ˈCƖƐCƖƐKÏBHË 50
Sɛɛ ˈligbë ˈmö a ˗nʋa ˈkä ɔ ˈmäna ˈmö ˗bhölɩnɩ ˈnɩ? (ˈPɩɔ 2)
Yuëa, Zoova a ˈɲɛɲɛlu wa glɩnɩɛ. ˈSaa ɔ yɩbhä miɛ nɩɩ, ˈyuëlowluwaa nɩ ˈzʋnɩ sasɛ ˈɲɛɲɛlu ˈla ˈyli. ˈDɩmözʋwɛlɩɩ a ˗nɩ a ˗nɩɩ ˈmö Zoova ˈɲɛɛ ˈyuëlowluwaa nzɩ yɩ ˈkʋa kwänɩ wa ˈkä ˗sɩbhä ˈzʋ. ˈDɩmözʋwɛlɩ ˈla, yɩ bhɛnɩˈɛ yɩ ˈkä yuëa kwänɩmö.
1. ˈDɩmözʋwɛlɩɩ a ˗mi Zoova ɲɛ ɔ ˈyuëlowluwaa ˈnɩ?
Zoova yɩbhä nɩɩ, ˈyuëlowluwaa nɩ ˗wa ˈwa yuëa. ˈN wa ˗kä bhɛnɩ, wa ˗ɲʋa ˈsɔ nɩ ˗sɛ ˈtɛɲɩ a ˗bɛ. Zoova yɩbhäˈɛ ˈgämö nɩɩ, ˈyuëlowluwaa nɩ ˈzʋnɩ sasɛ ˈwa yuëa ˈyli ˗lizoku tuëa ghlɩ, ˈn wa nɩ ghlɛnɩˈɛ Biblë a ˈpäpägböö ˈmö nzɩ wa ˈkʋa ˈcɩa. (Proverbes 1:8) Sɛˈɛ ɔ ˈɲɛɛ dɩbawaa ˈdɩ: “A ˗kʋä ˗suu [ˈa yuëa], sɛɛ Lagɔ slʋnaɲɩɛ, a nɩ zlɔmanuë ˗sɩbhä ˈmö a ˈkʋä ˗sɩbhä ˈdɩ ˈmö zʋ.” (Zɛlɩ Ɛfɛɛzɩ a ˗nʋa 6:4 ˈmö.) ˈYuëlowluwaa ˗kä Zoova ˈa ˈdɩmözʋwɛlɩɩ ˗gänɩ nzɩ wa ˈkä waɲɩgäsɛ ˈwa yuëa sasɛ ˗suu, yɩ nɛnɔ teɲii dlɩ yɔwʋ.
2. ˈDɩmözʋwɛlɩɩ a ˗mi Zoova ɲɛ ɔ yuëa ˈnɩ?
Sɛˈɛ Zoova ˈɲɛɛ yuëa ˈdɩ: “A nɩ ˈzʋ a ˗lowluwa ˈklʋkpamö.” (Zɛlɩ Kolɔɔsɩ a ˗nʋa 3:20 ˈmö.) Yuëa ˗kä wa ˗lowluwa ˈklʋkpamö ˈzʋʋ, Zoova ˗ɲɛ wa ˗lowluwa ˈsɔ ˈmö wa zʋä ˈmäna dlɩ zɛmö. (Proverbes 23:22-25) Zezwii a ˈyuënɔɔ, sɛ ɔ ˈzʋä ɔ ˗lowluwa ˈklʋkpamö, yuëa kä wa ˈkä ˗sɩbhä ˈɔ gbäpöö ˗gänɩ. Ɔ ˗lowluwa ˗gwälɩnɩ abhlɩ ˈɲiɲlolii ˈmö, ˗maa ɔbhlɩ, ɔˈɔɔ ˈɲiɲlolii ˈmö ˗kä. Yɩ ˗wʋ ˗sɩbhä ˈmö, ˈn ɔ zuë ˈklʋkpamö.—Lwiikö 2:51, 52.
