-
ˈSaa ˗lɛ ɔ Lagɔ ˈa ˈKämanɔɔ ˈnɩ?A nɩ ˗bhölɩ ˈkwädlɩnɩ!: ˗N yi sasɛ biblë ˈmö ˈnʋ
-
-
ˈCƖƐCƖƐKÏBHË 31
ˈSaa ˗lɛ ɔ Lagɔ ˈa ˈKämanɔɔ ˈnɩ?
Dɛsɛkälu ˗wʋɲɩ wɛlɩɩ Biblë bhïla teɲii muu ˗lɛ Lagɔ ˈa ˈKämanɔɔ a wɛlɩɩ mi. ˈKämanɔ ˈla ˈmö Zoova ˈkää ˈmö ghlɛnɩ nzɩ ɔ ˈkä dʋdʋkpäta ˈbhlɩ a ˗bhlɩɩ ˈwʋ ˈzʋa. ˈSaa ˗lɛ ɔ Lagɔ ˈa ˈKämanɔɔ ˈnɩ? Sɛɛ ˗a ˗yi ɔ sɛ nɩɩ Lagɔ yɛ ˈKämanɔ ˈla sɛ ˈgïla ˈwë ˈnɩ? ˈSaa wʋ yɛ ɔ ˗bhlɛ nʋ ˈnɩ? ˈN ˈsaa wʋ ˈkä ɔ zɩkö nʋ ˈnɩ? ‘Cɩɛcɩɛkïbhë ˈlɛ ˈn ˈCɩɛcɩɛkïbhï ˗mimii ˈsɔ yi nimïyɩbhäkïbhï ˈlɛ zɛmö ˗sɛ.
1. ˈSaa ˗lɛ ɔ Lagɔ ˈa ˈKämanɔɔ, ˈn ˗mɔ ˗lɛ ɔ wʋ ˈKämanɩɲɔɔ ˈnɩ?
Lagɔ ˈa ˈKämanɔɔ, ˈkämanɩzɩkpa a ˗ma Lagɔ ˈgïlaa sɛ ˈmö wa laa ˗sɩbhä. Wʋ ˈKämanɩɲɔɔ mɔɔ ˗lɛ Zezwii Klii mɔ, ɔ ˗wʋ ˗mä zlɩ ˈmö ˈn ɔ ˈkämanɩɛ. (Matie 4:17; Zaa 18:36) Sɛˈɛ Biblë gbää Zezwii a dɛ nɩɩ: “ˈƆ ˈKämanɔɔ ˈnaa ˈkä ˈbhlenɩde ˗kä.” (Lwiikö 1:32, 33) Mɔɔ ˈkää mäˈä dʋdʋ ˈwʋ a nɩkpaa ˈwuë ˗gömö ˈkämanɩ.
2. ˗Wa ˗ɲɛ Zezwii ˈsɔ ˈkä ɔ ˈgämö ˈkämanɩ ˈnɩ?
Zezwii a ˈyize mɔɔ ˈnɩɛ ˈkämanɩɛ yi. Biblë lɛ nɩɩ, ‘˗Gligbïï ˈwuë ˈwʋ a nɩkpaa, gbɩɩ ˈwuë a gbäwaa, ŋäyaa ˈwuë, dʋdʋ ˈwʋ a bhlɩɩ ˈwuë ˗gömö a nɩkpaa, wa ˗ɲɔɔ ˈsɔ wa ˈkää dʋdʋkpäta ˈwuë ˗gömö ˈkämanɩ.’ (ˈYlimötulanɩlii 5:9, 10) ˗Zɩmö wa ˗bhli ɔ ˈnɩ? Sɛɛ Zezwii ˈmaa ˈkäa mäˈä dʋdʋ ˈwʋ yii, nɩkpa a miniɲwɩ mʋa zʋä ɔ nʋa. Maa nɩkpa a 144.000 a ˈyize mʋa ˗ɲɔ ˈsɔ ˈkää ˗mä zlɩ ˈmö ˈkämanɩ. (Zɛlɩ ˈYlimötulanɩlii 14:1-4 ˈmö.) Mäˈä dʋdʋ ˈwʋ a ˗nʋa ˗muëˈla wabhlɩ, Lagɔ ˈa ˈkämanɔɔ muu ˈkʋa ˗gömö ˈkämanɩ.—Psaume 37:29.
3. Sɛɛ Lagɔ ˈa ˈKämanɔɔ nɛnɩ ɔ wʋ ˈkä nɩkpaa a ˈkämanɔɔ ˈwʋ zi ˈnɩ?
Pɩwʋ nɩ ˈwʋ a ˈkämanɩwaa yɛla ˗kamä ˗lii ˈmö wa ˈkä ˗li a ˗lii nʋ, maa waˈaa bhɛnɩ wa ˈkɩ nʋ. ˈTɛɲɩ ˗mɛmɛɛ ˗kä ghlɛ, ˗lɛ wa ˗sʋä ˈn ˗mumuë plɩɛ ˗lɛ wa ˈbhle ˈmö. ˈN wa plɩɛ ˗lɛ ˈbhle ˈmö, waɲɩ a ˈyize a gbʋ muu plɛnuë, waˈaa ˈyɩbhä wa ˈkä nɩkpa wa ˈkämanɩɛ ˗gömö kwänɩ. Maa, Lagɔ ˈa ˈKämanɔɔ a ˈKämanɩɲɔɔ ɔbhlɩ, ˈkämanɩɲɔɔ ˗mɔmɔɔ ˈnɩɛ ˗zɩ bhɛnɩ ɔ ˈkä ˗lɛ ɔ ˈbhle ˈmö ˈplɩ. Lagɔ yɛ ‘ˈKämanɔɔ ˗wʋ ˈnaa ˈkää ˈkwädlɩnɩ ˈyli bhɩɛ sɛ gïla. ˈN wʋ ˈyize mʋʋ ˈkää ˈkwädlɩkwädlɩnɩ ˗bhölɩ.’ (Daniel 2:44) Zezwii ˗kä ˈɔ ˈKämanɔɔ tɛɛ mäˈä dʋdʋ ˈwʋ, ɔ ˈnaa ˈkä ˗mumuë ɔ ˈbhɩa a sɛ ˈwʋ ˈlibhï nzɩ ɔ ˈkä ˗mumuë ˈylimö fälanɩ. ˈKämanɩɲɔ a ˗mɔ kää ˗wawʋ dlɩ zɛmö, ˗ɔ nɛnɩɛ dlɩ ˈwʋ ˈn ˗ɔ ˗wʋä ˗kpöö ˈwʋ ˈmö ɔ glɩnɩɛ. ˈN ɔ yiˈɛ ˈɔ ˗wʋwʋsaa a kii nɩkpa ˈcɩa. Mii ˗lɛ: ˗Wawʋ, kɛgänɔɔ, ˈn ˈmözlɔnɩzlɔnɛ.—Zɛlɩ Isaïe 11:9 ˈmö.
