CƐ̃́Ɛ́-ÐƐ̀ 51
Xwɛ̀ M̀ Ɓɛ́ìn Jɛhova Hwòɖò Dyi Dèɛ̀ Ðé Nì Wĩín-Wùɖù Múɛ́?
Ti Jɛhova mɛ ma à kɛɛ, ɔ nyí ma à nyíí-ɖɛ̀ kpa ɖɛ ɖò—ɔ mɔ̀ ɓɛ́ à ké wùɖùɛ̀ ɓɛ́ìn. Kà à nyu nyíí-ɖɛ̀ nìà wɛ kũ̀à mú nyùɛ̀n nyɛɛ jè kpɔ̃ ɔ hwòɖòò? Ǹdye, ɔ jè kpɔ̃ ɔ hwòɖò cá! (Zà Jĩ́ìn 1:26 wuɖuún.) Ɔ jèɛɛ, xwɛ̀ à ɓɛ́ìn à wĩín-wùɖùɔ̀ kũ̀à mú nyùɛ̀n ɓɛ́ ɔ ké Jɛhova hwòɖò dyi dè kɛ́?
1. Xwɛ̀ à mɛ nyu nyíí-ɖɛ̀ mɔ̀à ɓɛ́ à ké wùɖùɛ̀ ɓɛ́ìn nyɛɛ kũ̀à mú nyùɛ̀n nyɛ́?
Baɓoɔ ɖá à mɛ “poìn pòìn kpéí, ké [à] mɛ kpáìn kpàìn gbo.” (1 Tɛ̀sàɖónìà 5:11) M̀ dyuò nyɔ ɓè ɓɛ́ wa mɔ́ kpéí-po-po kɛ dyíì? Ðɛ́ m̀ ɓɛ́ìn nyuɛ ɓɛ́ wa hwòɖò ké dyi dè kɛ́? Nyuɛ ɓɛ́ wa kéɛ dyí dyuò kà m̀ ɖɛ̀ɓɛ̀ wa múɛ. M̀ ɓɛ́ìn ɖɛ m̀ ɖɛ̀ɓɛ̀ mú ɓá wa jè dyíɛɛ wa gbo cɛ̃ɛ. M̀ dyuò Baɓo vɔ̀sì ɖò ɓɛ́ ɔ ɓɛ́ìn nyɔ ɖò ɓɛ́ m̀ dyuò dyíɛ kpéí poɛ kɛɛ dyíì? Baɓo vɔ̀sì pàɖà ɓè nì ɓó ɓɛ́ m̀ ɓɛ́ìn ɖò gãa kɛ. Ké ɖeɛɛ, ɔ mɛ nì m̀ hwìɖìi kà m̀ nyu ɖɛ ɖò cɛ̃ɛ kɛɛ ɓɛ́ìn nyɔ ɖò kpéí poɛ kà dyúáɖò kà wuɖu m̀ nyùàìn kũ̀à múɛɛ nyuà nyuɛ kɛ. Ɔ jèɛɛ, m̀ mɛ vɔ̃ ɓɛ́ nì wuɖu ké dyí ɓɛɖɛɛ̀ ti séín.—Nɔ́ɔ́ 15:1.
2. Ðɛ́ mɔ̀ wuɖu ɓè à mɛ ɓàɖàìn dyíɛ́?
Baɓoɔ ɖá: “Ɓè dyi wùɖùɛ̀n nììn, ɓèìn ɖá ɓè ké ɖɛ gbà ɖò cɛ̃.” (Zà Ìfísĩ̀ɔ̀ 4:29 wuɖuún.) Ɔ xwíníín mɔ̀, à mɛ ɓɔ́ wuɖu gbà poɛ, mɔɔ à mɛ ɓɔ́ wuɖu ɓè ɓɛ́ wa mɔ̀ nyɔ-hwòɖò-ɖé-ɖei-po-wùɖù kɛɛ cɛ̃ɛ. Ké ɖeɛɛ, à ɓéɖé ɓɛ́ à ké nyɔ nyɛ́nɛ́ zeɖe-zeɖe kè nyɔ cã̀-cã̀ cɛ̃-cɛ̃ dyí ɓàɖàìn.—Zà Nɔ́ɔ́ 16:28 wuɖuún.
3. Ðɛ́ mu à gbo kpáùn ɓɛ́ à wuɖu ké nyɔ tɔ̀ɔ̀ ɓè kpéí po kɛ́?
