ˈCɩɛcɩɛ-kïbhëa 2

-Mɔ -lɛ bhä Lagɔ ˈnɩ?

-Mɔ -lɛ bhä -tiamö a Lagɔ ˈnɩ, a ˈyɩ bhä ɔ ˈnglɩ ˈnɩ? (1, 2)

ˈSaa nyɩ kpökpa ɔ ˈkä bhä ˈnɩ? (3)

Sɛ ɔ -wʋwʋsaa -wʋ ɔ ˈmö ˈnɩ? (4)

-A bhɛnɩ bhä -a ˈkä -lii mimii -nyɛ -glɛkwlɩɩ ˈsɔ ˈmö ghlɛnɩ -a ˈkä Lagɔ bʋbɔɔ -a? (5)

-Lii -mii ˈsɔ bhɛnɩ bhä yi -kanyɩ kwänɩ -a ˈkä Lagɔ yɩbhlɩnɩ ˈnɩ? (6)

1. -Lii a -bɛ ˈmö nɩkpa bʋbɔɔ. Maa sɛˈɛ Biblë -nyanyɩɛ ˈdɩ nɩɩ, -TIAMÖ a Lagɔ -bhlʋ ɔ -bhliɛ. Mɔɔ -lɛ zlɩ ˈmö -nyɛ dʋdʋ ˈwʋ ˈsɔ a -lii ˈwuë a wälanyɔ. -Mɔɔ -lanyɩɛ ˈpɩwʋ, zaa ɔ ˈyize -kpöö, ˈmö -a kää -a ˈkä bʋbɔ.—1 Kɔlɛɛtɩ a -nʋa 8:5, 6; ˈKlʋkälɩwɛlɩɩ 4:11.

2. Lagɔ kä bhɩzɩnglɩɩ a -bɛ, maa ɔ kä ɔ -tiamö a ˈnglɩ. Mɩɩ -lɛ ZOOVA. -Mä Biblë a -bɛ ˈmö, Lagɔ ˈa -tiamö a nglɩ ˈmö wa -sɛ -mä ˈn wa yiɛ bhɩzɩnglɩɩ -ATƲ -nyɛ LAGƆ ˈsɔ ˈmö zigbanɩ. Maa wa ˈcɛlɩɛ Biblë cuu, ˈnglɩ -yɩ lɛ Zoova -wʋa -mä ˈwʋ a 7000 a sɛ la!—Exode 3:15; Psaume 83:18.

3. Zoova kä kpökpa, maa aˈa nɩkpɛ a sɛ -wʋ. Sɛˈɛ Biblë gbää nɩɩ: “Lagɔ ˈwugɔmʋ ɔ glɩnɩɛ.” (Zaah 4:24) ˈWugɔmʋ ˈnɩɛ nɩkpɛ a sɛ -wʋ. Zaa wʋ ˈghïlinɔɔ zi tenyii a nʋ ˈwʋ. Nɩkpɛ ˈnɩɛ -bhlɛ tɛkäsɛ Lagɔ ˈylɩmö. -Mä zlɩ ˈmö -mä Zoova glɩɛ, maa ɔ bhɛnɩ ɔ ˈkä -lii ˈwuë ˈylɩmö. (Psaume 11:4, 5; Zaah 1:18) ˈSaa wa la bhä Lagɔ ˈa ˈwugɔmʋʋ ˈnɩ? Wa -kä Lagɔ ˈa ˈwugɔmʋʋ nʋʋ, ɛˈɛ -bhö nɩkpɛ, maa Lagɔ ˈa mötɛɛnɔ muë.—Psaume 104:30.

4. Sɛɛ Zoova wʋwʋnɩɛ ˈmö, -sɩbhä Biblë -sʋlʋnɩnyɩɛ. Mɛ -sʋlʋnɩnyɩɛ nɩɩ, Zoova nɩkpa ɔ -wa, ɔ zlɔnɩ ˈmö, ɔ ˈnɛɛ, ˈn ɔ tɛ ˈmö. (Deutéronome 32:4; Job 12:13; Isaïe 40:26; 1 Zaah 4:8) Sɛˈɛ Biblë -nyɩanyɩˈɛ ˈdɩ nɩɩ, Zoova kä ngäzɩdlɩ, ɔ ˈtatinɩ ˈnyinylolii a gbʋʋ yi, ɔ nɛnɩ dlɩzɛmö ˈn ˈɔ kpaanɩɛ dlɩ ˈmö. Sɛ yuë zʋä wa -lowluwa ˈklʋkpamö, -a nɩ yɩlɩ ˈɔ ˈzʋzʋsaa ˈwʋ -a ˈkä -sɩbhä ˈzʋmö.—Ɛfɛɛzɩ a -nʋa 5:1, 2.

5. -A -kä Lagɔ bʋbɔɔ yi, -a kä bhä -a ˈkä -glɛkwlɩɩ -nyɛ ˈtɛlɩtɛlɩɩ swii wa laa lagwɩ ˈsɔ dlɩ ˈmö -kokomïladigbï glu ˈpä -a kɩɩ bʋbɔ -a? -Nˈnn! (Exode 20:4, 5) Zoova lɛ nɩɩ, ɔ ˈyize -kpöö ˈmö -a kä -a ˈkä bʋbɔ. Maa ɔ -nyɛ nɩkpɛ -nyɛ käbölu ˈsɔ ˈnɩɛ ˈghïlinɔɔ ˈwʋ gbɔɔ. -Glɛkwlɩɩ ˈnɩɛ ˈmötɛɛnɔ kä yɩ -kanyɩ kwänɩ.—Psaume 115:4-8; Isaïe 42:8.

6. Sɛɛ -a ˈkä bhä sasɛ Lagɔ yɩbhlɩnɩ ˈnɩ? Tɛkädɔˈwʋ: -A nɩ ylɛɛ ˈɔ -bhɛbhɛlii ˈn -a nɩ pä ˈsaa yɩ -sʋlʋnɩnyɩɛ dlɩ ˈwʋ. Lagɔ ˈa ˈmötɛɛnɔɔ ˈkɔdʋʋ -nyɛ ˈɔ ˈnɛɛnɔɔ ˈkɔdʋʋ ˈsɔ, ˈmö ˈɔ -bhɛbhɛlii -tulanɩnyɩɛ ˈylimö. ˈƆ -bhɛbhɛlii ˈwuë ˈmö -mä -a yɩnɛ ˈɔ nɩkpa a -wawʋʋ ˈylɩmö. (Psaume 19:1-6; Ghlɔɔmö a -nʋa 1:20) ˈN ˈsɔnadɔˈwʋ -a käˈɛ nʋ nɩɩ -a ˈkɔ sasɛ yɩbhlɩnɩ nʋʋ, -aˈa nɩ ˈcɩɛ Biblë. -Mä ɛ ˈmö -mä ɔ -sʋlʋnɩnyɩɛ sasɛ ˈɔ -wʋwʋsaa. ˈƆ ˈsaa ɔ ˈkää nʋ -nyɛ, ˈsaa ɔ yɩbhä a nɩ -nʋ ˈsɔ, ˈmö ɔ -sʋlʋnɩnyɩɛ.—Amos 3:7; 2 Timotee 3:16, 17.

[ˈFoto yɔwʋ ˈa wɛlɩkïbhëa, kpʋ 5]

ˈƆ -bhɛbhɛlii -nyɛ -mä Biblë ˈmö ˈsɔ, -mä -a yɩbhlɩnɩɛ Lagɔ.