CƐ̃́Ɛ́-ÐƐ̀ 20

Kà Dyí-Poìn-Kpòòɔ̀ Nyu Paún Nìɛ̀ Kɛ

Ɔ Dyɛ̀ Sɔ̀à Nɛɛ̀ Kɔ̃ɛ

Jɛhova mɔ̀ ɖɛ-paún-po Geɖepɔɔ. (1 Kɔ̀ɖéíntĩ̀ɔ̀ 14:33, 40) Ɔ jèɛɛ, à ɓɛ́ìn hwìɖìi dèɛ̀ kà ɔ nyɔ ɓèɔ̀ mu paún nììn nyɛ. Xwɛ̀ Kɛ́ɖɛ́ì ɖeín-sí-nyɔ̀ ɓèɛ̀ dyí-poìn-kpòòɔ̀ nyu paún nìɛ̀ kɛ́? Ðɛ́ à ɓɛ́ìn nyuɛ ɓɛ́ ɔ ké mú wóɖóɛ́?

1. Nyɛ́ mɔ̀ nyɔ nì dyí-poìn-kpòòɔ̀ kɔ̃in nyɛ́?

‘Kɛ́ɖɛ́ì mɔ̀ nyɔ nì dyí-poìn-kpòòɔ̀ kɔ̃in.’ (Ìfísĩ̀ɔ̀ 5:23) Ɔ nàìn Jɛhovaa nyɔ ɓèɔ̀ kũ̀à ɓèɔ̀ ɖé ɓóɖó-kpàà dà séín sɔ̀ìn ɖé dyɔún. Jízɛ̀ gã “gbò-nì-nyɔ̀ ɓɛ́ ɔ fɔ̀nɔ̀ hwòɖò, ké nyɔ ɓɛ́ìn ɔ hwòɖò kɔ̃ dèɛ̀” kɛ—ɛ́ɖɔ̀ hwɛ̀ ɖɛ ɓè ɓɛ́ nyɔ ɖáìn Nyɔ-Dyúa-Nì-Nyɔ̀ Ɓèɛ. (Zà Máfíò 24:45-47 wuɖuún.) Kà àpɔ́sò ɓè kè ɛ́ɖɔ̀ ɓè nì ma ɖé Jùɖúsɛ̀ɖɛ̀ìn nyɛ nìà kɛɛ, Nyɔ-Dyúa-Nì-Nyɔ̀ Ɓèɔ̀ zaìn dyí-poìn-kpòò ɓè nì ɓóɖó-kpàà dà séín nyɛɛ hwìè da. (Àpɔ́sò 15:2) Kɛɛ gàa ɓè nìà kɛɛ se à kpòòɔ̀ nàìn-nyɔ̀ ɓè. Wa gmɔìn ɖé Jɛhova kè ɔ Wuɖuɔ̀ gbo ɓó hwìè da zàìn jè, ké wa sí Jízɛ̀ɛ̀ hwìè-da-zàìn-zàìnɔ̀ kíɖíí.

2. Ðɛ́ mɔ̀ ɛ́ɖɔ̀ ɓèɔ̀ kũ̀à kɛ́?

Ɛ́ɖɔ̀ ɓè mɔ̀ Kɛ́ɖɛ́ì ɖeín-sí-gàà hwɛ̀ ɖɛ ɓè ɓɛ́ wa tɛ̀mɛ̀ìn ɖɛ sɔ̀ìn Baɓoɔ mú, ké wa gmɔ̀ Jɛhovaa nyɔ ɓèɔ̀ dyí dyììn ɖé wa gbo-kpá-kpá kè wa kpéí-po-po múɛ. Wa ní pɛ́ɛ̀ wa ɓó waà kũ̀àɔ̀ jè. Kɛɛ, wa ‘nyuɛ ɖéɛ hwòɖò-wɔ̃́-wɔ̃́ mú kà ɓɛ́ Geɖepɔɔ mɔ́ ɓɛ́ wa kéà nyuɛ. Ké wa ní nyuɛ ɓó wíɖí dyé jè’. (1 Píɖɛ̀ 5:1, 2) Mìnìsíwɔ́ɖɔ̀ sɛ́vɛ́ìn ɓè dè ɛ́ɖɔ̀ ɓè sɔ̃ xwíɖíi, ké ti wè ɖà ziín wa mɔ̀ùn ɓɛ́ìn ɛ́ɖɔ̀ ɓè jùɛ.

