CƐ̃́Ɛ́-ÐƐ̀ 48
Gã Nì Ɓàto Ɓè Hwòɖò-Fɔ̀nɔ̀-Kà
Ɓàto xwɛ̃́ìn bũ̀in ɓè po à múàɔ̀ kɔ̃ ɖé ti nɔ̀mɔ̀ dyíin ɓè mú, ké wa po à kpéí ɖé ti kàmàùn-kàmàùn ɓè mú. Kɛɛ, Baɓoɔ po à náún kà ɓɛ́ nyɔ séín se ɓàto nɔ̀mɔ̀ dyíin nyɛ. Nìí, xwɛ̀ m̀ ɓɛ́ìn ɓàto nɔ̀mɔ̀ dyíin gãa kɛ́? Poìn dyi-diè-ɖɛ̀ ɓè kɔà ɓó dyíɛɛ jè hwìɖìi.
1. Ðɛ́ ɓàto ɓè m̀ gã kɛɛ ɓɛ́ìn m̀ bũ̀ nyuɛ kɛ́?
À ɖɛ̀ɓɛ̀ à ké nyɔ ɓè ɓɛ́ à kè wa kè naìn múɛɛ kpeɖe dyí ɖú. Ɔ ɓɛ́ìn kpeɖe gbà mɔɔ kpeɖe nɔ̀mɔ̀ dyíin jùɛ—ké ɔ ɓɛ́ìn ná kpáa kɛbì à kè wa kè mɛ naìn mú ɖé kpóɖóún mɔɔ ɖé ɖúú kɔ̃ɛ. Baɓoɔ ɖá, “nyɔ ɓɛ́ ɔ kè hwòɖò-fɔ̀nɔ̀-nyɔ̀ naìn múɛɛ fɔ̀nɔ̀ hwòɖò, kɛɛ nyɔ ɓɛ́ ɔ kpɔ̃ zuɖuu-nyɔ̀ [nyɔ ɓɛ́ ɔ se Jɛhova mú ɖɛ̀ɓɛ̀ kɛ] ɓàto múɛɛ gbɔɔ̀ mú.” (Nɔ́ɔ́ 13:20) Ɓàto ɓè ɓɛ́ wa ɖɛ̀ɓɛ̀ Jɛhova mú ké wa ɓiè ɔ kɛɛ ɓɛ́ìn m̀ gbo kpáa, ɓɛ́ m̀ ké ɔ bũ̀in xwɛ̃́ìn tee, kè ɓɛ́ m̀ ké ɖɛ mɔ ɖɛ nɔ̀mɔ̀ dyíin nyɛɛ gbɔ po. Kɛɛ, nyɔ ɓè ɓɛ́ m̀ kpɔ̃ ɓàto mú ɖé píéɛɛ ɓɛ́ìn nyuɛ ɓɛ́ m̀ kè Jɛhova ké gboi tɔmɔìn. Xwíníína kɔ̃̀ jè ɖé Baɓoɔ ɖá à mɛ gãà à ɓàto ɓè hwòɖò-fɔ̀nɔ̀-kà kɛ̀. À ɓàto ɓè dyi nyɔ ɓè ɓɛ́ wa ɖɛ̀ɓɛ̀ Geɖepɔɔ múɛ jù ní, à nyu à mìɔùn kpáná dyí, ké à nyu wa kpáná dyí ɖekè. Nìí, à mu ɖɛ Baɓoɔ cɛ̃à kà à mɛ “poìn pòìn kpéí, ké [à] mɛ kpáìn kpàìn gbo” kɛɛ nyuɛ ɓɛ́ìn.—1 Tɛ̀sàɖónìà 5:11.
2. Xwɛ̀ Jɛhovaa hwòɖòɔ̀ mu nììn ɓá ɓàto ɓè m̀ gã kɛɛ jè dyíɛ́?
Jɛhova ma mú kóɖó-kóɖó ɖé ɔ ɓàto ɓè gã-gã mú. “Ɔ hwòɖò dèìn dyí-sɛ́ɖɛ́ìn-nyɔ̀ ɓèɔ̀ múin.” (Nɔ́ɔ́ 3:32) Xwɛ̀ Jɛhova hwòɖòɔ̀ mu nììn ɔ jù ké m̀ dyiɔ́ má ɓàto ɖò ɓɛ́ ɔ se ɔ mú ɖɛ̀ɓɛ̀ kɛɛ gã níɛ́? Ɔ hwòɖòɔ̀ mu ɖé ɖei kpáùn mìɔ cá! (Zà Jĩ́ìn 4:4 wuɖuún.) Kɛɛ, ɔ jù ké à dyi ɓàto se dyí sɛ́ɖɛ́ìn ɓè kɔ̃ín pòìn, ké à dyi Jɛhova kè nyɔ ɓè ɖɛ̀ɓɛ̀ ɔ múɛɛ bũ̀in xwɛ̃́ìn mìɔ ní, nìí, ɔ mu à gãùn, ɓɛ́ à ké ɔ ɓàto ɓè jù.—Wɛ́ɖɛ́ 15:1-4.
