CƐ̃́Ɛ́-ÐƐ̀ 43
Xwɛ̀ Kɛ́ɖɛ́ì Ðeín-Sí-Nyɔ̀ Ɓè Mɛ Nyu Nɔmɔɔ Dya Gmɔ̀ɔ̀ Kɛ́?
Ðé ɓóɖó-kpàà dà séín nyɛɛ, nyɔ ɓè ɓéɖé hwìɖìi-poìn-ɖɛ̀ kò-kò ɓè ɓá nɔmɔɔ jè dyí. Nyɔ ɖíɛ́ ɓè kè wa ɓàto ɓè dyi dyí poìn ní, wa ná nɔmɔɔ ti ɖíɛ́ ɓè ɓaɖa. Nyɔ tɔ̀ɔ̀ ɓè gãa ɓɛ́ wa ké se ná fɔɔ. Ké nyɔ tɔ̀ɔ̀ ɓè mɔ̀ùn ná ké nɔmɔɔ̀ zi wa mú. Ðɛ́ Baɓoɔ cɛ̃ ɓá nɔmɔɔ jè dyíɛ́?
1. Ɔ mɔ̀ ɖɛ gbà ɓɛ́ nyɔ ké nɔmɔɔ náà?
Baɓoɔ seɛ cɛ̃ kà nɔmɔɔ-ná-ná mɔ̀ ɖɛ gbà kɛ. Ðé ɖɛ nɔ̀mɔ̀ dyíin ɓè ɓɛ́ Geɖepɔɔ nyí nyɔùn wɛ̃ zɛɖɛ-zɛɖɛ múɛɛ, Baɓoɔ cɛ̃ “wã́ìn ɓɛ́ ɔ ɓɛ́ìn nyɔùn-dyùɛ̀ hwòɖò dyi dèɛ̀ kɛ” jè. (Wɛ́ɖɛ́ 104:14, 15) Màa kè gàa ɓè ɓɛ́ wa mɔ̀ ma hwòɖò-kɔ̃-dè-nyɔ̀ ɓè ɓɛ́ Baɓoɔ cɛ̃ jèɛɛ ná ma nɔmɔɔ.—1 Tímétè 5:23.
2. Ðɛ́ mɔ̀ náún-po-wùɖù ɓɛ́ Baɓoɔ ɓéɖé ɓó nyɔ ɓè ɓɛ́ wa gãà ɓɛ́ wa kéà ná kɛɛ bììɛ́?
Jɛhova ɖá nɔmɔɔ pàɖà ná-ná kè ɔ nyɔ-mú-zi-zi mɔ̀ ɖɛ gbà. (Gàɖézìà 5:21) Jɛhova wuɖuɔ̀ ɖá: “Mɔ̀ùn ɖá ɓɛ́ m̀ ké kàmàà-ɖɛ̀ kúɖúú ná-nyɔ̀ . . . jù.” (Nɔ́ɔ́ 23:20) Ɔ jèɛɛ, ɔ jù ké à dyiɛ gã ɓɛ́ à ké ná—kɛbì ɔ mɛ mɔ̀ ɖé gã gbo ní—à mɛ ɓɔ́ náa mìɔ ɓɛ́ à ké se hwìɖìi poɛ̀n ɓɛ́ìn mɔɔ wùɖùɛ̀ ɓɛ́ìn mɔɔ dyi nyànàà ɓɛ́ìn nɔ̀mɔ̀ dyíin, mɔɔ ɓɛ́ à dyɔɔ̀ ké se mú wóɖó. Ɔ jù ké à se à nɔmɔɔ ná jèɔ̀ dyí kpɔ̃ɔ ɓɛ́ìn ní, à hwòɖò mɛ wɔ̃́ ɓɛ́ à ké nɔmɔɔ ná-ná dyi táà gàná cá.
