A nɛmönɛmösa nɩ ŋäla ˈnapɛ a sɛ
1 Nɩkpaa ˈwuë -wa -binɩɲɩɛ, ˈyuylukwë ˈmö wa -wʋä, ˈwa nɛmönɛmösa -ɲɛ ˈwa -wʋwʋsa ˈsɔ ˈnɩɛ lagɔsɛ -wʋ. “-Li -yiɛ -lu a -lu gwë glɛɛ” wa nʋnɩɛ -mä guylukwëa ˈmöö, ˈmö lagɔ a gbëaawɛlɩ pää ˈpɩwʋ -a tia bhäla ˈmö bhlinɩ. -Sɩbhä a za, Zezwii ˈa tietieɲɔ Pɔɔlʋ ˈɲɛɛ klɩtɩɛwa ˈdɩ nɩɩ “Sɛɛ nɩkpa -muëë glɩnɩɛ ɔ -nʋä kää wa ˈkä nɛmöö, -a nɩ nɛmö -sɩbhä.”—Ɛfɛ. 5:8, 11.
2 “-Mɔ Zezwii Klii ŋälanɩɛ ˈɔ wɛlɩ ˈmö ˈwʋʋ, ˈmözlɔnɩli a ˈyize ɔ nʋä.” ˈƆ nʋnʋli -ɲɛ mäˈä ˈpɩwʋ a nɩkpa -wa -wʋä ˈyuylukwëa ˈmö a -nɩɩ ˈnɩɛ ˈwlʋnɩ ˈlɩlɩlɩ. (Ɛfɛ. 5:9) -A -kä -a ˈkä -muë Zezwii ŋälanɩɛ ˈɔ wɛlɩ ˈmö ˈwʋ a sa -wʋ nʋʋ, -mä -aˈa klɩtɩɛ -zɩkpa ˈmö, -aˈa lagɔsɛ a nɛmönɛmösa nɩ kä ˈŋlɩ -lizokuu ˈla ˈwuë ˈkä ˈpɩwʋ ˈpɔɔ. -A nɩ glɩnɩ nɩkpa a -muë nɛnɩɛ Zezwii dlɩ yɔwʋ. -A käˈɛ ˈgämö -a ˈkä Lagɔ a gbëawɛlɩ a dɔˈwʋ -aˈa dila ˈwuë klʋ kälɩ, -a ˈkɩ dlɩ a dlɩ ˈmö ˈwʋ ŋlunɩ, -a ˈkä yɩ ˈmäna dlɩ zɛmö -kä. Zezwii -kä nɩkpɛ -ɔ wɛlɩ ˈmö ˈwʋ ŋälanɩ a sɛ ɔ nɛmöä, -a nɩ nɛmö -sɩbhä -mä -aˈa zɩkpa ˈmö -ɲɛ -aˈa lagɔwɛlɩbia libho ˈmö ˈsɔ.
3 Sɛɛ -naˈa nɛmönɛmösa ˈkää ŋäla ˈnapɛ a sɛ, tɛlɩ ˈkwädlɩ -sɩbhä sɛ: Sɛˈɛ Zezwii ˈɲɛ a-a ˈɔ ˈwʋ-bhlinɩwaa ˈdɩ nɩɩ: “ˈA nɛmönɛmösa nɩ ŋäla ˈnapɛ a sɛ nɩkpa ˈwuë ˈwʋ.” (Mat. 5:16) Zezwii a sa, -sɩbhä -a biamöä Lagɔ ˈa ˈKämanɔ -ɲɛ ˈɔ ˈsaa ɔ gbää ɔ ˈkä ˈyli ˈwälanɩ a ˈtɩtɩ. -A -kä nɩkpa -mä ˈligbï ˈmö ˈylɩmö -yɩɛ möö, -a -kä -mä -aˈa libho ˈmö a -nʋa lagɔwɛlɩ ˈɲɛɛ, -a ˈkɩɩ -mä -aˈa -suku ˈmö a -nʋa ˈɲɛɛ, -a ˈkɩɛ -aˈa dɛglɩwa ˈɲɛɛ, ˈn -a ˈkɩɩ saa ˈwuë bianɩɩ, sɛɛ ˈnapö ŋälaˈɛ nɩkpa ˈwʋʋ, -sɩbhä -a -wʋä daˈa -mumuë ˈwʋ ŋäla dɔˈwʋ.—Fil. 2:15.
