ˈCɩɛcɩɛ-kïbhëa 12

-Bhölɩbhölɛ -nyɛ dlu ˈsɔ nɩ kä a-a dɛ dɛsɛ

Sɛ -a ˈkä bhä -bhölɩbhölɛ ˈwʋ libhï ˈnɩ? (1) ˈN nɩkplokwë a -mä -sɛsʋ ˈnɩ? (1)

Sɛ Klɩtiɛwaa ˈa nɛmönɛmösaa tulanɩ bhä ˈylimö nɩɩ, wa kä -pälɛpälɛ a glɩglɛ dlɩ ˈwʋ ˈnɩ? (2)

Nɩma a ˈlɩbhälɩbhʋ nɛnɩ bhä -a? (3)

-Bhɛbhɛlii a -mii tulanɩ bhä ˈylimö nɩɩ -bhölɩbhölɛ ˈnyɛ nɩkpaa a dɛ dɛsɛ kä ˈnɩ? (4)

ˈSaa lɛ bhä Lagɔ ˈa gbaa dlu a dɔˈwʋ ˈnɩ? (5)

-A ˈkä anyɩ dlu ˈmö ˈpä -wʋ mö ɔ -mä ? (6)

1. Zoova mɔɔ glɩnɩɛ -bhölɩbhölɛ a ˈbhöönɩda. Lagɔ a ˈnglɩ ˈmö -lii ˈwuë yiɛ ˈpɩwʋ yi. (Psaume 36:9) -Mä Lagɔ a ˈyila ˈklʋ a dɔˈwʋ, -bhölɩbhölɛ dɛsɛ ɛ kää tenyii. -Sɩbhä ˈyu ˈpʋpɔ ɔ -wʋä -mä ɔ -da a ˈmlɩɩ a -bhölɩbhölɛ käˈmöˈɛ Zoova a ˈyila ˈklʋ dɛsɛ. Zaa, nɩkpɛ -kä -blipäsɛ -mä nɩkplokwë -sɛ, ˈnyɩnyloli a ˈkädɩ yɩ glɩnɩɛ Lagɔ a yila ˈklʋ a dɔˈwʋ.—Exode 21:22, 23; Psaume 127:3.

2. -Pälɛpälɛ a glɩglɛ dɛsɛ ɛ kää -tiamö a Klɩtiɛwaa a dɛ. -Sɩbhä a za, ˈwa bïdii -nyɛ ˈwa tomobï ˈsɔ, ˈmö wa ylɩɛ sasɛ ˈwʋ yɩ tɩa ˈku ˈlɩbhä a za. (Deutéronome 22:8) Lagɔ a -nʋa -nyɛ -bhölɩbhölɛ ˈnɩɛ nyɩasɛ ˈbhli, nzɩ wa kä ˈmäna li a za. Nza wa-a ˈbhlimöä ˈbhlibhle a kii ˈwuë yɩ kää gɔlwɩɩ gwë, ɛ nyɩ ˈmö wa dɩɛ -blipäsɛ -mumuë ˈjɩɩ yɔwʋ. ˈBhlibhile ɛ -kä gɔlʋ gwë, wa ˈnɛɛ kɛ zɩ.—Psaume 11:5; Zaah 13:35.

3. -Lii ˈwuë a ˈwälanyɔ a ˈyila ˈklʋ a dɔˈwʋ, nɩma a -bhölɩbhölɛ kämöˈɛ dɛsɛ tenyii. Klɩtiɛ bhɛnɩ ɔ ˈkä nɩmaa ˈlɩbhä ɔ kɩɩ li, ˈn ɔ ˈkä yɩ kwɩɩ ˈmöpälabanɩ ˈwʋ ˈzʋa. ˈN nɩmɛ nɩ -kä gu ˈmö -kä, ˈn ɛ -käˈɛ ɛ ˈkä nɩkpɛ ˈlɩbhä nʋʋ, ɔ bhɛnɩ ɔ ˈkɛ ˈlɩbhä. (Genèse 3:21; 9:3; Exode 21:28) Maa, -a ˈkä ˈbhlibhile ˈmö nɩma ˈlɩbhä, ˈn -a ˈkɩ -dizia, mii ˈnɩɛ nɛnɩ.—Proverbes 12:10.

