CƐ̃́Ɛ́-ÐƐ̀ 28
Tɛ̀mɛ̀ìn Zùo-Po-Hwòɖò Ɓó Ðɛ Jɛhova Kè Jízɛ̀ Ðàà M̀ Bìì Nyuɛɛ Jè
Xwɛ̀ nì hwòɖòɔ̀ mu nììn ɔ jù ké nì ɓàto ɖò dyi m̀ nyíí-ɖɛ̀ nɔ̀mɔ̀ dyíin ɖò nyí níɛ́? Ɔ mu dyɛ̀ m̀ múàùn poùn mìɔ, ké nì muɛ mɔ́ùn ɓɛ́ m̀ kéɛ nì ɓàtoɔ̀ dyí tɛ̀mɛ̀ìn kà m̀ kpáìn nyíí-ɖɛ̀ɔ̀ jè múàùn dyiɛ. Jɛhova kè Jízɛ̀ nyí à nyíí-ɖɛ̀ zi ɖɛ kpáuń mìɔ ɓɛ́ ɔ zi nyíí-ɖɛ̀ séín ɖò dyíɛ. Ɔ mɔ̀ ɖɛ́ kɛ́, ké xwɛ̀ à ɓɛ́ìn tɛ̀mɛ̀ìn kà à kpáìn jè múàùn dyiɛ́?
1. Ðɛ́ mɔ̀ hwìè ɖò kɔ̃̀ mú ɓɛ́ à ɓɛ́ìn tɛ̀mɛ̀ìn kà à ɓéɖé zùo-po-hwòɖò ɓó ɖɛ Geɖepɔɔ kè Kɛ́ɖɛ́ì nyu ma à bììɛɛ jè kɛ́?
Baɓoɔ cɛ̃ɛ kà ɓɛ́ “nyɔùn séín mu [Jízɛ̀] hwìɖìì taɓaùn wɛ̃ɛ” ɓɛ́ìn cĩ́ɛ kánáá puɛ. (Jɔ̃́ɔ́ 3:16) Ðɛ́ mɔ̀ ɓɛ́ nyɔ ké Jízɛ̀ hwìɖìì taɓa kɛɛ xwíníín nyɛ́? Ɔ se Jízɛ̀ jè jàà-po-po ɖòùn pu. À kɔ̃̀ à ké à hwìɖìì-taɓa-taɓaɔ̀ tɛ̀mɛ̀ìn dyììn ɖé ɖɛ ɓè à gã kè ɖɛ ɓè à nyuɛɛ mú. (Jĩ́ìn 2:17) À dyi à hwìɖìì-taɓa-taɓaɔ̀ tɛ̀mɛ̀ìn dyììn ɖé ɖɛ ɓè à nyu kè ɖɛ ɓè à cɛ̃ kɛɛ mú ní, à mu gbo-kpɔ̃ìn-kpɔ̃ìn nìà à kè Jízɛ̀ kè ɔ Ɓà Jɛhova pṹa kɛɛ dyi kùìn.—Zà Jɔ̃́ɔ́ 14:21 wuɖuún.
2. Hwɔ kpa ɖɛɔ̀ nyɛ́ jɛ́ɛ́ kpá à gbo ɓɛ́ à kéɛ tɛ̀mɛ̀ìn kà à ɓéɖé zùo-po-hwòɖò ɓó ɖɛ Jɛ̀hóvà kè Jízɛ̀ ɖà à bìì nyuɛɛ jè kɛ́?
