ˈPƖƆ 9
A -ɲɛ ˈa ˈligbë ˈmö a -nʋa ˈsɔ nɩ bʋbɔɔ Zoova
“Lagɔ mɔɔ -bhɛɛ zlɩɩ, mɔɔ -bhɛɛ dʋdʋʋ, zaa, ˈmö a nɩ bʋbɔ.”—ˈKlʋkälɩwɛlɩɩ 14:7
Biblë kä ˈpäpägböö a -bɛ ˈmö -yɩ bhɛnɩɛ yɩ ˈkaɲɩ kwänɩ a -ɲɛ ˈa ˈligbë ˈmö a -nʋa ˈsɔ, ˈmö a ˈcɩɛ -mä blosu ˈlɛ ˈmö. Zoova yɩbhä nɩɩ, a nɩ -wʋ ˈmäna ˈmö. Ɔ -lɛ nɩɩ, ɔ bʋbɔbʋbʋ a gbʋ kaɲɩ plɛnɩ, “-lɛ a dɔˈwʋ, ɔˈbhë ɔ yeaɲɩ -li ˈla ˈwuë ˈɲɛ.” (Matie 6:33) Ɔ yɩbhä -tiamö nɩɩ, a nɩ zʋ ɔ bhɛya. Sɛ a ˈkää ˈzʋ nzɩ a -ɲɛ Lagɔ ˈsɔ a bheyi ˈkä ˈyukusɛ möö, -sɩbhä a nɩ ˈzʋ. Nɩkpɛ ˈkä Lagɔ a bheyi glɩnɩ a dɔˈwʋ, -jɔlʋ ˈkɔdʋä.—Matie 22:37, 38.
1 A NƖ ˈTUMANƖ A -ƝƐ ZOOVA ˈSƆ A ˈWƲ -WƲNƐ ˈMÖ
SƐƐ BIBLË GBÄÄ: “‘N yi a dɩba glɩnɩ, a yi na ˈyuë glɩnɩ,’ saˈa -sɩbhä Zoova gbää.” (2 Kɔlɛɛtɩ 6:18) Lagɔ yɩbhä nɩɩ, a nɩ ˈzʋ ɔ bhɛya ˈkädɩ. Bhibhebhibhiuu mu ˈkaɲɩɛ kwänɩ. Zaa, Zoova yɩbhä nɩɩ, “bhibhebhibhe dɔˈwʋ swɩ nɩ taɲɩ yɔwʋ ˈkunɩ.” (1 Tesaloniikö 5:17) A dlɩ zɛmö a wɛlɩ ˈn -lii -yiɲɩ gbʋ plɛnaɲɩɛ, a nɩ ˈɲɔɲɩ maa ɔ yeaɲɩ yɛˈmö tɩtasɛ ˈyukwli -pʋnɩ. (Filiipö 4:6) -N -ɲɛ -naˈa ˈligbë ˈmö a -nʋa ˈsɔ -kä bhibhee, wa yi sɛ yɩbhlɩmanɩ nɩɩ -n -kä -tiasɛ Lagɔ dlɩ ˈwʋ.
A kä a ˈkä Lagɔ bhibhee abhlɩ, maa a käˈɛ a ˈkɔ ˈyukwli -pʋnɩ. Biblë a ˈcɩɛcɩʋ ˈn lagɔbɔgwɩ a ˈmözɛlɩzɛlɛ yeaɲɩ kwänɩ. (Psaume 1:1, 2) ˈSaa a ˈcɩɛɛ, a nɩ ˈpänii dlɩ kɛ. (Psaume 77:11, 12) A -kä ˈkwädlɩ ˈwluyɩbhäyɩbhʋ ˈwʋ möö, yɩ -lɛˈɛ ˈgämö Lagɔ a ˈyukwlipʋnɩpʋnɛ.—Psaume 122:1-4.
A ˈkä Zoova ˈa wɛlɩɩ -mumuë ˈɲɛ -lɛ -lu a -mu kää dɛsɛ -wʋ ˈkaɲɩɛ kwänɩ nzɩ a -ɲɔɔ ˈsɔ a ˈwʋ -wʋnɛ ˈkä ˈmö ˈtumanɩ. Sɛ a bhïla ɔ wɛlɩɩ, -sɩbhä a -ɲɔɔ ˈsɔ a bheyi möä ˈyukusɛ ˈyize.—Matie 28:19, 20.
ˈSAA A BHƐNƖƐ A ˈKÄ NƲ:
Zila ˈwuë ˈmö, a nɩ ˈlibhï ˈtɛɲɩ ˈwʋ a ˈkä Biblë ˈmö zɛlɩ ˈn a ˈkäˈɛ Lagɔ bhibhee.
Lagɔ ˈa libho a gbʋ nɩ plɛnaɲɩ wʋ ˈkä ˈbhlibhïle ˈwʋ zi.
2 ˈA ˈLIGBË ˈMÖ A BIBLË A ˈCƖƐCƖƲ ˈMÖ, A NƖ GHLƖNƖ -MÄ ˈMÄNA
SƐƐ BIBLË GBÄÄ: “A nɩ ˈgïa ˈa dilaa Lagɔ ˈyi, -lɛ a dɔˈwʋ ɔ yeaɲɩˈɛ ɔbhlɩ ˈyi gömö.” (Zaakö 4:8) A kä a ˈkä a ˈligbë ˈmö a Biblë a ˈcɩɛcɩʋ a ˈylɩ -dɩ, a ˈkɛ ˈklʋkpamö ˈzʋ. (Genèse 18:19) Maa ɛˈɛ -bho daˈa yɩ ˈyize. -Mä ˈa nʋnʋlii ˈwuë ˈmö, a nɩ ˈpä ˈkwädlɩ Lagɔ dlɩ ˈwʋ. A -kä nɩɩ ˈa ˈligbë ˈmö a -nʋa -ɲɛ Lagɔ ˈkäa ˈwʋ -wʋnɩ nʋʋ, a nɩ ˈcʋa Lagɔ ˈa wɛlɩ ˈyize. “Ɛ yi -mä ˈligbë ˈmö ma oo, ɛ yi -mä ˈyioo ˈwʋ ma oo, a yi sɛpö oo, a -kä gɔlɔ oo.” (Deutéronome 6:6, 7) Sɛɛ Zozwie zʋ a-a, a nɩ zʋmö -sɩbhä. Sɛˈɛ ɔ nʋ a-a nɩɩ: “-N -ɲɛ ˈna ˈligbë a -nʋa ˈsɔ Zoova ˈmö -a ˈkää bʋbɔɔ.”—Josué 24:15.
ˈSAA A BHƐNƖƐ A ˈKÄ NƲ:
Sɛɛ -n ˈkää ˈzʋ ˈn ˈa ˈligbë ˈmö a Biblë a ˈcɩɛcɩʋ ˈkää -naˈa ˈligbë ˈmö a -nʋa kwänɩ -mä ˈwa zɩkpa ˈmö, -sɩbhä -n nɩ ˈzʋ.