ˈCɩɛcɩɛ-kïbhëa 9

Lagɔ a -nʋa kä wa ˈkä ˈwlɩlɩ -wʋ

ˈSaa kä bhä ˈnglɩ ˈn -a ˈkä -lii ˈwuë ˈmö a dɔˈwʋ ˈwlɩlɩ -wʋ ˈnɩ? (1)

ˈSaa -lɛ bhä ˈwlɩlɩ -wʋwʋɛ: -Mä -aˈa lagɔbʋbɔsaa ˈmö ˈnɩ? (2) -mä -aˈa nɛmönɛmösaa ˈmö nɩ? (3) -mä -aˈa dlɩpäsaa ˈmö ˈnɩ? (4) -mä -aˈa -wʋwʋsaa ˈmö ˈnɩ? (5)

Wɛlɩkïbhïzoku a -mii -a kä bhä -a ˈkä kɛˈmö -sɛ ˈnɩ? (6)

1. Lagɔ Zoova -wʋ ˈwlɩlɩ, ɔ -wʋ ˈɔ dɛ. Zaa ɔ yɩbhä nɩɩ, ˈɔ -nʋa nɩ -wʋ ˈwlɩlɩ ˈyize -mä ˈwa Lagɔbʋbɔsaa ˈmö, -mä ˈwa nɛmönɛmösaa ˈmö, -mä ˈwa dlɩpäsaa -nyɛ ˈwa -wʋwʋsaa ˈmö ˈsɔ. (1 Piɛlɩ 1:16) Nɩkpɛ kä ɔ ˈkä Lagɔ a ˈyila ˈklʋ a dɔˈwʋ ˈwlɩlɩ -wʋ nʋ, ˈyli yɔwʋ ɔ ˈkää tɛɛmanɩ. Ɛˈɛ -bhö nyɩasɛ, maa -sɩkaa a zɩkpa -a -wʋä ˈmö ˈnɩɛ ˈwlɩlɩ -wʋ. -Sɩbhä a za -a -nyɛ -aa ˈnyinylolii a mötɛɛnɔ ˈsɔ kää tʋ gwɩ. Maa swɩ nɩ -tɩnyɩ yɔwʋ ˈkunɩ.

2. ˈWlɩlɩ -wʋwʋɛ -mä -aˈa lagɔbʋbɔsaa ˈmö: -A kä -a ˈkä Zoova bʋbɔ nʋʋ, -a nɩ panɩ ˈfʋ a lagɔgligbïï -nyɛ yɩ ˈcɩawɛlɩɩ ˈn yɩ päpägböö ˈsɔ -gömö. -A kä -a ˈkä ˈfʋ a lagɔgligbïï ˈmö ˈwlʋ. A nyʋa ˈsɔ nɩ tɩˈɛ bhʋ -bhlʋ yɩ. (2 Kɔlɛɛtɩ a -nʋa 6:14-18; ˈKlʋkälɩwɛlɩɩ 18:4) ˈN -a nɩ -kä Lagɔ a dɔˈwʋ gbëa ˈcɩɛ ˈwëë, -a nɩ ˈnɛmanɩ -anyɩ ˈwʋ, nɩkpa -mumuë -tɩnyɩa ˈwa yiowɛlɩ ˈmö dulanɩ.—2 Zaah 10, 11.

3. ˈWlɩlɩ -wʋwʋɛ -mä -aˈa nɛmönɛmösaa ˈmö: Zoova yɩbhä nɩɩ, ˈɔ -nʋa nɩ nɛmö ˈkwädlɩ lagɔsɛ. (1 Piɛlɩ 2:12) -A -bhɛbhɛlii ˈwuë yɩ yi zizaa a bhë -këë, ɔ ˈyila ˈklʋ yɩ pöä. (Ebleewaa 4:13) -A kä -a ˈkä mäˈä ˈpɩwʋ a -lizoku -nyɛ ˈngwlɩ -nyɛ nyɩbhɛlɩ ˈsɔ a sɛsɛnɩ sɛsɛnɛ kɛˈmö -sɛ.—1 Kɔlɛɛtɩ a -nʋa 6:9-11.