ˈCƖƐ ˗LII ˗MIMII
˗Yɩ kää ˈŋlɩ ˈn Lagɔ ˈa ˈKämanɔɔ nɛnɩɛ wʋ ˈkä nɩkpaa a ˈkämanɔɔ a kii ˈwuë ˈwʋ zi, ˈYi ˈylɩmö.
4. ˈKämanɔɔ a ˗mu ˈtɛɛ ˈmö ˗wʋ ˈkää dʋdʋkpäta ˈwuë ˗gömö ˈkämanɩ
Zezwii Klii ˈtɛɛ ˈmö ɔ ˈkä pɩwʋ nɩ ˈwʋ a ˈkämanɩwaa ˈwuë ˈwʋ zi. Zɛlɩ Matie 28:18 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Zezwii ˈa ˈKämanɔɔ ˗ɲɛ nɩkpaa a ˈkämanɔɔ ˈsɔ, sɛɛ yɩˈɩ ɔ yɔwʋ mönɩ ˈnɩ?
Nɩkpaa a ˈkämanɔɔ a kii ˈwuë, ˈmö yɩ zigbonɩɛ ˈyize. ˈKämanɩwaa bhʋlʋbhlʋ wa ˈkämanɩɛ ˈwa bhlɩɩ ˗gömö. ˈN Lagɔ ˈa ˈKämanɔɔ wʋbhlɩ ˈnaa? Zɛlɩ Daniel 7:14 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
Sɛɛ Lagɔ ˈa ˈKämanɔɔ “ˈnaa ˈkää ˗zɩ ˈyli bhɩɛ” a wɛlɩɩ, sɛɛ yɩ ˗lɛ ɔ ˗li a ˗lii ˈnɩ?
Lagɔ ˈa ˈKämanɔɔ ˈkä dʋdʋkpäta ˈwuë ˗gömö ˈkämanɩ a wɛlɩɩ, ˗yɩ kä ɔ ˈŋlɩ ˈn yɩ ˗lɛ ɔ ˈtɩtɩ a ˗tɩtɩɩ ˈnɩ?
5. Nɩkpaa a ˈkämanɔɔ a kii ˈwuë yi ˈyli bhɩɛ
˗Yɩ kä ɔ ˈŋlɩ ˈn Lagɔ ˈa ˈKämanɔɔ kä ɔ wʋ ˈkä nɩkpaa a ˈkämanɔɔ ˈyli bhɩa ˈnɩ? ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
ˈSaa nɩkpaa a ˈkämanɔɔ ˈwälanɩ ɔ ˈyli ˈnɩ?
Zɛlɩ Ecclésiaste 8:9 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
˗Na dɔˈwʋ, Lagɔ ˈa ˈKämanɔɔ kä ɔ wʋ ˈkä nɩkpaa a ˈkämanɔɔ a ˈbhle ˈmö ˈplɩ ˗a? ˗Yɩ kä ɔ ˈŋlɩ ˈnɩ?
6. Lagɔ ˈa ˈKämanɔɔ ˗lɛ ˈKämanɔ a ˗mu nʋʋɲɩɛ ˈmö
˗Aˈa ˈKämanɩɲɔɔ Zezwii, dɛɛ ɔ ˗wʋ a˗a mäˈä dʋdʋ ˈwʋ, ˗aa sɛ a nɩkpɛ ɔ glɩnɩ a˗a. Zaa, “˗aa ŋäzɩdlɩ ɔ kää teɲii. Ɔ ˗yi sɛ nɩɩ, nɩkpa a ˗muë ˗waa ˈyɩbhä wa ˈkä ˈɲiɲloli nʋ, maa ˗waa ˗lɛ a ˈmötɛɛnɔ ˗kää, mö ˗a glɩnɩɛ.” (Ebleewaa 4:15) Nɩkpa a 144.000 ˗wa ˈtɛɛnɩɛ Lagɔ dlɩɩ, ɲɩbhɛlɩ ˗ɲɛ ˈŋwlɩ ˈsɔ, Zoova gbäzɩɛ ˈmö nzɩ wa ˗ɲɛ Zezwii ˈsɔ ˈkä ˈgämö ˈkämanɩɩ, “dʋdʋ ˈwʋ a bhlɩɩ ˈwuë ˗gömö a nɩkpaa, ŋäyaa ˈwuë, gbɩɩ ˈwuë a gbäwaa,” ˈmö wa glɩnɩɛ.—ˈYlimötulanɩlii 5:9
˗N yɩbhlɩnɩɛ sɛ nɩɩ, Zezwii ˗ɲɛ ɔ ˗nʋa ˈsɔ ˗wa ˗kaɲɩɛ ˗gömö ˈkämanɩɩ, ˗aa sɛ a nɩkpaa wa glɩnɩ a˗a, sɛɛ yɩ ˈtɛmanɩmö ɔ dlɩ ˈwʋ ˈnɩ? ˗Yɩ kä ɔ ˈŋlɩ ˈnɩ?
Bhlɩɩ ˈwuë ˗gömö a nɩkpaa, ɲɩbhɛlɩ ˗ɲɛ ˈŋwlɩ ˈsɔ, ˈmö Zoova gbäzɩɛ ˈmö nzɩ wa ˗ɲɛ Zezwii ˈsɔ ˈkä ˈgämö ˈkämanɩ.
7. Lagɔ ˈa ˈKämanɔɔ a ˗lɔɔ nɛnɩ wʋ ˈkä nɩkpaa a ˗nu ˈwʋ zi
Nɩkpaa a ˈkämanɔɔ ˈgïla ˗lɔɔ a ˗bɛ sɛ, wa dɔˈwʋ mii ˈkää ˈwa bhlɩɩ ˈmö a nɩkpaa ˈwʋ ˗kʋ. Lagɔ ˈa ˈKämanɔɔ käˈɛ wʋbhlɩ ˗lɔɔ, nɩkpa wʋ ˈkää ˗gömö ˈkämanɩ ˈkää ˗gänɩ. Zɛlɩ 1 Kolɛɛtɩ a ˗nʋa 6:9-11 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
˗Na dɔˈwʋ nɩkpa ˈwuë ˗kä Lagɔ ˈa ˗lɔɔ ˈklʋkpamö ˈzʋʋ, sɛɛ zɩkpaa ˈkä ɔ ˗wʋ ˈnɩ?a
˗Na dɔˈwʋ, Zoova kä ɔ zugo nzɩ ɔ ˈkä gbä nɩɩ ˗muë ɔ ˈkämanɩɛ ˗gömö nɩ ˈzʋ ˈɔ ˗lɔɔ ˈklʋkpamö ˗a? ˗Yɩ kä ɔ ˈŋlɩ ˈnɩ?
