ˈCƖƐCƖƐKÏBHË 28
˗A nɩ yɩbhlɩnɩ ˈsaa Zoova ˗ɲɛ Zezwii ˈsɔ nʋä ˗aa za
ˈN ˗na bheyi ˗kamö ˗lu a ˗mu nɛnɩɛ ˈylimö ˈɲɛɛ, ˈsaa yɩ ˗kamö ɔ ˈwlu nʋ ˈnɩ? ˈMäna ˈwʋ yɩ ˗kamöä ˗bhö, ˈn ˗n yo ˈylimö tulanɩ nɩɩ ˗n yɩbhlɩnɩ ˗li a ˗li ˈla ɔ nʋmöä ˈwlu. Zoova ˗ɲɛ Zezwii ˈsɔ, ˈɲɛɲɛlu a ˈkɔdʋ nɩkpɛ ˗nɩɲɩɛ ˗bhlɛ tɛkäsɛ ˈɲɛɛ, ˈmö wa ɲɩaɲɩɛ. ˈƝɛɲɛlu a ˗mu ɔ ˈnɩ? ˈN sɛɛ ˗a ˈkä ɔ tula nɩɩ ˈɲɛɲɛlu ˈla ˗bhöɲɩ ˈmäna ˈwʋ ˈnɩ?
1. Sɛɛ ˗a ˈkä ɔ tula nɩɩ ˗a yɩbhlɩnɩ ˈsaa Lagɔ ˗ɲɛ Zezwii Kliisɩ ˈsɔ nʋä ˗aa za ˈnɩ?
Biblë lɛ nɩɩ, ‘nɩkpɛ a ˗mɔɔ ˗kä Zezwii dlɩ ˈtɛɛnɩ,’ ɔ yi ˈkwädlɩkwädlɩnɩ ˗bhölɩ. (Zaa 3:16) ˗Maa sɛ ˗a ˈkä ɔ tula nɩɩ ˗a ˈtɛɛnɩ Zezwii dlɩ ˈnɩ? ˗Aˈa nʋnʋlii ˈn ˈsaa ˗a sɛɛ ˗lɛ kä yɩ ˈkä tula nɩɩ ˗a ˈtɛɛnɔɔ dlɩ. (Zaakö 2:17) ˗Mä ˗aˈa nʋnʋlii ˈmö ˈn ˗mä ˗aˈa bhïlabhïlasaa ˈmö, ˗a ˗kä tula nɩɩ ˗a ˈtɛɛnɔɔ dlɩɩ, Zezwii ˗ɲɛ ɔ dɩba ˈsɔ, a ˗ɲʋa yi teɲii ˈwʋ ˗wʋnɩ.—Zɛlɩ Zaa 14:21 ˈmö.
2. ˈSaa bhɛnɩ ɔ wʋ ˗kaɲɩ kwänɩ ˗a ˈkä tula nɩɩ ˗a yɩbhlɩnɩ ˈsaa Zoova ˗ɲɛ Zezwii ˈsɔ nʋä ˈnɩ?
