CƐ̃́Ɛ́-ÐƐ̀ 13
Kà Ɓiè-Kpòò Ɓè Seà Jàà Kɛɛ Nyu Geɖepɔɔ Nyɛ́nɛ́ Dyíin Nyìnìɛ̀n Nyɛ
Ɔ jù ké Geɖepɔɔ dyi ɖɛ̀ɓɛ̀ìn-ɖɛ̀ɓɛ̀ìn jùìn, nìí, xwíníínɔ̀ nyɛ́ kɔ̃̀ jè ɓiè-kpòò ɓè ɓɛ́ wa ɖá wa mɔ̀à ɔ nyɔ ɓèɛɛ nyuà ɖɛ gbà pàɖà kɛ́? Ɔ xwíníín mɔ̀, wa mɔ̀ ɓiè-kpòò ɓè se jàà kɛ; ké wa nyìnììn Geɖepɔɔ nyɛ́nɛ́ dyíin. Xwɛ̀ wa nyu Geɖepɔɔ nyɛ́nɛ́ dyíin nyìnìɛ̀n nyɛ́? Xwɛ̀ ɔ hwòɖò nyu nìɛ̀ ɓáa jè dyíɛ́? Ké ɖɛ́ ɔ mu nyuùn ɓáa jè dyíɛ́?
1. Xwɛ̀ ɓiè-kpòò ɓè seà jàà kɛɛ nyu Geɖepɔɔ nyɛ́nɛ́ dyíin nyìnìɛ̀n dyììn ɖé waà tɛ̀mɛ̀ìn-ɖɛ̀ ɓèɔ̀ múɛ́?
Ɓiè-kpòò ɓè seà jàà kɛɛ ‘táà Geɖepɔɔ jààɔ̀ dyi, ké wa ɖú se dyí.’ (Wóɖómà 1:25) Ɔ hwɔìn-kà, ɓiè-kpòò pàɖà ní tɛ̀mɛ̀ìn Geɖepɔɔ nyɛ́nɛ́ɔ̀ wa nyɔ ɓèɔ̀. Kɛɛ, Baɓoɔ ɖá à kɔ̃̀ à ké Geɖepɔɔ nyɛ́nɛ́ɔ̀ kũ̀à mú nyùìn. (Wóɖómà 10:13, 14) Ðɛ gbà ɖò dyi kpáín, cɔ́cì-nàìn-nyɔ̀ ɖíɛ́ ɓè ɖá ɔ mɔ̀ Geɖepɔɔ mɔ́ɔ́-ɖɛ̀. Kɛɛ, ɔ mɔ̀ se. Geɖepɔɔ ní nyuɛ ɓɛ́ ɖɛ gbà ké kpá fɔɔ. (Zà Jĩ́ìn 1:13 wuɖuún.) Wìì-ɖɛ̀ɔ̀ mɔ̀, se ɓè ɓɛ́ ɓiè-kpòò ɓè tɔ́mɔ́ɛɛ ɖàa nyu, ké nyɔ ɓè ɖà Geɖepɔɔ dyi táà.
2. Xwɛ̀ ɓiè-kpòò ɓè seà jàà kɛɛ nyu Geɖepɔɔ nyɛ́nɛ́ dyíin nyìnìɛ̀n dyììn ɖé waà nyuu-ɖɛ̀ ɓèɔ̀ múɛ́?
Ɓiè-kpòò ɓè seà jàà kɛɛ ní kpɔ̃ nyɔ ɓè kà Jɛhova nyuà kɛ. Baɓoɔ ɖá ɓiè-kpòò ɓè seà jàà kɛɛ “nàmàùn ɓèɔ̀ deìn kɔ̃in, ké wa nyini ɖé dyɔún.” (Wɛ̀ɖɛ̀ɓèɖésĩ̀ɔ̀ 18:5) Ɓó zɔ̃ hɔ̃dɛ̀ɖɛ̀ pàɖà ɓè xwíníín nyɛɛ, ɓiè-kpòò ɓè ɖà gɔ̀mànà ɓè jè sɔ̃ún po, ké wa ɖà to ɓè hwìɛ̀ kpá, ké wa ɖàa nyu ké nyɔ pàɖà ɖà mɛ́ mɔɔ wa dè wa mɛ́ jè sɔ̃ xwíɖíi. Cɔ́cì-nàìn-nyɔ̀ ɖíɛ́ ɓè nɛ́ wa nyɔ ɓèɔ̀ kíɖíi ɓó wíɖí jè, ɓɛ́ wa ké cĩ́ kà bã-nyɔ̀ ɓè cĩ́à kɛ. Kpeɖe ɓè nìà kɛ tɛ̀mɛ̀ìn kà wa se Geɖepɔɔ dyí dyuò dyɛ̀ mɔ̀ùn, hwɛ̀ ḿ po níiń wa ké ɔ nyɔ ɓè jùɛ ɓɛ́ìn nyɛ.—Zà 1 Jɔ̃́ɔ́ 4:8 wuɖuún.
