-Mä lagɔwɛlɩbia libho ˈmö, ˈtɛɲɩ ˈwuë Lagɔ ˈɲaɲɩɛ a tɛ ˈyi ˈtatinɩ ɛ ˈkä ˈfʋ ˈplɩ

2014 a ˈylʋba ˈmö, Zoova ˈa Bhlɩnɩwaa -sɛ ˈgïle a 1.945.487.604 -mä lagɔwɛlɩbia libho ˈmö.—Yɩ -wʋ gbëaa nɩɩ, -a yɩbhä dɛ -a kää sɛ, -a ˈkä -lɛ kɛ ɲɔnʋ ˈyize nzɩ Zoova ˈa libho a nʋnʋ dɔˈwʋ -a ˈkä ˈkwädlɩ ku ˈmö -su! (Ps. 110:3; 1 Kɔ. 15:58) “ˈTɛɲɩ ɛ tʋä -mä ˈnɩa zu,” zaa -aa bhä bhɛnɩ -a ˈkä -aˈa lagɔwɛlɩ bia tɛɲɩ -ɛ kää teɲii dɛsɛ ˈwʋ ˈlibhï -a ˈkä nɩkpa a -bɛ lagɔwɛlɩ ˈɲɛ -a?—1 Kɔ. 7:29.

-A -kä -a ˈkä -aˈa lagɔwɛlɩbia tɛɲɩ sasɛ libho ˈmö nʋnɩɩ, -a tɩ sa -bhlʋ -kpɔ zʋ. ˈKwädlɩ a dɔˈwʋ, ˈn -n -kä lagɔwɛlɩ sa -bhlʋ -kpɔ bia ˈyize -këë ˈgïle -bhlʋ a sɛ -kä ˈplɩ, -n ˈnɩ nɩkpɛ lagɔwɛlɩ ˈɲɛɛ, -n ˈnaa ˈkä bhä sɛ -mäma zʋ nzɩ -n ˈkä nɩkpa a -bɛ lagɔwɛlɩ ˈɲɛ -a? Dɛ -mäma -ɲɛ dɛ -mäma ˈsɔ a -lii ˈnɩɛ ˈwlʋnɩ. Maa ˈdɩmözʋwɛlɩ ˈlɛ, yeaɲɩ kwänɩ, a tɩa nɩkpɛ a -mɔ -ɲɛ ˈɔ ˈli -wʋä gwɩ dɔˈwʋ -ɔ ˈpää “yɩasɛbɛyɩ -kätlɩɩ” ˈwlʋnɩ.—1 Kɔ. 9:26.

• -Mä ˈligbï ˈmö a lagɔwɛlɩɩ a biabiʋ: ˈYlʋbö a -bɛɛ dɛˈɛ, lagɔwɛlɩbiawa -kä lagɔwɛlɩ bia mö, ˈligbï ˈmö a lagɔwɛlɩbiabiʋ wa tɛɛnɩɛ ˈwʋ. Maa nɩkpa a -bɛ ˈzɔkpɔsɛ wa möä libho ˈmö zaa, -aa bhä bhɛnɩ -a ˈkä -lii ˈmö yɛla nzɩ -a ˈkä ˈligbï ˈmö a lagɔwɛlɩbiabiʋ ˈkidopɛpɛ ˈmö tɛɛ ˈn swɛ -käˈɛ swɛ -käˈɛ ˈlili ˈwʋ yluu, dɛɛ nɩkpa a -bɛ -wʋä -mä ˈwa ˈligbï ˈmö ˈn wa -ghlɩnɩɛ käˈmö -a? Zlɩ -kä -gää, -a bhɛnɩ -a ˈkä mä ˈywii ˈwʋ, -mä libhinʋbɛyɩ, -mä pɛlʋpäbɛyɩ ˈsɔ lagɔwɛlɩ bianɩ. -Sɩbhä a dɔˈwʋ -a yi nɩkpa a -bɛ lagɔwɛlɩ ˈɲɛ.

