Timotee yɩbhä a-a ɔ ˈkä nɩkpa kwänɩ

Ɲɛgbayu a -mɔ nɩkpa a kwänɩkwänɛ -bhö a-a ˈmäna ˈwʋ, ˈmö Timotee glɩnɩ a-a. Ɔ mö a-a -mä -glwɩ a -bɛ ˈmö ɔ ˈkä a-a nɩkpa kwänɩ a za. -Sɩbhä a za, ˈɔ -zɩkpa ˈmäna ˈwʋ a -bhö a-a. -N yɩbhä bhä -n ˈkä ɔ -gömö a wɛlɩ ˈnʋ -a?—

-Mä -glɔ wa laa Lisɩtlɩ ˈmö -mä Timotee ˈghlimanɩ a-a. Dɛ ɔ glɩnɩ a-a -bhlɛ ˈyu ˈtikëyi, ˈɔ -da ˈkɔdɔ Loyiisɩ -ɲɛ ˈɔ -da Eniisɩ ˈsɔ yɔ a-a Zovaa ˈa wɛlɩɩ ˈcɩacʋ ˈtɛɛ. Timotee ˈzʋä ˈkɔdɔ, ɔ yɩbhä a-a ɔ ˈkä -mumuë kwanɩ wa ˈkä Zoova yɩbhlɩnɩ.

Timotee ˈzʋ a-a ɲɛgbayu ˈn Pɔɔlʋ yɔ a-a ˈdɩ ˈɲɛ nɩɩ, ɔ -ɲɔ ˈsɔ wa ˈkä -mä -gwlɩ ˈmö lagɔwɛlɩ bia ˈmö. Timotee lɛ nɩɩ: ‘Nn!’ Ɔ bhɩɔ ˈmö ɔ -ɲɔ ˈsɔ wa ˈkä mö wa ˈkä -mumuë kwanɩ.

Timotee -ɲɛ Pɔɔlʋ ˈsɔ wa yiɛ -mä Masedʋanɩ a -glɔ wa la Tesalonikö ˈmö mö. Wa ˈkä -mä -glɔ la ˈmö mö a dɔˈwʋ, ˈyio -vʋkwa wa bhlinɩɛ kplɩ ˈyli -këë ˈn wa yi a-a bhäla bato ˈwʋ ˈlibhï. Wa ghlɛɛ -mä, wa yiɛ nɩkpa a -bɛ kwänɩ nzɩ wa ˈkä Zoova yɩbhlɩnɩ. Maa nɩkpa -mumuë ˈklɛ ˈwʋ yɩ -bhöä a-a zaa, wa yɩbhä wa ˈkʋä -lizoku ˈwlu nʋ. Pɔɔlʋ -ɲɛ Timotee ˈsɔ wa yiɛ -mä -glɔ la ˈmö ˈbhöö ˈn wa yiɛ käbö bɛyɩ lagɔwɛlɩɩ biaa mö.

ˈCwɩyie ˈplɩɛ, ˈn Pɔɔlʋ yiɛ Timotee -mä Tesalonikö tie ɔ ˈkä lagɔdaayuëa -wa -wʋ -mä ˈwʋdɩdɩɛ mö. Ɔ ˈkä -mä -glɔ ˈla ˈmö ˈwlu -sɩbhä a dɔˈwʋ ŋanɔ ˈwʋ yɩ -bhöä za, ɔ ˈnɩa -mä dlɩ ˈzʋä ɔ ˈnaa ˈkäa -mä mö. Timotee, ˈɔ lagɔdaayuë a za dlɩ libho a-a nza ɔ sɩbhä -mä ˈwlu. Ɔ ˈbhöä -mä, ˈtɩtɩ a -tɩtɩ ɔ -lɛmö a-a Pɔɔlʋ. Tesalonikö a -nʋa nɛnɩa ˈmö ˈtɩɩ.

Timotee -ɲɛ Pɔɔlʋ ˈsɔ, wa yi a-a ˈgämö libhoo nʋnɩ ˈylʋbö a -bɛ ˈmö. ˈYlɩ -bhlʋ ˈmö ˈn Pɔɔlʋ yi a-a ˈcɛlɩ nɩɩ, Timotee mɔ -lɛ nɩkpɛ a nɩkpɛ ɔ bhɛnɩɛ ɔ ˈkä tie, ɔ ˈkä lagɔzɩkpö ˈmö a -nʋa kwänɩ. Timotee -wa a-a Zoova -ɲɛ nɩkpa ˈsɔ.

-N -wa bhä nɩkpa -a, -n yɩbhä ɔ -n kuë kwänɩ nzɩ wa ˈkä Zoova yɩbhlɩnɩ -a?— -N -kä -sɩbhä zʋä, -naˈa zɩkpa yi teɲii ˈmäna ˈwʋ -bhö, Timotee a na a sa!