-Aˈa -lii -a ˈcɩanɩɛ ˈmö
1. Sɛɛ klɩtɩɛwa -wa biaa Lagɔ ˈa ˈtɩtɩ a -tɩtɩɩ, wlʋnɩ ɔ nɩkpa -wa tɛlɩɛ -digbï, -wa bhlɛˈɛ -lɛya, a sɛ a ˈslɛlɛkäwa ˈnɩ?
1 Nɩkpɛ -ɔ tɛlɩɛ -digbï, -ɔ bhlɛˈɛ -lɛya, a sɛ a ˈslɛlɛkäwa, -lii a ˈki a -bɛ wa ghlɛnɩɛ ˈmö ˈn wa nʋä ˈwa libhi. Libhonʋnɩli -mimii -wʋ -lɛ, wa ˈnɩɛ ˈkwädlɩ libho ˈmö nʋnɩ, maa libhi a ˈki -mimii a ˈyize a dɔˈwu wa sɩɛ ˈbhle ˈn wa nʋnɩɛ libho ˈmö. ˈN -mimii -wʋˈɛ -lɛ wa nʋnɩɛ ˈkwädlɩ libhi a ˈki ˈwuë ˈmö. -Sɩbhä a libhonʋwa ˈla -wa yɛɛ -mä ˈwa libho ˈmö -jɩbhɛnɩɩ, lɛ a libhonʋnɩli ˈla wa nʋnɩɛ libhi a ˈki a -bɛ ˈmö wa -swii ˈkwädlɩ -mä ˈwa -kotoku ˈmö, ˈmö wa -yiɛ sasɛ libho ˈmö nʋnɩsɛ -miˈla a dɔˈwʋ. “-Naˈa lagɔlibhoo -n nʋä, wʋ ˈkä Lagɔ dlɩ yɔwʋ nɛnɩ a gbʋ mʋʋ nɩ plɛnɩmö. ˈƆ wɛlɩɩ bhïlii gbëaa, -lɛ a dɔˈwʋ -naˈa libhoo ˈnaa -kamö ˈklʋ ˈmö ˈkpëakpëanɩ.” Saˈa -sɩbhä Biblë zʋä klɩtɩɛwa -wa bia kumösusɛ lagɔwɛlɩ ˈdɩ ˈmö. (2 Tim. 2:15) -Mä -aˈa -kotoku ˈmö a -lu a -mu kä ɔ dɛsɛ -wʋ zi ɔ -miˈla ˈwuë ˈwʋ ˈnɩ? Biblë mɛɛ, -aˈa libhonʋnɩlu -wʋ kää teɲii dɛsɛ, -a ghlɛnɩɛ ˈmö “ˈn -a ˈcɩaa nɩkpa wa ˈkä Zezwii a -nʋa ˈzʋ.” (Mat. 28:19, 20) -Sɩbhä a za -a kä -a ˈkä ˈyli yɔwʋ ˈtɛmanɩ -a ˈkä sɛɛ -a ˈkää sasɛ “Biblë libho ˈmö nʋnɩ” ˈcɩɛ. Miɛ abhlɩ, maa ˈkwädlɩ a libhonunɩlii -mimii -wʋ -mä -aˈa -kotoku ˈmö, ˈmö klɩtɩɛwaa ˈwuë kää wa ˈkä sasɛ libho ˈmönʋnɩsɛ ˈcɩɛ—nzɩ wa ˈkä nɩkpa Lagɔ ˈa gbëawɛlɩ ˈcɩa.—Prov. 22:29.
2. −Libhonʋnɩlii a -mi -a ghlɛnɩ ɔ ˈmö ˈn -a ˈcɩa ɔ nɩkpa lagɔwɛlɩ ˈnɩ?