3. Sɛɛ ˈa ˈligbë ˈmö a ˗nʋa bhɛnɩ ɔ wa ˈkä Lagɔ yɔwʋ ˈdionɩ ˈnɩ?
˗N ˗kä ˈyuëlowli glɩnɩ, ˗n yɩbhä nɩɩ sɛɛ ˗n ˗wa Zoova, ˗naˈa yuëa nɩ ˗wamö ˗sɩbhä Zoova. Sɛɛ ˗n ˈkä ɔ ˈzʋ nzɩ ˗n ˈkʋa kwänɩ ˈnɩ? Sɛɛ Biblë gbää, mö ˗n nɩ ˗gänɩ: “˗N kä ˗n ˈkɩ ˗naˈa yuëa ˈcɩa [Zoova ˈa wɛlɩɩ], ɛ yi ˗mä ˈligbë ˈmö ma oo, ɛ yi ˗mä ˈyio ˈwʋ ma oo, a yi sɛpö oo, a ˗kä gɔlɔ oo.” (Deutéronome 6:7) Wa ˗kä “ˈcɩa” nʋʋ, miɛ sɛɛ zɛmö nɩɩ ˗n ˈkä ˈkwädlɩ nɩkpɛ ˗lu sʋlʋnɩ ˈyize, zila ˈwuë ˈmö. Zaa, a ˗kä nɩɩ yuëa ˈkä ˗li ˗mimii ˈwʋ ligbanɩ nʋʋ, a kä a ˈkʋa ˈkwädlɩ yɩ wɛlɩɩ ˈɲɛ ˈyize. Biblë a gbɛlʋ ˈlɛ, sɛˈɛ wʋ sɛɛ zɛmö nɩɩ, a kä a ˈkä ˈtɛɲɩ a ˗bɛ ˈwʋ ˈlibhï a ˈkä ˈa yuëa Zoova ˈa wɛlɩɩ ˈcɩa. ˈLigbë ˈmö a ˗nʋa ˗kä ˈtɛɲɩ ˈwʋ ˈlibhï ˈdimasia ˈwuë ˈmö, ˈn wa ˗kä Biblë ˈgämö ˈcɩɛnɩ, nɛnɩ yɩ nɛnɩɛ teɲii. ˗N ˈnɩ ˈyu ˗kä aˈbhë ˗kë, ˗n bhɛnɩ ˗n ˈkä ˈtɛɲɩ ˈwʋ ˈlibhï ˗n ˈkä ˗naɲɩ ˈwlugïganɩ nzɩ ˗n ˈkä lagɔwɛlɩɩ ˈcɩɛ ˈyize.
ˈCƖƐ ˗LII ˗MIMII
ˈDɩmözʋwɛlɩɩ a ˗nɩ a ˗nɩɩ ˗yɩ ˗kamöä kwänɩ ˗n ˗ɲɛ ˗naˈa ˈligbë ˈmö a ˗nʋa ˈsɔ ˈkä ˈtɩɩglɩglɛ ˗ɲɛ ˈmäna ˈsɔ ˈmö ˗bhölɩnɩɩ, ˈyi ˈylɩmö.
4. A nɩ ˗sunɩ ˈa yuëa ˗wawʋ ˈmö
˗N ˈkä ˈyu ˗su bhɛnɩ yɩ ˗kamö kɛˈmö ˈtɛɛnɩ. Sɛɛ Biblë bhɛnɩ bhä ɛ ˗kamö kwänɩ ˈnɩ? Zɛlɩ Zaakö 1:19, 20 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
ˈYuëlowluwaa ˗ɲɛ ˈwa yuëa ˈsɔ ˗kä ˈdɩ ˗sɛ dɔˈwʋ ˗wʋʋ, sɛ wa bhɛnɩ bhä wa ˈkʋa ˈwa ˗wawʋ ˈylimö tulanɩ ˈnɩ?