ˈSaa tula ɔ nɩɩ nɩkpaa ˗waa ˈzʋä ˈɔ ˗lɔɔ ˈklʋkpamö bhɛnɩ wa ˈkä ˈmö zigbonɩ ˈnɩ? Yɩlɩ ˗mä gbɛlʋ 11 ˈmö.
˗Lɔɔ a kii ˈwuë nɩkpaa ˈgïlaa sɛ, yɩ kä nɩkpaa a ˗li a ˗lii ˈmö. ˗Maa, Lagɔ ˈa ˈKämanɔɔ a ˗lɔɔ zi wa ˗nɩɩ ˈwʋ, ˈn yɩ kä ˗aa ˗li a ˗lii ˈmö.
˗MƆMƆƆ ˗KAMÖ NIMÏ ˈYƖBHÄ NƖƖ: “ˈSaa ˗lɛ ɔ Lagɔ ˈa ˈKämanɔɔ ˈnɩ?”
Sɛɛ ˗n ˈkä ɔ gbä ˈnɩ?
DƐSƐKÄKÏBHÏ
Lagɔ ˈa ˈKämanɔɔ, ˈKämanɔɔ a ˗mu ˗bhölɩɛ ˗tiamö ˈmö wʋ glɩnɩɛ, ˗mä zlɩ ˈmö ˗mä wʋ ˗wʋä, muu ˈkää dʋdʋkpäta ˈwuë ˗gömö ˈkämanɩ.
ˈWʋligbanɩkïbhï
˗Muë ˗lɛ ɔ Lagɔ ˈa ˈKämanɔɔ ˈmö a ˗nʋa ˗wa ˈkää ˈkämanɩ ˈnɩ?
˗Yɩ kä ɔ ˈŋlɩ ˈn Lagɔ ˈa ˈKämanɔɔ nɛnɩ ɔ wʋ ˈkä nɩkpaa a ˈkämanɔɔ ˈwʋ zi ˈnɩ?
˗Lii a ˗mi Zoova yɩbhä ɔ wa nɩ ˈzʋ ˈklʋkpamö ˈnɩ?
YILII YƆWƲ
Sɛˈɛ Zezwii nʋ ɔ nɩɩ Lagɔ ˈa ˈKämanɔɔ, dlɩ zɛmö a ˗lu bhä ˗a?
« Le royaume de Dieu est˗il dans le coeur ? » (Ɛtɛnɛtɩ ˈklʋ a ˈcɩɛcɩɛkïbhë)
˗Yɩ kä ɔ ˈŋlɩ ˈn Zoova a Bhlɩnɩwaa ˗wʋ ɔ Lagɔ ˈa ˈKämanɔɔ nimï, ˈn wa ˈnɩ ɔ nɩkpaa a ˈkämanɔɔ nimï ˗wʋ ˈnɩ?
Nɩkpa a 144.000 Zoova ˗sɛ ˗lɛ nzɩ wa ˗ɲɛ Zezwii ˈsɔ ˈkä ˈgämö ˈkämanɩɩ, sɛɛ Biblë gbää wa dɔˈwʋ ˈyi ˈylɩmö.
ˈŊlɔ ˗bhlʋ wa ˈpä a˗a ˗jie ˈmö, ˈsaa kä ɔ ˈŋlɩ ˈn ɔ kɩ ɔ dlɩ ˈwʋ nɩɩ Lagɔ ˈa ˈKämanɔɔ muu bhɛnɩɛ wʋ ˈkä mäˈä dʋdʋ ˈwʋ ˈmözlɔnɩzlɔnɛ ˗lɛmö ˈnɩ?
« J’ai découvert la solution à l’injustice » (Réveillez˗vous !, novembre 2011)
-
-
Lagɔ yɛ ˈɔ ˈKämanɔɔ sɛ ˈgïla!A nɩ ˗bhölɩ ˈkwädlɩnɩ!: ˗N yi sasɛ biblë ˈmö ˈnʋ
-
-
ˈCƖƐCƖƐKÏBHË 32
Lagɔ yɛ ˈɔ ˈKämanɔɔ sɛ ˈgïla!
ˈYlʋba wa laa 1914 ˈmö, ˗lɛ Lagɔ ˈa ˈKämanɔɔ tɛɛ ˗mä zlɩ ˈmö. ˈYlʋba ˈla ˈmö, ˗lɛ nɩkpaa a ˈkämanɔɔ a ˈgbëbhlenɩtɛɲɩ tɛɛ. Sɛɛ ˗a ˗yi ɔ sɛ ˈnɩ? ˗Lii Biblë gbää ˗yɩ ˈkä ˈyli ˈwlʋnɩ ˈn ˈsaa ˗a yɩɛ ˈylɩmö tɛɛnɩ 1914 a ˈylʋba ˈmö ˗këë zɩˈɛ, mö ˗a ˈkää yɔwʋ yɩlɩ.
1. Lii ˗a ˗mi Biblë gbä ɔ yɩ ˈkä ˈyli ˈwlʋnɩ ˈnɩ?
Daniɛlɩ a ˈbɔgʋʋ lɛ nɩɩ wa laa “ˈylʋbö ngbi’sɔ,” yɩ ˈgbëbhlenɩtɛɲɩ ˈmö ˗lɛ Lagɔ ˈa ˈKämanɔɔ ˈkää tɛɛ. (Daniel 4:16, 17) ˈYlʋbö a gwlɩ ngbï a ˈki a ˗bɛ ˈplɩɛ ˈwë, ˈylʋbö ˈla ˗bhlʋ ˗kpɔ ˈmö Zezwii laa ‘lɛgäwaa a ˈtɛɲɩ,’ ˈn ɔ yiˈɛɛ nɩɩ ˈtɛɲɩ ˈla ˈnɩɛ ˗bhlɛ bhɩɛ. (Lwiikö 21:24) ˗A ˈyɩɛ ˈylɩmö nɩɩ ˈylʋbö ngbiˈsɔ ˗kpɔ ˈla, 1914 a ˈylʋba ˈmö ˗lɛ yɩ bhɩɛɛ.
2. ˈTɛɛnɩ 1914 a ˈylʋba ˈmö ˗këë zɩˈɛ, ˈsaa ˗a yɩ ɔ ˈylɩmö ˈnɩ?