Ɓó hwìò-kà hwɛ̀ ɓɛ́ Jízɛ̀ ké ma mɛ́ɛ, ɔ cɛ̃ɛ ma ɔ ɖeín-sí-nyɔ̀ ɓèɔ̀ gbo ɓá hwìè kà kò ɖò kɔ̃̀ mú wa kéɛ tɛ̀mɛ̀ìn kà wa ɓéɖé zùo-po-hwòɖò ɓó ɔ mɛ́-mɛ́ɔ̀ jè kɛɛ jè dyí. Ɔ po ma hwɔ kpa ɖɛ ɖò páún ɓɛ́ Baɓoɔ ɖáìn “Bounɓoɔ̀ Ðii-Ðɛ̀ɔ̀,” ké wa ɖáìn Kɛ́ɖɛ́ì mɛ́-mɛ́ɔ̀ jè hwìɖìi-dyà-dyà ɖekèɛ. (1 Kɔ̀ɖéíntĩ̀ɔ̀ 11:20) Jízɛ̀ poɛ ma páún, ɓɛ́ ɔ ké ɔ àpɔ́sò ɓèɔ̀—kè jàà Kɛ́ɖɛ́ì ɖeín-sí-nyɔ̀ séín ɓè mu ma ɓó wa ɖeín dyí kɔùn wɛ̃ɛ—hwìɖìi nì kà ɔ tò ma ɔ fɛ̀ɛ̀ɔ̀ ɓó à bììɛ. Ɓá hwɔ nìà wɛ jè dyíɛɛ, Jízɛ̀ cɛ̃ɛ ma, ké ɔ ɖá, “Ɓè mɛ nyu ɖɛ nìà kɛ, ɓɛ́ ɔ ké ní jè ɓè hwìɖìi dyà.” (Ðúù 22:19) M̀ dyi ɖɛ-hwìɖìi-dyà-hwɔ̀ɔ̀ kɔ̃ mu ní, m̀ tɛ̀mɛ̀ìn kà m̀ ɓéɖé zùo-po-hwòɖò ɓó ɖɛ̀ɓɛ̀ìn-ɖɛ̀ɓɛ̀ìn ɓúá kpéín ɓɛ́ Jɛhova kè Jízɛ̀ ɓéɖéà ɓó à bììɛɛ jèɛ.
ÐE ÐƐ MÚIN CÁ
Cɛ̃́ hwìè tɔ̀ɔ̀ ɓè kɔ̃̀ mú à ɓɛ́ìn tɛ̀mɛ̀ìn kà à ɓéɖé zùo-po-hwòɖò ɓó ɖɛ̀ɓɛ̀ìn-ɖɛ̀ɓɛ̀ìn ɓúá kpéín ɓɛ́ Jɛhova kè Jízɛ̀ tɛ̀mɛ̀àìn nyɛɛ jè. Cɛ̃́ xwíníín kɔ̃̀ jè Kɛ́ɖɛ́ì mɛ́-mɛ́ɔ̀ jè hwìɖìi-dyà-dyà kpaà ɖɛ mìɔ kɛɛ jè.
3. Ðɛ à ɓɛ́ìn nyuɛ ɓɛ́ à kéɛ tɛ̀mɛ̀ìn kà à ɓéɖé zùo-po-hwòɖò kɛ
Nàìn hwìɖìi kà m̀ nì níɔ sèɛ̀n ké nyɔ ɖò póìn m̀ wɛ̃. Ðɛ nyɔɔ̀ nyuà m̀ bììɛɛ jè mu m̀ hwìɖìi sɔ̀ùn puù? Mɔɔ nì mu hwìè ɓè dyi mɔ́ùn ɓɛ́ m̀ kéɛ ɔ dyí tɛ̀mɛ̀ìn kà m̀ ɓéɖé zùo-po-hwòɖò ɓó ɖɛ ɔ nyuà kɛ jèɛɛ̀?
À nì cĩ́ɛń ɓó Jɛhova bìì. Zà 1 Jɔ̃́ɔ́ 4:8-10 wuɖuún, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn:
Xwíníínɔ̀ nyɛ́ kɔ̃̀ jè Jízɛ̀ɛ̀ mɛ́-mɛ́ɔ̀ mɔ̀à nyíí-ɖɛ̀ kpa ɖɛ ɖò kɛ́?
Xwɛ̀ nì hwòɖòɔ̀ nyu nìɛ̀ ɓá ɖɛ Jɛhova kè Jízɛ̀ nyuà m̀ bììɛɛ jè dyíɛ́?