ÐE ÐƐ MÚIN CÁ
Cɛ̃́ xwíníín kɔ̃̀ jè ɓàto nɔ̀mɔ̀ dyíin gã-gã kpaà ɖɛ mìɔ kɛ, ké dyé kà m̀ ɓɛ́ìn ɓàto ɓè ɓɛ́ wa mu dyíin nɔ̀mɔ̀ùn ɓó m̀ bììɛɛ gãa kɛ.
3. Nì ɓɛ́ɖɛ́ kɔ̃ ɓó ɓàto se dyí sɛ́ɖɛ́ìn ɓè jè
Nyɔ ɓè ɓɛ́ wa se Geɖepɔɔ kè ɔ gma ɓèɔ̀ mú ɖɛ̀ɓɛ̀ kɛɛ mɔ̀ ɓàto se dyí sɛ́ɖɛ́ìn ɓè. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ ɖɔ́ɔ́ kɔ̃in dèìn.
Xwɛ̀ à kè nyɔ ɓè se dyí sɛ́ɖɛ́ìn nyɛɛ ɓɛ́ìn mú nàìn se-ɖɛ-dyuò-kà kɛ́?
Zà 1 Kɔ̀ɖéíntĩ̀ɔ̀ 15:33 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
Nyɛ́ ɓɛ́ìn ɓàto se dyí sɛ́ɖɛ́ìn jùɛ ɓó m̀ bììɛ́? Xwíníínɔ̀ nyɛ́ kɔ̃̀ jèɛ́?
Zà Wɛ́ɖɛ́ 119:63 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Ðɛ́ m̀ mɛ mɔ́ dyi ɖé ɓàto ɖò múɛ́?
Ɓáá-ɖɛ̀-ɓò zɔ̃̀ dyúáɖò ɓɛ́ìn ɓáá-ɖɛ̀-ɓò tɔ̀ɔ̀ ɓèɔ̀ mú gbɔɔ̀. Ðɛ́ ɓàto se dyí sɛ́ɖɛ́ìn dyúáɖò ɓɛ́ìn m̀ bũ̀ nyuɛ kɛ́?
4. Nyɔ ɓè ɓɛ́ wa kò ɓó à gboɛɛ ɓɛ́ìn ɓàto nɔ̀mɔ̀ dyíin ɓè jùɛ
Baɓoɔ cɛ̃ Dèɓé kè Jònétɔ̃̀ ɓɛ́ wa mɔ̀ ma gàa kpò sɔ̃́ ɓè ɖé Éézùɖùɛ̀-ɓòɖòɔ̀ kɔ̃ɛɛ jè. Wa sɔ̃́ɔ̀ se ma ɓɛ́ìn, ké Jònétɔ̃̀ mɔ̀ ma kã́áɔ̀ dyú-gàà; kɛɛ wa mɔ̀ ma ɓàto nɔ̀mɔ̀ dyíin cá. Zà 1 Sámíò 18:1 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Xwíníínɔ̀ nyɛ́ kɔ̃̀ jè à ɓàto ɓè se kɔ̃̀ wa kéà à ɓɛ́ìn-wɔ̃̀ ɓè mɔɔ nyɔ ɓè ɓéɖé ɖɛ kɛɛ jù wɛ̃́ɛ́ kɛ́?
Zà Wóɖómà 1:11, 12 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Xwɛ̀ ɓàto ɓè ɓɛ́ wa ɖɛ̀ɓɛ̀ Jɛhova múɛɛ ɓɛ́ìn wa mùè ɖò kpéí poɛ kɛ́?
Ðé víɖòɔ̀ múɛɛ, dyé kà gàa-dyù gmɔ̀ ɖò nyu ma ɓàto ɓè dyéɛ ɖé dà ɓè ɔ se ma hwìɖìi dèɛ. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.
Ðé víɖòɔ̀ múɛɛ, xwíníínɔ̀ nyɛ́ kɔ̃̀ jè Àkíɛ̀ wóɖóìn-nyɔ̀ ɓè gbaìn ma hwòɖò dyií ɓá ɔ ɓàto ɓè jè dyí ɖé sùkúù kɛ́?