ˈYlɩ ˗bhlʋ ˈmö, Zezwii ˈa ˈwʋ˗bhlinɩwaa yoo nimï ˈyɩbhä nɩɩ: “˗Naˈa ˈkämanɔ ˈkɔdʋʋ a ˈyliwlʋnɩzlɩɩ, ɛ ˗ɲɛ ˈpɩwʋ a ˈylibhɩɛdaa ˈsɔ, ˗lɛ a ˈtɛɲɩ ˈla, ɛ ˗kä ghlɛɛ yii, ˈsaa ˗a ˈkɛ bhä ˈmö yɩbhlɩnɩ?” (Matie 24:3) Wa ˈyɩbhɔɔ saˈa nimï ˈn Zezwii yiɛ ˗lii a ˗bɛ ˗yɩ ˈkää ˈwʋ ˈplɩ a wɛlɩɩ bhïla, Lagɔ ˈa ˈKämanɔɔ ˗kä tɛɛ. Ɔ bhïla tʋ, ŋɔmʋgupegupe, ˈn dʋdʋ a tɩtlɛnɩtɩtlɛnɛ a wɛlɩɩ. (Zɛlɩ Matie 24:7 ˈmö.) Biblë nʋˈɛ nɩɩ “ˈpɩwʋ a ˈgbëbhlenɩtɛnɩ ˈmö,” nɩkpa a nʋnʋlii a za, “zila ˗mimii yi ˈmö ˈtɛmanɩ.” (2 Timotee 3:1-5) ˗Li ˈla ˈwuë, tɛɛnɩ 1914 a ˈylʋba ˈmö, mii ˗wʋä ˈyli ˈwlʋnɩ dɔˈwʋ.
3. Lagɔ ˈa ˈKämanɔɔ tɛɛ, ˗yɩ kä ɔ ˈŋlɩ ˈn pɩwʋ ˈtɛmanɩ ɔ ˈmö ˈyize ˈnɩ?
Zezwii ˈzʋä ˈkämanɩɲɔ ˈwë cuu, Sataa ˗ɲɛ ˈɔ zuzukuzokuu ˈsɔ ˈmö ɔ ˗ɲɛ gwɩɛ ˗mä zlɩ ˈmö. ˈN ɔ yiɛ Sataa ˈwlu ˈplɩ. Biblë nɩɩ, “ɔ ˗ɲɛ ˈɔ zuzukuzokuu ˈwuë ˈsɔ, ˈmö wa bhlɩɛ mäˈä dʋdʋ ˈwʋ sɛ.” (ˈYlimötulanɩlii 12:9, 10, 12) Sataa ˗yi a˗a sɛ nɩɩ wa yoˈaa ˗pa ˈyli bhɩa zaa, ɔ ˈwuë ˈklɛ. ˗Sɩbhä a za, ɔ ˈyɩa mäˈä dʋdʋ ˈwʋ a nɩkpa ˈklɩ a ˗bɛ. Mii kää ˈŋlɩ ˈn ˈpɩwʋ ˈwʋ a ˗lii ˈtɛɛ teɲii ˈmö! Maa Lagɔ ˈa ˈKämanɔɔ yi ˗lizokuu ˈwuë ˈyli bhɩa.
ˈCƖƐ ˗LII ˗MIMII
ˈSaa tulaa nɩɩ, 1914 a ˈylʋba ˈmö ˗lɛ Lagɔ ˈa ˈKämanɔɔ tɛɛ ˈn sɛ yɩ sɛɛ ˗aa dɔˈwʋ zɛmö, ˗a nɩ yɩlɩɩ yɔwʋ.
4. Sɛɛ Biblë tulaa nɩɩ 1914 a ˈylʋba ˈmö Lagɔ ˈa ˈKämanɔɔ tɛɛ
Lagɔ gbä ˈn Babilɔɔnɩ a ˈbhlɩlowli Nabikodonozɔɔ yiɛ ˗lii ˗yɩ ˈkää zɩkö ˈwʋ ˈplɩ yɛla ghlɛ. Daniɛlɩ mɔɔ ˗sɛɛ yɛla ˈla zɛmö. Nabikodonozɔɔ ˈa ˈkämanɔɔ ˈn Lagɔ ˈa ˈKämanɔɔ a wɛlɩɩ, ˈmö yɛla ˈla bhïla.—Zɛlɩ Daniel 4:17 ˈmö.a
Zɛlɩ Daniel 4:20-26 ˈmö, a nɩ yɩlɩ ˗ziple ˈmö a ˗lii yɔwʋ ˈn a nɩ yɩlɩ nimïyɩbhäkïbhï ˈlɛ yɔwʋ:
(1) ˈSaa Nabikodonozɔɔ ˈyɩ ɔ ˈylɩmö ˗mä ˈɔ yɛla ˈmö ˈnɩ?—Yɩlɩ ˗mä gbɛlʋ 20 ˈn 21 ˈmö.
(2) Sɛ wa ˈzʋ ɔ su ˈla ˈnɩ?—Yɩlɩ ˗mä gbɛlʋ 23 ˈmö.
(3) “ˈYlʋbö ngbiˈsɔ” ˗kpɔ ˗kä bhɩɛ, ˈsaa ˈkä ɔ ˈwʋ ˈplɩ ˈnɩ?—Yɩlɩ ˗mä gbɛlʋ 26 ˈmö.
Suu ˈkämanɩɲɔɔ ghlɛɛ yɛla ˗ɲɛ Lagɔ ˈa ˈKämanɔɔ ˈsɔ, sɛ yɩ mönɩɛ yɔwʋ
WƐLƖƖ ˗YƖ ˈKÄÄ ˈYLI ˈWLƲNƖ (Daniel 4:20-36)
ˈKämanɔɔ
(1) Suu ˈkɔdʋʋ
ˈKämanɔɔ yɛ ˈbhlenɩ
(2) “A nɩ ˈklɛ suu,” “ˈylʋbö ngbiˈsɔ” ˈkä ˈplɩ
ˈKämanɔɔ yɛ ˈwʋ ˈsɔ tɛɛnɩ
(3) “˗N yi ˈwʋ ˈsɔ ˈkämanɩ”
˗Lii ˗yɩ ˈwlʋnɩɛ tɛkädɔˈwʋ ˈyli...
(4) ˗Mɔ wa pälɩ ɔ suu ˈwʋ ˈnɩ? —Yɩlɩ ˗mä gbɛlʋ 22 ˈmö.
(5) ˈTɛɲɩ ˗mɛ ˈmö ˈɔ ˈkämanɔɔ ˈbhlenɩ ɔ ˈnɩ? —Zɛlɩ Daniel 4:29-33 ˈmö.