3. Xwɛ̀ Geɖepɔɔ hwòɖò nyu nìɛ̀ ɓá ɓiè-kpòò ɓè seà jàà kɛɛ jè dyíɛ́?
Ɔ jù ké ɖɛ ɓè ɓɛ́ ɓiè-kpòò ɓè seà jàà kɛɛ nyu kɛɛ dyi m̀ dyoɖoún po ní, nìí, nì hwòɖò ɖá xwɛ̀ Jɛhova hwòɖò nyu nìɛ̀ kɛ́? Ɔ ɖɛ̀ɓɛ̀ nyɔ ɓè mú dyɛo, kɛɛ ɔ kpáìn cɔ́cì-nyɔ̀ ɓè ɓɛ́ wa nyìnìàìn ɔ nyɛ́nɛ́ dyíin, ké wa kpɔ̃à wa nyɔ ɓèɔ̀ gbàà-kà kɛɛ dyoɖoún. Ɔ cɛ̃ɛ kà ɓɛ́ ɓiè-kpòò ɓè seà jàà kɛɛ mu mú gbɔùn, ké “wa se [wa] dyéɛ mu ɖe fɔɔ” kɛ. (Wɛ̀ɖɛ̀ɓèɖésĩ̀ɔ̀ 18:21) Geɖepɔɔ mu ɓiè-kpòò ɓè seà jàà kɛɛ jè dyi zĩ̀ìn kàùn.—Wɛ̀ɖɛ̀ɓèɖésĩ̀ɔ̀ 18:8.
ÐE ÐƐ MÚIN CÁ
Gmɔìn kà Geɖepɔɔ hwòɖò nyu nìɛ̀ ɓá ɓiè-kpòò ɓè seà jàà kɛ jè dyíɛɛ múin cá. Cɛ̃́ ɖɛ pàɖà ɓá ɖɛ ɓè ɔ ɖà nyuɛɛ jè dyí. Kɛɛ, m̀ mɛ cɛ̃́ xwíníín kɔ̃̀ jè ɖɛ ɓèa mɛ ɓɔ́à nyuɛ ɓɛ́ m̀ ké se Jɛhova dyí dyuò kɛɛ jè ɖekè.
4. Geɖepɔɔ hwòɖò se ɓiè-kpòò séín múin dèìn.
Nyɔ pàɖà poɛ jàà kà ɓɛ́ ɓiè-kpòò ɓè nì kà hwìè kò-kò ɓè ɓɛ́ wa séín mùìn ɖé Geɖepɔɔ gboɛɛ nìà kɛ. Kɛɛ, ɔ mɔ̀ jàà? Zà Máfíò 7:13, 14, wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Ðɛ́ Baɓoɔ cɛ̃ ɓá hwìè muà ɖé dɛ̀ ɓɛ́ nyɔùn ɓéɖéà fɛ̀ɛ̀ kɛ dyíɛɛ jè dyíɛ́?
Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.
Baɓoɔ ɖá ɓiè-kpòò pàɖà dè Geɖepɔɔ hwìɖìì?
5. Ɓiè-kpòò seà jàà kɛɛ se Geɖepɔɔ ɖɛ̀ɓɛ̀ìn-ɖɛ̀ɓɛ̀ìnɔ̀ tɛ̀mɛ̀ìn
Ɓiè-kpòò ɓè ɖà Geɖepɔɔ nyɛ́nɛ́ dyíin nyìnììn ɖé hwìè pàɖà ɓè mú. Hwìè nyìnììn dyíin ɖò cá kɔ̃̀ mú ɓɛ́ wa nyuɛ náa kɛɛ mɔ̀ wa to jè sɔ̃ún-po-po. Ɓɛ́ m̀ ké ɔ hwɔìn-ɖɛ̀ ɖò dyé ní, Po VÍÐÒƆ̀ kũ̀à gbo. Nìí, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.