Zezwii ˈkää ˈkuä yi a sabʋsaa, kii ˗mimii ˈɔ ˈwʋ˗bhlinɩwaa bhɛnɩɛ wa ˈkä ˈmö ghlɛnɩ nzɩ wa ˈkä tula nɩɩ wa yɩbhlɩnɩ sɛ ɔ bʋbɔnɩɛ ɔɲɩ Lagɔ, ˈn ɔ yʋa ˗sɩbhä sʋlʋnɩ. Ɔ ˗lɛ nɩɩ wa nɩ ˈyɩbhä ˈkwädlɩ ˈwlu ˗lu ˗bhlʋ ˗wʋ kää dɛsɛ a za. ˈMö Biblë laa “lagɔlilea“ ˈmö wa laˈɛ Zezwii ˈa ˈkwie a ˈwʋligbanɩzlɩ. (1 Kolɛɛtɩ a ˗nʋa 11:20) Zezwii yɩbhä a˗a nɩɩ sɛ ɔ ˈkuä ˗aa ˈwlumöö, ˈɔ tietiewaa ˗ɲɛ ˗tiamö a Klɩtɩɛwaa ˈsɔ nɩ ligbanii ˈwʋ. Sɛˈɛ Zezwii nʋä nɩɩ: “A nɩ ˈzʋ ˗sɩbhä, ˈsaa n nʋä a ˈwlumö a dɛ, a dila ˈkä ˈkwädlɩ ˗lɛ pö.” (Lwiikö 22:19) ˗A ˗kä Zezwii ˈa ˈkwie a ˈwʋligbanɩzlɩ a ˈwluyɩbhäyɩbhʋ ˈwʋ yi, yɩ tula nɩɩ sɛɛ Zoova ˗ɲɛ Zezwii ˈsɔ ˗waɲɩɛ teɲii, ˗a yɩbhlɩni ˗aa dila ˈwuë ˈmö.
ˈCƖƐ ˗LII ˗MIMII
Kii ˗mimii ˗a bhɛnɩˈɛ ˗a ˈkä ˈmö ghlɛnɩ nzɩ ˗a ˈkä tula nɩɩ ˗a yɩbhlɩnɩ ˈsaa Zoova ˗ɲɛ Zezwii ˈsɔ nʋä, ˗a nɩ ˈyi ˈylɩmö. ˗Yɩ kää ˈŋlɩ ˈn Zezwii ˈa ˈkwie a ˈwʋligbanɩzlɩ kää teɲii dɛsɛ, ˈyi ˈylɩmö.
3. Sɛɛ˗a ˈkää ˈzʋ nzɩ ˗a ˈkä tula nɩɩ ˗a yɩbhlɩnɩ ˈsaa Lagɔ ˗ɲɛ Zezwii ˈsɔ nʋä
ˈYlɩ ˗bhlʋ ˈmö, ˗n yɛ ˗kamä ˈɲu ˈmö bhlinɩ ˈn nɩkpɛ yiɛ yi ˈn ɔ ˗yimöä ɲuu ˈla ŋli puë. ˈSaa nɩkpɛ ˈla nʋä, ˗n yi ɔ ˗pa ˈwʋ dlʋ cuu ˗a? Sɛɛ ˗n ˈkää ˈzʋ nzɩ ˗n ˈkɔ ˈylimö tulanɩ nɩɩ ˗n yɩbhlɩnɩ ˗li a ˗li ˈla ɔ nʋmöä ˈwlu, mö ˗n ˈnaa ˈkä ɔ sɛ tɛlɩ ˗a?
Zaa, nɩkpɛ ˈla a saa, ˗sɩbhä Zoova ˈzʋä. ˗A ˈkäa ˈpʋpʋɛ ghlɩ a za, ˈɔ yuu ˗bhlʋ ˗kpɔ ˈmö ɔ ˈwlʋä ˈmö ˈn ɔ yiɛ ˗aa ˈwlumö ˈku. Zɛlɩ 1 Zaa 4:8-10 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
Sɛɛ Zezwii bʋbɔnɩɛ ɔɲɩ Lagɔ, ˗yɩ kä ɔ ˈŋlɩ ˈn yɩ ˗lɛ ɔ ˈɲɛɲɛlu a ˗mu kää teɲii dɛsɛ ˈnɩ?
Zoova ˗ɲɛ Zezwii ˈsɔ a ˈsaa wa nʋä ˗na za, sɛɛ ˗n pä ɔ yɩ dɔˈwʋ dlɩ ˈnɩ?