(6) “ˈYlʋbö ngbiˈsɔ ˈplɩɛ ˈwë,” ˈsaa ghlɩ ɔ Nabikodonozɔɔ ˈnɩ? —Zɛlɩ Daniel 4:34-36 ˈmö.
˗LII ˗YƖ ˈWLƲNƖƐ TƐKÄDƆˈWƲ ˈYLI
ˈKämanɔɔ
(4) Nabikodonozɔɔ, Babilɔɔnɩ a ˈbhlɩlowli
ˈKämanɔɔ yɛ ˈbhlenɩ
(5) ˈYlʋba 606 Z.ˈN.G. ˈplɩɛ ˈwë, ˈn Nabikodonozɔɔ yiɛ ˈgwɩköbhäɲɔ ˈzʋ, ɔˈɔɔ a bhɛnɩ ɔ ˈkä ˈkämanɩ, ˗këë ˈylʋbö ngbiˈsɔ yiɛ ˈplɩ
ˈKämanɔɔ yɛ ˈwʋ ˈsɔ tɛɛnɩ
(6) Nabikodonozɔɔ yiɛ yɛmanɩ ˈn ɔ yiɛ ˈwʋ ˈsɔ ˈɔ ˈkämanɔɔ tɛɛ
˗Lii ˗yɩ ˈwlʋnɩɛ ˈsɔnadɔˈwʋ ˈyli...
(7) ˗Mɔ wa pälɩ ɔ su ˈla ˈwʋ ˈnɩ? —Zɛlɩ 1 Chroniques 29:23 ˈmö.
(8) ˈTɛɲɩ ˗mɛ ˈmö ˈkämanɔ ˈla ˈbhlenɩ ɔ ˈnɩ? Sɛɛ ˗a ˗yi ɔ sɛ nɩɩ dɛɛ Zezwii yiɛ mäˈä dʋdʋ ˈwʋ, ˈkämanɔ ˈla ˈnɩɛ a˗a ˗bhölɩ ˈnɩ? —Zɛlɩ Lwiikö 21:24 ˈmö.
(9) Dɛɛ ˈkämanɔ ˈla tɛɛnɩ ɔ ˈwʋ ˈsɔ, ˈn ˈtɛɲɩ ˗mɛ ˈmö wʋ tɛɛ ɔ ˈnɩ?
˗LII ˗YƖ ˈWLƲNƖƐ ˈSƆNADƆˈWƲ ˈYLI
ˈKämanɔɔ
(7) Yizlaɛlɩ a ˈkämanɩwaa ˗wa ˈkämanɩ a˗a Lagɔ a ˈŋlɩ ˈmö
ˈKämanɔɔ yɛ ˈbhlenɩ
(8) Wa yɛ Zeluzalɛɛmö a ˗glɔ ˈyli bhɩa, ˈn Yizlaɛlɩ a ˈkämanɩwaa a ˈkämanɔɔ yiɛ ˈbhlenɩ ˈylʋbö a 2.520 ˈmö
ˈKämanɔɔ yɛ ˈwʋ ˈsɔ tɛɛnɩ
(9) ˗Mä zlɩ ˈmö, Zezwii yɛ ˈɔ ˈKämanɔɔ tɛɛ
Sɛ wa zɛlɩ ɔ ˈylʋbö ngbiˈsɔ ˗kpɔ ˈnɩ?
Biblë a gbɛlɩ ˗mimii kwänɩɲɩ ˈn ˗a nʋä gbɛlɩ ˗mimii ˈmö. A yɩɛ, ˈYlimötulanɩlii a ˈbɔgʋ ɲɩaɲɩ ˈdɩ nɩɩ ˈylʋbö ta ˈkïbhë mii bhɛɛ ˈylɩ a 1.260. (ˈYlimötulanɩlii 12:6, 14) Zaa, wa ˗kä ˈylʋbö ngbiˈsɔ nʋʋ, ˈylɩ a 1.260 a ˈki ˈsɔ ˈmö wa gaa. Yɩ ˈwuë mii bhɛɛ ˈylɩ a 2.520. ˗Mä Biblë ˈmö, dɛ ˗mämaa a dɔˈwʋ wa ˗kä ˈylɩ ˗bhlʋ nʋʋ, ˈylʋba ˗bhlʋ ˈmö wa gaa. (Ézéchiel 4:6)
5. ˈTɛɛnɩ 1914 a ˈylʋba ˈmö, ˈpɩwʋ a ˗lii yɛ ˈmö zigbonɩ
Zezwii ˗kä ˈkämanɩɲɔ ˈzʋ ˈwë a sɛɛ ˗lii ˈkä ˗wʋ, ɔ bhïla yɩ wɛlɩɩ. Zɛlɩ Lwiikö 21:9-11 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗Lii ˗yɩɲɩ wɛlɩɩ gbɛlɩ ˈlɛ bhïlaa, yɩ glaˈmö a ˗mi ˗n ˈyɩ ɔ ˈylɩmö ˗yɩ ˈwlʋnɩ ɔ tɛkäsɛ ˈyli ˈnɩ?
ˈPɩwʋ ˗kä ˈyli bhɩɛ yi a ˈtɛɲɩ ˈmö, sɛɛ nɩkpa ˈkää ˗wʋʋ, Zezwii a tietieɲɔ Pɔɔlʋ ˗sɛsɛnɩ yɩ wɛlɩɩ ˈmö. Zɛlɩ 2 Timotee 3:1-5 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Nɩkpa a nʋnʋli ˈlɛ ˈwuë wa zɛlɩɛ a dɔˈwʋ, ˈsaa ˗n köbha ɔ zɩˈɛ ˈyli ˈnɩ?
6. Lagɔ ˈa ˈKämanɔɔ kä wʋ ˗kaɲɩ ˗mä ˈsunɩ ˗a ˈkä ˗lu nʋ
Zɛlɩ Matie 24:3, 14 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
Libho a ˗mu kä ɔ dɛsɛ ˗wʋ tula ɔ nɩɩ Lagɔ ˈa ˈKämanɔɔ yɛ ˗tiamö tɛɛ ˈnɩ?
Sɛɛ ˗n bhɛnɩ ɔ ˗n ˈkä libho ˈla nʋmö ˈnɩ?
Lagɔ ˈa ˈKämanɔɔ yɛ tɛɛ ˈn wʋ yiaˈa ˗pa dʋdʋkpäta ˈwuë ˗gömö ˈkämanɩ. Zɛlɩ Ebleewaa 10:24, 25 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
“ˈPɩwʋ a ˈylibhɩɛtɛɲɩ ˗ɛ yɛɛ ˈdio ˈwë” a za, ˈsaa ˗a ˈkä ɔ ˗bhʋlʋbhlʋ nʋ ˈnɩ?
