-A nɩ kä ˈslɛlɛ -mä -aa lagɔwɛlɩɩ bia libhoo ˈmö—-A nɩ kä nɩkpa -a ɲɛɛ ˈkwädlɩnɩ peliodikïa
ˈSaa kää ˈŋlɩ ˈn yɩ kää dɛsɛ: Nɩkpa a -bɛ -wa zɛlɩɛ -aˈa peliodikïa ˈmö ˈnɩɛ ˈyɩbhä wa -ɲɛ -abhʋa ˈsɔ ˈkä Biblë ˈcɩɛ. ˈWa lagɔgligbï mii nɛnʋä -kamä dlɩ yɔwʋ a zaa. Wa dɔˈwʋ waa -kamä ˈtɛɲɩ -kä wa ˈkä Biblë ˈcɩɛ. Maa sɛ wa zɛlɩɛ ˈkwädlɩnɩ -aˈa peliodikïa ˈmö a za, lagɔwɛlɩ a ˈtʋ kuë -kamä teɲii dila zɛmö plɛ. (1 Piɛ. 2:2) -Aˈa lagɔbɔgwɩ ˈmö a ˈkïbhë -mäma yɛ -kamä ˈwa dila kɛ zɩ, -li -mimi yɛ -kamä wa dɛ ˈmözigbonɩ. ˈN -a -kʋä ˈkwädlɩnɩ ˈylɩmö -yɩɛ mö, wa -yiɲɩ kuˈmö yɩbhlɩnɩ ˈn yi -yiɲɩɛ kwänɩ -a ˈkä ˈsaa kää wa dɔˈwʋ dɛsɛ -ɲɛ wa yɔwʋ a wɛlɩ ˈsɔ yɩbhlɩnɩ. Sɩbhä a dɔˈwʋ -a bhɛnɩ -a -ɲʋa ˈkä Bible a ˈcɩɛcɩʋ tɛɛ.
Sɛ -a ˈkää zʋ:
• ˈCwɩ ˈwuë ˈmö, ˈlibhï ˈtɛɲɩ ˈwʋ nzɩ La Tour de Garde -ɲɛ Réveillez-vous ! ˈsɔ -yɩ ˈwlʋä ˈlili ˈwʋ zɛmö, -n ˈkɩ nɩkpɛ ˈɲɛ. ˈCʋ ˈla -bhlʋ -kpɔ ˈmö, -n bhɛnɩ -n ˈkɔ zlɩ -mɛmɛ ˈmö ˈylɩmöä mö nzɩ -n ˈkä ˈkïbhë -mäma -a -wʋä -mä peliodikö -n ˈɲɔ a-a ˈmö, a wɛlɩ bhïla. -Lɛ a dɔˈwʋ, peliodikö ˈla a ˈmözɛlɩ ˈtʋ yɔ ˈlɩbhä. -N bhɛnɩ -n ˈkɔˈɛ lagɔbɔgwɩ -mimii -n -wʋä ˈcʋ ˈla ˈmö bia dɔˈwʋ a glaˈmö a -bhlʋ yɔwʋ tɩ. -Lii -yɩɲɩ wɛlɩɩ a bhïlaa ˈcɛlɩ yɩ ˈwuë.—ˈYlʋba wa laa 2014 a Zavie ˈmö a Ministère du Royaume a kpʋ 3 ˈklʋ ylɩɩ -lɛ.
• -N -kä nɩkpɛ ˈylɩmö möä yi, gïganɩ sasɛ -naɲɩ ˈwlu. Tɔ peliodikïa a ˈyize ˈɲɛɛ maa, -n -ɲɔɔ ˈsɔ nɩ -sɛ ˈdɩ, yɛla -lii ˈmö -n -ɲɔɔ ˈsɔ ˈkä bheyi ˈmö -wʋ nzɩ -n ˈkɔ kwänɩ, lagɔwɛlɩɩ a ˈtʋ kɔ ˈkwädlɩnɩ dlɩ zɛmö -wʋ a za.
• Sɛɛ -n ˈkää ˈmö ˈzʋzʋnɩ, -n -ɲɔɔ ˈsɔ ˈkä Biblë a ˈcɩɛcɩʋ tɛɛ, tɛlɩ ˈkwädlɩnɩ -sɩbhä sɛ. ˈN nɩkpa -n ˈɲɛɛ peliodikïa a glaˈmö a -nɔ -bhlʋ, -kaˈmö sɛ Biblë gbää kïbhë -mäma a dɛ nimï yɩbhää, -lɛmɔ -aˈa Biblë cɩa bɔgwɩ a glaˈmö a -nʋ -bhlʋ -wʋɲɩ ˈmö kïbhë ˈla a zɛmösɛna -wʋä nzɩ -n -ɲɔɔ ˈsɔ ˈkɩ -gömö -sɛsɛnɩ. -N -kɔɔ yɔwʋ ˈbhöä yi, ˈyɩbhänɔ -sɩbhä a kibhë -mäma wʋ nimï, nzɩ -n -kä wʋ ˈsɔ yini, a ˈka yɔwʋ ylɩ. ˈN -n -kä Biblë ˈmö ghlɛnɩ, ɛ -käˈɛ -aˈa Biblë cɩɛ bɔgwɩ a glaˈmö a -nʋʋ glɩnɩ, -n -ɲɛ nɩkpɛ ˈsɔ -kä ˈkwädlɩnɩ lagɔwɛlɩ bhïla, ɛ yi ˈtɛɲɩ ˈtikëyi ˈmö glɩnɩ -kë, Biblë -n -wʋɔ daˈa ˈcɩa dɔˈwʋ. -N yɛ ɔ tɛkäsɛ blosu wa laa Lagɔ ˈa ˈtɩtɩ a -tɩtɩɩ! nɩkpɛ ˈɲɛɛ -a? ˈN -n -ɲɔɔ ˈsɔ yɛ bhä tɛkäsɛ -lii ˈmö yɛla Biblë a ˈcɩɛcɩɛ dɔˈwʋ -a? Video wa laa ˈSaa kä bhä ˈŋlɩ ˈn a kä ɔ a ˈkä Biblë ˈcɩɛ ˈnɩ? -ɲɛ video wa laa Sɛ Biblë a ˈcɩɛcɩʋ ˈplɩplɩnɩɔ ˈmö ˈnɩ?, -n kɩ bhä tɛkäsɛ nɩkpɛ ˈylimö tulanɩ -a? Tɛkädɔˈwʋ ɔɔɔˈa -kamä yɩbhä ɔ ˈkä Biblë ˈcɩɛ, maa yɩbhlɩnɩ sɛ nɩɩ, -lii bhɛnɩ yɩ ˈkä ˈmö zigbonɩ. Yɩ ˈnaa ˈkä bhä kɛ -gä -a, -n -kä wʋ ˈsɔ -lii ˈmö yɛla?
ˈDɩmözʋwɛlɩɩ -a ˈkää ˈcʋ nɩ ˈmö -gänɩ:
• Nɩkpa -n bhɛnɩɛ -n ˈkä ˈkwädlɩnɩ peliodikïa ˈɲɛ, ˈcɛlɩ ˈwa ˈŋlɩ. ˈƝʋa ˈcʋ ˈmö a peliodikïa ˈn ˈɲʋä ˈdɩ nɩɩ, -n yuë ˈcʋ -muˈla ˈmö a -nɩɩ -lɛmö.