Ðɛ́ cɔ́cì pàɖà ɓè nyu ma ɓó To Vɛ̀nɛ̀ Sɔ̃́ Nììnɔ̀ tiín nyɛ́?
Xwɛ̀ nì hwòɖò nyu nìɛ̀ ɓá ɖɛ wa nyu ma kɛɛ jè dyíɛ́?
Zà Jɔ̃́ɔ́ 13:34, 35 kè 17:16 wuɖuún. Nìí, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
Nì hwòɖò ɖá xwɛ̀ Jɛhova hwòɖò nyu nìɛ̀ ɔ jù ké ɓiè-kpòò ɓè dyi to jè sɔ̃ún po níɛ́?
Ɓiè-kpòò ɓè seà jàà kɛɛ ɖà ɖɛ gbà pàɖà ɓè nyu. Hwìè nyɛ́ ɓè kɔ̃̀ mú m̀ ɖàa dyé, ké ɓiè-kpòò ɓè se Geɖepɔɔ ɖɛ̀ɓɛ̀ìn-ɖɛ̀ɓɛ̀ìnɔ̀ tɛ̀mɛ̀ìn nyɛ́?
Ɓiè-kpòò ɓè seà jàà kɛɛ se Geɖepɔɔ ɖɛ̀ɓɛ̀ìn-ɖɛ̀ɓɛ̀ìnɔ̀ tɛ̀mɛ̀ìn
6. Geɖepɔɔ mɔ́ ɓɛ́ ɔ ké nyɔ ɓè póìn ɖé ɓiè-kpòò ɓè seà jàà kɛɛ xwaún
Zà Wɛ̀ɖɛ̀ɓèɖésĩ̀ɔ̀ 18:4 wuɖuún,a ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Xwɛ̀ ɔ nyu nì hwòɖòɔ̀ nyuɛ ɓɛ́ m̀ kéɛ dyí dyuò kà ɓɛ́ Geɖepɔɔ mɔ́ ɓɛ́ ɔ ké nyɔ ɓè ɓɛ́ ɓiè-kpòò ɓè seà jàà kɛɛ ɖà cá kɛɛ póìn nyɛ́?
7. Cɛ̃́ jàà Geɖepɔɔ jè kánáá pu
Ɓiè-kpòò ɓè seà jàà kɛɛ mɛ zàìn kà m̀ nyu Geɖepɔɔ dya gmɔ̀ɔ̀ kɛɛ dyíì? Poìn dyú ɖò ɓɛ́ ɔ se ɔ ɓà náún-po-wùɖù sɛ́ɖɛ́ìn dyíɔ̀ dyi kpɔ̃ kɛɛ jè hwìɖìi. Dyúɔ̀ sɔ̀ taà mú, ké ɔ cĩ́ se-dyí-sɛ́ɖɛ́ìn-kà. Ɓàɔ̀ se ɔ dyúɔ̀ nyuu-ɖɛ̀ ɓèɔ̀ hwòɖò múin dèìn. Xwíníínɔ̀ nyɛ́ kɔ̃̀ jè ɔ seà dyí sɛ́ɖɛ́ìn mu, ɓɛ́ nyɔ kéà ɓàɔ̀ kàìn ɓó dyúɔ̀ se-dyí-sɛ́ɖɛ́ìn-kà cĩ́ jèɔ̀ kɛ́?
Ɔ mu dyí sɛ́ɖɛ́ìn ɓɛ́ à ké Jɛhova kàìn, kè ɓɛ́ à ké ɔ jè cɛ̃́ɛ ɓɔ́ ɓó ɓiè-kpòò ɓè seà jàà kɛɛ nyuu-ɖɛ̀ ɓè jèè?
NYƆ ÐÍƐ́ ƁÈ ÐÁ: “Ḿ se Geɖepɔɔ jè mú ɖɛ̀ɓɛ̀, sepoɛɖe ɓiè-kpòò ɓè mɔ̀ nyɔ nyuɛ ké fũ̀à-fṹá pàɖà nìà kɛ̀.”