˗Lu a ˗mu ˗n ˈkää nʋ nzɩ ˗n ˈkä nɩkpa kwänɩ wa ˈkä ˈpʋpʋɛ ghlɩ, ˗n ˗kɩɩ yii, sɛɛ ˗n ˈkä ɔ ˈzʋ ˈnɩ?
˗MƆMƆƆ ˗KAMÖ NIMÏ ˈYƖBHÄ NƖƖ: “˗Yɩ kä ɔ ˈŋlɩ ˈn Zoova ˈa Bhlɩnɩwaa nʋ ɔ nɩɩ 1914 a ˈylʋba dɛsɛ a kää ˈnɩ?”
Sɛɛ ˗n ˈkä ɔ gbä ˈnɩ?
DƐSƐKÄKÏBHÏ
˗Lii ˗yɩ ˈkää ˈyli ˈwlʋnɩ ˗yɩɲɩ wɛlɩɩ Biblë bhïla, ˈtɛɲɩ ˗ɛɲɩ ˈmö ˗lii ˈplɩɛ bhʋlʋbhlʋ ˈwʋ, ˈn pɩwʋ nɩ ˈwʋ a ˗lii ˗a yɩɛ ˈylɩmö, yɩ tula nɩɩ Lagɔ ˈa ˈKämanɔɔ yɛ ˗tiamö tɛɛ. ˗A ˗kä lagɔwɛlɩɩ biaa, ˗a ˗käˈɛ ˈwluyɩbhäyɩbhɩ ˈwʋ mö, ˗a tula nɩɩ ˗a kä ˗tiamö Lagɔ ˈa ˈKämanɔɔ a wɛlɩɩ dlɩ ˈwʋ.
ˈWʋligbanɩkïbhï
ˈYlʋbö ngbiˈsɔ ˗kpɔ a wɛlɩɩ Daniɛlɩ a ˈbɔgʋʋ bhïlaa, yɩ bhɩɛɛ ˈwë, ˈsaa ˈplɩ ɔ ˈwʋ ˈnɩ?
˗Yɩ kä ɔ ˈŋlɩ ˈn ˗n kɩ ɔ dlɩ ˈwʋ nɩɩ Lagɔ ˈa ˈKämanɔɔ, 1914 a ˈylʋba ˈmö ˗lɛ wʋ tɛɛ ˈnɩ?
Sɛɛ ˗n ˈkä ɔ tula nɩɩ Lagɔ ˈa ˈKämanɔɔ yɛ tɛɛ ˈnɩ?
YILII YƆWƲ
Tɛɛnɩ 1914 a ˈylʋba ˈmö a ˈsaa plɩɛ ˈwʋ, sɛɛ nɩkpa ˗mumuë ˗wa vɩɛ ˗lii ˈmö bhïla yɩ wɛlɩɩ, yɩlii yɔwʋ.
« Depuis quand ce déclin brutal ? » (Réveillez˗vous !, avril 2007)
Matie 24:14 ˈmö a wɛlɩɩ ˗yɩ ˈkää ˈyli ˈwlʋnɩ, zeli ˈmö ˈn sɛ yɩ zigbanɩɛ nɩkpɛ ˗bhlʋ a zɩkpa ˈmö ˗n ˈkɩ ˈylɩmö.
« J’aimais le baseball plus tout au monde ! » (La Tour de Garde no. 3 2017)
Sɛɛ ˗a ˗yi ɔ sɛ nɩɩ Daniɛlɩ ˈkïbhï 4 ˈmö a wɛlɩɩ, Lagɔ ˈa ˈKämanɔɔ a wɛlɩɩ ˈmö yɩ bhïlaa ˈnɩ?
ˈYlʋbö ngbiˈsɔ ˗kpɔ ˗yiɲɩ wɛlɩɩ Daniɛlɩ ˈkïbhï 4 bhïlaa, ˈsaa tula ɔ nɩɩ 1914 a ˈylʋba ˈmö yɩ bhɩɛ ˈnɩ?
a ˈCɩɛcɩɛkïbhë ˈlɛ ˈmö a dɛɛ wa ˈzʋä Yɩlii yɔwʋ, lagɔbɔgwɩɩ ˈsɔ ˗kpɔ wa ˈzʋä ˗lɛ, zeli ˈmö.
-
-
ˈSaa Lagɔ ˈa ˈKämanɔɔ ˈkä ɔ nʋ ˈnɩ?A nɩ ˗bhölɩ ˈkwädlɩnɩ!: ˗N yi sasɛ biblë ˈmö ˈnʋ
-
-
ˈCƖƐCƖƐKÏBHË 33
ˈSaa Lagɔ ˈa ˈKämanɔɔ ˈkä ɔ nʋ ˈnɩ?
Lagɔ yɛ a˗a ˗pa ˈɔ ˈKämanɔɔ sɛ ˈgïla ˈwë. Ɔ yiaˈa ˗pa ˗lii a ˗bɛ ˈmö zigbanɩ mäˈä dʋdʋ ˈwʋ. Lagɔ ˈa ˈKämanɔɔ ˗kä ˈtɛɛ, ˗li a ˗lii wʋ ˈkää ˗lɛmö, ˗a nɩ ˈyiɛ ˗ka ˈylɩmö.
1. Lagɔ ˈa ˈKämanɔɔ yi ˈtɩɩglɩglɛ ˈn ˈmözlɔnɩzlɔnɛ ˗lɛmö
Lagɔ ˈa ˈKämanɔɔ a ˈkämanɩɲɔɔ Zezwii, ɔ yi ˈkpʋkpʋwaa ˈwuë ˗ɲɛ nɩkpa a ˈkämanɔɔ ˈsɔ ˈyli bhɩa ˗mä Amagedɔɔ a tʋ ˈmö. (ˈYlimötulanɩlii 16:14, 16) ˗Lɛ a ˈtɛɲɩ ˈla ˈmö, wɛlɩ ˈlɛ Biblë bhïla a˗a ˗lɛ yɩ ˈkää ˈyli ˈwlʋnɩ, ˗yɩ nʋä nɩɩ: “˗Lɛ ˈnaa ˈkäa ˈmö gwälɛ, ˈkpʋkpʋwa ˈnaa ˈkäa ˗bhölɩ.” (Psaume 37:10) Lagɔ ˈa ˈKämanɔɔ ˈmö Zezwii ˈkää ˈmö ghlɛnɩ ɔ ˈkä ˗mä dʋdʋkpäta a këtiea ˈwuë ˈwʋ ˈtɩɩglɩglɛ ɲɛ ˈmözlɔnɩzlɔnɛ ˈsɔ saa ˈwuë mlɩmanɩ.—Zɛlɩ Isaïe 11:4 ˈmö.