˗Yɩ kä ɔ ˈŋlɩ ˈn ˈyuëlowluwaa ˈnɩ ɔ ˗kä wa ˈkä ˈwa yuëa ˈklɛsɛ ˈmö zlɔmanɩ ˈnɩ?a
5. ˈYuëlowluwaɲɩ, a nɩ ˗kʋ sasɛ ˈa yuëa ˈwʋ
ˈYuëlowluwaa ˈkä ˈwa yuëa ˈwʋ ˗kʋ a dɔˈwʋ, ɲɩbhɛlʋ ˗ɲɛ ˈŋlɔ ˈsɔ ˈkä ˗lɛ ˗wʋ a wɛlɩɩ, wa kä wa ˈkʋäɲɩ dlɩ ˗gömö ˗sɛsɛnɩ. ˗A ˗ɲɛ ˗aˈa yuëa ˈsɔ ˈkä ˗sɩbhä a ˈdɩ ˗sɛ bhɛnɩ yɩ ˗kaɲɩ zʋ ˈwʋ ˗bhö. ˈZʋ ˗lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.
ˈYuëlowluwaa ˗ɲɛ ˈwa yuëa ˈsɔ ˈkä ˗sɩbhä a ˈdɩ ˗sɛ a dɔˈwʋ, ˗yɩ kä ɔ ˈŋlɩ ˈn yɩ ˈtɛɛnuë ɔ kɛˈmö ˈnɩ?
Sɛɛ ˈyuëlowluwaa ˗mumuë ˈzʋ ɔ ˈn wa ˗ɲɛ ˈwa yuëa ˈsɔ yi ɔ ˗sɩbhä a wɛlɩɩ bhïla ˈnɩ?
Sɛɛ Biblë gbää a dɔˈwʋ, Sataa ˈa ˈpɩwʋzokwë nɩ ˈwʋ, ˈmlɩɲuwa yi zumanɩ ˈyize. Zɛlɩ 2 Timotee 3:1, 13 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
ˈMlɩɲuwaa ˗waɲɩ wɛlɩɩ wa bhïla ˗mä gbɛlʋ 13 ˈmö, ˗mä wa glaˈmö, nɩkpa ˗wa nʋä yuëa ˗ɔɔzʋkälii ˈwlu ˗wʋmö ˗mä. Zaa, sɛɛ yuëa ˈkää waɲɩ ˈwʋ ˈnɛɛnɩ ˗sɩbhä a nɩkpazoku ˈla a za, ˈyuëlowluwaa ˗ɲɛ yuëa ˈsɔ ˗kä ˗sɩbhä a ˈdɩ ˗sɛ, ˗yɩ kä ɔ ˈŋlɩ ˈn yɩ kä ɔ dɛsɛ ˈnɩ?
˗N ˗yi a˗a bhä sɛ ˗a?
Zoova a Bhlɩnɩwaa ˗bhɛ lagɔbɔgwɩ a ˗bɛ ˗ɲɛ videwi ˈsɔ, yɩ ˈkä ˈyuëlowluwaa kwänɩ, nzɩ wa ˈkä ɲɩbhɛlʋ ˗ɲɛ ˈŋlɔ ˈsɔ ˈkä ˗lɛ ˗wʋ a wɛlɩɩ ˈwa yuëa dlɩ ˗gömö ˗sɛsɛnɩ.˗Yɩ glaˈmö a ˗nɩ miɛ dɛˈɛ:
A nɩ ˗kʋ ˗aˈa yuëa ˈwʋ (video)
ˈBɔgʋʋ wa laa Écoute le grand Enseignant, ˈkïbhë 10 ˈn 32
« Parler de sexualité à son enfant » (Réveillez˗vous ! no 5 2016)
6. A nɩ ˈzʋ a ˗lowluwa ˈklʋkpamö
Yuëa ˗ɲɛ ˗dɩgbö ˈsɔ bhɛnɩ wa ˈkä tula nɩɩ wa zʋ wa ˗lowluwa ˈklʋkpamö ˗mä ˈwa bhïlabhïlasaa ˈmö. ˈZʋ ˗lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.