Sɛɛ ˗a ˈkä ɔ tula nɩɩ ˈsaa Zoova ˗ɲɛ Zezwii ˈsɔ nʋä ˗aa za, yɩ ˗bhöɲɩ teɲii ˈmäna ˈwʋ ˈnɩ? Zɛlɩ 2 Kolɛɛtɩ a ˗nʋa 5:15; 1 Zaa 4:11; 5:3 ˈmö. A ˗kä gbɛlɩ ˈlɛ ˈmö zɛlɩ ˈwë, a nɩ yɩlɩ nimïyɩbhäkïbhï ˈlɛ yɔwʋ:
Sɛɛ Biblë a gbɛlɩ ˈlɛ gbää a dɔˈwʋ sɛɛ ˗a ˈkä ɔ ˈzʋ nzɩ ˗a ˈkä tula nɩɩ ˗a yɩbhlɩnɩ ˈsaa Zoova ˗ɲɛ Zezwii ˈsɔ nʋä ˗aa za ˈnɩ?
4. ˗A nɩ ˗gänɩ Zezwii a gbäpöö
Sɛɛ ˗a ˈkäˈɛ tula nɩɩ ˈsaa Zoova ˗ɲɛ Zezwii ˈsɔ nʋä ˗bhöɲɩ ˈmäna ˈwʋ, miɛ nɩɩ ˗a nɩ ˗gänɩ Zezwii a gbäpöö. Zɛlɩ 1 Piɛlɩ 2:21 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Kii ˗mi ˈmö ˗a ˈkä ɔ ˈkwädlɩ Zezwii a gbäpöö sasɛ ˗gänɩ ˈnɩ?
Zezwii ˗wa a˗a Lagɔ ˈa wɛlɩɩ, ɔ bia a˗a Lagɔ ˈa ˈtɩtɩ a ˗tɩtɩɩ ˈn ɔ kwänɩ a˗a nɩkpa.
5. ˗A nɩ mö Zezwii ˈa ˈkwie a ˈwʋligbanɩzlɩ a ˈwluyɩbhäyɩbhʋ ˈwʋ
Lagɔlilea a tɛkäna a dɔˈwʋ, ˗n ˗kä ˗n ˈkä sɛɛ ˗lii ˈplɩɛ ˈwʋ ˈylɩmöö, zɛlɩ Lwiikö 22:14, 19, 20 ˈmö. ˈN a nɩ yɩlɩ nimïyɩbhäkïbhï ˈlɛ yɔwʋ:
Sɛɛ ˗lii ˈplɩplɩnɩ ɔ ˈmö lagɔlilea a dɔˈwʋ ˈnɩ?
ˈFɔlɔ ˗ɲɛ duvɛɛ ˈsɔ, sɛ yɩ sɛ ɔ zɛmö ˈnɩ? Yɩlɩ ˗mä gbɛlʋ 19 ˈn 20 ˈmö.
ˈSaa Zezwii yɩbhä a˗a ˈɔ ˈwʋ˗bhlinɩwaa nɩ nʋ, miɛ nɩɩ ˈylʋbö ˈwuë ˈmö, wa nɩ ligbanɩ ˈɔ ˈkwie a zlɩɩ ˈwʋ. Nza Zoova a Bhlɩnɩwaa yɩbhää ˈwlu ˈylʋbö ˈwuë ˈmö, wa ˈkä Zezwii a ˈkwie ˈwʋ ligbanɩ. ˈWluyɩbhäyɩbhʋ ˈla ˗wʋ kää teɲii dɛsɛ a za, ˗n ˗kä ˗n ˈkä ˗lii ˗mimii ˈmö ˈnʋʋ, ˈzʋ ˗lɛ VIDEO. ˈN a nɩ yɩlɩ nimïyɩbhäkïbhë ˈlɛ yɔwʋ.
Zezwii ˈa ˈkwie a ˈwʋligbanɩzlɩ a ˈwluyɩbhäyɩbhʋ ˈwʋ, sɛɛ ˗lii ˈplɩplɩnɩ ɔ ˈmö ˈnɩ?
