-A nɩ ghlɛnɩ blosu wa laa Tɩtɩ a -tɩtɩɩ ˈmö -a ˈkä nɩkpa ˈcɩa
1. Sɛ wa -bhɛ ɔ blosu wa laa ˈTɩtɩ a -tɩtɩɩ ˈnɩ?
1 -Aˈa zwie ˈmö a Lagɔ ˈa ˈKämanɔɔ a Libho a kpʋ ˈmö a ˈsaa -a ˈyɩ a-a ˈylɩmö, mɩɛ nɩɩ, -aˈa libhonʋnɩli -yɩ -wʋä -mä -aˈa -kotoku ˈmö, -a ghlɛnɩɛ ˈmö ˈn -a ˈcɩaa a glaˈmö a -nʋ -bhlʋ -wʋ kää dɛsɛ mu -lɛ Lagɔ ˈa ˈtɩtɩ a -tɩtɩɩ! Biblë a gbɛlɩ wa ˈdɩɛ ˈŋlɩ, sɛ yɩ gbää, wa ˈnɩɛ -mä zʋ, -lɛ a dɔˈwʋ, ˈligbëlowli -a -wʋä lagɔwɛlɩ ˈɲɛ dɔˈwʋ, ɔ -kɩɩ -mä Biblë ˈmö aˈbhë ɔɲɩgäsɛ ˈmözlɩ, yɩ ˈkɔa dlɩ yɔwʋ nɛmanɩ. -Aˈa lagɔbɔgwɩ -miˈla -a ˈcɩanɩɛ ˈmö, sɛ wa bhɩɛ a za, nɩkpɛ bhɛnɩ ɔ ˈkɩ ɔ ˈyize ˈmöcɩɛnɩ, maa -mu nɩ sɛ wa bhɩʋä a dɔˈwʋ, nɩkpɛ -kä ɔ ˈkʋ ˈmöcɩɛnɩɩ, ˈcɩaɲɔ kä ɔ ˈkɔ ˈyukugänɩ. -Sɩbhä a za, -a -kʋʋ nɩkpɛ ˈnɛɛ, -a nɩ ˈtɛmanɩ ˈyli yɔwʋ sɛ wa ghlɛnuä ˈmö ˈn wa cɩɛɛ Biblë -a ˈkɔ -sɩbhä sʋlʋnɩ. -lɛ a dɔˈwʋ , sɛ wa -kä -mä Biblë ˈmö ˈtɩtɩ a -tɩtɩɩ ˈcɩɛ ˈn yɩ zɩɛ dlɩ kɛ, ˈligbëlowli -a -wʋä lagɔwɛlɩ ˈɲɛ dɔˈwʋ yi yɩbhlɩnɩ.—Mat. 13:44.
2. −N -kä nɩkpɛ tɛkädɔˈwʋ ˈylɩmö ˈyɩ, sɛ -n bhɛnɩɔ -n ˈkä blosu wa laa ˈTɩtɩ a -tɩtɩɩ ˈmö ghlɛnɩ ˈnɩ?
2 -N -kä nɩkpɛ tɛkädɔwʋ ˈylɩmö -yɩɛ mö: -N bhɛnɩ -n ˈkä nɩɩ: “Sɛ zɩkpa ˈkää zɩkö -wʋ a dɔˈwʋ nɩkpa a -bɛ dlɩ libhua nza n -yimöa ˈylɩmöä -a ˈkɩ ˈgämö yɔwʋ ylɩnɩ. -N kɩ ɔ dlɩ ˈwʋ nɩɩ, -lii yɩ ˈylɩ -bhlʋ ˈmö nɛmanɩ -a? [ˈTatinɔ ˈyi ɔ ˈkä -gömö -sɛ.] Biblë kä ˈtɩtɩ a -tɩtɩɩ ˈmö -yɩ bhɛnɩɛ yɩ -kaɲɩ dlɩ ˈwʋ ˈtɛmanɩ. ˈKïbhï Biblë sɛɛ zɛmö a glaˈmö a -nɩ -mimii miɛ dɛˈɛ.” ˈƝɛ ˈligbëlowli blosu yowʋ, ˈn ˈɲɔ ˈdɩ nɩɩ, -mä wʋ -gömö a nimïyɩbhäkïbhï -yɩ -wʋä -mä, ɔ nɩ -sɛ -lɛ -bhlʋ. ˈCɩɛcɩɛkïbhëa ɔ -sɛɛ -lɛ, ghlɛnɩ a zɛmösɛkïbhëa a ˈtɛkäna ˈmö, sɛ wa ghlɛnɩɛ blosu ˈla ˈmö ˈn wa cɩɛɛ Biblë, -n ˈkɔ -sɩbhä sʋlʋnɩ. -N bhɛnɩˈɛ -n ˈkɔ ˈkïbhë ˈwʋ ˈyɩbhänɩ a ˈkää ɔ dlɩ kɛ zɩ, -a -glɛɛ blosu ˈla a ˈcɩɛcɩɛkïbhë ˈwʋ -n -sɛ -lɛ -naˈbhë. ˈN sʋlʋnɔɔ sɛɛ blosu ˈla ˈkɔɔ kwänɩ ɔ ˈkä -mä Biblë ˈmö ˈkïbhë ˈla a zɛmösɛna ghlɩ. ˈN ˈcɩɛcɩɛkïbhëa ˈla a video -kä -mä jw.org ˈklʋ -wʋʋ, ˈmö lagɔwɛlɩbiawa -mumuë tulanɩɛ tɛɛ nɩkpɛ ˈla ˈylimö.
