpɔ̃ ɖò se ɖé dyí-poìn-poìn ɓèɔ̀ mú nì. Jɛhova Zàse ɓèɔ̀ ní kpɔ̃ pɛ́nɛ̀
5. Dyí-poìn-poìn ɓèɔ̀ mú mu-mu mɔ́ dúún-ku-ku
Dyé dyí-tɛ̀mɛ̀ìn-ɖɛ̀ ɓáa Jízɛ̀ɛ̀ xwéɖé-dùɔ̀ jè dyíɛ. Ɓɛ́ wa ké zɔ̃ ɖòɛ̀ hwɔ kɔ̃ mu ní, wa ɓéɖé wa ké nà ɓó máa 60 bìì ɖé toɖo hwìè ɓè xwíníín sɔ̀ìn Názɛ̀ɖɛ̀ ké Jùɖúsɛ̀ɖɛ̀ìn muɛ. Zà Ðúù 2:39-42 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
Nì hwòɖò ɖá hwìè-kpà muà Jùɖúsɛ̀ɖɛ̀ìn nyɛɛ xwíníín-nà-nà ɖú dúún-ku-ku dyíì?
Xwíníínɔ̀ nyɛ́ kɔ̃̀ jè m̀ kɔ̃̀ m̀ kéà dúún ku ɓó dyí-poìn-poìn ɓèɔ̀ mú mu jè kɛ́?
Nì hwòɖò ɖá ɔ kpa ɖɛɛ̀? Xwíníínɔ̀ nyɛ́ kɔ̃̀ jèɛ́?
Baɓoɔ ɖá dyí-poìn-poìn ɓó ɓiè jè kɛɛ kpa ɖɛ mìɔ. Zà Híìbúɖúù 10:24, 25 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Xwíníínɔ̀ nyɛ́ kɔ̃̀ jè à mɛ muà dyí-poìn-poìn ɓèɔ̀ mú ti séín nyɛ́?
NYƆ ÐÍƐ́ ƁÈ ÐÁ: “M̀ se kɔ̃̀ m̀ kè nyɔ tɔ̀ɔ̀ ɓè ké dyí poìn. M̀ ɓɛ́ìn nì Baɓoɔ wuɖuún zàà ɖé taún pu.”
Vɔ̀sìɔ̀ nyɛ́ mɔɔ dyí-tɛ̀mɛ̀ìn-ɖɛ̀ɔ̀ nyɛ́ nì ɖé Baɓoɔ mú ɓɛ́ ɔ tɛ̀mɛ̀ìn ɖɛ Jɛhova mɔ́ ɓɛ́ à ké nyu kɛ́?
SṸÌN-XWÍNÍÍN
Dyí-poìn-poìn ɓèɔ̀ mú mu-mu mu m̀ gbo kpáùn, ɓɛ́ m̀ ké ɖɛ pàɖà cɛ̃́ ɓá Jɛhova jè dyí, kè ɓɛ́ m̀ ké gbo-kpɔ̃ìn-kpɔ̃ìn nì m̀ kè ɔ kè pṹa kɛɛ dyi kùìn, ɔ kè ɓɛ́ m̀ ké ɔ ɓiè ɖé nyɔ tɔ̀ɔ̀ ɓè hwìɛ̀.
Ðɛ-kɔ̃in-kpa-kpa
Xwíníínɔ̀ nyɛ́ kɔ̃̀ jè Jɛhova poà à kpéí, ɓɛ́ à kéà dyí poìn nyɛ́?
Ðɛ́ nì mu cɛ̃́ìn ɖé Jɛhova Zàse ɓèɛ̀ dyí-poìn-poìn ɓèɔ̀ mú kɛ́?
Xwɛ̀ kà kò ɖò nì hwòɖò ɖá m̀ ɓɛ́ìn dyí-poìn-poìn ɓèɔ̀ mú mu-mu kpáná kɔ̃ún dyéɛ kɛ́?
CƐ̃́ ÐƐ PÀÐÀ
Ɔ jù ké dɛ̃ dyi m̀ nyu ɓó dyí-poìn-poìn ɖò mú mu jè ní ɖé? Dyé ɖɛ nyuɛ ɓɛ́ gàa ɖò ɓɛ́ ɔ peɖe ma dɛ̃ kɛɛ ké ma dyí-poìn-poìn ɓèɔ̀ mú ɖɛ̀ɓɛ̀ kɛ.
Dyé kà gàa-dyù gmɔ̀ ɖò nyu ma dyí-poìn-poìn ɓèɔ̀ múàùn dyi kpáìn kè ɖɛ ɔ nyu ɓɛ́ ɔ ké ma ɖé mu teeɛ.
Cɛ̃́ kà nyɔ tɔ̀ɔ̀ ɓè hwòɖò nyu nìɛ̀ ɓá dyí-poìn-poìn ɓèɔ̀ mú mu jè dyíɛ.
Dyé kà nyɔ-ɖɛ-gana-xwa-zàìn-nyɔ̀ ɖòɛ̀ cĩ́-cĩ́ nyu ma gbo zĩàìn ti ɔ mu ma Jɛhova Zàse ɓèɛ̀ dyí-poìn-poìn ɖò múɛ.
“Ḿ Kè Ní Buɔ̀ Mu Ma Dà Séín” (Dyí-Gmɔ̀ìn-Gbò-Cèè-Ðɛ̀ɔ̀, Káná-Dyù-Wè 1, 2014)