ˈYu ˗kä ˈklʋkpamözʋsɛ ɔ ˗lowluwa bhïlanɩ, sɛ yɩ kä bhä ɔ ˗li a ˗lii ˈmö ˈnɩ?
Yuëa ˗ɲɛ wa ˗lowluwa ˈsɔ ˗kä bhïla dɔˈwʋ ˗wʋʋ, sɛ wa ˈkä ɔ tula nɩɩ wa kä wa ˈklʋkpa ˈnɩ?
Zɛlɩ Proverbes 1:8 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Sɛɛ ˗dɩgbö kä ɔ wa ˈkä ˈzʋ wa ˗lowluwa ˗kʋa ˈdɩ ˈmö ˈzʋ dɔˈwʋ ˗wʋ ˈnɩ?
7. Sɛɛ ˈligbë ˈmö a ˗nʋa ˈkää Zoova ˈgämö bʋbɔnɩ
˗Mä Zoova a Bhlɩnɩwaa ˈa ˈligbï ˈmö, ˈtɛɲɩ wa sɛɛ ˗lɛ nzɩ wa ˈkä Zoova ˈgämö bʋbɔnɩ, ˈdimasiea ˈwuë ˈmö. Sɛɛ ˈligbë a Biblë a ˈcɩɛcɩʋ ˈla ˈplɩplɩnɩ ɔ ˈmö ˈnɩ? ˈZʋ ˗lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.
Sɛɛ ˈligbë ˈmö a ˗nʋa ˈkä ɔ ˈzʋ, wa tɩa ˈwa ˈligbë ˈmö a Biblë a ˈcɩɛcɩʋ a ylɩɩ ˈwʋ ˈmɩɛ ˈnɩ?
Sɛɛ ˈyuëlowluwaa ˈkä ɔ ˈzʋ, ˈwa ˈligbë ˈmö a Biblë a ˈcɩɛcɩʋ ˈkäa ˈmäna ˈwʋ ˗bhö ˈnɩ?—ˈYɩ ˈcɩɛcɩɛkïbhëa ˈlɛ a tɛkäkpʋ ˈklʋ a foto ˈylɩmö.
˗Mumuë ˈkä ˈwa ˈligbë ˈmö a Biblë a ˈcɩɛcɩʋ ˗bhɛ a dɔˈwʋ, ˗yɩ kä ɔ ˈŋlɩ ˈn yɩ ˈtɛɛnuë ɔ kɛˈmö ˈnɩ?
Sɛˈɛ Zoova ˈɲɛ a˗a bhlaˈmö Yizlaɛlɩ a ˗nʋa ˈdɩ nɩɩ, wa nɩ ˈɲɛ zila ˈwuë ˈmö ˈɔ wɛlɩɩ ˈwa yuëa. Zɛlɩ Deutéronome 6:6, 7 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Sɛɛ ˗n ˈkä ɔ wɛlɩ ˈlɛ ˗gänɩ ˈnɩ?
Sɛ a ˈkää ˈa ˈligbë ˈmö a Biblë a ˈ cɩɛcɩʋ ˗bhɛ:
A nɩ gïganɩ aɲɩ ˈwlu lagɔzɩkpa ˈmö a ˈwluyɩbhäyɩbhɩ a dɔˈwʋ.
Biblë ˈmö a nɩkpa a wɛlɩɩ ˗yɩ ˗bhöä ˈa ˈligbë ˈmö a ˗nʋa ˈmäna ˈwʋ, a nɩ zeli ˈmö ˈn a nɩ yɩlii yɔwʋ.
A ˗kä ˈyuë ˈtikïyie ˗kää, ˗mä jw.org ˈklʋ a ˈcɩɛcɩɛkïbhëa ˗a bhïla ˈyuë ˈtikïyiea a wɛlɩɩ, ˈmö a nɩ yɩlɩ yɔwʋ.
A ˗kä ˈyuëdɩgbö ˗kää, ˗mä jw.org ˈklʋ a ˈcɩɛcɩɛkïbhëa ˗a bhïla ˗dɩgbö a wɛlɩɩ, ˈmö a nɩ yɩlɩ yɔwʋ.
