ˈBɔgʋ wa laa Qu’enseigne la Bible ? a ˈmö a -lii, nʋnɩɩ sasɛ libho ˈmö
Sɛɛ lagɔwɛlɩɩ a ˈcɩɛcɩɛɲɔ cɩɛɛ ˈsaa Biblë ˈcɩaa -tiamö, sɛ ɔ -gäniɛ -mä ˈɔ zɩkpa ˈmö, -sɩbhä Lagɔ ˈa ˈwugɔmʋʋ -kä nɩkpɛ dlɩzɛmö libho nʋ a ˈsaa yɩ ˈwälanɩɛ ˈylii, ˈwlʋnɩɛ -mä ˈɔ zɩkpa ˈmö ˈyli. (Ps. 1:1-3) -A -kä ˈbɔgʋ wa laa Qu’enseigne la Bible ? a ˈmö a -lii libho ˈmö nʋnɩsɛ -yi, -a yi nɩkpa -a ˈcɩaa Biblë kwänɩ nzɩ wa ˈkä lagɔwɛlɩɩ ˈmö a dɔˈwʋ ˈyukusɛ mö ˈyize.
Nimïyɩbhäkïbhï yɩ tɛɛnɩɛ ˈwʋ: ˈCɩɛcɩɛkïbhï ˈwuë, nimïyɩbhäkïbhï yɩ tɛɛnɩɛ ˈwʋ. Nimïyɩbhäkïbhï ˈla a zɛmösɛna -wʋ -mä ˈcɩɛcɩɛkïbhï ˈla ˈmö. -N bhɛnɩ -n ˈkɔ -lɛ a nimïyɩbhäkïbhï ˈwʋ ˈyɩbhänɩ nzɩ -n ˈkä ˈɔ dlɩ ghäyɩ ˈpä wɛlɩ a ˈkää bhäla ˈcɩɛ a dɛ. -N bhɛnɩˈɛ -n ˈkɔ ˈdɩ ˈɲɛ nɩɩ, ɔ nɩ bhïla ˈtikïyie ˈwʋ sɛ ɔ pää nimïyɩbhäkïbhï ˈla a dɛ dlɩ a wɛlɩ. ˈSaa ɔ sɛnɩɛ ˈmö nɩ -kpö ˈwʋ -wʋ, tɔ -lɛ -gba -bhlʋ -kpɔ ˈla ˈmö ˈdɩ ˈɲɛ nɩɩ, ɛˈɛ -bhö mii. ˈƆ ˈmösɛnɩwɛlɩɩ mii -kamöä kwänɩɛ nzɩ kïbhï -n kää -n ˈkä ˈwʋ pɩɛnɩ, -n ˈkɩ -yi.—Prov. 16:23; 18:13.
-Lii -mimii: ˈKïbhëa a zɛlɩɛ ˈmöö, ɔ -kaa ˈmö ˈnʋʋ, ˈn ɔ -kaa ˈwʋ ŋluu, -n bhɛnɩ -n ˈkɔ ˈdɩ ˈɲɛ nɩɩ, ˈbɔgʋ a dɛɛ ɔ ˈkää -lii -mimii ˈcɩɛ, ɔ nɩ zɛlɩ bhäla -lɛ ˈmö. A -kä ˈwʋ ˈsɔ ˈcɩɛnɩɛ yi, -n bhɛnɩ -n ˈkä minitiayie ˈwʋ ˈlibhï -n ˈka ˈylɩmö ˈn ɔ -kä ˈsaa ɔ zɛlɩ a-a ˈmö ɔ ˈyize, ˈmö ˈnʋ a za. Maa yɩ -kä ɔ -li a -lii ˈmö -kä, a -kä ˈcɩɛ dɔˈwʋ -wʋ, -n bhɛnɩ -n ˈkä ˈtɛɲɩ ˈwʋ ˈlibhï nzɩ a ˈkä -lii -mimii ˈla ˈmö zɛlɩ ɛ -käˈɛ zɛmösɛkïbhï -yɩ sɛsɛnɩɛ ˈsaa a -wʋä ˈcɩɛ dɔˈwʋ -gömö ˈtɩɩ, ˈmö a nɩ zɛlɩ ˈmö. Ɔ -kä ˈmö zɛlɩ ˈwë, nimïyɩbhäkïbhï -n gïganɩɛ ˈwlu ˈwë ˈn -n yoo ˈylɩmö -yɩɛ mö, ˈmö -n nɩ yɩbhänɔ ˈwʋ.
ˈWʋligbanɩkïbhï: Nimïyɩbhäkïbhïï -yɩ -wʋä -lɛ ˈkïbhï a tɛɛnɩdɛ a zɛmösɛna -wʋ -mä ˈwʋligbanɩkïbhïï -yɩ -wʋä -lɛ ˈkïbhëa ˈla a bhɩɛnɩdɛ. -N bhɛnɩ -n ˈkä ˈkïbhï ˈla ˈmö ghlɛnɩ nzɩ -n ˈkä ˈylɩmö ˈn ɔ -kä bhɛnɩ ɔ ˈkä ˈsaa a ˈcɩɛɛ ˈmö ˈnʋ ˈn ɔ -kä bhɛnɩ ɔ ˈkä yɩ dɛsɛkäkïbhï, -gömösɛsɛnɩ. A nɩ ˈpä wɛlɩ ghäyɩ a ˈkä ˈwʋligbanɩkïbhï ˈmözɛlɩ, yɩ -ɲɛ Biblë a gbɛlɩ ˈwuë wa zwiɛ yɔwʋ ˈsɔ. ˈN ˈɲɛ lagɔwɛlɩɩ a ˈcɩɛcɩɛɲɔ ˈdɩ nzɩ ɔ ˈkä Biblë a gbɛlʋ ˈla, ɛ -käˈɛ gbɛlɩɩ, -yɩ -wʋä -lɛ ˈwʋligbanɩkïbhëa ˈla yɔwʋ ˈmö ghlɛnɩ ɔ ˈkä ˈylimö tulanɩ nɩɩ, ˈkïbhëa ˈla gbëaa a kää ˈmö.—Ztw. 17:2, 3.