ˈSaa -lɛ ɔ Lagɔ ˈa ˈKämanɔɔ ˈnɩ?

1. ˈSaa -lɛ ɔ Lagɔ ˈa ˈKämanɔɔ ˈnɩ?

-Ma zlɩ ˈmö, -mä Lagɔ ˈa ˈKämanɔɔ -wʋä. ˈKämanɔ ˈla, mʋʋ ˈkää mäˈä ˈpɩwʋ a ˈkämanɔɔ a ˈbhle ˈmö ˈplɩnɩ. ˈMö Lagɔ ˈkää ˈmö ghlɛnɩ, ɔ ˈkä ˈsaa ɔ yɩbhää nʋ, -mä zlɩ ˈmö -ɲɛ mäˈä dʋdʋ ˈwʋ ˈsɔ. Lagɔ ˈa ˈKämanɔɔ a ˈtɩtɩ, ˈtɩtɩ a -tɩtɩɛ. Lagɔ ˈa ˈKämanɔɔ yiaˈa -pa nɩkpaa -tiamö a ˈKämanɔɔ wa yɩbhää ˈɲɛ. Mʋʋ ˈkää ˈŋlɩ -kä ˈn -wa -wʋä mäˈä dʋdʋ ˈwʋ ˈkää -wamanɩ.​—-A zɛlɩ Daniel 2:44 -ɲɛ Matie 6:9, 10 ˈn Matie 24:14 ˈsɔ ˈmö.

ˈKämanɔɔ kä wʋ ˈkä ˈkämanɩɲɔ -kä. Zoova mɔɔ ˈzʋa ˈɔ yuu Zezwii, ˈɔ ˈKämanɔɔ a ˈKämanɩɲɔ ˈwʋ.​—-A zɛlɩ ˈKlʋkälɩwɛlɩɩ 11:15 ˈmö.

A nɩ ylɛ video ˈSaa -lɛ ɔ Lagɔ ˈa ˈKämanɔɔ ˈnɩ?

2. -Yɩ kä ɔ ˈŋlɩ ˈn Zezwii kä ɔ ɔ ˈkä nɩkpa ˈwuë -gömö ˈkämanɩ ˈnɩ?

Lagɔ ˈa yuu Zezwii, mɔɔ kää ɔ ˈkä nɩkpa ˈwuë -gömö ˈkämanɩ. Ɛˈɛ -bhö ɲɩasɛ, maa dlɩ zɛmö ɔ nɛnɩɛ, gbëaa ɔ kää ŋli. (Matie 11:28-30) Ɔ ˈtɛɛ ˈmö ɔ ˈkä nɩkpa kwänɩ. Ɛˈɛ -bhö ɲɩasɛ, maa -mä zlɩ ˈmö, -mä Zezwii ˈkää glɩ ɔ ˈkä mäˈä dʋdʋ ˈwʋ ˈkämanɩ. Lagɔ -sɔɔ glu, ɔ yiɛ -mä zlɩ ˈmö mö, ˈn ɔ yiɛ -lɛ Lagɔ a luukɛ ˈwʋ sɛ glɩ. (Ebleewaa 10:12, 13) ˈN Lagɔ yoo ˈKämanɔɔ ˈɲɛ.​—-A zɛlɩ Daniel 7:13, 14 ˈmö.

3. -Mɔ -ɲɛ Zezwii ˈsɔ ˈkä ɔ ˈkämanɩ ˈnɩ?

-Zɩkpaa wa laa “-wa sa-a -lɛ”, mʋa -ɲɛ Zezwii ˈsɔ ˈkää ˈkämanɩ, -mä zlɩ ˈmö. (Daniel 7:27) -Wa sa-a -lɛ a glaˈmö a tɛkänʋa, -mä ˈɔ tietiewaa -wa kɔɔ dlɩ ˈwʋ a glaˈmö, -mä Zezwii gbäzuëë ˈmö. Tɛɛnɩa -lɛ, Zoova gbäzɩ -bhlɛ ˈŋwlɩ -ɲɛ ɲɩbhɛlɩ ˈsɔ ˈmö, -wa kɔɔ dlɩ ˈwʋ, ɔ zuë -mä -wa sa-a -lɛ a glaˈmö. Zezwii a saa, wa -kä glu ˈwlʋʋ, zuzuku a kpökpa wa ˈkää -kä.​—-A zɛlɩ Zaah 14:1-3 -ɲɛ 1 Kɔlɛɛtɩ 15:42-44 ˈsɔ ˈmö.