2. Nɩkpaa ˈwuë ˗kä mäˈä dʋdʋ ˈwʋ ˈsaa Lagɔ yɩbhää nʋʋ, sɛɛ zɩkpaa ˈkä ɔ ˗wʋ ˈnɩ?
Lagɔ ˈa ˈKämanɔɔ a ˈtɛɲɩ ˈmö, “˗wa nʋä ˈsaa nɛnɩɛ Lagɔ dlɩ yɔwʋ mʋa ˈkää dʋdʋkpäta ˗kälɩ, ˈn wa yea ˈkwädlɩkwädlɩnɩ ˈklʋ ˗bhölɩnɩ.” (Psaume 37:29) Nɩkpaa ˈwuë ˗kä ˈsaa Lagɔ yɩbhää nʋʋ, wa ˗kä Zoova ˗waa ˈn wa ˗kä ˗wawanɩɩ, sɛɛ ˗lii ˈkää ˗wʋ, ˈpaniɛ ˗ka dlɩ kɛ! Gu ˈnaa ˈkäa nɩkpɛ ˈlɩbhä, ˈn nɩkpaa ˈwuë yi ˈkwädlɩkwädlɩnɩ ˗bhölɩ.
3. ˈKpʋkpʋwaa ˈwuë ˗kä ˈyli bhɩɛ ˈwë, ˈsaa Lagɔ ˈa ˈKämanɔɔ ˈkä ɔ nʋ ˈnɩ?
ˈKpʋkpʋwaa ˈwuë ˗kä ˈyli bhɩɛ ˈwë, Zezwii yi ˈkämanɩ ˗këë ˈylʋbö a 1.000. ˗Lɛ a ˈtɛɲɩ ˈla ˈmö, Zezwii ˗ɲɛ nɩkpa a 144.000 ˈsɔ, wa yi mäˈä dʋdʋ ˈwʋ a nɩkpa kwänɩ nzɩ wa ˈkä nɩkpa a ˗muë ˈnɩɛ ˗maa yɔwʋ ˗kä ˈzʋ. ˈYlʋbö a milɩ ˗bhlʋ ˈla ˗kä bhɩɛ, dʋdʋkpäta ˈwuë yi ˈbhlɩ a ˗bhlɩɩ ˈzʋ. Nɩkpa ˗wa ˈkaa ˈklʋ ˗bhölɩnɩɩ, sɛ wa zʋä Zoova ˈa gböö ˈklʋkpamö a za, wa yi ˈmäna ˈmö ˗wʋ. Miˈla ˗kä ˈplɩ ˈwë, ˈKämanɔɔ Zoova ˈɲɛ a˗a Zezwii, Zezwii yoɲɩ ˈwʋ ˈsɔ yowʋ ˈɲɛ. Yɩ ˗kä ˗sɩbhä ˈwʋ ˈplɩ ˈwë, nɩkpaa ˈwuë yi ˈkwädlɩkwädlɩnɩ Zoova ˈa ‘ŋlɩɩ ˈghlimanɩ.’ (Matie 6:9, 10) Yɩ yi tula nɩɩ, ˈkämanɩɲɔ a ˗nɔ a ˗nɔ ˗ɔ ˈzʋnɩɛ ɔ ˗nʋa ˈyli, ˈmö Zoova glɩnɩɛ. Zoova yi Sataa ˗ɲɛ ˈɔ zuzukuzokuu ˈsɔ ˈyli bhɩa. ˈN nɩkpaa ˈwuë ˗wa tlinɩɛ ˈɔ ˈKämanɔɔ kplɩ sɛ, ɔ yua ˈyli bhɩamö. (ˈYlimötulanɩlii 20:7-10) ˗Li a ˗lii Lagɔ ˈa ˈKämanɔɔ ˈkää ˗lɛmö, ˗lii a ˗mi ˈnaa ˈkää ˈkwädlɩkwädlɩnɩ ˈyli bhɩɛ ˈmö yɩ ˈkää glɩnɩ.
ˈCƖƐ ˗LII ˗MIMII
˗Lii ˈwuë Biblë gbää ˗yɩ ˈkä zɩkö ˈyli ˈwlʋnɩ, ˗yɩ kää ˈŋlɩ ˈn ˗a kɩɛ dlɩ ˈwʋ nɩɩ Lagɔ yi ˈɔ ˈKämanɔɔ ˈmö ghlɛnɩ nzɩ ɔ ˈkɩ ˈyli ˈwälanɩ, ˈyi ˈylɩmö.
4. Lagɔ ˈa ˈKämanɔɔ yi nɩkpaa ˈa ˈkämanɔɔ ˈyli bhɩa
“Dɛɛ nɩkpɛ ˈkämanɩɛ ɔ ˈlilɛ ˗gömö, ˗lizoku a ˈyize ɔ nɔɔ ˈwlu.” (Ecclésiaste 8:9) Nza Zoova ˈkää ˈɔ ˈKämanɔɔ ˈmö ghlɛnɩ nzɩ ɔ ˈkä ˗ɔɔˈmözlɔnɩli ˈla sɛ ˗sɛ.
Zɛlɩ Daniel 2:44, ˈn 2 Tesaloniikö a ˗nʋa 1:6-8 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
Zoova ˗ɲɛ ɔ yowli Zezwii ˈsɔ, ˈsaa wa ˈkä ɔ nɩkpaa a ˈkämanɔɔ ˗ɲɛ ˗wa ˗wʋä ˈkämanɔɔ a ki ˈla nimï ˈsɔ ˈwlu nʋ ˈnɩ?
ˈSaa ˗n ˈcɩɛ dɛˈɛ a dɔˈwʋ, ˗yɩ kä ɔ ˈŋlɩ ˈn ˗n kɩ ɔ dlɩ ˈwʋ nɩɩ, ˈsaa Zoova ˗ɲɛ Zezwii ˈsɔ ˈkää nʋʋ, ˈmö yɩ ˈkää zlɔnɩ ˈn yɩ ˈnaa ˈkä ˗bi ˈmö ˗kä ˈnɩ?
5. ˈKämanɩɲɔ a ˗nɔ a ˗nɔ ˈmö Zezwii glɩnɩɛ
Zezwii ˗ɔ glɩnɩɛ Lagɔ ˈa ˈKämanɔɔ a ˈKämanɩɲɔɔ, ɔ yi mäˈä dʋdʋ ˈwʋ a nɩkpaa kwänɩ ˈki a ˗bɛ ˈmö. ˈZʋ ˗lɛ VIDEO ˗n ˈki ˈylɩmö nɩɩ, Zezwii yɩbhä ɔ ˈkä nɩkpaa kwänɩ ˈn Lagɔ ˈɲɔ ˗lɛ a ˈmötɛɛnɔ ˈla.