Ðɛ ɓè à cɛ̃ jèɛɛ tɛ̀mɛ̀ìn ɖɛ ɓè à poìn hwìɖìi kè kà à hwòɖò nyu nìɛ̀ kɛ wáɖáá. (Ðúù 6:45) Ɔ jèɛɛ, à kɔ̃̀ à ké à mìɔùn ɖɛ tɛ̀mɛ̀ìn, ɓɛ́ à ké ɖɛ nɔ̀mɔ̀ dyíin ɓè jè hwìɖìi poìn—ɖɛ ɓè ɓɛ́ wa mɔ̀ jàà, ké wa sɛ́ɖɛ́ìn dyí, ké wa mɔ̀ mú-ɖɛ̀ɓɛ̀-ɖɛ̀, ké wa zi dyíin nɔ̀mɔ̀ùn wɛ̃. (Fèɖópĩ̀ɔ̀ 4:8) Ɓɛ́ à hwòɖò ké ɖɛ ɓè nìà kɛ gbo nììn, nìí, à ɓéɖé ɓɛ́ à ké péé kè à ɓàto ɓè gã hwòɖò-fɔ̀nɔ̀-kà. (Nɔ́ɔ́ 13:20) Ɔ mu à gbo kpáùn ɖekè ɓɛ́ à ké hwìɖìi poìn hwɛ̀ à ké wùɖù. Poìn ɖɛ nì wuɖuɔ̀ mu nyɔ tɔ̀ɔ̀ ɓè bũ̀ nyuùn wɛ̃ɛ jè hwìɖìi. Baɓoɔ ɖá: “Wuɖu ɓɛ́ nyɔùn-dyù se hwìɖìi poìn ké wa cɛ̃ kɛɛ puà nyɔ kà gàsíà nyuà kɛ, kɛɛ hwòɖò-fɔ̀nɔ̀-nyɔ̀ɛ̀ wuɖu dyà dyi-káná-káná.”—Nɔ́ɔ́ 12:18.
ÐE ÐƐ MÚIN CÁ
Cɛ̃́ kà m̀ ké wùɖùɛ̀ nyu ɓɛ́ ɔ ké Jɛhova hwòɖò dyi dè kè ɓɛ́ ɔ ké nyɔ tɔ̀ɔ̀ ɓè kpéí poɛɛ jè.
4. Kpɔ̃ nì miɔɔ̀ dyí
Tiɔ̀ ɖíɛ́ ɓè ɓaɖaín, à séín cɛ̃ ɖɛ ɓè ɓɛ́ wa se à hwòɖò dyi dèɛ. (Jĩ́ìn 3:2) Zà Gàɖézìà 5:22, 23 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
Kpeɖe ɓeɛ̀ nyɛ́ nì mu jè ɓaàùn ɓɛ́ ɔ ké m̀ gbo kpá ɓɛ́ m̀ ké nì miɔɔ̀ dyí kpɔ̃ kɛ́? Xwɛ̀ kpeɖe ɓè nìà kɛ ɓɛ́ìn m̀ gbo kpáa kɛ́?
Zà 1 Kɔ̀ɖéíntĩ̀ɔ̀ 15:33 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Ðɛ́ ɓàto ɓè kè péé ɓè m̀ gã kɛɛ ɓɛ́ìn nì wĩín-wùɖùɔ̀ bũ̀ nyuɛ kɛ́?
Ðɛ́ ɓɛ́ìn kà m̀ nyu wùɖùɛ̀ kɛɛ kpé kɔ̃ún ɓéɖéɛ kɛ́?
Zà Ìkíɖísìásì 3:1, 7 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Tiɔ̀ nyɛ́ ɔ mu dyíin nɔ̀mɔ̀ùn ɓɛ́ m̀ ké gìɖìì nì kɛ́, mɔɔ m̀ ké ti ɔ mu dyíin nɔ̀mɔ̀ùn ɓɛ́ m̀ ké ɖɛ ɖò cɛ̃ kɛɛ fòìn nyɛ́?
5. Cɛ̃ nyɔ tɔ̀ɔ̀ ɓè nɔ̀mɔ̀ dyíin
Xwɛ̀ à ɓɛ́ìn nyɔ ɖò wuɖuún-ɖaɓa-ɖaɓa mɔɔ ɖɛ se dyí sɛ́ɖɛ́ìn nyɛɛ cɛ̃-cɛ̃ dyí ɓàɖàìn nyɛ́? Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.
Ðé víɖòɔ̀ múɛɛ, xwíníínɔ̀ nyɛ́ kɔ̃̀ jè ɖíí-gààɔ̀ mɔ́ ɓɛ́ ɔ kéà kà ɔ nyu nyɔ tɔ̀ɔ̀ ɓè jè cɛ̃ɛ kɛɛ dyí zàìn nyɛ́?
Ðɛ́ ɔ nyu ma ɓɛ́ ɔ ké gbo zĩàìn nyɛ́?
Zà Ìkíɖísìásì 7:16 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Ðɛ́ mɛ nì à hwìɖìi ɔ jù ké nyɔ ɖò ɖɛ-gbà-kɔ̃ún-cɛ̃-tò dyi à nyuín nyɛ́?