3. Xwɛ̀ à ɓɛ́ìn nyɔ tɔ̀ɔ̀ ɓè nììn gbɔ-po-ɖɛ̀ ɓè ɓá nɔmɔɔ jè dyíɛɛ kpéín dyéɛ kɛ́?
Nyɔ ɖò-ɖò séín ɓéɖé ɓɛ́ wa kéɛ gbɔ po kɛbì wa mu nɔmɔɔ náùn ní. À mɛ ɓɔ́ nyɔ ɓè ɓɛ́ wa gãa ɓɛ́ wa ké nɔmɔɔ wè ná kɛɛ dya gmɔ̀ɔ̀ gbà-kà, ké à mɛ ɓɔ́ nyɔ ɓè ɓɛ́ wa se náa mɔ́ kɛɛ dyí dèɛ̀ ɓɛ́ wa ké ná. (Wóɖómà 14:10) À ɓɛ́ìn gãa ɓɛ́ à ké se ná ɔ jù ké à ná-náɔ̀ dyi fũ̀à-fṹá jùɛ mu ɓó nyɔ tɔ̀ɔ̀ ɓè bìì ní. (Zà Wóɖómà 14:21 wuɖuún.) À mɛ ‘ɓɔ́ à mìɔùn nììn nɔ̀mɔ̀ dyíin dyi mɔ́ɔ. À mɛ mɔ́ à mùè ɖò nììn nɔ̀mɔ̀ dyíin dyi.’—Zà 1 Kɔ̀ɖéíntĩ̀ɔ̀ 10:23, 24 wuɖuún.
ÐE ÐƐ MÚIN CÁ
Cɛ̃́ Baɓo hwìè-da-zàìn-wùɖù ɓè ɓɛ́ wa mu m̀ gbo kpáùn, ɓɛ́ m̀ kéɛ gbɔ po kɛbì m̀ mɛ ná, ké m̀ dyi náa mu ní ɔ jĩ̀ kà m̀ mɛ ná kɛ. Ké ɖeɛɛ, cɛ̃́ ɖɛ m̀ ɓɛ́ìn nyuɛ ɔ jù ké m̀ dyi fũ̀à-fṹá ɓéɖé ɓá nɔmɔɔ ná jè dyí ní.
4. Poɛ gbɔ kɛbì nì mu náùn ní
Xwɛ̀ Jízɛ̀ nyu ma nɔmɔɔ ná-ná dya gmɔ̀ɔ̀ kɛ́? Ɓɛ́ m̀ ké ɔ gɔ̃̀-jù-wùɖù cɛ̃́ ní, poìn zɛ̃̀ìn-ɖɛ̀ kĩ́ín-kĩ́ín ɔ nyu ma kɛɛ jè hwìɖìi. Zà Jɔ̃́ɔ́ 2:1-11 wuɖuún, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn:
Sɔ̀ìn ɖé zɛ̃̀ìn-ɖɛ̀ nìà kɛ múɛɛ, ɖɛ́ à ɓɛ́ìn cɛ̃́ɛ ɓá kà Jízɛ̀ nyu ma nɔmɔɔ dya gmɔ̀ɔ̀ kè kà ɔ nyu ma nyɔ ɓè náa ma kɛ dya gmɔ̀ɔ̀ kɛɛ jè dyíɛ́?
Kà Jízɛ̀ seɛ ma cɛ̃ kà nɔmɔɔ ná-ná mɔ̀ ɖɛ gbà kɛɛ, xwɛ̀ Kɛ́ɖɛ́ì ɖeín-sí-nyɔ̀ ɖò mɛ nyu nyɔ ɖò ɓɛ́ ɔ gãa ɓɛ́ ɔ ké nɔmɔɔ ná kɛɛ dya gmɔ̀ɔ̀ kɛ́?
Kɛɛ sepoɛɖe Kɛ́ɖɛ́ì ɖeín-sí-nyɔ̀ ɖò ɓɛ́ìn nɔmɔɔ náa jèɛɛ, ɔ se ɖɛ ɓɛ́ ɔ ɓɛ́ìn náa ti séín nyɛ. Zà Nɔ́ɔ́ 22:3 wuɖuún, ɓɛ́ m̀ kéɛ dyé kɛbì ɖɛ ɓè nìà kɛ muɛ nyuùn ɓɛ́ m̀ ké se ná ní:
M̀ nì hwòtimo nàìn dyiɛń mɔɔ màzĩ́ìn kũ̀à mú nyùɛ̀n dyiɛń.
M̀ nì zùù kɔ̃.
Hwoò-nyɔ̀ ɖò cɛ̃ɛ m̀ gbo kà m̀ mɛ ɓɔ́ nɔmɔɔ náa kɛ.
M̀ se m̀ mìɔùn dyí kpɔ̃ɔ ɓɛ́ìn ɓá nɔmɔɔ ná jè dyí.
Ɓóɖóɔ̀ gma ɖá m̀ mɛ ɓɔ́ nɔmɔɔ náa.
M̀ kè nyɔ ɖò ɓɛ́ ɔ se nɔmɔɔ náa mɔ́, sepoɛɖe ɔ ɓéɖé fũ̀à-fṹá ɓá nɔmɔɔ ná jè dyíɛɛ nì dà ɖò.
