-ABHƲA KLƖTƖƐWAA SƐ -A -BHÖLƖƐ

-Sɛ -lɛ ˈnɛɛnɩsɛ -naˈa ˈbhlibhïle

-Yɩ kä ɔ ˈŋlɩ ˈn -a ˈkä ɔ ˈnɛɛnɩsɛ -aˈa ˈbhlibhïle -lɛ -sɛ ˈnɩ? -A -kä flimö ylɛ yi, -a -kä ˈlʋ ˈyukwli -pʋnɩɛ yi, -a -kä ɛtɛnɛtɩ ˈklʋ möä yi, -a -kä ˈbɔgʋ ˈmö zɛlɩɛ yi, -a kä -a ˈkɩ sasɛ ˈmö gbäzɩ. Ɛˈɛ -bhö ɲɩasɛ, maa mii -kaɲɩɛ dlɩpäsaa a -ma nɛnɩɛ ˈɲɛ. ˈSaa -a sɛɛ -lɛ bhɛnɩ yɩ ˈkä -aˈa -wʋwʋsaa ˈmö zigbanɩ. Maa zɩˈɛ a dɔˈwʋ, -lii a -mi ˈnɩɛ Zoova dlɩ yɔwʋ nɛnɩ ˈlɩlɩlɩ, mii -wʋä -mä ˈbhlibhïle a -bɛ ˈmö. (Ps 11:5; Ga 5:19-21) Nza Biblë zʋʋɲɩɛ ˈdɩ ˈmö nɩɩ, -li a -lii -yɩ nɛnɩɛ Lagɔ dlɩ yɔwʋ, mö -a kää -a ˈkä dlɩ ˈwʋ ˈpä. —Fil 4:8.

A NƖ YLƐ VIDEO WA LAA ˈBHLIBHÏLE A KE -MA N KÄ Ɔ -LƐ -SƐ ˈNƖ? ˈN A NƖ YƖLƖƖ NIMÏYƖBHÄKÏBHÏ ˈLƐ YƆWƲ:

Bhlaˈmö, Ghlɔɔmö a -nʋa ˈa ˈbhlibhïle -bhlʋ a dɔˈwʋ, wa gwɩ -këë, ˈn -bhlʋ kuä. Sɛ yɩ -ɲɛ zɩˈɛ a ˈbhlibhïle ˈwlʋnɩ ɔ ˈnɩ?
Sɛɛ lagɔzɩkpa ˈmö a -nʋa bhɛnɩ bhä wa ˈkä -dɩgbö kwänɩ, nzɩ wa ˈkä ˈnɛɛnɩsɛ ˈwa ˈbhlibhïle -lɛ -sɛ ˈnɩ?
-A -kä ˈbhlibhïle -lɛ -sɛɛ yi, sɛ -a ˈkä ɔ Ghlɔɔmö 12:9 ˈmö a wɛlɩɩ ˈwʋ dlɩ ˈpä ˈnɩ?
-Mä ˈa ˈbɛyɩ a dɔˈwʋ, ˈbhlibhïle a kii -mi nɛnɩ ɔ ˈnɩ?

-NAˈBHË -N NƲ Ɔ -LU -A? MAA ˈSAA -MUMUË NƲÄ A ˈYIZE ˈMÖ -N YLƐ BHÄ -A?

ˈSaa zɩˈɛ a ˈbhlibhïle a -bɛ ˈcɩaa miɛ nɩɩ, -a nɩ glɩ -lɛ cuu, -a nɩ tɩ -lu nʋ, nzɩ -a -kä mumuë ylɛ, -a ˈkä ˈsaa wa nʋä a wɛlɩ ˈmö zɛlɩ. -Mä tleviziɔ ˈmö a -lii wa tulaa, flimö, ˈn ˈbɔgwɩ ˈmö a wɛlɩɩ, nɩkpa -mumuë a -lii wa -sɛɛ ˈwlumöö, a wɛlɩɩ ˈmö yɩ bhïlaa, maa -aˈa -gömö a wɛlɩɩ ˈmö yɩ ˈnɩɛ bhïla. -Sɩbhä a ˈbhlibhïle -bhölɩ -tiamö abhlɩ. Maa, -mumuë a -bɛ a dɔˈwʋ, ˈbhlibhïle -ɛɲɩ ˈmö wa bhɛnɩɛ wa ˈkä waɲɩgäsɛ -lu nʋ, mɛɛ nɛnɩɛ. -Mumuë, wa ˈkä ˈlwɩ bhlɩ, wa ˈkä desɛɛ ˈpä, wa ˈkä bie mö, wa ˈkä guë mö ˈn wa ˈkä balɔɔ ˈpä, -sɩbhä a -lii ˈmö wa -wa. Maa, ˈbhlibhïle -mɛ -n yi -lɛ -sɛ aˈbhë -kë, “ˈsaa ˈghlimanɩɛ Lagɔ ˈa ŋlɩɩ, yɩ ˈyize mö -n nɩ nʋ.”—1Kɔ 10:31.