Dɛɛ Zezwii ˗wʋ a˗a mäˈä dʋdʋ a ˗lii ɔ nʋä, mii tula ˗lii Lagɔ ˈa ˈKämanɔɔ ˈkää nʋ. ˈƝupälɩ ˗yɩ ˗wʋä dɛˈɛ zɛmö, yɩ glaˈmö a ˗ni ˗mi ˗n yɩbhä ɔ ˗n ˈkä ˈylɩmö ˈnɩ? Biblë a gbɛlɩ wa ˈzʋä ˗lɛ, zeli ˈmö.
DƐƐ ZEZWII ˗WƲ A˗A MÄˈÄ DƲDƲ ˈWƲ...
ZEZWII YI ˗MÄ ZLƖ ˈMÖ ˗WƲ, ˈN Ɔ YI...
ɔ bhɛnɩ a˗a ˈpɩwʋ a ˗lii a ˈmötɛɛnɔɔ ˗gömö.—Maakö 4:36-41.
˗lii ˈwuë wa ɲima mäˈä dʋdʋ ˈwʋ ˈwlu gïganɩ. —Isaïe 35:1, 2.
ɔ lia a˗a zɩzɛsɛ nɩkpa a mila a ˗bɛ. —Matie 14:17-21.
ŋɔmʋ ˈyli bhɩa.—Psaume 72:16.
ɔ yɛmanɩ a˗a guzuwa a ˗bɛ. —Lwiikö 18:35-43.
gbä nɩkpa ˈwuë yi ˈmö nɛnɩ ˈtɩɩ.—Isaïe 33:24.
ɔ gäla a˗a ˗wa yɛɛ ˈku ˈwë. —Lwiikö 8:49-55.
ˈkwie sɛ ˗sɛ.—ˈYlimötulanɩlii 21:3, 4.
6. Lagɔ ˈa ˈKämanɔɔ yi gbä zɩkpa yi teɲii ˈmäna ˈwʋ ˗bhö
ˈSaa Zoova gbä a˗a ɔ ˈkä nɩkpa ˈɲɛ ˈmö Lagɔ ˈa ˈKämanɔɔ ˈkää ˈyli ˈwälanɩ. ˈN wa yi ˈkwädlɩkwädlɩnɩ mäˈä dʋdʋ ˈwʋ ˗bhölɩnɩ, ˗mä ˈbhlɩ a ˗bhlɩɩ ˈmö. ˈZʋ ˗lɛ VIDEO nzɩ sɛɛ Zoova ˗wʋä ɔ yowli Zezwii ˈmö ghlɛnɩ dɔˈwʋ ɔ ˈkä ˈsaa ɔ yɩbhää ˈyli ˈwälanɩ, ˗n ˈkɩ ˈylɩmö.
Zɛlɩ Psaume 145:16 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗N yɩbhlɩnɩɛ sɛ nɩɩ, ‘ˈsaa ɲɛpɛɲɛpɛlii ˈwuë yɩbhää Zoova yuaɲɩ ˈɲɛ,’ ˈsaa yɩ nʋmö ɔ ˈwlu ˈnɩ?
NƖKPA ˗MUMUË LƐ NƖƖ: “˗A ˈwuë ˗a ˗kä libho ˈgämö nʋnɩɩ, ˗a bhɛnɩ ˗a ˈkä ˈpɩwʋ a yɔlɔylʋ ˈwuë ˈyli bhɩa.”
˗Lii a ˗mi Lagɔ ˈa ˈKämanɔɔ ˈkä ɔ nʋ, nɩkpaa ˈa ˈkämanɔɔ ˈnɩ ɔ bhɛnɩ ˈnɩ?
DƐSƐKÄKÏBHÏ
ˈSaa Lagɔ yɩbhää, ˈmö ˈɔ ˈKämanɔɔ ˈkää ˈyli ˈwälanɩ. Wʋ yi dʋdʋkpäta ˈwuë ˈbhlɩ a ˗bhlɩɩ ˈwʋ ˈzʋa. ˈN nɩkpaa a ˗muë ˈkää ˈkwädlɩkwädlɩnɩ Zoova bʋbɔɔ, mʋa ˈkaa ˈklʋ ˗bhölɩnɩ.
ˈWʋligbanɩkïbhï
Sɛɛ Lagɔ ˈa ˈKämanɔɔ ˈkä ɔ Zoova ˈa ŋlɩɩ ˈghlimanɩ ˈnɩ?
˗Yɩ kä ɔ ˈŋlɩ ˈn ˗a ˈkɩ ɔ dlɩ ˈwʋ nɩɩ, wɛlɩɩ ˈwuë Biblë bhïla a˗a Lagɔ ˈa ˈKämanɔɔ yi ˈyli ˈwälanɩ ˈnɩ?
˗Li a ˗lii ˈwuë Lagɔ ˈa ˈKämanɔɔ ˈkää nʋʋ, yɩ glaˈmö a ˗nu ˗mu ˗n yɩbhä ɔ ˗n ˈkä ˈylɩmö ˈnɩ?
YILII YƆWƲ
Wa ˗kä Amagedɔɔ nʋʋ, sɛ yɩ sɛ ɔ zɛmö ˈnɩ?
« Qu’est˗ce que la bataille d’Armaguédon ? » (Ɛtɛnɛtɩ ˈklʋ a ˈcɩɛcɩɛkïbhë)
ˈSaa Zezwii laa ˈˈzwɩzize ˈkädɛɛˈˈ a ˈtɛɲɩ ˈmö a -lii -yɩ ˈkää ˈwʋ ˈplɩɩ, ˈyi ˈylɩmö.—Matie 24:21.
« Qu’est-ce que la grande tribulation ? » (Ɛtɛnɛtɩ ˈklʋ a ˈcɩɛcɩɛkïbhë)
ˈLigbë ˗bhlʋ ˈmö a ˗nʋa, sɛɛ ˈwa zɩkpa ˈkää ˗wʋ ˗mä ˈbhlɩ a ˗bhlɩɩ ˈmö a sɛ wa ˈpäniɛ dlɩ kɛ, ˈyi ˈylɩmö.
˗Mä ˈKïbhëa ˈlɛ ˈmö, ˗a nʋä « J’étais tourmenté par de nombreuses questions », sɛɛ politikönɩkpɛ ˗bhlʋ ghlɩɛ kïbhï ɔ ˈyɩbhänɩ a˗a ɔɲɩ ˈwʋ a zɛmösɛna, ˈyi ˈylɩmö.
« La Bible transforme des vies » (La Tour de Garde, 1er janvier 2012)
-