M̀ mɛ nyí nyɔ ɓè nɔmɔɔ ɖé dyi-kpɔ̃ìn-hwɔ̀ ɓè kɔ̃ɔ̀ mɔɔ hwɔ tɔ̀ɔ̀ ɓè kɔ̃ɔ̀? Ɓɛ́ m̀ ké ɖɛ ɓɛ́ìn m̀ gbo kpáa ɓɛ́ m̀ ké ɖɛ gbɔ poɛɛ dyé ní, po VÍÐÒƆ̀ kũ̀à gbo.
Zà Wóɖómà 13:13 kè 1 Kɔ̀ɖéíntĩ̀ɔ̀ 10:31, 32 wuɖuún. Ɓè ɖà vɔ̀sì ɓèɔ̀ wuɖuún zà ɖò-ɖò ní, ɓè mɛ dèìn dyi-diè-ɖɛ̀ nìà kɛ dɔ́ɔ́ kɔ̃in:
Xwɛ̀ hwìè-da-zàìn-wùɖù nìà kɛɛ kũ̀à-mú-nyùìn-nyùìn ɓɛ́ìn m̀ gbo kpáa ɓɛ́ m̀ ké ɖɛ mu Jɛhova hwòɖò dyi dèìn nyɛɛ gbɔ po kɛ́?
Kɛ́ɖɛ́ì ɖeín-sí-nyɔ̀ ɖò-ɖò séín kɔ̃̀ wa kéɛ gbɔ po ɓó wa mìɔùn bìì kɛbì wa mu náùn mɔɔ wa se náa mu ní. Ɔ jù ké Kɛ́ɖɛ́ì ɖeín-sí-nyɔ̀ ɖò dyi nɔmɔɔ ná ɖoo ɖò ní, ɔ ɓɛ́ìn gãa ɓɛ́ ɔ ké se ná ti ɖíɛ́ ɓè ɓaɖa
5. Po nɔmɔɔ jĩ̀ kà nì mu náùn wɛ̃ɛ jè gbɔ
Ɔ jù ké m̀ dyiɛ gã ɓɛ́ m̀ ké nɔmɔɔ ná ní, ɖɛ nìà kɛ mɛ nì m̀ hwìɖìi: Jɛhova seɛ cɛ̃ kà nɔmɔɔ ná-ná mɔ̀ ɖɛ gbà kɛ, kɛɛ ɔ cɛ̃ɛ kà ɓɛ́ nɔmɔɔ pàɖà ná-ná mɔ̀ ɖɛ gba kɛ. Xwíníínɔ̀ nyɛ́ kɔ̃̀ jèɛ́? Zà Hòzéà 4:11, 18 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Ðɛ́ ɓɛ́ìn nyɔ ɖò gbo kpáa ɔ jù ké ɔ dyi ná mìɔ níɛ́?
Xwɛ̀ à ɓɛ́ìn nɔmɔɔ pàɖà ná-ná dyí ɓàɖàìn nyɛ́? À kɔ̃̀ à ké à sèìn-naín dyuò. Zà Nɔ́ɔ́ 11:2 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Xwíníínɔ̀ nyɛ́ kɔ̃̀ jè ɔ nyuà fɔ̀nɔ̀-hwòɖò ɓɛ́ m̀ kéà nɔmɔɔ jĩ̀ kà nì mu náùn wɛ̃ɛ jè dyí sɔ́ kɛ́?
6. Zi nɔmɔɔ pàɖà ná-ná wɔ̃
Dyé ɖɛ kpá ma gàa ɖò gbo ɓɛ́ ɔ ké ma nɔmɔɔ pàɖà ná-ná dyi táà kɛ. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.
Ðé víɖòɔ̀ múɛɛ, ɖɛ́ nɔmɔɔ ná-ná nyu ma Dìmɛ́téɖè nyuu-ɖɛ̀ ɓè bũ̀ kɛ́?
Ɔ ɓɔ́ ma nɔmɔɔ náa wàɖà cáà?
Xwɛ̀ ɔ ɓɛ́ìn ma nɔmɔɔ pàɖà ná-ná wɔ̃ ziɛ gàná cá kɛ́?
Zà 1 Kɔ̀ɖéíntĩ̀ɔ̀ 6:10, 11 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
Nɔmɔɔ pàɖà ná-ná mɔ̀ ɖɛ gbà cáà?
Ðɛ́ tɛ̀mɛ̀ìn kà nyɔ ɓɛ́ ɔ mɔ̀ nɔmɔɔ pàɖà ná-nyɔ̀ kɛɛ ɓɛ́ìn gbo zĩàìn nyɛ́?