Xwɛ̀ à ɓɛ́ìn tɛ̀mɛ̀ìn kà à ɓéɖé zùo-po-hwòɖò ɓó ɖɛ Jɛhova kè Jízɛ̀ nyuà à bììɛɛ jè kɛ́? Zà 2 Kɔ̀ɖéíntĩ̀ɔ̀ 5:15 kè 1 Jɔ̃́ɔ́ 4:11; 5:3 wuɖuún. Ɓè ɖà vɔ̀sì ɖò-ɖò ɓèɔ̀ wuɖuún zàà hwɔ ní, ɓè mɛ dèìn dyi-diè-ɖɛ̀ nìà kɛ dɔ́ɔ́ kɔ̃in:
Kà vɔ̀sì nìà wɛ̃ nyuà cɛ̃ɛ kɛɛ, ɖɛ́ à ɓɛ́ìn nyuɛ ɓɛ́ à kéɛ tɛ̀mɛ̀ìn kà à ɓéɖé zùo-po-hwòɖò kɛ́?
4. Sí Jízɛ̀ ɓo bɛ̃̀ìn
Hwìè ɖò kɔ̃̀ mú à ɓɛ́ìn tɛ̀mɛ̀ìn ɖe kà à ɓéɖé zùo-po-hwòɖò kɛɛ mɔ̀, dyììn ɖé Jízɛ̀ ɓo bɛ̃̀ìn sí-sí mú. Zà 1 Píɖɛ̀ 2:21 wuɖuún, ɓɛ́ ɓè ké dyi-diè-ɖɛ̀ nìà kɛɛ dɔ́ɔ́ kɔ̃in dèìn:
Hwìè nyɛ́ ɓè kɔ̃̀ mú m̀ ɓɛ́ìn Jízɛ̀ɛ̀ ɓo bɛ̃̀ kíɖíí síɛ kɛ́?
Bɛɖɛɛ̀ɔ̀ kè wã́ìnɔ̀ mɔ̀ hwɔìn-ɖɛ̀ ɓè. Bɛɖɛɛ̀ɔ̀ mɔ̀ Jízɛ̀ɛ̀ nyɔùn-kpòɖò-dyùà se kɛɛ ɖò ɓéɖé ɓɛ́ ɔ tò ma ɓó à bìì. Wã́ìnɔ̀ mɔ̀ ɔ nyɔmɔɔ̀
5. Mu Kɛ́ɖɛ́ì mɛ́-mɛ́ɔ̀ jè hwìɖìi-dyà-hwɔ̀ɔ̀ kɔ̃
Ɓɛ́ m̀ ké ɖɛ kpá ma ɓó Bounɓoɔ̀ Ðii-Ðɛ̀ɔ̀ hwɔ kĩ́ín-kĩ́ínɔ̀ tiín nyɛɛ dyé ní, zà Ðúù 22:14, 19, 20 wuɖuún. Nìí, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
Ðɛ́ kpá ma ɓó Bounɓoɔ̀ Ðii-Ðɛ̀ɔ̀ ɖi-tììn nyɛ́?
Ðɛ́ mɔ̀ bɛɖɛɛ̀ɔ̀ kè wã́ìnɔ̀ xwíníín nyɛ́?—Dyé vɔ̀sì 19 kè 20.
Jízɛ̀ mɔ́ ɓɛ́ ɔ ɖeín-nà-nyɔ̀ ɓèɔ̀ ké ma dyí poìn ɓó Bounɓoɔ̀ Ðii-Ðɛ̀ɔ̀ jè kpa dyúáɖò ɖé zɔ̃ séín xwíníín ɓó ti kɔ̃̀ ɓaɖa ɔ mɛ́ ma kɛ. Ɔ jèɛɛ, Jɛhova Zàse ɓè poìn dyí ɓó zɔ̃ séín xwíníín, ɓɛ́ wa ké Kɛ́ɖɛ́ì mɛ́-mɛ́ɔ̀ jè hwìɖìi dyà kà ɔ nyuɛ ma cɛ̃ɛ kɛ. Ɓɛ́ m̀ ké dyí-poìn-poìn kpa ɖɛ nìà kɛ jè cɛ̃́ ní, po VÍÐÒƆ̀ kũ̀à gbo. Nìí, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.
Ðɛ́ kpá Ðɛ-Hwìɖìi-Dyà-Hwɔ̀ɔ̀ tiín nyɛ́?