ˈFɔlɔ ˗ɲɛ duvɛɛ ˈsɔ, yɩ kä zɛmö. Zezwii ˈa kpökpaa ˗a ˈnɩɛ ˈɲiɲlolii ˈmö ˗kä, ɔ bʋbɔnɩɛ Lagɔ ˗aa za, ˈmö ˈfɔlɔ ˈla glɩnɩɛ. Duvɛɛ, ˈɔ dluu muä.
NƖKPA ˗MUMUË LƐ NƖƖ: “˗N ˗kä Zezwii a ˈyize dlɩ ˈtɛɛnɩ cuu, ˗n yi ˈpʋpʋɛ ghlɩ.”
Sɛɛ ˗n ˈkä ɔ Zaa 3:16 ˈn Zaakö 2:17 ˈmö ghlɛnɩ nzɩ ˗n ˈkä tula nɩɩ, yɩ ˈyize mii ˈnɩɛ dɛsɛ ˗kä ˈnɩ?
DƐSƐKÄKÏBHÏ
Sɛɛ ˗a tula nɩɩ ˗a yɩbhlɩnɩ ˈsaa Zezwii nʋä ˗aa za miɛ nɩɩ, ˗a ˈtɛɛnɔɔ dlɩ ˈn ˗a mö ˈɔ ˈkwie a ˈwʋligbanɩzlɩ a ˈwluyɩbhäyɩbhʋ ˈwʋ.
ˈWʋligbanɩkïbhï
Wa ˗kä nɩɩ nɩkpɛ ˈtɛɛnɩ Zezwii dlɩɩ, sɛ yɩ sɛ ɔ zɛmö ˈnɩ?
ˈSaa ˗n yɩbhä ɔ ˗n ˈkä nʋ nzɩ ˗n ˈkä tula nɩɩ ˗n yɩbhlɩnɩ ˈsaa Zoova ˗ɲɛ Zezwii ˈsɔ nʋä ˗na za ˈnɩ?
˗A ˈkä Zezwii ˈa ˈkwie a ˈwʋligbanɩzlɩ a ˈwluyɩbhäyɩbhʋ ˈwʋ mö, ˗yɩ kä ɔ ˈŋlɩ ˈn yɩ kä ɔ dɛsɛ ˈnɩ?
YƖLII YƆWƲ
Sɛɛ Zezwii ˈkuä ˗aa ˈwlumöö, sɛ yɩ ˈsunɩɲɩ ɔ ˗mä ˗a ˈkä tula nɩɩ ˗a yɩbhlɩni nɩ?
Ɔ ghlɛnɩ ˈɔ kpökpaa ˈmö ˈn ɔ yiɛ Zoova a ˈŋlɩ ˈghlimanɩ (9:28)
ˈSaa wa laa dlɩtɛɛnɩtɛnɛ ˈn sɛɛ ˗a ˈkɛɛ tula, ˈcɩɛ yɩ dɛ.
« Exerce ta foi dans les promesses de Jéhovah » (La Tour de Garde, octobre 2016)
Sɛɛ Zezwii ˈa ˈkwie sɛɛ zɛmö, ˈŋlɔ ˗bhlʋ ˈnwiɛ ˈmö, yɩ zigbanɩ ˈɔ dlɩpäsaa ˈmö. Ɔ ˗lɛ nɩɩ: “N yiaˈa ˗sɩkaa sɛ nɩɩ n ˗wʋ ˈwlɩlɩ ˈn ˗bhölɩbhölɛ ˗bhö a ˈmäna ˈwʋ.”
« La Bible transforme des vies » (La Tour de Garde, 1er août 2011)
Zezwii ˈa ˈkwie a ˈwʋligbanɩzlɩ a ˈwluyɩbhäyɩbhʋ ˈwʋ, nɩkpa a ˗bɛ ˈnɩ li ˈfɔlɔ ˈn waˈa ˈnɩmä duvɛɛ. ˗Yɩ kä ɔ ˈŋlɩ ˈnɩ?