• Nɩkpabhë ˈa ˈyila ˈklʋ a lagɔwɛlɩɩ biabiʋ: ˈTebhli ɛ -käˈɛ -pusɩpusɩ a sɛ a -lii -yɩɲɩ ˈklʋ wa zʋä lagɔbɔgwɩ. -A kä a ˈkɩ -mä lagɔzɩkpa a ˈpɩɔ ˈyli a dɛɛ nɩkpa a -bɛ ˈplɩnɩɛ ˈzʋ. (A nɩ ylɩɩ -lɛ 2013 a zwie a Lagɔ ˈa ˈKämanɔɔ a libho a kpʋ 5 ˈklʋ) ˈBhle ˈla ˈmö dɛ wa zʋa -lii ˈla, wa -kä sɛyɩbhlɩnɩ nɩɩ, nɩkpa a -bɛ ˈnɩa -lɛ ˈwʋ -tʋnɩ, -wa -suä -mä lagɔzɩkpa ˈmö a lagɔwɛlɩbialibho a wɛlɩ, bhɛnɩ wa ˈkä -mä ˈwa ˈpɩɔ ˈyli a ˈbhle -mäma sɛtɛlɩ dɛɛ nɩkpa a -bɛ ghlɛnɩɛ nzɩ wa ˈkɩ -mä kwä.

• ˈWʋ ˈsɔnadɔˈwʋ a nɩkpa a ˈylɩmöyɩyɛ -ɲɛ Biblë a ˈcɩacɩʋ ˈsɔ: ˈTɛɲɩ dɛɛ lagɔwɛlɩbiabiʋ a ˈkii -mimi ˈnɩ möä -mä, -aa bhä bhɛnɩ -a ˈkä -lɛ a ˈtɛɲɩ ˈla ˈmö -aˈa nɩkpa a ˈwʋ ˈsɔnadɔˈwʋ a ylɩmöyɩyɛ -ɲɛ Biblë a cɩacɩʋ ˈsɔ -bhɛnɩ -a? ˈYlɩgbʋplʋ a ˈzɔkpɔsɛ a ˈligbï ˈmö a lagɔwɛlɩbiabiʋ -kä ˈyukusɛ möö, -a bhɛnɩ -a ˈkä -kidopɛpɛ ˈmö nɩkpaa -a ˈɲɛɛ lagɔwɛlɩ -ɲɛ -muë -a ˈcɩaa Biblë ˈsɔ ˈylɩmöä mö -a? ˈN lagɔwɛlɩbiawa -kä nɩkpa wa ˈɲɛɛ lagɔwɛlɩ ˈwʋ ˈsɔ ˈylɩmöä mö dɔˈwʋ -wʋ, waa ɔ bhɛnɩ wa ˈkä -zɩkpö ˈtikïyie -bhɛ nzɩ wa ˈkäa nɩkpa a -bɛɛ lagɔwɛlɩ ˈɲɛ -a?

Mɩɛ abhlɩ, -a -kä lagɔwɛlɩbiabiʋ tɛɛ cuu, -aˈa ˈgïle a zɛlɩzɛlɛ -a tɛɛ, maa -a -kä nɩkpa a -bɛ lagɔwɛlɩ ˈɲɛɛ lɩbhä -aˈa ˈmäna gbanɔɔ ˈwʋ. -N -kä sɛ -yi nɩɩ, lagɔwɛlɩbiabiʋ a ke -mäma ˈnɩɛ ˈtɛɲɩ -mɛmɛ ˈwʋ -ŋwaa, -n bhɛnɩ -n ˈkä -lɛ a ˈtɛɲɩ ˈla ˈmö, sɛ -mäma ˈzʋ. Bhibhe Zoova “ˈlagblɛlowli,” ɔ -kamö kwänɩ -n ˈtɩa -mä -naˈa lagɔwɛlɩbia libho ˈmö, ˈtɛɲɩ ˈwuë Lagɔ ɲɩamöä ˈyi ˈtatinɩ ɛ ˈkä ˈfʋ ˈplɩ!—Mat. 9:38.