4. Bhʋabhʋ, zla a päpʋ, tama, gëji a ˈnɩmänɩmʋ -nyɛ jɛlɩ a päpʋ ˈsɔ ˈnɩɛ Klɩtiɛwaa ˈwʋ ngwa. Ɛˈɛ -bhö nyɩasɛ, maa kïbhï ta yɩ kä ˈnglɩ ˈn yɩɛ nɛnɩ miɛ dɛˈɛ: (1) -Di yɩ zia, (2) Kpökpa ˈmö yɩ nyima, (3) ˈN yɩ plaa fɩ. (Ghlɔɔmö a -nʋa 6:19; 12:1; 2 Kɔlɛɛtɩ a -nʋa7:1) Yɩ kɛˈmö -sɛsʋ yi ˈmö ˈtɛɛ. Maa -a ˈkä Zoova dlɩ yɔwʋ nɛnɩmanɩ a za, -a kä -a ˈkɩ yi ˈtatinɩ.

5. Lagɔ a ˈyila ˈklʋ a dɔˈwʋ, dlu ˈkä ˈmöˈɛ dɛsɛ. Lagɔ lɛ nɩɩ, -mä dlu ˈmö -mä nɩkpɛ a -bhölɩbhölɛ -wʋä. Zaa dlu a lilie ˈnɩɛ nɛnɩ. Nɩmɛ ɛˈɛɛ wlu dɩɩ, ɛˈɛɛ sasɛ dlu ˈmö sa-aa a lilie ˈnɩɛ nɛnɩ. Nyɛmʋ nɩ -kä nɩmɛ wʋ lu, ˈn ɛ -kä ˈku, ˈn ɛ nɩ -käˈɛ gbokwë ˈyli ˈkunɩ, a nɩ tɛ li. ˈGbɩɔ ˈmö wa nɩ -kä nɩmɛ ˈlɩbhä, ˈn wa -käˈɛ nɩmɛ -kosu ˈmö ˈlɩbhää, -a -kä -a ˈkɛ li nʋʋ, ˈwʋ -a kää -a ˈkä päpanɩ, nzɩ -a kɛ ˈwlu -dɩ.—Genèse 9:3, 4; Lévitique 17:13, 14; Tietiewaa a wɛlɩɩ15:28, 29.

6. -A ˈkä -anyɩ dlu ˈmö ˈpä nɛnɩ bhä -a? -A nɩ ligba, Zoova lɛ nɩɩ, -a nɩ tɩ dlu a ˈke bhlʋ aˈbhë li ˈlɩlɩlɩ. Mɩɩ sɛɛ zɛmö nɩɩ, -a nɩ tɩ käbönɩkpɛ a dlu -anyɩ ˈmö ˈpä. ˈN -anyɩgäsɛ a -nʋ, -a nɩ -kʋʋ -mä -aa kpökpa ˈmö -sɛ ˈwë, -a nɩ tʋˈɛ -mä ˈsɔ ˈzʋnɩ. (Tietiewaa a wɛlɩɩ 21:25) -Tiamö a Klɩtiɛwaa naˈa ˈkä ˈwʋ nglu wa kʋä dlu ˈmö ˈpä. Maa, -dʋtɔlɔ ˈmö a gwäzɩ yiɛ dlu ˈmö -kä wa pää nɩkpa ˈmö, ˈmö wa ˈkä ˈwʋ nglu. Wa yɩbhä wa ˈkä -bhölɩ, maa waˈaa yɩbhä wa ˈkä Lagɔ ˈa gböö ˈklʋkpamösɛ wa ˈkä -bhölɩ a za.—Matie 16:25.

[ˈFoto yɔwʋ ˈa wɛlɩkïbhëa, kpʋ 25]

-A kä -a ˈkä Lagɔ dlɩ yɔwʋ nɛnɩmanɩ nʋʋ, -a nɩ tɩ dlu a ˈmö päpʋ, nʋnʋlizoku -nyɛ ˈfʋ a ˈbhlibhile ɛ ˈlɩbhää ˈku ˈsɔ kɛˈ zɩ.