Zà Ìkíɖísìásì 7:21, 22 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Xwɛ̀ vɔ̀sì ɓè nìà kɛ ɓɛ́ìn m̀ gbo kpáa ɓɛ́ m̀ ké se dyoɖoún kpá mìɔ ɔ jù ké nyɔ ɖò dyi m̀ ɖɛ gbà kɔ̃ún cɛ̃ níɛ́?
6. Ma mú ɓɛ́ m̀ ké nì gbò-xwíníín-nyɔ̀ ɓè gbo wùɖù
Jɛhova mɔ́ ɓɛ́ à ké à gbò-xwíníín-nyɔ̀ ɓè gbo wùɖù ɖé wuɖu ɓɛ̀ɖɛ̀-ɓɛ̀ɖɛ̀ kè kpéín-dyé-dyé mú. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.
Ðɛ́ mu m̀ gbo kpáùn ɓɛ́ m̀ ké nì gbò-xwíníín-nyɔ̀ ɓè gbo wùɖù nɔ̀mɔ̀ dyíin nyɛ́?
Zà Ìfísĩ̀ɔ̀ 4:31, 32 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Ðɛ́ mɔ̀ wuɖu ɓè ɓɛ́ wa nyu ké xwéɖé-dù ɖò kpɔ̃ìn gbo kɛ́?
Jɛhova cɛ̃ ma kà ɔ hwòɖò nyu ma nìɛ̀ ɓá ɔ Dyú-gàà Jízɛ̀ jè dyíɛ. Zà Máfíò 17:5 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Xwɛ̀ m̀ ɓɛ́ìn Jɛhova ɓo-bɛ̃̀ìn síɛ dyììn ɖé kà m̀ nyu nì gbo-xwíníín-nyɔ̀ ɓè gbo wùɖùɛ̀ kɛɛ mú kɛ́?
Mɔ́ ti nɔ̀mɔ̀ dyíin ɓè dyi, ɓɛ́ m̀ ké nyɔ tɔ̀ɔ̀ ɓè kpéí po
NYƆ ÐÍƐ́ ƁÈ ÐÁ: “Ḿ cɛ̃ ɖɛ kpɔ̃ m̀ hwòɖòɛ. Ɔ se ní kpé ɔ jù nyɔ tɔ̀ɔ̀ ɓè se ɖɛ ḿ cɛ̃à kɛɛ mú ɖɛ̀ɓɛ̀ ní.”
M̀ wɔ̃́ìn gboò? Xwíníínɔ̀ nyɛ́ kɔ̃̀ jè m̀ wɔ̃́àìn gbo, mɔɔ m̀ seà gbo wɔ̃́ìn nyɛ́?
SṸÌN-XWÍNÍÍN
Wuɖu ɓéɖé kpé. À kɔ̃̀ à ké ɖɛ à cɛ̃ɛ kè ti à cɛ̃̀ìn nyɛ ɔ kè kà à nyuɛ cɛ̃ɛ kɛɛ jè hwìɖìi poìn kóɖó-kóɖó.
Ðɛ-kɔ̃in-kpa-kpa
Ðɛ́ mɔ̀ hwìè ɖíɛ́ ɓè kɔ̃̀ mú m̀ ɓɛ́ìn wuɖu kũ̀à mú nyùɛ̀n ɓɛ́ m̀ ké nyɔ tɔ̀ɔ̀ ɓè gbo kpá kɛ́?
Ðɛ́ mɔ̀ wuɖu ɓè m̀ mɔ́ ɓɛ́ m̀ ké dyí ɓàɖàìn nyɛ́?
Ðɛ́ ɓɛ́ìn à gbo kpáa ti séín ɓɛ́ à wuɖu ké dyíin nɔ̀mɔ̀ ɓɛ́ ɔ ké nyɔ tɔ̀ɔ̀ ɓè kpéí po kɛ́?
CƐ̃́ ÐƐ PÀÐÀ
Ðɛ́ ɓɛ́ìn à gbo kpáa ɓɛ́ à ké wuɖu nɔ̀mɔ̀ dyíin cɛ̃ kɛ́?
Cɛ̃́ ɖɛ ɓɛ́ìn m̀ gbo kpáa ɓɛ́ m̀ ké wuɖu gbà po-po dyí ɓàɖàìn nyɛ.
Dyé kà m̀ ɓɛ́ìn xwáɖá mɔ̀à nyɔ-nyɛ́nɛ́-zeɖe-zeɖe kɛɛ dyí ɓàɖàìn nyɛ.
Cɛ̃́ kà Jɛhova nyu ma gàa ɖò gbo kpáa ɓɛ́ ɔ ké ma gboò-gboò dyi táà kɛ.