3. Sɛ wa ghlɛnɩɛ blosu wa laa ˈTɩtɩ a -tɩtɩɩ ˈmö ˈn wa ˈcɩaa nɩkpa Biblë, sɛsɛni ˈmö.
3 Sɛ -n ˈkää Biblë a ˈcɩacɩʋ -su: (1) Nimïyɩbhäkïbhëa -a kää ˈnaba yɔwʋ -a yuluä, wa cɛlɩɛ -mä blosu ˈla ˈmö wa ˈkä ˈligbëlowli kwänɩ nzɩ ɔ ˈkä yɩ dɛsɛkäkïbhï ˈwlumö zʋ, zɛla ˈmö. (2) Zɛmösɛkïbhëa -maˈla -a -gä ˈyuku, zɛla ˈmö. (3) Biblë a gbɛlɩ -yɩ cɛlɩnɩɛ wa laa italikö ˈmö, zɛli ˈmö ˈn sɛ -n ˈkɔɔ nimïyɩbhä ɔ ˈkä nimïyɩbhäkïbhëa a zɛmösɛna -mä Biblë ˈmö ghlɩ, -sɩbhä -n nɩ ˈyɩbhɔ nimï. (4) Zɛmösɛkïbhëa -mämaa -kä -lɛ zɛmö -wʋ, ˈki ˈla -a ˈyɩɛ -sɩka ˈylɩmö, sɛ wa gbää -a nɩ zʋ -mä 2 -ɲɛ 3 ˈsɔ ˈmö a dɔˈwʋ, zʋ -sɩbhä. ˈN -mä video -bhlʋ ˈmö a ˈsaa -wʋä -mä -ɲɛ nimïyɩbhäkïbhëa -kä yɔwʋ mönɩ, ˈn -n ˈnɔɲɩ -bhlɛ tɛkäsɛ ˈylimö tulanɩ, tulanɔɲɩ ˈylimö. (5) ˈGbëbhlenɩdɔˈwʋ, nimïyɩbhäkïbhëa -a kää ˈnaba yɔwʋ, ˈyɩbhäna ˈligbëlowli ˈwʋ nzɩ -n ˈkɩ dlɩ ˈwʋ -kä nɩɩ, ɔ kɩ ˈmö ˈnʋ.
4. ˈSaa -kaɲɩ ɔ kwänɩ nzɩ -a ˈkä libhonʋnɩlu ˈla ˈslɛlɛsɛ ˈmö ghlɛnɩ ˈnɩ?
4 ˈCɩɛ sasɛ libhonʋnɩlu nɩ -wʋ kää teɲii dɛsɛ. -A -kä ˈkwädlɩ nɩkpɛ lagɔwɛlɩɩ ˈɲɛɛ yi, -a -kä sɛ -yi nɩɩ, wʋ yi -lɛ ŋwaa, -a nɩ ghlɛnu ˈmö ˈyize. ˈKwädlɩ -n -kä nɩɩ, -n -ɲɛ nɩkpɛ ˈkä Biblë ˈcɩɛɛ, Biblë a gbɛlɩ -yɩ -wʋä -mä ˈcɩɛcɩɛkïbhëa a ˈkää yɔwʋ ylɩ ˈmö, ˈpä ɔ dɛ dlɩ nzɩ sɛ -n -ɲɔ ˈsɔ a ˈkɩɛ dlɩ kɛ ˈpänɩ -n ˈkä -sɩbhä yɩbhlɩnɩ ˈwë -n ˈkɔa bhäla ˈylɩmöä mö. (Prov. 15:28; Ztw. 17:2, 3) ˈN -n -kä blosu ˈla -bɛ ˈwʋ libho ˈmö nʋnɩ, wʋ libhonʋnɩ dɔˈwʋ -n -kä ˈslɛlɛ -kä, yɩ yi ˈŋlɩ -kä -n yi -kamö nɩɩ, -mä -aˈa lagɔbɔgwɩ -a ˈcɩanɩɛ ˈmö a glaˈmö a -nu -wʋ nɛnɩmöä dlɩ yɔwʋ ˈcɩacɩa dɔˈwʋ ˈmö wʋ glɩnɩɛ!