Zelemii bhïla a-a ˈkwädlɩ Zoova a dɛ

Zlɩ -mɛmɛ ˈmö -kä yie, nɩkpa ɲɩɛnɩ wa ɲɩɛnɩɲɩɛ ˈn -mumuë aˈbhë ˈpänɩɲɩɛ ˈklɛ yɔwʋ -a -kʋä Zoova ˈa wɛlɩ ˈɲɛ dɔˈwʋ -wʋ. Yɩ -yiɲɩ -mä ˈsunɩ -a yi Lagɔwɛlɩ a biabiu ˈnigba. -Sɩbhä a -lii -nɩmö bhä -bhlɛ tɛkäsɛ ghlɩ -a?— Biblë mɛɛ -ɲɩaɲɩɛ ˈdɩ nɩɩ, ɲɛgbayu -bhlʋ -ɔ -wa a-a Zoova teɲii, mɔɔ yɩbhä a-a ɔ ˈkä ˈɔ wɛlɩ a biabiu kɛˈmö -sɛ. ˈMö wa la a-a Zelemii. -A nɩ ˈcɩɛ saa ɔ nʋä.

Zelemii -lɛ a -bhlɛ ɲɛgbayu ˈn Zoova yɔ a-a nɩkpa ˈwʋ tie, ɔ ˈkuë ˈdɩ ˈɲɛ nɩɩ, wa nɩ -sɛ ˈwa -lizoku kɛˈmö. Yɩ ˈtɛɛnɩ a-a Zelemii kɛˈmö ˈn ŋanɔ ˈlɩbhɔɔ a-a. Ɔ yi a-a Zoova ˈdɩ ˈɲɛ, ɔ ˈlɛ naa: ‘Nˈn-ä sɛ n ˈkä gbä -yi. ˈYu n glɩnɩɛ -bhlɛ.’ Maa Zoova lɛ nɩɩ: ‘ˈTɩ ŋänɩ, n -yimö kwänɩ.’

ˈN Zelemii yi a-a nɩkpa ˈdɩ ˈɲɛ nɩɩ, wa ˈnɩ ˈwa -lizoku kɛˈmö -sɛ, Lagɔ yuë pinɩ. -Na dɔˈwʋ, nɩkpa -pʋnɩ a-a bhä Zelemii ˈyukwli -a?— Nˈnn. Ɲɩɛnɩ wa ɲɩɛnɔɔ, wa yɔɔ teɲii ˈklɛ yɔwʋ ˈpänɩ. -Mumuë aˈbhë yɩbhä a-a wa ˈkɔ ˈlɩbhä ɔ ˈkä ˈku! –Na dɔˈwʋ, sɛ Zelemii ˈpä a-a bhä dlɩ ˈnɩ?— Ŋanɔ a za ɔ yi a-a nɩɩ: ‘n na ˈkä a-a Zoova ˈa wɛlɩɩ bhïla ˈlɩlɩlɩ.’ Maa Zelemii -sɛ a-a bhä -tiamö Zoova ˈa libhoo kɛˈmö -a?— Nˈnn ɔ ˈnʋä kɛˈmö -sɛ. Ɔ -wa a-a teɲii Zoova zaa, ɔˈɔ ˈɔ libhoo kɛˈmö -sɛ. Zelemii ˈnɩ a-a Zoova ˈa libhoo kɛˈmö -sɛ zaa, Zoova yɔɔ ˈwʋ gwɩ.

ˈYlɩ -bhlʋ ˈmö, kpʋkpʋwaa yɔɔ a-a ˈbhʋkwa ˈkäda ˈmö ˈpä a yie bädɩ ˈwʋ. -Ɔɔˈa lile -ɲɛ ˈɲu ˈsɔ yɔwʋ -kä. Nɩkpa ˈla yɩbhä a-a nɩɩ, ɔ nɩ ˈkunɩ -mä ˈbhʋkwa ˈla ˈmö. Maa Zoova yɔɔ a-a kwänɩ ɔ yiɛ ˈpʋpʋɛ ghlɩ!

ˈSaa -a ˈcɩɛ ɔ Zelemii a dɛ ˈnɩ?— ˈTɛɲɩ -mɛmɛ ˈmö ɲanɔ ˈlɩbhɔ a-a, maa ɔ bhïla a-a Zoova a wɛlɩ ˈyize. -N -kä Zoova ˈa wɛlɩ bhïla dɔˈwʋ -wʋ, -mumuë ɲɩɛnɩ ˈmö ˈn -mumuë ˈpänɩmöä ˈklɛ yɔwʋ. Yɩ -yimö -kamä dlɩ ˈyli kla, ŋanɔ -yɩmöˈɛ -kamä ˈlɩbhä. Bhïla Zoova ˈa wɛlɩɩ ˈyize, sɛ ɔ kwänɩ a-a Zelemii ɔ -yimö -sɩbhä kwänɩmö.