Nyɔ-Dyúa-Nì-Nyɔ̀ Ɓèɔ̀ gã ɛ́ɖɔ̀ ɖíɛ́ ɓè ɓɛ́ wa ké dyí-poìn-kpòò kɔ̃in-té-nyɔ̀ ɓè jù. Wa té dyí-poìn-kpòò kò-kò ɓè kɔ̃in, ɓɛ́ wa ké wa hwìè da zàìn kè ɓɛ́ wa ké wa kpéí po. Dyí-poìn-kpòò kɔ̃in-té-nyɔ̀ ɓè nyùìn Baɓoɔ kũ̀à mú, ɓɛ́ wa kéɛ dyé kɛbì ɖíí-gàà ɖò ɓɛ́ìn mìnìsíwɔ́ɖɔ̀ sɛ́vɛ́ìn mɔɔ ɛ́ɖɔ̀ jùɛ ní.—1 Tímétè 3:1-10, 12; Tátɔ̀ 1:5-9.

3. Ðɛ́ mɔ̀ kũ̀à ɓɛ́ Jɛhova Zàse ɖò-ɖò ɓè ɓéɖéɛ́?

Nyɔ séín nì ɖé dyí-poìn-kpòòɔ̀ múɛɛ ‘ɓàìn Jɛhova nyɛ́nɛ́ɔ̀’ dyììn ɖé gɔ̃̀-jù-wùɖù tò-tò ɖé dyí-poìn-poìn ɓèɔ̀ mú kè ɖé Geɖepɔɔ-wùɖù-wáɖá-kũ̀àɔ̀ dyɛ̀ wa ɓɛ́ìn nyuɛ kɛɛ mú.—Zà Wɛ́ɖɛ́ 148:12, 13 wuɖuún.

ÐE ÐƐ MÚIN CÁ

Cɛ̃́ nàìn-nyɔ̀ ɓɛ́ Jízɛ̀ jù kɛ kè kà ɛ́ɖɔ̀ ɓèɔ̀ vɔ̃ ɓɛ́ wa ké ɔ nyuu-ɖɛ̀ ɓèɔ̀ kíɖíí síɛɛ jè ɔ kè kà à ɓɛ́ìn Jízɛ̀ kè ɛ́ɖɔ̀ ɓèɔ̀ wuɖu nyuɛ kɛ.

4. Jízɛ̀ mɔ̀ nàìn-nyɔ̀ nɔ̀mɔ̀ kpeɖeín ɖò

Jízɛ̀ ɖá à ɓɛ́ à ké ɔ gbo dyi. Zà Máfíò 11:28-30 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Xwɛ̀ Jízɛ̀ mɔ́ ɓɛ́ à hwòɖò ké nì ɓá ɔ nyɔ-nàìn-nàìnɔ̀ jè dyíɛ́?

Xwɛ̀ ɛ́ɖɔ̀ ɓè nyu Jízɛ̀ɛ̀ kpeɖe ɓèɔ̀ kíɖíí síɛ kɛ́? Po VÍÐÒƆ̀ kũ̀à gbo.

VÍÐÒ: Ɛ́ɖɔ̀ Ɓèɔ̀ Nyu Ðɛ Ðò Ɓá Nìpáà-Ɓòɖòɔ̀ Dyi-Túò-Túò Jè Dyí (4:56)

Baɓoɔ tɛ̀mɛ̀ìn kà ɛ́ɖɔ̀ ɓèɔ̀ mɛ nyu wa kũ̀àɔ̀ nyuɛ kɛ wáɖáá.

Zà Àzédyà 32:2 kè 1 Píɖɛ̀ 5:1-3 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Xwɛ̀ nì hwòɖò nyu nìɛ̀ ɓɛ́ m̀ kéɛ dyí dyuò kà ɛ́ɖɔ̀ ɓèɔ̀ vɔ̃, ɓɛ́ wa ké nyɔ tɔ̀ɔ̀ ɓè kpéí po kà Jízɛ̀ nyuɛ ma kà kɛ́?
Ðɛ́ mɔ̀ hwìè tɔ̀ɔ̀ ɓè kɔ̃̀ mú ɓɛ́ ɛ́ɖɔ̀ ɓèɔ̀ sí Jízɛ̀ɛ̀ nyuu-ɖɛ̀ ɓèɔ̀ kíɖííɛ́?

5. Ɛ́ɖɔ̀ ɓè tɛ̀mɛ̀ìn ɖɛ dyììn ɖé wa nyuu-ɖɛ̀ ɓè mú

Xwɛ̀ Jízɛ̀ mɔ́ ɓɛ́ ɛ́ɖɔ̀ ɓè ké waà kũ̀àɔ̀ dya gmɔ̀ kɛ́? Po VÍÐÒƆ̀ kũ̀à gbo.