Jízɛ̀ ɖɛ̀ɓɛ̀ Geɖepɔɔ Wuɖuɔ̀ mú, ké ɔ wáɖá ma bɔ̃̀ nɔ̀mɔ̀ dyíinɔ̀, ké ɔ kpá ma nyɔ tɔ̀ɔ̀ ɓè gbo
NYƆ ÐÍƐ́ ƁÈ ÐÁ: “Ðɛ ɖòùn m̀ kɔ̃̀ m̀ ké nyu ɓɛ́ m̀ ké póɛɛ mɔ̀ ɓɛ́ m̀ ké Jízɛ̀ jè jàà po.”
Xwɛ̀ m̀ ɓɛ́ìn Jɔ̃́ɔ́ 3:16 kè Jĩ́ìn 2:17 kũ̀à mú nyùɛ̀n, ɓɛ́ m̀ kéɛ tɛ̀mɛ̀ìn kà nyuu-ɖɛ̀ pàɖà ɓè nì ɓóɛ́?
SṸÌN-XWÍNÍÍN
À tɛ̀mɛ̀ìn kà à ɓéɖé zùo-po-hwòɖò ɓó ɖɛ Jízɛ̀ nyuà à bììɛɛ jè dyììn ɖé ɔ hwìɖìì-taɓa-taɓa kè ɔ mɛ́ jè Hwìɖìi-Dyà-Hwɔ̀ɔ̀ kɔ̃-mu-mu mú.
Ðɛ-kɔ̃in-kpa-kpa
Ðɛ́ mɔ̀ Jízɛ̀ hwìɖìì-taɓa-taɓa xwíníín nyɛ́?
Xwɛ̀ m̀ mɔ́ m̀ kéɛ tɛ̀mɛ̀ìn kà m̀ ɓéɖé zùo-po-hwòɖò ɓó ɖɛ Jɛhova kè Jízɛ̀ nyuà m̀ bììɛɛ jè kɛ́?
Xwíníínɔ̀ nyɛ́ kɔ̃̀ jè ɔ kpaà ɖɛ mìɔ ɓɛ́ nyɔ kéà Kɛ́ɖɛ́ì mɛ́-mɛ́ɔ̀ jè Hwìɖìi-Dyà-Hwɔ̀ɔ̀ kɔ̃ mu kɛ́?
CƐ̃́ ÐƐ PÀÐÀ
Kɛ́ɖɛ́ì mɛ́-mɛ́ɔ̀ jè po à kpéí, ɓɛ́ à ké ɖɛ́ nyu kɛ́?
Ɔ Nyùìn Ma Ɔ Kpóɖó-Dyùàɔ̀ Kũ̀à Mú Ɓɛ́ Ɔ Ké Jɛhova Dya Dè (9:28)
Cɛ̃́ ɖɛ pàɖà ɓá hwìɖìì-taɓa-taɓa jè dyí kè kà à ɓɛ́ìn tɛ̀mɛ̀ìn nyɛ.
“Taɓa Jɛhovaa Nyɛ́nɛ́ín-Dáìn-Ðɛ̀ Ɓèɔ̀ Jè Hwìɖìì” (Dyí-Gmɔ̀ìn-Gbò-Cèè-Ðɛ̀ɔ̀, Kpadyua 2016)
Ðé nɔ́ɔ́ mɔ̀à “Ḿ Hwɛ̀ Mú, Ké Ḿ Nì Cĩ́ɛń, ké Ḿ Mɔ̀ Nyɔ Gàná” kɛ múɛɛ, dyé ɖɛ Kɛ́ɖɛ́ì mɛ́-mɛ́ɔ̀ jè cɛ̃́-cɛ̃́ nyu ma màa ɖòɛ̀ cĩ́-cĩ́ɔ̀ bũ̀ɛ.
“Baɓoɔ Zĩàìn Cĩ́-Kà Gbo” (Dyí-Gmɔ̀ìn-Gbò-Cèè-Ðɛ̀ɔ̀, Káná-Vɛ̀nɛ̀ 1, 2011)
Cɛ̃́ xwíníín kɔ̃̀ jè nyɔ xwéɖé-wè ɖià bɛɖɛɛ̀ɔ̀ ké wa náà wã́ìnɔ̀ ɓó Ðɛ-Hwìɖìi-Dyà-Hwɔ̀ɔ̀ tiín nyɛɛ jè.