A nɩ ˗bhɛ Biblë ˈmö a nɩkpa a wɛlɩɩ a ˈylimötulanɩlu.
A nɩ ylɛ jw. org ˈklʋ a video ˈn a nɩ yulu yɔwʋ.
NƖKPA ˗MUMUË LƐ NƖƖ: “ˈYu ˈkä Biblë ˈmö ˈnʋ a dɔˈwʋ, ˈmö yɩ ˈtɛɛ teɲii.”
Sɛɛ ˗n ˈkä ɔ gbä ˈnɩ?
DƐSƐKÄKÏBHÏ
ˈSaa Zoova yɩbhää miɛ nɩɩ, ˈyuëlowluwaa nɩ ˗waa ˈwa yuëa, wa nɩ ˈcʋä ˈn wa nɩ ˗kʋa ˈwʋ. Ɔ yɩbhä nɩɩ, yuëa nɩ ˈzʋ wa ˗lowluwa ˈklʋkpamö ˈn ɔ yɩbhäˈɛ nɩɩ, ˈligbï ˈwuë ˈmö a nʋa nɩ bʋbɔnɔɔ ˈgämö.
ˈWʋligbanɩkïbhï
Sɛɛ ˈyuëlowluwaa ˈkä ɔ ˈwa yuëa ˈcɩa ˈn wa ˈkʋa ɔ ˈwʋ ˗kʋ ˈnɩ?
Sɛɛ yuëa ˈkä ɔ tula nɩɩ wa zʋ wa ˗lowluwa ˈklʋkpamö ˈnɩ?
ˈLigbë ˈmö a ˗nʋa ˗kä ˈkwädlɩ ˈwa ˈligbë ˈmö a Biblë a ˈcɩɛcɩʋ ˗bhɛ, sɛ yɩ kä ɔ wa ˗li a ˗lii ˈmö ˈnɩ?
YILII YƆWƲ
Sɛ ˗n ˈkä ɔ ˗naˈa yuu ˈcɩa ɔ ˗kä ˈkɔdɔ ˈzʋ ɔ ˈkäa ɔɲɩ ˗susɛ ˗yi ˈnɩ?
« Six valeurs à transmettre aux enfants » (Réveillez˗vous ! no 2 2019)
Biblë ˈmö a ˈdɩmözʋwɛlɩɩ ˗yɩ bhɛnɩɛ yɩ ˈkä ˗wa ˈzʋnɩɛ wa ˗lowluwa ˗wa yɛɛ gɔ ˈyli kwänɩ.
« Prendre soin de ses parents âgés : qu’en dit la Bible ? » (Ɛtɛnɛtɩ ˈklʋ a ˈcɩɛcɩɛkïbhë)
Nɩkpɛ ˗bhlʋ ˗ɔɔɔ a sɛ ɔ ˈkä ɔ yuëa ˈbhʋaa, ˈyɩ ɔ wɛlɩɩ ˈylɩmö.
Sɛɛ dɩbawa ˈkä ɔ ˈzʋ nzɩ wa ˗ɲɛ ˈwa yuëa ˈsɔ ˈkä teɲii ˈmö ˗ŋöŋönɩ ˈnɩ?
« Comment un père peut˗il rester proche de son fils ? » (La Tour de Garde, 1er novembre 2011)
a ˗Mä Biblë ˈmö wa ˗kä “ˈmözlɔmanɩzlɔmanɛ” nʋʋ, mii sɛ zɛmö nɩɩ ˈyuëlowluwaa kä wa ˈkä ˈwa yuëa ˈcɩa, ˈn wa ˈkʋa kwänɩ wa ˈkä ˈwa dlɩpäsazokwëa ˈmö zigbanɩ. ˗Maa wa ˗kä ˗sɩbhä ˈzʋä yii, wa nɩ tɩ ˗sɩbhä ˈklɛsɛ ˈzʋ.—Proverbes 4:1.