ˈPƖƆ 4
Sɛ wa ˈkää moni ˈmö -susunɩ
“-Wa zʋnɩɛ ˈdɩ ˈwʋ, ˈwa nʋnʋlii ˈwʋ yɩ ˈplɩɛ sasɛ.”—Proverbes 20:18
-Aa ˈwuë, moni ˈmö -a tɛlɩɛ sɛ -a ˈkä -aˈa ˈligbï ˈmö a -nʋa ˈyli ˈzʋnɩ a za. (Proverbes 30:8) Zaa, “moni glɩnɩ -lu a -mu gwɩɲɩɛ ˈwʋ.” (Ecclésiaste 7:12) ˈLuwli -ɲɛ ŋlɔ ˈsɔ ˈkä moni a gbʋ bhïla ˈmö yɩ ˈtɛɛ, maa a nɩ tɩ moni ˈyi ˈtatinɩ ɛ ˈkaɲɩ wɛlɩ jijoˈwʋ ˈzʋ. (Ɛfɛɛzɩ 4:32) ˈLuwli -ɲɛ ˈŋlɔ ˈsɔ kä wa ˈkä dlɩtɛɛnɩtɛnɩ nzɩ wa ˈkä ˈmö ˈnʋnʋnɩ wa -kä moni plɩɛ yi.
1 ˈSAA A KÄÄ A ˈKÄ NƲ, A NƖ ˈPÄNI SASƐ DLƖ KƐ
SƐƐ BIBLË GBÄÄ: “A glaˈmö a nɩkpɛ -kä -budu ˈkɔdʋ ˈsɩbhää yii, sɛ ɔ zʋä, a -yi -sɩbhä. Sɛ ɔ glɩɛ ˈtɩɩ, moni ɔ ˈkää plɩɩ, ˈn ɔ bhëgee, ˈsaa ɔ kää -käa -zu a za” (Lwiikö 14:28) Sɛ a ˈkää ˈa moni plɩ a kä a ˈkɩ ˈgämö yɔwʋ ylɩnɩ. (Amos 3:3) ˈSaa a ˈkää pɩa a dɔˈwʋ a nɩ ˈzʋni yɔwʋ ˈn moni -zɩmö a ˈkää plɩɩ, a nɩ zʋnɩˈɛ ˈgämö yɩ wɛlɩ yɔwʋ. (Proverbes 31:16) A kä moni zaa, a nɩɩ klɩpaa a kä -lu a -mu ˈnɩɛ dɛsɛ -kä pɩa. A nɩ ˈtɛmanɩ ˈyli yɔwʋ a tɩa gɔgbʋ ˈwʋ ˈlibhï. ˈA moni a kää a ˈyize ˈmö a nɩ plɩ.—Proverbes 21:5; 22:7.
ˈSAA A BHƐNƖƐ A ˈKÄ NƲ:
ˈCʋ ˈmö a moni a ˈkä a-a plɩ -kä ˈwʋ tʋʋ, ˈsaa a kää ˈa moni ˈla ˈwʋ nʋʋ, a ˈsɔ -kpɔ a nɩ zʋni yɔwʋ.
ˈN a -kä sɛ yɩbhlɩnɩ nɩɩ ˈa moni ˈnaɲɩɛ kɛ zʋnɩɩ, ˈsaa a gbää a ˈkä pɩa, a nɩ -sɛni ˈwʋ. Aɲɩgäsɛ a nɩ pi ˈa lilea, maa a nɩ tɩ lilea wa pää -mä ˈpɩwʋ pɛlʋ ˈa möni ˈmö ɲimanɩ.
2 A NƖ TƖ YLƲ NƲNƲNƖ MAA A DLƖPÄSA NƖ ZLƆNƖ ˈMÖ MONI A DƆˈWƲ
SƐƐ BIBLË GBÄÄ: “N ˈkä -Alowli Lagɔ a ˈyila ˈklʋ ˈmö zlɔnɩ a gbʋ a ˈyize mʋʋ -nɩɩɛ plɛnɩ, maa n ˈkä nɩkpa a ˈyila klʋ ˈmö zlɔnɩ a gbʋ wʋ plɛnɩmöˈɛ.” (2 Kɔlɛɛtɩ 8:21) Moni -n ˈlɩbhää ˈn -mɛ -n plɩɛ a dɔˈwʋ, tɩ -naˈa -lɛglɩɲɔ ylʋ nʋ.
-N -kä -n ˈka moni -lu wʋ nʋ nʋʋ, -naˈa -lɛglɩɲɔ kä ɔ ˈkä sɛ -yi. (Proverbes 13:10) Sɛ a ˈkää moni köbhä a dɔˈwʋ a -kä ˈkwädlɩ yɩ wɛlɩ bhïla, ˈa jijoˈwʋ ˈtɩɩglɩnɔɔ yi -lɛ -wʋ. Moni -n lɩbhää, tɩ dlɩ ˈpä nɩɩ, -na ˈyize a -nɛɛ, maa yɩbhlɩnɩ sɛ nɩɩ -naˈa ˈligbë ˈmö a -nʋa ˈwuë a -nɛɛ.—1 Timotee 5:8.
ˈSAA A BHƐNƖƐ A ˈKÄ NƲ:
Moni -zɩmö a bhɛnɩɛ bhʋlʋbhlʋ a ˈkä plɩ -ɛɲɩ dɔˈwʋ aa -kä a ˈkä ˈdɩ ˈɲɛɲɛnɩ, a nɩ ˈnʋnʋnɩ ˈmö ɛ dɔˈwʋ.
A nɩ tɩ -kʋnɩ wɛlɩ ˈkaɲɩ ghlɩ ˈwë a ˈkäa ˈbhäla moni a gbʋ bhïla.