4 Sɛˈɛ Zezwii nʋ a-a nɩɩ -mumuë yi a-a -wa ŋäla nɩkpaa ˈwʋ -gblɩɩ. (Zaah 3:20) “ˈTɩtɩ a -tɩtɩɩ ˈla, mɩɩ ŋäla -tiamö nɩkpɛ ˈwʋ. Zezwii Klii, sɛ Lagɔ -wʋä tɩɩ, -ɔ -wʋä -sɩbhä, ˈɔ ˈghlinɔ ˈmö yɩ tulanɩɛ ˈylimö.” Zaa, sɛ nɩkpa a -bɛ ˈnɩɛ ˈwʋ ŋlu yɩ ˈkʋä ˈwʋ ŋäla, -sɩbhä ˈnɩɲɩɛ swɩ yɔwʋ ˈkuanɩ. (2 Kɔ. 4:4) Zoova ylɩ -mä nɩkpa ˈwuë a dila zɛmö ˈwʋ, ˈn -wa nʋä -lii -yɩɛ ˈmözlɔnɩ, ɔ ˈnʋa -mä ˈɔ -nʋa a jijoˈwʋ yɩbhänɩ.
5 ˈN sɛ Zoova yɩbhää, -a -kä -sɩbhä nɛmö, -a -kä ˈwʋ ŋlu, ˈɔ wɛlɩɩ -kaɲɩ ˈwʋ ŋäla, -a yiɛ -abhlɩ -sɩbhä -mumuë ˈwʋ ŋälamö. -Aˈa nʋnʋlii -kʋä ˈylimö tulanɩ nɩɩ, “Lagɔ ˈa wɛlɩɩ -yɩ ŋälaa nɩkpa ˈwʋ ˈn wa ghlɩɛ ˈpʋpʋɛ”, ˈmö -a -suä -tiasɛ, yi yuë -mä ˈsunɩ nzɩ wa ˈkä ˈyli yɔwʋ ˈtɛmanɩ, wa ˈkä ˈmö zigbonɩ, wa ˈkäˈɛ ˈgämö wabhlɩ ˈnapö a sɛ ŋälamö.—Zaah 8:12.
6 ˈN -a -kä ˈnapö a sɛ ŋäla, -aˈa ˈwälaɲɔ a ˈŋlɩ ˈmö -a ˈghlimanɩɛ, yɩ yiɛ ˈgämö ˈŋlɩ -kä, nɩkpa -wa kää dila a dila yɔ yɩbhlɩnɩ ˈn wa yi dlɩ ˈwʋ -kä nɩɩ, zɩkö wa yi zɩkpa -a ˈnaa ˈkää ˈyli bhɩɛ ghlɩ. (1 Pɩɛ. 2:12) ˈN -a -kä Lagɔ ˈa wɛlɩɩ -yɩ ŋäla nɩkpa ˈwʋ ˈnapɛ a sɛ -yi, -a nɩ ghlɛnii ˈmö nzɩ -a ˈkä -mumuë kwänɩ, sɛ nɩkpɛ ˈwlʋˈɛ ˈyuylukwë ˈmö ˈn ɔ ˈsɩbhëˈɛ dɛɛ zlɩ -gää, wa ˈkä -sɩbhä ˈwa -lizoku kɛ ˈmö -sɛ, nzɩ wa ˈkä -li a -lii nʋ.