-A nɩ ghlɛnɩ jw.org ˈmö nzɩ -a ˈkä nɩkpa lagɔwɛlɩɩ ˈɲɛ—“Zʋ Zoova ˈa bheyi”

-Mä jw.org ˈklʋ a dɛ -mama wa laa “Biblë ˈa ˈCɩacɩʋ” ˈyuëa dɛ -bhlʋ -wʋ -lɛ, dɛ wa laa “Zʋ Zoova ˈa bheyi.” -N yi -mä ˈlwɩ, video -ɲɛ -lii -mimii ˈsɔ ghlɩnɩ. -N yɛ ɔ tɛkäsɛ -lɛ nɩkpa ˈylimö tulanɩ -mä -naa lagɔwɛlɩɩ bia libhoo ˈmö -a? ˈN -n -ɲɛ ˈyuëlowli -kä Biblë ˈcɩɛ dɔˈwʋ -wʋ, -nˈn-ä bhä bhɛnɩ -n ˈkɔ -lɛ ˈylimö tulanɩ -a? ˈN -n -kä -sɩbhä zʋä, yɩ yoo -mä sunɩ nzɩ ɔ ˈkä jw.org ˈklʋ a dɛ -mama mö, ɔ ˈkä -lii -mimii ˈylɩmö.

Lagɔdaayu -bhlʋ, ɔ ˈkää Lagɔ ˈa ˈKämanɔɔ a ˈtɩtɩɩ No. 38 a kpɩ ˈdlɩnɩ dɔˈwʋ -wʋ, ɔ yiɛ ˈŋlɔ -bhlʋ ˈylɩmö. Ɔ ˈɲɔɔ kpʋ -bhlʋ cuu, ɔ yiɛ wʋ ˈmözɛlɩzɛlɛ ˈtɛɛ. Ɔ kä a-a ˈyuë -dɩgbö a -bɛ, -wa yɩbhä a-a wa ˈkä kpʋ ˈla ˈmö ˈnʋ. Lagɔdaayu -ɲʋä ˈsɔ yiɛ ˈtikïyie ˈwʋ kpʋ la ˈmö zɛlɩ, ˈn ɔ yuë -mä wʋ -gömö, -aˈa ɛtɛnɛtɩ a dlɛsɩ ˈylɩmö tulanɩ. Lagɔdaayu yɩɛ ˈylɩmö nɩɩ, ˈsaa ɔ sɛnɩɛ daˈa ˈmö nɛnɩa ˈŋlɔ dlɩ yɔwʋ, ˈɔ ŋöŋöyukwli ˈmö ɔ ˈlibhiä ˈwʋ ˈn ɔ yiɛ kalɛbö a video ˈŋlɔ -ɲɛ ˈɔ ˈyuëa ˈsɔ ˈylimö tulanɩ.

ˈŊlɔ -bhlʋ -ɔ kää ˈyuë -dɩgbö a -bɛ, -aa lagɔdaayu ˈŋlʋyu -ɲɛ ˈsɔ nʋnɩɛ libhoo -gämö, ˈmö ɔ ˈɲɛɛ ˈdɩ nɩɩ, ɔ -kä -mä -aa ɛtɛnɛtɩ a dlɛsɩ ˈklʋ möä, ɔ yi ˈdɩmözʋwɛlɩɩ wa ˈɲɛɛ ˈligbë ˈmö a -nʋa a dɛ ˈylɩmö. ˈN ˈŋlɔ -ɲɛ ˈɔ ˈyuëa ˈsɔ yiɛ -mä jw.org ˈklʋ ˈylɩmöä mö. ˈYlɩya ˈplɩɛ, ˈn ŋlɔɔ yiɛ -aa lagɔdaayu ˈŋlʋyu ˈdɩ ˈɲɛ nɩɩ, wa möä -mä jw.org ˈklʋ a dɛ wa laa “Zʋ Zoova ˈa bheyi” a ˈlʋ wa ˈcɩɛ -mä, -wʋ nʋä “Bia Lagɔ ˈa wɛlɩɩ,” ˈmö wa bhlɩɛ ˈn wa binɩɛ -budu ˈwʋ.”

ˈCɩɛ sasɛ jw.org ˈklʋ a dɛ nɩ, nzɩ -n ˈkä - ˈlwɩ, video -ɲɛ -lii -mimii ˈsɔ, -mä -sɛ nzɩ -n ˈkɩ -mä -naa ŋöŋöyukwli ˈmö zʋ. -Lɛ a dɔˈwʋ -n yi jw.org ˈklʋ a dɛ waa laa “Zʋ Zoova ˈa bheyi” ˈmö ghlɛnɩ nzɩ -n ˈkä nɩkpa lagɔwɛlɩɩ ˈɲɛ. Dɛsɛkälu -wʋ -kaɲɩɛ kwänɩ nzɩ -a ˈkä sasɛ -alowli Zezwii ˈa libhoo nʋ, ˈmö jw.org a ˈpɩɔ nɩ glɩnɩɛ!​—Ztw. 20:19.