VÍÐÒ: Ɛ́ɖɔ̀ Ɓè Nì Kũ̀àɔ̀ Dyúa! (7:39)

Jízɛ̀ dè ma ɓo-bɛ̃̀ ɓó nyɔ ɓè nì dyí-poìn-kpòòɔ̀ dyúa kɛɛ bìì. Zà Máfíò 23:8-12 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Ðɛ́ tó nì hwòɖòɔ̀ dyi ɓá zaìn gboi nìà Baɓoɔ gma ɓè ɓó ɛ́ɖɔ̀ ɓè bììɛ kè ɖɛ m̀ ɖà cɔ́cì-nàìn-nyɔ̀ ɓè nyuɛ dyéɛ pṹa kɛɛ jè dyíɛ́?

A. Fótò-poìn-dyí: Ɛ́ɖɔ̀ ɖò nì ɔ mìɔùn kè ɔ xwéɖé-dùɔ̀ dyi kùɛ̀n ɖé zùùɔ̀ wáká kɔ̃. 1. Ɔ nì ɓaàùn hwɛ̀ ɔ ké Baɓoɔ cɛ̃́-cɛ̃́ gbɔ dè. 2. Ɔ gmàà nì ɔ gbo kpáuń, ɓɛ́ wa ké wa dyú-màà gmɔ̀ɔ̀ ɖɛ tɛ̀mɛ̀ìn ɓá Baɓoɔ jè dyí.

B. Ɛ́ɖɔ̀ dyúáɖòɔ̀ kè ɔ gmàà nì ɖíí-màà wɛ́-wɛ́ ɖò nì wa dyí-poìn-kpòòɔ̀ mú ɓɛ́ ɔ nì píɖɛín nyɛɛ gboi téɛń.

Ɛ́ɖɔ̀ ɓè kùìn wa mìɔùn kè waà xwéɖé-dùɔ̀ dyi ɖé Jɛhova ɓiè-ɓiè mú
Ɛ́ɖɔ̀ ɓè kɔ̃̀ nyɔ séín nì dyí-poìn-kpòòɔ̀ múɛɛ jè gbo
Ɛ́ɖɔ̀ ɓè wáɖá Geɖepɔɔ-wùɖùɔ̀ ti séín
Ɛ́ɖɔ̀ ɓè mɔ̀ ɖɛ-tɛ̀mɛ̀ìn-nyɔ̀ ɓè. Wa tò gbo-kpá-sɔ̃̀ ɓó Kĩ́dɔ̃̀ Hɔ́ɔ̀ɔ̀ múin nɔ̀mɔ̀ìn jè kè kũ̀à tɔ̀ɔ̀ ɓè jè

6. À ɓɛ́ìn ɛ́ɖɔ̀ ɓèɔ̀ wuɖu nyuɛ

Baɓoɔ nyí à xwíníín kpa ɖɛ ɖò kɔ̃̀ jè à mɛ nyuà ɛ́ɖɔ̀ ɓèɔ̀ wuɖuɛ. Zà Híìbúɖúù 13:17 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Nì hwòɖò ɖá kà Baɓoɔ poà à kpéí, ɓɛ́ à kéà nyɔ ɓè nìà à dyúa kɛɛ wuɖu nyu kè ɓɛ́ à kéà wa kpéín dyéɛɛ nyu fɔ̀nɔ̀-hwòɖòò? Xwíníínɔ̀ nyɛ́ kɔ̃̀ jè ɔ nìà ná mɔɔ ɔ seà ná nì kɛ́?

Zà Ðúù 16:10 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Xwíníínɔ̀ nyɛ́ kɔ̃̀ jè ɔ kpaà ɖɛ ɓɛ́ à kéà ɛ́ɖɔ̀ ɓèɔ̀ wuɖu nyu ɖé ɖɛ tííwè ɓè múɛ́?

NYƆ ÐÍƐ́ ƁÈ ÐÁ: “M̀ se kɔ̃̀ m̀ ké ɓiè-kpòò nì paún wɛ̃ɛ mú nì.”

Nì hwòɖò ɖá ɔ nɔ̀mɔ̀ dyíin ɓɛ́ nyɔ ké dyí-poìn-kpòò ɖò mú nìì?

SṸÌN-XWÍNÍÍN

Jízɛ̀ mɔ̀ nyɔ nì dyí-poìn-kpòòɔ̀ kɔ̃in. À kpá múàùn ɓɛ́ à ké ɛ́ɖɔ̀ ɓè nìà ɔ xwíɖíiɛɛ wuɖu nyu, sepoɛɖe wa po à kpéí, ké wa tɛ̀mɛ̀ìn à ɖɛ dyììn ɖé waà nyuu-ɖɛ̀ ɓè mú.