2 -Aˈa libhonʋnɩlii -yɩ kää teɲii dɛsɛ -a ghlɛnɩɛ ˈmö ˈn -a ˈcɩaa: Biblë -wʋä -lɛ ˈwë, libhonʋnɩlii a -mii -a bhɛnɩ ɔ -a ˈkä ˈmö ghlɛnɩ ˈnɩ? Yɩ glaˈmö a tɛkänʋ a bhɛnɩɛ -a ˈkä ˈmö ghlɛnɩ -a ˈkä Biblë a gbëawɛlɩɩ ˈcɩa muä Quˈenseigne réellement la Bible ? -A -ɲɛ nɩkpɛ ˈsɔ -kä ˈbɔgʋ ˈla a ˈcɩɛcɩʋ zɛmö bhɩɛ ˈwë, ˈbɔgʋ wa laa « Gardez-vous dans l’amour de Dieu » ˈmö -a -ɲɔ ˈcɩɛnɩɛ ˈmö nzɩ ɔ ˈkä sɛ ɔ ˈkää Biblë ˈmö a ˈpäpägböö -gänɩ -mä ˈɔ zɩkpa ˈmö ˈcɩɛ. -Sɩbhä a za -a kä -a ˈkä ˈslɛlɛ -kä ˈbɔgwɩ nɩ ˈsɔ a libho ˈmö -nʋnɩ dɔˈwʋ. -A käˈɛ ˈgämö -a ˈkä bloswi -mimii -mä -aˈa ˈcɩanɩlii a glaˈmö zʋmö. Blosu wa laa Lagɔ ˈa ˈtɩtɩ a -tɩtɩɩ!, libhonʋnɩlii -yɩ kää teɲii dɛsɛ -a ghlɛnɩɛ ˈmö ˈn -a tɛɛ Biblë a ˈcɩacɩʋ a glaˈmö a -nʋ wʋ glɩnɩɛ. ˈN -mä -aˈa pɩɔ ˈyli nɩkpa -waa sasɛ ˈmözɛlɩsɛ -yi, -wa bhïlaˈɛ gbɩ -mimii -yɩɲɩ lagɔbɔgwɩ a -bɛ -aa -kä, ɛ -käˈɛ -aa -kä ˈlɩlɩlɩ, -lɛ a dɔˈwʋ -a bhɛnɩ -a ˈkä blosu wa laa -A -pʋnɩ agɔ ˈyukwli, ɛ -käˈɛ -A -pʋnɩ Lagɔ ˈyukwli -a ˈkä ˈkwädlɩnɩ -bhölɩ ˈmö ghlɛnɩ nzɩ -a ˈkä lagɔwɛlɩ ˈcɩa. Libhonʋnɩlu -mumu -a bhɛnɩɛ -a ˈkä ˈmö ghlɛnɩ nzɩ nɩkpa -a -ɲɛ cɩɛɛ Biblë -a ˈkʋa -mä -aˈa ˈwlugïganɩzɩkpa ˈmö sʋlʋnɩ, mu -lɛ blosu wa laa Qui fait la volonté de Jéhovah ? Video -mimii -wʋ -lɛ -a kää -a ˈkä libho ˈmönʋnɩsɛ -yi, yɩ glaˈmö a -nɩ mi -lɛ video wa laa ˈSaa kä bhä ʼŋlɩ ˈn a kä ɔ a ˈkä Biblë ˈcɩɛ nɩ? ˈn -mu wa laa Que se passe-t-il dans une Salle du Royaume ? -ɲɛ -mu wa laa Dieu a-t-il un nom ? ˈsɔ.
3. ˈKïbhï wa ˈkää -mä -aˈa Lagɔ ˈa ˈKämanɔɔ a libho a kpɩ -yɩ ˈkää zɛmö ˈwlʋ ˈklʋ zʋʋ, -lu -mu a nʋnʋdɔˈwʋ yɩ bhɛnɩ ɔ yɩ -kaɲɩ kwänɩ ˈnɩ?
3 ˈKïbhï wa ˈkää -mä -aˈa Lagɔ ˈa ˈKämanɔɔ a libho a kpɩ -yɩ ˈkää zɛmö ˈwlʋ ˈklʋ zʋʋ, -yiɲɩ kwänɩ -a ˈkä lagɔbɔgwɩ -a ˈcɩanɩɛ ˈmö sasɛ libho ˈmö nʋnɩsɛ -yi. ˈN -a -kä ˈyli yɔwʋ ˈtɛmanɩ nzɩ -a ˈkä -aˈa libhonʋnɩlii sasɛ libho ˈmö nʋnɩ, ˈdɩmözʋwɛlɩ -yɩ ˈbhöönɩɛ Lagɔ ˈmö -yɩ nʋä nɩɩ: “-Naˈa nɛmönɛmösaa, ˈnɛmanɩ ˈkwädlɩ -sɩbhä ˈwʋ, -sɩbhä ˈkä ˈmö zlɔnɩ ˈyize. -Naˈa lagɔwɛlɩɩ -n ˈcɩaa nɩkpaa, köbhɩɩ ˈyli yɩ ˈkä ˈmö zlɔnɩmö. -N -kä -sɩbhä zʋʋ, -naˈbhë, -sɩbhä yi -na ˈpʋpʋɛ ˈmö -kä, ˈn -wa -pʋnɩmöä ˈyukwlii, -sɩbhä yiˈɛ wa ˈpʋpʋɛ ˈmö -kämö.” ˈmö -a -gänɩɛ daˈa.—1 Tim. 4:16.