4. ˈWlɩlɩ -wʋwʋɛ -mä -aˈa dlɩpäsaa ˈmö: -A -kä kwädlɩ -li a -lii dlɩ ˈwʋ pää, -aˈa nɛmönɛmösaa yi ˈwlɩlɩ -wʋ. (Filiipö a -nʋa 4:8) Maa ˈn -aˈa dlɩ ˈwʋ pää -lii -kä zokuu glɩnɩ ˈyize, -lizoku -a ˈkää nʋ. (Matie15:18-20) ˈBhlibhli -lii ˈwuë yɩ ˈkää -aˈa dlɩpäsaa fɩ päla, -a nɩ tɩ kɛ zɩ. -A -kä ˈkwädlɩ lagɔwɛlɩɩ ˈcɩɛ, -aˈa dlɩpäsaa yi ˈwlɩlɩ -wʋ.

5. ˈWlɩlɩ -wʋwʋɛ -mä -aˈa -wʋwʋsaa ˈmö: Lagɔ a tietiewaa wa glɩnɩɛ za, Klɩtiɛwaa a ˈmöpälabanɩ -nyɛ ˈwa kpökpöö ˈsɔ, kä yɩ ˈkä ˈwlɩlɩ -wʋ. -A -kä ˈkwlɛ yɔwʋ ˈbhöö, -A kä -a ˈkä kɛ wɔlʋ. -A -käˈɛ lile kɛ zɩɛ yie, -a kä -a ˈkä kɛ wɔlʋ ˈwë, nzɩ -a ˈkä li. ˈN a nɩ ˈkwlɛ yɔwʋ ˈmö nɩ dɛ -kä, a -kä ˈkwlɛ yɔwʋ möä, a kä a ˈkä ˈbhlu, nzɩ a -kä zɛmö bhɩɛ ˈwë, a ˈkä -lɛ ˈwʋ wɛnɩ. (Deutéronome 23:12, 13) -Wʋwʋsa ˈmö a ˈwlɩlɩ -wʋwʋɛ mɛ kä ˈnglɩ ˈn gu nɩ ˈlɩbhää nɩkpɛ. -Sɩbhä a za Klɩtɩɛ a -budu ˈmlɩ -nyɛ ˈwʋ yɔwʋ ˈsɔ, kä wʋ ˈkä ˈwlɩlɩ -wʋ. Dɛ ɔ glɩɛ a -nʋa kä wa ˈkä ˈɔ -buduu ˈnine ˈmö ˈpänɩ.

6. ˈWlɩlɩ -wʋwʋɛ -mä -aˈa bhïlawɛlɩ ˈmö: Lagɔ a -nʋa kä wa ˈkä ˈkwädlɩ gbëaa bhïla. Ɛˈɛ -bhö nyɩasɛ, maa yiowaa ˈnɩɛ -mä Lagɔ a ˈPɩwʋlelea ˈwʋ ˈbhle -kä. (Ɛfɛɛzɩ a -nʋa 4:25; ˈKlʋkälɩwɛlɩɩ 21:8) Klɩtiɛwaa ˈnɩɛ wa ˈkä wɛlɩzoku ngli -kä. Waˈa -ɔɔzʋkäwɛlɩ ˈyukwli -pʋnɩ, ˈn wa ˈnɩɛ -sɛmö. Ɛ yi -mä libhoo ˈmö oo, ɛ yi -mä -sukumö ˈmö oo, -mä ˈwa glɩ da ma oo, nɩkpa ˈwuë yi sɛ nɩɩ, ˈwa nglii a wɛlɩ ˈwuë ˈwlɩlɩ yɩ -wʋä.—Ɛfɛɛzɩ a -nʋa 4:29, 31; 5:3.

[ˈFoto yɔwʋ ˈa wɛlɩkïbhëa, kpʋ 18, 19]

Lagɔ a -nʋa kä wa ˈkä -mä -lii ˈwuë ˈmö a dɔˈwʋ ˈwlɩlɩ -wʋ.