Ðɛ́ nyu ké ɓàto ɓè nìà kɛ nɔ̀mɔ̀ ma dyíin ɖé ɔ dyéɖéín kĩ́ín nyɛ́?
Xwɛ̀ ɔ ɓɛ́ìn ma ɔ kpɛín-dyi-kpá-kpáɔ̀ wɔ̃ ziɛ kɛ́?
5. Kà m̀ ké ɓàto nɔ̀mɔ̀ dyíin ɓè ɓéɖéɛ nyuɛ
Cɛ̃́ kà m̀ ké jàà ɓàto ɓè ɓéɖéɛ nyuɛ—kè kà m̀ mìɔùn ké ɖò jù ɖekèɛ. Po VÍÐÒƆ̀ kũ̀à gbo.
Zà Nɔ́ɔ́ 18:24 kè ɔ 27:17 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
Xwɛ̀ jàà ɓàto ɓè nyu wa mùè ɖò gbo kpáa kɛ́?
M̀ ɓéɖé ɓàto nɔ̀mɔ̀ dyíin nì kà wɛɛ̀? Ɔ se ná nììn, nìí, xwɛ̀ m̀ ɓɛ́ìn ɖò ɓéɖéɛ kɛ́?
Zà Fèɖópĩ̀ɔ̀ 2:4 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Ɓɛ́ m̀ ké ɓàto nɔ̀mɔ̀ dyíin ɓè ɓéɖé ní, m̀ kɔ̃̀ m̀ ké ɓàto nɔ̀mɔ̀ dyíin jù. Xwɛ̀ m̀ ɓɛ́ìn náa nyuɛ kɛ́?
Ɓɛ́ m̀ ké ɓàto nɔ̀mɔ̀ dyíin ɓè ɓéɖé ní, m̀ kɔ̃̀ m̀ ké ɓàto nɔ̀mɔ̀ dyíin jù
NYƆ ÐÍƐ́ ƁÈ ÐÁ: “Ɓàto séín ɖò ɓéɖé-ɓéɖé nɔ̀mɔ̀ dyíin ké ɔ zi m̀ ké se ɓàto ɖò ɓéɖé fɔɔ kɛɛ dyí.”
Ðɛ́ nì mu cɛ̃ìn nyɛ́?
SṸÌN-XWÍNÍÍN
À dyi à ɓàto ɓè gã hwòɖò-fɔ̀nɔ̀-kà ní, à dè Jɛhova hwòɖò dyi, ké à nyu à mìɔùn kpáná dyí.
Ðɛ-kɔ̃in-kpa-kpa
Xwíníínɔ̀ nyɛ́ kɔ̃̀ jè ɓàto ɓè à gã kɛɛ jè kpɔ̃à Jɛhova hwòɖò kɛ́?
Ɓàto ɓèɔ̀ nyɛ́ à mɛ ɓàɖàìn dyíɛ́?
Xwɛ̀ m̀ ɓɛ́ìn m̀ kè nyɔ ɓè sɛ́ɖɛ́ìn dyíɛɛ ɓàto jù-jùɔ̀ dyi kùɛ̀n nyɛ́?
CƐ̃́ ÐƐ PÀÐÀ
Dyé kà jàà ɓàto ɓè ɓɛ́ìn m̀ gbo kpáa ɖé ti-kàmàùn-kàmàùn ɓè múɛ.
“Kpɔ̃ Ɓàto Kui-Kui Ɓè Hwɛ̀ Ðɛ Séín Ké Mánáín Hwɛ̀” (Dyí-Gmɔ̀ìn-Gbò-Cèè-Ðɛ̀ɔ̀, Gbàɖà-Gbàɖà 2019)
Cɛ̃́ ɖɛ ɓè m̀ ɓɛ́ìn nyuɛ ɓɛ́ m̀ ké ɓàto nɔ̀mɔ̀ dyíin ɓè ɓéɖéɛ jè.
Ðɛ́ m̀ mɛ dyuò dyí ɓá ɖúú-kɔ̃ ɓàto ɓè jè dyíɛ́?
Ðé cɛ̃́ɛ́-ɖɛ̀ mɔ̀à “Ḿ Nì Ma Ɓà Mɔ́uń Xwéé” kɛ múɛɛ, dyé ɖɛ nyu ké gàa ɖò dyi ma ɔ ɓàto ɓèɔ̀ gbo zĩàìn nyɛ.
“Baɓoɔ Zĩàìn Cĩ́-Kà Gbo” (Dyí-Gmɔ̀ìn-Gbò-Cèè-Ðɛ̀ɔ̀, Zágìɖìɔ̀ 1, 2012)