Kà nì hwòɖòɔ̀ nìì?
Xwíníínɔ̀ nyɛ́ kɔ̃̀ jè ɓiè-kpòò ɓè seà jàà kɛɛ nyuu-ɖɛ̀ ɓè mɛ ɓɔ́ kà à nyu Jɛhova dya gmɔ̀ɔ̀ kɛɛ dyí zàìn nyɛ́?
SṸÌN-XWÍNÍÍN
Ɓiè-kpòò ɓè seà jàà kɛɛ ɖà Geɖepɔɔ nyɛ́nɛ́ dyíin nyìnììn dyììn ɖé wa tɛ̀mɛ̀ìn-ɖɛ̀ ɓè se jàà kɛ kè waà nyuu-ɖɛ̀ nyìnììn kɔ̃in ɓè mú. Geɖepɔɔ mu ɓiè-kpòò ɓè seà jàà kɛɛ mú gbɔ̀ùn.
Ðɛ-kɔ̃in-kpa-kpa
Xwɛ̀ nì hwòɖò nyu nìɛ̀ ɓá ɖɛ ɓè ɓɛ́ ɓiè-kpòò ɓè seà jàà kɛɛ ɖà tɛ̀mɛ̀ìn kè ɖɛ ɓè ɓɛ́ wa ɖà nyuɛɛ jè dyíɛ́?
Xwɛ̀ Jɛhova hwòɖò nyu nìɛ̀ ɓá ɓiè-kpòò ɓè seà jàà kɛɛ jè dyíɛ́?
Ðɛ́ Geɖepɔɔ mu ɓiè-kpòò ɓè seà jàà kɛɛ bũ̀ nyuùn wɛ̃́?
CƐ̃́ ÐƐ PÀÐÀ
Cɛ̃́ hwìè sɔ̃́ ɓè kɔ̃̀ mú ɓɛ́ ɓiè-kpòò pàɖà ɓè po Geɖepɔɔ hwòɖò ɖé ɖieɛɛ jè.
“Ɓiè-Kpòò Séín Nì Dyúáɖòò? Wa Séín Mùìn Ðé Geɖepɔɔ Gboò?” (Ðúú-kɔ̃-cèè-ɖɛ̀)
Ðɛ́ kɔ̃̀ jè Jɛhova mɔ́ à kéà ɔ ɓiè ɖé nyɔ tɔ̀ɔ̀ ɓè hwìɛ̀ kɛ́?
“Ɔ Kpa Ðɛ Ɓɛ́ Nyɔ Ké Ɓiè-Kpòò Nì Páún Ðò Mú Nìì?” (Ðúú-kɔ̃-cèè-ɖɛ̀)
Píɖíì ɖòɛ̀ hwòɖò se ma ɔ ɓiè-kpòòɔ̀ múin dèìn. Kɛɛ ɖɛa seɛ ma nyu, ɓɛ́ ɔ ké ma jàà ɓá Geɖepɔɔ jè dyíɛɛ cɛ̃́ɛ ɓɔ́.
“Xwíníín Kɔ̃̀ Jè Píɖíì Ðò Sɔ̀ Ma Ɔ Cɔ́cìɔ̀ Múɛ” (Wóɖó Nyíɔún!, Fóɖó-Vĩ̀ 2015)
Ɓó zɔ̃ hɛ̃dɛ̀ɖɛ̀ pàɖà ɓè xwíníín nyɛɛ, ɓiè-kpòò ɓè ɖà se ɓè tɔ́mɔ́ kà ɓɛ́ Geɖepɔɔ se à jè gbo kɔ̃̀ ké ɔ mɔ̀ kànáà-ɖɛ̀ nyu-nyɔ̀ kɛ. Cɛ̃́ jàà ɓá se ɓèa tã jè dyí.
a Ɓɛ́ m̀ ké xwíníín kɔ̃̀ jè Wɛ̀ɖɛ̀ɓèɖésĩ̀ɔ̀ ɖáìn ɓiè-kpòò ɓè seà jàà kɛɛ Báɓèɖɔ́ùn-hwɔ̀ɖɔ̀-vɛ̀nɛ̀ kɛɛ dyí dyuò ní, dyé Mánáín-hwɛ̀ìn-wùɖù 1.