Zà Máfíò 5:30 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Sɔ̃ ɖò ɓó cɛ̃-cɛ̃ tɛ̀mɛ̀ìn kà à ɓéɖé à ké ɖɛ ɓè à ɖɛ̀ɓɛ̀ múɛɛ kɔ̃ín pòìn, ɓɛ́ à ké Jɛhova hwòɖò dyi dè kɛ. Ðɛ́ m̀ ɓɛ́ìn nyuɛ ɔ jù ké m̀ dyi nɔmɔɔ pàɖà ná-ná wɔ̃-zi-zi gbo vɔ̃uń nììn nyɛ́?a
Zà 1 Kɔ̀ɖéíntĩ̀ɔ̀ 15:33 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Ðɛ́ nì ɓàto ɓè ɓɛ́ìn m̀ bũ̀ nyuɛ ɓá nɔmɔɔ jĩ̀ kà nì mu náùn wɛ̃ɛ jè dyíɛ́?
NYƆ ÐÒ ƁƐ́ÌN NÍIŃ: “Nɔmɔɔ ná-ná mɔ̀ ɖɛ gbàà?”
Xwɛ̀ nì muɛ gɔ̃̀ jùùn wɛ̃́?
SṸÌN-XWÍNÍÍN
Jɛhova nyí à nɔmɔɔ ɓó à múàùn kpá jè, kɛɛ ɔ ɖá nɔmɔɔ pàɖà ná-ná kè ɔ nyɔ-mú-zi-zi mɔ̀ ɖɛ gbà.
Ðɛ-kɔ̃in-kpa-kpa
Ðɛ́ Baɓoɔ cɛ̃ ɓá nɔmɔɔ jè dyíɛ́?
Ðɛ́ mɔ̀ nàdì ɓè ɓɛ́ wa nì nɔmɔɔ pàɖà ná-ná múɛ́?
Xwɛ̀ à ɓɛ́ìn ɖɛ nyɔ tɔ̀ɔ̀ ɓè po gbɔ ɓá nɔmɔɔ ná jè dyíɛɛ kpéín dyéɛ kɛ́?
CƐ̃́ ÐƐ PÀÐÀ
Xwɛ̀ nyɔ gmɔ̀ ɓè ɓɛ́ìn ɖɛ ɓè gbɔ poɛ nɔ̀mɔ̀ dyíin ɓá nɔmɔɔ jè dyíɛ́?
Cɛ̃́ ɖɛ ɓè m̀ ɓɛ́ìn nyuɛ ɓɛ́ m̀ ké nɔmɔɔ pàɖà ná-ná wɔ̃ ziɛɛ jè.
“Nɔmɔɔ Ná-Ná Dyí-Sɛ́ɖɛ́ìn-Kà” (Dyí-Gmɔ̀ìn-Gbò-Cèè-Ðɛ̀ɔ̀, Dùà-Dù 1, 2010)
Kɛ́ɖɛ́ì ɖeín-sí-nyɔ̀ ɓè mɛ kɔìn tɛ̀ɓɛ̀ɛ̀ dyíì?
“Dyi-Diè-Ðɛ̀ Ɓè Sɔ̀ìn Céè-Ðɛ̀ Wuɖuún-Zà-Nyɔ̀ Ɓè Gboɛ” (Dyí-Gmɔ̀ìn-Gbò-Cèè-Ðɛ̀ɔ̀, Fóɖó-Vĩ̀ 15, 2007)
Ðé nɔ́ɔ́ mɔ̀à “Ḿ Mɔ̀ Ma Kòò Cɛ̃̀ Gbɔí” kɛ múɛɛ, dyé kà gàa ɖò nyu ma nɔmɔɔ pàɖà ná-ná dyi táà kɛ.
“Baɓoɔ Zĩàìn Cĩ́-Kà Gbo” (Dyí-Gmɔ̀ìn-Gbò-Cèè-Ðɛ̀ɔ̀, Dùò 1, 2012)
a Nyɔ ɓè ɓɛ́ nɔmɔɔ ná-ná dyuòàìn múin mìɔ kɛɛ mɔ́ ɖɛ-dyuò-nyɔ̀ jɛ́ɛ́ ɖò ɓɛ́ ɔ ké wa gbo kpá, ɓɛ́ wa kéɛ dyi táà. Hwoò-nyɔ̀ pàɖà ɓè cɛ̃ɛ kà nyɔ ɓè ɓɛ́ wa ɓéɖé ma fũ̀à-fṹá ɓá nɔmɔɔ ná jè dyíɛɛ mɛ ɓɔ́ náa ɖe fɔɔ kɛ.