Nɩkpa -zɩmö ˈkä ɔ -mä zlɩ ˈmö mö ˈnɩ? ˈMö Zezwii laa ‘waˈaa -zu.’ (Lwiikö 12:32) Wa -bhli nɩkpa a 144.000. Wa -ɲɛ Zezwii ˈsɔ, dʋdʋ ˈwuë ˈmö wa ˈkää -gömö ˈkämanɩ.​—-A zɛlɩ ˈKlʋkälɩwɛlɩɩ 14:1 ˈmö.

4. Zezwii tɛɛ ˈɔ ˈkämanɔɔ, ˈsaa ˈplɩ ɔ ˈwʋ ˈnɩ?

ˈYlʋba wa laa 1914 ˈmö, -lɩbhä Zezwii tɛɛ ˈɔ ˈKämanɔɔ Lagɔ ˈɲɔɔ.a Zezwii a tɛkälu ɔ -bhɛɛ mʋä nɩɩ, Sataa -ɲɛ ˈɔ zuzukuzokuu ˈsɔ, ˈmö ɔ ˈpää mäˈä dʋdʋ ˈwʋ. Sataa yiɛ teɲii ˈklɛ ˈpä nza ɔ -wʋɲɩɛ ˈklɩ ˈyɩa dɔˈwʋ. (ˈKlʋkälɩwɛlɩɩ 12:7-10, 12) Tɛɛnɩa ˈlɛ, ˈɲiɲloli yiɛ teɲii mäˈä ˈpɩwʋ zumanɩ. Tʋ, ŋɔmʋ, gwi ˈkädɩ, dʋdʋ -wʋ tɩtlɛnɩɛ, -mii ‘tulaa’ nɩɩ, Lagɔ ˈa ˈKämanɔɔ yiaˈa -pa mäˈä dʋdʋ ˈwʋ tɛɛ.​—-A zɛlɩ Lwiikö 21:7, 10, 11, 31 ˈmö.

5. ˈSaa Lagɔ ˈa ˈKämanɔɔ nʋ ɔ ˈnɩ?

Lagɔwɛlɩɩ a ˈcɩacɩʋ, ˈmö Lagɔ ˈa ˈKämanɔɔ ghlɛnɩɛ ˈmö ˈn wʋ -wamanɩɛ zɩˈɛ -gwlɩɩ ˈwuë -gömö a nɩkpa a -bʋbʋ ˈkɔdʋ. Nɩkpa a miniɲwɩ -wa yɔnɩɛ dlɩ ˈwʋ, ˈmö Zezwii ˈkää -gömö ˈkämanɩ. Lagɔ ˈa ˈKämanɔɔ yʋa ˈwʋ gwɩ, wʋ yi ˈpɩwʋzokwëa ˈyli bhɩa. Zaa nɩkpa ˈwuë -wa nʋä wa ˈkä Lagɔ ˈa ˈKämanɔɔ ˈmö a -li a -lii ghlɩ, wa kä wa ˈkä Zezwii ˈklʋkpamö ˈzʋ.​—-A zɛlɩ ˈKlʋkälɩwɛlɩɩ 7:9, 14, 16, 17 ˈmö.

ˈSaa Lagɔ yɩbhä a-a tɛkädɔˈwʋ ɔ ˈkä nɩkpa ˈwlu nʋ, ˈmö Lagɔ ˈa ˈKämanɔɔ ˈkää ˈylʋbö a 1.000 ˈmö -bhɛnɩ. Dʋdʋkpäta ˈwuë yi ˈbhlɩ a -bhlɩɩ zʋ. ˈGbëbhlenɩdɔˈwʋ, Zezwii yi ˈKämanɔɔ ɔ Dɩba Lagɔ ˈɲɔ a-a, yowʋ ˈɲɛ. (1 Kɔlɛɛtɩ 15:24-26) Nɩkpɛ -mɔ -n ˈkä ɔ Lagɔ ˈa ˈKämanɔɔ a ˈtɩtɩ ˈɲɛ ˈnɩ?​—-A zɛlɩ Psaume 37:10, 11, 29 ˈmö.